في منتصف طريق حياتنا ، ألفيتني في غابة مظلمة ، لأن جادة الصواب كانت مفقودة..!! يصعب ان اقول، ما كانته ، تلك الغابة القاسية ، الحريف ، القويّة التي تبعث الخوف في الفكر مريرة هي ، لا يكاد يضارعها في مرارتها الموت ، ولكن كي اتكلم عما لقيت فيها من خير فأنا اقدر ان اذكر اشياء اخرى رأيتها هناك
في سالف الزمان ، حوالي سنة 1308 لغاية 1321 (زمن كتابة الكوميديا الإلهية)، كان في واحد طلياني اسمو (دانتي ألغيري).. ، اها اخينا ده كان زعلان من الوضع السياسي في ايطاليا وكتها (بالمناسبة الراجل ده كان وحدوي وبيطالب بوحدة ايطاليا ، وهي الوحدة التي نراها اليوم في ايطاليا ككيان سياسي موحد..!!..والله صحي..)..واكتر حاجة كانت منرفزاهو ، وكتها ، هي حكاية هيمنة شيوخ الدين المسيحي على الواقع..اها اخينا ، يتخيل لي ، وبعض الظن اثم..قام سطل سطلة تاريخية وكتب ليهو قصيدة طووووووووووووووويلة..و سماها (الكوميديا الإلهية ، كتر خير اخونا كاظم جهاد قام ترجمها ترجمة انيقة ولطيفة)..القصيدة دي ، فيها قرابة الخمسطاشرالف بيت شعر..والعالم تعارف عليها ، فيما بعد طبعا ، بانها ملحمة شعرية (امسودان ذاتها برضك عندها ملحمة شعرية كتبها الشاعر هاشم صديق وسماها قصة الثورة )..
من ضمن نقة الطلياني دانتي ، كلامات بتقول:
(اذا كان العالم الحالي منحرفا وضالا ، ابحثوا عن السبب في انفسكم)..
كبر
10-20-2015, 03:12 AM
Kabar
Kabar
تاريخ التسجيل: 11-26-2002
مجموع المشاركات: 18537
في سنة 1953 ، كانت في امسودان انتخابات (اول انتخابات في امسودان) ، اها ناس جريدة الديلي تلغراف البريطانية قاموا رسلوا صحفي اسمو انطوني مان..عشان يغطي الإنتخابات المهمة دي..اها الراجل ، اندوش جنس دوشة ، اسكتوا ساكت خلوها..ودخل بحمد ومرق بخوجلي وما فهم التكتح..فقام ذهنو اتفتق عبقرية وقال اخر نكتب كتاب ..!
في سنة 1954 ، قام الخواجة انطوني رجع تاني لأمسودان ، لأنو ما كان مصدق العجين والسواطة الحاصلة..و قال لناس الجريدة..داير يسبك فكرة الكتاب اكتر واكتر..! الشاهد عمنا انطوني اختار عنوان لكتابو..و قام سماهو: Where God Laughed أي والله : اين ضحك الرب..! اها تبريرو لإختيار العنوان ، قال لاطشوا من مقولة سودانية.. بتقول:
Allah made the Sudan, and he laughed
بالعربي البسيط: الرب خلق امسودان، وضحك كاااااااااااااااااااااااااااااك...!!!!!
طبعا ربك رب الخير ستر وما قسم للخواجة المستهبل ، انطوني مان ، زيارة امسودان لمن الجماهير ، فيما بعد ، بقت تهتف بطول حسها (ريسكم مين؟..نميري ، ابوكم مين؟..نميري)..او بالعدم (امريكا روسيا قد دنا عذابها..وشنو كده ما عارف..!!)
وبعد اتنين وستين سنة من كتاب الخواجة انطوني مان..انتو قايلين شنو؟
يبدو ان الرب لازال يضحك من هذه الخلقة العجيبة المدهشة الإسمها امسودان..!
حال امسودان حال وهم غريبة خلاص، تقوم النخبة تخلق ليها تورنودو (عصار لآوي) وتقوم تجري في نص العصار ده، زي رقصة التوستي بتاعة زمان دييك ، لمن البنات كانن بليبسن جكسا في خط ستة ، ولا ماكسي ، ما متذكر.. اهم حاجة العالم دي بتدور وتدور لمن جبوناتها تطير..و الخلق تقعد تتفرج علي عوارتها وتضحك..لأنو ، يبدو لي ، وبعض الظن اثم يااااااخ ، ناس امسودان بعد خطوط الجبون بتكون مافي حاجة..!!!
