معقوله ماشفتو الحاصل في سواكن

Quote: تحياتي اخي حامد.. وحمدلله علي سلامة الوصول... نفس معاناتك عشتها في سواكن في طريق العودة الي جدة... تعطل باعبود ونما عمل زحمة في رحلة العودة وتكدس المسافرين في سواكن.. اول مرة في حياتي أتو الواسطة..وجرّيت الخمسين من قولة تيت وركبت الباخرة اول واحد...وفي نفسي حسرة على من انتهت تاشيرات سفرهم في سواكن.. _____ في اول يوم تم اعتقالي من طرف جهاز الامن والمخابرات الوطني..(قال كوز قال)ههههه تم اطلاق صراحي خلال 15دقيقة ...بسبب شفرة دكتور الغنم ..من كبيرهم في الخرطوم.. تم الاعتذار وسلامات والمابيعرفك بيجهلك يادوك.. السبب شنو ...ساشرحه لاحقا..

Quote: واظنك سمعتا بقصة اختنا الوقعت تووووش بحر احمر اي والله كانت حاجزه في نما والباخره اتحركت وهي مخليا وليداتا طرف الباخره مشت تعمل الاجراء وباقي على تاشيرتا يومين فقط فطوالي عشقت جوه المويه لولا عناية الله الحاضرة دوما من اجل الغبش المساكين انقذوها واسعفوها وركبوها دهب بعد عرفو قصتا

Quote: موش سمعت بس ..كنت شاهد عيان عدييل من فوق سطوح الباخرة دهب..وجات معانا في نفس الرحلة يوم الاتنين 2/9/2014.. كان موقف رهيب

Quote: اول مرة في حياتي أتو الواسطة..وجرّيت الخمسين من قولة تيت وركبت الباخرة اول واحد...وفي نفسي حسرة على من انتهت تاشيرات سفرهم في سواكن..

Quote: موضوع كوبري جدة حلايب حاصل فيه شنو ؟

Quote: عرفنا انو الباخره نور ماشه بي موتور واحد وحركوها عشان يفكو الزحمه يعني لو ردفت سبيكه او قطعت وش راس او شحطت بستم معناتا عناية الله والموج والهوا تقيف عدن تمشي الصومال ماشغلوم وعشان القصة دي الباخره ماشه باقل من سبعه عقده بحريه المهم صلوات ودعوات وعناية الله ظهرت ابراج الجوال وانوار مينا بشائر والبورو بورسودان وسواكن قلنا بعد كده نتمها خواضه

Quote: حامد بدري يا ود العم كيفك ليك وحشة ياخي إنت زول قاص وسردك متعة واصل مستمتعين بالحكي اللذيذ

Quote: سلام من الله يغشاكـ وممتنين على تنويركـ للناس عبر هذا البوست ، لدي صور ووثائق عن رحلتي من جدة لسواكن يوم29 رمضان وكنت انوي فتح بوست قدر الليلة وبكرة لسرد المآسي لكن كثرة المشغوليات حالت دون ذلكـ . الباخرة نور فعلاً انقذت الموقف بنقل اعداد كبيرة رغم بطئها ومكوثنا لاكثر من عشرون ساعة ابحار. وتعمدت لقاء قائد الرحلة (كابتن / كمال الدين عباس العمري) واكد بانه وقع اتفاق مع الجهات المعنية بتسيير الباخرة نور قبل اتمام الصيانة اللازمة بشرط ان تستغرق الرحلة (20) ساعة ابحااار. ولي عوده..

