|
|
|
 Re: بنتنا أميرة السيد بالنوبية ( موقو mogo ) وأر� (Re: علي عبدالوهاب عثمان)
|
استاذنا علي عبد الوهاب
ابونينقا مسكاقمي
والله اي موقوسيس....
لكن كلامك السمح ده كله بس من ذوقك الرفيع وسمو مقامك
..وتعلمنا منك انت حلو الحديث والسرد ...وتعلمناومنك الكثير
عن الثقافة النوبية وعادات وتقاليد الشمالية وسكانها واهلها كما
تعلمنا من استاذنا محمد النور كبر الكثير من ثقافة
كردفان وسكانها واهلها...
ونرجو ان تواصل ما بداته من قبل عن ثقافات الشعوب
والامم، وخاصة اهلنا النوبة لان هذه الحضارة النوبية
الضاربة جذورها في عمق التاريخ لا نعرف منها الا
النذر اليسير جدا...
ونتمنى ان نحقق طلبك ونعود اليكم بالجديد ....
وشكرا مرة اخرى لثقتك فينا وان شاء الله نكون
قدر الشكر ده....
لقد تعلمنا الكثير من موقع سودانيز اون لاين
ومن بين من تعلمنا منهم ، بالاضافة الى شخصك
الكريم، حلو الحديث وسلاسة التعبير وجمال الحكي
ود اب سن، وود البوش، وود شيقوق ، وود المنسي،
وود الطيب، وود الفاضلاب، وود اسحق ، وود شاهين،
وود كباشي، واخرين جعلوا من هذا المنبر منارة ..
والله يديهم الصحة والعافية
والله يديك الصحة والعافية
| |
 
|
|
|
|
|
|
|
|
Re: بنتنا أميرة السيد بالنوبية ( موقو mogo ) وأر� (Re: اميرة السيد)
|
ابونينقا مسكاقمي
والله اي موقوسيس....
=====================
كمان مصحوبة بقسم .. أجزم أنك اصيلة وبنت أصول ..
حرام يا أميرة تحرمي البوست من موهبة الترجمة وطريقة التعبير
بوست بن لادن كان مدرسة بحالها .. وتناولتها في منتدى الاربعائية لدينا في جدة
إجرينا عليه بحوث ومناقشات .. أنا مشكلتي زول تربال ( جوال أبوكشاف ، لا صور لا تسجيل )
قضيت كمان إجازة شهر في ضواحي الدنيا .. هناك مع الكادحين .. العالم هناك في غابة الجمال ..
شتاء بارد جداً .. وناس منهمكين في زراعة القمح والبصل والشمار ..
وبنتي شهادة عربية إلتحقت بالجامعة ( كلية القانون ) كنت خايف عليها ولكن ما شاء الله
رجعت من البلد وجدتها بقت خرطومية 100% مما قالت ( البوش ) وإجازة ( العصيان المدني )
عرفت أنها خلاص أندمجت مع الوطن ..
الشمال جميل ورائع .. ناس ضواحي الدنيا هم مرجعيتنا عند المحن المادية والنفسية تجلس وسطهم
لا علاج سكري ولا ضغط حقيقة ( ملح الآرض ) ..
ولا بد أن تقومي برحلة في شريان الشمال إلى أن تزوري الدفوفة ومتحف كوش ( شارلي بونيه ) وتشوفي حلاوة
الدنيا وجمال البشر ما في مشكلة أسفلت من أمريكا إلى حلفا وفي طريقك توقفي في البرقيق .. وأسألي عن طريق فتحي خليل
بس قولي وين بيت ناس ( علي عبدالوهاب ) خلاص نحن إطورنا بيتنا فاتح على الزلط .. وأهلنا وحتى الغنمايات عرفوا ثقافة
الزلط والعبور والانتظار وإتخاذ قرار العبور والفترة الزمنية للانتظار والعبور والسرعة وحتى حميرنا كمان إتعلموا القدلة في الزلط
وما تنسي تاخدي الاميرات .. تلقي هناك سوق البرقيق وكرمة كلهم خواجات بالكوم لابسين شورتاتهم حريم ورجال وأهلنا ناس مسالمين
تتخيلي يا أميرة .. الخواجة (السائح ) يأكل وواحد من ناس البلد يدفع الفلوس ويحلف لصاحب المطعم أن لا يأخذ قرش من الخواجة
ده سلوك ما في كل العالم ..
