|
|
 الرجاء المساعدة فى معرفة كاتب هذه القصه (السودانية الرحلة600).
|
نشرت هذه القصة على صفحة الاخ الصديق محمد حسين المميز فى الفيس بوك وعندى سؤالى له عن كاتبها ا########ى بعدم معرفتى به.
قمت بسؤال عدد من الاصدقاء من قاموا بمشاركة هذه القصة على صفحاتهم وكنهم للاسف جميعاً لا علم لهم بكاتبها.
نترك التعليق والتقييم لكم بعد الاطلاع على النص.
المشهد (1) ..... في استعلامات مطار الخرطوم
في مكتب استعلامات المطار التاسعة صباح الاحد... ثلاثة من الموظفات جالسات في حالة خمول وتعسيلة.... ويرن الهاتف بازعاج شديد ... تررررررررررررن .... والموظفات الجالسات لا يبدو عليهن الاهتمام... او الرغبة في الرد على الهاتف .....ويستمر الهاتف في الرنين ... تررررررررررررن .... فتنادي احدى الفتيات الاخرى وهي مندمجة في قراءة احدى الصحف امامها ... يا هنادي عليك الله ما ترفعي السماعة شوف دا منو العامل لينا ازعاج من اول الصباح دا ....... صوت التلفون دا انا بقى يجيب لي العصبي ......
وبتثاقل وبرود شديدين .. ترفع هنادي التلفون ....
هنادي ....... الو .....
فيجيبها صوت رجل من الجانب الآخر : دا وين ....
الموظفة : انت ضارب وين ....
الصوت : انا داير استعلامات المطار .....
هنادي بزهج .... ياها الاستعلامات ... داير شنو ....
الصوت ... داير اقول ليكم رحلة سودانير القامت الصباح رقم 660 الماشة دبي ..... انا خ.......
وقبل ان يكمل تقاطعه هنادي .... طيارة دبي دي قامت قبيل .....
الصوت ... عارفها قامت ... تقوم قيامتك .... داير اقول ليك انا ختيت فيها قنبلة ....
هنادي باندهاش .... قتا شنو....؟
الصوت .... زي ما سمعتي ... ختيت فيها قنبلة .... وفي رسالة في جيب المقعد رقم 15 بي كاتب ليكم انا داير فيها شنو... الرسالة في ظرف ابيض ... كاتبها لحبيبتي المسافرة في الطيارة واسمها محاسن عيسى .... ولو .......... تييت تيت تييييييييييييييييييييت
هنادي .... الو ... الو ..... وبزهج تطنطن ..... شكلو السجم دا رصيدو خلص .....
احدى الموظفات موجهة سؤالها لهنادي .... دا منو ....
هنادي ... دا واحد ما عارفاهو سكران ولا مالو.... قال شنو ختى قنبلة في طيارة دبي ... داير يكتل حبيبتو الراكبة في الطيارة ......
الموظفة باستغراب .... اجي .... اها بقينا لجنس دا ...... الله يعرس لينا ويحلنا من وجع القلب دا .... شي سكارى وشئ عروب وشئ شفع .... عليك الله خلينا من وجع القلب ديل .... اها الفطور شنو الليلة ......
الموظفة الاخرى التي لم تشارك في الحديث.... انا غايتو الليلة بايعاكم ماشة لمحاسن صحبتي في المالية بفطر معاها ....
هنادي ...... هي بمناسبة محاسن دي .... اتذكرت الراجل بتاعة القنبلة قال حبيبتو اسمها محاسن عيسى ... كدى يا آمنة شوفي في كشف طيارة دبي في اسم محاسن عيسى دي ...
امنة وهي تقلب في مجموعة من الاوراق والاسماء ..... محاسن ... محاسن .... آي في محاسن عيسى محمد .....
هنادي ..... هي ووب علي .... شكلو الزول دا كلامو صحي صحي ..... كدى جيبي التلفون دا اضريو لجنابو عبد العزيز بتاع الامن المطار نكلمو ....
وفي دقائق كان الاتصال بجنابو عبد العزيز ..... الو جنابو ... صباح الخير .... معاك هنادي من الاستعلامات ....انت وين
جنابو عبد العزيز ..... اهلا هنادي .... انا لسة ما دخلت المكتب .. قاعد بشرب قهوة في الشارع .... في شي ....
هنادي ... لا ما في حاجة بس في زول ضرب قال انو خت قنبلة في طيارة دبي القامت قبيل .... قال عايز ينتقم من حبيبتو الفي الطيارة .....
جنابو عبد العزيز .... يا زولة قنبلة شنو قولي كلام تاني .... مراة شنو البكتلوها بقنبلة دي ..... دا واحد ساي بكون داير يهظر .... كدى لما ارجع المكتب بجيب رقمو واجيبو اطلع عينو ....
هنادي .... بس يا جنابو ادانا اسم حبيبتو .... وفعلا لقيناها ضمن الركاب ..... وجد قلبي موغوغشني يكون كلامو صحي وقال ختا ليها خطاب في جيب المقعد رقم 15 بي ....
جنابو عبد العزيز .... كدى خلاص امشي ناس برج المراقبة خليهم يضربو للطيارة لسة بتكون في الاجواء حقتنا ... واساليهم يشوفو جيب المقعد فيهو شنو ..... وبعداك وريني البيحصل شنو .....
|
|
 
|
|
|
|
|
|
|
|
Re: الرجاء المساعدة فى معرفة كاتب هذه القصه (السودانية الرحلة660). (Re: بدرالدين الطائف)
|
المشهد الثاني : داخل الطائرة
داخل طائرة سودانير المتجهة الى دبي في الرحلة 660 وداخل كبينة القيادة يرن الاتصال .....
برج المراقبة .... الو رحلة 660 اجب معاك برج المراقبة
كابتن الطائرة ... معاك الرحلة 660 .... معاك كابتن ممدوح ... قائد الطائرة ..... في شنو ... ما تكونو نسيتو تقفلو التنك ...
برج المراقبة ..... تنك شنو يا زول ..... في اخبارية جاتنا انو في قنبلة في الطيارة .... حول
كابتن ممدوح ..... يا زول حول شنو .... دي ما فيها حول ..... قت لي القنبلة وين ......
برج المراقبة ..... مزروعة في الطيارة .... وحسب الاخبارية الجاتنا ... في جواب في جيب المقعد رقم 15 بي في ظرف ابيض معنون لواحدة اسمها محاسن عيسى .... كدى اتاكد انو في جواب ولا غشة ساكت .... حول
كابتن ممدوح .... كدى اديني دقيقة بس .... ثم يلتفت لمساعده الذي كان ايضا يستمع للمكالمة .... قوم يا عوض سيب الفي يدك .... كدى شوف جيب المصيبة دا فيهو شنو ...... يا اخوانا دي مصايب شنو البتحدف علينا دي ..... انا من قبيل سفرية دبي دي قلبي مابيها ما عارف ليه ...... كلو من المراة الفقر دي .... من ما عرفتني ماشي دبي ومسكتني دايرة ودايرة .... اها جابت خبري ....
وفي دقائق يذهب عوض ثم يعود حاملا الظرف ثم يناوله للكابتن ممدوح قائلا .... فعلا يا كابتن الظرف في ومكتوب فيهو برا الى محاسن عيسى ....
كابتن ممدوح وهو يفتح الظرف ويقرأه بصوت واضح ....حبيبتي محاسن .... كدا تبيعيني وتبيعي حبنا ... وتتخلي عني بالسهولة دي عشان واحد مغترب عندو حبة قريشات .... انا عارف كلو دا من امك الشمطا دي ..... هي الجنها قروش ... لكن انتي برضك ما دافعت عني واتمسكتي بحبك لي ..... عشان كدا تستاهلي الشنق والموت .... وشفتي دبي العاجباك دي ما حتشوفيها بعينك ..... وعريسك ود ال###### دا ما حيتهنا بيك او يلمسك .... لانك ملكي انا ...... وكلها لحدى ما تجي الساعة حداشر .... تكوني انتي وكل الفي الطيارة دي العاجباهم دبي حقتك دي ..... في الباي باي ... يا خاينة ... يا خاينة ....... حبيبك للابد ايمن دجانغو
كابتن ممدوح ..... الو معاي يا برج المراقبة سمعت كلام الزول المجنون دا .....
برج المراقبة .... ايو سمعناهو .... وباقي لينا نص ساعة مفروض نتصرف فيها .... وما في طريقة ترجع لمطار الخرتوم او اي مطار قريب .....
كابتن ممدوح ... يعني ح اطير بيها وين المصيبة دي ..... الحل شنو ..
برج المراقبة ...الحل انو لازم القنبلة دي تتفك في مكانها ..... دقائق وبكون معاك خبير متفجرات يوريك تعمل شنو ...... المهم ما تقلق ... حول
كابتن ممدوح .... الحول اليعميكم ياخي ما قلنا ليك القصص دي مافيها حول ..... انتو البنات ديل كلهن طالقنهن ماشات دبي وجايات من دبي ... ليه ما بتقولو للواحدة الموديك شنو ولا محرمك وينو ..... كدى يا عوض نادي لينا المضيفة دي ... خليها تجيب لينا قاشرة عيسى دي نفهم منها دا منو المجنون العمل الحكاية دي
| |
|
|
|
|
|
|
|
|
|
Re: الرجاء المساعدة فى معرفة كاتب هذه القصه (السودانية الرحلة660). (Re: بدرالدين الطائف)
|
المشهد الثالث
وفي دقائق كانت محاسن عيسى في كبينة القيادة ..... ويبدو عليها من شكل الحنة والابهة التي هي فيها انها عروس في طريقها لملاقاة زوجها .... ويبدو عليها الاندهاش من طلبها بواسطة الكابتن ....
محاسن ..... في شنو ياخي الطيارة مالها حتقع ....
كابتن ممدوح وهو ينظر اليها بغضب .... كان دايرة تقع كان بناديك عشان تصبيها ........ بتعرفي واحد اسمو ايمن دجانغو ....
محاسن .... سجمي ايمن المجنون ... مالو جا لاحقني هنا ....
كابتن ممدوح .... يعني حيكون لاحقك باف سطاشر .... دا لاحقنا كلنا وبسببك داير يغتس حجرنا كلنا .....
محاسن ... مالو يا جنابو في شنو ....
كابتن ممدوح .... اولا انا ما جنابو ... وتانيا الزول دا خت قنبلة في الطيارة دي .... وكاتب ليك الجواب دا .... ثم يناولها الجواب فتقرأه ثم تبدا في النواح ...
محاسن .... ووووب وووب علي .... الما مكتوب لي اتهنا .... واي يا امي تعالي الحقيني .....
كابتن ممدوح .... يا بت هوي احنا جبناك هنا تسكلي لينا .... جبناك نسأل ..الزول دا بعرف يعمل قنابل .... وكان بعرف ممكن بسببك يكتل الناس ديل كلهم ....
محاسن .... دا مجنون بعملها ... هو زمان كان شغال في الجيش بتاع متفجرات ..... وطوالي كان بقول لي والله تعرسي غيري افجرك ما اخلي فيك حتة ..... وانا كنت قايلاهو بهظر ... بس من ما عرف اني حا اتزوج بقى طوالي يترصدني وبقيت اخاف لانو مرات بضرب لي وبقول لي بكتلك ..... ومرة رمى لي في البلكونة كديسة مضبوحة معاها ورقة بقول لي دي انتي ....
كابتن ممدوح .... كدى خلاس ارجعي مكانك خلينا نشوف حنسوي شنو ..... ثم يوجه حديه للمضيفة سوقيها رجعيها مكانها
....
كابتن ممدوح ....الو الو يا برج السجم انت معاي ... اها نسوي شنو .... ووينو الخبير القلتو دا ....
برج المراقبة .... ايوا سامعين .... دقائق الخبير وبيوصل يادوب صحيناهو من النوم ....
كابتن ممدوح .... ياخي استعجلوه الزول دا .... الساعة حداشر دي قربت .... وصراحة بطني واجعاني داير اخش الحمام ....
برج المراقبة ... كدى قبل الحمام .... كلم المضيفة تفتش تحت الكراسي عن محل القنبلة .... وزحوا الناس من جنبها لحدي ما الخبير يورينا ......
كابتن ممدوح ... مضيفات شنو يا بن العم .... الشافعات المعيننهم لينا ديل ..... واحدة قبيل سمعت ونقلت ليهم الخبر .... واهم هناك مرزوعات كل واحدة تقول ليك كرعيني ما شايلاتني .... والبتبكي ..... والقاعدة منططة عيونها ..... في واحدة جديدة مسلوعة كدا زي الصبرة عاجباها قصة دبي دي هي الوحيدة الما مستوعبة الخطر اللي نحن فيهو .....
برج المراقبة ..... ما يكون الركاب حسو بحاجة ......
كابتن ممدوح .... هو ديل لو بحسو كانو حسو .... همهم في الوجبات والداير شاي والداير قهوة ..... والببحلق في الشباك ....
ثم يلتفت الى مساعده عوض .... كدى يا عوض نادي لينا البت الزي الصبرة دي خليها تجي .....
وفي لحظات تكون المضيفة امام الكابتن تتلقى التعليمات .....
كابتن ممدوح ... اسمعي امشي عايني تحت الكراسي ديل كرسي كرسي شوفي القنبلة دي مركبة وين ....
المضيفة ..... حاضر بشوفها وبجي
| |
|
|
|
|
|
|
|
|
|
Re: الرجاء المساعدة فى معرفة كاتب هذه القصه (السودانية الرحلة660). (Re: بدرالدين الطائف)
|
المشهد الرابع
ويتناول الكابتن المذياع ليخاطب الركاب ....
كابتن ممدوح ..... معاكم الكابتن ممدوح .... اسمعوني كويس .... ناس برج المراقبة قالو انو في قنبلة في الطيارة دي .... واحتمال تنفجر الساعة حداشر ....... فدايرين كل واحد فيكم يعاين تحت كرسيهو ... ولو لاحظ حاجة غريبة يوريها للمضيفة ..... وارجوكم حافظوا على الهدوء ......
وفي لحظات سادت حالة من الهرج والصياح في الطائرة .... وتعالى بكاء النساء وصراخ الاطفال ...... وانخرط البعض في البكاء او الدعاء ..... وفي خضم ذلك .... كان احدهم يخاطبهم بصوت عالي .... يا ناس اهدوا ..... الموت واحد .....بدل الصريخ دا اذكروا ربكم لحدي ما تنفجر بيكم ..... اتذكروا انكم حتموتوا شهداء ....ثم يخاطب احدى المضيفات ... يا اخت قولي للسواق دا يشغل لينا شريط قران ..... يمكن الناس دي تهدأ ....
وانهمك بعض الركاب في البحث تحت المقاعد .... عن اي شئ غريب ... مساعدة منهم للمضيفة في سرعة الحصول على ...وفجأة يصيح احدهم ..... هنا هنا في حاجة بتنور وعاملة زي الساعة...... وهكذا تم استدعاء الكابتن ممدوح لمشاهدة القنبلة وجها لوجه .......
وفي لحظات كان الكابتن تحت الكراسي ينظر لها ..... ويتحدث مع برج المراقبة ....
الكابتن ممدوح .... يا برج المراقبة .... يا برج الخبير وصل ....
برج المراقبة .... الخبير وصل وبسمعك ..... وبقول ليك وصف ليهو القنبلة القدامك ....
الكابتن ..... قدامي علبة ماكنتوش وفوق ليها ملزقة حاجة زي الساعة فيها انوار بتنور .....
الخبير من برج المراقبة ..... علبة ماكنتوش مقاسها شنو ....
الكابتن ..... ياخي اهي جايبنها لي هدية .. ما هي علبة والسلام كان صغيرة ولا كبيرة فرقت في شنو .......
الخبير ..... طيب الساعة القدامك دي هي البتعمل الصوت ولا الصوت جاي من جوا العلبة ....
الكابتن ..... يا برج انتو الزول دا متاكدين انو خبير .... جبتوهو من وين دا .... ياخي صوت وجاي من فوق ولا من تحت انا شن عرفني بيهو ....
الخبير .... طيب اوكى حاول براحة افتح العلبة ووريني جواها في شنو .....
الكابتن وبعد ان تمكن بهدوء من فتحها ..... في مجموعة اسلاك ... احمر واصفر واسود ......
الخبير ..... ما في سلك لونو اخضر .......
الكابتن .... لا ما في .....
الخبير ..... خسارة .... معناها القنبلة دي متطورة خالس ... والزول الركبها دا جن مصلت ....
الكابتن .... اها والحل شنو نخليها تفرقع ونرتاح وترتاحو ..... ولا نسوي شنو .....
لخبير ..... والله صعب اقول ليك تسوي شنو ..... لاني ما قادر اتخيل شكلها عامل كيف .... ولا بكون مركبها من شنو ....
| |
|
|
|
|
|
|
|
|
|
Re: الرجاء المساعدة فى معرفة كاتب هذه القصه (السودانية الرحلة660). (Re: بدرالدين الطائف)
|
المشهد الخامس .... مكتب امن المطار
يدخل جنابو عبد العزيز مكتبه .... ثم يبدأ في عمل مجموعة من الاتصالات بعد ان تم تأكيد خبر وجود القنبلة في الطائرة من هنادي كما طلب منها ....
جنابو عبد العزيز .... الو الو ..... يا نمرة عشرة سامعني يا نمرة عشرة ...... سوق معاك قوة مسلحة ..... امشو امبدة جنب مدرسة الصلاح الابتدائية في واحد اسمو ايمن دجانقو ..... جيبوه هنا بسرعة .... انا في انتظاركم هنا ....
نمرة عشرة .... حاضر سعادتك دقائق وبنكون عندك ....
جنابو عبد العزيز وقد انهمك في اجراء مكالمة اخرى ...... الو اسمعني يا احمد .... شوف ناس الاتصالات وحددوا لي موقع الشخص حامل الرقم دا 096576548 ... وقول ليهم بصورة مستعجلة لانو مطلوب القبض عليهو في عمل ارهابي ...... انا في انتظارك .......
وكلها دقائق معدودة كان الاتصال من رقم عشرة ..... سعادتك احنا داهمنا منزل المشبوه ... وما لقيناهو قالو مرق من الصباح ..... نقبض ناس بيتهم نجيبهم ولا تعليماتك شنو ....
جنابو عبد العزيز .... لا ناس بيتهم ما دايرينهم .... شوفو ليهو صورة حديثة من بيتهم نعممها على الوحدات ....
نمرة عشرة .... والله يا جنابو جبناها .... بس الزول دا شبهو كتير خلاس ..... لو حاولنا نرسلها بالفاكس للرئاسة بتطلع سوداء المعالم بتكون غير واضحة .....
جنابو عبد العزيز .... كدى يا نمرة عشرة خليك معاي ..... معاي اتصال من الاتصالات عشان يحدد لينا مكانو .... خليك معاي
جنابو عبد العزيز .... الو .. ايوا يا احمد .... اها الاشارة ظاهرة وين .... في الحلة ما بعيد من البيت ..... فيها احداثيات ولا كالعادة ما في شئ ..... اها ..... معناها المنطقة دي قريبة من بيتو .... اوكى تمام خليك معاي في الخت .... واديني اشارة اذا السيجنال اتحركت ...
جنابو عبد العزيز ... ايوا يا نمرة عشرة ... الزول دا ما بعيد منكم الاشارة بتوري انو قريب من البيت ..... في شنو هناك محل ممكن يكون قاعد جنبو ....
نمرة عشرة .... غايتو هناك في حبشية بتبيع شاي في راس الشارع ..... الجماعة ملمومين جنبها ...يمكن يكون هناك .... خليك معاي سعادتك ....
وفي دقائق كان الاتصال من نمرة عشرة ...... سعادتك نحن وصلنا الحبشية .... في واحد قاعد مطرف في البنبر تنطبق عليهو المواصفات ...... حنداهمو ونقبض عليهو ...
وانقضت لحظات يسمع فيها جنابو الهرج والمرج من خلال السماعة .... امسك .. اقبض ... يا زول .... امسك الرجل دي .... ما يفلت منك ....
نمرة عشرة .... تمام سعادتك ياهو الزول المطلوب .... هو ناكر انو ايمن دجانغو .... لكن الحبشية قالت يا هو دجانقو زاتو وحتى قالت هو جبهة ثورية وهي دايرة منو قروش..... وما معاهو اثبات شخصية .... ونحن متحركين جايبينو ....
جنابو عبد العزيز ...... اوكى ممتازين يا نمرة عشرة .... نجضوا لي كويس وانتو جايين .... ما داير اصرف معاهو عربي كتير ...
ولم تمر دقائق معدودة ... حتى كان المذكور مضروب ومبشتن وتسيل الدماء من وجهه امام جنابو عبد العزيز ....
جنابو عبد العزيز ..... انت قايل ما بجيبوك .... اتكلم القنبلة الختيتها في الطيارة دي بوقفوها كيف .....
ايمن دجانغو ..... ابيت ما بوريك .....
جنابو عبد العزيز ..... يازول خلى الغتاتة دي .... احسن ليك انضم ... اتكلم ورينا ...
ايمن دجانغو .... ابيييييييييييييييييييييييييت ما بقول ليك ..... خليها تنفجر عشان الخاينة تموت ......
جنابو عبد العزيز ...... هي بس البتموت براها ما معاها ناس ابرياء ذنبهم شنو ........ لو وريتنا بوقفوها كيف بنسامحك بعدين ....
ايمن دجانغو ....... خليهم يموتو .. عالم وهم .... سودان وهم ... بنات وهم ..... حتى ذاتها ما قنبلة واحدة .... قنبلتين ....... لو عرفتو واحدة التانية ما حتعرفوا مكانها دسيتها مع العفش .... وحتنفجر اذا قل الضغط في الطيارة ..... يعني لو الطيارة هبطت في الارض ....بوووووووووووووووووووووووم .... باي باي محاسن .......... هاهاهاهاهاهاهاها
جنابو عبد العزيز ........... يا عسكري تعال سوق المجنون دا ارميهو في الحراسة ........ بكتلو كان قعد معاي اكتر من كدا ....
| |
|
|
|
|
|
|
|
|
|
Re: الرجاء المساعدة فى معرفة كاتب هذه القصه (السودانية الرحلة660). (Re: بدرالدين الطائف)
|
المشهد السادس داخل الطائرة ....
وقد انهمك الجميع مع الكابتن ممدوح في فك وتعطيل القنبلة قبيل انفجارها ......
احد الركاب موجها كلامه للكابتن ...... اسمع يا باشمهندس .... الشئ دا ما بتتحرك .... شيلها ارفع فوق خلينا زاتنا نشوف معاك بدل مدنقر ليها كدا ..... ونحن قاعدين هنا ما فاهمين الحاصل شنو ....
كابتن ممدوح .... هي بتتحرك بس خايفها تنفجر لو حركتها .....
الراكب .... ياخي مرقها يمكن نعرفها كيف بفكوها ..... اهي كدا ولا كدا مفروض تنفجر ..... بعدين هو الختاها منو .... ناس دارفور ولا القاعدة ولا منو الداير يفجرنا دا ..... الله لا كسبو دنيا ولا اخرة ....
كابتن ممدوح .... دا واحد ختاها هنا عشان حبيبتو القاعدة هناك دي باعتو مشت عرست واحد تاني ....
وهنا تلتقط الحديث احدى النساء بالطيارة ...... موجهة حديثها لمحاسن عيسى ... وينها المعولقة القاعدة هناك تتبكى دا ..... تبكي على شنو على سجم رمادك ... ما ياها عمايلك ..... الواحدة فيكم تنطلق وتلقط في العواليق وبعداك تجي تتبكى ...... ما يكتلك براك حسي نحن والشفع الصغار ديل ذنبهم شنو ...... كلو فوق رقبتك ... رقبتك بالتقطعها ....... والله كان ما شبشبي جديد كان مرقتو دقيتك بيهو هردتك ليك لحمك وشحمك دا ...... تفوووووو عليك وعلى الربوك ......
وليس بعيدا من ذلك كان الكابتن قد اخرج القنبلة من تحت المقعد .... ووضعها في احد الكراسي ...... وفتحها ينظر للاسلاك التي فيها ..... وانضم اليه حبا في الاستطلاع عدد من الركاب .......
تعرف يا كابتن ..... هم تلاتة اسلاك حقوا نفك السلك الاحمر دا في الاول ...... هكذا قال احد الركاب .....
ليه السلك الاحمر ... ما يكون الاصفر .... يقاطعه راكب اخر ......
انا غايتو بشوف في الافلام دايما السلك الاحمر بكون عاملينو خدعة ..... ولما يقطعوا ما بنفجر ..... يقول احد الركاب ....
هي القنبلة دي محشية شنو ..... شايف لي فيها حاجة سائلة لونها اخدر ....... مافي زول بتاع كيميا هنا يورينا فيها شنو المادة دي يقول احد الركاب
انا قارية كيميا بس ما اشتغلت بيها .... اشتغلت في محل اتصالات ..... بتذكرها المادة اللونها اخضر دي كنت بشوفها في اللاب لكن اسمها شنو ما متذكراه ..... تجيب احدى الشابات بالطائرة
ياخي ما تلف الطيارة دي ترجع كان متنا نموت في بلدنا ...... يقول احد الركاب
كابتن ممدوح .... يا جماعة لو سمحتو خلوني اركز واشوف الدائرة الكهربية دي من وين وداخلة وين ......
ياخي اقطع ليك اي واحد وريحنا بدل الشحتفة دي ..... انفجرت الله يرحما .... ما انفجرت برضو الله يوصلنا بالسلامة ويمرقنا من هنا ...... وبعدين مافي وقت كلها الساعة حداشر قربت .... يقول احد الشباب الركاب .....
كابتن ممدوح وهو ينظر الى ساعته .... يا زول على قولك ..... دي دائرة ما معروف راسها من قعرها .... وخبير السجم دا لا فادنا ولا بيفيدنا ......يا جماعة اتشهدوا ... انا ح اقطع اي واحد فيهم والبحصل يحصل ......
وهنا يتعالى الصراخ والضجيج في الطائرة والبكاء ..... ياخي ما تقطعها خليها تنفجر براها امشي سوق سواقتك ...... يقول احد الركاب ..... واخر يقول..... كدى قبل ما تقطع اربطها في راس البت الفقر دي خليها تفرقع اول زول ... يقول رجل كبير في السن ...... وكابتن ممدوح ينظر للاسلاك وهو يردد ...... يا ايدي شيليني ختيني .... في بيت الله العاجبني ... كمنت الله ويا الله ...... الله اكبر ولا اله الا الله ...... ثم يغمض عينية ويقطع اول سلاك يصادفه ..... وتشاء الظروف ان يكون السلك الاحمر .....
لحظة صمت في الطائرة ....... مع بعض حالات الاغماء ....... ولكن لم يحدث شئ ... ولم يسمع صوت انفجار .... ليفتح كابتن ممدوح عينيه ببطء ... فيشاهد السلك الاحمر مقطوع ..... والقنبلة كما هي لم يتوقف عدادها ......
ما قلت ليكم السلك الاحمر دايما غشة ساكت .... يقول الراكب الذي نادي سابقا بقطع السلك الاحمر .....
كابتن ممدوح ...... كدا فضلوا سلكين ...... يا برج المراقبة ... قطعنا السلك الاحمر ... وفضل سلكين نقطع ياتها ...... الو الو برج المراقبة .... ولكن دون رد .....
ياخي سيبك من ناس البرج ديل ... ديل اخير منهم برج الجمام .... حسي تلاقيهم مشوا يفطروا ...... اقطع اي واحد فيهم .... ولا اقول ليك نقطعهم الاتنين مرة واحدة ....... ما فاضل زمن كلها دقيقتين وتنفجر
| |
|
|
|
|
|
|
|
|
|
Re: الرجاء المساعدة فى معرفة كاتب هذه القصه (السودانية الرحلة660). (Re: بدرالدين الطائف)
|
المشهد السابع
وهكذا اجمع الجميع على قطع السلكين مرة واحدة ..... ومسك الكابتن واحد الاشخاص كل واحد منهم سلك .....
كابتن ممدوح ..... اوكي ماسك السلك كويس ..... اوكى نعد لحدى تلاتة وبعداك نقطع مع بعض قطعة واحدة ..... اوكى جاهز ..... يا اخوانا اتشهدوا وشيلو الفاتحة على ارواحكم ..... اشهد ان لا اله الا الله وان محمد رسول الله ..... واحد ....................................... اتنين .................................................. .. تلاتة
وكما حدث سابقا سادت حالات البكاء الهستيري بين الركاب والصراخ نساء ورجال واطفال .......... اعقبتها فترة صمت ................................ ليكتشف الجميع ان القنبلة قد تم تعطيها .... قبل خمسة ثواني من انفجارها ........
ويسود بعدها جوء من المرح والزغاريد والتصفيق ... والتهانئ بين الركاب ... حمد لله ع السلامة ...... وربنا لطف وستر ......... وتبادل الجميع مع الكابتن التهاني بسلامة الجميع ....... وبعد ان اطمأن الكابتن على الجميع .... وعادت الحياة في اجساد المضيفات والمضيفين ....... وتوزيع المياه والعصائر على الركاب ........ عاد الكابتن ممدوح الى قمرة القيادة ........
كابتن ممدوح ................... الو برج المراقبة ........ الو برج المراقبة ........... تم تعطيل القنبلة ..... سامعني .......ولم يتلقى اي رد ........ ثم يخاطب الركاب ...... السادة الركاب باذن الله حنوصل دبي في مواعيدنا ...... ومفروض نصلها بعد ساعة ونصف .... فاسترخو واستمتعوا بباقي الرحلة وخدماتنا .......
دقائق ساد فيها الهدوء الطائرة ..... ليرن جهاز النداء .... من برج المراقبة ....
برج المراقبة ..... الو يا سودانير 660 اجيب ....... حول
كابتن ممدوح ....... ايوا معاك سودانير 660 ...... وينو انتو كنتو ...... القنبلة بحمد الله عطلناها ومواصلين رحلتنا الى دبي .....
برج المراقبة ..... علم يا سودانير 660 ...... بس في اخبارية بتقول انو في قنبلة تانية مع العفش ..... وبتنفجر مع اي انخفاض في الضغط ........ فالافضل خليك في ارتفاعك وما تحاول الهبوط ......... واتصلنا نجيب خبير هبوط .... حيجي يوريك تتصرف كيف ....... حول ......
النهاية
ملاحظة للمشاهد الكريم :
لا زالت رحلة سوادنير 660 حائمة وعالقة في الاجواء ...... في انتظار وصول خبير الهبوط ............. وقد اختلطت مع الطائرات الاخرى المتبقية من اسطول سودانير ... ولم يعد ممكنا ان تعرف من بينهم .... لهذا فلتعلم اخي الممشاهد ان كل طائرة سوددانير قد تشاهدها في الاجواء قد تكون هي طائرة منكوبة ............... ومشروع انفجار ........................
انتهت
| |
|
|
|
|
|
|
|
|
|
Re: الرجاء المساعدة فى معرفة كاتب هذه القصه (السودانية الرحلة660). (Re: أحمد قلوب)
|
دي واحدة عن الجراد
الكاتب زي ما وضحنا فوق هو د. حامد موسى بشير
___________________________________________________________
دعوني أعرفكم بنفسي ...
أنا جرادة .. بالتحديد ذكر جراد ، وعملي هو إنني قائد سرب مكون من مليون جرادة وظيفتنا الوحيدة في الحياة هي أن نأكل لنعيش ونعيش لنأكل ... البشر يكرهوننا بشدة لأنهم – غفر الله لهم – يظنونا نفسد زراعتهم وننافسهم في أرزاقهم ... نحن لا نفسد .. نحن مثلهم بالضبط نجتهد لكي نعيش .. هم يقطعون الأشجار ويذبحون الحيوانات لينعموا بالثمار واللحوم والألبان ولم تشتك منهم الحيوانات ولا الأشجار ، بينما يملئون الأرض ضجيجا حينما يأتي الجراد لينال رزقه .. إنه الغرور يا سادة .. تبدأ قصتنا حين أوصى جدي أبي وقال له :
- أنت حتكون القائد بعدي .. أوعك تخلي سربك يجوع ، أعمل أي حاجة لكن ما تخليهم يجوعو .. لفو الدنيا دي كلها ولو فترتو أمشو السلة حتلقو الأكل هناك
- سلة شنو ؟
- سلة غذاء العالم يا ولدي .. دي بلد كبير وعريض خيرو راقد أجدادنا كانوا بمشو ليهو ليهم ألاف السنين
ونفذ أبي الوصية .. ظل يرعى سربه سنوات بعدل ونزاهة ... هناك أسراب أخرى تحاربنا وتنافسنا ولكنه رغم الحروب لم ينس إن توفير الطعام لسربه هو الأولوية الأولى .. وحين مات قبل سنوات بعيدة أوصاني بدوري ، فأستلمت القيادة ولكن الزمن كان قد تغير ... في أول عام لي قبل خمسة وعشرون سنة قررت أن أزور مع سربي سلة غذاء العالم .. طرنا لمسافات طويلة وعبرنا الصحارى والبحار حتى وصلنا .. كانت أرضا كالجنان .. واسعة ومنبسطة ويشقها نهر عظيم لم نر له مثيل في العالم .. كانت خضراء ومليئة بالزروع ، وفنانيها يغنون إنه ( حتى الطير بجيها جيعان ) ... ونزلنا هناك وأكلنا قبل أن يطاردوننا بالمبيدات القاتلة فهربنا ولم نعد من ذلك الزمن .. واليوم أعود مع سربي بعد ربع قرن لأن الجوع قد أنهك المناطق الأخرى فقررت المجازفة والعودة لسلة الغذاء ... طرنا عاليا في السماء .. ومن فوق كنا نرى النهر الكبير ولكن كل ما حوله كان صحراء .. أين الخضرة والزروع ؟ أين المشاريع ؟ إتصلت على الأسراب الأخرى وسألتهم :
- يا جماعة في سرب منكم جا البلد دي وأكل زراعتها ؟
- لا والله يا بوص ما جينا
- طيب والخرب زراعتهم كده شنو الناس ديل ؟
- دي حكومتهم يا سيادتك
- حكومتهم فيها جراد زينا كده ؟
- الله أعلم يا بوص
نزلنا في الزروع البسيطة لنأكل ، فحلقت حولنا الطائرات ورشتنا بالمبيدات .. فزع الجراد ولكن المبيد لم يقتله .. تشممت المبيد فعرفت إنه فاسد .. هههههههههه ضحكت بقوة ودعوت قومي للوليمة .. هذه البلاد مسئوليها يستوردون المبيدات الفاسدة والتقاوى الفاسدة والأسمدة الفاسدة ... إنها جنة الجراد .. يجب أن أرسل خطاب شكر للمسئول عن الزراعة في هذا البلد .. لابد إنه أحد أبناء عمومتنا .. وحين إنتهينا من الأكل بعد أيام كانت البلاد قد صارت جرداء .. غادرناها على أمل العودة بعد عام حين يزرعون من جديد ، ولكن بعد عام لم نجد الزروع ، فقط الناس الصامتون الذين يأكلون الفول المستورد .. مالعمل ؟ يجب أن يأكل الجراد وأنا لن أفرط في قوت سربي ، لذلك أمرت السرب صائحا :
- أهجمو على ملابس الناس
وتعالى صراخ الناس والجراد يهاجمهم بالألاف ويمزق ملابس .. طعم الملابس لذيذ رغم إنها مستوردة من الصين .. وبعد أيام كان كل من في البلد عاريا ، فرحلنا عنهم على أمل العودة العام القادم حين يزرعون ويصنعون ملابس جديدة ، ولكن في العام التالي وجدنا الأرض لاتزال يابسة والناس عرايا ، وصامتون ويأكلون الفول المستورد ، فصحت في قومي :
- إهجمو على إطارات السيارات .. إهجمو على الخشب والبلاستيك
ثم تملكني الغيظ فصحت فيهم :
- وأهجمو على الفول المستورد
وبعد أيام إنتهى البلاستيك والخشب والفول من البلاد فغادرناها ، على أعمل العودة في العام القادم وإلتهام المباني والناس أنفسهم ، وفي العالم القادم ، هاجمنا المزرعة السعيدة على الفيسبوك ، وأكلنا أجهزة الكمبيوتر وحين طرنا في الهواء عاليا ، تجمع الناس العرايا ، في ميدان واسع ليخطب فيهم أحد مسئوليهم ، كان المسئول يخطب هادرا والناس تصيح معه فنزلنا لأسفل لأسمع فسمعته يصرخ ملوحا بعصاته نحو أسراب الجراد :
- أنزلو لينا تحت هنا عشان نحسمكم بالعصايات ... الله أكبر
http://www.sudaneseonline.com/articles-action-show-id-30713.htm
| |
|
|
|
|
|
|
|
|
Re: الرجاء المساعدة فى معرفة كاتب هذه القصه (السودانية الرحلة660). (Re: بدرالدين الطائف)
|
تحياتي لصاحب البوست والمتداخلين
ابداع ووصف قمة في الروعة والجمال
وبما انك بتبحث عن كاتب هذه القصة اسمحي لي اقول ليك انو برضو ببحث عن اسم كاتب القصة التالية والتي قرأتها من سنوات ياريت نعرف مين هو ذلك المبدع
وإليكم القصة:
بعد أن اكتمل عدد المشتركات فى الصندوق (الماسكاهو حاجة سعدية) قررت أن تذهب لتسليمه إلى صاحبة (الصرفة الأولى) فقامت بوضع (القريشات) فى (كيس نايلون أسود) ولفها بعناية حتى لا يستبين ما بداخلها ثم أوقفت (ركشة)..
- ماشة وين يا حاجة؟
- ماشة ليا يا ولدى لى ناس زيارة قدام محطة (جامسكا) فى الثورة!
وإنطلق سائق الركشة وهو مندمج مع الأغنية التى يبثها (المسجل) بصوت عال وأخذ شارعاً جانبياً ثم آخر حتى صار بعيداً عن شارع الظلط الذى من المفترض أن يسلكه مما حدا بحاجة سعدية أن تقول له:
- يا ولدى إنت ماشى بى وين؟ أنا بى هنا ما بعرف السكة!
- يا حاجة إنتى مش ماشة (جامسكا)؟ أنا خلاص بوصلك!
استمر سائق الركشة فترة من الوقت (يدخل بى زقاق ويطلع بى زقاق تانى) حتى توقف أمام أحد المنازل وقام بالضغط على البورى ففتح باب المنزل (3 ضلف) لتدخل الركشة وبداخلها (الحاجة سعدية)! التى تفاجأت بوجود عدد من (الشباب) يلتفون حولها تفوح منهم رائحة (الخمر) و(الدخان)- يا وليداتى أنا (مرا كبيرة) عاوزين منى شنو؟
- (مشيراً إلى طشت كبير): ما عاوزين منك شئ يا حاجة بس نضفى لينا (الكمونية) دى!
كان الطشت (مليان لى عينو) بالمصارين و(الكرشة) و(العفشة)، وضعت (حاجة سعدية) الطشت أمام (الماسورة) وهاك يا (نضافة)، على الرغم من أن كمية (الكمونية) التى فى الطشت من الواضح انها لأكثر من (بهيمة) إلا أن (مهارة) حاجة سعدية قد ساعدتها فى إنجاز المهمة فى وقت قياسى مقداره ساعتان بالتمام والكمال!
- (وهى تستعدل ثوبها) أها يا وليداتى رجعونى حتتى!
- (أحدهم يناولها كيس أسود): يا حاجة معقولة تفكينا (عكس الهوا) كده وتمشى؟يعنى (الكمونية) دى ناكلا (نيه)؟
قامت حاجة سعدية بفتح الكيس الذى يحتوى على (الفحم والبصل والصلصة والبهارات)، جلست على (البنبر) المتآكل من جديد، (ولعت نارا) وبدأت فى (حش البصل) ثم (دق التوم) والفلفل..
- أها يا وليداتى.. لى (الصلصة) كبيتا ليكم فيها.. خلاس ودونى لى اهلى الواطه (فللت)!
- خلاس يا حاجة تعالى أركبى نوصلك..
على مشارف الحى قام سائق الركشة بإنزال (حاجة سعدية) التى إتجهت صوب منزلها بينما انطلق (السائق) عائداً إلى ( شلته)..
- مالك يا حاجة إتأخرتى وجاية (فترانة) كده؟
- كيفن ما اجى فترانة وتعبانة؟ ومنضفه (كمونيت) الدنيا والعالمين!!
- أجى (كمونيت) شنو ياحاجة ما قلتى ماشة تودى قروش (الصندوق) الوداك للكمونيات شنو؟
وبعد أن قامت حاجة سعدية بسرد (الحكاية) وسط دهشة الحاضرين خاطبتها حفيدتها (الطالبة) قائلة:
والله يا حبوبة بركة البقت على (الكمونية) مع الحاجات البنقراها فى الجرائد دى!
لما كان من الضرورى تسليم مبلغ (الختة) لصاحبتها فقد قامت (حاجة سعدية) بإرتداء ملابسها فى عصر اليوم التالى ثم قامت بوضع (القريشات) فى (كيس نايلون أسود) لفته بعناية حتى لا يستبين ما بداخله ثم أوقفت ركشة ..
- ماشة وين يا حاجة؟
- ماشة ليا يا ولدى لى ناس زيارة قدام محطة (جامسكا) فى الثورة!
وإنطلق سائق الركشة بالشارع الرئيسى الذى بعد أن تحرك قليلاً وجده مغلقاً فى منتصفه بسبب بعض الإصلاحات فاضطر إلى أن ياخذ شارعاً جانبيا ثم آخر وعندما إنتبهت (حاجة سعدية) إنو (الشوارع ما ياها) قذفت بنفسها من الركشة وهى تصيح:
- وحات الله ما بقدر على الكمونية تااانى!!
هشام حامد العبيد
| |
|
|
|
|
|
|
|
|
|
Re: الرجاء المساعدة فى معرفة كاتب هذه القصه (السودانية الرحلة660). (Re: بدرالدين الطائف)
|
دي نزلت الليلة
______________________
(إستراحة الجمعة )
فانتازيا نسائية ....
الثامن من مارس الثامنة و ثمان دقائق صباحا ...
بدأت الخطة التي تم الإعداد لها قبل أشهر عديدة أيها السادة .. إنه يوم المرأة العالمي ، وفيه قررت المرأة السودانية إهداء بقية نساء العالم ، يوم لا ينسى من التاريخ .. يوم كامل من السيطرة النسائية .. أربعة وعشرون ساعة من كروموسوم( إكس إكس) بدون أي تدخل من كروموزوم (واي) المخرب ... وقد كان .. قبل عشرة دقائق من ساعة الصفر بدأ التنفيذ .. الزوجات وضعن المخدر لأزواجهن في شاي الصباح والامهات وضعنه في الحليب للأطفال الذكور وفي الشاي الأحمر والقهوة للشباب ... فتيات الجامعة وضعن المخدر للطلاب في أكواب العصير ... زوجات الوزراء والمسئولين خدرن أزواجهن كذلك ( لا أعرف ما يشربه هؤلاء في الصباح الأمر متروك لخيالكم) .. المهمشون والضائعون الذين ليس لديهم شاي ولا قهوة ولا عصير أو إفطار أمسكت زوجاتهم ب(المدق ) وضربنهم وهم نيام حتى غابوا عن الوعى ، واللواتي أبتلين بأصحاب المزاج إضطررن لوضع المخدر كيفما أتفق في كوب المريسة أو داخل لفة السجارة وأحيانا في كيس التمباك وحجر الشيشة ... وبحلول الساعة الثامنة من صباح الثامن من مارس غاب آخر الذكور عن الوعي وهو بلا فخر رئيس البلاد الذي أتعب زوجته كثيرا حتى خدرته ... صارت البلاد الآن ملكا لهن ... وخرجت زوجة الرئيس من القصر وخاطبت النساء :
- يلا يا بنات نشد حيلنا قدامنا شغل كتيييير
صاحت إحدى المنافقات :
- تكبير
إلتفتت إليها جميع النساء بإستنكار ، فصاحت :
- إحم .. تصفييييق وين الصفقة ؟
حين تحكم النساء البلاد يا سادة تتغير الكثير من الأمور .. الساعة العاشرة صباحا كان موعد زوجة مسئول المفاوضات بين الحكومة والحركات مع زوجة رئيس تجمع الحركات ( نسيت إخباركم بأن زوجات رجال الحركات ودولة الجنوب فعلوا نفس الشئ ) وخلال عشر دقائق تم الإتفاق على وقف إطلاق النار ، وتقسيم السلطة والثروة وعودة النازحين ونزع الأسلحة ألخ ألخ ، وفي نفس اللحظة كانت زوجة وزير الخارجية تلتقى بزوجة وزير خارجية دولة الجنوب وتبدآن مباحثات مهمة بشأن تدفق النفط عبر البلدين وحل المسائل العالقة ألخ ألخ ألخ .... زوجات ضباط الأمن فتحن زنازين المعتقلين وأخرجنهم لزوجاتهم اللائي خدرنهم فورا بإعتبار إن الواجب فوق كل شئ ... النسوة اللاتي كن ينتظرن هذه الفرصة إستغلوها كما ينبغي ، فهناك من طردن الخادمات الأثيوبيات والفلبينيات خارج البلد وهناك في الجامعات من جعلن الشباب النائمين يبصمون على قسيمة زواج معدة مسبقا ألخ ألخ كل هذا كما تعرفون آثار جانبية بسيطة مقارنة بالإنجازات التي حدثت فعلا .. وبعد أربع وعشرون ساعة من المجد تبادلت نساء البلد التحايا على أمل التكرار العام القادم ، وفي الصباح إستيقظ الرجال وعاد كروموسوم (واي) لوعيه .. لم يفهموا في البداية ما حدث وعادت الجرائد للكلام عن ( مؤامرة صهيونية وغاز منوم أدى إلى غياب الجميع عن الوعي بهدف سرقة خيرات البلد وإستلاب هويتها الثقافية أل ألخ ) ، ثم بدأت عجلة الحياة المعتادة تدور ... على الفور أعلنت بعض الحركات المسلحة رفضها لشروط الإتفاقية وأعلنت الحكومة نفسها عن تحفظها لبعض البنود وتجدد القتال وعاد النازحون للمعسكرات .. الحقيقة إن الحياة بدون حركات ومفاوضات مستحيلة لهؤلاء القوم .. دولة الجنوب أوقفت ضخ النفط وحشدت جيوشها على الحدود وطلاب الجامعات طلقوا زميلاتهم والرجال اعادوا الخادمات الفلبينيات والحبشيات للبيوت وغنى عن الذكر إن المعتقلين عادوا لزنازينهم قبل حتى أن يفيقوا من نومهم ... وفي القصر قال الرئيس لزوجته متثائبا وهو يتابع آخر المستجدات :
- الاوضاع جاطت شديد في اليومين الفاتو ديل بس الحمد لله رجعناها تاني .. صدقيني أحسن حاجة إنكم النسوان ما قاعدين تحكمو .. دي مسئولية تقيلة .. تقيلة شديد
نظرت له زوجته بضيق وطنطنت :
- تقيلة ؟.. طيب أصبرو لينا للسنة الجاية لو ما ختينا ليكم السم
التحية لأمهاتنا وأخواتنا وزوجاتنا وبناتنا في يومهن الذي لا يحتجن إليه لأن كل الأيام لهن وبهن
د.حامد ود نجوى بت محمد آدم
| |
|
|
|
|
|
|
|
|
|
Re: الرجاء المساعدة فى معرفة كاتب هذه القصه (السودانية الرحلة660). (Re: جمال محمود)
|
Quote:
بيان هام
نهنئ أنفسنا بميلاد كاتب قصة جديد ورائع، وأول كاتب سيناريو سوداني على الإطلاق، يخرج بنا من قالب: (عيك .. هوي .. يا جنى ...)إلى آخر تلك اللغة المتسكعة الميتة التي نسمعها في الدراما السودانية وهي تنبع مجانية وفطيرة وخالية من حرارة الحدث.
الحدث في هذه القصة، هو الذي يخلق اللغة كأداة توصيل مشحونة بكم الانفعال المتولد من الحدث نفسه.
مبروك علينا كلنا هذا الكاتب.
احفظوا اسمه جيديا، سيكون له شأن وأي شأن في عالم الابداع |
حامد بدوى بشير ++++ حامد موسى بشير.
يا حامد عندك علاقة بى حامد .
| |
|
|
|
|
|
|
| |
بدرالدين الطائف
Nasr
صلاح ليون
Kostawi
أحمد قلوب
waleed nayel
هشام حامد العبيد
Mohammed Ahmed Saeed
جمال محمود
فيس بوك
تويتر
انستقرام
يوتيوب
بنتيريست