Quote: ياه حالم دائما يا حامد بدري زمان من سنين طويله سافرت بسفينه اسمها الجودي ، برضو كانت ماشه بمحرك واحد ،جلسنا 17 ساعه فوق سطح المركب. كان وقتها قالوا ان الغبطان دخل بالسفينه في الشعب المرجانيه واعدم المحرك وصارت تمشي عرجاء بمحرك واحد. ربنا يهون بس. حمد لله علي السلامه

Quote: ود البدري يازول الف حمد لله علي السلامة اعتبر نفسك في سياحةوخلي كلام ناس الراحات ده ود العريفي

Quote: تقوى حسن بليلة · University of Toronto في سواكن تشوفو العجب و الحاجات دي من زمان استنزاف موسمي المفروض الناس يوقتو اجازاتهم في فترااات غير مصادفة الاوقات دي

Quote: حامد .. سكيرفي .. وحمديلا على السلامه ... وانتا زاتك غلطان تسافر مع باعبود .. دا بواخر قديمه ومستهلكه .. انا اخر مره سافرت فيها بالبحر كان عام 1998 ومعي سيارة كرت .. على الباخره الجودي ( على ما اذكر ) وكانت خدماتهم جيده جداً ويختموا ليك جوازك وانتا داخل الباخره قبل الوصول ..

Quote: حمدا لله بالسلامه يا حامدأولا ثانيا فهمت أنك لس موجود في السودان الوضع في سواكن الآن ...... الآن أكثر من خطير ألوف المسافرين موجودين في سواكن ولا توجد بواخر ولا غيره لي أسره موجوده هنالك لهم حوالي 5 ايام لاحظ عائله واطفال وعربيه وفي الكثير من الناس خروجهم وعودتهم إنتهت المدارس فتحت في السعوديه ولا حياة لمن تنادي وكلاء السفر الأمر خرج من إيدهم لأن ناس الأمن والسلطات أوقفوهم يعني لو عايز تسافر للسعوديه لازم عن طرقهم والا فلا تخيل أطفال وعوائل قاعدين في سواكن الإنت عارفها يا حامد بدري الي هي لو ربطوا شيطان إستحاله أنه يقعد فيها فيا أخوي شوف طريقة رجعه تانيه غير سواكن .

Quote: انقتووو عاصم هكرفيجلو ان بلدلا نوركا حمدن تان تيقني .............سكيرفي

Quote: الأخ/ حامد بدوي

Quote: صباح الخير ربنا يعين من تقطعت بهم السبل في سواكن ويعين السودانيين الذين يذوقون الامرين ... الواقع في سواكن في وادي وتصريحات المسؤولين في وادي آخر اللي ربنا فتح عليهو بكلمة من الرسميين في هذا الشان يتحدث عن ازمة حاصلة وفي طريقها للانفراجة ...كعادتهم أكاذيب وتصريحات تناقض الواقع كأفضح ما يكون التناقض

Quote: طيب البودره الراشنها للمرقوت في دهب شفتها غايتو زولي مرق خلا الغرفه للسطوح عشان المرقوت ارحم من ريحة الجمكسين والسفتي مان بقول الباخرة مابتؤووووفش يابيه امتى حنضفها دي عايزالها اسبوع كامل ونظام معين للتنضيف رووووح ياجدع كلم حكومتك غايتو انا استفزاز المصرييين وضحكوم علينا ده كان لي مراد اختف واحد منهم واقع بحر احمر غايتو وقعان البحر بجيب نتيجه تاني

Quote: شفتا البودرة في الغرفة ..والصراصير والمارقوت التقول دافعين تذاكر.. الصرصــــــور يقدل في نص الغرفة...معاي شباب مشينا لي بتاع الغرف..للاسف سوداني بيكلمك من راس نخرتوا قلنا ليه تعال نضف الغرفة ...جا زهجان ...كرب رب ...امسحك امسحك..كانو ما عمل حاجة .. قلنا ليه هات عدة النضافة دي.. نضفناها من الجمكسين برانا.. لا بديل لي باخرة نما الا نما... رحلة العودة الي السودان الشقيق..الباخرة باعبود...نور

Quote: زي كلامك في السياسة وتخيلاتك العجيبة ديك.

Quote: عفوا يا حامد بدري أصابك رايش. الجاتك بسبب إسمك سامحتك........

