|
|
|
 Re: المنـظـــــــــــــــــــم (Re: درديري كباشي)
|
- طيب خلينا نبدا من الاخر شنو الحدث وخلاك تجيني اليوم وحكاية الضرب دي شنو ؟
-امس انا وهو كنا في السوق وخلينا الاولاد مع حبوبتهم .. امه يعني . اها طبعا في السوق شئ عادي انه يرتب الصناد\يق بتاعة البضاعة وبعض البياعين اتعودو عليه وسموهه صلاح نظام .
لكن حصلت مصيبة .ز
-خير مصيبة شنو كمان ..
-نحن في السوق جات اسرة زينا معاهم اولادهم ولد وبنت الولد عمره حوالي اتناشر سنة وصحة كويسة سمين يعني لابس بنطلون وقميص وشاكيهم .. فجأه صلاح لاحظ انه شكة القميص بتاعة الولد من ورا طالعة لبره حاول يصلجها ..
( وتدخل فيي نوبة بكاء شديد .....)
- طبعا الوالدين فهموه غلط ..؟
- يا دكتور صلاح اخذ ضرب وشتائم من اهل الولد وحتى ناس السوق ..وهو المسكين ما قدر يدافع عن نفسه غير انه غطا وشه بيديه واتحمل الضرب ..
-واكيد الزاد الامر سوء حوادث الاغتصاب والقصص المالية البلد.. وانتي عملتي شنو ؟
-ما قدرت اعمل اي شئ غير ابكي بس ..
-وطيب اتخارجتو كيف من الموقف دا اوعى يكون دخل السجن كمان ؟
| |
 
|
|
|
|
|
|
|
|
Re: المنـظـــــــــــــــــــم (Re: درديري كباشي)
|
-نفعنا عم عثمان راجل كبير من التجار ومحترم في السوق الا جا وفكاه واقنع اهل الولد بانه صلاح عنده حالة نفسية وما قاصد ؟
-اهل الولد اقتنعوا ؟
-في ناس كتار ايدوا كلام عم عثمان بعداك اهل الولد فكوه لكن بدون ما يعتذروا تحس انهم ما اقتعنوا لكن هم اصلا اخذوا حقهم بيدهم تاني عايزين شنو ..ركبنا تكسي ومشنا البيت وصلاح وشو كله جاري دم ..
-انتي من كلام عم عثمان يادوب انتهتي الى انه يمكن تكون دي حالة نفسية ؟
-ايوا يا دكتور في الاول كنت فاكرة النظام دا حاجة كويسة بس هو مزودا حبتين لكن حقة امس دي اقنعت انه دا جن عديل معقولة زول ما يتحكم في نفسه ويقيس الامور بعقله في موقف زي كدا ؟
-مظبوط يا محاسن انا احب اطمنك انك انتي يا دوب مسكتي الطريق الصاح ونحن لازم نتهاون عشان نعالجه ..
-الله يخليك يا دكتور انت كدا اديتني امل .
-طيب يا سلوى لازم تحكي لي قصتكم من اولها بكل التفاصيل .. كيف اتعارفتوا وعلاقتكم قبل الزواج وكدا ؟
-حاضر يا دكتور .. لكن ما احسن يجي معاي تسمع منه هو .ظ
-طبعا انا لازم اقابله لكن لازم في الاول يكون عندي خلفية عنه تمام التمام .
| |
|
|
|
|
|
|
|
|
|
Re: المنـظـــــــــــــــــــم (Re: درديري كباشي)
|
- طيب اسال يا دكتور انا جاهزة ..
-اول شئ هل هو قريبك ولا اتعارفتوا كيف ؟؟
-هو قريب فعلا ولد خالتي اخت امي .
-كان بيناتكم علاقة قبل الزواج .؟؟.
-والله انا مش عارف هي علاقة ولا اسميها شنو لكن انا من اتولدت كان مسمني عروس صلاح امي وخالاتي ؟؟
يعني نحن لقينا نفسنا كدا ولا حتى جربنا اي خيارات تانية ؟
-طيب هو اكبر منك بكم ؟
-يعني حوالي خمسة سنوات ...
