أسد العرب منو الزيو فارسا في الفوارس والله ليهو زئير فارس دار جعل مقنع الكاشفات عمر اب زرد الفارس الطمطير عمر سيد الرجال الاصم والعدو من شوفتو ديمه يطير عمر الضكر وفي الضكارة زولا عنيد عنطير المرسال مشي لشريف نيجيريا وهلت هناك بشاير الخير وغنت دار جعل للفارس العنيد البرفع راسنا في الكانكير والطيارة قامت اتوجهت نيجيريا وفيها الفارس اب زنطير والخرطوم ودعت سيد الرجال الاسد البحاحي الطير وهناك في نيجيريا الكركون ضرب ونزلت طيارة الضانكير ونزل (اللسد) النتر ورافع راسو زايد هيبة وشموخا حير الجرجير وفي القاعة الكبيرة الرؤسا مجتمعين منتظرين اب زرد الديمه والله بشير وحجزولوا الكلام و الخلوق صنت وفي راسه التقول هناك رك الطير وزاعوا الاسم والمنصة رجفت والمكرفون اتضاير جنس ضيير والناس صفقت في انتظار الفارس الديمه والله كبير القاعة صنت وصنت وصنت وسفيرنا انحرج من كترة التأخير والرؤسا الفي القاعة هموا وقالوا ان شاء الله الحاصل خير اتنحنح سفيرنا المسيكين واتضاير قدام الخلوق ونسي انو سفير وعاين للقنيصل وقالو في اضانو : ان شاء الله يا اخوي خير وقالو القنيصل: بدور النصيحة يا اخوي .. يا حضرة ود عمي السفير علي بالطلاق فضيحة السواد والهواد ده شيتا ما بتبلع ده عيبا والله كبير ريسنا انفزر وفضحنا قدام الخلوق القايلاهو زولا بخافو نكير الريس اكان قريب بكون هسع في حجر ( ودوية) زي صبيرة لابدة جوه جحير الريس يا زول قام صوف راكب الطيارة وكمان سداري وقرب قليبو يطير بعد ما سمع انو حاجات الفول والتسالي عملن كبسيبة وقالن كلام ختير قالن لشريف نيجيريا : لو ما سلمتو لاوكامبو والله (بالاروق هنكلي ريهتك تير تير) اها غنن يا حكامات البلد... اسد العرب بقي صبيرة ساكنه ليها جحير! ـــــــــــــــــــــــــــــــــــــــــ
07-17-2013, 04:00 PM
هشام هباني هشام هباني
تاريخ التسجيل: 10-31-2003
مجموع المشاركات: 51288
مصادرنا تقول ان واحدا من الكيزان المتنفذين بسفارتنا بنيجيريا كان وراء هذه الفضيحة المدوية بغية الحصول علي مال ضخم من البشير شخصيا والذي يؤمن بالشعوذة والدجل حيث تعود هذا الدبلوماسي كلما المت زنقة بالحكومة ان يرسل رهطا من المشعوذين والسحرة النيجيريين الي الخرطوم علي أجنحة طائرة الرئاسة ( المحوطة) ايضا بالعروق وبالتعاويذ ل( يحوطوا) الريس وحكومته من كل شر وهذه المرة دبر هذا الدبلوماسي الالعوبان هذه اللعبة الخطيرة من غير ان يحسب لتداعياتها واثارها الجانبية علي سمعة الريس لانه كان يفكر فقط في احتلاب المال وذلك بالتعاون هذه المرة مع مشعوذ نيجيري كبير اخبره بنية قدوم الريس الي نيجيريا لهذا المؤتمر وطلب منه تدبير هذه التظاهرة المصطنعة و التي تسببت في هرب الريس ويبدو حسب السيناريو ان الدبلوماسي اخبر الريس بعد الوصول عن رؤية شيخه الفلاتي الكبير رؤية حول نية جماعة نيجيرية من الناشطين