|
Re: كاريكاتيرات عز الدين عثمان ( مجموعة العهد البائد 1967 ) (Re: نادر)
|
Quote: سلام وتحايا يا أيها الرجل الجميل المسمى يحيى قباني، ومشتاقين والله في البدء ندعو بالرحمة والغفران للكاريكاتيرست عزالدين عثمان، ثم ولأننا من ركاب الدرجة الأولى في بوستاتكم المجيهة، بالله كبر الصور شوية هسع لألفاظ الفي البقالة دي في كتير منها ما واضح. ومتابعين يا حبيب. نادر |
يا سلام ... اول زواري الرجل البديع نادر ...
الشوق اكتر و الله ... بس الضلمة الكانت راخية علي المنبر ده ما خلت زول ظاهر ...
حاحاول تكبير الصور ... لكن 40 كيلو بايت بكري دي جننتني ...
بالله كلموهوا يديني فرقه لي 100 كيلو بايت بس ...
لانه الكتاب ده جميل و مليان ...
ولا كان عندكم صيبة كلمونا ...
| |
|
|
|
|
|
|
Re: كاريكاتيرات عز الدين عثمان ( مجموعة العهد البائد 1967 ) (Re: يحي قباني)
|
Quote: : ألا تلاحظ أن معظم هذه الكاريكاتيرات
أصبحت تنطبق على العهد "الحاضر" |
شكرا الأخ يحيى قباني على هذا البوست المعرفي الذي يحكي بالرسومات حقبة مهمة من تاريخ السودان . رحم الله عز الدين فقد كان بحق سلطة رابعة بذاتها .
تعليق الأخ الباقر موسى دليل قطعي بان الديمقراطية كممارسة لم تتطور و وقفت في نفس مكانها حتى الآن نسبة للانظمة الشمولية التي صادرت الديمقراطية ولمدة 40 سنة .
لو استمرت الديمقراطية من بعد أكتوبر وحتى ألان وبمراقبة صحافة حرة وناس زي عز الدين ، لكان السودان ألان من الدول المتقدمة جدا في أفريقيا والعالم العربي .
| |
|
|
|
|
|
|
Re: كاريكاتيرات عز الدين عثمان ( مجموعة العهد البائد 1967 ) (Re: عاطف عمر)
|
جانب آخر
أن هذه الكاريكاتيرات أصبحت وثائق تاريخية
مثلا عندما يتساءل البعض عن من المسئول عن إدخال العنف في الممارسة السياسية والحياة الطلابية
تجد هنا كاركاتيرين يسلطان ضوءا ساطعا على هذا الموضوع كاريكاتير الأخ باف ورقص العروس
وأذكر كاريكاتير آخر يقول فيه شخص مضروب "بس قلت الترابي ساقط بالتزكية ألقى المصيبة وقعت فينين" وفي الصورة شخص ملتحي ممسوك يتطاير الشرر من عينية وبيده عصاة غليظة
الباقر موسى
| |
|
|
|
|
|
|
Re: كاريكاتيرات عز الدين عثمان ( مجموعة العهد البائد 1967 ) (Re: يحي قباني)
|
Quote: سلامات يا حبيبو
كاريكاتيرات تصلح تماماً لواقع اليوم ( مع زيادة مداها أفقياً ورأسياً )
رحم الله الفنان الفنان عزالدين _________________
سنة 67 دي نحن يا دوبك دخلنا أولى أولية ومع أ أسد وب بقر إنتو يا أولاد الخرطوم كنتو بتقرو الكاريكاتيرات من الزمن داك ؟؟ غايتو عليكم جنس شدة |
عاطف عمر يا دفعه ...
ما اشبه اليوم بالبارحه ...
شديدين و لضيدين يا عاطف ...
والله الكتاب ده عندي من سنة 72 تقريبا ...
شوف ليك جنس فصاحة ...
