|
|
|
 Re: شهد كبر (تصوير) : See The Beauty:Autumn (Re: Kabar)
|
الصديقات والأصدقاء..حبابكم جميعا..
هذا الفيديو القصير ، من اعمال الآنسة شهد كبر..قامت بتصويره في نهاية سبتمبر 2017
نتمنى من الصديقات والأصدقاء..خصوصا ناس الفنون والتصوير..بعض الإنطباعات..!
طبعا سألت الأنسة شهد عن حكاية الكلام المكتوب ، وكان هو جزء من رؤيتها تجاه العالم الحالي ، بدأتها لي من عم ترامب ،الحروب ، الدمار..!!
فياترى كم منا ينتبه للحاجات والتفصيل الصغيرة التي ننساها ونحن نمضي في مطحنة الحياة؟..
نرجو الإفادة..سواءا باللغة العربية او باللغة الإنجليزية..
ودمتم..
كبر
| |
  
|
|
|
|
|
|
|
|
Re: شهد كبر (تصوير) : See The Beauty:Autumn (Re: Kabar)
|
نحن يا صديقي لا ناس فنون و لا ناس تصوير ...
و لكن نضعف تماماً في مواضع الجمال ...
حسيت بكل خطوة خطتها شهد ...
سبحان الخالق فيما خلق ... بلغها تحياتي ...
و قول ليها عمك قباني ناوي يجيكم زيارة قريب ان شاء الله ...
| |
|
|
|
|
|
|
|
|
|
Re: شهد كبر (تصوير) : See The Beauty:Autumn (Re: عمر دهب)
|
ول ابا يحي..حبابك يا صديقي
حاولت ارسل ليك رسالة مسنجر..وفشلت..!!
عموما..
كتر خيرك على المرور هنا..
رسالتك سوف تصل ، صدقني ستسعد الآنسة شهد كبر..
وسوف ابشرها بحضورك هنا..الي مدينة كالقري ..وهي لسع مناها تشوف اونكل وليد كوش واونكل مصطفى السني..!
شوية شوية..عرفت عمر منصور يعني شنو..وعبد اللطيف درار يعني شنو..!
خالها يا يحي.. اخونا التشكيلي الغائب عن المشهد ، الأستاذ الطاهر بشرى..وحتى اللحظة تتبع اخباره وتتمنى ان تلتقيه (شفتو المحنة كيف يا عمر دفع الله وخالد كودي..!!)..!
كل البقدر عليهو ، وديتها امسودان ، شافت الغبار ، شافت اخوات واخوان الطاهر بشرى ، شافت العجائب..ولمن وديتها الدلنج ، وقابلها التشكيلي العالمي عبد الرحمن حامد جمعة (عبد الرحمن بليا) ، مشت بيتو..ولغاية الليلة سؤالها: ليه ما قادرة تشوف بليا في قنوات العالم..؟؟؟..ونحن نشيل ونضاير..!!
سعدت يا صديقي ، في كل تجربتها في الدنيا ، وحتى اللحظة انها شافت ناس من امثال عبد الرحمن بليا ، السيد منوفل ..ولسه بتسأل الطاهر بشرى وين..؟؟؟؟؟؟؟؟؟؟؟؟!!!!!!!!!!!!!!!!!!!
قايل شنو يا يحي؟..ذات تجربة ، شافت اونكل سامي المغربي عيانا بيانا في ذات حفلة بكالقري..!!
ما تبقى ، كان سيكون في المسانجر..والله يقطع طاري المسانجر..!!
كبر
| |
|
|
|
|
|
|
|
|
|
Re: شهد كبر (تصوير) : See The Beauty:Autumn (Re: عمر أبوعاقلة)
|
كتب عمر ابو عاقلة:
Quote:
ما جيتو شاقين بي جاي:
|
عمر..حبابك يا صديقي
كتر خيرك على المرور من هنا ، وتحياتك تصل للآنسة شهد والصورة كمان..
عارف يا عمر ، تقريبا الصورة دي بتشبه لي موقع بالقرب من مدينة الدلنج..اسمو الحفير..وعلى منعطف منو حتة اسمها شاشنديل..بنفس التفاصيل والملامح..!
الجماهير دي زارت الدلنج (اقصى مكان يصلوهو في امسودان..!!)
وفيهم روح كوميديا ساخرة اسكت ساكت خليها..!
حكيت ليهم عن طبيعة مجتمع البقارة ، واشيل واحكي (اشيل واعيط على قول عمك عادل امام) ياخي لمن خشمي زبد ذاتو..!!
عارف قالوا لي شنو ، في مرحلة اي سؤال؟؟ ، : اها..
Where is the washroom؟
ياخي سبيت بالعربي وباللاوندي ذاتو..وكظمت غيظي وقلت ليهم..
You have to walk away, so far, until you find a big tree that you can hide behind it so you can do it there..!!
عليك امان الله ، الإتنين ، وهن شافعات قالن لي بخشم واحد:
Really…!!
ياخي لمن اتعقدت ذاتو..!!
لكن تظل الطبيعة ياها بكل جمالها ، ومرقنا من الغنيمة بسلامة الإياب ، اي الفرح بالطبيعة..!
