أقيفوا، أقيفوا بالله قبُل ما تجوني دافرين أُوُرررررررررررررر، زي ما القمرا تبدأ هلآل، لو سمحتو قصروا المداخلآت بالزات المستنيرين. أطول مدآخلة مسموح بيها 3 سطور ؤ نُص، عشان أنا اليومين ديل عندي مبادي أزمة، يعني عِندي سكسكة في السدُر.
حليلك يا ود المدير، كُنت جناح زي الفِرّة. والله صحي...
12-21-2016, 11:27 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
قال المستنير فيما يقول الدايش، كليتك باظت ممكن تعيش بكلية واحدة، الأدوية رفعوا منها الدعم القرض راقد، الحاجات بقت غالية تنزل للرُبُع أو أقلّ من كِدا بشوية، ما عندك حق المدارس الوِليدات وديهُن الخلوة، دا كُلو ما قدرت عليهو إدمدم وإتلحس. شعب من غير إستنارة أخير يشوفلوا دبارة، مسألة العصيان دي من غير إستنارة تبلوها ؤ تشربوا مويتا. غايتو الزمن دا يوريك العجب ؤ يضوقك الصيام في رجب. العجب شفناهو والصيام في رجب هو هُشام آدم.
يا محمد جودة، هي هُشام بالضم وليست هِشام بالكسر...
12-21-2016, 12:03 PM
محمد البشرى الخضر محمد البشرى الخضر
تاريخ التسجيل: 11-14-2006
مجموع المشاركات: 28869
ود المُدير عشان جنس عوارتك البتسوي فيها دي بنقول إنه الاستنارة والوعي ضرورة مُلحة. وبدل ما تكون فكرة البوست بس مجرد "عنوان" زنَّ ليك في راسك وعجبك وداير تستعمله سااااي وخلاص، حأعمل فيك خير، وأدي لي بوستك ده قيمة وفايدة أوضح ليك فيهو يعني شنو استنارة بدون ما تفك الزرارة.
الوعي يا ود المدير ما بالضرورة إنك تمشي تقرا لهيجل ولا كانط ولا أركون. الوعي إنه إنسان الشارع البسيط ده يكون عارف شنو هي حقوقه الدستورية وشنو هي حقوقه القانونية، وشنو هي طبيعة العلاقة بين الدولة والمواطنين (يعني الحقوق والواجبات). الاستنارة إنه إنسان الشارع البسيط ده يكون فاهم يعني شنو مواطنة، ويعني شنو علمانية، وليه هي مهمة، وليه لازم تكون الخيار المناسبة لمرحلة مابعد سقوط النظام، لأنه لو عرف ده حيعرف يضمن إنه الأحزاب الانتهازية القاعدة دي ما تنط على أي ثورة أو انتفاضة ممكن تحصل لي قدام، وحيعرف ممكن يدي صوته لمنو ولشنو.
ياللا بعد ده ممكن تتعاور وتضحك زي ما داير، ومعليش ما التزمنا ليك بالتلاتة سطور البتقدر عليهم، لكن عزاءنا الوحيد إنه المُداخلة بالعامية السودانية عشان تفهم رغم إني أشك في كده.
ههههههههههههههههههههههههههه، يعني إنت يا هُشام منتظرني أناقشك، يا وآد لا. البوست دا حقي ؤ داير أكتب فيهو بمزاجي، ؤ زيادة علي كِدا مفتوح للجميع. يعني ممكن تاخد راحتك، بس ما تفتكر إنو البوست لفتح حوار معاك، هو عبارة عن خُد ؤ هات مع جميع الزوار.
مشكور علي الطلّة، بس ما عهدناك إنفعالي !. والله صحي...
12-21-2016, 12:55 PM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
يا هُشام يأخي بصراحة كِدا إنت شرفتني كتيّر، ؤ ما أخفي عليك أنا لمآن شُفت حروفك ترنمت، أكاد لا أصدق أهذه الحروف؟ … كلّ هذه الحروف خطّها بنانك المنمّق بنانك المنّغم المموسق لا غرو .. إنها تأتلق و إنها تموج بالعبير تعبق و إنها تجعلنى أحترق أسطرها .. بحر إشتياق موجه يصطفق فى لجّه .. أضيع راضيا وأغرق..
