إهداء خاص ل ول أبا عبد الكريم الأحمر .. غبت كتير يا ول أبا .. ونحن نتذكر بكل حرف جميل كتبته في هذا المنبر ..
وبصفتى رقاص نقارة في بواكير عمري .. هذا الفيديو يعتبر من روائع رقص النقارة .. النقارة والمردوم تمتازان بلياقة بدنية عالية جداً .. وهؤلاء الشباب طاقات متفجرة .. ما شاء الله.
حينما حضرت إلي الجامعة .. ومن شدة القعدة الطويلة أصبت بألم حاد في فم المعدة ربما من أكولات ناس المدن .. ذهبت الطبيب، بعد أن هبش الطبيب علي بطنى، سألنى أي رياضة تمارس .. قلت لا شيئ! .. قال والله كذاب هذه عضلات بطن زول رياضي من الطراز الأول .. سألنى تذكر نوع الرياضة التي تمارسها .. قلت له أها وجدتها: المردوع (ونحن نقولها هكذا) والنقارة .. ضحك الطبيب بصوت عالي ونادي الممرضين قاليهم تعالوا هنا زول رياضي .. سألونى تمارس أي نوع من الرياضة قلت لهم المردوم والنقارة .. الجماعة ضحكوا قالوا لي في الجامعة هنا ما ح تقلي مردوم ولا نقارة لا زم تمارس رياضة أخري، عرفت أن ثقافتنا البقارية رايحة في داهية في الخرطوم.
بريمة
08-26-2017, 05:51 PM
Biraima M Adam Biraima M Adam
تاريخ التسجيل: 07-05-2005
مجموع المشاركات: 27473
في هذا الفيديو ... عايزكم تذهبوا إلي الدقيقة .. 47:36 .. ثم تابعوا نموذج الرقص .. شوفوا أستعمال بنات أبا لرقابهن في الرقص .. ما أظن تكون شفتوا أي حاجة ذي دا في بقاع السودان الأخرى .
لتحية لو دمسيخ .. وفرح الغبش .. الذي وفر لنا هذه المادة.
ول ابا بريمة..حبابك يا صديقي كل سنة وانت طيب ، وعيد الحول ما يغضب زول..
بمناسبة الفيديو الثالث (حلقة طرب الغبش) التحية لصديقنا عضو المنبر الغائب لزمن طويل شديد ، اخونا الجميل ول ابا خالد عبد الله ، واذكر كان ارسل لي بعض السيديهات فيها نفس المجموعة تقريبا ومجموعات اخرى من واشنطن سنة 2007 ، التحية له أينما كان وكيفما كان..! والتحية لول ابا عضو المنبر عبد الكريم الأحمر ونتمنى ان يعاود الظهور هنا..
الفيديو الأول (المردوم) عندي معاهو قصة طريفة ، مرة ابن عمي ارسل لي فيديو من ناس الفريق فيهو مردوم ، فقمت استأت للغاية..الجماعة كانوا لابسين بناطلين واحذية لامعة (التقول موظفين بنوك) وشايلين كلاشات..!! اها قلت لود عمي: ياخي خربتوا المردوم؟ قال لي كيف؟.. قلت ليهو ده مردوم مليشيات وافندية ساكت..شنو بناطلين واحذية لامعة وكلاشات..!! بعد فترة ، ارسل لي ود عمي رابط الفيديو الفوق ده..وقلت ليهو: ايواتا ليك ياهو ده شكل المردوم ولبس المردوم والإكسسوار ..كده..! الشباب في الفيديو لابسين عراريق..وفيها نوع عراقي قديم كان موضة في السبعينات وكنا بنسميهو (عراقي فرملة)..وفيهو كشكشة على الصدر والظهر وفتحات على الجوانب..والأشرطة الملونة (الزيقان) دي اضافة جديدة..! ايضا بتلاحظ الشباب لابسين مراكيب..يعني مافيش احذية مدينة وبندر..! المجموعة في فيديو المردوم ، هم اهلنا اولاد هيبان ..وهم في اقصى حدود المسيرية الزرق الغربانية..وهم اشرس المسيرية الزرق..ناس صعبين شديد..وكانوا اهلنا بيشكروهم وبيقول عليهم (عيال اب ضنب ، كن ده اوما ، داك ضرب)..يعني الدواس عندهم ساهل جدا ، لو واحد رفع عصايتو ساكت ، التاني بيخش شمال زي الترتيب..!! اولاد هيبيان ، فيهم اول عمدة متعلم في دار المسيرية الزرق ، وكان هو اخونا الأستاذ بشارة ، وكان معلم بالمدارس الإبتدائية في نواحي لقاوة..! التشكيلة بتاعة الرقصة جديدة ، واول مرة اشوف لي راقصين مردوم بهذا العدد الكبير..وشكلها واضح (صلاة العيد)..الجماعة اتأثروا بفلسفة التأصيل..!! الشباب بتلاحظ بعضهم لابس سكسس (خنانيق وتلاليل)..والحاجات ده بتكون هدية من المحبوبة او الأخت او بت العم/الخال/الخالة/العمة..!! الكشكوش (على الأرجل) كما هو معروف يصنع من صفق شجر الدوم ، وحبيبات رمل كبيرة الحجم قليلا..! اجمل حاجة مافي بندقية ظاهرة هنا (ده من النقد بتاعنا يا ول ابا) والعصي ظاهرة لأنها بتحفظ التوازن..!! طريقة التشكيل فيها مراعاة عالية لمسألة: الــــ Safety زمان في المردوم الناس بتمشي بترقص في شكل صف بالتتابع..وده ياهو الكان بيجيب المشاكل..