- يعني ما اتلاقيتو في دراسة مع بعض ؟
-انا لامن دخلت الجامعة سنة اولى اقتصاد هو كان في السنة الخامسة في كلية الهندسة ..
- يعني دراسة الهندسة يمكن تكون زادت الهوس لانه الهندسة اصلا قائمة على النظام لكن هل هو من زمان كان يحب النظام ..
- ايوا يا دكتور من نحن صغار صلاح دا كراساتو وشنطتوا ما زي حقات الناس منظمة ونظيفة ما بيكتب في الكراس كان ما تكل يده في منديل او قطعة ورق .
-طيب يا سلوى انا الليلة بكتفي بالمعلومات دي عشان عندي مرضى غيرك ؟
-تقصد غير صلاح ؟
-+يضحك ... ماشي اقصد غير صلاح ..
-طيب اجي متين تاني يا دكتور ؟
-خلينا نقول تعالي لي بعد يومين عشان تحكي لي عن الحصل شنو لصلاح بعد العلقة الاخذها في السوق ورد فعله شنو هل ندمان ولا ما لاقي تفسير للحصل ..
-تقصد شنو يا دكتور بما لاقي تفسير يعني التصرفات دي ممكن تكون بدون وعي منه ؟؟
-ممكن صلاح يعاني من نوع الرغبة المسيطرة يعني لامن تجيه رغبه عشان يعمل شئ ما بيقدر يمنع نفسه ؟
-
-
| |
|
|
|
|
|
|
|
|
|
Re: المنـظـــــــــــــــــــم (Re: درديري كباشي)
|
غايتو يا درديري بتحفر جنس حفَير !
أنا عندي حاجة قريبة من دي مع شريكتي الله يحفظها..
عشان كدا دايما بقول ليها بيتك دا فندق ما بيت أسرة ..
إذا قمت من الكرسي والمسند انقلب وراي على بال ما اشرب وارجع بلقاها استعدلتو ..
بصراحة الموضوع عاجبني لإني برضو بحب النظام ..
بس بشفق عليها من عمايل العيال ..
:
نسكت نتابع مع إنك عادي بتشر الناس ^- ^.
| |
|
|
|
|
|
|
|
|
|
Re: المنـظـــــــــــــــــــم (Re: درديري كباشي)
|
بعد ساعة تصل سلوى البيت وتفتح الباب يقابلها صلاح
-كنتي وين يا سلوى ..؟
-اهلا صلاح انت صحيت ..
-يعني كنتي عايزاني ما اصحى كمان ؟؟
-ياا راجل دا كلام شنو .. انا سلوى مرتك حبيبتك عايزاك ما تصحى ؟
-بطلي قة الادب دي وما تغيري الموضوع كنتي وين ؟؟
- ما قلت ليك ماشة اغير لبسة هناء في السوق واغشى محاسن صاحبتي اديها قروش الصندوق ..
- اذا كان محاسن صاحبتك جات هنا تسال منك ..
-ما انا اتأخرت في السوق وما قدرت اغشاها بالله هي جات هنا ومالها مشت ..
- اها ولبسة هناء غيرتيها ..
- لا ما لقيت المحل قفل ..
- يا مرة هوي انتي في شنو كنتي وين ؟؟
- اجي يا صلاح انت مالك بتحقق معاي ولا شنو ؟
-ياا مرة انا بسألك كنتي وين من حقي ولا من حقي ؟ شنو احقق وما احقق..
- للمرة الاخيرة كنتي وين ؟؟ نهرها بصوت عالي مما اضطرها تخاف و تعترف وتخرج ورقة العيادة من شنطتها .
- والله يا صلاح كنت عند دكتور فتح الرحمن الدكتور النفسي المعروف ..
- عندك شنو كمان .. جنيتي ؟؟
- لا ما قلت ليك اكثر من مرة قعد تجيتي كوابيس بالليل تصحيني من النوم ..
- طيب ليه ما كلمتيني ولا خليتيني امشي معاك ..
