|
|
|
 Re: فلنُعــزي عضــوة المنبر سلمى الشيخ سلامة (Re: اخلاص عبدالرحمن المشرف)
|
رحم الله الأستاذة فاطمة وغفر لها وجعل الجنة مثواها إنه سميع قريب مجيب الدعاء..
اللهم تقبلها عندك مع الصالحين
اللهم اكرم نزلها ووسع مدخلها وانر قبرها
اللهم تقبل عملها الصالح من أجل وطنها خالصا عندك بلا رياء وثقل به ميزانها..
اللهم لا تفتنا بعدها ولا تحرمنا أجرها.
..
خالص عزائنا للأمة السودانية
ولمن عرفوا فضلها ولمسوا إخلاصها..
..
عزاؤنا الخاص لآلها
وللدكتور طارق الشيخ سلامة..
والأخت سلمى الشيخ سلامة
وإنا لله وإنا إليه راجعون
| |
 
|
|
|
|
|
|
|
|
Re: فلنُعــزي عضــوة المنبر سلمى الشيخ سلامة (Re: عمر أبوعاقلة)
|
.
يا خاله يا فاطنه
مشوار مشيتي سنين
راوياهُ دم وأنين
ساقياهو دمع العين
شِلتي الجِراح بالصبر
ضُقتي الوجع والبين
في سبيل وطن مقهور
كافحتي يا فاطنه
أيام سنين ودهور
فيكي العُمُر بيمُر
وانتِ الدهب والدُّر
ممكونه يا صابره
شُفتي العذاب المُر
لا خُفتي من جبار
لا أرهبِك عسكر
سودانِك الجواك
باقيالو خير وملاك
شايلاهو ضي العين
حاضناهو في قلبِك
ساقياهو شوق وحنين
يا خاله يا فاطنه
القلب صار محزون
يا ما سه يا دُرَّه
إنتي الدهَب مكنون
ودَّعنا فيكي المجد
من شعبِ ليكي بحِب
وفخور وليك ممنون
يا يُمَّــه يا فاطنـه
يا يُمَّــه يا فاطنـه
يا يُمَّــه يا فاطنـه
.
.................... عادل حسبو رضوان
| |
|
|
|
|
|
|
|
|
|
Re: فلنُعــزي عضــوة المنبر سلمى الشيخ سلامة (Re: عباس محمد عبد العزيز)
|
..
أكدت اللجنة القومية التي تكونت أمس السبت من القوى السياسية والتنظيمات
الديمقراطية النسوية وأسرة الفقيدة وأهل حي العباسية ، إنها ستتكفل بتكاليف
نقل الجثمان ، وسترتب كافة التفاصيل المتعلقة بالتشييع والتأبين .. وأشارت
إلى أنها ستوافي الشعب السوداني بكافة التفاصيل لاحقاً ..
| |
|
|
|
|
|
|
|
|
|
Re: فلنُعــزي عضــوة المنبر سلمى الشيخ سلامة (Re: محمد فضل الله المكى)
|
.
يا أم احمد
توبِك جارِّي
طيفِك مارِّي
بين العِفَّه وعرق الناس
ذِكرِك باقي
شرفِك عالي وما بِنداس
إنتِ علامه
وشوق وكرامه
وكيف الراس
إنتي الهِمَّه
وباقي الذِّمه
وقول الفاس
يا أم احمد
أحمد شاهِد
ذِكرِك خالِد
إنتِ الصامده عدوِّك شارِد
عملِك ظاهِر ونورِك باهِر
وعرقِك كافي
يا أم احمد ألفِ سلام
ومافي ندامه وحبك صافي
يا أم احمد طفِّي النور
سريرِك دافي
وتاني سلام ضوقي الراحه
ونومي عوافي
ونومي عوافي
ونومي عوافي
.
......................... هشام الفيل
| |
|
|
|
|
|
|
|
|
|
Re: فلنُعــزي عضــوة المنبر سلمى الشيخ سلامة (Re: يوسف الطيب احمد إدريس)
|
.
مِن ضيِّ هاتيك العيون
العميقة
ستتقد في عُتمة الليل
قناديل الحقيقة
وسيكتب التاريخ سطراً
لن ينطفي أبداً بريقه
لاشيء يصِفُ الحزن
يا أم الوطن
يا نخلة بلادي
الشاهِقة
السامِقة
يا رمز السماحة يا أنيقة
ما انحنيتِ
كي تمر الريحُ يوماً
ما انثنيتِ
بل تشدي الأزرَ دوماً
لم تحيدي عن النضال المستقيم
وعن دروبه
.
.............................. د. منال بشير عباس
| |
|
|
|
|
|
|
|
|
|
Re: فلنُعــزي عضــوة المنبر سلمى الشيخ سلامة (Re: بابكر قدور)
|
.
اللهم ارحمها واغفر لها
واجعل الجنة مثواها
اللهم ان كانت مُحسنةً فزِد في حسناتها
وإن كانت مُسيئةً فتجاوز عن سيئاتها
اللهم اغسلها بالماء والثلج والبرد
ونقِّها كما يُنقى الثوب الأبيض من الدنس
.
أحسن الله عزاء آل المناضلة فاطمة احمد ابراهيم والعزيزة سلمى الشيخ
وكل شرفاء الوطن المكلوم
| |
|
|
|
|
|
|
|
|
Re: فلنُعــزي عضــوة المنبر سلمى الشيخ سلامة (Re: محمد فضل الله المكى)
|
كذا فليَجلَّ الخطبُ وليَفدحِ الأمرُ فليسَ لعين لم يفضْ ماؤها عذرُ
صادق التعازي للأخت سلمى الشيخ سلامة وشقيقها الدكتور طارق
وعموم آل الشيخ سلامة وللأمة السودانية جمعاء
في فقد علم من أعلام النضال والشموخ والعز السوداني
وترجلت فاطنة بعد رحلة عمر تكتب بماء الذهب وتعلق في كل جدران منازل السودان
فاطنة أستاذة الأجيال ومعلمة الوطنية الحقة في القرن المنصرم والحاضر وربما قروناً قادمات
من لم يبك فاطنة من حنايا أضلعه فليتحسس إنسانيته
____
الحليلة
| |
|
|
|
|
|
|
|
|
|
Re: فلنُعــزي عضــوة المنبر سلمى الشيخ سلامة (Re: خالد العبيد)
|
.
............................................. وقفات في مسيرة فاطــنه
.
* الميلاد 1939
* جِدها أول ناظر لمدرسة للبنين وإمام مسجد .
* والدها تخرج في كلية غردون معلماً .
* والدتها من أوائل البنات اللائي حظين بتعليم مدرسي .
* درست في مدرسة ام درمان الثانوية للبنات ، وكانت لها جريدة حائطية باسم ( الرائد ) .
* قادت أول اضراب نسائي بالسودان ، يطالب بعدم حذف المقررات الدراسية العلمية واستبدالها بالتدبير
المنزلي والخياطة ، ونجح الإضراب في تراجع ادارة المدرسة . ومن هنا بدأت في الإنخراط السياسي
ضد الإستعمار .
* عام 1952 ساهمت في تكوين الإتحاد النسائي مع مجموعة من القيادات النسائية الرائدة .
* من انجازات الإتحاد النسائي ما جاء في دستور 1954 المعدل ، حق التصويت والترشيح لدخول
البرلمان ، وحق التمثيل في كل المؤسسات التشريعية والسياسية والإدارية للمرأة على قدم وساق مع
الرجل . والحق في الأجر المتساوي العمل المتساوي ، والمساواة في حق التأهيل والتدريب والترقي،
ومحو الأمية بين النساء ، وتوفير فرص التعليم المجاني ، وتوفير فرص العمل وتحويل المرأة إلى
قوة منتجة ، وتحديد سن الزواج بحيث لا يسمح به قبل البلوغ .
* عام 1954 انضمت للحزب الشيوعي ، وبعد فترة دخلت اللجنة المركزية ، وهو أول حزب يُدخِل
في تنظيمه عنصراً نسوياً .
* في يوليو 1955 تسلمت رئاسة تحرير مجلة صوت المرأة التي يصدرها الإتحاد النسائي .
* في رئاستها للإتحاد النسائي 54 ـ 1957 حرصت على استقلال الإتحاد من أي نفوذ حزبي لضمان
مسيرته كمنظمة جماهيرية ذات قاعدة عريضة .
* شارك الإتحاد النسائي في ثورة اكتوبر 1964 .
* عام 1965 انتخبت فاطنة عضواً بالبرلمان كأول امرأة في العالم العربي وأفريقيا تدخل البرلمان .
* بفضل مجاهدات الإتحاد النسائي ، وما ان حلَّ عام 1969 حتى نالت المرأة السودانية حق
الإشتراك في كل مجالات العمل بما فيها القوات المسلحة والشرطة والقضــاء ، وتحققت عدة
مكاسب للمرأة .
* عام 1971 تم اعدام زوجها ضمن قادة الحزب الشيوعي السوداني ، وتم وضعها في الإقامة
الجبرية لمدة عامين ونصف تعرضت فيهما لكثير من العسف .
| |
|
|
|
|
|
|
|
|
|
Re: فلنُعــزي عضــوة المنبر سلمى الشيخ سلامة (Re: محمد فضل الله المكى)
|
لا حولة ولا قوة الا بالله العلي العظيم ,, اللهم ارحمها واغفر لها واجعل الجنة مثواها ,,, فقد جلل لامراة كانت رمزا للنضال والكفاح والتضحية والاباء والصمود نسال الله ان يتقبلها قبولا حسنا وان يلهم الها وزويها ومعارفها ورفقائها الصبر والسلوان ,,, احر التعازي للاخت الزميلة الاستاذه سلمي الشيخ سلامه ونسال الله ان يتقبل الاستاذة فاطمة قبولا حسنا وان يلهمهم الصبر الجميل ... الدوام لله ...
ياسر العيلفون .....
| |
|
|
|
|
|
|
|
|
|
Re: فلنُعــزي عضــوة المنبر سلمى الشيخ سلامة (Re: ياسر السر)
|
.
.................................. وقفات في مسيرة فاطمــة
.
* اضطرت لمغادرة الوطن عام 1990 وواصلت نضالها من المهجر ، بتنظيم التظاهرات وعقد الندوات
من أجل الوطن .
* عام 1991 تم اختيارها رئيسة للإتحاد النسائي الديمقراطي العالمي ( IDWU ) كأول امرأة عربية
افريقية مسلمة من العالم لثالث .
* عام 1993 حصلت على جائزة الأمم المتحدة ( UN AWARD ) لحقوق الإنسان .
* من كتبها :
1/ المرأة العربية والتغيير الإجتماعي .
2/ حول قضايا الأحوال الشخصية .
3/ قضايا المرأة العاملة السودانية .
4/ آن أوان التغيير ولكن !
5/ أطفالنا والرعاية الصحية .
.
* يالِبؤس الأرض .. ويا لفرحة السماء
| |
|
|
|
|
|
|
|
|
|
Re: فلنُعــزي عضــوة المنبر سلمى الشيخ سلامة (Re: محمد فضل الله المكى)
|
| Quote: يالِبؤس الأرض .. ويا لفرحة السماء |
..
قرأت قبل دقائق هذا النعي غير المسبوق في إحدى صفحات الفيس بوك
كتبته
سناء عثمان التوم..
Quote: ونزلت دمعة حارة علي خد امي النعمي بت محمد سعد لما كلمتها برحيل فاطنة بت احمد... سكتت...
ثم جلست متوهطة سريرها.. وقالت...( بخت المشت ليهم بهناك....) ... للحظة تنبهت ان حزن الارض الشاسع يقابله فرح هستيري بيغادي في السماء...
عندها تلصص الخيال علي حيطة السماء وسمع......
صوت (المبشر).محلقا بين السموات السبع ...
ينادي في اهل السماء . هووووي ها... ياناس جنة السودان.الحنان في كل الجنان ياالمليون ميل جنة مربعة البشارة. البشااااارة .. قالوا فاطنة جاية عليكم بيجاي.... وانتشر الخبر....
وعم كل الجنان....
وتسارعت الجموع نحو بوابة السماء....
وسط سخط الملايكة الواقفين عند الباب....
اها خلاص اتلموا جو... اصلا ماعندهم صبر الناس ديل...