يعني لو واحد عفص التاني الشكلة بتدور طوالي..!!!! عشان كده بتلاحظ المسافات بين الراقصين متباعدة.. البنات واقفات صف..وهو شكل وقفة البنات الأصلية في المردوم بهيئتو القديمة..وفي الفيديو مافي واحدة شاركت في الرقص..! وصفقة البنات كانت هي الريتم لضبط ايقاع الرقص..لكن الوضع الأن اصبح نظام رقص حر ، وصفقة البنات بتلعب دور ضيئل فيهو..يعني الحداثة برضك دخلت هناك يا ول ابا..!! طريقة الرقص هنا..بتمنح الراقص فرصة للتنفس..عشان كده كنت بشتغل شبابنا وبقول ليهم ياخي انتو تعابنين ونفسكم قصير شديد..!! ولأن المردوم رقصة الشباب ..فبتلاحظ شكل الأعمار متقاربة وشباب ..وكلهم طلاب يا اما في الجامعات او المدارس الثانوية..!!!!!!
كبر
08-26-2017, 08:15 PM
Kabar Kabar
تاريخ التسجيل: 11-26-2002
مجموع المشاركات: 18537
تلاتة حاجات جديرة بالملاحظة: صوت النقارة ، ودقة تطابقه مع حركة الراقصين..زمان ايقاع النقارة هو البيحدد طريقة الرقص..هنا العكس..النقارة بتتبع حركة الراقصين والراقصات..وبالرغم من ان النقارة (الطبول) في ذات نفسها قريبة، لكن بتديك احساس انها بعيدة شوية..والتحية لمن قام بهذا التسجيل ..لأنو انتبه للحتة دي..! الحاجة التانية: هناك نوع من صوت الزغراد (الزغرودة) وهو نوع نادر وكنت احسب انو انقرض في تلك النواحي..واسمو الزغراد الجرس..وهو عملية تقوم بامرها امرأة خاصة تجيد هذا الفن..لأنو بيحتاج لضبط النفس لفترة طويلة بعض الشي..وزمان كان المعيار يقولوا ليك فلانة بتعرف الزغراد وبتــّلــّقب الجواد..! وتلقيب الجواد منها المثل المشهور : الخيل تقلب والشكر لي حماد..! فكانت المرأة تبدأ الزغرودة ، وينطلق الجواد لمسافة ميل تقريبا ويعود..وهي في حالة زغرودة متواصلة..!! الحاجة التالتة: طريقة الرقص.. اول ما يفتح الفيديو بتلاحظ الراقصين والراقصات جالسين على الأرض..وبعض المعلقين بيتساءل: دي ياتو اوهام دي..!! الجلسة هي اشبه بالرمل (ضرب الرمل) ، وده معناها كده..! بعد شوية بتلاحظ راقص بيجلس..نفس جلسة الفكي ، وعامل فيها بيكتب في لوح..واحد المعلقات بتقول: بيكتب ليها من العين..يعني بيعمل ليها حجاب..!!!!!!! وده تعبير عن الإعجاب..أي أن هذه الراقصة بالتحديد اجادة الفن لدرجة خايف تصيبها عين الحسد..!!!! البنيات الراقصات..متقيدات بالزي التقليدي لبنات البقارة في هذه السن..بالمناسبة كل الراقصات اقل من عمر عشرين سنة..وكل الفساتين ملونة ومشجرة..الناس دي بتحب الحياة..!! زينة الرأس..مشاط الشعر ..واستخدام الكانتيل (نوع من الصوف ينسق بصورة معينة ، وزمان زمن السكة حديد كان يكسر في معدات السك حديد ويسمى الأُسطبة)..وهذا الأكسسوار بديل لمسألة التربلول (مخلوط عشبة المحلب)..!! السكسك (التلاليل) ظاهر قليلا..ويبدو ان الناس تخلت عن استخدامه بصورة كثيرة..! في السابق كانت معاصم البنات الراقصات تزين بالعاج الملون..ومعظمهم مصنوع من البلاستيك..اضافة للجبيرة وهي من الفضة الخالصة وتكون في شكل هلال..!! في عهدنا ، يمكن النساء ان تعبر عن شعورهن بالإعجاب ان رأين راقص يجيد رقص النقارة ، والتعبير يكون بان تخلع المرأة جبيرتها وتضعها في معصم الراقص..!! والحداثة برضك ظاهرة يا بريمة ..لاحظ وضع التوب..زمان راقصة النقارة بتربط التوب حول خصرها وبتستغل اطرافه للتواز (حيث تمسك بيدها اليمنى الطرف الأيمن من التوب ، وباليسرى الطرف الأيسر اثناء الرقص ثم تضمهما معا في حالة الهش..!!).. الراقصات في الفيديو لابسات او واضعات التياب بصورة مبتكرة..حيث التوب مطبوق ويثبت بطريقة معينة ويتدلى من ناحية الكتف الأيمن للراقصة مع وجود حزام رقيق لتثبيت التوب على الخصر..وفي لحظة الرقص يهفهف التوب مع الحركة..!!!! رقصة النقارة ، مثلها ومثل رقصات الطبول في السودان ، بتقوم على الفكاهة والحوار بين الراقصة والراقصة والتعبير عن طريق حركات الجسد..!! الراقصة صاحبة التوب الأزرق..زولة حريفة وبتعرف ترقص نقارة صاح..زهجانة من الزول القاعد يرقص معاها وهو برضك حريف في الرقص..!!! سبب الزهج انو شال منها مناديليها..!!..والله صحي..!! طبعا ظاهرة عملية الهش والخنسان..وحركة الراقصة في مد اياديه (كس مني غادي/أي زح مني غادي)..!!
