|
|
|
 Re: صديقي وحبيبي زُهاء الطاهِر.. ياخ كيفك.. طَولْنا.. والله مُشْتاقين (Re: عزام حسن فرح)
|
آدم سيد الرايحة
زُهاء الطاهِر
محمد ود أحمد الضهراوي خال آدم سيد الرايحة، حلف وأقسم بالذي خلقه، ورمى الطلاق بالتلاتة قدام الرجال المصنقرين في ضل راكوبة البني السرماطي والعوين كانن ورا الراكوبة من الجهة الصبحانية يتصنتن الكلام لكن ساعة وقعت حليفة الطلاق السوميت مرتو جفلت التقول وقع فوقا سوط المطر.
- على باليمين الكلام القالوه ليكم كلو خارم بارم، وكلام ساكت الكلام الصحي ترى عندي أنا دا. على الطلاق بالتلاتة من بيتي مافي زولاً تب بعرفوا زي. يا زول النصيحة أدومة ود أختي بتول كان نجيض بلحيل لكن خويويف. وزمان ساعة كان العيال بنادوا ليهو يا سيد الرايحة.... يا سيد الرايحة ويتضاحكوا. على بالحرام خشموا دا التقول مصمغ. تقوم البتول في العيال تهرج فيهم بعدين في الآخر تقول ليهم:
- آدم رويحتو بلقاها كان طال العمر كان قصر، لكن الكلام فيكم يا عيال العوين يا ملقطين يا أولاد الحرام.
آها يا أولاد الضهراوي كلكم كنتوا قاعدين يوم أنا من هنا قمتا تنكش تنكش الأبيض ما لقيت آدم قالوا ودوه الخرطوم من محلي داك وعنيت ليكم الخرطوم، لميت في ود أختي، قعدت معاه يومين بعدين في اليوم التالت كلمتو بالشئ الجابني.
قلت ليهو. يا أدومة ناسك ديل ياهم ريسوك وعملوك أوزباشا كبير وعريض مالك يا ود بتول لغاية هسع ما قمتا بانقلاب، إنشالا انقلاب فاشل يا سجم الرماد، على الطلاق يا أدومة أمك الغبشة دي كان سووها أوزباشا كانت قامت ليها بدل انقلاب واحد تسويهم عشرة، يا ولدي طلبتك بالنبي ارفع راسنا فوق قدام القبايل والمسألة كلها شختك بختك. بعد كلامي الحار على باليمين الولد العوير ود العوير صرصر وجيهو الزي وجيه عمو البني القاعد دا، ومدا بوزو شبرين وقام مشى، طلع من البيت وخلاني براي. بس ذكرني بأبوه العيفة المات زي الغنماية. ما أصلوا زمان أنا قلت لآدم في حياة أبوه. ابوك دا يا سيد الرايحة مبهدل ساكت وما فوقو نفع، وما ترجى منو خير فأحسن تشوف ليك طريقة. دنقر رويسو. ينخس في الواطا. قمتا طلعت خليتو. بعدين جا الدرت قام مشى معاي أب قبة علشان نشتغل في أي جاحة. بعد شهر قاموا ناس الجيش دخلوه معاهم. ما أصلو ناس الجيش أذاعوا ليهم بيان في السينما، وقت الإستراحة اذاعوا الإعلان وسيد الرايحة جوة السينما، لكن من كترة الهيصة ما فهم الزول كان بقول في شنو، سأل جارو في الكنبة قال ليهو: إنتا الزول برطن بقول في شنو؟
جارو قال ليهو: ديل ناس الجيش عايزين يجندو عساكر. الليلة ديك بعد ما رجع آدم من السينما تورني من عز نومي عشان أديهو الصابوناية، ومن تحت البرش مرقتا ليهو الصابوناية، شالا وقام طلع جلابيتو الدبلان وسروالو أب تكة واتحزم ليهو بملاية ووقع فيهم غسيل، غسلهم تمام التمام وشراهم فوق الصريف الريحاني وبعد داك نام لكن قبال البواح قام زي المخلوع، طبق هديماتو وختاهم تحت راسو، تحت المخدة، ونام فوقهم ومع طلوع الشمس قام فراهم، ودرع السروال، ولبس الجلابية ومرق من البيت براهو، ما كلم فد زول.
وصل الميدان الكبير داخل القيادة، لقى ليك الخلق ديك ما يدونك الدرب، وقف في نصهم أكتر من ساعتين لمان في الأخير ظهر ليهم شاويش طويل وعريض وشاف ليهم شوفة حقارة، وبعدين صفق تلاتة صفقات لا من قطعوا الحركة قام قال ليهم: عايزين نجند منكم خمسين واحد بس من هيصتكم الفارغة دي يلا خلاص بطلوا الكلام عشان نقدر نشوف شغلنا.
كانوا يمكن خمسمية، يمكن ألفو مية، يمكن مليون ومية، آها قاموا قسموهم تايه، تايه والشاويش قال ليهم حيقوموا يختاروا الأول والتاني من كل جماعة، بعدين الأوائل والتواني حيعملوا ليهم برضو تصفية لغاية ما يرسو على الخمسين.
وابتدت التصفيات لغاية صلاة العصر، وفي كل مرة كان آدم سيد الرايحة يطلع البرنجي، وفي الآخر المسعلة رست على مية نفر، قام الشاويش صفر ليهم وقالوا يا مِنْسَتِر، وبدو الجري، قولة بسم الله من باب الجيش، مرقوا بالسجن وبيوت السجانة، بعدين السكة حديد، رجعوا لغاية مخازن السكر في آخر البلد، نطوا المنطقة الصناعية بعدين كسحوا بشارع المصريين عشان يمسكوا الشارع الكبير الماشي صعيد، وصلوا في ثانية سوق النسوان وبعدين قاموا شالوا شارع الاسبتالية وصبّحوا لغاية النقل. ترتروا مغربين لمان وصلوا أب صفية، ودخلوا الرديف، مسكوا شارع أب شرا لغاية التمنة الغربية بعد داك عنوا زريبة الفحم قاموا رجعوا تاني بالدرب البوديك مقابر النصارى، وقعوا في شارع الزلط، الله لا بارك فيهم. هنا قاموا مسكوا درب السوق الكبير لغاية المحكمة قدام السينما ومن هنا شرقوا، بس المرة دي خلوا المنتزهة على يمينهم، ولفوا كان مرتين كان تلاتة قبلا ما يستعدلوا نهاي ويخشوا القيادة. وبرضو آدم طلع البرنجي. طوالي مسكوه ليك وعنوا بيهو الضابط، قام دقاه في كتفو، وحمر ليه في عيونو وقال ليه: عفارم عليك، آها بعد داك قاموا يعلموه الصفا والانتباه وحركات الجيش. على باليمين بعد شهرين بقى هو البعلم فيهم قالوا ليه كدة يا آدم؟ ووالله ما قصروا معاهو تب، ووقعوا فوقو ترقيات، كل سنة كانوا برقوه، كان في مناسبة كان مافي، أولاً قولة بسم الله رقوه ادوه شريط، تاني شريط بعد شوية عملوه شاويش بتشاويش وصول... بعد سنة زولكم ركبوا ليه نجمة، الكترابة... قبال ستة شهور عملوه أوزباشا كبير وعريض.
- وبعد دا يا ود أحمد دايرو يعمل ليكم إنقلاب يا أولاد الضهراوي؟
- مالو ما بعملوا الناقصو شنو؟
- خم وصر.
(منقول/أسعد/سودانيات)
http://www.sudanyat.org/vb/showthread.php?t=19826
| |
 
|
|
|
|
|
|
|
|
Re: صديقي وحبيبي زُهاء الطاهِر.. ياخ كيفك.. طَولْنا.. والله مُشْتاقين (Re: عزام حسن فرح)
|
ياسلام ياعزام
طريتنا زول سمح بالحيل المبدع الخلاق زهاء الطاهر
كنت محظوظ زيك ياعزام جالسته كثيرا وحاورته طويلا
ماجالست زهاء وإلا اشارلى لقراية كتاب بعينه ....