اجاب ملاك جميل اسمر..
ياخ الجاية دي زولة عزيزة وغالية...
اخير تستنفر السموات الدني وتعلن حالة طؤاري....
ومن هناك بدأت الجماهير الهادرة تزحف نحو البوابة....
وفي المقدمة..و بقامته الفارعة وببدلة سوداء غاية في الاناقة يقف متبسما ممسكا بجريدة.. حبيبها الشفيع وجمبه عبد الخالق ونقد وقرنق و و و وكثير من الرفاق .
و حولهم كل الكان هنا مساكين ومتعبين يقفون مرصوصين بجلاليب ولبسات متنوعه كلا علي ما يكون. من الجمال .. وبي هنا
اصطف الشعراء والمغنين...
محجوب شريف والفيتوري وابو امنه حامد..حسين بازرعة ومجدي النور...
التفت الحسين الحسن نظر و نظر واعاد النظر ثم سال وين حميد..ياناس .
اجاب احدهم (حميد في جنته يحش في التمر ما اظن سمع.... والا لا لا.. اهو داك ظهر) ...
يقدل كما الترابله السماويين يطير ولا يطير...يسير ولا يسير وبرفقته عمر الدوش و محمد عبد الحي.... وغير بعيد جلس ابدؤود ووردي وعثمان حسين والعاقب وابراهيم عوض والكاشف ...التفت خوجلي عثمان قال.
اها يااستاذ جهزت لحن (.حباب فاطنة. .)
رد وردي نعم جاهز...
ونادي يامحمدية... فرقتك جهزت..
اجاب ايوه بنعمل في البروفه الاخيرة...
وقف وردي يستمع...باهتمام شديد.. وقال... ياااااا اندريا... انت نسيت العزف والا شنو... سوفت سوفت ياخ ما كدا.غنا غنا....
ابتسم وليام واعاد المعزوفة... هناك ماف زعل.... ... ايوه ايوه حاضر سعادتك.وابتسم اميقو. وعبدو وحسام وبدر الدين .فرقة ماسية فعلا.. . وانهمك الجميع...في البروفات.. وطبعا محجوب شريف حضر قصيده فخيمة لاستقبالها.... فسال حميد انت حضرت شنو.... حميد قال.... البيجي في راسي ساعه حضورها بقوله.... هي التجي مالها اتاخرت....
رد ابداؤود... يكون عمك الملاك جاي بالطيارة السودانية.... كتمت الملايكة ضحكتها.......
رد عليهو .. علي المك....
(انت جنك دا ما بتخليهو والله يوم بيطردونا من الجنه بسببك) انفقع الجميع بالضحك .....
مصطفي ود المقبول غير بعيد يوزن في عوده... و جمبه بوب مارلي..بجيتاره ومحمد عجاج بالبيانو يساعده في الوزن... وغير بعيد منهم يطنطن ود الزومه في اضان النعام ادم... انت البوب مارلي دا شيوعي.... رد النعام ..( ا بخبرو.... تراهو قاعد من الدغش هني وحكمة الله ينضم عربي ذي الرصاص.)....
وبيجاي حواء الطقطاقة سخنت دلوكتها واترصنا جمبها نسوان كتار سمحات ومنديات..جنس سماحة عليهن ... يحدرن ليهن الحور العين وينقنقن.... عليك الله شوفي سماحة السودانيات ديل كيف..... ردت صاحبتها...... كيف ما سمحات وهن عندهن شنو غير يدلكن ويدخنن اليوم كله..هنا ....... نهرتها عمتي بت التوم.... هييي يالخواجيات قومن من هنا فسراع بلاش غلبه معاكن.....
ومن الصف الخلفي رد عوض خالي ضاحكا... ياخ ديل ما خواجيات قولن ليكن ديل..... حور حور..... غايتو ههههههههه..وفي الخلف العجاجي قايمي بحفلة طمبور ويردد يس عبد العظيم.. (ياعابرة عبر الدم شايلاك شراييني)... وهنا مردوم وجراري وغناء ورقيص من كل انحاء الجنان السودانية. كلو عندو دين وكلو عندو راي. يغني محمود عبد العزيز. والناس بهناك مبتهجة مقرره ان هذا اليوم عيد ..