| |
|
|
|
|
|
|
Re: كاريكاتيرات عز الدين عثمان ( مجموعة العهد البائد 1967 ) (Re: يحي قباني)
|
كانت كاريكاتيرات عز الدين أحد أهم معالم الديمقراطية في فترة ما بعد ثورة اكتوبر
تكون صبي صغير يرسلك أهلك لشراء الجريدة وأنت تحملها في الطريق ترى الكاريكاتير "أبو الزهور خرق الدستور" فتتشرب روح الديمقراطية ونكهتها
وفي الجانب الآخر لا تسمع أن الرئيس إسماعيل الأزهري قد اتخذ أي إجراء ضد عز الدين أو صحيفته وحتى أذا فكر في ذلك فسيجد دونه سدودا من محامين وقضاة ممن جسدوا سيادة القانون
المهم تسلم الصحيفة للكبار ليقرأوها وتنتظر المرسال لعدد الغد في لهفة
الباقر
| |
|
|
|
|
|
|
Re: كاريكاتيرات عز الدين عثمان ( مجموعة العهد البائد 1967 ) (Re: يحي قباني)
|
Quote: كانت كاريكاتيرات عز الدين أحد أهم معالم الديمقراطية في فترة ما بعد ثورة اكتوبر
تكون صبي صغير يرسلك أهلك لشراء الجريدة وأنت تحملها في الطريق ترى الكاريكاتير "أبو الزهور خرق الدستور" فتتشرب روح الديمقراطية ونكهتها |
ما زلت اتذكر يا باقر في عام 70 او 71 تقريبا ...
ارسلت لي كشك الجرايد الفي ود أرو
وكان يوم جمعة و اول صدور للجرايد بالحجم العريض ...
وكان سعرها قرش واحد ...
وكنت احملها فرحا و اردد مع اخي الاكبر ( البرش بي قرش )
تغير الحال يا صديقي ...
| |
|
|
|
|
|
|
Re: كاريكاتيرات عز الدين عثمان ( مجموعة العهد البائد 1967 ) (Re: يحي قباني)
|
لاحظ في كاريكاتير إبن الدايرة
كيس الخدار .. مليان
وواقفين في محطة بص يعني في بصات وشركة ومواقف وأحدهم مشتري جريدة ويقرأها وملابسهم بحالة ممتازة الشارع والرصيف مصانة بحالة جيدة المكان كله نظيف (مكنوس ولا زبالة ملقاة أو حشرات)
هذا كان حال الأفندية (الطبقة المتوسطة) آنذاك ويمكن أن تضيف إلى المشهد تاكسي طراحة وقرض من البنك لبناء منزل أو شراء عربة ومعاش محترم وعلاج مجاني للاسرة وتعليم مجاني للأبناء والبنات
كل ذلك اختفى بفعل فاعل بفعل حكومة
أفكر في إعادة زيارة كاريكاتيرات عزالدين كاركاتيريا
الباقر
| |
|
|
|
|
|
|
Re: كاريكاتيرات عز الدين عثمان ( مجموعة العهد البائد 1967 ) (Re: يحي قباني)
|
ياسلام يا ود قباني علي موادك وتوثيقاتك للفنان عزالدين عثمان! كاركاتيرات زي ما قلت بتعبر تماما عن زمنا الحالي زي ماعبرت عن الزمن الفات.. كأنه حياتنا في السودان بتتكرر كل عشرين سنة وكل سنة برضه بتتشارك في التفاصيل
أسه شوفت كاركاتير شيخ علي عبدالرحمن والأزهري ده كيف؟؟
ياربي إدموند منير موجود؟؟
رحم الله عزالدين عثمان المتمكن..
وشكرا ليك ولمجهوداتك الكبيرة..
| |
|
|
|
|
|
|
Re: كاريكاتيرات عز الدين عثمان ( مجموعة العهد البائد 1967 ) (Re: عمر عبد الخالق سعيد)
|
Quote: سنة 67 دي نحن يا دوبك دخلنا أولى أولية ومع أ أسد وب بقر إنتو يا أولاد الخرطوم كنتو بتقرو الكاريكاتيرات من الزمن داك ؟؟ غايتو عليكم جنس شدة |
تعرف يا عاطف .. الشئ الجميل إنك تشوف الكبار بيعلّقوا على الكاراكاتير وتشوفوا إنت كمان وتعرف الحاصل حواليك.
رغم صغر السن ... كتير من الكاريكاتيرات دي لا تزال عالقة بالذاكرة. نفس الكتيّب ده كان موجود في بيتنا (إشتروهو أخواني الكبار يا عاطف) .... بس ما عارف مصيرو هسع.
سلام يا قباني.
| |
|
|
|
|
|
|
Re: كاريكاتيرات عز الدين عثمان ( مجموعة العهد البائد 1967 ) (Re: عاطف عمر)
|
Quote: ياسلام يا ود قباني علي موادك وتوثيقاتك للفنان عزالدين عثمان! كاركاتيرات زي ما قلت بتعبر تماما عن زمنا الحالي زي ماعبرت عن الزمن الفات.. كأنه حياتنا في السودان بتتكرر كل عشرين سنة وكل سنة برضه بتتشارك في التفاصيل
أسه شوفت كاركاتير شيخ علي عبدالرحمن والأزهري ده كيف؟؟
ياربي إدموند منير موجود؟؟
رحم الله عزالدين عثمان المتمكن..