عالم طريقة تفكيرها صعب خلاص..!!
كتر خيرك..
كبر
| |
|
|
|
|
|
|
|
|
|
Re: شهد كبر (تصوير) : See The Beauty:Autumn (Re: Kabar)
|
تصدق ايها الرجل الجميل .. نفس السيناريو دا مريت بيه
Quote: عارف قالوا لي شنو ، في مرحلة اي سؤال؟؟ ، : اها..
Where is the washroom؟
ياخي سبيت بالعربي وباللاوندي ذاتو..وكظمت غيظي وقلت ليهم.. |
عند زيارة بنتي (لينه) لأول مرة السودان
وتعبت جداً وأنا أشرح لها الوضع
تشيلي البطارية دي بيدك الشمال والابريق دا باليمين
وتمشي هناااااااااك
وهي تسوي لي "أبوي انت جادي"
كبر الونسة معاك ممتعة ياخ
أما بخصوص الصورة في هي نواحي الدلنج
وكمن زار ليس كمن "قوقلها"
دام صفاك مشمول
| |
|
|
|
|
|
|
|
|
|
Re: شهد كبر (تصوير) : See The Beauty:Autumn (Re: عمر دهب)
|
ياسلام يا كبر على تصوير شهد
تطوير مهارات التصوير لدى أمثالها مهمة عظيمة خاصة لما تجد تشجيع من الوالدين
لقيت بت تورنتو Diana Nazareth المصورة ومصصمة برامج التواصل المجتمعي عن طريق الكاميرا كاتبة الكلام السمح ده عن نفس الموضوع
| Quote: “Photography, in some ways, has become a modern-day extension of how we interact and communicate with others,” |
| Quote: “Photography can help develop a child’s voice, vision and identity as it pertains to their family, friends and community,” |
| Quote: You could encourage [kids] to look for and photograph certain colours found in nature or shapes that look like a letter in the alphabet,” she explains. After your walk, ask kids to talk about their photographs. Why did you choose to take that photo؟ What is your photograph trying to say؟ |
-
ديانا دي ابوها بيتر نزاريت (من الناس الطردهم عيدي امين) كان بيني وبينه مراسلات حول تدريسه رواية موسم الهجرة في الجامعة
Peter Nazareth (born April 27, 1940), a major critic and writer, was born in Uganda of Goan and Malaysian decent. He is currently professor of English and African-American World Studies at the University of Iowa
تحية لشهد
| |
|
|
|
|
|
|
|
|
|
Re: شهد كبر (تصوير) : See The Beauty:Autumn (Re: حيدر حسن ميرغني)
|
التحية والتقدير لشهد ، ولا شك انها اسم على مسمى،،،
فن في التصوير واختيار الموضوع جمال الخريف،،،
وانا اتخيلها مخرجة تلفزيونية شهيرة يشار اليها بالبنان
او مخرجة سينمائية تضارع جيمس كاميرون الكندى في
افاتار وتايتانيك،،،
لكن جمال الخريف ما عندكم ،،،
وتسلم البطن الجابتها،،،
ودمت بالف خير وصحة وعافية
| |
|
|
|
|
|
|
|
|
|
Re: شهد كبر (تصوير) : See The Beauty:Autumn (Re: Kabar)
|
ول ابا حيدر حسن..حبابك يا صديقي
الآنسة شهد كبر ، كفيلتها في المنبر هي صديقتنا الصدوقة ..دومه (زينب الفحل)..ياخي لغاية هسع شهد بتكن لدومه انها اول من بشرت بحضور شقيقتها الصغيرة الآنسة شروق..في هذا المنبر (الآنسة شروق، البشرت بلحظة ميلادها صديقتنا زينب الفحل /دومه ، قبل شوية جات من اجتماع الأباء والتلاميذ ، وحضرت الإجتماع لأنها عضو في اتحاد الطلبة..ديل ناس ابتدائي وثانوي عام يا صديقي ، ويا حليلنا نحن..ياااااااااااخ..!!)
حكيت ليها (شهد)، عن دومه ، ولغاية الليلة بتقول ليه ما نعمل موبايل هاوس ونمشي نعسكر في سفوح جبال الروكي زي انتي دومه..!
كتر خيرك يا صديقي ، وح اخبر شهد عن ديانا نزاريت..وهي معجبة بيفيلم فورست ويتكر
The Last King of Scotland
لأن االصدفة جمعتها بهنود يوغندا ذات يوم ما..!!
وبالطبع بتجاملني في محبتي واعجابي بالفنانة كيري واشنطون..الظاهرة في ذاك الفيلم وافلام اخرى..!!
ابوي يا حيدر ، عمك الأنصاري الحاج النور كبر ، خلاني نعيش الحياة كما نرى وكما نرغب ، وصدقني دي الحصيلة الوحيدة الفضلت لينا: نعلم الورانا يعيشوا الحياة كما يرغبون وكما يرون..!!
كتر خيرك يا صاحب..
كبر
| |
|
|
|
|
|
|
|
|
|
Re: شهد كبر (تصوير) : See The Beauty:Autumn (Re: Basamat Alsheikh)
|
بت ابا بسمات..حبابك يا صديقتي
كتر خيرك على المرور هنا..