حين التقيه في دار الرزيقى المتلاف مسعود محمد على
زى ماكان بكنيه خالد الكد يتحدث زهاء عن النوب وثقافات
جبالة النوبة الملكةالمقاتلة (مندى) ويتحدث مسعود عن
البقارة وادبياتهم ورحلات الرعى كنت بحس وقتها وانا اسمع
ذلك الحكى كانى جالس بين ساحرين ثم التقيه مع النور عثمان
ابكر ويكون الحديث عن الترجمة والترجمات الادبية فاخرج من
عندهم بعقل تم تعميده بقديسين ثم نلتقى عند المخرج عبدالرحمن
نجدى ويكون الحديث عن السنما وتاريخ السنماواعظم الافلام في تاريخ
السمنا ومعهد الموسيقى والمسرح وذكرياتهم هناك وكلاهما خريج المعهد
اما عنددكتور اسماعيل الفحيل وكون الاخير عالم انثربلوجيا فيكون الحديث
عن الحكاوى والنوادر في جبال النوبة وبوادى كردفان ولمن امشى له بيته
واجده جالس على الكنبة في الشارع بقرب باب البيت يسالنى اسالة عن اربجى
لاقبل لى بها ثم ينبرى ويحدثنى اربجى التاريخة وكانه احد مؤسسيها ....
احزننى كثيرا نسيبه مهدى الذى عمل معنا كمترجم في عام 2010 ان زهاء حين
رحل عجزو ان يوارهو الثرى في بلدته حيث كانت الانقاذ في عز تتاريتها وحظر
التجوال فدفن في الخرطوم ولم يودعه سواء اربعة او خمسة من الاصدقاء تخيل
واحد من اعظم كتاب القصة القصيرة في السودان بل اكاد اجزم انه اعظمهم يرحل كدا
لدى مسعود محمد على وعبدالرحمن نجدى العديد من اعمال زهاء المنشورة في الصحق والغير
منشورة اليوم انا ماشاى افطر مع نجدى حا احاول استكتابه هنا واخد منه بعض اعمال زهاء
وبالمساء سوف اهاتف مسعود في بلد اليانكى واطلب منه ان يكتب هنا وبرضو حا اتصل بدكتور
اسماعيل الفحيل في الامارات واحاول استكتابه ....
شكرا عزام لقد نفضت الغبار عن الذاكرة الجمالية
والف رحمة ومغفرة لروح زهاء واريت الصديقة العزيزة
سلمى الشيخ سلامة تمر من هنازهاء كان بعزها كثيرا وبينهم
مكاتبات هى درر ادبية روحية
| |
|
|
|
|
|
|
|
|
Re: صديقي وحبيبي زُهاء الطاهِر.. ياخ كيفك.. طَولْنا.. والله مُشْتاقين (Re: عزام حسن فرح)
|
عزام كيف انك
بالامس ونحن بمنزل نجدى قرأ صديقى الادروبى درير بوستك في حضرة الاصدقاء عواطف حسين ود.منال السر
ومحمد سليمان ونجدى وشخصى نجدى قال ان لديه مقال كتبه عن زها ورحيل زها وتحمس النشرهم في هذه
النافذة وبعداك دور حوار الذكريات عن زها والدوحة والناس القديمين (الزيك طبعا) والمبدعين السودانين المرو على الدوحة
المهم انت ياعزام اتصل بنجدى وشيل منه تلك المواد وخلينى للباقين .....
وبجيك لسر اسم زها الذى ليس له علاقة بالكلمة العربية زهاء بضم الزاى والهمزة على السطر حسب شرحه هو
النا لاسمه وانا اقود سيارة مسعود في طريقنا لايصاله لمنزله وكان يوم جمعة وكنا متغدين مع صديقنا نوح ومسعود
كان داير يمشى حراج السيارات عشان يبدل سيارته المرسدس او يبيعها ....
| |
|
|
|
|
|
|
| |
عزام حسن فرح
Kabar
بدر الدين الأمير
فيس بوك
تويتر
انستقرام
يوتيوب
بنتيريست