وفي ركن جلس دكتور عماد الامين واحمد المجذوب يشربوا في سيجار بينسون.. وامامهم كاسات من خمر الجنان... ومنهمكين مع شباب كثر في عمل البوسترات واللافتات. وملاك ضغنتوتي يطنطن ما تجوطوا الحتة.. رتب علي كتفه العميري وقال ليهو نحنا بنضاير المكان بعد نهايه الاحتفال.. اغمي علي الملاك من شدة. جمال صوت العميري... وحينما انهمك شهداء رمضان في تركيب الانوار جاء بهنس وقال. دقيقة نرسم لوحة نورية للست فاطمة... رسمها لوحة نورية وشهق الجميع..حتي الطيب صالح صاح... يا الله ياالله عليك يابهنس... عندها خجلت الملايكة وقالت في سرها... ياداب عرفنا ليه الله طلب مننا نسجد لبني ادم ديل.... .وجمبهم هنا جلس زيدان والجابري وخليل اسماعين مدورين حفله براهم.ومعاهم صالح الضي.. حفلة هنا وحفلة هناك....لمة هنا ولمة هنا... ... وهناك عند مدخل البوابة كان الصمت الوقور والشوق يرفرفان علي الحشود......وهناك الشوق بيتشاف عديل وكمان الحب والسلام...يتجاروا وسط الناس حفايا .... وبينما يجتهد بوابين السماء بتزين بوابة الدخول بابهي مايكون.......انتظارا لصعود القديسة فاطنة بت احمد ابراهيم.حسب الاوامر العليا المشددة بان تكون في كمال البهاء ......نادي العاشق المشتاق الشفيع بصوت جهور الشاب الدكتور علي فضل وقال ليهو تعال اقيف معانا قدام..... فاطمة مشتهاك.ياعلي .جاء وبرفقته ضحكاته وحبه للغلابه ثم .. ووقف الجميع...فجاتن حينما شق الجموع شاب اسمر رفيع اسمه هاشم العطا ببدلة رسمية زاهية وملونة وصاح.. صفا انتباه.... فاطمة جات....
.وردد الجميع.. هتاف.
فاطمة النايبة الحرة جات
... فاطمة النايبة الحرة جات..
.#. ياااالبؤس الارض....
. وفرح السماء..الان |
| |
|
|
|
|
|
|
|
|
|
Re: فلنُعــزي عضــوة المنبر سلمى الشيخ سلامة (Re: الأمين عبد الرحمن عيسى)
|
.
........... فاطنة
.
فاطنة من ليل الأماسي
وشوشات شايلة البشاشة
وفاطنة في عِز الهجاير
همبريب شبعان دُعاشه
وفاطنه بتذوِّب سحابة
صابه شان تسقي العطاشا
فاطنة يا بِت عازه ساره
فاطنة يا ضهر العذارى
يا جناح شوق العصافير
المِطوِّله من صِغاره
يا نَفَس فرح البشاره
بي فراق ناساً مهاجره
سايبه داره وا خساره
فاطنة وقت النيل يِحمِّر
ويوم يفيض وامواجو تدفِر
تتقلِب شتله وتخدِّر
وتدي للناس كُلْ ثِماره
فاطنة وقت الليل يِفلِّل
هي تضوي للناس الحيارى
فاطنة ما قوّاله فاتنه
فاطنة في محياها فاتنه
وفاطنة إنتن يا بناتنا
وفاطنة جاتنا الليله جاتنا
جاتنا جاتنا وجات نجاتنا
وابشِرن عاد يا بناتنا
فاطنة قالت مرَّه نامت
ولما صِحيت من مناما
فاطنة قالت شافت الله
وفاطنة عمرها ما بِتكضِب
في عيونه أنا شُفت الله
شُفتو شُفتو ، شُفتو والله
شُفتو والله في عيونه
وشُفتو في البسمه الحنونه
وشُفتو في الدمعة الهتونه
شُفتو في طِيبة كلامه
وفي براءته والوسامه
شُفتو في طيبة سلامه
شُفتو شُفتو
وشُفتو ياما وياما شُفتو
فاطنة هي ليل الأماسي
وشوشات شايله البشاشة
وفاطنة في عِز الهجاير
همبريب شبعان دُعاشة
وفاطنة بتذوب زي سحابة
صابه شان تسقي العطاشا
.
