|
كتب الكاتب الفاتح جبرا المتوفرة بمعرض الدوحة
|
|
 Re: مافى اى موضوع (Re: عمر نملة)
|
ووالدته عواطف النصري...سكنوا جيراننا بالحيطة زيادة من 20 سنة..الله يرحم حاج عبد العزيز..وحاجة عواطف...والبركة في اولادهم...اتذكرك يا نصري ونحن صغار ابان زياراتكم ناس بيت المال..وكمية الترابط الاسري..وفرح حاجة عواطف ربنا يرحمها..كانت رطبة اللسان والقلب..طيبة منقطعة النظير..هي واخواتي وبنات الجيران اسسن دار الصلاة على الرسول صلى الله عليه وسلم..تواصلت وعزيت طارق ومجدي وعادل ودفع الله وتهاني واماني وهنادي ...شجرة طيبة ...
شيخ الصائم ديمة كان لا يحط رحاله الا في هذا المنزل فيملا كل الجوار امن...
| |
 
|
|
|
|
|
|
|
|
Re: مافى اى موضوع (Re: عمر نملة)
|
اهلا و سهلا اخ عمر
نعم طارق عبدالعزيز ابن شقيقتى عواطف امين ربنا يرحمها.
اظنك تحكى عن فترة اقامتهم فى مدينة ودمدنى من منتصف السبعينات الى
2006
اسرة عبدالعزيز سكنوا فى منزلين فى بانت
الاول قريب من صينية مدخل مدنى و الثانى قرب بيوت فى بانت المعلمين فى مواجهة شارع الخرطوم مدنى.
البيت الثانى كانوا جيران لناس الجزار ، حسن و اديب و ملاصق لبيت عادل عبشين.
| |
|
|
|
|
|
|
|
|
Re: مافى اى موضوع (Re: النصرى أمين)
|
كانت هناك حساسية غير مرئية بيننا (أولاد أمدرمان) واولاد مدنى، نوع من المنافسة، اولاد مدنى عندهم نوع من الغيرة مننا ، كنت الاحظها عندما أسأل واحد منهم هل تذهب للخرطوم ؟، بدون وعى يرد على بانه يتضايق جدا عند ذهابه لها وانه يكره الزحمة و الفوضى و الوسخ و السخانة وانه لا يطيق البقاء فى الخرطوم يوما واحدا ..
طبعا الكلام ده كله ونحن اطفال و فيه نوع من المصداقية.
الحاحة التانية كنت بكاوى أولاد مدنى انهم عندهم لهجة فى كلامهم مثلهم مثل أولاد الأقاليم و عندما يسألوا عن الدليل اقول لهم انتو تقول كلمة مثل
احمد قرا فى جامعة الخرطوم ، تنطقون كلمة قرا (بفتح القاف ) بكسر القاف لتنطق قيرا ...كنت اضحك. ..
ايام ان تنسى ابدا
| |
|
|
|
|
|
|
|
|
|
Re: مافى اى موضوع (Re: النصرى أمين)
|
وفى موضوع اكتر من القومبلة دى.
الف مرحب بيك يا النصرى مرة اخرى والمنابر نورت.
الظاهر موعودين بقفشاتك اللطيفة التى تذهب الحزن.
| |
|
|
|
|
|
|
|
|
|
Re: مافى اى موضوع (Re: Abureesh)
|
اهلا محمد عثمان
بالله لسه ناس سودانيز انلاين القدام قاعدين ؟ انا افتكرت الحفلة اتفرتكت و كل *قرد* طلع شجرته .
فى 2006 كنت افتح المنبر قبلما اخش الحمام لمن اصحى من النوم . كانت مرضة عجيبة و ادمان يفوق تأثير الكوكايين .
لدرجة انى اصدرت اكتشافى الاول عن (القيمة المنبرية) وهى قيمة اسهم عضو المنبر التى تزيد و تنقص على حسب ما يكتب .
تذكر ايام الهاكر ؟ و الهجوم اليومى على الموقع و كيف تصدينا له ؟
تذكر لمن بكرى قفل المنبر وحرد ، قمنا انا وانت بإنشاء منبر احتياطى للخروج من الأزمة. .
ايام والله
| |
|
|
|
|
|
|
|
|
|
Re: مافى اى موضوع (Re: النصرى أمين)
|
تعرف يا عمر
انا متابع باهتمام الحاصل فى الولايات المتحدة بخصوص قوانين حمل السلاح و ترخيصه و كيف ان هناك تيارين كل واحد اقوى من الثاني، الاول التيار الذى يدعو الى السماح لكل أمريكى بحمل السلاح بقيادة جمعية البندقية الوطنية NRA و هى لوبى سياسى و اقتصادى مهول ،أعضاء الجمعية مئات الملايين من الأمريكان وهى جمعية محافظة قريبة جدا من الحزب الجمهورى و الرئيس ترامب وتدافع بشدة عن بند الثلنى فى الدستور يسمح للناس بالدفاع عن أنفسهم و ممتلكاتهم.
فى الجهة الثانية باقى الشعب من ديمقراطيين و ليبرال و طلبة و غيرهم.
الصراع ده مرير جدا و كل جهة لها أسباب مقنعة جدا و منطقية.
حادثة الحرامى تلك لازالت تترك أثر فى نفسى رغم مرور اكثر من ثلاثين عام ، اى انسان له الحق فى الدفاع عن نفسه و لكى يفعل ذلك يحتاج للسلاح النارى.
لو كان عندى مسدس فى تلك اللياة كنت شت الحرامى ده فى راسه
| |
|
|
|
|
|
|
|
|
|
Re: مافى اى موضوع (Re: النصرى أمين)
|
مرحب يا النصري بعودتك لدارك ونحن ضيوفك
توقفت عند رغبتك المتأخرة في شوتة الحرامي داك في راسو
وبديت افكر في ظاهرة الحرامي
من هو الحرامي في ذلك الزمان؟
كيف كنا ننظر إليه كـ "شيء" أسطوري!!
وليه كان بيلجأ للنط في البيوت
وإذا كان محتاج، هل كان بيعتبر السرقة أشرف من مد يده للناس؟
مش عنوان البوست "مافي موضوع" ، حبيت أعمل موضوع جانبي
بعد أن كبحت رغبة قوية في فتح بوست خاص بالموضوع
لعدة أسباب.
| |
|
|
|
|
|
|
|
|
|
Re: مافى اى موضوعه (Re: معاوية الزبير)
|
اهلا و سهلا معاوية
بصراحة ما عارف اذا انا فعلا قدر تلك الرغبة الملحة بشوتة الحرامى فى راسه !!! هل فعلا عندى المقدرة على الضغط على الزناد و قتل انسان لمجرد انه تلب بالحيطة و سرق ساعة يد كنت املاها كل يوم حتى تواصل العمل ،هل كمية الغضب بداخلى كافية لإنهاء حياة انسان !!
انا متأكد تماما ان ذلك الحرامى in particular غير مسلح و انه لم يقصد إيذاء احد ، متأكد تماما ان قمة طموحاته تلك الليلة المهببة ان يسرق بضع ساعات ولو كان محظوظ بضع جنيهات وضعها صاحبها تحت المخدة ونام .
هو حرامى على قدر حاله ، رأسماله ملابس داكنه لاصقه بجسمه و مقدرة على القفز فوق الجدران.
تعاطفى مع جماعة حمل السلاح فى أمريكى نابع فقط من لحظات الرعب التى عشتها وانا ارى الحرامى يقف فوق رأسى.
| |
|
|
|
|
|
|
|
|
|
Re: مافى اى موضوعه (Re: النصرى أمين)
|
اهلا أبوبكر
والله سعيد جدا انك اخو عادل و بسال عنه و ماعارف حاصل عليه ، بالرغم انة نسيت معظم شخصيات تلك الفترة الغنية بالأحداث.
وصفك للحادثة دقيق جدا ، لمن صحيت لقيت الحرامى فوق راسى ، هجمت عليه و بدا الجرى و تلب فوق الحيطة التى تفصل بين بيت عبدالعزيز و بيتكم ، لم استطع التليب خلفه لسببين ، الاول انى جهامة و صعب جدا اتلب فوق حيطة علوها متر و ثانيا الدنيا ليل ولا يصح ان اتلب بيوت الناس وهم نيام .
لكن عملت the next best thing ..وقفت فى راس الحيطة و بديت اكورك بصوت جهورى .الحرامى يا عادل ..يا عادل الحرامى؛
كنت أرى الحرامى يتلب الحيطة تلو الحيطة حتى وصل الحيطة السابعة وفى كل تليبة اصرخ يا عادل اصحى الحرامى.
غالبا الحرامى نفسه يكون اعتزل المهنه بعد تلك التجربة المريرة و المجهود الحبار فى القفز فوق 7 حيطان طوال .
هذه الحادثة تمر بخاطري كل مرة أشاهد الأخبار الأمريكية والجدل الدائر حول قوانين حمل السلاح .
| |
|
|
|
|
|
|
|
|
|
Re: مافى اى موضوعه (Re: النصرى أمين)
|
Quote: السرقة في السودان زي ما قال ليك معاوية
جزء من الاجتماعية الاشتراكية |
صديقي إلى الأبد أبوبكر عباس
يا ريت بالله و.. زي ما بقولوا المثقفين ناس أستاذ حاتم الياس
تحفر لينا في الحتة الـ في المقتبس دي
أنا دايره في رأسي الفكرة لكن ما قادر انزلها كتابة
---
عندنا في البلد (الجزيرة مقرات) حرامي فد واحد
معروف ومافي زول بسأله إلا لما تكون السرقة كبيرة
بقيمة 2 جنيه مثلا (الكلام ده في السبعينات)
عادة بسرق حاجات خفيفة يبيعها ويمشي يسكر بقروشها
المثال ده ما بعيد من الفكرة الرئيسية بتاعتي لكنه ليس في عمقها
| |
|
|
|
|
|
|
|
|
|
Re: مافى اى موضوعه (Re: معاوية الزبير)
|
عودا جميلا النصري
وضيوفك
معاوية الزبير وصديقه الابدي
مولانا عبدالباقي سعد من الائمة الثوريين والمصادمين وهو معلم سابق .. كنت قاعد معاهو وجاهو عمنا فلان المشهور بخدمة المقابر من توفير الموية والتراب للضانقيل وتوفير الكهربا تطوعا فرديا منه . ومتابع المقابر والاهتمام بها
جا قال لي مولانا
بجيني زول يديني قروش انزل تراب ولا أكب موية للمقابر . وانا بكون مفلس وحق الخضار ما عندي في بيتي ممكن اتصرف منهم
قال ليهو وانا شاهد
فتوي مني ليك واسأل منها شيل طوالي . شرطا علي مقدار حوجة اسرتك
و
احسن اسكت
| |
|
|
|
|
|
|
|
|
 Re: مافى اى موضوعه (Re: Faisal Saad)
|
عودة لموضوع البوست "مافي موضوع " و عطفا على مداخلة الأخ الفاضل معاوية الزبير،، انا اعتقد متيقنا و مؤمنا و مصدقا، أنه أي حرامي ينط في بيت يجب إطلاق النار على رأسه في الحال..
| |
|
|
|
|
|
|
|
|
|
Re: مافى اى موضوعه (Re: Faisal Saad)
|
الذاكرة دي يا فيصل سعد، غريبة خلاص،
الغريب العادي دائماً يرسخ في قلوب وعقول أهل الدار،
خليك من زول عندو كاريزما زي النصري،
الزول دا صحي قعد معانا بمدني سنة واحدة، لكنو كان مميز وعندو حاجتو،
دجل ناس أم درمان
أول مرة كان أشوف لي زول عندو خطة لدخول الجامعة،
حتى الكلية الكان داير يدخلها لم أسمع بها في ذلك الوقت،
زايد انو أنا زول باهت جداً لا أرسخ في عقول الناس قبل أختراع بيل غيتس للتواصل عبر الكتابة،
زول باهت زي غرونوي الفي رواية العطر
ممكن أمر جنبك وما تشوفني
زول لا رائحة له
لكن بكون وأنا قاعد جنبك شفتا سفنجتك مسحوكة من ياتو جهة وعرفت مشيتك بتكون ن ك
| |
|
|
|
|
|
|
|
|
|
Re: مافى اى موضوعه (Re: أبوبكر عباس)
|
لكن بكون وأنا قاعد جنبك شفتا سفنجتك مسحوكة من ياتو جهة وعرفت مشيتك
ــــــــــــــــــــ
ياباهت ، كان عندي رغبة اتعرف بيك يوما ما غير الاسافير
لكن كدا صرفت النظر ، جني والناس بتاعة الشكليات ، النوع
البعاين ليك من فوق لتحت دا دايما سطحي خالص
| |
|
|
|
|
|
|
|
|
|
Re: مافى اى موضوعه (Re: النصرى أمين)
|
نرجع لموضوع (البهتان) واعتراف ابوبكر انه زول باهت ...
عزيزى ابوبكر ..عندما تتحدث عن البهتان فانا اكتر زول باهت فى الدنيا , استمرت حالة البهتان هذه طوال فترة الدراسة فى
المرحلة الاولية , كنت باهت لدرجة الخوف , والحمدلله لم اكن وسيما , لان الوسامة مع البهتان مع الخوف تدخل صاحبها جحر ضب.
المهم ,,, اذكر مرة وانا فى الصف الخامس الابتدائى , زميل فى الفصل قال لى ( كبير كده و بتخاف ؟) الجملة دى كانت زى جرس الفطور , مدوية جدا ,
وتركت اثر عجيب , بعد تفكير عميق قررت التخلص من البهتان وزى ما بقولوا الامريكان السود Fu""k that sh"t كفاية بهتان .
النسخة التى عايشتها للنصرى امين فى 1982 لم تكن النسخة الاصلية , كانت النسخة المنقحة , ولو استعملت مقدراتك فى الملاحظة كنت عرفت انك بتتعامل مع زول باهت
حد البهتان يغطى بهتانه بالصوت العالى وصناعة الفوضى ومحاكاة شفوت امدرمان
| |
|
|
|
|
|
|
|
|
|
Re: مافى اى موضوعه (Re: عبداللطيف حسن علي)
|
| Quote: النون والكاف ديل جن من وين؟ ما عارف! |
عودة النصري تستحق التهنئة
جيدا جيت والجايك يجيب عقابك
—-
يا مستنير
انت عارف انا بحبك
لو النون والكاف ديل
كانن نون وكاف
كنا شطبناك طوالي من كشف ابوقناية
وسجلناك عندنا ناس اب عصاة سيف
قول هيييييع
بعدين برضو كلم المصحح التلقائي يبدل سينكم
في منبسق الى ثاء
بكرة الجماعة يفتحوا بوست منبسق ويقولو المستنير داقي كفرها قال كده
بكره الجماعة يفتحوا بوست منبسق (وجه.....)
النصري جيدن جيت
عثل وبسكويت
| |
|
|
|
|
|
|
|
|
|
Re: مافى اى موضوعه (Re: عبدالله عثمان)
|
اهلا بالجمهورى العتيق عبدالله عثمان ..
شكرا على الترحيب , يبدو انه اخونا ابوبكر زول ما ساهل ,
فقط لاحظت من تعليقاتكم عنه انه مشاغب وليس باهت كما يدعى
| |
|
|
|
|
|
|
|
|
 Re: مافى اى موضوع (Re: سيف النصر محي الدين)
|
اهلا يا دكتور سيف
ياخ انا ساكن فى تويتر عديل , اتلقى كل معلوماتى من هناك .
ميزة تويتر انها مختصرة , امسك لى واقطع ليك .
ان شاء الله معاركم مع الكيزان فى البورد اسفرت عن شيئ !!!
غايتو وجودهم فى تويتر يكاد يكون معدوم , ما عارف دى حاجة كويسة ام كعبه !
| |
|
|
|
|
|
|
|
|
|
Re: مافى اى موضوع (Re: أبوبكر عباس)
|
ما دام الكلام جاب الكلام
خلوني أونسكم بواحد من أجمل الناس الالتقيت بيهم في حياتي
طارق عبد العزيز ود حاجة عواطف أخت النصري أمين النصري دا
والأشجار ليهو عمر نملة في مداخلتو الأولى الترحيبية في عمقها بالنصري،
طبعاً أنا معجب جداً بقصتي بتاعت ستاربكس، في القصة دي في شخصية جميلة جداً اسمها محجوب،
محجوب دا كونتو من شخصية طارق دا
طارق دا دفعتي في من رابعة ابتدائي السنة الرحلوا فيها من أمدرمان لمدني
اتذكر كنت جالس جمبو في الفصل
الاستاذ وزع ورق وقال كل زول يكتب أمنية حياتو
أنا كتب أن أكون قاضياً
تاوقت لطارق لقيتو كاتب بخطو الجميل داك:
أن أكون سعيداً
من اليوم داك ترصدتو ببهتاني المعروف لحدي ما فارقتنا الجامعة وهو سافر ليوغسلافيا
لو سمعته وهو يضحك؛ تكون سعيد لمدة يومين
كنزي ونوري رسول هون
| |
|
|
|
|
|
|
|
|
|
Re: مافى اى موضوع (Re: ناذر محمد الخليفة)
|
اهلا ناذر
شكرا على المرور الصامت ،يبدو انك تأثرت بظاهرة
البهتان التى استعرت نيرانها فى هذا المنشور (طبعا ثقافة الفيسبوك
قامت بتعريب كلمة بوست بمنشور)
حليل ايامك ..كنت تنزل بوست يوقف البورد ده على كراع واحدة .
| |
|
|
|
|
|
|
|
|
|
Re: مافى اى موضوع (Re: النصرى أمين)
|
وهذه صورة حديثة للمواطنين الكنديين طارق والنصرى فى صيدلية طارق فى مدينة لندن بمقاطعة اونتاريو كندا.
طارق فعلا حقق امنية طفولته بان يكون سعيد , طبعا السعادة والفلس لا يجتمعان , السعادة والقروش الكتيرة اصحاب وفرد
والدنقلاوى (وهذا لقبه لان جده لابيه دنقلاوى من دنقلا يرطن) مرتاح و مبسوط وله بنت وولد .
https://ibb.co/mY9DkS
| |
|
|
|
|
|
|
|
|
|
Re: مافى اى موضوع (Re: كمال عباس)
|
حمدالله على السلامة النصري الذي جمع بين الحسنيين أمدرمان والمؤتمر أما المعلومة الطلعت بيها من البوست ده أن المستنير إكس فرند من الجزيرة مقرات ياخ أنا قايلك من أمدر ياخ لو كدة رجع لي كتابي بتاع القرامطة 😂
| |
|
|
|
|
|
|
|
|
|
Re: مافى اى موضوع (Re: muntasir)
|
يا نصري، لسّ شباب عيني باردة
تحايا للصديق طارق
طبعاً يا أخوانا بيت ناس عبد العزيز الظهرة دا كان حكاية
لو أمدرمان دي هزمتنا نحن ناس مدني في الزمن داك في حاجة واحد،
تكون هزمتنا في التفوق الاجتماعي لهذا البيت
أنا قلت انو طارق دا أجمل زول لاقاني
لكن الكلام دا ما صاح
طارق تاني أجمل زول لاقاني
أجمل زول هو شقيقه الأكبر الحبوب مجدي عبد العزيز
ملك ملوك الاجتماعيات
يا نصري، في المنبر دا في بوست بديتو وما تميتو عن شقيقتك الراحلة حاجة عواطف أمين النصري
البوست اسمو:
كنزي ونوري رسول هون
| |
|
|
|
|
|
|
|
|
|
Re: مافى اى موضوع (Re: أبوبكر عباس)
|
تعرف بطريقتك دي يا أبكر الشين بكرة تجي تقولينا لا،، صديقك المفضل عادل عبد العزيز، الله يطراو بالخير، أو بعد بكرة تبقى النون و الكاف و كدا.. أركز يا مان، هههه
| |
|
|
|
|
|
|
|
|
 Re: مافى اى موضوع (Re: Faisal Saad)
|
قبل الترحيب بزوار البوست الكرام هناك خاطرة احب ان اسجلها قبلما تطش
لان لى ذاكرة نملة سكر من النوع الذى يستطيع التهام 450 شوال سكر و يدعى ان الكيزان اكلوها .
الانسان السودانى الاجتماعى المتواصل مع الناس يكبر و يعجز بسرعة هائلة، يبدأ شعره يشيب وهو فى الثانوي وفى سن الأربعين تظهر عليه تجاعيد الشيخوخة و الهرم و ارزل العمر ، عارف السبب شنو؟
السبب انو المجتمع السودانى لاحم مع بعضه البعض لحام الستالين و يمكن الأكسجين (صطلح اللحام أتى به طارق أثناء دراسته فى يوغسلافيا)
هذا النسيج الاجتماعى اللحامى المتماسك ينهك الشخص الاجتماعى و ينخر فى عظامه و يقصر من عمره.
لذا قررت قبل سنوات طويلة استعمال نفس الطريقة التى تخلصت فيها من البهتان وهى كفاية كفاية و fu*k that sh***t العمر واحد و قصير و لو تابعت اجتماعيات السودانيين حتخسر دينك و دنياك .
مجدى عبدالعزيز بسبب هذه المقدرة الاجتماعية الهائلة أصبح يبدو كانه عجوز شمطاء مع انى انه أكبر منى بسنة واحدة وفقط .
The more you control your social life the better off your life would be.
صديق لى رجع السودان بعد غيبة طويلة جدا ، واجه صعوبة شديدة فى التعرف على الناس، مرة ؛ فى الشارع و معه شقيقه ؛ قابلوا رجل عحوز ، متهالك ، لم يتعرف عليه صاحبنا ؛ بعد مجهود و شحذ للذاكرة ، تعرف عليه انه فلان صاحب البقالة وان ابنه كان يدرس معه فى المدرسة ؛ بهت الجميع و حل صمت قاتل ، الرجل العجوز ليس فلان صاحب البقالة ؛ الرجل العجوز المتهالك هو ابن صاحب البقالة و صديق و زميل زولنا العائد من الاغتراب.
أتخيل بس كمية الاحراج.
| |
|
|
|
|
|
|
|
|
|
Re: مافى اى موضوع (Re: النصرى أمين)
|
Quote: صديق لى رجع السودان بعد غيبة طويلة جدا ، واجه صعوبة شديدة فى التعرف على الناس، مرة ؛ فى الشارع و معه شقيقه ؛ قابلوا رجل عحوز ، متهالك ، لم يتعرف عليه صاحبنا ؛ بعد مجهود و شحذ للذاكرة ، تعرف عليه انه فلان صاحب البقالة وان ابنه كان يدرس معه فى المدرسة ؛ بهت الجميع و حل صمت قاتل ، الرجل العجوز ليس فلان صاحب البقالة ؛ الرجل العجوز المتهالك هو ابن صاحب البقالة و صديق و زميل زولنا العائد من الاغتراب.
أتخيل بس كمية الاحراج. |
هههه...
كامل التضامن مع صديقك الذي عاد بعد طول غياب..
ثلاثون عاماً أو يزيد على ما أظن!؟
يسقط اللحام المجتمعي أياً كان توصيفه ستليناً أو أكسجيناً..
نعم.. لزهرات عمر أكثر إيناعاً واخضراراً ...
ويحيا هذا الموضوع المافي...
المافي شنو كما يقول صديقنا الحاضر الغائب قيقراوي
| |
|
|
|
|
|
|
|
|
|
Re: مافى اى موضوع (Re: النصرى أمين)
|
يا شفيف فيصل، عماد طه داك دائرة تانية ليس له علاقة بناس فريق بانت.
النصري أنا الداهم بيتنا أكتر من مرّة ولهط ليهو جردلين لقيمات؛ نساني
في الزمن داك، النصري ابتدع لينا حاجة اسمها المداهمة الاسبوعية لشراب ساي المغرب
كان كل أسبوع بختار ليهو زول نداهمو في بيتو
قبل المداهمة بكلموك عشان تحضر المطايب.
شوف للمزيد من تحدي الذاكرة،
أنا في سنة البرليم بالبركس مشيت معهد الدراسات التجارية حضرت مع النصري دا محاضرة مسائية
وأتذكر معاهو صديق من أم درمان أصلع
أعتقد لحدي اربعة وتمانين كان بيننا تواصل وكنت أزور مجدي ببيت المال وعندي معرفة بكل أخوان النصري وتسيبهم حاتم
يا نصري، لا أعتقد سبب ظهور تقدم العمر لمجدي سببو الاجتماعيات
سببو صعوبة الحياة ومكابداتها بالسودان
زايد عامل مهم وهو من بنات تفكيري البيطري وهو
كفاية جسم الانسان من البروتين الحيواني
السودان دا مهما كان وضعك الاقتصادي، فأنت مصنف عندي بفقر تناول البروتين الحيواني
| |
|
|
|
|
|
|
|
|
|
Re: مافى اى موضوع (Re: أبوبكر عباس)
|
يا أخي، عبد الله عثمان دا
ما حصل. مشيت ليهو في العين وإلا طلب لينا نص خروف مشوي
نص خروف مشوي لتلاتة أشخاص!!
جزارة بانت كلها بضبحوا فيها خروفين!!!
| |
|
|
|
|
|
|
|
|
|
Re: مافى اى موضوع (Re: أبوبكر عباس)
|
يا عزيزى ابوبكر
دعنى اختلف معك ؛ السودانى الذى يستطيع ان يطلع من دائرة الفقر ، تفكيروا
كله فى الخرفان ، المتعة الأساسية فى السودان هى الخرفان ، ليس هناك ترفيه و ليست هناك اماكن للترفيه ، حتى السينما "العفينة" على قولة حسين اسد لا توجد فى السودان، فرص الترفيه صفر فى السودان، الترفيه الوحيد هو الخرفان ، صديقى جمال ابايزيد وهو عضو فى هذا البورد وغالبا يقرأ هذه الكلمات فى زيارة للسودان هذه الأيام؛ قال لى و بكل بجاحة انه ماشى السودان للاقاشى ، يضبحوا خروف وكل اللحمة تمشى للاقاشى ، بدلا عن زيارة جبل مرة او رحلة صيد سمك فى حبل أولياء او حتى المشاركة فى ظاهرة (الشروق) ..بدلا عن كل ذلك يفضل ان يستمتع بخروف معلق باعواد الاقاشى .
كثرة البروتينات عند المقتدرين فى السودان وراء شيخوختهم المبكرة .
اما فقراء السودان فالاجتماعيات الزائدة عن الحد وراء مصائبهم
| |
|
|
|
|
|
|
|
|
|
Re: مافى اى موضوع (Re: النصرى أمين)
|
القصة ما أقاشي وسمك عند عوضية كبرنامج متعة
كونها بقت متعة ذلك يعني انها فوق العادة!
ما أقصده النظام الغدائي اليومي، الوجبات الغذائية صحية ومكتملة وزائدة عن حاجة الجسم الفيزيولوجية وهي نظام يومي لك ولأطفالك زايد الرعاية الصحية
لا تشعر بها كنعمة من شدة العادة
دا الفرق الجوهري بين الحياتين
| |
|
|
|
|
|
|
|
|
|
Re: مافى اى موضوع (Re: أبوبكر عباس)
|
| Quote: جزارة بانت كلها بضبحوا فيها خروفين!!! |
ياخ انت من زمن ربع الكيلو بقسموهو وشفت زمن في المزاد ولا 114 ما عارف السلطة ذاتها بقسموها
ياخ دة المستشار الصحفي محمد محمد خير قبل فترة طووويلة قال بضبحوا 600 عجل في اليوم
ده مع نمل السكر دة و"أولاد أم درمان" البقت في كل ناصية دي بيكونو بقوا كم عجل يا ربي
ضيعت ليها يا مستنير جك فول وأجمل الحلوين عهودك وين؟
تاكلو نيم
المافي شنوووووو أو كما قال أبونفيسة عن قيقراوي
| |
|
|
|
|
|
|
|
|
|
Re: مافى اى موضوع (Re: عبدالله عثمان)
|
عليك الله، يا عبد الله، لمان تدخل Sam’s Club وتلقط عبوات الحليب الكبيرة ديك الجالون
موش بتحس انك في أيدي أمينة؟
البروتين الحيواني ضروري للبنية والصحة الزاهية
الواحد ممكن يلخص الفرق بين أوربا أمريكا مع افريقيا حيوانيا بأنو هو مقدار بروتين
١٠: ١
| |
|
|
|
|
|
|
|
|
|
Re: مافى اى موضوع (Re: أبوبكر عباس)
|
بمناسبة البروتينات و دفاعك المستميت عن اللحوم
والاقاشى والاسماك.
احكى لك
زميلى فى العمل سوداني عنده مشكلة صغيرونة فى الوزن لكن شايل هموم
الدنيا كلها بسبب هذه الارطال القليلة الزائدة ، اراه كل يوم يتريض فى جيم الشغل و يراقب اكله و شرابه ، دعوته عدة مرات للذهاب للمطعم الهندى المحبب لنفسى (فيصل كباب) رفض ورد بانه يراقب his diet carefully
فى نفس الوقت ، انا ال obese مديها بالجزمة القديمة و اكل المكرونة بالرغيف.
المهم ...غبت عن صديقى عده اسابيع ..اظنها ثلاثة او اربع ..عندما قابلته كدت لا اعرفه ..لم اصدق عينى !! الزول ده نقص 20 رطل او اكثر فى فترة وجيزة جدا .
عند السؤال ؛ قال لى انه استعمل برنامج ريجيم اسمه Keto
هذا الكيتو الكيوت ..بسيط جدا ...تأكل كل ما تشتهي من اللحوم ، حتى لو خروف كامل؛ سمك ، دجاج ..تلبع كيفما شئت بس بشرط تبعد تماما من النشويات ولا حتى قرمة بتاعت رغيف ولا رزاية واحدة ، لا مكرونة ؛ لا بطاطس. .ايضا بعيد من الفواكه.
لحوم و سلطات فقط ...وتاكل زى ما داير ...قال ضاحكا. ..ميزانية السوبرماركت زادت شوية لكن كل شئ بثمنه .
Keto البرنامج ويمكن قوقلته لمن يريد
| |
|
|
|
|
|
|
|
|
|
Re: مافى اى موضوع (Re: النصرى أمين)
|
بيت حاج عبد العزيز وحاجة عواطف بيت انموذج..واقرب وصف لية ما صورة الطيب صالح في يوم وليلة عرس الزين...فحاج عبد العزيز هو رجل اداري من الطراز الرفيع...فهو مدير الزهرة...صباحا... وسكرتير نادي الاهلي...وقد كان سبب في انتقال اميز لعيبة مدني للهلال..ومن ابرزهم حمد والديبة...وقد وقع شقيقي عادل( عبشين) للنادي الاهلي دون نقاش عندما طلب منه حاج عبد العزيز ذلك..وان كانت ميول عادل اتحادية...اما النصري فكان المنفذ الفعلي لكل خطط الانتقال من دس اللعيبة وغيرة....وفوق ذلك حاج عبد العزيز صوفي حتى النخاع..فداره هو محط شيخ الصائم ديمة...لقد شكل هذا الرجل عليه الرحمة كثيرا مني..فالعلاقة معه مختلفه عنمن يكبرنا يتونس معاك وتحس انو صاحبك...بيته وقبله قلبه الاخضرمفتوح للجميع فتجد في هذا البيت رجال الاعمال على سبيل المثال بابكر الخواض..فمصنع الزهرة ملكهم...وتجد اهل الفن أصدقاء مجدي مثل صديق متولي وامير يونس..وصديق سرحان..ولعيبة كرة القدم...واصحاب عادل واحباب طارق من نوابغ العلم..فكم عقدت مذاكرة جماعية...دا غير عالم حاجة عواطف وبناتها..واهلهم ناس بيت المال..فهذا البيت ساهم في كتابة فترة خصبة من تاريخ مدني والهلال والفن...
| |
|
|
|
|
|
|
|
|
|
Re: مافى اى موضوع (Re: عمر نملة)
|
اصلا حاج عبدالعزيز و والدى مشجعين لفريق الاتحاد فى هجرتهم الأولى
لومدنى فى منتصف الأربعينات، فى ذلك الوقت بدأت العلاقة مع أولاد الخواض إبراهيم و محمد احمد وأعتقد بابكر، لم تنجح الهجرة الاولى و رجعوا لامدرمان .
عند تأسيس مصنع ظهرة الحصان بمشاركة أولاد الخواض فى بداية السبعينات احتفظ عبدالعزيز بولاءه لنادى الاتحاد الا ان حادثة صغيرة غيرت كل شء.
كان لعبدالغزيز صديق مقرب اسمه عبدالعزيز محمد الحسن (كان صاحب مطبعة( وله اابن دفعتنا و احد افراد الشلة اسمه صلاح ، دخل جامعة الخرطوم بعد معافرة الا انه تركها و ذهب ليكمل تعليمه فى روسيا؛ عبدالعزيز صاحب المطبعة كان اهلاوى متشدد و عضو فى ادارة النادى ،
احدى الليالى عبدالعزيز مطبعة طلب من عبدالعزيز ظهرة ان يرافقه لنادى الجزيره لان هناك اجتماع مهم لإدارة نادى الأهلى ، فى البداية عبدالعزيز ظهرة رفض العرض لكن بعد الحاح عبدالعزيز مطبعة ذهبوا للاجتماع.
جلس عبدالعزيز ظهرة فى نهاية المكان لان الأمر لايخصه ، كان يستمع فقط .
الحوار كان دائر حول مشكلة يواجهها النادى فى عمل بئر لسقاية النجيلة .
عندما اوشك الإجتماع على نهاية و اتفاق الحضور على بعض النقاط، رفع عبدالعزيز ظهره يده طالبا فرصة الحديث. ..عرف نفسه فى البداية وقال للحضور )كلامكم ده كله غلط ...لو دايرين تحلوا مشكلة الماء عليكم بكذا وكذا وانا اعرف فلان و استمر يقدم فى الحلول والحضور فى دهشة من الزول الغريب صاحب الامكانيات العجيبة.
المهم اتفقوا ان يتولى عبدالعزيز ظهرة موضوع البئر و من ديك و عيك .
| |
|
|
|
|
|
|
|
|
|
Re: مافى اى موضوع (Re: النصرى أمين)
|
بالنسبة لتسجيل اللاعبين ..كنت انا السواق لتهريب اللاعبين واخفاؤهم
أذكر جيدا كيف ذهبنا لمارنجان و اتينا بعمر النقى و احتفظنا به فى بيت المال خوفا من إدارة المريخ، لا اذكر حمد والديبة لكن اذكر جيدا سانتو (ليس الفاضل سانتو ) ، اختطفناها من إدارة المريخ و ظل معنا فى البيت عدة ايام لكن إدارة الهلال غيرت رايها و رفضت تسجيله ، هذا السانتو كان أفضل لعيبة
المريخ لسنوات طويلة و كان متخصص فى الهلال ، كل قون يحرزه فى الهلال كنت اعض شلوفتى حسرة
| |
|
|
|
|
|
|
|
|
|
Re: مافى اى موضوع (Re: النصرى أمين)
|
يا نصري يا سلام عليكم ..ال امين النصري وال محمد الحسن.....عبد العزيز عليه الرحمة وصل في عشقه للنادي الاهلي انه لا يستطيع دخول الاستاد ويكون لافي حول الاستاد بسيارته المازدا...فعلا شخص حباه الله بذكاء عملي واجتماعي...اذا حكيت عنهم لن اوفي...لكن احكي عن النفاج الذي فتح في زواج بنته تهاني..وصرنا بيت واحد واستمرهذا النفاج مدة طويلة..وصارت حسابات قفله او تركه صعبة..لان الناس بتتعامل بحس مرهف..فاذا قفل يخافوا يقولوا زهجوا مننا..واذا ترك يخافوا من عدم احترامهم للخصوصية...مهم تم العزم وحدد قفل النفاج..كمية من الدموع ذرفنها اماتي عواطف وبت ابقناية وشامة عباس...مشهد يدل على العشرة الصادقّة....اما المشهد التاني يوم رحولهم..من البكاء أتى الناس من بعيد وفي فكرهم انو في شخص مات..حاجة عواطف عليها الرحمة فعلت اكتر مما يفعله ناس البكاء..اما حاج عبد العزيز هرب من خلف البيوت وسار مسافة كبيرة على شارع الخرطوم......مازال التواصل يا نصري رغم تباعد السنين...اسرة عبدالعزيز فرضت نفسها في مجتمع مدني..باصالتها..واخلاقها..وطيبتها...وكرمها.......المني رحيلهما
| |
|
|
|
|
|
|
|
|
|
Re: مافى اى موضوع (Re: عمر نملة)
|
عند زيارته لمصر اشترى عبدالعزيز لنفسه حذاء ..جزمة فاخرة جدا
و غالية جدا ..عند عودته للسودان استكثر على نفسه هذه الجزمة الرائعة.
فى نفس اليوم وغالبا بعد منتصف الليل، ظهر الشيخ دفع الله الصائم، لم يتردد حاج عبدالعزيز فى إهداء الجزمة للشيخ دفع و هو سعيد انه فعل ذلك ، بعد دقائق جاء رجل و همس فى اذن الشيخ بكلمات، ما كان من الشيخ الا ورفع الجزمة من يمينه واعطاها للرجل و عبدالعزيز يعاين مندهش .