- انا قلت ما ازعجك وانت نايم كدا حننتني والله ..
- حننتك ؟؟ برسم ولا سادة ؟؟
- هي هي والله خفتك دمك دي الله يخليك لي يا حبيبي ..
- انت شنو الليلة قلة الادب الجديدة دي مرة تقولي لي حبيبتك ومرة يا حبيبي انتي كنتي في السينما ولا شنو ؟
| |
|
|
|
|
|
|
|
|
|
Re: المنـظـــــــــــــــــــم (Re: درديري كباشي)
|
صلاح لا زال موجهه متورما بالكدمات من ضرب الامس وكذلك النوم الطويل ..
بعد ما اقتنع بحكاية سلوى دخل ناحية الصالة وقبل ما يدخل يلاحظ انه نعلات الاطفال مرمية هنا وهناك وهناك يبدأ يجمع فيها ويرصها في المكان المخصص للاحذية ..
سلوى تحاول ان تثنيه وتمسكه من يده لكن يدفر يدها مواصلا في تنظيم ورص الطقاطيق الصغيرة بتنثيق وترتيب ..
- سلوى خلاص يا صلاح يا حبيبي امشي ارقد راسك ما يوجعك .ز
يتلفت ناحيتها بعيون جاحظة وحمراء ..
- أجي في شنو يا راجل مالك ؟؟
-اوعى تقولي لي يا حبيبي تاني ؟؟
-اجي يا صلاح انت ما بتحبني يعني ..
- دا موضوع تاني ما تغيري الموضوع ..
-شنو هو انت ما قعد تتكلم في الحب موضوع تاني كيف كمان ؟
- ياولية كلام تحبني واحبك دي قلة ادب بتاعة مسلسلات ومصريين ساي ما تتكلمي كدا تاني ..
- حاضر يا حبيبي ؟
- تاني ؟؟
| |
|
|
|
|
|
|
|
|
|
Re: المنـظـــــــــــــــــــم (Re: درديري كباشي)
|
سلوى تتذكر وصية الدكتور انه هي لازم تعرف انطباعه عن حادثة الامس والعلقة التي تلقاها فتساله .
- انت يا صلاح الراجل الامس في السوق دا كان مالو معاك ؟؟
- دا راجل مجنون ياخ ؟
- كيف مجنون ؟
-+ انتي ما شفتي براك فجاة كدا نطا فيني ووقع فيني ضرب ..
- انت ما عملت له حاجة يعني ؟؟
- اعمل له شنو وانا بعرفه من وين ..
- هاي لكن الراجل منه وليه يقع فيك ضرب كدا ؟؟
- ما مجانين فاكنهم في السوق ساي الحكومة ما شايفة شغلها ..
- صلاح حبيبي عليك الله حاول اتذكر انت الراجل دا عملت له شنو ما ممكن لكن ؟
- تاااني رجعت لحبيبي دي ؟
- خلاص ما حبيبي ..
- انا ما حبيبك ؟؟؟ .. انا براي ملاحظ كدا اليومين دي ؟؟
- أجي ...ملاحظ شنو كمان ..
- انتي ما زي زمان ..
| |
|
|
|
|
|
|
|
|
|
Re: المنـظـــــــــــــــــــم (Re: درديري كباشي)
|
سلوى تجاوزت غضبتها وفي سبيل علاج الحبيب كله يهون ..وقالت
-يا صلاح انا زي شفتك هبشت قميص الولد من ورا كدا قام هو صرخ فيك بعدا شفت الاب والام واقعين فيك ضرب ونبذ ..
- بالله الراجل الغبي دا هو ابو الولد ؟؟
- ومال وقع فيك ضرب بعد الولد صرخ قايلو من اصدقاء الشرطة يعني ؟
- حتى لو ابوه انا عملت شنو ؟؟ بالعكس انا حاولت اساهم في اناقته ..
- تساهم كيف يعني كمان ؟
- الولد لابس قيافة ولبستو حلوة بس غاظتني شكة القميص طالعة نص كدا قلت ادخل له القميص جوة لكن لو كنت عارف المتخلف دا ابوه ما كان اشتغلت بيه .
- يا صلاح انت تعرف الحاجات دي بتتفسر غلط بتخرب ليك سمعتك .
- كيف يعني بتتفسر غلط ..
- انت ما قعد تشوف الجرايم في الصحف كلها اغتصابات اطفال وبلاوي ..
- بالله هو الناس ديل فهموا انا بتحرش بالولد .؟.
وضع صلاح يديه في راسه وجلس في السرير ..
- عايز تدخل يدك في بنطلون الولد ويفسروها شنو كمان ..
- انا ما كدا انتي عارفاني .. والله انا ما كدا يا ناس .. ويدخل في نوبة بكاء ... ويواصل .. والله انا ما كدا دا في عمر ولدي يا ناس ..
-خلاص يا صلاح معليش انا عارفاك والله والناس الحولنا عارفنك لكن اناعارفاك انت زول بتحب النظام والنظافة بس خفف شوية ..
- لكن يا سلوى لو خلينا النظام العالم حا يبقى فوضى ..
- ياخي انت ما مسئول من العالم كله نظمنا نحن ياخ نظم حياتك وبيتك ومكتبك .. شوف المشاكل الدخلك فيهاا حب النظام ياخ ارحمنا عليك الله ارحمنا ..
-
| |
|
|
|
|
|
|
|
|
|
Re: المنـظـــــــــــــــــــم (Re: درديري كباشي)
|
تركت سلوى صلاح في الصالة وقالت انها ستجهز العشاء ..
وطلبت من صلاح ان يوغظ الاولاد لكن صلاح بدلا عن ذلك انشغل بترتيب الصالة بالرغم من انها سلفا مرتبة جدا .. لكن عند صلاح ان تخرج الطاولة الصغيرة من
تحت الكبيرة اكثر من اللازم يعتبره عدم نظام لذلك يرجعها مكانها ويوزنها مع مربعات البلاط في ارضية الصالة ويذهب ناحية الدولاب الزجاجي الذي به الاواني الفخمة
ينزلها ويبدأ يرص فيها من جديد .. تأتي سلوى وهي تحمل صينية العشاء ..
-صلاح لزومه شنو التعب دا هسع .. الصالة دي ما مرتبة ونظيفة .
-مرتبة شنو بالله ياخ . دي فوضى عديل كدا .. هسع الترابيز ديل الطلعهم من مكانهم منو ؟
- انت ما صحيت الاولاد للعشا مالك ..
- الاولاد انا عشيتهم قبيل بكورن فليكس ولبن لامن شفتك اتاخرتي ..
- الله يخليك لينا يا حبيب ..
-انتي مصرة على حبيبي ..
-خلاص كان مضايقاك بخليها ..
-ايوا مضايقاني جدا خليها .ز
- حاضر يا حبيبي ..
هذه المرة يضحك ويهز رأسه .. كانه يقول في نفسه ما جاية من دكتور نفسي معذورة ..
| |
|
|
|
|
|
|
|
|
|
Re: المنـظـــــــــــــــــــم (Re: درديري كباشي)
|
يتعشى الزوجان ويناما وفي الصباح تبدأ حياة جديدة ..
يذهب صلاح الى عمله اذ انه يعمل مهندسا بأحد المؤسسات الحكومية بعد ان يوصل طفليه الولد والبنت لمدارسهم ..
وتذهب سلوى الى عملها بالبنك حيث تحضر لها حافلة نقل الموظفين كل صباح جديد ..
وفي عمل صلاح يدخل وهو لازال يحمل اثر الكدمات في وجهه ..
يقابله صديقه خالد ويسأله
- ابو صلاح مالك خير وشك كله كدمات حاصل شنو . وامس مالك غبت .
