|
|
 تحياتى ؛ الابن العزيز د. ابو بكر عباس .
|
09:22 PM July, 27 2017 سودانيز اون لاين
shaheen shaheen-
مكتبتى
رابط مختصر "" سلام شاهين ،
إذا أخرجنا ممارسة جنس خارج العلاقات الزوجية السودانية من منظومة القيم الأخلاقية المجتمعية وجعلناها مسألة شخصية جداً،
هل تختلف نظرة تقييمك لجيلك وجيلنا ؟ "" .
ده سؤال سيادتك فى رواية " احلام حسب الرسول " .
بالنسبة لى شخصياً , انا مُحافظ جداً , جداً فى سلوكى ممكن تقول مؤدب بمفهوم التيار المحافظ المتدين والمُسيطر على الساحة من نهايات سبعينيات القرن الماضى .
مُرتبط عاطفياً بمحامية اعتقد انها ناجحة فى مجالها , واكتر حاجة شدتنى ليها هى التزامها وانضباطها الاخلاقى والسلوكى , وكان قدامى نساء مُتحرارت بالمفهوم الليبرالى لكن خفتا منهن بكل صراحة .
انا يا ابو بكر والله ما عندى اجابات لحاجات كتيرة , كل ما اكبر فى السن بتزيد الاسئلة وتكتر الاجابات .
بحسد اصحاب اليقين المطلق , بحسد واحد بيبكى فى الصلاة معاى فى المكتب , وبتمنى اصل درجة اليقين والحب بتاعتو .
بحسد واحد صحبى سكران واعى بيهتف انو الشعب ح ينتصر , وانا ما عارف ما المقصود بالشعب وما المقصود بالانتصار .
عشان كده انا شردت من الكتابة السياسية المباشرة , ما عندى اجابات , عندى اسئلة .
فى رواية " احلام " كل الشخصيات تعبانة مُقلقة , وين الصح ووين الغلط , فى رواية " المرحاض " البطل متصالح مع وضع الشخصى كمثلى جنسياً لكن ساخر من مثليته ومن دوره السياسى كرئيس حزب بيخدع الناس , فى " عيونك يا حمادة فيها حاجة " كان سؤال البطل حول التضحية من اجل الناس وحول اختيارات حياتو وعدم تكوين اسرة ووجوده وحيد فى غرفة المستشفى وكل الغرف التانية فيها زوار واهل وابناء .
كل ما اكبر فى السن كل ما اتلخبط , " احلام البعثية " فى الرواية ماشية امريكا عشان خاطر ابنها الوحيد يعيش فى دولة محترمة , رغم انو العامل الرئيسى الكسرها نفسياً كان الغزو والاحتلال الامريكى للعراق .
يا ريت يا ابو بكر لو كان عندى مقدرة للاجابة عن كل سؤال .
ما رأيك فى الدين , والله كذا كذا .
ما رأيك فى الجنس , والله كذا كذا .
زى ما بيعمل كتير من اعضاء سودانيز .
فى حاجات كده يا ابو بكر ما بحب اخوض فيها بشكل علنى .
لكن فينى حاجة ايجابية , انا بحترم خيارات الناس جداً جداً جداً , مهما كان نوع خيارو فى الجنس او الدين او السياسة .
|
|
 
|
|
|
|
|
|
|
|
Re: تحياتى ؛ الابن العزيز د. ابو بكر عباس . (Re: shaheen shaheen)
|
جلينا يا ابو بكر , كان اكثر التزاماً , لو صحت كلمة التزاماً دى .
يعنى كان عندنا هبالة الحب العذرى واكل التسالى , والحاجة الباردة لمن استطع اليها سبيلاً .
من جيلكم وانتا نازل , اختلف الوضع , واعتقد , واعتقد انو الاجيال الاصغر اكثر تحرراً فى العلاقات الجسدية .
بعدين يا ابو بكر بنات زمان ديل كانوا ضخمات الجسد , فى الدورة المدرسية ناس بيت الامانة ومدرسة ايه كده الشعبية كانوا حاجة ضخمة , هسع تلقى البت بتعمل فى الدكتوراه وهى فى حجم طالبة اساس ما عارف ده سوء تغذية ولاّ فرق السنة المسحوبة من السلم التعليمى .
هل جلينا احسن , برضو ما عندى اجابة , لكن مثلاً من ناحية الوعى اعتقد جيلنا كان احسن بكتير , انا مثلاً من الثانوى كنتا جبهة ديمقراطية , لما دخلتا حركة " حق " لفترة بسيطة جداً اكتشفتا انو جيلنا شوية كان متقدم فكرياً عن الاجيال الحالية , لانو " حق " كانت من طلاب جامعات صغار جداً فى السن , وبالمقارنة لقيت انو نحنا ايام الثانوى كان مستوى اطلاعنا وتثقيفنا افضل .
| |
|
|
|
|
|
|
|
|
|
Re: تحياتى ؛ الابن العزيز د. ابو بكر عباس . (Re: shaheen shaheen)
|
الأخ شاهين، سلام
كنت في الطائرة في طريقي للسودان أقرأ أغتيال احلام عبد الرسول من PDF صنعته من نسخة ٢٠٠٨ المنشورة هنا،
لفت نظري مداخلة أو اهداء لجيلك جيل الهزائم والمقابر، وقرأت الرواية تبعا لذلك كمحاكمة لجيلك وهو جيلي (نهاية التمانينات) على ما أظن،
لذلك أقحمت ذلك السؤال التعيس موضوع البوست بهناك داخل الرواية.
آسف لذلك وحسنا فعلت بأفرادك بوست خاص، فقط لم يعجبني مناداتك لي بالابن!
فنحن تقريبا امتداد قريب لجيلكم نحمل نفس "احلام" الحب العذري
المهم يا زول، كتاباتك دي خطيرة وزي ما بقولوا:
ممكن تكتل ليها زول
| |
|
|
|
|
|
|
|
|
|
Re: تحياتى ؛ الابن العزيز د. ابو بكر عباس . (Re: أبوبكر عباس)
|
أقحمت ذلك السؤال التعيس بهناك كطوق نجاة لذلك المحامي الذي حمّل سكرتيرته
قلت في سري:
الجنس في هذا البلد الجاف اسهل طريق للابتزاز والهزيمة
حينما كتبت بوست:
"البحث عن البوي فريند الشرعي"
الذي تلقيت فيهو من السباب والشتيمة وقد إخافني امتداد الشتيمة لأطراف لا ينتهجون نفس طريقة نقدي لذاتي ومن حولي
توقفت خوفا وليس ورعا
خطرت لي فكرته وأنا اردد مقولة الكيزان:
فلنأكل مما نزرع
| |
|
|
|
|
|
|
|
|
|
Re: تحياتى ؛ الابن العزيز د. ابو بكر عباس . (Re: shaheen shaheen)
|
ما اعتقد فارق السن بينك و بين ابوبكر كبير للحد الذي يجعلك تناديه بِالابْن يا شاهين :)
ثم أظن انك باختيارك لدور الكاتب و الروائي في تناول قضايا المجتمع ورصدها و التفاعل
معها من الطبيعي ان تميل اكثر لطرح الأسئلة و عرض الواقع دون الدخول في تقديم المواعظ
او تقديم رؤاك و طروحاتك الخاصة، على الاقل هذا هو تصوري الخاص عن دور الفن و الأدب
في المجتمع.
| |
|
|
|
|
|
|
|
|
Re: تحياتى ؛ الابن العزيز د. ابو بكر عباس . (Re: أبوبكر عباس)
|
من الطبيعي ان تميل اكثر لطرح الأسئلة و عرض الواقع دون الدخول في تقديم المواعظ
كلامك صح ياحبيب ..
وبدل (تقديم المواعظ ) كما قلت .. الادب في عمومه ممكن يقدم أيضا حلول لمعالجة قضايا مجتمعية مثلما هو الحال في (الدراما)
أي يتناول القضايا بمنظور فني ويطرح تصوراته حيالها.
تحية للمبدعين شاهين والمستنير ولك
-
دي نوعية البوستات اللي مفروض تتصدر سطح المنبر
| |
|
|
|
|
|
|
|
|
|
Re: تحياتى ؛ الابن العزيز د. ابو بكر عباس . (Re: حيدر حسن ميرغني)
|
"" احتمال يا سيف، تكون المناداة بالابن من باب، أدباء برتبوا في سلم الإبداع مع بعض،
في الحالة دي
أقبل الأبننة "" .