الحوار الوطني..جوطة شديد..النخبة جايطة للطيش..عوا ،لأ.. ما بجاي بغادي يا اخينا ،..لآ..ما فوق تحت ياخ ، لا ما تمسك من هنا ، امسك من هنا..لأ جوه امسودان ، لا ما دايرين جوه امسودان ، دايرين بره امسودان ، نجيب زعيط..لا جيبوا معيط..عفصتني ياااااخ فوق رجلي ، وانت مادي كراعك قدر ده لي شينو..طبزتني ، يا خي ما تلبس ليك نضارة سيفتي..وهكذا..وهكذا..!
مافي نخبة واحد بيقول للعوام هو الحوار الوطني ده شنو بالضبط؟..وليه اساسا كانت الحاجة دي في منعطف امسودان التاريخي الحالي؟..ولي شينو..ناس تسوي حوار في الخرطوم عاصمة امسودان وناس تسوي حوار في اروشا في تنزانيا ، ولا ندري هل هي عاصمة ولا حلة ساكت..!!
مافي زول ولا زولة (نخبة) بيجي يشرح للعوام الفكرة شنو ، لكن مستعد يحدر ليك.. عشان تقع في واحد من كومين فقط: يا اما مؤيد للحوار ويا اما معارض للحوار..مافي خيار تالت نوهائي..
المؤيديين للحوار ديل كوم اسمو (الأحزاب المشاركة في الحيكومة:هم كم علمي علمك)..والرافضين للحوار هم ناس المعارضة (احزاب ، حركات مسلحة ، افراد عاملين فيها حردانين وزعلانين من الحيكومة: هم كم ، علمي علمك..)..!
كبر
10-21-2015, 02:28 AM
Kabar
Kabar
تاريخ التسجيل: 11-26-2002
مجموع المشاركات: 18537
الجماهير العريضة مشاركة (لأنو أي دستور سوداني تقوم النخبة تنجرو ، بتقوم بتخط فيهو بند هام : الشعب مصدر سلطة الدولة)..لكن المشاركة بتكون كربي والجماهير ذاتها ما عارفة الحاصل.. فنخبة بتقول الحوار ناجح لأنو جماهير كتيرة ملتفة حولو(يعني سارقين اسمك وصوتك)..و نخبة تانية بتقول الحوار فاشل لأنو جماهير كتيرة قاطعتو(يعني سارقين اسمك وصوتك)..والجماهير دي ياهو انا وانت وهو وهي وانتم وهم وانتن وهن..يعني شعوب امسودان الساكتة كنوع من السلبية تجاه الحاجات..! طيب الأغلبية الساكتة دي ساكتة لي شنو؟..غايتو احتمال كبير ..دايشة دوشة الخواجة انطوني الجابتو جريدة الديلي تيلغراف سنة 1953 عشان يغطي اول انتخابات في امسودان ، فقام مرقها في تأليف الكتب وغيرو..!
كبر
10-21-2015, 02:32 AM
Kabar
Kabar
تاريخ التسجيل: 11-26-2002
مجموع المشاركات: 18537
ول ابا محمد البشرى..حبابك يا صديقي كتر خيرك على المرور.. يازول ضحك اسكت ساكت خليهو..! الأنكي ، بعد اتنين وستين سنة من نقة الخواجة انطوني..لسع في نفس المحل..الزيادة الوحيدة..بدل ندوات ومناشير..جابت ليها واتساب وفيس بووك..! الحوار ماشي على نظام (السايقة واصلة)..ومحدد ليهو تلاتة شهور.. اها الجماعة ناس المعاردة فاروا شو..عييك وعييك..وسكتوا..ناس نفسم قصير خلاص..! شايف ناس قطاع الشمال عاملين حوار موازي..في تنزانيا..و شابكننا ليك حكم ذاتي للمنطقتين (جنا تقرير مصير وكده).. والشيوعيين لاخمين الجماهير باستعجابهم من حكاية استفتاء دارفور..! مش الخالق ليهو الحق يضحك كاااااااااااااك..!! كتر خيرك.. كبر
10-22-2015, 06:39 PM
محمد كابيلا
محمد كابيلا
تاريخ التسجيل: 11-15-2008
مجموع المشاركات: 3510
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة