مهتم بقراءة مجلة ريدرز دايجست الامريكية العريقة وجمعت من نسختيها الانجليزية والعربية عشرات الاعداد القديمة وهي مجلة جميلة جدا تتطرق لموضوعات حيوية شديد باختصار ومتعة وفايدة ... في النسخة الامريكية وفي احد اعداد السبعينات لقيت موضوع بيتكلم عن مكافحة الغلاء وبيذكر افكار عملية بسيطة زي مثلا قال : * الدواء ما شرط يكون نفس المكتوب ليك من الطبيب ويمكنك استخدام البديل وهناك بدائل تتكون من نفس المكونات بتاعة الدواء الاصلي ومافي اي داعي تخسر قروش كتيرة في شراء دواء بتاع شركة كبيرة وعريقة في حين ممكن تشتري بديل بنفس المكونات بثمن اقل كتير...تسال صيدلي من معارفك عن البديل الفعال ذو نفس المكونات عشان يمكن الصيدلي الموجود في الصيدلية ما يدلك على الحتة دي عشان يبيع الدواء الاصلي الغالي بتاعو...
* ذكر تاني مثال يمكن هنا ف السودان ما موجود لكن نذكره من باب الفايدة للناس البره السودان...بيقول انو البنزين ذو الكفاءة العالية - 95 كما يسمى في السعودية - ما بتستفيد منه اي شي لو عربيتك جديدة...فكونك تشتريهو بس بتخسر نفسك قروش زيادة وممكن تكب بنزين عادي
* في نقطة بيقوليك اقرا كاتلوج العربية كويس فربما تلقى نصايح كتيرة عن كيفية توفير الوقود وربما تجد بعض الاعطال وطريقة اصلاحها بنفسك دون الحوجة الى ميكانيكي .
وهكذا مقال مليء بافكار عملية بسيطة وكتيرة قد تساهم في توفير بعض المال....
فكيف نحنا في السودان نقدر نبدع افكار زي دي تتناسب مع واقعنا وتقلل لينا الصرف وتخفف على المواطن البسيط اعباء الحياة ؟
الاخ احمد سيد احمد ما يميز السودانيين انهم يؤمنون بالتكافل الاجتماعي المباشر والاسرة الممتدة فهذه خففت قليلاً من حدة الغلاء ولكنها ليست بحل لأنها حلول مؤقته والحل : أما ان تجوع الناس وتزهد في الحياة أو سيصيبهم فقدان للعفة ولا اعني هنا عفة المرأة يعني اشكال الناس البتطلب العون تغيرت كثيراً ويبدو من ثيابهم أنهم كانوا في بحبوحة واصبح ليس من الغريب ان تدخل عليك امرأة سودانية في بيتك وتطلب مساعدتك والاطفال صاروا يدقون الابواب طلباً للعمل او افطار كما اني وجدت امرأة عجوز تنام على الرصيف امام بيتي عند صلاة المغرب وهي متسخة وخاوية المعدة كل ما رويته اعلاه عشته شخصياً موجة الغلاء اجبرت الناس للتسول وزادت في حدة الفقر
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة