|
|
 حكاية بِت سافرت امريكا بموضوع زواج وهمي ...
|
أحوال المعيشة في سودان الأمس كانت أحسن حالاً من سودان اليوم، رغم إنها كانت
تعد صعبة بمقاييس ذلك الزمان. بدآية الإنقاذ كانت بدآية التدحرج نحو الهاوية. صاحب
تردي الأوضاع في تلك الفترة طفرة في عالم التكنلوجيا خاصةً في مجال الإتصالآت،
وظهرت محلآت الإتصالآت كمصدر دخل لتنتشر في جميع أنحاء البلد.
|
|
 
|
|
|
|
|
|
|
 Re: حكاية بِت سافرت امريكا بموضوع زواج وهمي ... (Re: معاوية المدير)
|
الجامعات كانت بمثابة فقاسات بيض تخرج بالكميات إلي الشوارع. كمية من العطالة لا يُستهان بها.
حمَلة شهادات جامعية إستوعبتهم الرقشات والأمجادات، والمِهن الهامشة كمساعدين بصات، وسواقين
حافلآت، وقس علي ذلك.
حسن فلنكة ضرب بشهاداته القِبل الأربعة ولم يرجع حتي بخفي حنين. بعد أن يإس من الوظيفة إستهوته
حكاية التجارة في الإتصالآت، وراح يعمل بإجتهاد حتي تمكن من فتح محل صغير للإتصالآت. سوق
الإتصالآت كان في إنتعاش في تلك الفترة السبب الذي جعل فلنكة في فترة وجيّزة يزوّد محله بجهاز
كمبيوتر حيث كانت اجهزة الكمبيوتر عزيزة في تلك الفترة. لم يقف طموح حسن فلنكة عند هذا الحد،
بل ظلّ متابع لحركة التكنلوجيا حتي تثنى له الدخول إلي عالم الشبكة العنكبوتية.
صاحب تردى الإقتصاد في تلك الفترة موجة الهجرة إلي امريكا الشمالية خاصةً في وسط الشباب، فسرت
حماها فيهم من جميع انحاء العالم حتي صارت طموح لهم، وأصبحت امريكا محط انظارهم وأرض أحلآمهم.
سافر العديد من الشباب السودانيون إلي اميركا، فأصبحت تلفونات فلنكة تحت الطلب
علي الدوام مما حدى به إلي ربطها بالإنتر نت.
| |
|
|
|
|
|
|
|
|
|
Re: حكاية بِت سافرت امريكا بموضوع زواج وهمي ... (Re: معاوية المدير)
|
حصلت مشكلة في جهاز الكمبيوتر، وراح فلنكة يبحث عن اخصائي تصليح.
مسألة تهبش كمبيوتر في ذلك الزمان كانت صعبة ناهيك من ان تكون اخصائي تصليح.
فلنكة في بحثة الدءوب دله صديق علي مكان تصليح في الخرطوم. إمتطى فلنكة أمجاد
وصوّب نحوالخرتوم بصحبة الجهاز. في مكان التصليح إستلمت الجهاز شابة في مُقتبل
العمر وعُنفوان الشباب وقامت باللآزم. سلّمت فلنكة الجهاز بحالة جيّدة شديد ولضيّض،
وهي تبتسم في وجهه. ردّ فلنكة الإبتسامة بتحويصة لا تخلو من إندهاشة، وشكر لها جهدها.
فلنكة: معليش يا أُخت، اصل أنا عندي محل بتاع إتصالآت وأحياناً بتواجهني مشاكل في جهاز
الكمبيوتر. ممكن رقم تلفونك إن كيّس لو حصل عُطُل وإحتجت لخِدماتِك.
هاجر: جداً يا اخي... دا رقم تلفوني وأنا إسمي هاجر، إتفضّل إتصل في ايّ وكِت.
فلنكة: شكراً ليكي... إتفضلي دا رقم تلفوني، وأنا إسمي حسن فلنكة.
هاجر، وهي تبتسم إبتسامة خفيفة: شكراً ليك.
أصبح فلنكة كلما واجهته مشكلة يهاجر عبر أسلآك التلفون إلي هاجر، حتي تأصلت بينهم
صدآقة عرف فلنكة من خلآلها أنّ هاجر أحد الخرجيين الذين لفظتهم الجامعات للشارع،
وهي تشتغل في المحل مؤقتاً لحين الحصول علي شغل في مجالها. عرف ايضاً أنّ ظروف
أهلها صعبة وأنها زولة حربيّة وتفتيحة تكافح وتناضل من أجل توفير لقمة العيش الحلآل لهم.
حسن فلنكة كان مُعجب جداً بتعاملها الراقي وطموحاتها البعيدة المدى، وفدائيتها في الإقتحام.
رآقت فكرة محل الإتصالآت لهاجر، فستشارت فلنكة في الأمر. فلنكة ما قصّر وبشهامة اولآد
البلد وقف معاها. إستدانت هاجر مبلغ من المال، ثُمّ وبمساعدة فلنكة إستطاعت أن تفتح محل
إتصالآت لِتتوسع العلآقة بين هاجر وفلنكة وتصبح تبادل منافع تجارية.
| |
|
|
|
|
|
|
|
|
|
Re: حكاية بِت سافرت امريكا بموضوع زواج وهمي ... (Re: معاوية المدير)
|
لآحظ فلنكة الرغبة المُلحة من الشباب في الهجرة إلي بلآد العم سآم.
إستطاع فلنة أن يتحصل علي معلومات بخصوص هذا الشأن، وعرف
أنّ التقديم يتم عن طريق (اللوتري). عن طريق الإنتر نت عرف فلنكة
طريقة التقديم، ومواعيد التقديم ثُمّ أضاف اللوتري لتجارة إتصالآته.