- تصور يا خالد كنا انا وسلوى في السوق نشتري اغراض كدا ولبسات جديدة للاولاد عندهم رحلة في المدرسة .. اها اتشبك ليك فيني واحد مجنون هو ومرته ووقعوا فيني ضرب ونبذ
- ياخي انت عملت شنو اوعى تكون هبشت المرا ؟؟
- ياخ مرة شنو البهبشها انت عارفني كويس انا ما بتاع حاجات زي كدا ..بعدين سلوى معاي ياخ .
- طيب عملت شنو براهم كدا وقعوا فيك خبط ..
قبل ما يرد صلاح يلاحظ انه لياقة قميص خالد مرفوعة فيمد يده ويصلحها له .. وخالد لا ينشغل بالموضوع يبدو انه تعود على هذه التصرفات ..
- ابدا بس عندهم ولد كدا حاولت اصلح له شكة القنيص وكدا ..
- افوا وطبعا فهموك غلط ..
صلاح يرد فقط بتنهيدة طويلة فقط ..
فجأة يمر من عندهم المدير العام هم واقفين في الصالة قبل الدخول لمكاتبهم يسلم عليهم ويلاحظ لصلاح . ويقف .
- صلاح مالك خير انشاء الله .
- لا يا سيادتك حادث بسيط كدا في الحلة ..
- يا راجل حمد لله على سلامتك ..
- الله يسلمك يا ريس ..
كذلك يلاحظ صلاح ان كرفتة المدير مفتولة مايلة وخارجه من البدلة يمد يده ناحيتها لولا يسرع خالد ويمسك يده ويقاوم صلاح مسكة خالد ويبدا تجحظ عيناه وهو يتطلع للمدير وخالد يمسكه بقوة .
المدير يصاب بالذعر : في شنو يا اخوان مالكم .. صلاح مالك .. الزول دا مالو يا خالد ؟
صلاح : حاجة بسيطة ..يا ريس والله حاجة بسيطة ,, والله حاجة بسيطة ..ويبدأ صوته يرتفع ..
واخيرا ينجح خالد في جر صلاح وادخله للمكتب وهو يتنفس بعتف شديد ..
بعد قليل يأتي الساعي لخالد ويقول له المدير عايزك ..
خالد امام المدير : نعم سيادتك ..
- عايزك تفسر لي الحاصل بسرعة بدون اي لف او دوران شنو البيحصل وصلاح مالوا معاي انا عملت ليه شنو . كان عايز يخنقني ؟
- خالد عفوا يا ريس والله صلاح دا عنده حالة نفسية هوس شديد بالنظام .
- عارف انا الموضوع ى دا ما جديد علي انا بسألك سؤال محدد انا بالتحديد كان عايز يعمل لي شو ؟
- الظاهر يا ريس هو لاحظ انه كرفتتك ما مظبوطة وحاول يصلحها ليك وانا حاولت منعه بس ما اكتر من كدا ..
- طيب انت ماسكه ليه ؟
- ما انا خفت انك تفهمه غلط ؟؟
- انت الخليتني حاليا انا افهمه غلط لانه لو كان صلح لي الكرفته انا كنت شكرته عليها وعادي جدا لكن انت قاومته وخليته يتشنج هسع امشي ناديه سريع قبل ما يتفاقم الموضوع ..
يذهب خالد لاحضار صلاح ..
| |
|
|
|
|
|
|
|
|
|
Re: المنـظـــــــــــــــــــم (Re: درديري كباشي)
|
يدخل صلاح برفقة خالد ولا زالت انفاسه في صعود وهبوط بعنف اما المدير يخرج من خلف المكتب ويأتي ناحيتهما ويبدو انه تعمد في هذه المرة ان يلف الكرفته ويخرجها من البدلة
وصلاح بكل لهفة يمسك الكرفته كما المدمن الذي يرى سجارة او شيشة بعد غيبة طويلة .. ويظبطها ويبدأ يهدأ ويرتاح والمدير يشكره ويمسكه من يده ويذهب به ناحية الكنبة ويطلب من خالد الانصراف لينفرد بصلاح
المدير : كيفك يا صلاح انت كويس .
- الحمد لله يا ريس وآسف جدا ما اكون ازعجتك ..