أنا وول أبا كبر داومنا علي الأتيان بفيديوهات تراث البقارة وتراث أبناء القبائل العربية .. في غرب السودان إلي المنبر بغرض التعريف بتراث تلك المناطق البعيدة عن مراكز التأثير والأعلام المقروء والمرئي والمسموع .. وساعدنا في ذات أبناءنا علي أرض الواقع الذين أستشعروا مهمة تقديم تراث أهلهم ..
هنا أخر لنا بوست .. هو تراث دار حمر .. كدنداية غبيش .. وأتمنى أن يأخذ أستحسانك وسوف أجيكم بالمزيد من الفيديو عن الجديد في تراث البقارة ..
حبيبنا بريمة .. مودتي كالعادة إبداع بلا حدود .. وإكتملت دائرة الابداع بحضور الزول الجميل كبر .. أنتم تبلغون رسائل في غاية الاهمية للاخرين في الوطن .. ما يعجبني أنكم رغم البعد عن الوطن .. تحملون تراث أهلكم في دواخلكم .. ومازال لديكم مخزون إستراتيجي يكفي لسنوات طويلة .. والأجمل أنكم ما زلتم في مقتبل العمر .. وإن شاء الله سوف تستمر هذه الرسالة لمدى أطول إن شاء الله .. واصلوا متابعين .. أحب البوستات لنفسي هي حكايات التراث .. وخاصة طريقة عرضكم للموضوع .. شكراً بريمة ، شكراً كبر .. شكراً لتلك الحاضنة التي أهدتنا هذا الجمال ..
08-27-2017, 04:59 PM
Biraima M Adam Biraima M Adam
تاريخ التسجيل: 07-05-2005
مجموع المشاركات: 27473
كتر خيرك علي الحضور .. كما عودتنا والله أوفيت في الشرح الدقيق .. هنا بعض ملاحظاتك .. وقد توقفت عندها .. بالذات أن هذا النوع من الرقص .. جديد .. والثاني هو الكم الهائل للراقصين في "نقعة" رقص واحدة .. وأنت أرجحت أن الجماعة تأثروا بمسألة التأصيل ..
Quote: المجموعة في فيديو المردوم ، هم اهلنا اولاد هيبان ..وهم في اقصى حدود المسيرية الزرق الغربانية..وهم اشرس المسيرية الزرق..ناس صعبين شديد..وكانوا اهلنا بيشكروهم وبيقول عليهم (عيال اب ضنب ، كن ده اوما ، داك ضرب)..يعني الدواس عندهم ساهل جدا ، لو واحد رفع عصايتو ساكت ، التاني بيخش شمال زي الترتيب..!! اولاد هيبيان ، فيهم اول عمدة متعلم في دار المسيرية الزرق ، وكان هو اخونا الأستاذ بشارة ، وكان معلم بالمدارس الإبتدائية في نواحي لقاوة..! التشكيلة بتاعة الرقصة جديدة ، واول مرة اشوف لي راقصين مردوم بهذا العدد الكبير..
.. من ناحية التجديد .. نعم البقارة يجددون في كل رقصاتهم .. قبل فترة شقيقي أرسل لي عن طهور أقامه لأبناءه .. ذكر لي رقصنا بقاري وحبشي .. قلت ترقصوا بقاري نعم .. لكن الحبشي لزومة شنوا؟ .. قال لي بقينا نرقصوا رقيص الحبش تقول قاعدين في أسمرا .. أستغربت وأنا هسي كلي أمل أن أجد كيف يوفق البقارة بين رقيصهم و رقص الحبش .. ولكن ليس مستغرب أنا أجد نفسي أتفاعل مع فيديوهات الحبش وأقارب أن أئتي بالرقصة كما يفعلها أصحابها ..