وعندي سؤال بسيط حول رايك يا هشام ادم اتفق معك بأن التوعية مهمة وضرورية للشعب حتى لا يكون البديل كسابقه ويرتكب نفس الاخطاء او ربما اكبر ولكن نحن الان محكومون بدولة امنية بوليسية لا تسمح بأي نشاط ما لم توافق عليه مسبقاً بتصريح رسمي من الجهات الامنية وحتى حفلات الزفاف تدخل ضمن هذه التصاريح ويحدد زمن انتهاء الاحتفال بالزفاف وكل من يخالف يتعرض للمسائلة القانونية والاعتقال
في ظل كل هذا يا هشام كيف يمكننا ان نعقد المحاضرات والندوات التوعوية لشرائح المجتمع المختلفة مع كل هذه القيود وبالتأكيد لن تسمح هذه الحكومة بأي نشاط سياسي خارج نطاق الحزب الحاكم الا ان يكون مرضياً عنه كأحزاب التوالي اذاً ما الآلية التي يمكن اتباعها حتى يتم تنوير الشعب بكل متطلبات المرحلة القادمة التي ترفضها الحكومة جملةً ونفصيلاً لانو هذا يعني زوالها
تحياتي
12-21-2016, 01:10 PM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
Quote: الوعي يا ود المدير ما بالضرورة إنك تمشي تقرا لهيجل ولا كانط ولا أركون. الوعي إنه إنسان الشارع البسيط ده يكون عارف شنو هي حقوقه الدستورية وشنو هي حقوقه القانونية، وشنو هي طبيعة العلاقة بين الدولة والمواطنين (يعني الحقوق والواجبات). الاستنارة إنه إنسان الشارع البسيط ده يكون فاهم يعني شنو مواطنة، ويعني شنو علمانية، وليه هي مهمة، وليه لازم تكون الخيار المناسبة لمرحلة مابعد سقوط النظام، لأنه لو عرف ده حيعرف يضمن إنه الأحزاب الانتهازية القاعدة دي ما تنط على أي ثورة أو انتفاضة ممكن تحصل لي قدام، وحيعرف ممكن يدي صوته لمنو ولشنو.
هههههههههههههههههههههه، يا غالي يا ود الغالي، إنت صدقت. يأخي أنا رغم إني قلت عندي مبادي أزمة ؤ ما داير مداخلآت طويلة لكن هُشام ألّح أو ربما أصّر لآزم يرشني في الشُعب الهوائية بتاعتي. عموماً كلآموا دا مضمونه إنو المواطن لآزم يعرف حقوقو ؤ يطالب بيها، ؤ يعرف واجباتوا ؤ يقوم بيها. ممكن يقوم بيها سداري كان داير، ما مشكلة، لكن المشكلة هُشام دا في عضمو قايم سداري. أنا في البوست دا بتكلم علي إفتراض إنوا الخراب البيسمهو هُشام نظام قطع وِشّو، هل الإستنارة هي الطريقة المُثلى عشان توصّل الفكرة دي لسِت الشاهِي ؤ بتاع الدرداقة ؤ بتاع الورنيش، واللآ حتي قول خريّج الجامعة زاتو، علماً بأنّ الجامعات بِقت تكُش ؤ تدي البحر ؟. بعدينك جيّب أضانك جاي، زولك دا قال الشعب في اللوّل اليبقى مستنير حتين يحاول تغيير الخراب بالعصيان !...
12-21-2016, 01:16 PM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
مُداخلتي الفاتت دي حتضمن ليك مشاركة وتفاعل كبير في بوستك الما عندو موضوع ولا أي فايدة ده لأنه الفئران لا تُقاوم رائحة الجبنة :) قصّرتَ معاك؟ ----------------------
معقولة لكن يا هشام ؟؟!!!!!!!