خدي معاكي الاميرات بس على الشرط في الشتاء لأن الصيف صعب شوية ..
التحية للاميرات وأحلى إجابة (( والله أي موقوسيس )) نور إلا باركا ( بارك الله فيك )
هيروو .. وووو أميرة أوووني ..
| |
|
|
|
|
|
|
|
|
|
Re: بنتنا أميرة السيد بالنوبية ( موقو mogo ) وأر� (Re: علي عبدالوهاب عثمان)
|
اها خلاص قمتوا على الرطانة ()
يا أميرة اسمعي كلام عمك واعلمي (mogo) سريع
========================================
حبيبنا البشاري .. مودتي
ما قصرت بنتنا نفذت بسرعة ( mogo )
يا أخي أهلنا البشارية عندنا يتكلموا النوبية والعربية بطلاقة
تزاوج ونسابة معاهم ( بصراحة كدة عملوا لينا تحسين نسل ) لأنهم حلوين
اليوم هم من أكبر ملاك الحواشات في البر الشرقي ووسطهم حواشات عبدالرحيم محمد حسين
في إجازتي ولد الشيخ البشاري على عبدالرسول يقول لي ( نحن جيران الوزير ) وعايز آخد لي قطعة في الخرطوم
البشاري الحبيب صدقني الوطن جميل وما في فرق وعوائق بس للذي يعيش فيه بفكر وفهم ( مش إتجاه واحد )
مودتي البشاري الحبيب ..
ملاحظة : عندك مقدرة زي ملاسي إجابات مختصرة وجرعات قوية .. ياريت آخد كورس منكم .. يمكن المشكلة عشان ما بجيد العامية السودانية
مودتي
| |
|
|
|
|
|
|
|
|
|
Re: بنتنا أميرة السيد بالنوبية ( موقو mogo ) وأر� (Re: علي عبدالوهاب عثمان)
|
وست فى وقته ,, تسلم يازول من ضواحى الدنيا.
=============================
حبيبنا الفاضلابي .. مودتي ..
صورة البرفايل .. ترجعني إلى ضواحي الدنيا ..
أذكر نخلة القنديلة التي تتدلى فوق عرش المزيرة داخل الحوش أو أمام المنزل
نفس ما تقوم به هذه الحليوة ( حفظها الله ) كنا نمارسها لأن القنديلة نخلة ذات مغزى
إقتصادي وإستهلاكي وغذائي عشان كده كان يشتلوها خارج زحمة النخيل لأنها مميزة
دي صورة أصيلة ..
وبعدين شجرة القنديلة عندها ثنية تذكرني أغنية محمد الامين ( تنية حلوة للشبال )
مودتي الفاضلابي ..
| |
|
|
|
|
|
|
|
|
|
Re: بنتنا أميرة السيد بالنوبية ( موقو mogo ) وأر� (Re: علي عبدالوهاب عثمان)
|
ههههههههههههههههه حالتا نوبية يعني مؤلفة قلوببم ساي لو لحقت مامون حميدة كان لبست البدلة البرتقالية ووقعت في علوب ضبح
كدي ياعبدالوهاب احكي لينا قصة الرطاني القال للزبير انننتون تورو واننتون هفللي
لي ناس البشاري وبقية الارابري والناطقين بغيرها الاسلام دخل من هنا وسيخرج من هنا طبعا قاصد اسلام الكيزان والجبايات والمكوس
| |
|
|
|
|
|
|
|
|
|
Re: بنتنا أميرة السيد بالنوبية ( موقو mogo ) وأر� (Re: حامد بدري)
|
مودتي حامد أننقا .. دي قصة منسوبه لأهلنا ناس حلفا ..
أما الزبير فقد شهدت له لقاء عام 1990م في منطقتنا البرقيق ..