زمان كان لدينا عدة رقصات في المردوم .. واحدة أسمها "الكرفاية" وهى أن توازن في ضرب الأرض بكلتي رجليك .. وهناك "الكوري" .. في شكل دائرة وتكون البنات في النص .. وهناك "الرديف" .. أشبه الكرنق ونعتمد فيهو علي رجل واحدة كمركز للقوة .. وهناك رقصات أخري للمردوم .. وأظن التجديد يعيد حيوية الرقصة .. والله أنبهجت جداً بالقوة التي يهبط بها الشباب علي الأرض .. ولو لاحظت في أخر الفيديو يظهر ثلاثة أطفال بالزي الأسود .. لاحظ الجماعة ماشين مع الرتم بتاع الرقصة بصورة جيدة مثل الناس الكبار .. دا دليل أن الرقصة أخذت زمن في المنطقة.
والتحية لأهلنا أولاد هيبان .. زمان حيكت ليكم قصة أنى أشتريت بقر منهم وهرب البقر إلي ديارهم .. وذهبنا لهم وقضينا مع شقيقي حوالي أسبوعين قبل أن نجمع كل البهائم ونعد سالمين .. في تلك المدة والله غمرنا أهلنا أولاد هيبان .. لا أقول ليك ضيافة .. الضيافة شيئ طبيعي لدي البقارة (علماً حينما قمنا جرياً وراء البهائم في ليل بهيم كان في جيبي 25 قرش .. طلب فول ما بتجيبه .. قضين أسبوعين ورجعنا وال 25 قرش في جيبي ..والله) .. لكن الأهم الضيافة الأجتماعية .. الونسات حتى منتصف الليل مع الكبار والصغار .. والله يا ول أبا كبر تحس أنك ما عايز تغادرهم أبداً .. في ليلة من تلك الليالي أقاموا لنا رقص المردوم .. وطبعاً أنا راقص مردوم فنان في الزمن الذي سبق ذلك الوقت .. وتوقفت بسبب الجامعة .. لكن الجماعة جابوا لي كشاكيش .. وقالوا لي الأستاذ لازم ترقص المردوم .. أنت بقاري كيف لو لم تعرف ترقص المردوم .. وهم ما عارفين أنا أجيد الرقص .. رقصت معهم حتى أنتصف الليل .. والشبال رقد فوقي رج .. وأنا راجع محل منزلتي الروائح العطرة من (التربلول) .. العطور التي يضعنها فتيات البقارة علي شعرهن تعطر المكان .. أنا خليت شقيقي نايم، وحينما عدت أبق التربلول يعطر المكان .. شقيقي سألني .. يا زول هووي أعمل حسابك .. أنحنا غربا عند الناس ديل .. أنت مشيت وين؟ .. قلت له يا زول أستهدي بالله .. أنا برقص مع أهلنا المسيرية في المردوم .. طبعاً شقيقي برضو حكيت ليكم عنه .. لم يخرج من بئية الحوازمة أطلاقاً .. زول عاش وسط أهله .. فأصابته غربة رهيبة .. أما أنا "مدردر ديار" كنت مستمتع حتى الثمالة بالرحلة.
أهلنا البقارة جميلين في كل شيئ ..
سوف أعود ..
بريمة
08-27-2017, 05:19 PM
Biraima M Adam Biraima M Adam
تاريخ التسجيل: 07-05-2005
مجموع المشاركات: 27473
مرحب بيك اخي علي .. شكراً لك .. عودتنا أنك تشجعنا .. دوماً .. وأنت العالم ببواطن الأمور أن هناك الكثير الذي يجمعنا كشعب سوداني مما يفرقنا ..
Quote: حبيبنا بريمة .. مودتي كالعادة إبداع بلا حدود .. وإكتملت دائرة الابداع بحضور الزول الجميل كبر .. أنتم تبلغون رسائل في غاية الاهمية للاخرين في الوطن .. ما يعجبني أنكم رغم البعد عن الوطن .. تحملون تراث أهلكم في دواخلكم .. ومازال لديكم مخزون إستراتيجي يكفي لسنوات طويلة .. والأجمل أنكم ما زلتم في مقتبل العمر .. وإن شاء الله سوف تستمر هذه الرسالة لمدى أطول إن شاء الله .. واصلوا متابعين .. أحب البوستات لنفسي هي حكايات التراث .. وخاصة طريقة عرضكم للموضوع .. شكراً بريمة ، شكراً كبر .. شكراً لتلك الحاضنة التي أهدتنا هذا الجمال ..
ما بين هذا الفيديو و الفيديو السابق عن ديار حمر، نكون قطعنا مسافة من أواسط شمال غرب كردفان .. إلي أقصي الجنوب الغربي لجنوب كردفان سابقاً .. و"غرب كردفان" حالياً ... تري من الفيديوهات هو ذات الشعب السودانى في الشمال والوسط والشرق مع أختلافات التراث والبيئة ..
بالله يا ول أبا علي، أقبفوا معنا عشان نكسروا الحواجز المصطنعة بين شعبنا السودانى ..
بريمة
08-27-2017, 06:08 PM
Biraima M Adam Biraima M Adam
تاريخ التسجيل: 07-05-2005
مجموع المشاركات: 27473
ول أبا علي، تعال شوف البيئة الخلابة التي ألهمت ذلك الغناء والرقص .. وشوف أبداع الأنسان السودانى في تحدي الطبيعة .. مراكب القرع البلدية من ديار الفلاتة في تلس جنوب دارفور ..