لا .. لا , العفو د . ابو بكر , لا والله , الابننة دى هظار منى , وهى مسروقة من العزيز " عبد الحليم ابو قصيصة " , كان شابكنا فى ( ج . د ) يا ابنى , يا ابنى .
انا بحب نمط كتابتك الساخرة , ومشاغباتك وتكسيرك للعدة .
المصريين عندهم تعبير " عواجيز الفرح " , ديل ناس الانتقاد عمال على بطال , ما عندهم قدرة على الرقص او اثارة اعجاب الجنس الاخر , ف اهو بيقعدوا بس ينتقدوا , العروس شينة , العريس صغير , العشاء بسيط الخ .
انا ما عندى انتقادات حادة على الجيل الاصغر , هم رجال ونحن كنا رجال , ويمكن هم الصح ونحنا كنا الغلط , يمكن .
لكن الاكيد انهم الاحق بتقرير مصير هذا الوطن , والافضل انو ما نزاحمهم , نحن يا " ابنى " نستعد لركوب مترو (أ) الزهايمر (ب) وتضخم والتهاب البروستاتا .
مشيت اتبرع بالدم فى استاك لصالح قريبة عزيزة على قلبى , الدكتور ابن حلال قال لى بالحرف الواحد , بعد ما سأل لو مؤاخذة عن عمرى
- يا عمو .. من الافضل انو تتبرع بالدم فى مكان فيهو طوارئ او مستشفى , لانو الاعمار من خمسين لحدى ستين فى نسبة مضاعفات و آثار جانبية 20% .
حتى التبرع بالدم خرجت من قائمته , وعقبال وصولى السبعين لاسقاط عقوبة الاعدام عنى وفقاً لمنطوق القانون الجنائى 1991 .
تعرف اخر كشف نظر عملتو , البت الدكتورة مُنقبة , عندهم جهاز زى " الميكرسكوب " تثبت عيونك عليهو , فى نور بيجى مندفع على عيونك وانا بزح راسى , البت الدكتورة تانى تقوم تظبط لى الوضع , وفى اخر مرة نهرتنى نهرة قوية جداً
- يا جدو , لكن ما ممكن كده , ما تزاح عيونك من الجهاز .
والله العظيم قربت تقلع النقاب من الزهج , اليوم داك رجعت البيت وفكرتا فى ازعاج المسن للوسط المحيط بيهو , ومنها وما زلت بتمنى يا ابو بكر انى اموت واقف على حيلى , دى امنيتى الوحيدة فى الدنيا , ان اموت دون ازعاج لاحد , دون ان يضطر شخص لتنظيف برازى وبولى ولعابى من المرتبة والمخدة , ان اموت كامل الاعضاء " من القوة للهوة " .
شوف الفرق بين الامنية دى , والامنيات لنفس الشخص وهو كان طالع مظاهرة ايام طلبنته فى الثانوى العالى او كان طالع بيتكلم فى ركن نقاش .
تواضع الامال , من الاحلام الكبيرة الى حلم وامنية واحدة صغيرة , ان اموت وانا فى كامل قوتى ولياقتى الذهنية دون ان اسبب القرف او الزهج لزوجة او ابنة او اخ .
سبحان الله , نفس تراجع " احلام البعثية " , من حلم الامة الواحدة ذات الرسالة الخالدة من المحيط الهادر للخليج الثائر , الى حلم الهروب لامريكا لانقاذ ابنها الوحيد من عفن وطن لم يعد حتى شبه وطن .
- وما الدنيا الا مسرح كبير يا ابنى الحبيب .