تعليقاتك وملاحظاتك سوف تصل للآنسة شهد..!
الناس ديل كبروا وكبرونا معاهم كمان..!!!
كنا نفرض عليهم مزاجنا..يتفرجوا ويتذكروا..
والصدفة الأولانية..كان مسرح عادل امام..!!
في عرفهم..
The Kid, Sayed the Butler
ثم سنما عبلة كامل..
(خالتي فرنسا)..!!
ولمن جينا نحكي ليهم عن مزيكا امسودان: وقفوا لينا في اسماء معينة..!!
كانت بتعجبهم (اللابس البمبي)..!!
اتغالطنا مع الحيكومة في الترجمة والشرح..
انا بكل طفاسة قلت ليهم:
اللابس البمبي..
About someone who dressed in pink
الحيكومة عليها السلام ، قالت ليهم : دادي غــــــلـــط..!
(اللابس البمبي) اصلا..
About beauty of dance
لمن شهد شافت فيديو لأستاذنا شرحبيل احمد ، وهو بيغني (اللابس البمبي) ، طلعت بنظرية لم نسمع بها من قبل في اباءنا الأولين ، وقالت لينا:
I love this guy, because he knows how to connect with his audio!
اها من ديك وعييك ، كل ما نعاين لينا لي فنان/ة سوداني/ة..المعيار بيكون هو..
الكونكشن ده..!
كتر خيرك يا بسمات..ياخي فكرة لذيذة خلاص ..تعاين ليهم يحبوا ،يمشوا ، ثم يبقوا ليك اصدقاء..!!!
كبر
| |
|
|
|
|
|
|
|
|
|
Re: شهد كبر (تصوير) : See The Beauty:Autumn (Re: Kabar)
|
كتابة قديمة ، سنة 2004 ، عن الآنسة شهد كبر (هي لم تقرأها بعد)..
وتواصل ترنيمة الخوف الزنخة..
ان تمني نفسك بلقاء الفرح في منعطف العمر ..هو نوع من الفجاجة والسذاجة والصفاقة والتبختر في معارج الوهم الزنيم..فقط عليك ان تنزف الحزن حتى اخر قطرة..
طلع الحزن علينا ..من ثنيات الضياع
وجب الخوف علينا..مادعا للحزن داع
هكذا، قال امل دنقل..
تاج الحكيمات ابيض..
لون الملاءات ابيض
ثم اضفت انت..
لون الجليد ابيض
واحساس الخواجات ابيض
انه معيار البرودة ياهذا..فلماذا لا يكون لون الحزن ابيض؟
شـهد ، قربك تنزف آهة..
وتنزف انت هروبا ينحدر نحو السيجارة..
ان تدخن وتدخن حتى تتلاشى..
وان تتوتر حد الذوبان..
او ربما هي محاولة اخرى من محاولاتك الفاشلة في ان ترتكب حماقتي الاحساس بالفرح والانتحار..
تتوضأ انينا وتصلي ركعة الترقب الألف..
اصرخ ياهذا..اصرخ في ظلمة الليل الربيعي الباهت..استغيث بهم..وبكتابتهم القوية لكي تعلمك معنى الثبات.. او عل الاقل النظر للاشياء من الناحية الثانية..نادي عليهم فردا فردا..
اين انت يا مصطفى مدثر..اريدك ان تكون قريبا ..تكور سفة السخرية العاتية..وتبصقها على قفا هذي الدنيا الهجالة..
أوف..لقد ذهب زهاء طاهر خلسة..ليعلن انه قد كسب رهانه مع الحزن وقايضه بخروج مبكر من دائرة النزيف/الحياة..
ابكر ادم..صبور..يرتب لك مداخل السؤال العاصي..وفي محاولة وزن المعادلة الفاشلة..يدفع لك بابطاله الانقياء..الذين يحاولون ارتكاب الشفافية في زمن لا يعرف سـوى التلون الداكن الغامق..
ثم..
يعتريك احساس التشتت..وانت تمتثل حالة محمد رابع الفلاتي..احد ابطال شوقي بدري..حينما قرر هذا الاخير ان حنق مصطفى مرجان جدير التدوين والتاريخ وانه حالة اهم من تاريخ الطائفية في ذات نفسها..
وتتحسر بينك وبين نفسك..بانك لم تستطع ان تنبث بكلمة وانت تتابع سلسلة المسكوت عنه واسباب الحنين الفارهة للتسكع في حواري امدرمان..لا ترتكب حماقة وتعلن لشوقي بدري بان امدرمان مدينة مصنوعة..فلقد ادمنهاهو تماما مثل محمد الواثق..وصارت جزء من دورة الدم الكبرى في دواخلهما..
ثم..
تسرقك ابتسامة غصبا عنك..وتتماهى مع هذيان بت قضيم..ذلك الشفيف..الذي يلمس المواجع ببراعة الطبيب..اين انت يا بت قضيم..اريدك اللحظة..ان ادفن رأسي في صدرك ..وابكي كما يبكي الاخ في صدر اخته..فقط لتشهدي على حضور الدمعة في منعرج السبيل الغامض..وان البكاء هو الحق الوحيد الذي تكفله لنا كل سلطات القهر ما ظهر منها وما بطن..