سيتظاهرون مطالبين بتسليمه للقضاء الدولي عبر قضاء نيجيريا وان هذه الرؤية رؤية الشيخ ( الفلاتي) الصالح ويبدو ان هؤلاء الناشطين جزء من هذا السيناريو المضحك وبالفعل عندما اكتملت خيوط اللعبة عندها اخبر الدبلوماسي الالعوبان البشير في اللحظات الاخيرة عن تحقق نبوءة الشيخ وبالفعل تأكد وجود تظاهرة ناشطين وشروعهم في تحريك دعوي للقبض عليه وصدق بالفعل الريس نبوءة المشعوذ واخلاص هذا الدبلوماسي الابليس وهو امر سيعزز من قربه من الريس ولذا هرب الرئيس نافدا بجلده وقطعا سيكافئ الدبلوماسي وصاحبه المشعوذ بهدية عظيمة علي حسن صنيعهم في الحفاظ علي حياته ولكن الاهبل نسي انه فقد كرامته ومرغ هيبته كرئيس امام مؤيديه والعالم اجمع حينما هرب بلا مبرر بعد حضوره وليته لو رفض السفر من اساسه الي نيجيريا لان التأويلات والمبررات ستكون حينها متوافرة لتبرير عدم الذهاب ولكن ان تحضر للمؤتمر وتحجز كلمتك وينتظر المجتمعون حضورك ولم تحضر ... حينها لا امكانية لتبرير هذا الذهاب المفاجئ الا عبر كذبة كبري بان انقلابا وقع بالبلاد اضطره للرجوع الفوري وهذا ما لم يحدث وهنا فضيحة السواد والهواد وهي في اعتقادي افضل مادة لحكامات السودان سينسجن عليها مواويلا من السخرية الرئاسية في شردة الرئيس الشراد لمئات من السنين القادمات!!
07-17-2013, 06:34 PM
هشام هباني هشام هباني
تاريخ التسجيل: 10-31-2003
مجموع المشاركات: 51288
لازلنا في انتظار بيان من هيئة الرئاسة لتوضيح ملابسات انسحاب الريس الفجائي من القمة الافريقية وهو الامر الذي ترك علامات استفهام عالمية واقليمية بسبب غموض هذا المسلك الرئاسي السوداني والذي يحتاج لتوضيح مقنع ومبرر ولا اعتقد ان لديهم حجة غير ان هنالك محاولة انقلابية بالسودان اضطرت الريس لقطع الزيارة .... واعتقد ان هنالك كباش فداء لا بد ان يضحي بهم من اجل سترة الريس واولهم سفيرهم وقنصلهم بنيجيريا بسبب ( انهم ما شايفين شغلهم) اذ كان بامكانهم تجنيب الريس هذه الفضيحة لو كانوا يتابعون أحوال الشارع النيجيري من قبل مقدم الريس....وايضا بالامكان في سبيل السترة يمكن اعتقال عسكريين في الجيش والامن غير راغبين فيهم سيتهمون بالاشتراك في المحاولة الانقلابية الفشنك!!
07-17-2013, 06:45 PM
الصادق اسماعيل الصادق اسماعيل
تاريخ التسجيل: 01-14-2005
مجموع المشاركات: 8620
وهو ذاتو الزول العرور الخبوب ده الموديهو مؤتمر الإيدز وما ادراك ما الايدز شنو بس قلة شغلة و ناسي انو الناس الكتلهم هو شخصيا في بلاده من شعبه بس اكثر أضعاف اضعاف من الذين حصدهم طاعون الايدز في تلت القارة الافريقية...فالايدز. يمكنك ان تتقيه ويمكنك أيضاً حتي بعد الإصابة ان تتعايش معه الي حين بينما سئ الذكر ( القشير) لا يمكنك ان تتعايش معه وسيغدر بك حتما الي ان يتخلص منك وقبل ذلك يمكن ان يعتقلك ويعذبك ويغتصبك ويقتلك وهذا ما لا يفعله الايدز!!