Quote: الأخ حامد بدري والمتداخلين الكرام وأخص الذين ما يزال يداعب أخيلتهم أمل بتحسن الأوضاع في السودان والذين ما يزالون يحفظون مصطلحات بالية عن إنسانم السودان النبيل الصادق الما عارف شنو ... أنا يا دووووب جاي لي أقل من أسبوع ومرقت من بين فكي أسد وتمساح .... في رحلة العودة من السودان وبعد إنقضاء الإجازة قمت بالإتصال بأحد أقاربي ببورتسودان وهو يعمل |(مخلص ) لتأكيد حجزي على الباخرة (نما) بعد أن قام بمراجعة مكتب الشركة أكد لي بأن هنالك لخبطة في الحجوزات ولازم يشوف طريقة عشان يشتري تذكرة جديدة ودي المفروض ابلها وأشرب مويتها ...! قلت ليهو أوكي وشاف التذكرة وإشتراها بقيمة 2000000 بدلاً عن 500000 ......والغريب إنو إشتراها من أحد رجال الأمن في بورتسودان ... قلت ليهو الدخل ناس الأمن في التذاكر شنو قال إنهم قاموا بإعتقال طاقم موظفي مكتب (نما ) بحجة أنها لخبطوا ولعبوا في الحجوزات .... وأخدوا منهم التذاكر وبطاقات الصعود إلى الباخرة ... ووزعوها بينهم ... الحشاش يملا شبكتو ... المهم طمأنني بأنه إشترى التذكرة ... وطلب مني الحضور فورا إلى سواكن .. وبالفعل تحركت في صباح الإتنين 1/9/2014 ووصلت سواكن منتصف النهار ممنيا نفسي برحلة سعيدة في نفس اليوم ... فوجئت بأنه لابد من دفع مبلغ 500 ألف لضابط الجوازات لكي يختم على جوازي بعبارة ( شوهد ) لأتمكن من صعود الباخرة ... ودفعت صاغرا المبلغ لكنه - أي الضابط بدأ من التسويف إلى أن غربت شمس ذلك اليوم وختم أخيرا على الجواز ... لكن كان الأوان قد فات وأن الباخرة قد أوشكت على الإبحار ... وتم شحن سيرتي وذكروا لي بأنه لا خيار أمامي إلا الإنتظار غلى يوم الأربعاء ( والمحاولة ) من جديد ...! وقد كان بالفعل ... عربيتي سافرت جدة وبقيت حتى الاربعاء وبقد قمت بعديد من الإتصالات والواسطات والمرتشين و و وللحصول على كرت صعود للباخرة وخضعت لصفوف وكانوا طوال النها يحولوننا من مكتب لآخر في بورتسودان ومررنا بأسام الشرطة لأن الأمر بيد رجال الأمن ... وفي الآخر قمنا بالإستعانة بواحد أمنجي وتم الإتفاق على أحضار كرت صعود إلى الباخرة ويبدو أنه منزوع من مستحقه ... لأنه بإسم آخر .. وطلب مني أن أقوم بدفع المعلوم إلى ضابط الجوازات للمرة الثانية حيث تم إلغاء الختم السابق ... يعني مآساة لا توصف بصراحة ... وما خفي أعظم

Quote: تحياتي مجددا..اخي حامد.. اخدتا جولة في بورتسودان.. صراحة اصبحت مدينة جميلة.

Quote: مندوب مجلس الوزراء لسونا الازمه انفرجت بتسيير رحلات جويه بين بورتسودان وجده وباقي حوالي مية الى مائتين مغترب بسواكن سيتم تفويجم مع الحجاج

Quote: مزمل طارق · جامعه النيلين كليه التجاره ياخ الواحد لما ينزل سواكن كانك فى كوكب اخر . عمال التحميل ورجال الامن اكتر من المسافرين ودا سبب الفوضه والاستقلال لمسافر باى شكل كان .. قبل سنتين سمعنا الميناء حايتحول لمدينه بورسودان ؟؟