....................... علي اخمد جار النبي
| |
|
|
|
|
|
|
|
|
|
Re: فلنُعــزي عضــوة المنبر سلمى الشيخ سلامة (Re: Mohamed Foto7li)
|
.
.......... أغنية حب لفاطنة
يلاّ يا سِت السماحة
يلا نومي وأخدي راحة
شوفي بلداً غير بِلاداً
عشعشَت فيها القباحة
العصافير الحزينة
فاقدة حرية صراحة
من كفوفِك كان شرابه
وكان ضميرِك ليها واحة
كان بِتشكيلِك همومه
والظُّلُم والإستباحة
كلمي الزول البيقابلِك
واحكي ليهو بِكُل صراحة
كلميهو عن السِّحاب
الشاف خلاف ساحاتنا ساحة
وكيف شمِسنا بِقت تِضلِّم
في الأفق قبل اصطِباحة
كلميهو عن الكرامة
كيف بِقت للذُّل مُباحة
كلِّميهو عن الخفافيش
كيف لِقَت في بلادنا راحة
وكيف تِسبِّح بالطرب
كلما اتعالت مناحة
كلميهو عن الضرورة
والتحلُّل والتَّمكُّن والإزاحة
وسفسفة قوت المساكين
بيهو يزدادو انشِراحا
كلميهو عن قلوبنا
وكيف تزيد كُلْ يوم جِراحة
والمساكين بالغباين
سابحة في الدمعات سِباحة
غايتو يا فاطنة الجميلة
عِشتي دنياكِ بكفاحة
عِشتي بي شرف النضال
وقابضة بي إيديك سِلاحة
الضِباع مهما استشاطت
والكِلاب ازداد نِباحة
مشيتي دربِك بي شجاعة
وقلتي قولِك بي سجاحة
عِشتي لي وطنِك ورحلتي
وكنتي لي وطنِك سماحة
يلا يا سِت السماحة
يلا نومي وأخدي راحة
شوفي بلداً غير بِلاداً
عشعشت فيها القباحة
.
..................... أحمــد الفرجـوني
| |
|
|
|
|
|
|
|
|
|
Re: فلنُعــزي عضــوة المنبر سلمى الشيخ سلامة (Re: محمد فضل الله المكى)
|
.
........... في رثاء فاطمة
الشاعرة التونسية فوزية العلوي
عَبرَت فاطِمة
مُحَملة بالحَبَق والتوت البرِّي
تتبعها الرنات وقُبرات الوادي
وراعية كان قد ضيعها البرق
فسكنت في شجر الطلح
لفاطمة أثواب في لون الخريف
ومَحْرَمة كحجر الوادي
ولها إذا تاهت شامةٌ في عنقها
مُذ غابت فاطمة بكى النهر
والليلُ بات ناسِكاً
والفجرُ يأتي مُتلجلِجاً بغير عينيها
السباع أصابها الإعياء
والوعول التي كانت تنادي السحاب
اختفت في السهوب البعيدة
لكن فاطمة لم تغِب تماماً
تأتي بين قمرٍ وقمر
بين موسِمٍ وموسِم
بين جدولٍ وآخر
لها أعشاشٌ تترقبها
وفراخها التي تتفقد خوافيها
وخِليات النحل الذي يُعرِّش في الجِبال
فإذا عبَرَت مُحمَّلة بالحَبَق والتوت البري
صفَّق النهر وتوثبت السباع
وغنَّت كل القمريات دفعةً واحدة
وسال العسلُ على أحجار السفح
فالتصقت كل الفراشات
حالمة بذلك الربيع الأزلي
.................................. فوزية العلوي
| |
|
|
|
|
|
|
|
|
|
Re: فلنُعــزي عضــوة المنبر سلمى الشيخ سلامة (Re: اخلاص عبدالرحمن المشرف)
|
.
............ بنتاً في سماها علم
................... محجوب شريف
.