| |
|
|
|
|
|
|
|
|
|
Re: تحياتى ؛ الابن العزيز د. ابو بكر عباس . (Re: حيدر حسن ميرغني)
|
تحياتي شاهين
وضيوفه
ضيوفه الاعزاء
للادب في نظري حرية الحركة اكثر من الايدلوجيا ولو شئت لقلت بوست بكري مثالا والروايات . يتحرك الادب بحرية اكبر في فضاء الاخلاق والدين والمسكوت عنه . ولو شئت تبسيطا يمكن ان اكتب رواية عن ملحد بشكل ايسر من مقال عن ملحد . او او
سؤال الجنس شغلنا كجيل وقتها منتصف الثمانينات .. وهو انشغال مشروع كمقبلين علي رجولة مبهمة . سؤال عن الجنس في ظل ثقافة منفتحة بشكل واسع علي اليسار .. اليسار الماركسي اللينيني بالتحديد وتلك النظريات حول الاخوال . واصل العائلة وكتابات نوال السعداوي .. السلوك الجنسي او لنسمي الاشياء بمسمياتها الممارسة الجنسية هل تأخذ شرعيتها من العاطفة ام من ضوابط المجتمع
آسف للتخريمات
حضور
| |
|
|
|
|
|
|
|
|
|
Re: تحياتى ؛ الابن العزيز د. ابو بكر عباس . (Re: عبدالحفيظ ابوسن)
|
بكور
مخاطبة شاهين لك بالابن ذكرتني بالاديب الاريب الراحل جمال محمد احمد (حلفاوي زي شاهين)
كان ينادي رصفائه من الادباء والمثقفين بنفس الطريقة .. يا إبني ..
وفي بعض الاحيان بـ "إبن أمي".
-
شاهين يمتاز باسلوب سرد ساحر وسهل يجبرك على مطالعة مواضيعه للنهاية دون ملل
يذكرني بالمؤلفين و screenwriters (كتاب السيناريو) المجيدين امثال اسامة انور عكاشة
| |
|
|
|
|
|
|
|
|
|
Re: تحياتى ؛ الابن العزيز د. ابو بكر عباس . (Re: عبدالحفيظ ابوسن)
|
"" ثم أظن انك باختيارك لدور الكاتب و الروائي في تناول قضايا المجتمع ورصدها و التفاعل
معها من الطبيعي ان تميل اكثر لطرح الأسئلة و عرض الواقع دون الدخول في تقديم المواعظ
او تقديم رؤاك و طروحاتك الخاصة ، على الاقل هذا هو تصوري الخاص عن دور الفن و الأدب
في المجتمع . "" .
تحيات العزيز جداً جداً على قلبى د . سيف النصر .
بالظبط كده , وكمان يمكن التكوين النفسى بيلعب دور , يعنى الشخص الاجتماعى بيميل للعمل المؤسسى فى احزاب او نقابات او مجالس ادارة اندية فى الحى , والشخص غير الناجح فى مجال العلاقات الاجتماعية الميال للعزلة بيتجه غالباً للانشطة الفردية زى صيد السمك , السماعة فى اضانه والسنارة فى يده , والله ورقبته عايش فى دنيا خاصة بيهو .
والرواية زى صيد السمك .
غير ميلى للعزلة والانفراد , بقى عندى مشكلة الخرس , يعنى بسمع بالخرس الزوجى مثلاً , لكن انا بقى عندى خرس اجتماعى شامل كامل غير مفهوم , اقل زول بتيكلم فى بيتنا , لما يجوا ضيوف فى البيت ما بعرفهم ما بعرف اتكلم فى شنو , ودى سببت لى مرة فشل علاقة مع انسانة ممتازة ومثقفة , هى جنها كلام فى التلفون وانا بعد
- كيف امورك حبيبة .. كلو تمام .
ما بيكون فى موضوع تانى .
يمكن عشان كده الحوار بين شخصيات محاولاتى الروائية مرات بيكون اكتر من السرد المباشر , وده بعتبره تعويض عن عدم كلامى فى الواقع , زى الاعمى حاسة السمع عندو بتقوى .
اتجاهى للرواية , وابتعادى عن العمل العام بكافة اشكاله من تظاهر او اعتصام او احتجاج الخ , هو المكان المناسب لتركيبتى النفسية الحالية , اما هل انا الرجل المناسب لهذه المحطة التى قررت قضاء بقية العمر فيها / كتابة الروية / فـ ده بيحتاج منى لشغل شاق وتجويد لغة وتقليل الاخطاء الاملائية والنحوية بقدر الامكان .
ما مهم عندى شهرة او جوائز , او ترك بصمة .. المهم عندى انا افعل ما احب وان اجد نفسى فيما احب , فصاحب السنارة ليس هدفه السمك فى حد ذاته , لان سعر السنارة الجيدة فى السودان اغلى من سعر 5 كيلو سمك , هدفه خلق المتعة لنفسه .
