|
اقيف لا تمشى يا حميد ............... مرثيه للشاعر حميد
|
خلاص روّحت يا حميد وما جاينا راجع تانى والخبر السمعنا اكيد اتارى الغيمة ما كان جاي تحدثنا وكان حزنانة لى روحا وكان مهموما شايلة همومنا عارفة حزنا ببقى شديد واتارى الدنيا قلبها طامى واسعى وضيقى خامى ولامى وكل الفيها كان محزون يفكر وهامى والمدسوس فى رحم الغيب ما معروف بيبق بنيى والا وليد خلاص روّحت يا حمّيد ... *** حنين بيوضة فى واديك وحِس عيوشة بتناديك ونظرات نورا بتقوليك اقيف لاتمشى يا حمّيد شان خاطرنا لاتبرح مكانك دا واوعة تسيبنا تمشى بعيد تعال تالانا ابقى حدانا ما تخلينا يا حميد شويفعين لسة ما شافوك يقرقرو بى حجاك يالزين تشابى على مداك وتزيد اقيف لاتمشى يا حميد شان خاطرنا لو رايدنا لاتبرحنا تمشى بعيد *** ووب ووبين عليك احيْ مراكبك وين رست ياخيْ وا حُرقة حشا اللُمات يالحاديت حدود الضيْ ووب ووبين عليك احيْ يالمزروع وسط اعماقنا وجوا الجوا يازول هيْ إتقلقلت فى انفاسنا فى إحساسنا تتسرب شوية شويْ ووب ووبين عليك احي~ يالاديتنا إحساس الزمان الزين وإنو الدنيا بى خيرا ولسة الناس ضميرن حيْ ووب ووبين عليك احيْ يا مقنع عشا البايتات ولفحة توب بنات العِز وقولت خير وجيداً جيد ووا جيت ليْ ووب ووبين عليك احيْ مراكبك وين رست ياخيْ ووين روّحت ياحميد .. *** إتلاقينا فى يوم صدفة بين همس النسيم والطرفة بين عسل الكلام والطٌرفة وكان الدنيا كنها عيد شفتك والفرح ماليك وشايلك فوق كفوف الليد وكان الشوق يقالدك شوق يشيلك شوق يختك شوق يسوقك سوق يطيربك فوق يهيج ويروق يكورك عوك جميع يا ايها المخلوق الما ضاق حلوهو يضوق وكان اليوم دا يوم عرسك واول مرة اشوفلى عرس احس بى نفسى إنى سعيد *** وكان ريحة الطلح والخُمرة فى بيناتنا تتسرب بشيش وبشيش وزي كم شافعة خمجو الدار طرطشن الولاد طرطيش وريحة البوخة فى نورا مو . فى نورا . فى عيوشة لا ..فى نورا.. فى عيوشة ف عيوشة فى نورا اقولك فايحى ف اللتنين وليشن نحن متقالتين وفى لحظات ورمشة عين جات ام زين وحد الزين وإسماعين وحاجة فطيمة والحردلو وامى وعبد الرحيم خالى وعمى ابزيد ونادت امى يا يوسب تعال هاك دا ومن المحفظة ام اضنين مرقت ليها ابقرشين وقالت لي زيد فوقو و اخمش ليك زي كيلتين من التمُر الجديد حق هسى وشيل اديهو لى حميد وخلاص روّت يا حمّيد ..
|
|
|
|
|
|