طلعتنا فيران عدييييل كدا
12-21-2016, 01:19 PM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
قلت لي البوست مفتوح "لحوار" ؟ هو في بوست حواري يعلقوا ليهو وش مُبتسم يا ود المدير؟ معقولة بس؟ شايف مُداخلاتك ذااااتا فايتة التلاتة سطور :)
------------ أخ هيثم قيلي الفئران المقصودين بكلامي يعرفون أنفسهم. أمَّا عن سؤالكَ فقد تجد إجابته في بوستي المعنون باسم الأستاذ كمال عباس الحقوق تُؤخذ ولا تُطلب يا عزيزي ... وهذا في حد ذاته نوعٌ من المُقاومة. ولكن انتظار سقوط النظام وقيام دولة "دينية" بنكهة ديمقراطية لن يكون الحل أبدًا لأن الجماهير حتى اللحظة غير مقتنعة بخيار الدولة العلمانية لأنها لا تعرف عن العلمانية إلا أنها ضد الدين وتحارب الدين. فبعد قيام حكومة "ديمقراطية" شرعية، تضع الإسلام مصدرًا تشريعيًا لها، وتستند على قاعدة جماهيرية متدينة تؤمن بشعار "الإسلام هو الحل" .. كيف يُمكننا ضمان أي فائدة يمكن أن نجنيها من الوعي والاستنارة، لاسيما وأنَّ الأحزاب اليسارية نفسها تخجل من ذكر العلمانية صراحة في برنامجها السياسي وتتحاشاها، بل إن منها ما أصبح شبه حزب ديني؟
12-21-2016, 01:26 PM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
Quote: لكن انتظار سقوط النظام وقيام دولة "دينية" بنكهة ديمقراطية لن يكون الحل أبدًا لأن الجماهير حتى اللحظة غير مقتنعة بخيار الدولة العلمانية لأنها لا تعرف عن العلمانية إلا أنها ضد الدين وتحارب الدين.
يا هشام، هشام، آجاد أخوي تنزل لمستوانا عشان أنا ضهري دا كعب ؤ ما بقدر أطلعلك فوق، وحات ربي 3 سِلِمات بس يجيبن خبري. يا هشام نحن بعنقاليتنا دي بنقرأ واقع، يا هشام يأخي راقب حِراك الشباب وحاول تخُت إيّدك فوق الوعي البيتمتع بيهو ؤ حاول تعيش داخل الإطار الموجود فيهو الشباب عشان تخرج من كهف الرجعية العايش فيهو دا. آووووووووبس، آسف والله...
12-21-2016, 01:43 PM
هشام آدم هشام آدم
تاريخ التسجيل: 11-06-2005
مجموع المشاركات: 12249
ود المدير حقيقي ما بحب أضيع زمن في حاجة ما عندها معنى ولا فايدة، ولا مع زول فاضي وداير يضيع زمن وبس. ياخ كل اللي بتمناه إنه لمن نكون مختلفين مع زول نختلف بأدب. أسلوب التريقة والسخرية والتقليل من القيمة والنبز ده ممكن يكون مناسب شديد لونسة وضحك وفض مجالس لكن أصلًا ما مناخ كويس لحوار مفيد. مختلف معاي يا حبيب؟ أبدًا مافي مشكلة، لكن السخرية الداعي ليها شنو؟ تسخر مني وأنا أسخر منك (والحاجة دي ساهلة وحياتك، يعني ما كيميا ولا حاجة صعبة) لكن حنستفيد شنو؟ سيبك مننا أنحنا: الناس اللي بتقرا حتستفيد شنو؟ ولا شيء .... نكبر شوية سلام
12-21-2016, 01:45 PM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
ود المدير تحياتي ممكن أش1ارك تعرف الاستنارة دي واخدة مقلب في نفسها لانو المقصودين بيها ولا شاغلين بالمستنير ولا المستنور ديل عالم عايش مع سقراط أبن سينا وبتهوفن وفان جوخ و وأمنحتوب وحوار الحضارات وليلا مع التكيله المكاسيكية ومتعق الاكل والمشروب ورقصة التانجو ونسه العجم نصها عربي وقيل منها لغة أخري قاليهو نحن في الزط واقفين عشان نشوف عربية لناس خالتك للميناء البري وانت في الصالون بتقرأ يا خي أن أثقل من الثقلة ذاتا أنا معترف باني فار معامل لكين ما أبيض # لك كل الود قصرت معك
12-21-2016, 01:50 PM
عبدالحفيظ ابوسن عبدالحفيظ ابوسن
تاريخ التسجيل: 06-24-2013
مجموع المشاركات: 22319
Quote: ود المدير حقيقي ما بحب أضيع زمن في حاجة ما عندها معنى ولا فايدة، ولا مع زول فاضي وداير يضيع زمن وبس. ياخ كل اللي بتمناه إنه لمن نكون مختلفين مع زول نختلف بأدب.
