|
|
 تقلية كُشنتها تقيلة، أو؛ أنا عاوز عروس يا (أُم مُروّة)..المتزوجون يمتنعون و كذا الآنسات
|
بدايةً، الكلام الهنا دا كلّوا حاصل بالجد و إن ستختلف درجات صدقيتي بما (يقتضيه الحال)
المايل جدا اليومين ديل. ميلان الحال دا ما عندو أية علاقة لا من بعيد و لا من قريب بحقيقة
إني I broke up with my girlfriend ، و بالتالي هي ذاتها أصبحت الآن my ex-girlfriend .
المهم ممكن عشان ما نخت الأمور في قالبها البيرضي هذه الـ ex-girlfriend :هي في الواقع
التي broke up with me . في كل الأحوال قاعد أطمن نفسي و أقول انا الكسبان! آها رايكن
شنو يا أخواتنا( مش الناس بيقولوا رايكم شنو يا أخوانّا؟ دا ماعاجبني عشان كدا قلت "يا
أخواتنا").
لكن قبّال التقلية و البصلة المكشّنة الطايرة لي في راسي اليومين ديل، عاوز آللخوات أعترف
ليكن بي حاجات كتيرة خلاس، مش من باب الإعتراف سيد الأدلة، لكن من مدخل إنو إنت وحّدكن
العندكن الحل و الربط في محنت دي. و أنا جيت واقع ليكن في واطاة الله دي.
.
.
.
و للحديث بقية أو كما قال: التقل ورا
|
|
 
|
|
|
|
|
|
|
|
Re: تقلية كُشنتها تقيلة، أو؛ أنا عاوز عروس يا (أُم مُروّة)..المتزوجون يمتنعون و كذا الآنسات (Re: ابوعسل السيد احمد)
|
آها البت دي ذاتها ( أو ظااااااتها على قول و د هباني عدو دولة الله الرسالية) بيضا زي
الدحية. لا عجب إذ هي طليانية. لكن من بعد هذا الawful break-up ، ما عاد ينفعها إنها
طليانية و للا أمها أيرلندية و أخوها أبوه من جزر الرأس الأخضر( بالمناسبة هي جزر افريقية
و أهلها يتحدثون البرتغالية و صُفر لامن بيُض، لكن برضو أفارقة). ليه لأنه المسألة كلها أنا
وصلت فيها لقرار خطير بالحيل. المهم هذه الـex من بلاد العم سام، أو زي ما قال صديقاي
لقمان محمدين و علي الباشا هي ذاتها من بنات العم سام الحُرّات. ما عارف الحرارة دي
جابنها من وين بنات العم سام! بياضن دا ما شايفه بجيب ليهن حرارة واحدة، و لله في بنات
العم سام شؤون. إلا بالمناسبة في واحد من الأحاديث المجوبكة و المنسوبة للرسول بيقول:
البياض نصف الحسن. يعني عوينّا الزرق و الخضر و القمحيات و الصفر ديل مهما بقن حلوات
فبينافسن فقط على خمسين في المية؟ شوف ليك ظلم واحد!
البت صغيرونة و عمرها فد تمنطاشر سنة، و أنا داقي في الأربعين ( ودا بيني و بينكم) و هاك
يازول شي حب و شي ريدة و شي نقاش و شي منقاش و شي ما بعرفه. المهم أكلت راسي تبّ.
.
.
.
التُقُل ورا
| |
|
|
|
|
|
|
|
|
|
Re: تقلية كُشنتها تقيلة، أو؛ أنا عاوز عروس يا (أُم مُروّة)..المتزوجون يمتنعون و كذا الآنسات (Re: بدرالدين كاجوري)
|
بدر الدين كاجوري
يا سيدي العزيز البوست مشرع للجميع و بخاصة المشوكشين زيك و زي حالتي (في رواية أخرى). لكن بخصوص الشجر الكبار و السمغ، الخيزران دا مالو و عيدان البان عيبها شنو؟ و للاّ أقول ليك ما سمعت بالقول القائل "البراعم.. اللحم الطاعم"؟ ما بالك لامن يكون برعم طلياني إيرلندي و منكشح فيك بلا مقدمات و لا مؤخرات؟ المهم أرجو أن تتابع معانا حتى النهاية لأن البوست دا آخره حيكون كويس (على قول صديقي سفيان نابري في واحد من بوستاته الملهلبة )
خليك قريب يا حبيب، و أقال الله شاكوشك
| |
|
|
|
|
|
|
|
|
|
Re: تقلية كُشنتها تقيلة، أو؛ أنا عاوز عروس يا (أُم مُروّة)..المتزوجون يمتنعون و كذا الآنسات (Re: sudania2000)
|
سودانية الألفية الجديدة و كل الألفيات. نحن ذاتنا غير الراي الضلامي دا دايرين شنو؟ قولي كل الإنت عاوزة تقوليه. أم عسل ما بعرف شقّيش بلادها. و عسل ذاته ما اتعرف ولد و للا بت. كان إتعرفت بلاد أم عسل بنتفق يكون ولد و للا بت. المهم كان عندي صاحبي في الجامعة وجيه و بحب الـchicks إلا مرات بيلاوز من البنات. لمّا يشوف ليه واحدة سمحة و عاوز يلفت إنتباهها بيقول لي بصوت عالي: "شفت كيف يا عسل" و تقوم السمحة متلفتة. يعني محسوبك كان حصان طروادة. بعد كل السنين دي أنا الأغبش الاشعث دا بقيت بقدرة قادر وجيه لحدت واحدة إقترحت اشتغل موديل رجالي!. شفت كيف!. و لله في الناس الزرق شؤون. يا ربي عوين الخواجات ديل عيونن نيّة للدرجة دي؟. بلاد العم سام حاجاتها كلّها مشقلبة. لكن التقل الجد ورا.