ثم..
لا تتذكر ملكة ســبأ..لأنها ستفتح عليك ابواب الحنين السبعة..وسيجلب ياسيكو نغما شفيف..وحينها سياتي بشرى سليمان..ويكلكل فيك بقايا الشوق..وتمارس الشتيمة اياها..وتعلن لهم للمرة الالف ان سبأ بت كلب ومليون بت كلب..
يتضامن هذيان بت قضيم مع تدفق شيري..الذي يصر هو الاخر..وعلى طريقته الخاصة..بان البعد عن الوطن..لا يساعد كثيرا في اغماضة الجفن عن المواجع المجانية..
يا سلام..
هل راى منكم احد..اشرف آش وهو يكتب الوجه الاخر للوجع؟
هل يجرؤ احد منكم ان يحدثني..بالضبط عماذا حدث لأمير بابكر عبداللـه؟
لماذا يصر هذا الزمن على ان يجلدنا بسياط الوجع المكابر؟الأننا تاخرنا قليلا عن الحضور باكرا؟
حسنا..كما يقول ابكر ادم..لو تأخر الانفجار الكبير لكسر من الثانية ..لما وجدت قمر حبيبها اسامة سرور..ولربما كانت هي في ثورة في امريكا اللاتينية..ولكان هو احد اتباع بوذا في اخر معبد من معابد التبت تجاه الشرق..
ابكر، ارجوك لا تكتب البنات الجميلات..فالاولاد السمحين لن يلتقوا البنات السمحات الا حسرة..
ثم..
تنده انت على فصاحة سيجيمان اللاذعة..وتقرر بينك وبين نفسك ان تكتب روشته مجانية لكافة حزانى السودان بان يقرأوا سيجيمان حينما يكونون في حالة ممارضة..اما اناقة عبارة عادل القصاص..فهي اجدى حينمايكون الحزن قد نام عندك او خفت بريقه لبرهة..
ثم..
تجيئك ايلين..الطبيبة الجامايكية..وترتل لك تراتيل المواساة واسفارها ..
وترجوك ان تقتات صبرا..
ان تقتات صبرا..
وشهـد قربك تنزف آهة..
تدفن وجهك في صحيفة الناشونال بوست..وهي تحتل المرتبةالثالثة والعشرين في سلسلة ممتلكات اليهودي اساي آسبر..ولماذا تذكر انه يهودي؟ هل تحنق على اليهود وقدرتهم الفائقة في ممارسة الاحتلال الناعم للعالم؟..حسنا..هل رايتم محمد الدرة وهو يسقط؟..ان فعلتم ذلك..اذن لقررتم ان كل رصاصة تخترق جسد طفل هي جديرة بان تخلق حالة من الحنق تجاه من اطلقها..
تدفن وجهك في الصحيفة..عيونك زائغة..اجهدها السهر الطويل..تسبهم في سرك وجهرك "بالعربي طبعا" او ربما تستعير اخر ما انتجته قواميس الصنايعية في حواري المنطقة الصناعية بامدرمان..
آهـ ..يا امدرمان اريدك الآن حاضرة بشوارعك المحفرة وجيوش الذباب التي اتعبت بت قضيم في تشخيص حالة القذارة التي تعتري اهالي السودان..
سؤال يا بت قضيم..هل يمكن ان تشكل تلك الحالة نوع من الـ "life style"؟..
ترتشف القهوة..اكملت الكوب السابع "extra large"..وتذكرت..انك تحتاج سيجارة..تخرجها بلهفة وتبحث عن قداحة الشرر..ليفاجؤك صوت تسـهاي الارترية ..موظفة الاستعلامات ..التي قد شربت كل وجوه العابرين بدون فرز ..وتجلس في صدر المكان في محاولة بلقاء من الـ system ..لتحقيق المساواة في فرص العمل والتباهي بالتعددية الثقافية..هل تتوقع يوما ان تكون عنوان السودان امرأة شلكاوية مثلا؟..خاصة وبنات الشلك لهن انصع ابتسامة على وجه الارض..
تهمس لك تسـهاي..التدخين ممنوع يا محمد..انك في دار الاستشفاء..
يطفر عليك تيار خبيث من الثنايا الجوانية البعيدة..وتحدق في صدرها الدافر العاري..تعتلي ارتفاعاته التي انهكتها جيوش التنفس المتدافعة بلطف..وتحدق في وجههاالطبيعي..الذي يقاوم بقوة كل ما انتجته مصانع التجميل التجاري..ثم تغض الطرف..بعد ان تلعنه في كونك اطلعت على ما لا يخصك في شئ..بالمناسبة.. هل النظر في تقاسيم تسـهاي الجميلة يعد خيانة زوجية؟ ام هو ممارسة لحقك الطبيعي في التمتع بالجمال؟
وتتناسى كل ذلك..وتقول لنفسك ماذا لو اباحوا التدخين في داخل المستشفيات..هل سيضر ذلك بالمرضى؟.. حسنا ..قد تكون الاجابة نعم..ولكن تسعين بالمئة من هؤلاء المرضى يتسللون خفية نحو مداخل المستشفى ليمارسوا التدخين..والضحك على استهبال وزارات الصحة في العالم قاطبة..تلك التي تعلن ان التدخين ضار بالصحة..
قال التدخين ضار قال..
انا اعرف كم وزير صحة يدخن..او يملك شركة تدخين او يساهم فيها..هذا طبعا غير الاطباء والطبيبات..والممرضين والممرضات..الاحياء منهم والاموات..
وانت تجرجر نعليك استعدادا للخروج المقدس..تدلف يدك نحو الصفحة السادسة..تتسمر امام ذلك الوجه القوي الذي يتصدرها.. انها امرأة عجوز من دافور..فهم يتخيرون جيدا الملامح التي تؤكد لقرائهم الأفاضل بان انسان افريقيا هو الوحيد القادر على خلق المآسي والتمتع بها..
المهم..اخيرا قد علم اهالي كندا بمأساة اهالي دارفور..ليس من باب العلم بالمصائب يخفف المصائب..ولكن من باب التحيق/الخبطة الذي يساهم في ارتفاع مشترى الصحيفة ..او ربما ليستحلب عطف القارئ العادي الذي تجتهد كافة دوائر الميديا بان تقنعه بانه لايوجد شئ في افريقيا سـوى الكوارث من مرض وفقر وجهل ..وايدز..ودماء تسيل وفق مناسبات لا تستاهل قطرة دم..ولكنه هو الدم الافريقي ارخص الدماء في هذا الكون..
حسنا..تتاجر الناشونال بوست بذلك..وكم نفر في هذه الدنيا يتاجر بمآسي البشر؟
تعدل عن الخروج المقدس..وتذهب مباشرة الى غرفة شهـد.. وانت تجتهد ان ترتب العبارات في ذهنك..حسنا سـأحدثها اليوم عن دارفور..وعن كيف ان الاطفال في مثل سنها..قد اصبحوا بلا مأوى..بلا حليب..بلا عصيدة..او حتى بلا جرعة ماء للشرب..
لكنك ..لن تجرؤ ان تقول لها..ان بعضهم اصبح بلا ام ..او بلا اب..او حتى بلا اطراف..
هل تتوقع ان تقول لك شـهد ..bull#### ؟..لا اظن ..فهي قد تعلمت في الـ daycare ..كيف ان تكون لطيفة..
في الصبح..تفتح شهد عينيها..وتحدق في دمعتك المنحدرة باسفاف ما بعده اسفاف..وتقول لك..محمد انا سعيدة..
حسنا يا شهـد..انا لم اتعلم قط في هذه الحياة ان اعلن عن سعادتي..ولم اتعلم قط ان اخفي هذه الدمعة الحروق..
نعم قد استطيع ان اخفيها في بعض المواضع..ولكن الآن..الآن..
انت سعيدة نعم يا شهد..وانا ايضا سعيد..
ثم تقول لك بمنتهى الصدق..اذن لماذا تبكي؟
ابكي؟..انا لا ابكي..ولماذا ابكي؟
هل تحدثت الى امك؟..تسالك
لا..لم اتحدث الى اي انسان..ولكني قرأت صحيفة الناشونال بوست..
هل بها خبر حزين؟ ..تسالك
ليس هو كذلك..ولكنهم يتسربون نحو المجهول..
ومن هم؟
اهلي..
ثم تصمت..
شـهد تسحب التلفاز الملون الصغير..الذي يمتد حامله كذراع طويلة..وتضع السماعات على اذنيها وتندمج في متابعة برنامجها المفضل Dora the Explorer ..وتحدثك ببعض الكلمات الاسبانية..التي تعترف بينك وبين نفسك بانك لم تفهمها الا بعدما تشرحها لك شهد بسلاسة..
ويطفر وجه عبد الواحد محمد نور من اطراف الذاكرة القصية..وجهه المستدير ولحيته الكثة..وهو يحمل كتب القانون العتيقة..ويتسكع في حواري كلية القانون..بحثا عن وزن معادلة العدالة الاجتماعية..
انه انسان..انه طيب..انه مصاب بالم في الكلية..انه يقود حركة مسلحة في دارفور..
وتهرب انت من هذه التشابكات المتعبة..
تهمس لك شـهد..بعد ان اكملت قراءة الحزن الفاقع في وجهك..وتقول لك ..هل تذكرت شئ حزين؟
تصفر انت صفير قصير..وتحاول ان تشتري صفوها بكذبة باهتة..ثم تقول لها..تذكرت صديق قديم..
تقول هي..هل له طفلة في مثل سـني..اريد ان العب معها..
وتحتار انت..
ثم بعد صمت تقول لها..لا ادري بالضبط..ولكني التقيته ايام الدراسة في السودان..
وتواصل هي تفرجها في برنامجها المفضل..
تحدق انت في وجهها ، الذي تهرب بينك وبين نفسك ان تصفه بالمتآكل..
اربعة سنوات من العمر..وثلاثة عمليات جراحية كبيرة..وتعلن شهـد انها سعيدة..