ان تعمل ما تحب , هى هبة ربانية فى دولة فاشلة , فذلك الطبيب البشرى الذى اعرفه ترك الطب وبريقه وبريستيجه واتجاه لسمسرة العربات , لقد وجد الهبة الربانية اخيراً وبشجاعة اختار ما يحب ان يفعله فى حياته , فله التحية ذلك المعتوه .
| |
|
|
|
|
|
|
|
|
|
Re: تحياتى ؛ الابن العزيز د. ابو بكر عباس . (Re: shaheen shaheen)
|
السلام عليكم ورحمة الله تعالى الاخ شاهين وابنه أبوبكر عباس وحيدروب حسن ميرغني وبقية الكوكبة فعلا يا شاهين كونك تصف رجل فى قامة أبوبكر عباس
بالابن دى كبيرة شوية كدى راجع نفسك شوية وغير عنوان البوست عشان على الأقل نقدر نشاركك الرأى فى طرحك الفلسفى ولا شنو يا جماعة ؟
صديق مهدى على
| |
|
|
|
|
|
|
|
|
|
Re: تحياتى ؛ الابن العزيز د. ابو بكر عباس . (Re: على تاج الدين على)
|
بوست جميل !
عجبتني الحتة بتاعة ماعندي اجابات وعندي اسئلة فقط !
قد تكون الاسئلة ناتجة عن اجابات غير مكتملة او غير مقنعة ...او استنفذت صحتها !
قبل يومين وجدت سؤال في الفيس عن :
اذا كان البوزون سبب ظهور الكتلة فهل هناك سبب يوضح لماذا للبوزون هذه الخاصية ؟!
وهل له كتلة مضمنة فيه ؟!
اعتقد ان التفكير بطريقة الانفصال والاتصال هو سبب ازمة التفكير !
فنحن لانعرف الخط الواصل بين اي شيئين اذا سلمنا جدلا بوجود شيئين منفصلين
تسهيلا للمناقشة فقط !
عندما اقول جيلي وجيلك فهنا يوجد فاصل وهمي ، لان الاجيال لايوجد بينها فاصل من اي نوع
وانما يوجد امتداد للحياة دون فواصل وكل لحظة في الحياة امتداد لمايسبقها واساس للحظة قادمة
| |
|
|
|
|
|
|
|
|
|
Re: تحياتى ؛ الابن العزيز د. ابو بكر عباس . (Re: عبداللطيف حسن علي)
|
تحياتي لاستاذنا شاهين ومستنيرنا
عبرت عني يا شاهين في جزئية حسد اصحاب اليقين حتى لو كانو على خطأ
المهم يقين والسلام وصدق من اطلق عليه صفة البرد (برد اليقين)
للاسف ما يدور بعقولنا من اسئلة وافكار لا يسمح لنا بهذا البرد
لدجة الشك في صحة وصدق يقين الناس من حولك
تحياتي
| |
|
|
|
|
|
|
|
|
|
Re: تحياتى ؛ الابن العزيز د. ابو بكر عباس . (Re: محمد البشرى الخضر)
|
سلام
وتحيات تحمل رائحة وونسات شقىة الهرم والجيزة وام المصريين
اعجبنى فقرتك التالية
((فينى حاجة ايجابية انا بحترم خيارات الناس جدا جدا جدا جدا مهما كان نوع خيارو فى الجنس او الدين او السياسة))
مهمة جدا مهما كان نوع خيارو
طيب ليه ما احترمتا خيار صديقنا عثمان محمد صالح فى موضوع الدين
وشاركتا فى الحملة التكفيرية ضدو
قد نختلف مع عثمان فى خيارو الدينى وطريقته فى التعبير
ولكنه خياره
| |
|
|
|
|
|
|
|
|
|
Re: تحياتى ؛ الابن العزيز د. ابو بكر عباس . (Re: mohmmed said ahmed)
|
تحياتي محمد وبعد إذن شاهين الموجه له السؤال
عثمان من بادر بعداحترام خيارات الآخرين بالإيمان وتقديس الرسول عليه الصلاة والسلام وطفق ينقل كل ما هو مسيئ له ويصفه بأحط الصفات
كثيرين ملحدين او لا دينيين أو يدينون بغير الاسلام ولا احد يتعرض لهم او لخياراتهم لكن ما فعله عثمان مختلف وتعدى حريته وحقه للمساس بحرية الآخرين وحقوقهم
| |
|
|
|
|
|
|
|
|
|
Re: تحياتى ؛ الابن العزيز د. ابو بكر عباس . (Re: محمد البشرى الخضر)
|
أكبر نقطة ضعف في شخصيات رواياتك يا شاهين، هي حياتهم الجنسية العاطفية.