قدّم حسن فلنكة لمجموعة من الناس وقع لبعضهم اللوتري وسافروا لأمريكا.
بعدها تجارة التقديم للوتري أصبحت وآآآرة مع فلنكة.
دآر الحديث التالي بين خريجين عطالة علي قارعة الملل.
البلعوطي: يا صديق بنج يا اخي ما نشوف حكاية أمريكا دي، قرفنا من قعدة الضللة يا عمّك.
صديق بنج: يا عمّك قال ليك في فكي في الحاج يوسف كهربتو وآصلة، ضربة وآحدة يخلي
ليك بلكاتك في السما. والله صحي. يا عمّك نجرب، هو زآتو البنج بقى عدم اليومين ديل.
بلعوطي: يا حبيب فكي شنو؟؟؟ قالوا في وآحد اسمو حسن فلنكة بيقدم للناس فلنكتو
حطبا تش، مُوبااالغة. يا راجل فلنكة دا قاليك زي وليم تيل رميتو اصلو ما بتجلي. والله صحي.
بنج: كدا في السلك يا عبد، والموضوع إتحلآ... نقدم عن طريق فلنكة ونديها جكّة بفكي الضي.
بلعوطي: لكن يا عمّك لو ضربت، الحكاية دي ما بتحتاج كنجالآت.
بنج: يا عمّك خليها علي ربّك بيحلها. ما طوالي بنكون قاعدين راسنا دآقي جرس،
وفجأة نضرب بنج من حيث لا نحتسب. ارح نمشي لعمّك الضي، خير البِر عاجله...
| |
|
|
|
|
|
|
|
|
|
Re: حكاية بِت سافرت امريكا بموضوع زواج وهمي ... (Re: معاوية المدير)
|
صديق بنج: سلآمات يا حاج الضي.
حاج الضي: اهلاً... مرهبا وِلآدي...اقُوُدُا.
بنج: يا حاج الضي جايينك في غرد.
حاج الضي: نقضاهو ليكم طب، وِلآدي...اقُوُدُوا.
بنج: يا حاج دايرين نمشي امريكا.
حاج الضي: نوديكو طب...ناس كُطااااار وديناهم يا وِلآدي... اقُوُدُوا.
بنج: يديك العافية يا حاج...أمسك دا البياض.
حاج الضي:كتّر خيرك يا ولدي... بس بااادين لُومان تااادو بغادي ما تنسونا من الدورارات...
أمسك يا ولدي، دي سبأأ طمرات، تاكل كل يوم هبة مأأ الريق لمُدة خمسة ايام. أيييي، خمسة
ايام، بأأد دآك تروه المقابلة... اسمأ ولدي، وِكتين ينطوك الإذِن طوالي تاكل الهبتين الفضلو فِشآن تسبِت الإذن قوي.,,
صديق بنج: كتّر خيّرك يا حاج الضي.
حاج الضي: شكراَ وِلآدي بي تروهو طب وِلآدي... ما تقُوُدووو...
بنج: شكراً يا حاج.
البلعوطي: يا فردة عمّك دا ملو شابكنا اقُوُدوو، اقُوُدووو، قايل نفسو طبيب اسنان، واللآ شنو؟؟؟
بنج: يا بلعوطي أسكت يا اخ، الزول دا ما يسمعك...
| |
|
|
|
|
|
|
|
|
|
Re: حكاية بِت سافرت امريكا بموضوع زواج وهمي ... (Re: عمر موسي منجي)
|
صديق بنج: السلآم عليكم يا شباب.
ــ: وعليكم السلآم.
بنج: يا شباب بسأل من وآحد إسمو حسن خشبة هنا.
ــ: حسن خشبة؟؟؟!!! والله يا اخي حسن خشبة دا ما بنعرفو.
بنج: الزول دا عندو محل إتصالآت هنا، وبيقدم لأمريكا.
ــ: قصدك حسن فلنكة.
بنج: بسسس، ياهو زآتو.
ــ: يا عمّك فلنكة ما فورمايكا... شايف كشك العصير الهنآآآآك دآآآك...
الدكان اللِصقو طوالي دا دُكان الخشب زآآآتو...
بنج: شكراً.
...
بنج: السلآم عليكم.
حسن فلنكة: وعليكم السلآم.
بنج: يا اخي دآير حسن فلنكة.
فلنكة: ايوا أنا فلنكة... ايّ خِدمة؟؟؟
بنج: يا اخي دايرين نقدم لأمريكا، لو في طريقة.
فلنكة: جداً. جيب لي صورتين ومعلوماتك.
بنج: بس!!!؟
فلنكة: ايوا...تدفع رسوم التقديم، ولو كنت من المحظوظين بعدين نتحاسب.
بنج: جداً يا حبيب، ما عندك تعطيل.
| |
|
|
|
|
|
|
|
|
|
Re: حكاية بِت سافرت امريكا بموضوع زواج وهمي ... (Re: معاوية المدير)
|
بلعوطي: يا بنج ما في خبر من فلنكة.
بنج: ابداً والله.
بلعوطي: غايتو لو ظبطت، إلا نعمل ليك كشف يا فردة.
بنج: يا اخي خليها تظبط كان نتفكا من العذاب دا... دا منو العارض دا كمان... الو مرحبا.
ــ: السلآم عليكم... ممكن اكلم صديق بنج؟؟؟
بنج: ايوا معاك بنج.
ــ: يا زول ألف مبروك... خلآس فتحت معاك.