تقترب منها ايلين الطبيبة الجامايكية وتبتسم ابتسامة عرضها السموات والأرض..وتقول..هاي شهد
هاي ايلين..صباح الخير..
صباح الخير شهد..ماذا حدث؟
تقول..لقد اجرى لي طبيبي دكتور وك ورث عملية جراحية الغرض منها حماية كليتي حتى لا اتعرض لغسيل الكلي في مستقبل عمري..
تقاطعها انت بحلم حارق..وتقول لذاتك..لقد ذهب مصطفى سيد احمد بسبب ذلك..
تلمح شهـد ارتجافة شفتيك التي رمت بالهمهمة المتقطعة ..وتسالك ..ماذا تقول يا محمد؟
تقول انت..كنت احدث نفسي عن مصطفى سيد احمد..
طبعا لا تفهم ايلين عن مصطفى سيد احمد..ولكن شهد تتبرع بتقريب وجهات النظر..وتقول..هو مغني كبير من السودان ..dady his big fan ..يحب الاستماع له كثيرا ..مع انه لا يغني الراب..او الهب هوب..او حتى الجاز..
تضحك ايلين..وتسال شهد..هل تحبين سماع الموسيقى..
تقول شـهد ..احيانا..ولكني احب السباحة والتحدث الى باربي ..لعباتي المفضلة..
وتؤكد لك شـهد وللدنيا قاطبة..بانها سعيدة..
وتؤكد لك اخر الاخبار ان دارفور مثلها مثل بقية بقاع السودان تصرخ بصوت مشـروخ..
أوف..هـذا هو انا..وذاك هو الحزن..
محمد النـور كبر
2 ايار2004
http://sudaneseonline.com/board/102/msg/معارج-النزيف%3a-وتحاول-ان-تشتري-صفوها-بكذبة-باهتة-1134343917.html
| |
|
|
|
|
|
|
|
|
 Re: شهد كبر (تصوير) : See The Beauty:Autumn (Re: Kabar)
|
ما شاء الله علي بنتنا شهد،
إبداع في الإختيار وكنترول في التصوير ثم نسجت من الوان
هذا الشهر التي تبعث الكأبة في النفس لوحة تنضح بالفرح .
كبر وشهد وباقي الأسرة الكريمة لا تنسوا
تكريم الزول الجميل عمر منصور يوم السبت
إن شاء الله ...
| |
|
|
|
|
|
|
|
|
|
Re: شهد كبر (تصوير) : See The Beauty:Autumn (Re: Kabar)
|
ول ابا معاوية المدير..حبابك يا صديقي..
كتر خيرك على المرور هنا..وتعليقك سيصل الآنسة شهد..
وسوف نحرص على حضور تكريم اونكل عمر..
The smart guy who knows how to play the violin
حسب رؤية الشابات شهد وشروق..!
طبعا لغاية الليلة كايسات اونكل عبد اللطيف درار..لأنو حصل السؤال عنو لمن زارن امسودان سنة 2015..ونحن نشيل ونوصف ونشيل ونوصف..!
المهم..
كتر خيرك يا صاحب..
كبر
| |
|
|
|
|
|
|
|
|
|
Re: شهد كبر (تصوير) : See The Beauty:Autumn (Re: Kabar)
|
ول ابا نادر..حبابك يا صديقي
كتر خيرك على المرور..وزي ما قالوا اهلنا (في جاه الملوك نلوك)..
من التجارب الطريفة يا نادر ، الجماهير ديل قاعد احكي ليهم كتير عن تجربتي في الجامعة ، وقاموا زروني ليك..لمن مشينا امسودان ، قالوا لي دايرين نشوف جامعة الخرطوم..الصغيرة بتريقة قالت لي: احتمال تكون مافي حاجة ذاتها اسمها الجامعة..!
ومشينا ، عدينا بنفس البوابة الفي البروفايل بتاعك ، وفحص وسؤال وشنو كده ما عارف..!
ياخي في الـــــ
Legal road
مدخل كلية القانون ، قبال ما نتوهط كويس..بنات اللذين قالن لي:
Let us go back..
قلت ليهن:
Why؟
الكبيرة (شهد) عملت نايمة ، الصغيرة (شروق) قالت لي:
This building looks like a museum..!!!
كانت تجربة محبطة خلاص..!!
الجماعة لغاية الآن بيحلوا يطيبوا خاطري ، من شاكلة: ما فيها حاجة يا حاج..وانت اتخرجت زمان ، والحاجات احتمال تكون اتغيرت..!!
طبعا عملت نايم من حكاية كلية غردون التذكارية..!!
كتر خيرك يا نادر..
كبر
| |
|
|
|
|
|
|
|
|
|
Re: شهد كبر (تصوير) : See The Beauty:Autumn (Re: Kabar)
|
سلام عليكم
ما زول فنون أو تصوير عشان أنقد وأنظر ، لكن ومن بعد مشاهدة الفيديو لاحظت إنك عصرتها وحصرتها في حتة معينة.
لكن رغم كدا قدرت تشوف التفاصيل الصغيرة،
فما بالك لو طلعت هناك في الدلنج أو أي من نواحي غربنا الحبيب وكملت خريفين!!