أدب دي شنو يعني ؟. إنت كتبت كلآم هنا من وُجهة نظري مدعاة للتريقة والسخرية وأنا بصدد التعرض له والسخرية منه، قد يتفق معي البعض وقد يختلف البعض، إنت لو شايف الحكاية دي ما عندها معني ؤ بتضيّع زمنك ما تجي حايم بجاي. ما طالب مِنّك توضح لي عدم الأدب وإني فاضي، لكن أرجوك زمنك غالي والوطن وآقف عليك وعلي أفكارك ؤ نحن ما مستعدين نضّيع وطنا فقد عانى وعانى أهله الكثير، إنصرف يا رجل. عِندك وردة فوق في ركن المدآخلة...
12-21-2016, 02:52 PM
أيمن نواى على أيمن نواى على
تاريخ التسجيل: 05-02-2015
مجموع المشاركات: 4327
Quote: بوستك دة فيهو غتغتة واظلام اولان بالتبادي لم تحدد زرارة قميص ولا بنطلون ولا كزاكا ثانيتن ياتو زرارة الفي اللول ولا الاخيرة جاوب عشان نعرف نخش نكتب سطرين
هههههههههههههههه،
يأخي دا من إطلاق الجزء وإرادة الكُل، يعني الزراير كُولهِن ما عدى اللآخيرة، والمقصود زراير القميص عشان التانيات بيودننا في 60 دآهية. بعدينك مع ترك الزرارة اللآخيرة مزرزرة أطراف القميص لآزمناً يكونن مربوطات مع بعض، شُفت كيف !.
خُش...
12-21-2016, 03:41 PM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
الوعي يا ود المدير ما بالضرورة إنك تمشي تقرا لهيجل ولا كانط ولا أركون. الوعي إنه إنسان الشارع البسيط ده يكون عارف شنو هي حقوقه الدستورية وشنو هي حقوقه القانونية،
ههههههههههههه هيجل بتكون بتعرفوا لكن كانط واركون بتعرفهم هههه
12-21-2016, 04:48 PM
جلالدونا جلالدونا
تاريخ التسجيل: 04-26-2014
مجموع المشاركات: 9387
ازيّكم .. فى شنو .. مالكن الفار ا لجر ذ ود المدير .. مالك جايب لينا النبيشة و شيل الحال !!! يعنى هسّى الشعب السودانى ده كلللللللو بما فيهو انتو ما واعى بى حقوقو الدستورية و القانونية طيّب عمل عصيان لييييه !!!. ليه الناس من عليائها الاستنارى تفترض جهل و غباء هذا الشعب الشعب بى مجاميعو عارف اكتر منّى و من اى زول حايم هنا و الدليل ود الخدر عارف حاجاتو تماما بى هناك يسأل من ود المدير و بى جاى يسأل من جلال ___ هيثم غالى ده بيطربق مالو !! ___ طبق اليوم سلطة خضار المكونات لفرد واحد 2 خياراراية بصلة بيضا متوسطة الحجم نص ربطة جرجير اخدر 1 فلفلية خدرا قليل من الشمار الاخدر... شبت ... و البقدونس 2 اوقية جبنة بتاعت الدويم ربع معلقة صغيرة فلفل مسحون شرحو شطة حمرا و شرحو توم مسحون كشحة شمار و بالتاكيد ملح الطريقة تحش الخدروات الى شرايح صغيرة تهرس الجبنة بالشوكة تلخبت الحاجات دى كلللها مع بعض و تكشح فوقا البهارات تمسك المعلقة بى ايدك اليمين و بالهنا و الشقا ده المحتاج ليهو الشعب السودانى .. هل الاستنارة ممكن تقدّم ليهو الحاجة دى ؟ و لمّا يسعى عشان يحقق الحاجات دى .. يقولوليهو حيلك حيلك انتا ما واعى بى حاجاتك !! __ معليش يا ود المدير .. الواحد مداخلاتو كلها بقت طويلة و حشو و كلام فارغ و ده دليل على انّو بقرا لى اهل الاستنارة كتير و على راسهم الديجانقو كبر و قديما قالوا .. طلقة فى الراس و لا ميّة مجليات
12-21-2016, 05:57 PM