بنج: الله يبارك فيك... الفتحت دي كِرتِلة واللآ شنو؟؟؟... إنت منو يا حبيب؟؟؟
ــ: يا صديق أنا حسن فلنكة، ووقع ليك اللوتري.
بنج: يا زول إنت جادي !!!؟؟؟
فلنكة: والله صحي... الموآفقة ياها دي قدآمي، تعال بسرعة.
بنج: يا سلآلآلآلآم يا فلنكة، الوآحد ما عارف يشكرك كيف؟؟؟ أنا في الطريق، هسّع بجيك.
فلنكة: أوكي... في إنتظارك.
بلعوطي: ألف مبروك يا فردة، بس بعدين ما تنسى أخوك.
بنج: يا عمّك دي يحلوها كيف؟؟؟. إنت عارف أخوك سخانتو دآقة ألِف.
بلعوطي: يا فردة بتتباصر. ارح نمشي للزول دا.
| |
|
|
|
|
|
|
|
|
|
Re: حكاية بِت سافرت امريكا بموضوع زواج وهمي ... (Re: معاوية المدير)
|
وقع اللوتري لصديق بنج وهو خاوي علي عروشه. مفلّس عدمان المِليّنة، والمسألة
فيها حق تزاكر، وحق اتعاب فلنكة، ومصاريف سفر وغيرها. أصبح صديق علي
إتصال دائم مع فلنكة في محاولة لإيجاد طريقة للسفر. كانت هاجر احد الذين
قدموا للوتري لكن لم يحالفها الحظ، فإقترح فلنكة علي صديق بنج أن يتزوجها زواج وهمي.
بنج: يا فلنكة يا اخي هسع دي يحلوها كيف؟؟؟ أخوك سخانتو تلحم.
فلنكة: أسمع... في بِت انا بعرفا عندها رغبة شديدة جداً تمشي امريكا،
وانا ممكن اقنعا تدبر ليك المصاريف لو إنت إتزوجتها زواج وهمي.
بنج: يا اخي أنا ما عندي مانع لو هي وآفقت. المهم اشتت من البلد دي.
فلنكة يرفع سماعة التلفون: الو... هاجر.
هاجر: أهلاً بيك يا حسن.
فلنكة: أسمعي... عندي ليك خبر.
هاجر: خبر شنو!؟؟؟
فلنكة: عندي وآحد صاحبي وقع ليهو اللوتري، وما عندو مصاريف السفر،
وهو مستعد يتزوجك زواج وهمي وتمشو السفارة، لو ادوكِ تأشيرة تدفعي
ليهو حق التزاكر والمصاريف وتسافرو مع بعض.
هاجر: خلآس يا حسن، بس كدي اديني فُرصة أفكر في الموضوع.
| |
|
|
|
|
|
|
|
|
|
Re: حكاية بِت سافرت امريكا بموضوع زواج وهمي ... (Re: معاوية المدير)
|
إتصلت هاجر علي فلنكة وأبدت موافقتها. أصبح هنالك إتصال بين صديق بنج وهاجر،
وإستطاعوا أن يستخرجوا قسيمة زواج. قبل الذهاب للسفارة صديق بنج اصرّ علي هاجر
لآزم يسجلوا زيارة لشيخ الضي. إستلموا التمرات وعملت هاجر بوصية حاج الضي.
ببركة تمرات حاج الضي حسب إعتقاد بنج منحت السفارة تأشيرة لهاجر.
قامت هاجر ببيع المحل لزوم تدبير السفر.
هاجر: لكن يا ناهد أنا ما بقدر أسافر بالطريقة دي. الناس يقولوا علي شنو؟؟؟
ناهد: أها طيّب عايزة تسافري كيف؟؟؟
هاجر: لا... عشان أسافر الناس لآزم يعرفو رسمي إني متزوجة. يعني زوآج بإشهار.
يا اختي الناس يقولوا علي شنو، كان سافرت سااااكت كدي؟؟؟
امال: خلآس، اعملي إشهار للزواج.
هاجر: يلآ... دي اعملآ كيف؟؟؟ إنت عارفة ما ممكن اعملآ عن طريق صديق.
امال: يا زولة ولآ صديق، ولآ بنج.
ناهد: يلآ يا امال ورينا الحل يا شاطرة.
امال: شاطرة ونُص وخمسة... شوفي يا زولة تتصلي علي حسن فلنكة، وتوريهو
إنّك إتعرفت علي وآحد في امريكا عن طريق النت، وإتقدم ليكي ووافقتِ
وراح يعملوا العقد طوالي عشان تسافري مع بنج.
ناهد: طيّب العقد دا ما لآزم يكون فيهو أهل عريس وكدا.
امال: يلآ... نقوم عن طريق صديق بنج نأجر مجموعة من الخريجين
الماليين البلد دي يعملوا فيها أهل العريس.هاجر: فكرتك دي كويسة بس صعبة شوية.
امال: يا اختي ولآ صعبة، ولآ حاجة. إتصلي علي فلنكة فهميهو إنّك إتقدم ليكي وآحد
من امريكا عرفتيهو عن طريق النت، وخلي بنج يشوف لينا شلة الخريجين، وحقهم مدفوع.
| |
|
|
|
|
|
|
|
|
|
Re: حكاية بِت سافرت امريكا بموضوع زواج وهمي ... (Re: معاوية المدير)
|
هاجر: ياسلآلآلآم يا حسن. يا اخي ما تتخيل الإمور إتسهلت كيف؟؟؟. تصدق إتعرفت علي
وآحد عن طريق النت في امريكا. قلت يمكن يساعدني لمان أمشي هناك وفضلت علي إتصال
معاهو. يلآ، قام رسّل أهلو يتعرفو علي اهلي. بعد حصلت المعرفة صارحني وإتقدم لي
رسمي، وبعد العقد حا اسافر مع بنج.
فلنكة: ألف مبروك يا هاجر. والله عشان إنت بت حلآل أهو ربنا سهلآ عليكِ، والفنان علي انا.
هاجر: ههههه، فنان شنو يا حسن؟؟؟
فلنكة: لا... الحفلة دي ما لآزم. يا زولة والله نعمل ليكِ ربّة ما حصلت. هو إنت هيّنة واللآ لينة؟؟؟
هاجر: يا زول خير... عن إزنك يا حسن، معاي خط تاني.
جداً، بس عليك الله وريني المواعيد لمان تحددو.
هاجر: جداً يا حسن، الله معاك... ألو معاي منو؟؟؟
بنج: أيوا يا هاجر...أنا صديق بنج.
هاجر: اها، عملتو شنو؟؟؟
بنج: الجماعة جاهزين، بس إنتو تحددو.
| |
|
|
|
|
|
|
|
|
|
Re: حكاية بِت سافرت امريكا بموضوع زواج وهمي ... (Re: معاوية المدير)
|
بنج: يا اب طربوش أهو دا مكان المناسبة، وصلنا.
اب طربوش: ديشااااك، يا ابو الشباب ديل عاملين صيوان عديييل كدا!!!
بنج: يا جماعة ظبطو الموضوع كويس. ما عايزين ايّ ربكة.
طُصآبة: يا زول ما تخاف، نحن أهل العريس بنجضما ليك تب. بس الكنجالآت أهمّ شي.
بنج: الكنجالآت أهي في جيبي، ما تخاف.
طُصابة: يا حاج حامد ظبّط العِمّة كويس، ما تنسى إنّك أبو العريس.
حاج حامد: أبو العريس واللآ أبو القدح؟؟؟ إنت صدقت يا حبة!!!؟.
حسن فلنكة: أهلاً، أهلاً يا جماعة إتفضلوا.
بنج: يا ابو الحُسن، كيف؟؟؟ أنا جيت مع أهل العريس. طبعاً الراجل حايكون فردة هناك، وكدا.
فلنكة: بنتنا دي أوعكم تقصروا معاها.
بنج: يا راجل دي بين العين والرموش. والله صحي.
الهبوب هامساً في أُذن طُصابة: أسمع يا مان، الزول القاعد جنب الصبارة دآآآك بيعرفني،
فأحسن إتحارج. يا اخي دا أبو العكلتة زاتا، وبيعمل شخشخة في الفلم لو كحلني.
طُصابة: يا راجل!!!
الهبوب: والله صحي. يا طصة دا لوكحلني معاناتا أكلنا نيم.
طُصابة: كان كدا إتخارج يا هبة. ما تنسى تودي لمحمود العِمّة والجلآبية بتاعاتو،
وحضِر المعلوم. نحن بنعقد للزول الوهم دا ونجي طوالي.
حاج الزين: يا جماعة إتفضلوا. وينو المازون؟؟؟
حاج الطاهر: المازون تراهو دا، جاهز.
حاج الزين: يلآ يا شيخنا، كُلو تمام أبدأ.
المازون: الفآآآتحة.
الجماعة: مبروك، مبروك، مبروك. وإنطلقت زغاريد النساء في ارجاء الحِلّة..
نسمات الشتاء تدآعب خصلآت شعر العروس وهي جالسة في الكوشة،
وحسن فلنكة قابض جو الحفلة وآخر بهرجة.
كلّ الإمور عدت بسلآم والمراسم كانت قمة في التنظيم، والحفلة كانت في السلك.
| |
|
|
|
|
|
|
|
|
|
Re: حكاية بِت سافرت امريكا بموضوع زواج وهمي ... (Re: معاوية المدير)
|
بعد ان ودعهم فلنكة وأهل العروس إعتلى سلم الطائرة صديق بنج وهاجر، وبعد رِحلة
طويلة بين طيات السحاب هبطت الطائرة في مطار جون إف كندي بمقاطعة كوينز في
المدينة الصاخبة نيويورك. تحققت الأحلآم لتبتلع المدينة الهائجة المائجة صديق بنج وهاجر.
شقت هاجر طريقها في غابة نيويورك تحمل بين طيات نفسها طموحاتها وأمالها، وراحت
تزاحم الملآيين بعزيمتها التي لا تلين. إستطاعت هاجر أن تتأقلم مع البيئة الجديدة الغريبة
عليها، وتعرفت علي بعض الأُسر السودانية في نيويورك. إحتضنتها تلك الأُسر، فأصبحت
تقضي جُلّ وقتها في العمل وتستقل وقت فراغها في زيارة الأُسر السودانية.
هاجر بشخصيتها القوية وادبها الجم، وروحها المرحة إستطاعت أن تخلق
لنفسها وضع محترم في وسط السودانيين، فأحبها الجميع.
| |
|
|
|
|
|
|
|
|
|
Re: حكاية بِت سافرت امريكا بموضوع زواج وهمي ... (Re: معاوية المدير)
|
نادر: يا عواطف البت الكانت معاكم قبل يومين دي من وين؟؟؟
عواطف: البِت ياتا يا نادر؟؟؟
نادر: البِت الكانت بتتونس مع شادية في البلكونة.
عواطف: قصدك هاجر؟؟؟
نادر: هي إسمها هاجر؟؟؟ ياها زاتا.
عواطف: يا نادر دي اريتا بِتي، ادب، واخلآق، وزوق. بِت!!!
بس نقول الكمال لله. إلآ إنت بتسأل منها ليه؟؟؟
نادر: بصرآحة كدا، البِت دي عجبتني، ولو وآفقت طوالي بتزوجا.
عواطف: خلآس يا نادر، خليني انا إتكلم ليك معاها...
غايتو كان وآفقت، تكون أُمّك دآعية ليك.
| |
|
|
|
|
|
|
|
|
|
Re: حكاية بِت سافرت امريكا بموضوع زواج وهمي ... (Re: معاوية المدير)
|
أخي / معاوية ... سلام ..
ماقلته أعلاه .. حقيقي 100% .. وأنا شاهد على قصة بإختلاف بسيييط في التفاصيل لكن نفس الموضوع ونفس النهايات وشيء من البدايات ...
أفترقا بعد أسبوعين من دخولهما الولايات المتحدة .. وذهب كل منهما في إتجاه ... وبعد حوالي عامين أرسلت له للطلاق .. وقد كان ...
ومنذ فراقهما بعد الأسبوعين الأولين والى الآن لم يقابلها ولو صدفة ... أو حتى يسمع بها ...
___
الغريب ( وحسب كلامه) أنه لتأكيد موضوع الزواج ... طلب منه (الذين نظموا أمر الزواج الوهمي ) أن يأتي اليوم التالي للأستديو لعمل صور الزواج لدعم الوضوع في مقابلة السفارة ...
وقد كان (وكان ذلك أول يوم يراها فيه ) ... أقول... الغريب ... أنها كانت بأنتظاره في الأستديو ... عروس كاملة الدسم ... بفستان زفاف وحنة ... وأهل يزغردون ...وصديقات ووصيفات حولها حتى شك في أنه قد دخل الى أستويو آخر ...
ثم كانت نعم السائق والممول لكل متطلبات التأشيرة ... من مشاوير الكشف الطبي والسجل والخدمة الإلزامية (له) مع الدفع الفوري لكل ذلك ...
وحتى تذاكر الطيران بالأثيوبية ... وقد كان .
__
..
| |
|
|
|
|
|
|
|
|
 Re: حكاية بِت سافرت امريكا بموضوع زواج وهمي ... (Re: معاوية المدير)
|
Quote:
شكراً جزيلاً ود المدير على القصة الرائعة بمواقفها الطريفة ومفارقاتها.
ولفائدة عموم من يسافر وقد يقع في مثل هذا المطلب اسألك : هل قامت هاجر بالتطلق من
العقد الأول قبل أن تدخل في العقد الثاني ؟ وكيف تتصرف قانوناً في أمريكا أو في
غيرها تجاه هذه المسألة. |
سلآمات يا هاني.
الإجابة علي هذا السؤال متروكة للقارئ. لكن ممكن أقول ليك، الفكرة في إنو ايّ شي
ممكن يتم في وضع البلد الراهن. يعني الزواج وهمي، والقسيمة مُستخرجة من مأذون
شرعي، ودا مُمكن يحصل حقيقة كما ذكر الأخ حاتم يوسف إنو في قصة حقيقية مماثلة
حصلت، وقطعاً كان فيها قسيمة زواج.
مؤسف جداً أن تصل البلد إلي هذا الوضع.
مشكور علي التداخل يا هاني.
مودتي...
| |
|
|
|
|
|
|
|
|
|
Re: حكاية بِت سافرت امريكا بموضوع زواج وهمي ... (Re: معاوية المدير)
|
Quote: صديق بنج: سلآمات يا حاج الضي.
حاج الضي: اهلاً... مرهبا وِلآدي...اقُوُدُا.
بنج: يا حاج الضي جايينك في غرد.
حاج الضي: نقضاهو ليكم طب، وِلآدي...اقُوُدُوا.
بنج: يا حاج دايرين نمشي امريكا.
حاج الضي: نوديكو طب...ناس كُطااااار وديناهم يا وِلآدي... اقُوُدُوا.
بنج: يديك العافية يا حاج...أمسك دا البياض.
حاج الضي:كتّر خيرك يا ولدي... بس بااادين لُومان تااادو بغادي ما تنسونا من الدورارات...
أمسك يا ولدي، دي سبأأ طمرات، تاكل كل يوم هبة مأأ الريق لمُدة خمسة ايام. أيييي، خمسة
ايام، بأأد دآك تروه المقابلة... اسمأ ولدي، وِكتين ينطوك الإذِن طوالي تاكل الهبتين الفضلو فِشآن تسبِت الإذن قوي.,,
صديق بنج: كتّر خيّرك يا حاج الضي.
حاج الضي: شكراَ وِلآدي بي تروهو طب وِلآدي... ما تقُوُدووو...
بنج: شكراً يا حاج.
البلعوطي: يا فردة عمّك دا ملو شابكنا اقُوُدوو، اقُوُدووو، قايل نفسو طبيب اسنان، واللآ شنو؟؟؟
بنج: يا بلعوطي أسكت يا اخ، الزول دا ما يسمعك... |
يا دفعة غايتو البقرأ الكلام دا بقول حاج الضي دا ود عمكـ
والله صحي
ســرد جميل ورائع يا دفعة والله صحي
أنت وقت بتعرف قدر دا ياخ!
المقعدك مع الوهم ديل شنو ............ والله صحي
| |
|
|
|
|
|
|
|
|
Re: حكاية بِت سافرت امريكا بموضوع زواج وهمي ... (Re: Shaker Hamid)
|
Quote: معاوية ود المدير سلامات ،،،
سرد جميل والله وقصة يمكن تكون حدثت آلاف المرات وفي كل المهاجر ( أنا شاهد على ماساة من هذا النوع )
وياعمي هاني القصة دي كلها ماشة على مداخلتك دي وأظنها ال Plot ،،،،حقة القصة ،،،كان تتأخر شوية ،،،
تحياتي ،،،،،، |
سلآمان يا عمر.