أرجع ورا كمان خطوتين من دافوري ساس ويسوس وخلينا نتمتع معاك باللعب الجميل دا
تحياتي
| |
|
|
|
|
|
|
|
|
|
Re: شهد كبر (تصوير) : See The Beauty:Autumn (Re: tabaldy)
|
والله فكرة تبلدي وقعت لي واظنها فكرة ممتازة تزور كردفان الغرة في فصل الخريف
وتورينا كمان مشاهد الخريف في امسودان..
واذا في اي طريقة تزور جبل مرة حنكون حاجةةما تخلص لاننا عرفنا من قبل من وصفك لطبيعة
الجمال في جبل مرة في بوستات سابقة ان جبل مرة من المناطق السياحية العالمية ولكنها مهملة
ونسمع ان زيارة جبل مرة الان محفوفة بالمخاطر نسبة للحروبات الدائرة في المنطقة...
اما ان لهذه الحروبات ان تنتهي حتى ينعم المواطن في المنطقة بالسلام والامن والطمانينة وان
تزدهر جبل مرة وتكون قبلة سواح العالم ومهيئة لاستقبال الصغيرات مثل شهد وزميلاتها للابداع
والابتكار....
والتحية مرة اخرى للمبدعة شهد،،،
ودمت ول ابا كبر بالف خير وصحة وعافية
| |
|
|
|
|
|
|
|
|
|
Re: شهد كبر (تصوير) : See The Beauty:Autumn (Re: Basamat Alsheikh)
|
تحية لابنتنا شهد
تحية لوالدتها المناضلة
و تحية ل كبر.
عاوز اعلق بي هناك يا كبر علي موضوع عزة
لكن لكن الزمن ممحوق ....
لكن شهد تستحق ان نتحدث عنها ...
فهي شابة مشحونة بالفرح و البهجة و الجمال
و اكيد لها مستفبل باهر تحت رعاية الاسرة الكريمة
لها تحياتي يا كبر ....
| |
|
|
|
|
|
|
|
|
|
Re: شهد كبر (تصوير) : See The Beauty:Autumn (Re: Hamid Elsawi)
|
ول ابا تبلدي..حبابك يا صديقي
ولينا طولة ..
كتر خيرك على المرور..والملاحظات سوف تصل لشهد..
حكاية الحصر والعصر..ما حصل يا صديقي ، والشباب ديل هنا براهم بيعملوا حاجاتهم..والموضوع والموقع هو من اختيار شهد براها..وكانت في زيارة لبعض صديقاتها..عندها فكرة مشروع تاني ، دايرة تمشي تصور في الداون تاون بكالقري..ولا ادري كيف سيكون الفيديو الجديد..
بالنسبة للدلنج وكردفان ، اخر مرة مشت زيارة للدلنج في سنة 2012 ولم تتمكن من وصول الدلنج في سنة 2015 ، لكنها كانت معجبة بفكرة الجبال في نص المدينة..وملامح الخريف..وكت داك كانت لسع في الأبتدائي..وان شاء الله في مرة قادمة نختار لينا وكت مناسب ونمشي..!
حتى اللحظة بتتذكر زيارتها لمنزل استاذنا عبد الرحمن بليا..وهو معرض دائم..وحتى اللحظة..محافظة على الحاجات التي اهداها ليها بليا..وهي حاجات طريفة :بخس ، مفاريك ابنوس ، طبقة صغير ملون..!
ياخي الدافوري ده طلع عينا واكل سنين العمر فينا وما جاب حقو..وربنا يهدينا..
كتر خيرك
كبر
| |
|
|
|
|
|
|
|
|
|
Re: شهد كبر (تصوير) : See The Beauty:Autumn (Re: Kabar)
|
بت ابا بسمات..حبابك يا صديقتي
كتر خيرك على المرور والإقتراحات..
وربنا يجيب السلام لبلدنا ، لأنو فيها تفاصيل تفوق الوصف والخيال..
شهد زارت كردفان اخر مرة 2012..ووصلت الدلنج..لكن حاجات بسيطة خلتها تاخد انطباع ما لذيذ..عشان كده سنة 2015 اعتذرت عن السفر الى الدلنج..
في سنة 2012 يا بسمات..لمن مشينا الدلنج الأوضاع الأمنية كانت فيها ربكة شوية..وحكاية الدخول تحت السراير عند مرور الأنتنوف كانت تجربة صعبة شديد بالنسبة للأطفال..اضافة الى انو ناس حامية الدلنج كانت كل ما الشمس تغيب عندهم شغل مدفعية كده اسكتي ساكت خليهو..حاجة مزعجة ولمن الشباب ديل عرفوا انو دي مدفعية زادت عقدتهم تجاه المنطقة..!
مرة زرنا سوق الدلنج ، ولاحظنا حكاية ناس بالزي المدني وشايلين كلاشنكوفات..برضك دي لخبطت عليهم الحاجات..وغلبني ابرر ليهم الحاصل..ياخي بلعوني ليك فكرة الفيدرالية في السودان الكنت قاعد اقدهم بيها..لأنو اول سؤال بخصوص الظاهرة بتاعة السلاح: هل السودان مثل الولايات المتحدة ممكن الناس (المدنيين) يشتروا السلاح ويشيلوهو في الأسواق؟..