وشكرا ليك ولمجهوداتك الكبيرة.. |
يا سلااام يا مني ...
احلي حاجة في البوست ده انه جاب لينا ( الطِيِبْ ) و الناس الجميلة كلها ...
الدنيا يا مني بتدور و بتدوّر فينا ... والحال فـــــــــــــــــــــــــي حاله ...
ادمون منير ... الرسام و الخطاط و مقدم البرامج ( خُد و هات ) و المريخابي المطبوع ...عايش ...
اخر عهدي بيهو محل فول فتحه قدام فول ابوالعباس في شارع السيد عبدالرحمن عشان يعيش ...
بعرفوا و بشوفو من سنة 72 يا مني ... كان مأجر صالون براني في بيت اصحابي د. سامي و د. أنا كاركانس
كان بيشتغل فيهو اليفط و اعمال الخط الكان بوديها التلفزيون ...
وانا كنت كل يوم معاهم و لازم لم تخشي البيت تمري علي اليفط ...
وبكون شغال في مكتبه ده نخش نشوف البدع ...
ولانو بلدنا بتكرم مبدعيها ... فتح محل فول و طعميه عشان يعيش ...
| |
|
|
|
|
|
|
Re: كاريكاتيرات عز الدين عثمان ( مجموعة العهد البائد 1967 ) (Re: محمد أبوالعزائم أبوالريش)
|
Quote: تعرف يا عاطف .. الشئ الجميل إنك تشوف الكبار بيعلّقوا على الكاراكاتير وتشوفوا إنت كمان وتعرف الحاصل حواليك.
رغم صغر السن ... كتير من الكاريكاتيرات دي لا تزال عالقة بالذاكرة. نفس الكتيّب ده كان موجود في بيتنا (إشتروهو أخواني الكبار يا عاطف) .... بس ما عارف مصيرو هسع.
سلام يا قباني. |
قال ليك أخواني الكبار يا عاطف ...
كان نفسي اكون في القديمة لسه وانت بتقول الكلام ده ...
لكن خليك من ده يا ابو الريش ... ياخ الكتيب ده ثروة قومية ما تفرط فيهو لو لسه موجود ...
| |
|
|
|
|
|
|
Re: كاريكاتيرات عز الدين عثمان ( مجموعة العهد البائد 1967 ) (Re: يحي قباني)
|
Quote: الاخ قباني تحيه مالك علينا ياخ كل ما نطيب تعاود الماضي. والماضي راح راح وانتهي هي حقبه من الزمان كان الزمن فيها يتقطر ألفه في كل ثانيه ...... يزداد بهجة كل دقيقه وساعته مقدارها ألف مليون محنه مما نعد وياتري هل يعودنا الزمن شكرًا |
محمد حسن ...
انت بتطيب لانك رومانسي :( ... انحنا اصلوا ما طبنا يا حبيبنا ...
والله حقبة كل حاجة كانت صح ...
زمن ولي ليته يعود ...
| |
|
|
|
|
|
|
Re: كاريكاتيرات عز الدين عثمان ( مجموعة العهد البائد 1967 ) (Re: يحي قباني)
|
Quote: إقتنيت كتابه هذا باكراً ولايزال ضمن ( الكراكيب ) التي تقول والدتي أنني زاحم ليهم بيها غرفة ( على الفاضي )
تصدق أنا هنا أستمتع بهذه الكاريكاتيرات وكأنني أراها للمرة الأولى أو لعل السر يكمن في إعادة قرأتها و( إسقاطها ) على واقع اليوم
|
عارف السر وين يا عاطف ؟؟؟
السر انو انحنا آخر جيل بيحترم كباره ...
وما يزعلو مننا الصغار ... انا بتكلم عن نسب و تناسب ...
و حاشرح كلامي ده بعدين ...
| |
|
|
|
|
|
|
Re: كاريكاتيرات عز الدين عثمان ( مجموعة العهد البائد 1967 ) (Re: يحي قباني)
|
أخونا يحي قباني سلام ليك و لكل ضيوفك
بوست جميل جداً الله إرحمو عزالدين قدر بي ريشتو و كلماته القليلة إصور ليك كل شئ حال البلد و حال السياسة و حال السياسيين و قدر إنتقد كل شئ من عاداتنا و تقاليدنا له الرحمة و المغفرة
و شكراً ليك لأنك أدخلت الطمأنينة إلى قلوبنا لأنو شايف بوستك لم العجائز و إعترافاتهم كمان..
