|
|
 الأستاذمحمودمحمدطه يتحدث عن الكورة والهلال والمريخ
|
قال الأستاذ محمود محمد طه في معني ما قال عن الكورة....
نبينا المعصوم( عليه أفضل الصلاة والسلام) في الإسراء والمعراج، لما توحد وصار وحدة مكانية في وحدة زمانية في وحدة ذاتيه! شاهد من لايحويه الزمان ولا المكان... صار مستغرق.
هسه عندكم زي الكورة لمان تكون الفرق الللاعبة كبيرة زي الهلال والمريخ والمنافسة قوية واللاعبين يبدعوا. إنت بتكون مشدود للمشهد القدامك، بصورة إنك تكون مستغرق، لو قرصتك نملة ما بتشعر بيها، الشوط يكون مرات ساعة وزيادة، إنت ما بتكون شاعر بالزمن، وممكن يمر عليك وكأنو دقيقة واحدة..
أو مثلاً فيلم سينمائي، جيد.. برضو بتكون مشدود بنفس الصورة.
.............
معروف عند السالكين في المسارات المختلفة... الشهود الأسمائي، والشهود الذاتي، وتحقيق هذه الدرجات الكبيرة عند العارفين والأولياء بصورة من الصور، وحظهم منها.. وحظ تحقيقهم فيها.
.............
مرة ذكر أحد تلاميذ الأستاذ محمود حديث عن الكورة أمام الأستاذ وتحدث عن لاعب معين جيد جداً مبدع في المريخ، وأن هذا اللاعب لو ما قيدوهو بلاعب معين من الهلال، عشان يحجم حركتو في الميدان، لكان أبدع ووراهم فنون اللعب..
فتعجب الأستاذ محمود من حدود النصر الضيق على حساب الأخلاق وقال ليه كدة؟ مفروض يخلوهو يبدع ويوري الناس ملكاتو الكروية.. لزيادة رصيدو من الفن الكروي.. حتى ولو أدي لغلبة خصمه المنافس.. كونو يخصصوا ليهو لاعب معين بس يوقف قصادو ويراغب تحركاتو في الميدان.. ويكسرو حتى، دي موش أخلاق.. بعدين اللاعب الخصصوهو دا عشان يقيف قصادو، دي برضو تحجيم لحرية هذا اللاعب المعين.. وتدخل في حريتو الشخصية في اللعب..
.............
مرة سأله أحد الصحفيين
أستاذ محمود تعرف أيه عن ( أمين زكي؟)
قال لا أعرف عنه ما يكفي..
...........
هو يعرف عنو إنه لاعب ممتاز وملأ السمع والبصر.. ولكن الشئ الذي لايعرفه الأستاذ مائة في المائة لايتحدث عنه.. ويقول: ( الشخص العارف.. دايماً حديثو أقل من تحقيقو.. هو أكبر.. هنالك أشياء لايتحدث فيها العارف.. وهنالك أسرار إلهية كبيرة جداً لايتحدث فيها العارف) تظهر في زمنها المناسب..
.................
مرة واحد صديق شخصي للأستاذ محمود ومهندس..
قال ليهو يا أستاذ محمود أمس حضرت كورة في نادي المريخ.. أتقول الشعب السوداني كلو في الأستاد..
ناس جو للمباراه من مدني وعطبرة بكميات كبيرة خرافية؟
لكن يا أستاذ محمود. عايز أقول ليك حاجة؟
يمر وقت الظهر والعصر، والمغرب. والناس دي قاعدة مكانا ما بتصلي؟ دا موش حرام؟هذه الكورة وكثرة الملاعب لهت الناس؟
ضحك الأستاذ وقال له
صحيح التفريط في مواعيد الصلاة محاسب عليه الإنسان..
لكن ما بتفتكر إنو الكورة عندها فضل!
أخرجت عدد كبير من الشعب السوداني من( الأنادي) الى ( النوادي)
موش تفتكر دي حسنة ونقلة نوعية وكمية؟
شوية شوية الحكاية
....
بعدين يجى الإجتهاد، في الناس المجودين في الصلاة وهم حاضرين في الأستاد للكورة ممكن يكون جايبين مصلايتهم معاهم يصلوا قبلهم.. أو يخرجوا ويمرقوا يصلوا بعدين يدخلوا وكدة؟
....................
تعليق
ياترى شباب الزمن دا وبناتو بيكونوا عارفين الفرق بين( الأنادي) و( النوادي)
|
|
 
|
|
|
|
منصوري
مامون أحمد إبراهيم
معتز عبدالله
فيس بوك
تويتر
انستقرام
يوتيوب
بنتيريست