عبدالعزيز الفاضلابى عبدالعزيز الفاضلابى
تاريخ التسجيل: 07-02-2008
مجموع المشاركات: 8199
اخ هشام انا اظن وبعض الظن يقين ان الشعب السوداني مسلم ومن الصعب جدا جدا تجريده من اسلامه على ارض الواقع مهما فعلت والاستنارة في مصطلح العلمانيين اظن انها تعني الالحاد وليست مقصود منها بالضبط تبصير الشعب بحقوقه لانها لو كانت بالمعنى الاخير فهي متوفرة ولتعلم يا اخي الفاضل ان ملامسة الشعب السوداني الفضل في دينه ومخاشنته بشي يوحي بالبعد عن الدين كفيلة بنفض يد اي منهم من ذاك الشي حتى لو كان هذا الشي هو الولد او الوالد وحتى لو كان الفرد غير متوسط او معتدل التدين .. عليه نجحت كثيرا من الاحزاب في تبني خطاب ديني حتى لو نفاقا لتحصد اصوات وبدأت هذه الاحزاب باستعمال الالحاد والزندقة والكفر فزاعة ونجحت في ذلك ولكن ومع ذلك الشعب حقا سيزهد في الديموقراطية والحرية والاستنارة بمعناها البعيد والقريب اذا احس انها ستبعده عن دينه .. ارجو ان اكون اوصلت فكرتي .. ودم بخير
كدة سطرين يا معاوية
عندي باقي سطر
12-21-2016, 11:14 PM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
Quote: ود المدير تحياتي ممكن أش1ارك تعرف الاستنارة دي واخدة مقلب في نفسها لانو المقصودين بيها ولا شاغلين بالمستنير ولا المستنور ديل عالم عايش مع سقراط أبن سينا وبتهوفن وفان جوخ و وأمنحتوب وحوار الحضارات وليلا مع التكيله المكاسيكية ومتعق الاكل والمشروب ورقصة التانجو ونسه العجم نصها عربي وقيل منها لغة أخري قاليهو نحن في الزط واقفين عشان نشوف عربية لناس خالتك للميناء البري وانت في الصالون بتقرأ يا خي أن أثقل من الثقلة ذاتا أنا معترف باني فار معامل لكين ما أبيض # لك كل الود قصرت معك
حيّاك الغمام يا ابو الزوز، ما بتقصر حاشاك. تعرف يا زهير الإستنارة دي عبارة عن كُتلة كبيرة من ظلآم الوهم يفتح المستنير بابها ويدخُل، الباب بوراهو كرَب يقفِل، والقفلآ الياها. يخُش جوّة يلقى ظُلمات فوقها ظُلمات ويفضل عايش في التيه منعزل عن العالم الخارجي تماماً ؤ عايز يحدد ليهو مساروا !. بديهي زول زي دا كلآموا بيكون أشتر ولا علآقة له بالواقع زي أخونا هُشام آدم دا. بعدينك زي دا لآمن ينزل لآرض الواقع بيتملطش زي صلاح وردة عادي...
12-22-2016, 08:14 AM
ALWALEED ALSHEIKH ALWALEED ALSHEIKH
تاريخ التسجيل: 01-11-2013
مجموع المشاركات: 884
طبق اليوم سلطة خضار المكونات لفرد واحد 2 خياراراية بصلة بيضا متوسطة الحجم نص ربطة جرجير اخدر 1 فلفلية خدرا قليل من الشمار الاخدر... شبت ... و البقدونس 2 اوقية جبنة بتاعت الدويم ربع معلقة صغيرة فلفل مسحون شرحو شطة حمرا و شرحو توم مسحون كشحة شمار و بالتاكيد ملح الطريقة تحش الخدروات الى شرايح صغيرة تهرس الجبنة بالشوكة تلخبت الحاجات دى كلللها مع بعض و تكشح فوقا البهارات تمسك المعلقة بى ايدك اليمين و بالهنا و الشقا جوعتنا ياخ ههههههههههههههههههههههه تحياتي يا جلال يا جميل
12-22-2016, 08:16 AM
ALWALEED ALSHEIKH ALWALEED ALSHEIKH
تاريخ التسجيل: 01-11-2013
مجموع المشاركات: 884
