|
|
|
 Re: السيدة/ عوضية عبد الله آدم (عوضية سمك ) قصة نجاح وكفاح ..... (Re: Ridhaa)
|
لافته بالموردة لن تخطئها عين التاريخ
*يا ناس الضرائب... أرحموني أنا غلبااانة
الخالة عوضية عبده امرأة عصامية وطموحة سقف طموحاتها ارتفع خلال سبعة عشر عاماً حتى وصل بها لتصبح أول تاجرة أسماك امرأة بموردة مدينة أم درمان. قصدناها لإجراء حوار معها فقابلتنا بترحاب فاق كثافة دخان صاج السمك الذي يرقد بجانبها وتمطره بين الحين والحين بوابل من السمك المتعدد الأنواع والأحجام والأسعار.
جلسنا إليها في ونسة دقاقة نسألها عن مهنتها وحكايتها مع التجارة بالأسماك فقالت:
أنا اسمي عوضية عبده عبد الله آدم، أسكن منطقة أمبدة وقصتي مع تحمير السمك بدأت قبل 17 سنة على شاطئ النيل بمحاذاة الموردة مع "السماكة" بدأت ببيع الشاي والزلابية ثم تدريجياً انتقلت إلى العمل في مجال الأسماك لأن العمل في مجال الشاي غير مريح.
× أنتِ كامرأة هل كان من السهل لك الولوج في سوق السمك لتنافسي الرجال... أحكي لنا عن ذلك؟
-البداية بالنسبة لي كانت صعبة جداً أولاً لأنني امرأة وثانياً لأنني أعاني من إعاقة حركية كما تلاحظين.. ولكن قوة الإرادة والعزيمة والتوكل على الله هي التي أعانتني على تحقيق هدفي إضافة إلى المساعدات العظيمة التي قدمتها لي منظمة تحدي الإعاقة من تجهيز الشواية بهذا الشكل الذي يرضي كثيراً من الزبائن وشكل الشواية والمطعم واحدة من الحاجات التي حققت لي النجاح – بارك الله في منظمة تحدي الإعاقة. وجزأهم الله ألف خير.
× هل الدعم هو الدافع الوحيد.. أم أن هنالك دوافع أخرى؟
مثل ماذا.. لم أفهم قصدك
-أقصد إنتي يعني ما كنتي راغبة تتعلمي تحمير وشواء السمك وتسويقه لكي تحسني وضعك؟
في قصة كده حصلت لي في المستقبل مع شراء السمك هي التي دفعتني للتعرف على أنواع السمك ثم المتاجرة به وتجهيزه وطهيه وبيعه للزبائن هنا.
ممكن تحكي لينا القصة دي؟
أيوه جداً.. في البداية زي ما قلت ليك أنا كنت شغالة ببيع الشاي وظروفي كانت صعبة وفي مرة طلبت من واحد من تجار سمك يديني سمك أوديهو لأولادي في البيت قام جاب لي كيس كبير مليان.. فرحت بيهو شديد وديتو لأولادي لقيتو كلو كبده سمك... واليوم الثاني كلمت واحد من السماكة الطيبين... فزعلتوا الحكاية دي وقال لي دا ما كويس ومرات بيعمل تسمم فطلبت منه يعلمني نظافة السمك عشان أتعرف عليهو أكثر وفعلاً علمني الكثير عن السمك وأنواعه ويمكن دا الخلاني أخش مجال طهي السمك وبيعه فيما بعد.
× يعني دي ما كانت البداية؟
- أيوه وطبعاً ما كانت بداية ساهلة زي ما إنتي شايفة المنافسة شديدة ومرات المعروض بيكون أكثر من الطلب.. إضافة إلى المضايقات الشديدة والإجراءات بتاعة ناس المحلية.
× ماذا عن أبنائك والتعليم؟
عندي اولاد وبنات والحمد لله فيهم البيقروا في الجامعات منهم مودة وجيهان. والأولاد منهم طارق المعاي في الشغل.
× بالتأكيد رسوم الجامعة كثيرة هل دخلك يكفي؟
- بدفع رسوم الجامعة بالأقساط، بدفع 3 ملايين لطالبة واحدة والثانية مليون ونصف والحكاية صعبة جداً.