07-17-2013, 07:08 PM
عبدالأله زمراوي عبدالأله زمراوي
تاريخ التسجيل: 05-22-2003
مجموع المشاركات: 744
أجُنَ شعب السودان؛ أليس بيننا عاقل يربط هذا البشير وتعلن عليه محكمة شرعية الحجر؛ تحجر عليه. لقد بلغ السفه مداه؛ فما الذي يجعلنا نقبل برئيس يطأطئ رأسنا في كل زقاق في الكرة الأرضية. اليوم فقط هربت من عملي بعد ان تناول خبر هروبه بعض العربان: احشفاً وسوء كيلة لربع قرن بداناه باسم الدين وانتهى بنا المقام لنكتشف أننا قد ابتلينا بلاءً عظيما يا هباني في هذا البشير وناسه في السلطة.
هل نكفر بالوطن؟ لا والله لن نكفر ولكننا سنبصق عليه ذات فجر قريب!
07-17-2013, 08:13 PM
هشام هباني هشام هباني
تاريخ التسجيل: 10-31-2003
مجموع المشاركات: 51288
في انتظارك ان تسطر لنا من احاسيسك الجميلة معلقة هجائية في هذا الريس الخواف انتصارا لكرامة وكبرياء السوداني الجريح وارشح لها عنوانا ( سفر الهروب) اذ يمكن ان تنسج عليه مايشفي غليلنا من كلم يشفي الوجدان من لوثة الكيزان.
07-17-2013, 11:41 PM
هشام هباني هشام هباني
تاريخ التسجيل: 10-31-2003
مجموع المشاركات: 51288
مشير شنو وبشير شنو انت يا عمر البشير سفاح البلد رباطي البلد وكمان رقوك لرتبة مشير رقوك في زمن السجم وات همك بس تصير شاويشنا شاويش السجم جزارنا معدوم الضمير قدر الله قد جابك عديل رئيسا اهبلا فاضي وعوير لا طايوق لافهم لاخلقة لا اخلاق بس قعونجة تحت الزير
والله يا عوقة لو طرت السما وغسلوك بمطر السما وصبوك من دهبا نقي وسووك انسانا سوي بل سووك كمان نبي
برضو عند شعبي الامير انت احقر من حقير مجرم حرب سفاح خبير واولاد الهرمة المعاك هم افة البلد الكبير خرابة البلد الموكح بالسجم نهابة الشعب الفقير جلابة الدين الضلام ماهو دين الله القدير همباتة الرزق الحرام عنقالة الكضب الختير اولاد الحنوت اولاد الحرام زبالة الزمن العفن مومس الحال المرير
تف يا عفطة الزمن الكعب وعوع من دقسة الحال الضهب وتف لغفلة الناس الحيارى عندما غابت الناس البصارى وماتت الناس النوارة
فجاة قد جيت رئيس تيسا خرتوك من دكة تيوس وجيتنا في زفة تيوس ناسا حتالاتا نجوس همهم خم الفلوس والكل يحلم بالعروس عينة من بشرا رخيس نهابة البلد التعيس بالغدر والعمل الرخيس وبقيت رئيس وبقيت عريس وانت القايد وانت الرئيس خليك عريس همك الليلة الرقيص كل دلوكة داقة وقالو دقة للرئيس ما ات وحدك الرئيس وات وحدك العريس والماتو في الغابات فطيس
مشير شنو وبشير شنو والله لو طرت السما برضو عند شعبي الامير انت احقر من حقير
والله ما شفنا زولا بترقى في زمن الهزيمة وما شفنا زولا مهزوم ادوه قيمة والبلد في زمانك والله قد صبحت وليمة من سقط لقط دخلت جيوشا جبتوها للبلد الغنيمة وغردون جبتوه تاني بالعفانات القديمة وفشودة جبتوها تاني بالخسارات والهزيمة يا حليلك يا بلد امة قد كانت عظيمة باعوك انصاف الرجال بالجبن والحالة الازيمة باعوك برخس التراب اهدوك للاغراب وليمة لانهم عشاق كراسي وما عندهم للشعب قيمة