تحياتي و إحترامي يا زول يا فنان
| |
|
|
|
|
|
|
Re: كاريكاتيرات عز الدين عثمان ( مجموعة العهد البائد 1967 ) (Re: يحي قباني)
|
Quote: 17 ( ديسمبر 1967 بعد إندماج حزب الشعب مع الوطني الاتحادى )
شوفوا الديموقراطية و حرية التعبير ... الأزهري بجلالة قدره اترسم غنماية ...
ده لو في زمنا ده ...كان الكاريكاتوريست قطعوا رقبتو !!! |
يا يحي الكاريكاتيرات دي نُشرت أيام الديمقراطية في جريدة الأيام ..... وفي الأيام الأولى لسيئة الذكر مايو وجعفر نميريها، تم تجميعها في هذا الكتيب. إستمرت مايو 16 سنة ... وعز الدين قاااااعد ..... هل كان السودان في الفترة دي هو (المدينة الفاضلة) والاّ ليه ما كان عز الدين عندو إنتاج يستحق أن يصدر في كتيّب؟ بعد مايو، وخلال الـ 4 سنوات الديمقراطية، كانت هناك أعمال لم تقتصر على عز الدين، ثم اختفت بعد عودة (المدينة الفاضلة). طبيعي إنو النظم الديكتاتورية لا تتحمّل النقد .... لكن المشكلة إنو أيّام الديمقراطية في ناس فسّروا الحريات والشفافية بالفوضى.
غايتو ...... الله في.
| |
|
|
|
|
|
|
Re: كاريكاتيرات عز الدين عثمان ( مجموعة العهد البائد 1967 ) (Re: سامى عبد المطلب)
|
شكرا أستاذ يحى قباني
ذكاء الفكرة وطرافة التعليق وإتقان لغة الجسد لتضخيم وإبراز الفكرة عبر الرسومات ...هذه هي كاريكاتيرات عز الدين ...
وأتمنى من رسامي الكاريكاتير الشباب أن يدرسوا أعمال الأساتذة ، عز الدين وأبو شوك ونزيه وغيرهم من مبدعين ... فهم مدرسة كاملة في هذا المجال .
وأخص هنا الشباب الذين نذروا أقلامهم للرسم عبر هذا المنبر ...فيبدو لي أن معظم أفكارهم بسيطة إلى درجة السماجة ولا تحمل روح السخرية الذكية واللماحة ... والرسمة زي لوحة الإعلانات ...مليئة بالجمل والعبارات ....مما يجرد القارىء من متعة الإستنباط وقراءة الفكرة ..من دون كلمات ... فأجمل وأذكى الكاريكاتيرات ....تأتي بدون تعليق
شكري لك ...وإعتذاري على التطويل ...والدخلة اللفت ...الفي النهاية ...
| |
|
|
|
|
|
|
Re: كاريكاتيرات عز الدين عثمان ( مجموعة العهد البائد 1967 ) (Re: يحي قباني)
|
Quote: وأخص هنا الشباب الذين نذروا أقلامهم للرسم عبر هذا المنبر ...فيبدو لي أن معظم أفكارهم بسيطة إلى درجة السماجة ولا تحمل روح السخرية الذكية واللماحة ... والرسمة زي لوحة الإعلانات ...مليئة بالجمل والعبارات ....مما يجرد القارىء من متعة الإستنباط وقراءة الفكرة ..من دون كلمات ... فأجمل وأذكى الكاريكاتيرات ....تأتي بدون تعليق
شكري لك ...وإعتذاري على التطويل ...والدخلة اللفت ...الفي النهاية ... |
اخي الجميل ابراهيم فضل الله ...
تسلم عي الكلمات الرقيقة ...
واحييك علي دخلتك ( اللفت ) ...لانو بامانه الهبوط في الذوق العام شوه كل شي جميل عرفناه ...
عندما نسمع قنبله و راجل المره ... ما ذا نتوقع ان تكون الكراكتيرات ... !!!
اضم صوتي لصوتك ...
واتمني ان نرتقي في فننا ونسمو به الي ما كنا عليه قبل زمن ليس بالبعيد ...بكل انواعه ...
| |
|
|
|
|
|
|
Re: كاريكاتيرات عز الدين عثمان ( مجموعة العهد البائد 1967 ) (Re: يحي قباني)
|
الباشمهندس \يحى قبانى .
تحياتى
لو قالوا ليك اوصف جمالك .... تفتكر تقدر تقول كل الحقيقة
ذكرتنا زمن كنا فيه صغار تعلمنا منهم الكثير ...!