شكراً للأخ حسن النوش ..
بريمة
08-27-2017, 06:21 PM
علي عبدالوهاب عثمان علي عبدالوهاب عثمان
تاريخ التسجيل: 01-17-2013
مجموع المشاركات: 12480
الحبيب بريمة .. مودتي .. هذه المداخلة الاخيرة .. وصورة هذه المعدية الصغيرة بالقرع .. لم أكن أتوقعها وتغيرت الصورة لدي تماماً لأنني لم أكن أتخيل أن هناك أي نوع من ( المراكب أو المعديات ) ضمن ثقافة أهلنا في الغرب وهذه جزئية البسيطة لها معنى وعمق كبير .. وهي مشابهة للطريقة لدينا على ضفاف النيل .. عندما تكون فروع من النيل أو ما يسمى بالعربية ( الخور ) يلجأ الناس على طريقة قوارب صغيرة من القصب المقوى ( البوص ) ويتم توجيه القارب عن مجداف صغير من عبج النخيل .. ونحن بالنوبية نسمي هذا القارب ( قييي ) ويكون فقط لراكبين ولا أكثر .. يا سلام .. يا بريمه .. رواويس الغرب .. هذا ما أشرت إليه في تعليقي على كتاباتكم .. كنت أفتكر أن أهلنا في الغرب ليست لديهم ثقافة المراكب أو القوارب شكراً كثير بريمة .. لقد ادهشتني .. بس ما شاء الله عندكم القرع ضخم جداً جداً . مودتي .. واصل .. هذا الابداع ..
08-27-2017, 06:22 PM
Biraima M Adam Biraima M Adam
تاريخ التسجيل: 07-05-2005
مجموع المشاركات: 27473
نجيي ليكم لمقاربة مهمة بين القبائل في غرب السودان ..
رقصة الكاتم هي للقبائل العربية .. لكن هنا ترون أهلنا الفلاته في منطقة تلس .. وهم يعشيون مع قبائل البقارة من بنى هلبه، والتعايشة والهبانية .. أخذوا رقص الكاتم .. رقص جنوني .. وصفق حار ..
بريمة
08-27-2017, 06:35 PM
سيف اليزل سعد عمر سيف اليزل سعد عمر
تاريخ التسجيل: 01-11-2013
مجموع المشاركات: 9476
Quote: ما أظن تكون شفتوا أي حاجة ذي دا في بقاع السودان الأخرى
يا بريمة يا اخوي اكثر حاجة إنتشارا فى السودان ده هو رقيص الرقبة..واسمه اساسا رقيص الرقبة..وموجود عند الشايقية مثلا بس بحركة اسرع شوية من النموذج الفى الفديو..
فى رقص المردوم بعجبنى الاداء القوى والقوى جدا من الرجال والنساء..
شكرا كثير على بوست المردوم...
08-27-2017, 08:08 PM
Hamid Elsawi Hamid Elsawi
تاريخ التسجيل: 09-22-2005
مجموع المشاركات: 3450
عشان نوريك نحن البقارة .. برضو نوبيين .. ما ح تصدق .. الفيديو التالي لقبيلة الحوازمة .. أهلي .. لكن تحديداً هذا الفيديو في منطقة قرية أم عشوش في وسط كردفان بين الأبيض والدلنج .. والمنطقة هى حاضرة قبيلة البرقد العريقة في كردفان .. وهم نوبا من شمال السودان .. اقحاح .. نزحوا في أزمان غابرة إلي دارفور وأستقروا في جنوب دارفور (ثقل القبيلة هناك) ..ثم في عهد سلاطين الفور حينما غزوا كردفان لفتحهها كان عماد جيوشهم من قبائل مسبعات والبرقد .. نزل البرقد في مناطق الحوازمة والمسيرية في وسط كردفان وأستوطنوا معهم .. وبحكم طبيعة المنطقة التي تساعد علي الرعي قاموا بتربية الماشية .. وصار أبناءهم يتجولون مع قبائل البقارة .. فأخذوا التراث البقاري .. وهذا الخليط الذي تراه ما بين قبائل عربية وأخري نوبيه .. هم ما نسميهم بالبقارة
هذا السودان أندمج وتوحد زمان .. زمن أجدادنا .. ودعاة الأفريقانية يريدون يحطموا هذا النسيج الأجتماعي .. والثقافي الثر .. الذي بناه أفذاذ أجداد هذا الشعب.
بريمة
08-27-2017, 07:57 PM
Biraima M Adam Biraima M Adam
تاريخ التسجيل: 07-05-2005
مجموع المشاركات: 27473
Quote: يا بريمة يا اخوي اكثر حاجة إنتشارا فى السودان ده هو رقيص الرقبة..واسمه اساسا رقيص الرقبة..وموجود عند الشايقية مثلا بس بحركة اسرع شوية من النموذج الفى الفديو..
فى رقص المردوم بعجبنى الاداء القوى والقوى جدا من الرجال والنساء..
شكرا كثير على بوست المردوم...