خليك قريبة. و بالمناسبة تابعت بوستك بتاع الجمعة فترة لحد ما شايفه إختفى.
جمعتك مباركة و الله يعدلها عليك و علينا دنيا و آخرة. ما تنسينا من الدعاء و
الشورة الجد جد
عشت
.
.
.
شقة بعيدة: الكتاب دا بنقراه تب. إلا راينا من هسعة (ها الساعة) ضده للطيش
| |
|
|
|
|
|
|
|
|
|
Re: تقلية كُشنتها تقيلة، أو؛ أنا عاوز عروس يا (أُم مُروّة)..المتزوجون يمتنعون و كذا الآنسات (Re: Ashraf el-Halabi)
|
أشرف الحلبي: سلامات يا حبيب
أولا: إنت عندك توم اسمه اشرف الحلبي و للا اسم على اسم  ؟ يا زول بنريدك في الله عشان عندي صاحب عزيز اسمه اشرف الحلبي. القصة دي زي ما قلت آخرها كويس. في الحقيقة هي مجموعة قصص لهؤلاء الـgirlfriends ، و آخري أنا دا كويس دي الحاجة الأنا متأكد منها. أما قصص (غصص) الحب الكويسة التي لم تنته بالزواج فدي يا سيدي الرجال أدرى بها. إلا أنا عاوز مستشاراتي العوين هنا يدني راسي. أنا ختيت ليهن اللحم في إيدن و السكين في إيدن.
عشت
| |
|
|
|
|
|
|
|
|
|
Re: تقلية كُشنتها تقيلة، أو؛ أنا عاوز عروس يا (أُم مُروّة)..المتزوجون يمتنعون و كذا الآنسات (Re: sudania2000)
|
الفاضلة سودانية الألفية و كل الألفيات
أسعد الله جميع ايامك بكل خير. أشكرك كثيرا على حسن الظن. الزول الدواخله مليانة جمال و حب و خير بغلبه أنه يحتفظ بالحاجات دي لنفسه لأنه دا بيبقى بخل. عشان كدا الحاجات دي بتفيض ، و يللاّ الزول بيقوم بيسبغها على كل الناس الحوله. دا ، في نظري، السبب البيخلي سودانية تحب مفردة عسل و تقوم تقول للناس الحولها: "يا عسل!". و هم ناس محاظيظ قطع شك . الحمد لله الذي منّ على عبده الغلبان المسكين في بلاد العم سام أن يكون في زمرة هؤلاء. الـboss العسل ضحكني بالجد، إلا غايتو عرفتي تتخارجي. و ياها ذاتها مضاراة المؤمن على نفسه(من الـboss ).
الشريط الضلامي دا دايرنه بالحيل. و المسافة ماها مشكلة، بزلق ليك عنواني في رسالة داخلية. بسمع الشريط و برسله ليك تاني. و لو سمحت لي بنْسخه قبال ما أرسلهback ، بيكون كتير حلو.
بجيك لي يا لطيف دي. آها هي لحد الآن من الأوراد القليلة اللسع ( إلى الساعة) محافظ عليها. و مرات لامن أتزنق لي زنقة صغيرونة بقول يا لطيف الألطاف نجنا مما نخاف ، يقال أنها بتنفع شديد لتفريج عظائم الاشياء ، أقلها الهم. أما بنات الحلال العسل ديل ماشاء الله راقدات زي صوف الراس (من باب "الخير فيّ و في أمتي" و من عزتهن و مكانتهن السامية و حسن ظن العباد الغلبانين زيي) بس كيف يسخن معانا و يقولن عديلة. إلا قبال داك خليهن في الأول يشوفن محني دي هنا، و يشوفن نتيجتي الإتوصلت ليها و يدني راين فيها. عشان عاوز أجي نضيف زي صحن البلّي.
يا زولة لحد هنا دا ما قصرتي تب. و خليك قريبة عشان التقيل ورا. و حكمتك و شورتك و فهمك ليهن مكان خاص.