انت اقرب سينما لبيتكم الجديدة والوطنية ,, البوديك الجمهورية شنووووو؟؟ افشتااااااك ,,,, الواحد فيكم يسأل السؤال و عارف الجواب شنو بس تحبو تحرجو الناس انتو اصلو ما سمعتو بخلوها مستورة هههههههههههههه تحياتي يا فاضلابي يا رائع
12-22-2016, 08:22 AM
ALWALEED ALSHEIKH ALWALEED ALSHEIKH
تاريخ التسجيل: 01-11-2013
مجموع المشاركات: 884
بوستك دة فيهو غتغتة واظلام اولان بالتبادي لم تحدد زرارة قميص ولا بنطلون ولا كزاكا الواحد ياخ لو اتكلم بلغة مفهومة مش بكون احسن هسه ناس كتار ما سمعو بالكزاكا دي و كما قال د. كمال عبدالقادر نقلا عن بروف ابن عوف نقلا عن فتيات الستينات بلبس لى كزاكا و بحاور الباك معاكا شفت السند و العنعنة دي كيف . تحياتي يا ابوسن يا جميل
12-22-2016, 08:28 AM
عبدالحفيظ ابوسن عبدالحفيظ ابوسن
تاريخ التسجيل: 06-24-2013
مجموع المشاركات: 22319
تحياتي وليد كيفنك عنك طيب ههههه طيب نمسح كزاكا ونكتب جبون تعرف غصبا عن ودالمدير ننزل الدقداق الكزاكا كان بتتعمل من بواقي القماش الملون والمبهرج .. زمن الجكاكي يا تعرسو لي ولا اسوي لي ام جكاكي في بطن السوق واسوي ليكم فضيحا شوف الزمن دة كيف الجكاكي هسة بقت شركات عالمية
12-22-2016, 08:30 AM
ALWALEED ALSHEIKH ALWALEED ALSHEIKH
تاريخ التسجيل: 01-11-2013
مجموع المشاركات: 884
نرجع لموضوع البوست الأصلي أول حاجة حقو المثقفين ديل يكون عندهم قليل ايمان بقدرة شعبهم على التغيير بالوسائل البشوفا الشعب تاني حاجة المرحلة مرحلة عمل ما تنظير و يخيل لى الواحد لو ما قادر يشارك مافي داعي يخذل بكسر و تشديد الذال تالت حاجة قصص علمانية و دينية و مدنية دي بتنطرح في جو ديمقراطي و معافى و الشعب بقول كلمته ان شاءالله لو عايز يحكموه بالكجور هو حر الحاجة الأخيرة الشعب الآن بفتش لأساسيات الحياة أكل و شراب و دواء ... الخ باقي المسائل بوقتها تعالو ناقشوها في جو ديمقراطي. و سلام مربع يا مدير زى ما بقول الأخ العزيز عاصم فقيري.
12-22-2016, 12:48 PM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
Quote: ولكن انتظار سقوط النظام وقيام دولة "دينية" بنكهة ديمقراطية لن يكون الحل أبدًا لأن الجماهير حتى اللحظة غير مقتنعة بخيار الدولة العلمانية لأنها لا تعرف عن العلمانية إلا أنها ضد الدين وتحارب الدين. فبعد قيام حكومة "ديمقراطية" شرعية، تضع الإسلام مصدرًا تشريعيًا لها، وتستند على قاعدة جماهيرية متدينة تؤمن بشعار "الإسلام هو الحل" .. كيف يُمكننا ضمان أي فائدة يمكن أن نجنيها من الوعي والاستنارة، لاسيما وأنَّ الأحزاب اليسارية نفسها تخجل من ذكر العلمانية صراحة في برنامجها السياسي وتتحاشاها، بل إن منها ما أصبح شبه حزب ديني؟
Quote: أمَّا عني أنا شخصيًا، فأعتقد أنَّك بنيتَ فكرتكَ على افتراضٍ خاطئ، فأنا أكتب في السياسة (قد لا أكتب عن السياسة) مُباشرةً، ولكنني أكتب فيها، وقد شرحتُ الفكرة سابقًا في ردي على إحدى مُداخلات الأستاذ كمال عبَّاس، وكرَّرته مرَّة أخرى في ردي على مُداخلة الأخت آمنة مُختار. فأنا أعتبر الكلام عن الدين، والأدب، كلامًا في السياسة أيضًا،