إنت ولد الفنان مصطفى مضوي؟؟؟
غريبة يا عمر !!! هسّع عندنا إتنين أثبتوا إنو القصة دي حصلت
في المجتمع السوداني.
حبكة القصة في إنو المجتمع السوداني أصبحت تحصل فيه أشياء
تعتبر مستحيلآت، لكن فجأتوني بأنّ مثل هذه القصة تحدث حقيقة
في المجتمع!!!
| |
|
|
|
|
|
|
|
|
|
Re: حكاية بِت سافرت امريكا بموضوع زواج وهمي ... (Re: Hani Arabi Mohamed)
|
Quote: أجمل ما في سيناريو الحكاية اسماء الشخوص ولغتهم والدلالات الرمزية للجهات ..
غايتو طصابه دا الليلنا..
الحبكة مشوقة وواقعية ..
لو طولّت نفسك ممكن تطلّع منها مسرحية أو مسلسل كارب.
شكرا ود المدير . |
محمد طه يا ملك،
سلآمات.
الليلكم دا ما تقول لي طُصابة ملك الغابة.
يا زول إنت من حِلة الصنفور واللآ من التمرجية؟؟؟
يا اخي طولة النفس دي الله يقدرنا عليها، أخوك المداخلآت دي
ياااا الله يرد عليها.
مشكور يا ملك...
| |
|
|
|
|
|
|
|
|
|
Re: حكاية بِت سافرت امريكا بموضوع زواج وهمي ... (Re: معاوية المدير)
|
ومن الحوداث الطريفة المبكية
ان احد المعارف طلبت منه السفارة الامريكية ان يثبت ما يؤكد زواجه من ذات الحسناء التي وقع عليها اللوتري
فما كان من صاحبنا الا الترتيب باقامة حفل زواج كارب مصور بالفيدو والصور وقد كان
وتمت الزيجة بالرغم من ان العريس لم يكن ميسور الحال ولكن شاءت الاقدار ان يكمل نصف دينه بهذه الطريقة
ولكنه سقط في الانترفيو (الاختبار الشفهي) بالسفارة لانه لا يعرف اللعغة الانكليزية
وبالرغم من ان صاحبة اللوتري خريجة جامعية وانها تعرف القدر اليسير من هذه اللغة
وحكاية طلب السفارة الامريكية بالاتيان بالاثبات المصور بالفيديو ربما لا يحدث الا في السودان
الا انها رؤية صحيحة كي يتم استئجار زوج وشهود واقامة حفل كارب كالتي حدثت لهاجر
| |
|
|
|
|
|
|
|
|
|
Re: حكاية بِت سافرت امريكا بموضوع زواج وهمي ... (Re: Zomrawi Alweli)
|
سلآم وتحايا للمرور وأصحاب المداخلآت.
حبيت من خلآل القصة أقول إنو السودان في الظرف الذي يمر به
الأن أصبح بلد العجائب ويمكن أن تحدث فيه قصص تفوق الخيال،
وما القصة إلا مثال للقصص التي لا يمكن أن يتصورها إنسان،
وهي فوق الخيال، فيا للعجب!!!.
أكتر من قصة شبيهة وردت في المداخلآت، وأكثر من قصة شبيه
وصلتني عن طريق التلفونات!!!؟.
يعني الوآحد تاني ما يهزر واللآ شنو؟؟؟
| |
|
|
|
|
|
|
|
|
|
Re: حكاية بِت سافرت امريكا بموضوع زواج وهمي ... (Re: معاوية المدير)
|
Quote:
الغريب ( وحسب كلامه) أنه لتأكيد موضوع الزواج ... طلب منه (الذين نظموا أمر الزواج الوهمي )
أن يأتي اليوم التالي للأستديو لعمل صور الزواج لدعم الوضوع في مقابلة السفارة ...
وقد كان (وكان ذلك أول يوم يراها فيه ) ... أقول... الغريب ... أنها كانت بأنتظاره في الأستديو ...
عروس كاملة الدسم ... بفستان زفاف وحنة ... وأهل يزغردون ...وصديقات ووصيفات حولها
حتى شك في أنه قد دخل الى أستويو آخر ... |
سلآمات يا حاتم.
يا اخي والله حيرتونا!!!
تصدق وآحد حكى لي بالتلفون إنو عرسان من نفس
النوعية دي حفلتم كانت في نادي عدييييل كدا!!!،
فتأمل... يا قول ملآسي...
| |
|
|
|
|
|
|
|
|
|
Re: حكاية بِت سافرت امريكا بموضوع زواج وهمي ... (Re: معاوية المدير)
|
Quote: يا مدير فعلا انت مدير
القصة جميلة وراقية
وبالرغم من ملكتنا كسودانيين في التفكير بمثل هذا الماثل امامنا الا انه عند تحويلها
الى قصة سينمائية تتحول الى هبالة من الممثلين وتفقد القصة رونقها وبساطتها
وتصبح كجناح الجراد |
سلآمات يا زمراوي.
كدي ما بتقدر ترشح لينا بعض الممثلين.
إعتقد عندنا ناس باررعين، واللآ رايك شنو؟؟؟
مودتي يا حبوب...
| |
|
|
|
|
|
|
|
|
|
Re: حكاية بِت سافرت امريكا بموضوع زواج وهمي ... (Re: معاوية المدير)
|
الاستاذ معاوية المدير تحياتى وحكايتك مشوقة وواقعية
بس شنو حكاية ان مثل هذه الوقائع ارتبط حدوثها في السودان بوضعه الراهن ؟ !!