ثانى يوم سمعته ضاحكا (وهو شخص يحب المرح و صناعة الضحكة) سمعته يقول ياريتنى لو لبست جزمتى الجديدة .
الناس ديل علمونا ان الصوفية عطاء و تضحية و مساعدة الآخرين
| |
|
|
|
|
|
|
|
|
|
Re: مافى اى موضوع (Re: النصرى أمين)
|
حاج عبد العزيز له خاصية غريبه فمثلا عند حضور مجلس كورة يتقمص شخصية الشباب والتعصب والولاء...وعند حضور شيخ الصائم يحضر بكله كتلميذ ينفذ تعاليم استاذة...فهو صعود ونزول بين كل الشخوص...يانصري بوستك دا رجع لي ذكري اناس يتعذر تكرارهم....يا بابكر طارق عبد العزيز عند ضحكتة الدائمة تتمتزج طيبة حاجة عواطف وانجذاب حاج عبد العزيز...كنت خايف يكون الزمن افقدوا الضحكة لكن صورتة مع النصري بيضحك...سبحان الله يا نصري صورتك اشبة بعادل ومجدي...يا اخ شوف لي صورة لدفع الله ويوسف
| |
|
|
|
|
|
|
|
|
|
Re: مافى اى موضوع (Re: عمر نملة)
|
عجبوني ولاد مدني
تقولوا مافي موضوع!
إنتو قايلين "الموضوع" هو شنو، لو لم يكن هذا الذي تفعلون
إنه موضوع وأكثر
ياما بوستات مفتوحة على أساس إنو فيها موضوع
وهي أفرغ من فؤاد أم موسى (عليهما السلام)
| |
|
|
|
|
|
|
|
|
|
Re: مافى اى موضوع (Re: معاوية الزبير)
|
الأخ معاوية والله العظيم امتلكنى شعور عجيب
ونوع من السعادة و الفخر و الاعتزاز لمن وصفتنا باولاد مدنى ، اول مرة فى حياتى يصفنى شخص بانى من ولاد مدنى ؛
ولاد مدنى اخوان الصفا
ولى عودة طلما حسبتونى من ولاد مدنى
الاستاد و سفريات الثقة و التاكا و اندحارهم بيد بصات السفينة المكيفة
| |
|
|
|
|
|
|
|
|
|
Re: مافى اى موضوع (Re: معاوية الزبير)
|
الأخ معاوية والله العظيم امتلكنى شعور عجيب
ونوع من السعادة و الفخر و الاعتزاز لمن وصفتنا باولاد مدنى ، اول مرة فى حياتى يصفنى شخص بانى من ولاد مدنى ؛
ولاد مدنى اخوان الصفا
ولى عودة طلما حسبتونى من ولاد مدنى
الاستاد و سفريات الثقة و التاكا و اندحارهم بيد بصات السفينة المكيفة
| |
|
|
|
|
|
|
|
|
|
Re: مافى اى موضوع (Re: Faisal Saad)
|
انا كتبت دكتور عماد بالفجيرة،،
رأس الخيمة دي ما عارفها جات من وين،، احتمال النون و الكاف بتاعة المستنير، لحقتها و نجدتها،، هههه.
| |
|
|
|
|
|
|
|
|
|
Re: مافى اى موضوع (Re: Faisal Saad)
|
سلام يا النصرى
تعابعت بوست التخسيس حقيقه بوست متفرد لغايه صفحه عشره
يوم
لبعت نص علبه الطحنية بعد 7 شهور ستره
البوست طويل جدا عسم رقبتى لمن حلفت تانى ماامشى جنبه
لكن ناوى امش الصفحه الاخيره اشوفك نزلت من 22 رطل كم
| |
|
|
|
|
|
|
|
|
|
Re: مافى اى موضوع (Re: عمر دهب)
|
تذكر يا نملة، تقريباً يوم الانتفاضة كنا بنزع انا واتّا في شجرة دقن باشا قدام بابنا الملاصق لعبد العزيز،
نزل من عربيتو وقال لينا:
طلعوا الشجرة لقدام شويّة عشان بعدين سلك الكهرباء
بعد دخل بيتم قلت ليك أو قلت لي أنساه دا تنظير منو هي الشجرة متين تصل السلك؟!!
دارت الأيام وأصبحت هذه الشجرة أكبر شجرة دقن باشا تشهدها المدينة
لو ما خائف تقولوا لي كضاب أقول ليكم:
حولية المكاشفية السنوية في مدني (بيت شيخ المكاشفية الباب القصادنا طوالي) بعملوها تحتها
يعني كانت بتشيل في ضلها ستة لواري حيران مكاشفية
يومتجي مطرة برعد وهوا شديد واسلاك الكهربا تتلاقى مع أغصانها
وتضربها كهربا تنشفها نشاف تام
قال لي أحد الأطفال أنه سمعها قبل طلوع الروح تصيح:
وا عبد العزيزا
وا عبد العزيزا
| |
|
|
|
|
|
|
|
|
|
Re: مافى اى موضوع (Re: أبوبكر عباس)
|
يا سلام ياخ!!
إبداع متناهي وحكي جميل ، وكأني بكم تتحدثون عن أي حارة وعن
أي شارع وأي عواطف (رحمها الله)
وعن أي جيران في اي بقعة من بقاع ذلك الوطن الشامخ الذي كان،
تطواف في غاية الروعة ، قمة السلاسة واللغة الراقية دون تكلف
أشكركم النصري وصحبه ،،
أبوبكر العجيب : إيه يامولاي
| |
|
|
|
|
|
|
|
|
|
Re: مافى اى موضوع (Re: عبد اللطيف بكري أحمد)
|
ماهى شجرة دقن باشا ؟
ولماذا هى فى حجم شجرة النيم ولم نسمع بها ؟
حقيقة ...لم اسمع بالاسم من قبل مع انى مفتون بالاشجار , دائما اعاين لاى شجرة واسال نفسى ( يا ربى الشجرة دى بتفكر فى شنو دلوقت؟)
ما عارف ليه عندى خاطر انه الاشجار لها عقل , تفكر و تتدبر امورها مثل باقى خلق الله ...