أعتقد إنّو الانسان فشل عبر العصور فشل شديد في تنظيم حياته الجنسية والعاطفية،
فشلت الأديان في ذلك كما فشلت العقود الاجتماعية والعرف.
الانسان يمارس في هذه المسألة ازدواج معايير،
السبب في ذلك تدخل الهورمونات بشكل يفقده السيطرة والتوازن،
قد تخون زوجتك بسبب هذه الهورمونات وتجد لنفسك العذر، لكنك لا تستطيع مسامحتها إن علمت بخيانتها لك!!!
التجارب التنازعات داخلك تثبت لك استحالة وضع اطر اجتماعية أو قانونية تحكم هذه المسألة.
لاحظ لرجل مثل كلينتون يفقد السيطرة داخل البيت الأبيض.
الخواجات فصلوا هذه المسألة عن السياسة والأخلاق.
داير أصل لشنو؟
| |
|
|
|
|
|
|
|
|
|
Re: تحياتى ؛ الابن العزيز د. ابو بكر عباس . (Re: محمد حمزة الحسين)
|
" طيب ليه ما احترمتا خيار صديقنا عثمان محمد صالح فى موضوع الدين
وشاركتا فى الحملة التكفيرية ضدو
قد نختلف مع عثمان فى خيارو الدينى وطريقته فى التعبير
ولكنه خياره " .
اورد الرابط استاذ محمد سيد احمد , حتى يعرف الناس مدى مشاركتى فى حملة تكفير استاذ عثمان .
انا لست مؤهل لاداخل شخص لاى دين , او اخراجه من اى دين .
انا ضد الاساءة لمشاعر ومعتقدات الناس الدينية , وستجد هذا فى لائحة داخلية لاى حزب سياسى لديه لائحة داخلية تحكم سلوك اعضائه .
x من الناس يعتقد ان الرسول المعصوم بتاع نسوان , او قاطع طريق , او ناجر القرآن من راسه , ليعتقد ما يشاء والحساب يوم الحساب , لكن لا تجرح مشاعر الناس بكلام لا يخدم ولا يوفر مدرسة وشفخانة وادبخانة .
لا تجرح مشاعر البوذى , ولا المسيحى الذى يعتقد ان يسوع ابن الله , او انه ابن يوسف النجار , لا تجرح مشاعر الشيعى الخ .
احترم خيارات الناس الدينية , واطالب بدولة تحترم خياراتهم فى اداء شعائرهم , وحفظ حقهم فى عدم الشتم والسخرية .
واطالب كذلك بايراد الرابط الذى قلت فيه ان استاذ عثمان كافر , ان اوردته اعتذار لك وله واستقيل من سودانيز اون لاين فوراً .
وان لم تجده تعتذر لى .. ok ؟ .
| |
|
|
|
|
|
|
|
|
|
Re: تحياتى ؛ الابن العزيز د. ابو بكر عباس . (Re: shaheen shaheen)
|
سلام محمد سيد أحمد،
موقف شاهين من عثمان كان دفاع عن حريّة اعتقاد المسلمين من إعتداء يراهو من جانب عثمان.
قد نختلف في قراءة تقاطع حرية الاعتقاد مع اعتقاد الآخرين،
لكن شاهين فوق الشبهات من أن يقوم بتكفير أحدهم أو يساهم في قيادة حملة تكفير.
العظماء مثل شاهين لا يقعون في مثل هذه التناقضات
| |
|
|
|
|
|
|
| |
shaheen shaheen
أبوبكر عباس
سيف النصر محي الدين
حيدر حسن ميرغني
عبدالحفيظ ابوسن
صديق مهدى على
على تاج الدين على
عبداللطيف حسن علي
محمد البشرى الخضر
mohmmed said ahmed
محمد حمزة الحسين
فيس بوك
تويتر
انستقرام
يوتيوب
بنتيريست