Quote: كنت في سواكن وعايشت المشكلة وقد كذب مندوب مجلس الوزراء وكذب من قبله معتمد سواكن الذي أراد الفرار من الجموع الغاضبة والعالقة بجوار ميناء سواكن لكن إحدى النساء أعطته درساً في المسئولية وأداء الواجب فأضطر لمخاطبة الجموع الغاضبة وقد ذكر بأنه غداً سوف يذهب الى الخرطوم لإيجاد الحلول ولا يعلم بأن المشكلة لها حوالي الشهر ولم يتمكن من الحديث وفــر هارباً، سودانير لم تسعى لحل المشكلة بل إستثمرتها لصالحها حيث أصبحت قيمة التذكرة من بورتسودان الى جدة إثنين مليون جنيه، الشكر لشركة نما وجميع العاملين بالباخرة المحبة الذين لم يمنعوا أحداً أستطاع دخول الميناء من الصعود الى الباخرة حيث كان دخول ميناء سواكن امرا صعبا حتى لو بيدك التذاكر وجواز سفرك وإلا بعد الحصول على موافقة العميد حسب الرسول ولجنته الأمنية والذين هم كذلك إستثمروا الأزمة لصالحهم وكانت التذاكر تباع بمبلغ مليون ونصف جنيه رغم عدم توفرها بالسوق حيث إحتكرتها لجنة حسب الرسول الأمنية. ذكر لي شهود عيان بسواكن بأن هنالك إمرأة رمت بنفسها في البحر تاركة خلفها أطفالها لكن أنقذها المواطنون، وهنالك العديد من القصص والمآسي يمكن توضيحها لاحقاً, حل المشكلة بيد النظام لكن النظام هو الذي تسبب في تدمير الناقل الوطني ســودانير والخطوط البحرية السودانية، يبدو أن أي جهة مسئولة في السودان ســمح لها بأن تمارس فسادها في محيطها - الوالي في ولايته ومسئول الميناء بميناءه وهكذا.

Quote: جاي مسخن شديد عليك الله اكل ليك نص بتاع زريبان مع كوب من لبن الصافي وهدي اعصابك شويه ود العريفي

Quote: السنة الفاتت وأنا راجع من الاجازه فى توقيت مخالف للإجازات تجنباً للزحام والمشاكل السخيفة البتحصل فى سواكن . إتحركنا على الميناء قبل صلاة الظهر فتحوا لينا صالة المغادرة دخلنا على الصالة وجدناها من دون كهرباء ويومها كانت هناك رحلتين واحده على نما والتانيه دهب . طبيعى يحصل إزدحام داخل الداخل ومازلت الصاله مقطوع منها التيار الكهربائي واحد من العمال الشقالين فى الصالة بيتكلم مع عسكري, يا جنابو ليه ما تشقلوا المولد , جنابو مارد ليهو ولا عبرو. سالت العامل ,,عندهم مولد قال ايوه عندهم مولد لكن مادايرين يشقلوهو ليه ماعارف,بالنص كده. بعد العصر زاد الزحام والناس بدت تجوط وتعمل مشاكل ووقتها الزحام والتكدس فاق حد الوصف . هرج ومرج وصريخ وعفيص . إخيرا إبتدا ضباط الجوازت فى إجراءت ختم المغادرة . بعض الفاسدين والمفسدين إستقلوا عدم صبر وشفقة المسافرين ونحن كشعب سوداني نتميز بهذه الصفات الاستعجال والشفقه حتى فى الطيران وفى الظروف العادية المافيها اى مشاكل ولا داعي للاستعجال . عاملة نظافة فى الصالة وبعض السمسارة الذين لانعرف لاي جهة يتبعون كانوا بيشيلو جوازات وتذاكر المسافرين ويعملوا ليهم الختم بتاع المغادره بمبلغ لايقل عن 50 جنية وقتها . المتاكد منو عاملة النظافة دى ممكن تكون مرت على كتيرين منكم وشافوها الزولة دى اكاد أجزم إنها عملت أكتر من 100 جواز من الرشايدة وخلافة من الشفقانين . وكانت بتدير النشاط ده من خلف كافتيريا صالة المغادره التعيسة ال######انه الكلها كدايس . أى زول جاي من ناحية سواكن لو حصلت زحمة ينتبة للزول دى حا يشوف العجب. المصيبة بعد طلوعنا للباخرة إكتشفنا إننا فى الباخره دهب لايتجاوز عدد الراكبين ال 150 نفر وحوالى 15 سيارة . من الاخر يا بدرى . إفتعال المشاكل وخلق الازمات يصنعه بعض الطفيلين والمنتفعين .