كيف بتضعوا أسعار السمك؟
- السمكة الكبيرة زي دي من 20 إلى 15 جنيهاً وآخر سعر للطلب هو 7 ونصف جنيه وبتماشي مع الناس وفي ناس بيشتروا بخمسين جنيه وديل يكونوا مجموعة وفي ناس بي 30 جنيه. والحمد لله الزبائن زايدين كل يوم وأنا بعمل سمك بس.
هل بتشتغلي يومياً؟
من الساعة 8 صباحاً حتى 8 مساءً دون انقطاع وبشغل معاي أولادي وأخواني وبنات عمي حتى في الأمطار الشغل متواصل وما بنقطع وشهر رمضان بنعتبره راحة وإجازة وبجهز مصاريفو من بدري.
× ذكرتي ناس المحلية بضايقوك.. كيف يعني؟
- هم خير وشر في وقت واحد. كانوا معذبني والآن بعد مساعدة المنظمة أموري مشت تمام.
× لماذا اخترتي شارع الموردة دون غيره؟
- كنت في البداية في سوق الموردة فلما ضايقوني شديد والناس اضايقوا من وجودي معهم كامرأة انتقلت لدكان آخر برضو ضايقوني وبعد 30 يوم رحلت بعد ما لقيت مضايقة من الناس الحولي خاصة أصحاب الشوايات. حتى في واحد جاء ومسك الدكان الجمبي كمان.
× ما هي الأشياء التي يفضلها الزبون مع السمك؟
طبعاً العيش والشطة والبصل والسلطة عشان غالية بيشتريها الزبون بألفين جنيه وبعد دا بنبيع سمك البلطي بـ10 جنيه والصغار من 9 إلى 10 جنيه والبرفض نديهو بـ7 جنيه.
× هل قعدتي في الشوايات قبل ما تبيعي السمك؟
الشهادة لله قبل الشغل ما حصل أكلت طلب سمك لأنو ما عندي قروش آكل سمك وأشرب بارد كنت باكل فول وعيش بشاي لأنو الوراي كثير وأول مرة بعد اشتغلت اشتريت 7 ملايات للبيت أولادي قعدوا يكوركوا من الفرح الشديد وحسيت بالسعادة واليوم داك اتملت دموع الخالة عوضية بالدموع من الفرح.
متى يرتفع سعر السمك؟
- في الصيف الشديد وفي موسم الخريف
× أبرز الشخصيات من الزبائن؟
الليلة جانا مدير هيئة المرور ومن شدة الزحمة لم أنتبه إليه ومن كل المؤسسات لدي زبائن كتار.
× الديكور الموجود بالمحل منو العملو؟
- عملتو جمعية المعاقين وكلفنا 2 مليون جنيه وناس الضرائب مصرين يدفعوني الضريبة والمفروض يعفوني لأني معاقة وبربي اولاد وبنات.
× رسالة لمن تبعثيها؟
- إلى كل مسئول نقول ليهو بنصبر على أرزاقنا بالرغم من كل المضايقات الموجودة دائماً.
× ذكرت إحدى النساء المشتريات للسمك بأن الخالة عوضية امرأة محترمة ومقدرة لأنها معاقة وتعمل وتشهد لها أنها لا تتمسك كثيراً في السعر يعني مجاملة مع أنها محتاجة للالتزامات.
× وذكر أمين عام منظمة متحدي الإعاقة الفاضل موسى محمد والأستاذة مشاعر مصطفى قالوا إذا نجح المعاق في حياته لا يجب أن نكسر جناحاته وأن يعفى من الضريبة. وعلى الدولة تنفيذ هذا البند.. فعوضية تقوم بتشغيل المعاقين معها وكل يوم جمعة تقدم وجبة لسجن النساء بأم درمان وتساعد الفقراء وتعتبر أنها تعمل للبر والإحسان أكثر من التجارة.
http://www.mossawi.com/vb/showthread.php?t=3532
| |
 
|
|
|
|
|
| |
Ridhaa
عبد الله شم
فيس بوك
تويتر
انستقرام
يوتيوب
بنتيريست