مشير شنو وبشير شنو والله لو طرت السما انت عند شعبي الامير انت احقر من حقير
مهازل يا بلد ستين مهازل حت (رواندا ) العفينة الغرقانة في بحر المشاكل ونيجريا سمعة حروبها قد ملت المحافل تهدي فينا وكنا تيجان المحافل تهدي في بلدي المناضل والذي كان حلال المشاكل بلد قدر السما وتاريخها مليان جمايل سديناها عين الشمش بسمح المكارم وحلو الشمايل وشعبي السمح كان بسمحو صايل وشعبي البطل بمجدو هايل
بلدي يا سجم ما جابت حوا غيرها فيها ترهاقا ونمر والمهدي ربان المسيرة فيها رابحة وفيها تاية ونحن منك يا مهيرة صانوها بدم الكرامة والشرف قد كان ضريرة قلعوها من خشم العدو بالعزة والروح الجسورة ما سرقوها في قومة دغش ونهبوا خيرها وما باعوها بالنص والتشاشة والفزرة والروح الكسيرة صانوها بالسيف والكرامة والهمة والنفس الكبيرة دي بلد شعبي المعظم براهو ليهو حق تقرير مصيرها مصيرنا وحدة شعب واحد ودم واحد مابنرضى غيرها شعب اصلي شعب يغلي وشعب جبار كسيرة اسالوا السفاح حليفكم يوم ليلة النصر الشهيرة ليلة مايو راحت (لعب ترتير جهال فوق الدميرة) واب عاج امامكم شردلاسيادو مكسوفا عضيرة وحق المظاليم ما بروح واطافي دنيا ازدادت شرورها ودم الشهيد ما ببقى موية طالما الاحرار هناك في راس المسيرة واهلي الغبش في الحارة زي موج الدميرة شايلنو ريدك يا بلد قدر الله ما خلق واداهم العافية الوفيرة
مشير شنو وبشير شنو والله لو طرت السما برضو عند شعبي الامير انت احقر من حقير
بلدا هاملة فاقدة وجيع وجيعا شايف دم البلد السمحة قاعد اضيع وخابر الناس الماكلة حقوقنا وسكنو القصر العالي منيع وسرقوا لبن الشافع اللسة رضيع بلدا هاملة فاقدة وجيع اقش الدمعة وافش غبينة الشعب المابي اطيع بلدا هاملة فاقدة وجيع دم الشفع لبن الشفع شربو الكوز الفاسد والله فظيع هذا الكوز نهب الدنياوحجز الاخرة هذا الفاسد هذا الكاسد ملك البيع باعو البلد السمحة وابدوا نهما اصلي شنيع
مشير شنو وبشير شنو والله لو طرت السما انت عند شعبي الامير انت احقر من حقير
الزول بترقى يوم نصرو يوم اعمل مفاخر وعزة الزول السمح عندما يعمل مآثر وات شبعان هزايم مليان وداشر والليلة قد بعت البلد لكل طماع وماكر والتيوس الانت فيهم جز دقونها جاي باكر جاي من وجع الغبش منهوبة الرزق يادوب تدافر جاي من ذل المظاليم هناك في جو الدفاتر جاي من زعل المغابين من زمن للحق تعافر جاي من وجع المساجين هناك في ذل المهاجر جاي من دم الشهيد كتلوه في زمن المساخر جاي من مهتوكة عرض مودرة وحيرانة ودايرالها ساتر جاي من وجع الارض وهي دنسها العساكر والتيوس الانت فيهم جز دقونها جاى باكر ورقيص شنو وعرضة شنو ات يا سجم العساكر والبلد مكندكة بالفقر والجوع قد طق البنادر رقيص شنو وعرضة شنو ات يا سجم العساكر والشعب قد سكن المقابر والفاشر الحبيبة قادلة فيها اغراب من عساكر طامعة في البلد الجنازة والشعب مسكين وصابر وانت راقص ماك شايف ماك خابر يا رئيسنا ويا عريسنا انت ياكبري الكباير