كان في ذلك الوقت حضر إلينا مجموعة كبيرة جداً من الاخوة الجنوبيين وبصراحة كمان
الحكومة ساعدتهم في بناء مأوي لهم .. عندما إشتد الحرب في الخرطوم
وفي لقائه مع أهلنا كان بجانب الزبير جنوبي أسمه جمعه وكان مشهور بالحكمة
وكان مرجعية لكل اخواننا الجنوبيين في المنطقة
أذكر الزبير قال .. ( يا جماعة أي جنوبي يعمل غلط كلموا جمعة ده .. عشان هو عمدتهم )
دا هنا في بلدنا إسمو جمعة لمن يمشي الخرطوم إسمو بيكون ( فرايدي Friday ) وقال باللفظ
الواحد للاخوة الجنوبيين ( إذا جاكم مندي كرو ما تيدهوا المريسة .. عشان هما عندهم حاجة إسمها الدكاي )
كنت في إجازة في البلد لم أصدق وأنا أستمع للزبير في هذا الاسلوب .. يبدو أن الزبير كان ذكي يخاطب
كل واحد بلغته وثقافته ..
لكن بصراحة كان الاخوة الجنوبيين عون لنا في الزراعة والبناء والاعمال اليومية لأن عدد السكان قليل
في الشمال وخاصة كلما إتجهت شمالاً .. بعد ذلك ذهب الجميع بعد الانفصال إلا واحد إسمو بشير
رفض إطلاقاً مغادرة الحلة وإلى يومنا هذا موجود وله شعبية واسعة جداً ..
مودتي حامد .. أننقا .. كما تعلم نحن في اللاشعور السوداني علمانيين وغير متشددين ..
كلما نطق شخص عبارة ( واحد حلفاوي ) أعرف أن نكته فيها علمنه .. الحكاية دي يمكن عشان ما عندنا طرق صوفية ومشايخ
تاني شكراً .. هيروو ووو هامد أننقا ..
| |
|
|
|
|
|
|
|
|
|
Re: بنتنا أميرة السيد بالنوبية ( موقو mogo ) وأر� (Re: حامد محمد حامد)
|
ووو حامد أننقا .. إيلو ..
شوق بحر يا حامد .. كيفك ..
يا زول يا جميل إنت .. الحبيب كيف سمت وأهل سمت ..
كنت في البلد قبل فترة .. مشيت وقفت في نص المدرسة ( البرقيق الاميرية الوسطى زمان )
إستحضرت كل الذكريات الجميلة ..
ليكم مودة خاصة يا ناس سمت .. إذكر في المدرسة كنتو أنيقين وتعرفوا تتكلموا عربي كويس
يعني كنتو متحضرين شوية عن باقي المجموعة ..
مودتي حامد كن بخير ..
والاستاذة أميرة أصيلة وعندها بوستات جميلة ..
وإن شاء الله سوف تواصل ..
إنت وين ما تقول لي أمريكا أو اوروبا ..
أثرت الذكريات يا حامد ..
حفظك الله يا أصيل ..
| |
|
|
|
|
|
|
|
|
|
Re: بنتنا أميرة السيد بالنوبية ( موقو mogo ) وأر� (Re: محمد مجيدو)
|
انتا يا البشاري .. البدخلت وسط الناس السمحين شنو ؟؟؟
عااالم بطااالــــــــــــــــــــــــــــة
ابونينقا علي ....
واميرة انسي ...
احييكم .. واحي كل اهل النوبة الجميلين ...
نظام عنصرية وكدا ..
والله يديكم العافية ..
=============================
مجيدو مسكاقمي ..
مجيدو عنصرية .. محببة إلى نفس .. مرات كده لمن تبقى وسيط بتدخل بأحب الألفاظ إلى النفس
ما شفت السفير الامريكي في الخرطوم رغم وجود المترجم يقول .. ( تنفيذ فوراً ) ..
مجيدو .. من دنقلا حتى تخوم المحس ( شرق النيل ) فيه تمازج جميل ما بين أهلنا والبشارية
بعدين كده بالسر وبراحة وبدون ما واحد يسمع ( ديل ناس حلوين جد جد ) ما قدرنا نستوعبهم كنوبيين
ولكن في تمازج تزاوج ..