متفقين تب .. وليس هناك أدنى خلاف .. في البوست السابق كدنداية غبيش .. مرفق إلي أعلي .. قلت أن الرقص بالرقبة لا يقتصر علي الشمال والوسط والشرق .. غرب السودان أيضاً فيه الرقص بالرقبة .. في حين أن رقص الرقبة في الكدنداية يشابه إلي حد كبير رقص الرقبة في بقية مناطق السودان .. إلا البقارة السلامات نموذجهم في رقص الرقبة يختلف .. تابع الفديو المرفق أعلاه من الدقيقة 47 وشوف النكهة البقارية لقبيلة السلامات في رقص الرقبة .. تجد تميز واضح عن بقية رقص الرقبة. لو لقيت حاجة ذي دي في غير قبيلة السلامات نحن نشوفها عشان نصل للمشتركات بينهم.
بريمة
08-27-2017, 08:14 PM
Biraima M Adam Biraima M Adam
تاريخ التسجيل: 07-05-2005
مجموع المشاركات: 27473
ديل أهل المرحوم ول أبا كباشي الصافي .. عليه شعابيب الرحمة .. من محلية أبو جبيهة .. في أقصي جنوب وسط ولاية جنوب كردفان ..
أولاد حميد رغم أنهم شعب رعوي .. إلا أنهم يشتهرون بزراعة أشجار الهشاب وطق الصمغ .. كما أنهم من أهم القبائل التي تزرع المانجو في شمال السودان .. مدينة أبو جبيهة وحدها بها أكثر من مليون شجرة منقة مثمرة .. لو تلاحظوا في هذا النموذج يكثر ريش النعام .. وهى عادة بقارية ضاربة في الجزور .. ومنها أخذ الجيش السوداني نظام البوريه أب ريش .. بالذات قوات الهجانة في الأبيض .. "الهجانة أب ريش ساس الجيش". والهجانة أب ريش سيد الأسم نوباوي من أهل الجبال ..
بريمة
08-28-2017, 07:54 AM
Kabar Kabar
تاريخ التسجيل: 11-26-2002
مجموع المشاركات: 18537
ول ابا بريمة..حبابك يا صديقي وحباب الصديقات والأصدقاء هنا.. كتبت بعض الإضاءات وسوف انشرها لاحقا..
اهديك نافذة يا صديقي..مختلفة شوية..وما قاعدين نركز عليها كتير..وضرور تكون جزء من التثقيف والتنوير بتراث اهلنا البقارة..!
اهديك اهلنا البقارة في النيل الأبيض.. نماذج من اهلنا سليم واهلنا الجمع..
ولي قدام ح نكتب عن بعض المفارقات..خصوصا ان الجمع موقعهم شرق موقع اهلنا الجوامعة ، ولكن نقارتهم ورقصاتهم مشابهة كتير لرقصات البقارة في كردفان ودارفور..! هناك رقصة سمعت بيها من حبوبتي زمان واسمها (الفنجفانج)..وعندي احساسي قوي انو يوم ح الاقي منها نموذج عند اهلنا البقارة في النيل الأبيض..!
كبر
08-28-2017, 07:56 AM
Kabar Kabar
تاريخ التسجيل: 11-26-2002
مجموع المشاركات: 18537
نماذج من اهلنا الجمع في النيل الأبيض.. يلاحظ معظم التسجيلات هنا من منطقة (سليمة) وهي محطة في خط سير القطار المتجه غربا ، وتقع بين كوستي (شرقا) وتندلتي (غربا)..
كبر
08-28-2017, 08:08 AM
Kabar Kabar
تاريخ التسجيل: 11-26-2002
مجموع المشاركات: 18537
غايتو يا ول ابا بريمة..اهلك ديل نجاض عديل يا قريبي.. فكرة الرقص بالعنق (الرقبة)..! الراس ما بيتحرك نوهائي..ومرات الأكتاف..رقبة بس..!! ياخي العالم التقول ما عندها عضام..!! قريبتنا واحدة خواجية حاولت تقلد البنيات ديل..قامت انفقهت..ياخي قربنا نستدعي خبير (يسندها)..!
الملاحظة المهمة..طريقة وقفة الراقصات..مجموعة المغنيات في شكل دائرة في الوسط..ثم دائرة خارجية بتاعة الراقصات..ثم دائرة الراقصين والمغنيين ..ثم دائرة الجمهور..!! كبر
08-28-2017, 08:27 AM
Kabar Kabar
تاريخ التسجيل: 11-26-2002
مجموع المشاركات: 18537
الكلمة المقصودة (انفهقت) ، جاية من حاجة اسمها (الفهق) بكسر على الهاء..وحاجة عانينا منها لمن كنا زمان صغار في الفرقان..
علاجها بيحتاج خبير..وطريقة العلاج اسمها (السند) بكسر على النون..بيقوم الخبير بيدخل اصبع السبابة في الفم..وبيرفع الفك الأعلي لمن رقبتك تطقطق..مرات بيربطوا الأرجل مع الجسم عشان ما تفرفر..!