مشير شنو وبشير شنو والله لو طرت السما برضو عند شعبي الامير انت احقر من حقير
قال سلام وقال كلام فاروقنا جلاب الهزيمة رئيسنا وعريسنا ورقاصنا معدوم العزيمة في نيفاشا جابوك بارك شان توقع للهزيمة وصدقت انك حمامة للحب والسلام وماك داري انك كت متيس زي بهيمة وفي دارفور عصروك تاني وقلت (الروب يا الله للكوز والحكومة) وفي شرقنا العصرة حصلت وماك مصدق انو اوشيك الهوين الليلة مليان بالعزيمة وبعد ده كلو رقوك مشير رتبه ما عارف لزومها لاحس لا شعور جاري في الدنيا ونعيمه وكيف الله بنصر ملة الشر اللئيمة وكيف الله بنصر صاحب اليد الاثيمة بكرة شعبي المظفر يمسح اهاتو الاليمة بالكفاح الاصلي فيهو والشموخ الفيهو ديمة وتاني ترجع ام در تغني وتعانق الفاشر التميمة وجوبا السمحة ترقص لوحدة البلد العظيمة وكسلا بشوتالها شايلة فطرة البلد السليمة تطرد الهم من بلدنا وترجع ايامنا الحميمة لا مشيرا فينا يأمر ولا بشيرا عندو قيمة ولا دقونا فينا قادلة بالاساطير القديمة وتاني ما بننخم ليها بعدما شفنا الجريمة وشعبي شايل تارو جاهز حقو برجع بالعزيمة ونحن ما بنغفر ذنوب الباعو دينن وباعوا بلدي الحرة الكريمة والمسامح وحدو الله وما بنسامح الولعوا نار الخصومة والبجامل في حقو تاني ابقي زولا واطي ديمة والبجامل في عرضو مرة مصيرو للذلة وجحيمها بشير شنو ومشير شنو والله لو طرت السما برضو عند شعبي الامير انت احقر من حقير انت يا عمر البشير
تعظيم سلام واجمل كلام ليك يمّة يا حاجة الهدية رمضان كريم والله اكرم ومقبولة صومتك يا رضيّة ومني ليك أبرك تحية اديك صحة واديك عافية و حجة لمكة العليّة
وهناك تطوفي بالكعبة الشريفة وتدعي لينا يا شريفة ويا عفيفة الله افكنا من ولدك عمرهذا التليفة دلدول الخوازيق وكمان عامل خليفة وكمان افكنا من ملة الجبهة الجليفة ملة الدين المزوّر والخرافات السخيفة وافكنا من كل التوالي و الدلاقين الحليفة وافكنا من حالة العدم المخيفة وحالة الناس الشلش عدمانة حق الرغيفة
و قولي لي ولدك عمر اب عصاية عمر الكرور عمر العرور عمر الطرور يا هوي يا وليد خلاص وقف كفاية وخاف الله في ناسا تعافر مدفونة حية للرزق يا دوب تدافر مضبوحة بشرع المجازر مكشوشة في دين الكوامر ومضروبة في جو المخافر ومظلومة في جوف المقابر ومطرودة في كل المهاجر ومنهوبة بالدجل المشاتر ومذلولة بصلف العساكر ومغدورة بشرع الخناجر ومرهوبة بكضب العناتر
قولي لولدك عمر هذا العرور المعتبر الكنت قايلاهو انضف من قمر وكنت قايلاهو مهدينا المنتظر أوكنت قايلاهو المك نمر لكن يمـّة المولى ما قسملك ابدا ولد ربما خلوا التبيعة عكس قانون الطبيعة ودفنوا في الارض الولد وجانا من سرق البلد لم يلد ولم يفد هذا الكرور المستبد هذا الخواف المرتعد
