مشيت مع جماعة مقابر البكري بام درمان وهي المقابر التي يدفن فيها سكان الحارة 2/5 ثالوث "المظاهر وحي العرب والمسالمة" وحي السوق والعمدة .. مشيت معاهم الترب اسم آخر للمقابر والدنيا ليل والسماء تتراص فيها النجوم مع غياب القمر في كل منازله!! ولذا لم تكن الإضاءة كافية بجانب عدم إنارة المقابر وقتها.
حرسوني النعش الذي يضم جثمان المرحومة الله يرحمها ويجعل الجنة مثواها وذهبوا لتحضير المقبرة التي ستضم الجثمان وماعارف لزوم الحراسة شنو ولكني إلتزمت بالمهمة وجلست القرفصاء كما يقولون قريبا منها وفجأة جات عربية من بعيد وعديل زولك ماشي علي الجنازة فصحت فيه "يا زول اعمل حسابك.. الجنازة!!" ولم أدر وقتها كيف سيكون الحال وتخيلوا معي جنازة تصدمها سيارة .. هل يعاد الجثمان مرة اخري للمستشفي إثر الحادث أم يعاد لمنزل المتوفية بغرض إعادة غسلها وتكفينها مرة أخري أم يتم لملمة الجثمان ودفنه ولا داعي للتلتلة من جديد؟
المهم رجع صاحب السيارة وتنفست الصعداء علي سلامة الجثمان وجلست مواصلا مهمتي في الحراسة وبعد شوية جات قافلة من الكلاب يتقدمها ك ل ب تربي يعني متربي في الترب .. وعديل كمان علي الجثمان المسجي والجماعة مشغولين في تحضير المقبرة فكررت الصياح مرة اخري " جر .. جر .. جر!" ورفضت قافلة الكلاب التقهقر بعيدا عن الجثمان مع يرتين تلاتة اليرة تعني زئير الكلاب! فصحت في مجموعة الدافنين:
يا جماعة تعالوا شيلوا جنازتكم دي قبل الكلاب دي تنهشها وقد كان جرت قافلة الكلاب بعيدا وقلت في سري " والله حكاية جابت ليها كمان حراسة جنائز"!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عمر الفاروق عبد الله الشيخ
فيس بوك
تويتر
انستقرام
يوتيوب
بنتيريست