-لا لاابدا يا ابو صلاح بالمناسبة انت من اكفا المهندسين عندي هنا وانا دايما في سيرتك بمدح فيك في اي اجتماع لانك منظم ومرتب وبتحب النظام جدا وتكره الحال المايل انا كمان بحب النظام جدا عشان كدا
انا رفعت توصية عشان تترقى وتكون انت رئيس قسم الرسم الهندسي لان الرسم الهندسي يحتاج لدقة ونظام ونظافة وانت ملك النظام والنظافة ..
- متشكر يا ريس والله انت اسعدتني جدا وانا كنت محبط وزهجان حتى من نفسي ووريتني الدنيا بخير ولسع في ناس بتحب التنظيم والتريب زيي ..
- كيف يا ابو صلاح تعرف انا من ادخل البيت قبل ما اقلع ملابسي اباشر الترتيب من الجنينة ولو في خرطوش مرمي الفه .. ولو عجلة الاولاد مرمية المها ..
- يا سلام يا باشمهندس الدنيا دي اصلا هي تنظيم وترتيب وتنسيق والله ذاته جميل يحب الجمال ..
-لكن يا صلاح نحن نرتب حاجاتنا نحن بس ما صاح نلمس حاجات الناس ونرتبها ليهم لانهم ما راح يرضوا ويشوفوه استفذاذ بالنسبة ليهم وكدا .
-والله يا سعادتك انا بحاول لكن الناس غياظين وفوضجية وانا ما بتحمل .
- ما عندنا بيهم شغلة نحن علينا بنفسنا لانك بالطريقة دي يا صلاح انت بتخسر الناس كلها حاول امسك نفسك الله يهديك ..
- بحاول يا ريس شكرا ليك وآسف مرة تانية ..
- معليش يا صلاح .. اي اوامر تانية ياريس ..
- متشكر يا ابو صلاح واتهيا للترقية اشتري ملابس جديدة وكرفتات خليك مدير مدير ..
- انا جاهز يا ريس في اي وقت .
- وانا متوقع كدا برضو
| |
|
|
|
|
|
|
|
|
|
Re: المنـظـــــــــــــــــــم (Re: درديري كباشي)
|
القبول والتكيف والترشيد والتوظيف الصحيح
هي وسيلتنا للتعامل مع خياراتنا التي لا فكاك منها
اليابان بلدا كانت صخره ترهقها السيول والزلازل
سخرت السيول لانتاج الطاقة الكهربائية
وتعلمت تبني مباني تقاوم الزلازل
واصبحا رمزا للصمود وتوظيف المصائب
| |
|
|
|
|
|
|
|
|
|
Re: المنـظـــــــــــــــــــم (Re: درديري كباشي)
|
ذهب صلاح الى مكتبه بمعنويات عالية من مكتب المدير تتصدره ابتسامة تعكس هذه الروح ليقابله صديقه خالد بفضول متراكم .
-اها قال ليك شنو عمل معاك شنو .
ىقرر صلاح ان يكتم سر البشرى الجديده وقال في نفسه اصلا كل بلاويه من الحسد ..فقال.
- ما قال لي حاجة بس انا اعتذرت ليه وقبل اعتذاري .
- يعني الابتسامة دي كلها عشان قبل اعتذارك ؟
- صلاح محاولا يختصر الموضوع ويحسم الحوار فرد بنهرة : يعني حايكون في شنو كمان ؟
- لا لا ما في حاجة العفو براحتك .. انا بس قلت يمكن الزول بشرك بترقية ولا كدا ..
صلاح في نفسه يبدو انه الخبر حقيقة وتسرب فعلا في ايام غيابه : اشمعنا ترقيه يعني ؟
- لا ما انا شايف الراجل من زمان مبسوط منك وكدا ؟؟
- عشان كدا انا لامن حاولت اصلح له الكرفته انت مسكتني عشان عارفني حا اتعصب كنت عاوز ترسل رسالة معينة مش كدا ؟؟
- لا لا ياخ رسالة شنو يا ابو صلاح ياخ نحن اصحاب لينا كم سنة
- ماشي يا خالد خليها للزمن لكن لازم تعرف وتخت في بالك انا انسان محتفظ بعقلي الحمد لله وعقل كبير وجامد انت بتعرفه من زمن الدراسة .