نعرف ان السودانيين تواقون اللهجرة منذ قرن او اك
ونعرف ان السودانيين مثلهم مثل كل شعوب الكرة الارضية يسلكون كل السبل لبلوغ غاياتهم
وفى اخر الثمانينات كانت قيادات التجمع الديمقراطى تدقس المجتمع المدني العالمى لتذليل العقبات
امام السودانيين الراغبين في الفرار من جحيم الحكومة الاسلامية وكانت الفيزات المنهمرة علي دكاكين
الهجرة في القاهرة تباع للسماسرة الذين يسوقونها لاي متسكع فى ميدان العتبة من ذوى البشرة السوداء.
| |
|
|
|
|
|
|
|
|
|
Re: حكاية بِت سافرت امريكا بموضوع زواج وهمي ... (Re: الجالية السودانية بإدمنتون)
|
والله تابعت بامعان ففي القصة المتعة وكثير من العبر التي يجب ان يصطحبها الكثيرون والكثيرات في مسيرة حياتهم
الاسماء عجبتني لدرجة انني اطلقتها على بعض اصدقائي ,,,
عندي قصة برضو في حكاية الوهم الامريكي دي ....
قريبتي جدا كان لها اخ من ابوها وكانت هي وحيدة امها وقد توفي ابوهم واصبحت عاله على اخيها ففكر ان يزوجها برجل من اصدقائه من امريكا ..فرحنا كثيرا لها فقد عانت الكثير وبالفعل تم كل جميل من برتكولات الزواج بعد التواصل الاسفير والصور الجميلة وسافرت قريبتي بعد ان اوصلناها المطار وهناك كانت المفاجاة حسب ما روت لي وكانت صديقتي بان الذي قابلها رجلا كهلا عجوزا يضع الحناء على يدية والصبغة على راسه وجاء متهلهلا كما وصفته وظنت هي انه والد زوجها ولكنها لم تساله واخذها الى بيتها الجميل الفخم لتكتشف خدعة الصور التي كانت منذ شبابة اي قبل عشرين سنة
روت لي انها لم ترى منه غير الاحترام والنوم فقط (والشخير وغمرها لمدة ثلاث شهور بالتسوق والشراء لدرجة الطخمة ولكن ثم ماذا تساءلت كثيرا ومن ثم فكرت بالرجوع والطلاق دون ان تاخد شيئا منه
كانت محترمة معه وحتى بعد طلاقه ولكنها ظلت حبيسة عملها وبيتها ونفسها وقلبها انها عقدة النفس ومازالت سجينة نفسها رغم نجاحها مهنيا ورافضة لفكرة الزواج ...وكان الله في عونها
مني محبتي
| |
|
|
|
|
|
|
|
|
|
Re: حكاية بِت سافرت امريكا بموضوع زواج وهمي ... (Re: الصادق يحيى عبدالله)
|
Quote:
أبدا والله ياود المدير نحن ناس شرق الله البارد / شرق الجزيرة / ناس الهلالية وقصة
مصطفى مضوي فعلا عاملة كانت لكن كان اتشاوفنا كان قلت لي مجازا أنت أخو مصطفى مضوي الفنان ،،،، |
أهلاً بناس الهلآلية في سودانيز اون لآين، وألف
مرحب بيك أخونا عمر.
التحية لك وللفنان المبدع مصطفى مضوي.
أبقى وآصل.
مودتي...
| |
|
|
|
|
|
|
|
|
|
Re: حكاية بِت سافرت امريكا بموضوع زواج وهمي ... (Re: معاوية المدير)
|
Quote: رائعة يا ود المدير...والله خليتنا نعد الايام بالساعات لحدما نشوفك
ونتعرف عليك يوم ٧ في ادمنتون...تلفونى بالبوست ونحن تحت الخدمة....عماد ساتى |
الأخ عماد ساتي التحية لك، ولجالية إدمنتون في شخصك
الحبيب.
حفلتكم يا عماد رغم إنها يوم الجمعة، لكن عشان كلآمك
الفوق دا قول الله يقهر العوارض، وإن شاء الله معاكم.
كتّر خيّرك كتير علي المدآخلة والمرور،
وتوقع مني تلفون إن شاء الله.
تحياتي للجميع بإدمنتون...
| |
|
|
|
|
|
|
|
|
|
Re: حكاية بِت سافرت امريكا بموضوع زواج وهمي ... (Re: ناذر محمد الخليفة)
|
Quote:
والله تابعت بامعان ففي القصة المتعة وكثير من العبر التي يجب ان يصطحبها الكثيرون والكثيرات في مسيرة حياتهم
الاسماء عجبتني لدرجة انني اطلقتها على بعض اصدقائي ,,,
عندي قصة برضو في حكاية الوهم الامريكي دي ....