(طمبل باى كاسوا ما لقو تمبل باى فى الغابة لقوا ماسكلو حمار من ضنبهو ويعمل ليهو كشلو كشلوا)
هى طمبل ام تمبل ....؟
حتى صار الاسم يعنى غشيم او نحو ذلك ....
ولصغار السن (الطمبل باى كان رئيس شاد) فى ذلك الزمن الجميل واختلف مع السودان فى ماذا لا ادرى ولم استوعب حتى الان .
فمن له المعلومة من السادة رواد هذا البوست من المخضرمين المحترمين ان يمدنا بها ...
والتحية والتقدير لك اخى يحى .
| |
|
|
|
|
|
|
Re: كاريكاتيرات عز الدين عثمان ( مجموعة العهد البائد 1967 ) (Re: عبداللطيف شريف على)
|
حيا الله أستاذ يحيى، شكراً ليك كتير! فكاريكاتيرات عزالدين كانت بعضاً من ذلك الجميل، الذي كدنا أن نفتقد كثيراً من ملامحه!
وأيضاً شكراً لك أن أتحت لنا الاطلاع على كلمات الأستاذ هاشم صديق الرائعة، هذا الرجل ما يزال يحتمل ذلك الزمن الجميل، في صدره! وما يزال ممسكاً على جمر القضية!
وليت مناضلينا يتعلمون منه!
Quote: أنا زمان كان مشكلتي الحرية ومناهضة الأجهزة الشمولية والدفاع عن المهمشين وقضايا الملكية الفكرية .. هسي أنا هّمي الأساسي النسيج الاجتماعي أنا يومياً بقرأ الجرايد وبقرأ ليكم ولي غيركم .. بتمزق ككاتب درامي لما أشوف الاشكالات الاخلاقية والاجتماعية والاقتصادية والسياسية الوصلنا ليها كسودانيين .. مرات بلقي القبض علي روحي متلبساً وأنا بتذكر لي في مثل سوداني اتعلمته من حبوباتي وأمي وخالاتي تلقاهو اليوم مافي .. بلاحظ للمشكلة الحاصلة لينا السكاكين المشرعة دي .. الأخ يقتل أخوهو .. وأنا حا أكون حذر عشان ما استعمل كلمات شينة في حق الوسط الفني وأنا عندي أصدقاء وأحباء بعزهم في الوسط ده . |
شكراً هاشم صديق، تجربة غنية في ممارسة النضال المدني!
| |
|
|
|
|
|
|
Re: كاريكاتيرات عز الدين عثمان ( مجموعة العهد البائد 1967 ) (Re: امير الامين حسن)
|
Quote: الباشمهندس \يحى قبانى .
تحياتى
لو قالوا ليك اوصف جمالك .... تفتكر تقدر تقول كل الحقيقة
ذكرتنا زمن كنا فيه صغار تعلمنا منهم الكثير ...!
(طمبل باى كاسوا ما لقو تمبل باى فى الغابة لقوا ماسكلو حمار من ضنبهو ويعمل ليهو كشلو كشلوا)
هى طمبل ام تمبل ....؟
حتى صار الاسم يعنى غشيم او نحو ذلك .... |
عبد اللطيف ...تسلم يا جميل ...
هو فرانسوا تومبلباي ...
طبعا انحنا عملناها طمبل باي ...لأنو اسم طمبل موجود في السودان ...
مشاكله مع السودان اعتقد جبهة تحرير تشاد كانت بتتحرك من السودان ... وهو كان داير الفرنسيين يساعدوهوا ...
كلام كتير كده ... في اول ايام النميري ... وهو راح بعد داك ...
| |
|
|
|
|
|
|
Re: كاريكاتيرات عز الدين عثمان ( مجموعة العهد البائد 1967 ) (Re: يحي قباني)
|
Quote: يا الله أستاذ يحيى، شكراً ليك كتير! فكاريكاتيرات عزالدين كانت بعضاً من ذلك الجميل، الذي كدنا أن نفتقد كثيراً من ملامحه!
وأيضاً شكراً لك أن أتحت لنا الاطلاع على كلمات الأستاذ هاشم صديق الرائعة، هذا الرجل ما يزال يحتمل ذلك الزمن الجميل، في صدره! وما يزال ممسكاً على جمر القضية!
وليت مناضلينا يتعلمون منه! |
تسلم يا ود فقير ...
وليتهم يتعلمون من هاشم صديق ...
| |
|
|
|
|
|
|
|