ودعوة للبشاري لزيارة ضواحي الدنيا .. من الخرطوم فقط 5 ساعات
مجيدو .. اليوم الكفيل على سفر .. تفرغنا لسودانيز الشغل ملحوق .. ننزل الضغط شوية
مودتي ..
| |
|
|
|
|
|
|
|
|
|
Re: بنتنا أميرة السيد بالنوبية ( موقو mogo ) وأر� (Re: علي عبدالوهاب عثمان)
|
لعلك لاحظت يا علي أن أميرة بدأت خطوات مشوارها الأولى مع (أسامة بن لادن) وأكملت مسيرتها الظافرة مبايعة لـ (أبي بكر البغدادي). 
أذكر ذلك البوست الذي أشرت إليه يا علي جيداً
والذي ظننته اختفى مع البوستات المحذوفة وانتقل إلى الرفيق الأعلى مع موت بن لادن
لولا أن تعثرت هنا على رابطه: رابط أميرة وبن لادن
وعلى شرف ذلك البوست، لا أنسى يا علي أن الأميرة "الداعشية" صاحبة المواعيد العرقوبية
كانت قد استدرجتنا وبمكر إلى مائدة مفخخة تم نصبها بإحكام وهي تدعونا تناول وجبة ساخنة هنية ولُقمة دافئة طرية اُعدت سراً في كهوف (تورا بورا)
وطُلب منا أن نتناولها – بالهناء والشفاء- في مطاعم أمواج، ولكن الله ستر وخرجنا من تحت ظلال السيوف
وكُتبت لنا النجاة من فتك السموم ومن الشرك المنصوب (شين الشرك يمكن أن تُقرأ مفتوحة أو مكسورة).
التحية لأميرتنا التي نتمنى أن تعود إلى خطها القديم بعيداً عن الدواعش وجماعة القاعدة.
وندعو معكم أن يعم الوئام أرجاء سودانيزاونلاين
وأن يعود المنبر إلى صفائه وإلى صراطه القويم
التحية لك وزوارك يا أخي علي ولإخوتنا اليمنيين (اكسكلودنق بن لادن).
...
..
.
| |
|
|
|
|
|
|
|
|
|
Re: بنتنا أميرة السيد بالنوبية ( موقو mogo ) وأر� (Re: محمد ادريس زمراوي)
|
فنانا الرائع زمراوي .. تركت فراغ كبير في مجتمع جدة
فراغ فني وإجتماعي .. ظاهرة في ليالينا ..
قضيت شهر في البلد .. يا أخي حاجة جميلة جداً البرقيق تقول (دبي) زحمة شديدة وقروش بالكوم في السوق وإرتفاع في أسعار الاراضي وإيجار المحلات التجارية أي حاجة بالملايين .. أهلنا المحس ناس تجارة صح وقروشهم كثيرة ما شاء الله ناس الاسبيرات والعملة محتكرين السوق عاملين نهضة تجارية جزاهم الله خير .. عموماً الناس كويسين مع البرد .. وزراعة الموسم الشتوي معانا نحن المغتربين الموسم الزراعي ومدخلاته كانت 100% لأن فرق العملة جات في الصالح إيجار ( البوكلين ) الساعة (500) والتراكتور كذلك .. يعني 200 ريال ..
السوق حلو .. لكن يا زمراوي الناس بقت عندها هوايات غريبة .. يطلبوا سمك من كرمة النزل ( ديليفري) يازول عهد الترابلة ولى .. وناس الدهب .. ومنافسات الكورة وإنت عارف البرقيق .. وسط جميل .. ومشروع الدفوفة نشاط غير محدود الناس واقعين زراعة بصل .. تخيل ربع البصل (30) جنيه .. وشوال تمر إرتفع مرة البركاوي مليون والقنديلة مليون ونص .. أغرب حاجة أهلنا إتعودوا يأكلوا لحم الابل حسب نصائج الدكاترة بأن لحم الابل قليل الدسم وبدون دهون .. زمان الواحد كان بس يشوف جمل يقوم جاري ..