- في شنو يا ابو الشباب ورسالة شنو الانا عاوز رسلة وحكاية عقلك الكبير انت المدير قاليك حاجة عني ولا حد قاليه حاجة عننا ؟
- الحمد لله مديرنا راجل زكي وقادر يقرأ الواقع بدون ما حد يقول له حاجة وعارف كل زول حدوده وين ؟
- يا صلاح كلامك ما مريحني في شنو بالله ..
- ما في حاجة اصبر خليك والايام بتوريك ..
- اها يا ابراهيم عوض ..
-
| |
|
|
|
|
|
|
|
|
|
Re: المنـظـــــــــــــــــــم (Re: درديري كباشي)
|
عرف صلاح بذكائه الحاد ا ن خالد بمسكه له عن اصلاح كرفته المدير يريد بخباثه ان يرسل رسالة للمدير العام ليثبت ان صلاح ليس جاهزا عقليا وذهنيا ان يكون رئيسا لقسمهم
واستنتج صلاح هذه الفكرة بعد ما عرض عليه المدير رغبته في توظيفه رئيسا للقسم رغم الحادثة وفي ذات الوقت استوعب رسالة المدير بابعاد خالد .. لكنه اسرها في نفسه لذلك آثر الكتمان
وعى ان يتعامل بحذر محاولا قدر جهده كبح جماح رغبته القاتلة في النظام والتي كادت ان تفقده وظيفته لولا وعي المدير العام وسلامة نيته ..
ومن الناحية الاخرى في البنك حيث تعمل سلوى لاحظت لها زميلتها وصديقتها محاسن انها واجمه وساهية طيلة اليوم حاولت ان تسالها من الصباح لكن زحمة العمل واكتظاظ العملاء لم يتح لها الفرصة
الا في فترة الاستراحة وقت تناول وجبة الافطار حيث التقت الصديقتان بالمقصف الخاص بالموظفين ..
محاسن : مالك يا اختي الليلة ماك عادية وشكلك سهرانة كدا ..وتعبانة ..
لم تملك سلوى كتمان هواجسها عن صديقتها محاسن وخاصة هي في حاجة لمن تنفس عنده هذه الهموم فقالت .
- والله انا قلقانة على صلاح يا محاسن .
- مالو كمان تاني عمل شنو ..؟
- حوادثه بتاعة هوس النظام دي كترت وبقت خطرة حتى على حياته
- شنو الخلاك تقولي كدا ما عادي حتى الناس اتعودت عليه ..
- يا اختي بقى يتدخل حتى في لبس الناس
- أجي دا كلام شنو كمان ؟
- اول امس انا وهو مشينا السوق خلينا الاولاد مع حاجة السرة .. اها في السوق صادفتنا عايلة كدا عندهم ولد وبت .. الولد قدر محمد ولدي عمره اتناشر سنة والبت تقريبا من عمر هناء يعني عشرة ..
- اها الحصل شنو ياختي قلقتيني .
- الولد لابس بنطلون وقميص وشاكيهم .. صلاح لاحظ انه القميص طالع من البنطلون لبرة اها قام ..
- ووووب علي ما تقولي لي ..
- ياها ذاتها مسك الولد وحاول يدخل له القميص في البنطلون الولد طبعا صرخ وابوه وامه جو وقعوا ليك ضرب في صلاح شئ شتيمة وقلة ادب ..
- دي مصيبىة شنو اتاريه انا امس شفتو وشوا مورم سألته قال لي حادثة بسيطة دخل في شجرة ما شايفها وكلام كدا انا ما وقفت فيه كتير .. اها وعلمتي شنو ..
- اها اتدخل عم عثمان شيخ السوق وقال للجماعة الراجل عنده حالة نفسية وما قاصد حاجة ويمكن شبهه بولده . المهم كدا كدا فكاهم منه ..