حبيبنا كبر مودتي .. يا سلام .. معقول تحريك الرقبة والراس ثابت .. دي مبالغة .. أتخيل أن الانسان عندما يسمو مع الطرب يستطيع أن يتصرف في حركة جسده كما يشاء تخيل البنت صاحبة الشيرت الأزرق دي مبالغة تحرك الرقبة والجزء العلوي من الكتف فقط نعم عندما يخرج الانسان من عالم الواقع إلى عالم الجمال الواسع حيث الطرب والابداع كل ذرات الجسد تكون تحت تصرفه .. على ما أذكر لدي الصوفيين مصطلح إسمه ( البسط) وهو عندما يبلغ الصوفي أعلى درجات السمو ويرتقي إلى عالم آخر خارج نطاق العالم البشري
لا أعتقد أن الرقص هو فقط طرب ولهو وما إلى ذلك كما يعتقد الكثيرين .. فهو عالم تسمو فيه الاوراح
مودتي .. الحبيب كبر وبريمة .. هذه الرقصة هي أبلغ واعمق في كل الرقصات التي شاهدناها خلال عمرنا الطويل خاصة إبتنا اللابسة Blue دي عايشة في عالم آخر ..
بالنسبة للبقارة (حسب كلام والدي الله يديه العافية منذ وانا صغير بأنها حرفة رعي البقر لبعض القبائل في الغرب وقد زرتهم وأنا صغير) وعاشرتهم وأنا كبير هههههههه
فهل الصحيح هي (حرفة) أم تم إطلاق مسمى البقارة لقبائل معينة (يعني البقارة هل هي حرفة أم قبيلة أم قبيلة تم تسميتها بناء على حرفتها) ما هو الصحيح؟؟؟
08-28-2017, 09:56 AM
Kabar Kabar
تاريخ التسجيل: 11-26-2002
مجموع المشاركات: 18537
بالنسبة لسؤالك: البقارة حرفة..وبيقابلها مصطلح الأبالة..رعاة الإبل..ونوع نادر جدا هم (الغنّامة) رعاة الأغنام (ضان وماعز)..
اصلا البقارة في السودان: الفلاتة ، الدينكا ، النوير وبقية قبائل الجنوب، النوبة..ثم القبائل العربية:الشكرية ، سليم ، الجمع ، الحوازمة ، المسيرية ، الرزيقات ، الهبانية ، التعايشة وبني هلبه..! قبائل كردفان ودارفور..شاع عليهم وصف البقارة..لأنهم كتار وبقرهم كتيرة..!
وذكرنا سابقا ، انو القبائل العربية في دارفور وكردفان ، حينما وصلت هجرتهم الى افريقيا كانوا رعاة ابل ، ولكن لأن ظروف البيئة في السافنا الغنية لا تسمح بتربية الإبل فتحولوا الى رعي الأبقار..وهي ظاهرة اتحدث عنها باحث الماني وسماها (ثقافة الإستبقار)..! اول بقاري في افريقيا..اخد بقرة هدية من صديقه من الفلاتة..!
ودمت..
كبر
08-28-2017, 10:19 AM
Kabar Kabar
تاريخ التسجيل: 11-26-2002
مجموع المشاركات: 18537
الرقصة الفي الفيديو هي رقصة المردوم..بالمناسبة الحفلة دي كانت في شهر مايو 2011 في جنوب كردفان ، وبعد شهر بدت الحرب..!!
اما العجكو..فهي حاجة قديمة وسادت في الأربعينات والخمسينات من القرن الماضي..
اصلا هي اغنية تقريبا بدايتها (العجكو ، عليّ منعوا)..العجكو من الفعل عجك أي عجن أو عطن..ولو متذكري ناس ثنائي العاصمة عندهم غنية فيها عبارة (عجوة معطونة في عسل)..!..ومنعوا..أي رفضوا ..والفكرة انو حرموها من حبيبها..وزوجوها زول تاني..!! ولأنها اغنية شعبية ..زي غنية الجنزير التقيل..فكانت كل مجموعة بتضيف عليها حاجة ..!..لو اتذكرت ح اجيب ليك اقرب نموذج للنص الأصلي..
طلاب جامعة الخرطوم..في اواخر الستينات تقريبا.. شالوا الأغنية دي وصمموا عليها رقصة..واشتغلوها في الجامعة وجابت كعة مشهورة في تاريخ جامعة الخرطوم والمشهد السياسي ..والكيزان كانوا رافضين انو الرقصة دي تتقدم في مسرح الجامعة ..ومن هناك صارت عبارة (رقصة العجكو)..!
اسبوع كردفاني الثاني..كان قبل دخولنا الجامعة بي سنة..وكانوا جايبين الفنانة امبلينا السنوسي..والكيزان لأنو متحسسين من حكاية (العجكو) قام هددوا امبلينا وقالوا ليها اوعي تجي تغني في اسبوع كردفان ، اها ناس كردفان سمعوا بالخبر..ومشوا لأمبلينا (كيزان وانصار سنة وشيوعيين وبعثيين وانصار وختمية واتحاديين وحزب امة..)..وقالوا ليها لازم تجي وتغني غنية العجكو كما..والجماعة في الحفلة..كل واحد كفّ لياقة القميص..عشان ينفرزوا من الجماعة التانيين وجابوا عكاكيزهم وحرسوا الحفلة...ياخي قالوا امبلينا السنوسى غنت بمزاج شديد خلاص..!