عمر المشير المعتبر عمر البشير الما بشر عمر العساكر والكجر عمر المفاسد والغجر
قولي ليهو يا وليد وقف كفاية الوطن ماهو حوش بهايم للسعاية وارواحنا ماها لعبة هواية ودم الناس ماهو موية سقاية يا وليد يا هوي كفاية
قولي ليهو: ماعافية منك ماني امك وابرا منك وكيف تداري الليلة ذنبك يوم تموت وتلاقي ربك وماني قايلاك سفاحا محنك وماني قايلاك سراقا وليك فنك يا ضنايا قايلاك راجلا زول مكارم شايل الناس في الحنايا بفرح الايتام بعطفو وبديهم الحب والعناية وقايلاك راجلا بشبع الناس الجعانة بستر الناس العرايا وقايلاك راجلا حقاني في ساعة المظالم بدي للمظلوم حماية وقايلاك راجلا ما بتكضب ما بتنافق دينو اصلي مو دعاية وقايلاك راجلا في كلامك في سلامك فنجريا فضلو باين بالعطايا يا ضنايا
ضاع شقايا وطال اذايا ووب عليك من دم الضحايا وحق يتيما انت شارب دم ابوهو وانت اشنع من عدوهو شوقو للعيد والهدايا فاقد الريد والمحنة فاقد الحب والرعاية وبكرة برسب في القراية ولكن ماهو ناسي دم ابوهو وتارو والع في الحنايا
ووب عليك يا جنايا من حق معذب في سجونك بالوشاية ما بخلي حقو ابدا في النهاية وحق مشرد بفنونك في الخطايا وبكرة جاي من جمر المنافي زعلو وافي وكيلو وافي وديمة قادل في المنايا يا هوي يا وليد وقف كفاية ما عافية منك ماني امك وابرا منك وماك طالع من حشايا
واسأليه يمة عن كتلة الشفع صغار في العيلفون وكيف دمعة ام فقدت حشاها شويفعا دريفون والدمع سال مطر دافق هتون مالي العيون وكيفن ولدك كتال الرقاب عامل حنون اهدى للشفع حلاوة حلاوة من طعم المنون هذا المشير هذا الحمار رصاصو ولع في الدرافين الصغار باسم الله كبر وجاهد عمر الحمار وسال الدم ركب والبحر زاد احمرار واليوم قد كان عيد الضحية وكانوا شفعنا الضحية وليدك عمر اهدى للشفع ودار شان رفضوا الحرب رفضوا الدمار
والليلة عامل فيها حمامة للحب والسلام ونافش ريشو في نيفاشا فاروقنا الهمام وصدق انو صانع الحب والوئام بعد ماكان بشجع لعبة الموت الزؤام يا سلام من كضب جاب الطمام ويا سلام من دجل ساكن النظام ويا سلام من عفن راكز تمام ويا سلام يا سلام من هذا السلام قولي ليهو : ماني امك ما عافية منك وابرا منك *** اسمعيني يمّة الهدية انت عارفة الدنيا فانية ولينا مكتوبة النهاية والله عارف والله شايف كل ما كان في النوايا والدين يا يمه قالوا النصيحة والسترة ديمة بارياها الفضيحة واتى يمة بتعرفي الله وبتخافي الله وبترضي بالكلمة الصريحة وتب ما بترضي بالفعلة القبيحة والليلة عندي ليك اخبارا ما مريحة في دولة وليدك عمر هذا التليحة دولة الدين المخستك والشعارات القبيحة وفي كل يوم تغرب شمس وفيها تسمع كم من فضيحة