قريبتي جدا كان لها اخ من ابوها وكانت هي وحيدة امها وقد توفي ابوهم واصبحت عاله على اخيها ففكر ان يزوجها برجل من اصدقائه من امريكا ..فرحنا كثيرا لها فقد عانت الكثير وبالفعل تم كل جميل من برتكولات الزواج بعد التواصل الاسفير والصور الجميلة وسافرت قريبتي بعد ان اوصلناها المطار وهناك كانت المفاجاة حسب ما روت لي وكانت صديقتي بان الذي قابلها رجلا كهلا عجوزا يضع الحناء على يدية والصبغة على راسه وجاء متهلهلا كما وصفته وظنت هي انه والد زوجها ولكنها لم تساله واخذها الى بيتها الجميل الفخم لتكتشف خدعة الصور التي كانت منذ شبابة اي قبل عشرين سنة
روت لي انها لم ترى منه غير الاحترام والنوم فقط (والشخير وغمرها لمدة ثلاث شهور بالتسوق والشراء لدرجة الطخمة ولكن ثم ماذا تساءلت كثيرا ومن ثم فكرت بالرجوع والطلاق دون ان تاخد شيئا منه
كانت محترمة معه وحتى بعد طلاقه ولكنها ظلت حبيسة عملها وبيتها ونفسها وقلبها انها عقدة النفس ومازالت سجينة نفسها رغم نجاحها مهنيا ورافضة لفكرة الزواج ...وكان الله في عونها
مني محبتي |
أختي نعمات،
سلآمات.
نقول إنا لله وإنا إليه رآجعون... مصائب ...
ورد في الحديث: من غشنا ليس منا.
الزواج قسمة ونصيب، وأتمنى أن ترجع تمارس حياتها بطريقة عادية.
الأسماء حركية وبعضها لناس أصحابي، تصدقي.
لك عاطر مودتي،
وعظيم شكري...
| |
|
|
|
|
|
|
|
|
|
Re: حكاية بِت سافرت امريكا بموضوع زواج وهمي ... (Re: معاوية المدير)
|
Quote:
شكرا على القصة و السرد الذي يعكس العمق المعرفي بتراكيب و وظائف
النص الشعبي، اذا جاز التعبير. قدرة مبدعة في توليف الماساة و الكوميديا |
سلآمات يا الصادق.
شكراً ليك علي التعليق والمجاملة اللطيفة، وأرجو أن
توفيك كلمة شكراً ولو النذر اليسير من تعليقك.
مودتي يا ظريف...
| |
|
|
|
|
|
|
|
|
|
Re: حكاية بِت سافرت امريكا بموضوع زواج وهمي ... (Re: معاوية المدير)
|
Quote: اخونا معاوية المدير سلام ..
لديك 1 رسالة في الماسنجر !!
ليها زي تلاتة يوم كدي ...!! |
سلآمات يا ناذر.
مشكور علي التنبيه والرسالة.
لو ما نبهتني ما كنت شفتها، لأنو ما ظهر لي إخطار
بوجود رسالة.
توالت الأحداث عاصفة يا ناذر، ومن جهات كتيرة
عرفت إنوا زي القصة دي عادي بتحصل في
السودان.
ههههههههههههه، المدآم قالت لي جيب جوازك وتعال
نفتح مكتب في السودان.
تحياتي...
| |
|
|
|
|
|
|
|
|
|
Re: حكاية بِت سافرت امريكا بموضوع زواج وهمي ... (Re: Bushra Elfadil)
|
Quote: أبدعت في كتابة أساليب الشباب اللغوية الحديثة وتمثّلها.
يمكنك أن تستمر فيها في حوارات متصلة.هذا توثيق مهم كل جيل له
أساليبه وتختلف من منطقة إلى أخرى. |
سلآمات د/ بشرى الفاضل.
مرورك يحفزني كثيرا. سأحاول المواصلة عن طريق خلق حوارات
مرتبطة بواقع هذا الجيل، رغم إنني لا أنتسب إليه، إضافة إلي أنني
خارج السودان منذ فترة، لكنك ترى ما لا اراه بنظرك الثاقب
وذوقك الأدبي الرفيع.
ألف شكر ليك علي المدآخلة
التي أسعدتني كثيرا...
| |
|
|
|
|
|
|
|
|
|
Re: حكاية بِت سافرت امريكا بموضوع زواج وهمي ... (Re: معاوية المدير)
|
Quote: الاستاذ معاوية المدير تحياتى وحكايتك مشوقة وواقعية
بس شنو حكاية ان مثل هذه الوقائع ارتبط حدوثها في السودان بوضعه الراهن ؟ !!
نعرف ان السودانيين تواقون اللهجرة منذ قرن او اك
ونعرف ان السودانيين مثلهم مثل كل شعوب الكرة الارضية يسلكون كل السبل لبلوغ غاياتهم
وفى اخر الثمانينات كانت قيادات التجمع الديمقراطى تدقس المجتمع المدني العالمى لتذليل العقبات
امام السودانيين الراغبين في الفرار من جحيم الحكومة الاسلامية وكانت الفيزات المنهمرة علي دكاكين
الهجرة في القاهرة تباع للسماسرة الذين يسوقونها لاي متسكع فى ميدان العتبة من ذوى البشرة السوداء. |
سلآم وإحترام أخي الكباشي.
الوقائع المقصودة هي تفشي النصب والإحتيال، والتزوير
حتي في قسيمة الزواج. إن كانت هذه الأشياء موجودة من
قبل، فنستطيع أن نقول وجودها كان علي نطاق ضيّق.
لكن في الوضع الرآهن أصبحت متفشية بكل اسف.
مشكور علي المدآخلة،
ولك مودتي...
| |
|
|
|
|
|
|
| |
معاوية المدير
عمر موسي منجي
Saifeldin Gibreel
محمد إبراهيم علي
Hani Arabi Mohamed
محمد على طه الملك
Zomrawi Alweli
الامين موسى البشاري
Hatim Elmaki
Shaker Hamid
dombek yai
الكباشى عبد الله الرقيق
نعمات حمود
الصادق يحيى عبدالله
ناذر محمد الخليفة
Bushra Elfadil
فيس بوك
تويتر
انستقرام
يوتيوب
بنتيريست