مع انهم شفع ، كانوا بيسألوا هل هناك مستشفى اطفال في الدلنج؟
واذكر بعض من بينات الجامعة كان بيجن يتنوسن معاهن باللغة الإنجليزية..ده غير الجماهير البتجي تتفرج فيهن وهن بتونسن مع بعض..!
في تلك التجربة..الشابات ديل ما نامن بارتاح الإ لمن زرنا خالتهن في بلدة اسمها ود عشانا (اخونا تبلدي متذكرها كويس)..لأنها هادئة وطراوة ..وعجبتهن حكاية الرملة..وحكاية الناس تمشي حفيانة في الحوش..!!
هناك بعض الفيديوهات عن جبل مرة ، ولو لقيت فرقة نفتح بيها موضوع وبعض الإضاءات عنها..
كتر خيرك يا بسمات..
كبر
| |
|
|
|
|
|
|
|
|
|
Re: شهد كبر (تصوير) : See The Beauty:Autumn (Re: Kabar)
|
صديقي حامد الصاوي..حبابك
كتر خيرك على المرور ..وملاحظاتك تصل الأنسة شهد..لأنو وعدتها اعرض عليها كل الملاحظات هنا..
الشباب هنا في كالقري يا صديقي ، كل واحد فيهم عندو رؤية ونظرية وفكرة..بس زي ما عارف الظروف والضغط..وياريت كل الأسر تلقى فرقة تسمعهم ..صدقني حاجاتهم جميلة ومفارقة..!
ونتمنى ان تجد فرصة لزيارة بوست عزة في هواك..وهو انتج اسئلة كتيرة الواحد بيحاول يلخصها ويجاوب على ما يستطيع وفقا لوجهة نظرو..
كبر
| |
|
|
|
|
|
|
|
|
|
Re: شهد كبر (تصوير) : See The Beauty:Autumn (Re: Kabar)
|
ول ابا عمر ابو عاقلة..حبابك يا صديقي
كتر خيرك على المرور..
التحية للآنسة لينا..
ياخي الشباب ديل عندهم افكار ومفارقات طريفة للغاية..واكيد السودان منجم كوميديا بالنسبة ليهم..
احد الصديقات..زارت السودان ، عندها بنوتة ظريفة..اها الحبوبة شايلة ليك البنية وطابقاها معاها في اي مشوار..مرة مشت بيت بكا وساقت البنية معاها..والله ياعمر لو سمعت البنية بتحكي الفكرة..لا تعرف تضحك ولا تعرف تبكي..!!
حكاية النوم في الحوش ، الزحمة ، غياب الإتكيت ..!
غايتو لمن مشينا ورجعنا..الأطفال عجبتهم حكاية (ثانكيو)..!
كل لحظات بتكون عالقة بذاكرة الأطفال..
كتر خيرك
كبر
| |
|
|
|
|
|
|
|
|
|
Re: شهد كبر (تصوير) : See The Beauty:Autumn (Re: Kabar)
|
حبيبنا كبر .. تحياتي .. مودتي ..
والتحية خاصة للإبنة شهد ..
يا سلام على العالم الأول يفتح الافاق أمام المواهب ..
ربنا يحفظها وإخواتها ..
والعائلة .. أتوقع أنهم إكتسبوا جينة السرد والحرف المنمق من والدهم
تحياتي يا رائع ..
| |
|
|
|
|
|
|
|
|
|
Re: شهد كبر (تصوير) : See The Beauty:Autumn (Re: Kabar)
|
عليك الله يا استاذ كبر قول للصغيرة شروق القالت عن جامعة الخرطوم:
the building looks like a museum
قول ليها انتي ظلمتي جامعة الخرطوم ظلم الحسن والحسين، واتلومتي لوم اليابا فضيل،.
واليابا فضيل خليها تسال منه عبد العزيز ود الفاضلاب،،
وقول ليها المبنى العتيق ده تخرج منه عمالقة في الادب والعلوم والهندسة والطب والقضاء
واناومرة قريت مقال تاريخي عن جامعة الخرطوم واستعرضت قائمة باسماء علماء وبروفسيرات
تخرجوا من هذه الجامعة، وقلت في نفسي معقولة مافي اداريين بالكفاءة التي كانت عند مديري
تلك الجامعة في ذلك الوقت حتى يعيدوا للجامعة رونقها ومجدها وشهرتها ،،،،
وتحياتي لها ،،،.ودامت بالف خير وعافية
ودمت بالف خير وصحة وعافية،،،
بسمات
| |
|
|
|
|
|
|
| |
Kabar
يحي قباني
عمر دهب
عمر أبوعاقلة
حيدر حسن ميرغني
محمد حمزة الحسين
معاوية المدير
الطيب رحمه قريمان
Nader Abu Kadouk
Hamid Elsawi
علي عبدالوهاب عثمان
فيس بوك
تويتر
انستقرام
يوتيوب
بنتيريست