وان شاء الله يمّة متابعة اخبار السياسة؟ وعارفة حالة البلد الليلة زي صاج العواسة والشغلة لا طايوق لافهم كسرة شايطة وحالة زايطة جايطة زي كوم كناسة ولا زلنا في سوق النخاسة باعونا في كل المواسم بالاحابيل والخساسة والفساد والعفن الليلة قد طال السياسة ونظام الزفت الليلة زايد في ا لنجاسة عايز ليهو مشاطة وصندوق برنجي وناس فايقة للحكي والكواسة
ويا ما ناس غنت عابدة للجاه والقروش وبالسحت والربا الليلة عبوها الكروش نهبوا العباد سرقوا البلاد اكلوها بوش ناس والله من صنف الوحوش وديل يا يمة شلة ولدك عمر الفشوش *** واظنك يمة سمعت بالبتاع اب ريالة عبدو البتاع سقط المتاع عبدو الحتالة عبدو الوزير عبدو الحقيرفاقد الرجالة بعد ما سرق ونهب البتاع بكل سفالة ومن فضيحتو البتاع قدم عديل استقالة والليلة وزيربتاعنا في الزمن الزبالة وده وليدك عمرالبتاع رقاهو بكل هبالة والليلة البتاع وزير دفاع وكمان زايد خمالة وزير دفاع في بلد شبعت عمالة بلد منكوحة بقوات اجانب في جنوبها وفي شمالها *** وبدور اسألك فد سؤال امي يا حاجة الهدية دحين (صراصر) نقلوها لكافور الغنية؟؟ وقالوا البنيات رطبّن فوق العمارات الجبهجية والوليدات طاروا فوق العلالي و المقامات المنجهية وقالوا اللبع اصبح حلال بالفتاوي المنهجية وده كلو في جاه وليدك فاروقنا بعدالتو الهمبتية عدلو بس للاقارب والبطانات والمعية والشعب ياكل نارو ( سنة سنتين شوية)* ( ويا بلال عليّ النار والضيق عليّ) ### وليك سلامي امي يا حاجة الهدية واعفي عني ماني قاصدك يا هدية و يا رضية بدور افش غبينتي الجوّه في الجوف والطوّية وماني راكب دبابة وشايل بندقية شايل قولة الحق والصدق بحسن نية وشايل في كلامي ملامح من قضية قضية ظلم واضحة فاتت الحد بل عصيّة والصدق يا يمة ضايع الليلة في خوف الرعية ما عمر العرور شايل عصا وقنبلية والبفتح خشمو ما ليهو حق في الشكية والشكية يمة قالوا لي ابو ايدا قوية لكن ما في زول مات قبل يومو في الدنيا الدنية والبقولو الحق قلال والله ما بخافوا الاذية وكم شهيدا بدمو ناضل وهو ناضل للقضية وكم مناضل في سجنو كاتل شامخ النفس الابيّة وكم مهاجر في المنافي لسه ماسك في الهوية وحواء والدة جابت التاية الشهيدة السمهرية واقدلي وتلّي ايدك ياشهيدة يا عنيدة يا بنيّة
وسلام عليك امي يا حاجة الهدية ودعتك الله واديك صحة واديك عافية وحجة لمكة العلية وقولي للمجرم وليدك ماني امك وابرا منك وانت سفاحا محنك وانت لفاحا محنك ماني امك وابرا منك وابرا منك يا اذيّة
* هي السيدة الوالدة الحاجة الهديّة والدة السفاح عمر البشير * مقطع من اغنية شعبية سودانية
هشام هباني
07-18-2013, 04:09 AM
هشام هباني هشام هباني
تاريخ التسجيل: 10-31-2003
مجموع المشاركات: 51288
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
هشام هباني
الصادق اسماعيل
فيس بوك
تويتر
انستقرام
يوتيوب
بنتيريست