الزلط من البرقيق إلى ما بعد كرمة وما بعدها بقت فيها مطلبات صناعية لأن حوادث الدهس بقت مشكلة والسرعة الزايدة .. وطبعاً الفرامل آخر إهتمامات ناسنا الجو كان جميل وإكتشفت حاجة أحسن شيء السفر يوم الجمعة من أمدرمان الشارع فاضي وطريق الشمال تقول حظر تجول .. ونسبة الحوادث زيرو ..
هيروو قو ووو زمراوي أننقا ..
| |
|
|
|
|
|
|
|
|
|
Re: بنتنا أميرة السيد بالنوبية ( موقو mogo ) وأر� (Re: اميرة السيد)
|
شكراً ووو أميرة ..
كنت خايف عليها ولكن بقت ما شاء الله تعرف كل حاجة أكلة (بوش) وبعدين ( عصيان مدني )
والمولد النبوي .. الرقشة ..الخ ما بين السعودية وضواحي الدنيا .. لكن المهمم تجيد الدنقلاوية بطلاقة كمان ..
شكراً كثير أميرة ..
إن شاء الله ربنا يكتب الخير
شكراً ..
| |
|
|
|
|
|
|
|
|
|
Re: بنتنا أميرة السيد بالنوبية ( موقو mogo ) وأر� (Re: Ahmed Yassin)
|
ن بنجت دسن مسو أدو باركى اوو امبانا
انكرى دقريكر باج
اميرة بت السيد وما ادراك ما تلكم الاميرة التي
شرشرت تيبان السكات على أرض رويانة وخريف
وزي ما قال علي بالعربي الفصيح
ياخي ..... سيبك
============================
ووو أهمد بناوي .. بتان مس ..
شكراً على المداخلة يا اصيل ..
يا سلام ناس بنا عندهم معزة خاصة في نفوس أهل دنقلا هي قيمة
التحية للاستاذة أميرة
موقوسكن
مودتي ووو أهمد
| |
|
|
|
|
|
|
|
|
|
Re: بنتنا أميرة السيد بالنوبية ( موقو mogo ) وأر� (Re: Ahmed Yassin)
|
عزيزي الفاضل
الصادق عبد الله الحسن
انا غالبا وبدون ما اقرا اسمك بعرف انك انت الكاتب التعليق
وذلك بسبب الحروف الظاهرة والكبيرة اللامعة الوضاءة البتكتب
بيها التعليق...
لكن اليوم قربت تفقع مرارتي بالزعل لمن قريت السطور الاولى والبتقول
فيها..واكملت مسيرتها الظاهرة مبايعة ابو بكر البغدادي...زعيم الدواعش..
وقربت ازعل منك زعل شديد ..ولكن في حاجتين خلتني ، وبعد الزعلة، اضحك
لاني عرفتك بتهظر بسبب الوجه الضاحك المصاحب للجملة البتفقع المرارة
والحاجة الثانية انت بالذات عندك معزة خاصة في نفسي لاني اول ما بديت اترجم
قصة اسرة بن لادن كنت خايفة واحد يوقفني ويقول لي وانتي مالك ومال بن لادن
وده ارهابي وما تجيبي لينا سيرته...ولكنك كنت اول المعلقين على البوست ووجدت
منك تشجيع للاستمرار ومنذ ذلك الوقت اكتسبت الثقة في النفس وواصلت في ترجمة
الكتاب بمساعدات كريمة من بسمات وامتثال وجعفر محي الدين من السعودية وود خالد
من امريكا وود المنسي .لهن ولهم التحية...
وشكرا لك يا الصادق ..
والله يديك الصحة والعافية
| |
|
|
|
|
|
|
| |
علي عبدالوهاب عثمان
الامين موسى البشاري
عبدالعزيز الفاضلابى
حامد بدري
حامد محمد حامد
محمد مجيدو
الصادق عبدالله الحسن
محمد ادريس زمراوي
Ahmed Yassin
shaheen shaheen
فيس بوك
تويتر
انستقرام
يوتيوب
بنتيريست