شِنو الخلاها
تبقى كِتابه وشفاها
بِتّاً في سماها عَلَم
قلم في إيدا ياتو قلم ؟
قلم يشفيكَ مما فيك
إذا كَتَم الحقيقة ألَم
صريحة صراحة
بل لمّاحة ... تفهما طايره
لن تلقاها في سِكَّة مذمَّه ولم
قلم ما يزيل بلم في رايا حِبرو سراب
وسيدو أقَلَّ حاجة ظلَم
وما بتقدر عليها تفوته
ما مسنودة بي جبروته
ولا مالاً معاهو بيوتا
هيبــتا بسْ
وبعضاً من كلامه سِكوته
ما تعمل مُهِم
حتجيها تستناها في مكتب تِحِت قِسِما
ديك اللافته ... داك اسِما
بصَمنا .. بسمَتا .. ورسِما
وضوح الشمس لو تعمل عمل خِتِما
كذلك أُنثى بالكامِل
بسيطة بساطة مرموقة
وبين الرِّفعة والعادية
ما بِتحِسَّها الفرقة
بين الورقة والطِّرقة
بين الشاشة والمُقشاشة
شايلا كِتابه والهبّابة والهيدفون
وتَكْية لطيفة جنب اللون
وجَفَّ .. سِهِر حَلِق قلما
تغمض ياخي شان ترتاح
يرفرِف في الصباح عَلَما
وفي الأفراح وفي الأتراح
بِتِتحزَّم
تهِز كانونه حتى رمادو يِتحَتا
حق الخَتَّة والنسوان
بتعرِف بابِن السِّري
وسِط جاراتا بِتجامِل وبِتعامِل
تزور الجارة والحامِل
وتتونَّس مع البنوت ضُحى الجمعة
عن التعليم والحرية والسُّمعة
عن الصبقة اللي بتسبب فشل كلوي
عن السُّترة البتخلي الحلم ممكن
حبيبه تَخُتُّو في الصورة
وما بتخلي في جواها إنه حاجة مصرورة
خريطة بسيطة للعالم
عَرَق نَقَّط وماسورة
ترى الفانوس وما النَّجَفة
لهذا هكذا ظلَّت .. تقول الحالة مستورة
تختها في الجرِح يبرى
تعَرْفَ الكمدة بالرمددة
والله يِكضِّب الشينة
سَمِح توبه سند عِمَّة
وهِمة تدرِّج العاطِل
إذا ما الوالِد استنجَد
ترسِّل ليهو ود عينا
تساعِد أمها تَتَكِّل
تَلَبِّس ناس .. وبِتْأكِّل
محل ما تمشي بِتشكِّل ... أهمية
قلم ما فيهو أنفاس الحياة اليوماتي أُميَّة
.
رحمك الله يا محجوب شريف
| |
|
|
|
|
|
|
|
|
|
Re: فلنُعــزي عضــوة المنبر سلمى الشيخ سلامة (Re: محمد فضل الله المكى)
|
فاطمة احمد تنازعتها ملائكة الرحمة والانبياء
تنازعتها ام در وجوبا
تنازعها احبابها ودراريش الحلقة
وتنازع رفاقها حول الجسد المسجي
طوبتك الكنائس قديسة
ورفعتك المأذن شهيدة
وكفر بك بعض الرفاق
علي شط النيل خرجت عرائس البحر وغابت تماسيحه
لجلال نساء السودان تفتح ورد وزهر وغني عصفور
عصفور صغير ترعاه قلوب الصالحين
عصفور فاطنة التي أحببت
| |
|
|
|
|
|
|
| |
محمد فضل الله المكى
الأمين عبد الرحمن عيسى
ابوحراز
عمر أبوعاقلة
عباس محمد عبد العزيز
احمد حمودى
يوسف الطيب احمد إدريس
بابكر قدور
مهيرة
Mahmoud Mustafa Mahmoud
elhilayla
محمد على طه الملك
الطيب شيقوق
خالد العبيد
Jamal Mustafa
ياسر السر
فتحي عباس نقد
Muna Khugali
Yasir Elsharif
نعمات عماد
ghariba
أحمد قلوب
سلمى الشيخ سلامة
Mohamed Foto7li
munswor almophtah
الفاتح ميرغني
فيس بوك
تويتر
انستقرام
يوتيوب
بنتيريست