|
|
|
 Re: ونـسـة الـتـكـاسـة فـي North America (Re: معاوية المدير)
|
عمنا سيّد فريد زول بيحب الطرب، وهو براااهو غناي.
يعني بيجضم الحقيبة تجضيم صح.
يوم قال يمشي يتونس مع ناس ود بشوش. ناس ود بشوش
يتحدثون العربية الفصحى عادةً في مجالسهم. شبكوهو ليك:
صُبّ له الماء يا بُني، أعطه صابونة الفنيك، دُله علي مكان
المرحاض...... وهكذا.
عمنا سيّد فريد طلع من عندهم زهجان، وقرفان، ومصدع،
لآقاهو وآحد في الشارع سلّم عليهو وسألوا:
جاي من وين يا عم سيّد فريد؟؟؟
ردّ عليهو بغضب وزهج ومعاهِن إنفعال شديد: جاي من سوق عكاظ.
كان إنت ما تكاسي في نورث اميركا لا تقعد مع شِلة تكاسة،
بتبقى عليك البقت علي سيّد فريد.
والله صحي...
| |
 
|
|
|
|
|
|
|
 Re: ونـسـة الـتـكـاسـة فـي North America (Re: معاوية المدير)
|
وآحد سايق تكسي في أمريكا جآب أُمو زيارة. بعدين
أصحابو التكاسة كل يوم بقوا يجو يركلسوا مع الحاجة،
ويطقوا الحنك. طبعاً ونستهم كولها في إطار التكسي،
والحاجة مِتبلِمة ومِتمحنة وتسمع فيهم.
أها، قامت رجعت السودان. سألوها: يا حآجة أمريكا كيف ؟؟؟
قالت ليهم: أوّل أمريكا أنا شُفت فيها حاجة!!! وحات الله من مشيت
لآمن جيّت غير تِب، تِرِب ما عرفت حاجة...
| |
|
|
|
|
|
|
|
|
|
Re: ونـسـة الـتـكـاسـة فـي North America (Re: صديق مهدى على)
|
مصطلحات خاصة بالمهنة لزوم
التوضيح وكدا:
تِرِب وتعني مشوار وتجمع تِرِبات، وأيضاً يُطلق عليها
الفير، وتُجمع فيرات.
تِب: بقشيش بلغة المصريين، وإسم اللدلع بتاعوا تبتِبوني. دا مُهم.
لُغة المفكات: تعني الـF ويرد. يعني التكاسي لمان يقول ليك،
الزبون دوّر معاي مفكات أفهما بس.
الكستمر: الزبون حيث لا جمع لها في التعريب.
الشفشفة: لِقيط الفيرات، (التِرِبات).
| |
|
|
|
|
|
|
|
|
|
Re: ونـسـة الـتـكـاسـة فـي North America (Re: معاوية المدير)
|
Quote: سلامات معاويه المدير وجمعتكم مباركه
واصل
متابعه.. |
سلآمات يا الكباشي،
أخبارك يا زول ؟؟؟
يا الكباشي التكاسة بتاعين امريكا ديل أكان قعدوا يتونسوا ونستُن تب
ما بتختا الدركسون. يعني هسّع أكان قعدوا بكري وهباني ديل مع
بعض، طوااالي قوم من جنبهم، لأنو ونستُن كلها حاتكون، وآحد طرش
لي في العربية، وشلت لي وآحد حسابوا 12 دولآر قطع فيني عِشرِيناية
خلآني أضحك بلآ سبب، ووآحد حسابوا 25 دولآر فكّ البيرق خلآني
خشمي مِلِح، مِلِح ..... وهكذا.
والله مشتاقين يا ود البكري...
| |
|
|
|
|
|
|
|
|
 Re: ونـسـة الـتـكـاسـة فـي North America (Re: معاوية المدير)
|
Quote: يا الكباشي التكاسة بتاعين امريكا ديل أكان قعدوا يتونسوا ونستُن تب
ما بتختا الدركسون. يعني هسّع أكان قعدوا بكري وهباني ديل مع
بعض، طوااالي قوم من جنبهم، لأنو ونستُن كلها حاتكون، وآحد طرش
لي في العربية، وشلت لي وآحد حسابوا 12 دولآر قطع فيني عِشرِيناية
خلآني أضحك بلآ سبب، ووآحد حسابوا 25 دولآر فكّ البيرق خلآني
خشمي مِلِح، مِلِح ..... وهكذا. |
والله يا ود المدير ماك ساهله في الحكي
احكي احكي ..
ضحكتني ربي يحلي ايامك وايام تكسيك
| |
|
|
|
|
|
|
|
|
|
Re: ونـسـة الـتـكـاسـة فـي North America (Re: ابراهيم عبدالناصر)
|
Quote:
حبيبنا ود المدير
سلامات |
مرحبتين حباب شيخنا هباني.
عادي ممكن تلقالك تكاسة جنب الجامع داقين
حنك زي دا:
حسن: يا جماعة الصلى بينا العشاء دا منو ؟؟؟
الشيخ: الزول دا بلآك أميركان لكن صوتوا جميل.
صالح: جميل ساكت، وكمان من غير آكسنت !!!
الشيخ : يا جماعة نمشي علي الشغل الليلة الجمعة.
حسن: قالوا البار البِزي الفي 14 إستريت قفلوهو.
صالح: يا زول. الكلآم دا كيف !!!؟
الشيخ : والله دي خسارة كبيرة، هسّع أنا كنت مضرّب عليهو.
صالح : عليك الله الناس ديل مُش ببالغوا.
حسن : يا زول البار دا بالزآت ما المفروض يقفلوهو.
الشيخ : يعوضنا الله. الليلة نمشي بارات الداون تاون.
وهكذا...
| |
|
|
|
|
|
|
|
|
|
Re: ونـسـة الـتـكـاسـة فـي North America (Re: معاوية المدير)
|
Quote: اتوا شفتوا حاجة التكاسة فى فنكس جرسة شديدة.
غايتو الله يكون فى عون التكاسة جرى شديد . |
صديق يا صديق،
مالكم الباقية عليكم شنو ؟؟؟
الجرسة والزهج ما كويسات، بيجيبن المفكات.
خالد: يا جلآل، كيف ؟؟؟
جلآل: تمام. كيف يومك البارح ؟؟؟.
خالد: يومي أنا ؟؟؟. يا فردة قالوا لي إنت شفشفتها صح، ما خليت فوقا حاجة.
جلآل: يا فردة شفشفة شنو !!! يا اخي البارح إتنين ركبوا ليك في المقعد الورا
وفجأة يا عمّك أسمع ليك الصفافير!!!. ختيت الهزر وجنبت العربية ودورت
ليك فيهم مفكات. الزول دوّر معاي مفكات وعايز يهرش، يا زول نزلت ليهو
تحت طوالي جرّ واطي. قلت ليهو تتوحوح هنا هسّع لآمن تصل البيت تتخمد
تنوم. تصدق بعد وصلتهم إعتذر وراح راشيني ليك بعشرة دولآر تِب.
خالد: يا اخي بنات العلوج ديل !!! الله يكافينا شرهن.
جلآل: يا فردة أنا الكمبيوتر أداني تِرِب، نشوفك بعدين...
| |
|
|
|
|
|
|
| |
معاوية المدير
هشام هباني
صديق مهدى على
ابراهيم عبدالناصر
فيس بوك
تويتر
انستقرام
يوتيوب
بنتيريست