الصديق و زميل الدراسة فى الثانوى , عبدالوهاب السويسرى , طبيعة عمله فى الخلاء وسط السودان , مناطق السافنا الغنية والفقيرة , طلبت منه فى
الواتساب تصوير الاشجار فى المنطقة و تعريفها , كانت اجمل فيديوهات الواتساب على الاطلاق , للاسف توقفت بسبب بعض المشككين التقليديين
| |
|
|
|
|
|
|
|
|
|
Re: مافى اى موضوع (Re: طلعت الطيب)
|
اهلا طلعت زميل الكفاح فى أيام كالقرى الاولى .
جوابى لسؤالك عن الغيبة الطويلة ، انى للاسف مصاب بحالة
شخصها العارفين (وهم شخصى و انا و ذاتى وروحى) بمتلازمة
اسمها *متلازمة الرشيد * .
متلازمة الرشيد ، هى باختصار، حالة اجتماعية سلوكية سودانية معقدة
الزول يكون صاحبك و حبيبك و كل يوم معاك ، محنة شديدة ، فجأة كده و بدون سبب يختفى عن الأنظار، يبيعك و يبيع عشرة زيك و كان شئ لم يكن.
المصابين بهذه الحالة ، عادة ؛ ناس كويسين و قلبهم ابيض لكن عندما تقوم عليهم الحالة يفتحوا ليك بدون سبب و ينشغلوا بامور أخرى.
متلازمة الرشيد اكتشاف خاص لم نسجل علامته التجارية بعد.
لكن ما معروف ..رسل لة رقم جوالك ، احتمال نحاننك فترة قبلما تقوم علينا الحالة و نبيعك فى سوق الله أكبر.
لك الود الذى تعلم و لعن الله متلازمة الرشيد
| |
|
|
|
|
|
|
|
|
|
Re: مافى اى موضوع (Re: طلعت الطيب)
|
حاجة عواطف امين النصري...عليها الرحمة..قمحية..لا ترفع نظرها مع من تحدث ادبا واحتراما...تسلم بوضع طرف ثوبها على يدها..تحمل دائما سبحة..كثيرة الصلاة على الحبيب صلى الله عليه وسلم...اسست مع بقية الجارات دار الصلاة على الرسول صلى الله عليه وسلم.....وواصلت في ذات المنهج بعد عودتها لبيت المال...قالت في مقابلة تلفزيونية مع دار الصلاة على الرسول صلى الله علية وسلم...( بكيت عند مغادرتي مدني رغم اني راجعة لاهلي)... تقول امي عنها وعن زوجها( الناس ديل عينهم مليانة قاموا في غنى وعز ..ما مستجدين نعمة...عواطف بتكورك لي نص الليل وتصحينا بان شيخ الصائم وصل...نقوم ويضبحوا خرفانهم...ونتعشى ونعشي الضيوف...وتاني يوم بترفع لينا اللحمة بالحيطة...لو ناس غيرهم بيقولوا كفاية امس اتعشوا معانا... شوفت كتير يا ولدي لكن ناس عواطف ما اظن في زيهم)
| |
|
|
|
|
|
|
|
|
|
Re: مافى اى موضوع (Re: عمر نملة)
|
تعرف يا عمر ، عمرى ما سمعت حاجة عواطف تنطق اسم زوجها
عبدالعزيز، دائما تقول (ابوهم)
مرة سافرت مصر مع الاسرة وسالها ،اظن ،موظف مصرى
عن اسم زوجها و كان بعيد عنها تلك اللحظات، لم ترد ، و تهمهم ، امممممم، والموظف يحتاج للاسم و هى اممممممم ، استمر الموقف و بدأ الضيق يظهر على الموظف المصرى حتى رجع عبدالعزيز و اخرجها
من الموقف المحرج.
اتخايل لى ده اخر جيل الا ينطق اسم الزوج تادبا و حياءا .
| |
|
|
|
|
|
|
|
|
|
Re: مافى اى موضوع (Re: النصرى أمين)
|
يا نصري...ما بقدر اوفي لعدة اسباب منها نظرتي القاصرة...وعجز اسلوبي. وصعب توصف شخص فطري...كل الاديان بتلف وتدور عشان ترجع الانسان لفطرته...معقول قريب 20 سنة ما اشوفها زعلانة ولا تشاكل والله ولا حتى الاطفال ما بينهم...امي عواطف ما بتمشي في نص الشارع دائما لاقرب مسافة من الحيطة..صبورة بما تعني الكلمة...لها علاقة جميلة مع والدة زوجها...ومن قصصهم الجميلة...ذهبت والدة عبد العزيز لتعزية صديقتها في وفاة والدتها وفي بيت البكاء سالت اها البت حصل عيها شنو...سالتها صاحبة البكاء البت ياتا...ردت بت المسلسل...قالتها ليها كدا يا خالتي بتسالي عن المسلسل في فراش امي..قالت ليها الله يعلم لما امي ماتت اكلتي البطيخ...تصدق حاجة عواطف بتضحك والدموع ...عفوية وطيبة..ربنا يرحمها
| |
|
|
|
|
|
|
|
|
|
Re: مافى اى موضوع (Re: عمر نملة)
|
والدة عبدالعزيز هى عشه بنت ام سماحة وهى خالة ابوى (هى الاخت الشقيقة لحبوبتى أسماء بنت ام سماحة .
حاجة عشه (الله يرحمها) كانت شخصية اسطورية
ساخرة من كل شئ و متمردة و عندها قصص لا تحصى ولا تعد .
قصة سؤالها عن بطلة المسلس المصرى فى العزاء دليل انها تعكس
ما يدور فى أذهان الناس وقتها لكن لا يجرؤ احد على البوح بذاك خوفا
من نظرة المجتمع، اما حاجة عشة .فما يهمها .هى تعكس ما بداخلها دون خوف من احد .
لولا ذاكرتي الضعيفة لحكيت لك قصص عن حاجة عشة لا يتصورها انسان عاش تلك الفترة.
ابنها عبدالعزيز اخذ منها كثير من تلك الصفات ، فهو ساخر جدا و متمرد على المجتمع و له دائما رأى يخالف القطيع
| |
|
|
|
|
|
|
| |
عمر نملة
Abureesh
معاوية الزبير
أبوبكر عباس
عبدالحفيظ ابوسن
Faisal Saad
احمد حمودى
عبداللطيف حسن علي
عبدالله عثمان
سيف النصر محي الدين
ناذر محمد الخليفة
Elhadi
نصر الدين عثمان
كمال عباس
طلعت الطيب
فيس بوك
تويتر
انستقرام
يوتيوب
بنتيريست