طبعا ابطال الكعة بتاعة اواخر الستينات.. معظمهم لغاية الآن عايش..وقاعد يتفرج ويستطيب في رقصات اكثر افصاحا من الرقصة بتاعة ناس جامعة الخرطوم ديك..!
ودمت.. كبر
08-28-2017, 11:18 AM
Biraima M Adam Biraima M Adam
تاريخ التسجيل: 07-05-2005
مجموع المشاركات: 27473
أهلنا البقارة يا كبر .. أبداعهم ماله حدود .. تعال شوف النقارة العجيبة دي .. هي نقارة الرزيقات .. وأنا كنت متخيل هذه النقارة كانت تخص العبدلاب وحدهم .. في عهد سلنطة الفونج ثم أخذها الصوفية منهم .. وجدت النقارة دي بكثرة في منطقة الضعين المشهورة حاضرة الرزيقات ..
ههههاي ..
بريمة
08-28-2017, 10:43 PM
Biraima M Adam Biraima M Adam
تاريخ التسجيل: 07-05-2005
مجموع المشاركات: 27473
ول ابا بريمة..حبابك يا صديقي كنت اود عمل اضاءات عن طريقة عزف (ضرب) النقارة..ولكني سأؤجل ذلك الى وقت افسح.. هنا اضيف لمحة من تراث في طريقه الى الإندثار..!
في مدينة امدرمان حي عريق ومشهور يسمى حي (العرضة)..وقد تكون الغالبية لم ترى العرضة او تعرفها على حقيقتها..والعرضة هي عرضة الخيل..أو قليب/تقليب الخيل..التي يوضحها المثل المشهور (الخيل تقلب والشكر لي حماد)..طبعا البعض يستخدم كلمة (تجقلب) كبدل لـ (تقلب).. هنا اهلك المسيرية في البطحا..في تشاد..وكما تعلم بالقرب من كادقلي..تحديدا منطقة دميك وانت متجه نحو لقاوة والفولة..توجد منطقة تسمى البطحا ويسكنها اهلك المسيرية العنينات وبعض من الدرع اولاد كدو (ديلي اهلي يا قريبي)..!
في العرضة زمان..كانت المرأة تزغرد..بنفس طويل..فتجري الخيل الى نهاية الشوط وتعود..!
هنا في هذا النموذج توجد الحكامة وهي تغني..في الحقيقة حكامتين..وهي فرصة للناس تشوف نموذج الحكامة على الطبيعة..!
الناس هناك لمن تبشر على الحكامة..تسمع الواحد يقول (ابشري..امسكي ليك عود)..الطريفة فكرة مسك العود ظاهرة هنا..حيث يلاحظ عود مقذوذ جنب عماتك وفي واحدة ماسكة العود..! زينة الخيل واضحة للغاية..! اظرف حاجة الأرضية رمال..والخيل لمن تجي جارية بتثير الغبار..لكن اعمامك عندهم حرفنة مدهشة للغاية.. فالنساء الواقفات مافي واحدة جاتها كتاحة..! اقتراب الخيل من الحكامات هو نظام تحية لهؤلاء الحكامات..وهي النقطة التي ذكرها بعض الأخوان في الفيديو بتاع برنامج طرب الغبش..! ووسوف اضيف نقارة اخرى من تشاد ايضا (المسيرية)..والإختلاف في الريتم بين نقارة المسيرية في كردفان وفي تشاد..
ودمت.. كبر
09-11-2017, 06:55 AM
علي عبدالوهاب عثمان علي عبدالوهاب عثمان
تاريخ التسجيل: 01-17-2013
مجموع المشاركات: 12480
التحية للاحباب بريمة وكبر .. شخصياً أعشق كتاباتكم وعمق معرفتكم باصولكم .. كنت أتمنى منكم تسجييل حلقات تلفزيونية .. لتعم الفائدة .. أيام العيد وفي قناة الخرطوم تم إستضافة فنان رائع جداً جداً ( حسين وادي ) يجيد أغاني إبراهيم موسى آبا .. وأنا شخصياً كنت أحب هذا الفنان رحمه الله .. وخاصة تلك الاغنية الرائعة ( حالف يمين يا عشه ) رغم أني لا أفهم بعض العبارات التي فيها خصوصية المنطقة ( المراح النشه ) ( النمور في الخشه ) ولكن هذا الفنان الذي أشرت إليه .. رائع رائع جداً وعلى ما أذكر هو من أبناء نيالا .. دارفور كردفان .. فن وجمال وثراء وإثراء للوطن .. وأجمل ما فيهم إعتزازهم بثقافتهم وتراثهم ..
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Biraima M Adam
Kabar
علي عبدالوهاب عثمان
سيف اليزل سعد عمر
Hamid Elsawi
فتحي عباس نقد
Deng
فيس بوك
تويتر
انستقرام
يوتيوب
بنتيريست