أها دا كلآم الزِويّل اللقرع دا، كلآم كتير وفطير ولا معنيً له، وكل الغرض منه إنوا الأعرج عايز يثبت للناس إنوا أوعى زول وهو المثقف المستنير الذي لا يُشق له غبار. دا وآحد عِريان ؤ لآبس كرفتة. اولآً، المستنير دا في المدآخلة الأُولى عايز يسلخ الدين من نفوس الناس عن طريق الإستنارة علمانيهم علي دينيهم. يعني يقعد يعافر في العالم دي لحدي ما تنسى مسألة الدين خالص ويفصلوها تماماً عن السياسة حتي بعد دآك يقعدوا لإنشاء دولة علمانية !. هل دا كلآم يقولوا شخص عاقل ؟. كم من الزمن سوف نستغرق حتي ننفذ كلآم الهُلآمي دا ؟. ثانياً، في المدآخلة الثانية يعتبر عبقري زمانه الكلآم في الدين، فقط مجرّد الكلآم في الدين كلآم في السياسة، وهذا يعني ان الدين في مفهومه المحدود جداً جزء لا يتجزأ من السياسة. دا وأحد مفتون بنفسه السطحية لدرجة عبادته لها !. (أَفَرَأَيْتَ مَنِ اتَّخَذَ إِلَٰهَهُ هَوَاهُ وَأَضَلَّهُ اللَّهُ عَلَىٰ عِلْمٍ وَخَتَمَ عَلَىٰ سَمْعِهِ وَقَلْبِهِ وَجَعَلَ عَلَىٰ بَصَرِهِ غِشَاوَةً فَمَن يَهْدِيهِ مِن بَعْدِ اللَّهِ ۚ أَفَلَا تَذَكَّرُونَ). 27 سنة من الحُكم الجائر الظلوم بإسم الدين والناس لم يتركوا دينهم، هذا يعني أنهم ليسوا بتاركيه للمساطيل والمجانين والمعتوهين والطغاة، وهذا يعني ان الدين عندهم شئ لا يُمِت لممارسات الكيزان ومن عاونهم من الملآحدة بِصِلة. إذاً إذا كان الدين من صُلب السياسة دع الناس ينصهروا في بوتقة الديمقراطية وتجربة 27 سنة كفيلة بأن تجعلهم يختاروا الأصلح. رأس/
12-22-2016, 01:44 PM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
Quote: ههههههههههههه هيجل بتكون بتعرفوا لكن كانط واركون بتعرفهم هههه
هههههههههه،
وحاتك يا ابراهيم حتي هيجل زاتو أنا ما بعرفوا جناياً هِيّل مِنو. لكن عارف الحاجات دي زي رأس اللصلة، ؤ راس الديك والفأر الميّت عند المتشعوذين بتكون موجودة عشان تشغل الضحية والمتشعوذ يمارس الشعوذة بتاعتوا، كلهم عالم وهم...
12-24-2016, 11:26 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
Quote: ليه الناس من عليائها الاستنارى تفترض جهل و غباء هذا الشعب الشعب بى مجاميعو عارف اكتر منّى و من اى زول حايم هنا و الدليل ود الخدر عارف حاجاتو تماما بى هناك يسأل من ود المدير و بى جاى يسأل من جلال ___ هيثم غالى ده بيطربق مالو !!
هيثم غالي دا أكان ما دقولوا مسمار في صنقوعو ما بيهبِط، ؤ ود الخِدر تسعل مِنّوا العافية، بس الفيهو إتعرفت، أما رأس النيّفة قال مشى قرأ لوآحد اسمو مِنو كدي ماني عارف ! عن العصيان ؤ جا داير يقدنا بيها، السِريرّيق دا الله يصرفوا يأخ...
12-24-2016, 06:11 PM
عبدالعزيز الفاضلابى عبدالعزيز الفاضلابى
تاريخ التسجيل: 07-02-2008
مجموع المشاركات: 8199
ابداً ياود عمى أقسم بالله ,, الكعوبية الجات فى مداخلة المسنوح وليد الشيخ ولا جات على بالى ,,, كل مافى فى الأمر انا بحبك شديد وبحب بوستاتك وظرافتك الغير متَكَلَّفة فحبيت اشاغلك عشان استمتع بردك... ولانامت عين جلالدونا.