- وي علي ووب علي وانتي عملتي شنو .. سلوى : انا غير البكا عندي شنو كمان .. لكن كلام عم عثمان اداني فكرة انه اشوف دكتور نفسي ..
- بس دي احسن حاجة فكرتي فيها اكيد دكتور فتح الرحمن ..
- اسكتي ساي امس مشيت ليه وسألني اسئلة منكر ونكير و طلب مني معلومات وقال لي تعالي بعد بكرة اسألك تاني ..
- بعني ما حا يقابله ..؟
- لا الدكتور قال اول يجمع معلومات عامة كاملة قبل ما يبدا اي حاجة معاه
| |
|
|
|
|
|
|
|
|
|
Re: المنـظـــــــــــــــــــم (Re: درديري كباشي)
|
عد اليوم والتقى الزوجين مع طفليهما في البيت
صلاح كان منتشيا بنبأ الترقية متشوقا ليحكيه لسوى
سلوى مهمومة اليوم مواعيدها مع الطبيب في الجلسة الثانية كيف ستقنع صلاح انها تروح لوحدها سيصر يذهب معها..
فجاة يقطع سرحتهما ابنهما محمد : ابوي الناظر قال لي بكرة تجيب ابوك معاك الصباح وادوني ليك ورقة ..
-شنو عملت شنو كمان ؟
- يا راجل قول بسم الله هو لازم يكون عمل حاجة ؟اها يا حمودي في شنو ؟
- لا يا ماما قالوا عايزين يكرمونا .
- ما قلت ليك شيل الظن السئ من راسك ..
- خير يكرموك بمناسبة شنو ..
-بمناسبة النظام ..
- ما شاء الله دا الكلام ..
- سلوى : يا ولد بمناسبة النظام كيف كمان ..
-قالوا انا اكتر طالب منظم في المدرسة كراساتي نضيفة ولبسي نضيف ومرتب ..
-انا ابوك يا محمد ..
سلوى متردده وفي بالها هذا النظام الفالت : لكن لازم ابوك يجي ؟ ما يكرموك انت وخلاص .
صلاح انتبه لملاحظتها وفعلا مشكلة ربما لو جاته نوبة النظام في المدرسة راح تجعل ابنه اضحوكة وتعمل له عقدة للابد
فعلا سها واحجم عن الاندفاع وسلوى تأثرت بمنظره ..
-خلاص يا حمودي قول لهم ابوي مشغول ما بيقدر يجي ..
-لكن يا ابوي هم عايزين يكرموك انت اكتر مني ..
سلوى تاثرت لمنظر صلاح وهو يقاوم رغبته الشديدة للذهاب ويتردد ..
-صلاح اتوكل على الله امشي ما في شي راح يحصل ..
قال صلاح في نفسه هي لسع ما سمعت بموقفه مع المدير ..لذا قرر ان يفرحها بنبأ الترقية ليغسل به هذا الهم ..
وفعلا فرحت واستبشرت وخيرا فعل باخفاء قصة الكرفته .
-
| |
|
|
|
|
|
|
|
|
|
Re: المنـظـــــــــــــــــــم (Re: درديري كباشي)
|
في المساء افلحت سلوى باقناع صلاح لحراسة الطفلين وذهبت العيادة وحدها لمواصلة الجلسات مع الطبيب
ابتدرها الدكتور مستأنفا: طيب يا سلوى الشئ الخلاك تلجأي للعيادة هو حادثةالسوق ماكان في احداث قبلها مشابهة.
- طبعافي احداث كثيرة مشابهة لكن ماكانت تصل لدرجة العنف والضرب يعني بكلام من نوع يا راجل انت الدخلك شنو مالك ومال نظامنا..
- ما تقدري تتذكري موقف كدا هزاك مثلا ..
| |
|
|
|
|
|
|
| |
محمد على طه الملك
عوض أبو عيش
عبدالعزيز الفاضلابى
علي محمد الفكي
Hani Arabi Mohamed
فيس بوك
تويتر
انستقرام
يوتيوب
بنتيريست