12-24-2016, 10:58 PM
Elmoiz Abunura Elmoiz Abunura
تاريخ التسجيل: 04-30-2005
مجموع المشاركات: 6008
سلامات ياود المدير من بيروت مالك مودينا لسينما الجمهوريه. نحن اولاد السودنه اقرب لينا الجديده والوطنيه. مره انا ودفعتى وصديقى المرحوم الموسيقار امين خواض ابراهيم مشينا بالعجلات لفلم فى سينما الجمهوريه, لقينا فىها زملائنا من عطبره الثانويه, المرحوم حمدالنيل, وعبدالله القطى البقا عضو لجنه مركزيه بالحزب الشيوعى.لمن طلعنا بره السينما لقينا دينامو النور للعجلات اتسرق. من اليوم داك ماعتبت سينما الجمهوريه ياود المدير. سلام لشباب كالغرى الزين P. S صديقى الاصغر ادريس العجب جاكم فى كالغرى من بيروت قبل 3 شهور. اسآل منه الصديق الباقر عثمان واتعرف عليه ياود المدير
12-26-2016, 01:41 PM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
Quote: السلام عليكم يا صاحب البوست وضيفة و عمتم مساء كده سطر اخ هشام انا اظن وبعض الظن يقين ان الشعب السوداني مسلم ومن الصعب جدا جدا تجريده من اسلامه على ارض الواقع مهما فعلت والاستنارة في مصطلح العلمانيين اظن انها تعني الالحاد وليست مقصود منها بالضبط تبصير الشعب بحقوقه لانها لو كانت بالمعنى الاخير فهي متوفرة ولتعلم يا اخي الفاضل ان ملامسة الشعب السوداني الفضل في دينه ومخاشنته بشي يوحي بالبعد عن الدين كفيلة بنفض يد اي منهم من ذاك الشي حتى لو كان هذا الشي هو الولد او الوالد وحتى لو كان الفرد غير متوسط او معتدل التدين .. عليه نجحت كثيرا من الاحزاب في تبني خطاب ديني حتى لو نفاقا لتحصد اصوات وبدأت هذه الاحزاب باستعمال الالحاد والزندقة والكفر فزاعة ونجحت في ذلك ولكن ومع ذلك الشعب حقا سيزهد في الديموقراطية والحرية والاستنارة بمعناها البعيد والقريب اذا احس انها ستبعده عن دينه .. ارجو ان اكون اوصلت فكرتي .. ودم بخير كدة سطرين يا معاوية عندي باقي سطر
سلآمات يا دكتور أحمد، وألف مرحبا بيّك. أسعدتني طلتك والله عشان كدا أنا بديك كراس ابـ64 كامل عسى ولعلّ تطلع بشي مع هذا هُشام. عموماً الراجل دا شايف في نفسو نبي ؤ بقُدرة حاجة في رِويسو دا بيقدر يجعل الخلق يعتنقوا خُزُعبلآتو دي، والتي أوحى له بها شي يعلمه هو وحده وهُنا تكمُن الوهمة التي لا تجعله جدير بأن يفتي في شئون وطن إسمه السودان. اكرر شكري علي الطلة، ؤ يا دكتو أُخُد راحتك، معاك كراس كامل...
12-26-2016, 05:31 PM
الشفيع وراق عبد الرحمن الشفيع وراق عبد الرحمن
تاريخ التسجيل: 04-27-2009
مجموع المشاركات: 11406
نتفق او نختلف مع الاخ معاويه المدير لكن الجميع يعلم ياالشفيع وراق ان معاويه ليس عنصر امن نظام الحركه الاسلاميه الارهابيه, ولا جداده الكترونيه, كما انه ليس الشخص الذى يشى بالوطنيين السودانيين فى السعودبه. انا احملك شخصيا مسؤولية سلامة الفرسان الوليد والقاسم المعتقلين الان فى السجون السعودية
Quote: صديقى الاصغر ادريس العجب جاكم فى كالغرى من بيروت قبل 3 شهور. اسآل منه الصديق الباقر عثمان واتعرف عليه ياود المدير
سلآمات يا ابو نورة. الشاب الظريف إدريس كتّر خيروا والله وصلنا قبل ما نصلوا ؤ جانا في النادي. اليومين الفاتن ديّل قابلتوا في إحتفالات كالقري برأس السنة وهو مبسوط وبألف خير بس نحن المقصرين معاهو...
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
معاوية المدير
محمد البشرى الخضر
هشام آدم
عبدالحفيظ ابوسن
أبوبكر عباس
زهير عثمان حمد
أيمن نواى على
ابراهيم عبد الوهاب
جلالدونا
عبدالعزيز الفاضلابى
ALWALEED ALSHEIKH
Elmoiz Abunura
الشفيع وراق عبد الرحمن
فيس بوك
تويتر
انستقرام
يوتيوب
بنتيريست