تسلمي و تعيشي و تتبارك أيامك.
| |
|
|
|
|
|
|
|
|
|
Re: تقلية كُشنتها تقيلة، أو؛ أنا عاوز عروس يا (أُم مُروّة)..المتزوجون يمتنعون و كذا الآنسات (Re: أحمد الشايقي)
|
الأخ أحمد الشايقي
الشايقي دي فاهما ما حقت العنصرية إلا حقت الأسرة، ما صح؟ كتبتها هنا رغم أنها بتثير حساسية حلفائي المنادين بسقوط سودانكم (السياسي-الجتماعي) القديم. أما السودان الجديد دا يكون كيف، فدي قصة تانية. إلا أقل شيئ ما عاوزين فيه مطاعنات لا للينا و لا للعلينا. مرورك مرحب بيه ألف. بس لسع ما عرفنا ( المصائب) و لا ( المصابين) . لو وضحت أكثر يكون سمح بالحيل، و إنت الشاعر المعروف. أما إذا داير تتعامل معانا بالسياسة و همزاتها فلا مرحبا يا أخي، لأنه ببساطة الموضوع هنا دا موضوع chicks و عرس و تقلية. يعني برنامج تكوين أسر و خارطة طريق إليه، و الذي منّه.
عندي صديقة كندية بتقول لي: my mom says that there are three things that divide families: politics, religion and marriage
أنا عندي واحد منهم هنا. ما داير التاني يجيبه لي زول عشان يبقى لي أغلبية برلمانية و يفركش لي بوستي دا، خاصة إنه أنا متأكد إنه السياسة في السودان القديم هي ضد التقلية. و أنا من أنصار التقلية الحمرا عين الديك .
ودي و تحياتي ليك بلا حدود
| |
|
|
|
|
|
|
|
|
|
Re: تقلية كُشنتها تقيلة، أو؛ أنا عاوز عروس يا (أُم مُروّة)..المتزوجون يمتنعون و كذا الآنسات (Re: ابوعسل السيد احمد)
|
البت لاقيتها بعد مدة من تغييري لشغلي ضمن أخريات من زميلاتي السابقات. سلمت عليها في إيدهاآخر واحدة. زميلاتي بديت أسلم عليهن بالأحضان في الأول. السبب إنه البت كانت متدربة! متذكرين حكاية المتدربة مونيكا لوينسكي الحاولوا يغتسوا بيها حجر بل كلنتون؟ آها دي متدربة ( بيقولوا ليها بالانجليزي intern). و قلت أعمل حسابي منها. لكن البت قالت بصوت عالي: why didn't I get a hug like every one المهم قالت لي أنا سمعت قالوا إنت كتبت كتاب. و أنا عاوزاك تكلمني عنه. قلت ليها خلاص يوم بعزمك غداء و نتكلم عنه. بعد كم يوم لاقيتها و مشينا إتغدينا في حتة أكلها سمح، و كسوداني قدمتها لحد محلها. في النهاية قلت ليها أديني نمرة تلفونك عشان أكلمك بخصوص الكتاب. قال لي: فاكراك ما حتطلب مني نمرة التلفون أصلا. كل الرجال طلبوها مني إلا إنت. قلت ليها: أنا عادة ما بطلب من البنات نمر تلفونهم عشان ما يسيئوا فهمي و يفتكروا I am hitting on them. قام وشها إتغير. أديتها حضنة الوداع و مشيت. نسيت أقول إنه في بلاد العم سام لامن الراجل يطلب من البت رقم تلفونها معناها هو interested in her و إذا هي أدته الرقم يبقى دا ضوء أخضر. بعد كدا يعزمها date . نحن زمان كنا بنقول promise للـdate دا.
بمناسبة المتدربة و كلنتون، الراجل جاء مدينتي قبل فترة و لاقيته زيّي زي كثيرين. راجل كلامه بيخش من القلب للقلب، بسيط، تلقائي و طيب. النسوان هنا بريدنه ريدة عجيبة خلاس. و كل واحدة تداري إعجابها بيه و تقوم تقول الراجل منحدر من أسرة فقيرة و بنى نفسه بنفسه. لكن الحقيقة قالها لي زميلي في مكان العمل: we like him because he slept with his intern
| |
|
|
|
|
|
|
|
|
|
Re: تقلية كُشنتها تقيلة، أو؛ أنا عاوز عروس يا (أُم مُروّة)..المتزوجون يمتنعون و كذا الآنسات (Re: ابوعسل السيد احمد)
|
قمت صبرت حوالى أسبوع و اتصلت عليها في الـ weekend . إتونسنا ونسة دراشة و إتفقنا نتلاقى.
عزمتها غداء تاني. بس المرة دي في بيتي. طقينا حنك سنين. ناقشنا مشاكل العالم و حقوق
الانسان و الفقر و غياب العدالة الإجتماعية و تفشي الجهل و غياب التعليم بالذات في البلدان
الأفريقية من حيث أنحدر.
الدنيا بقت ليل شديد، فطلبت منها المكوث لقضاء الليل ببيتي. أديتها مرتبتي التانية. طبعا
أنا زول أغبش ساكت: في بلاد العم سام و لحفاتي في الأرض. و عندي training suit و فانلة نادي
AC milan الإطالي، أديتهم ليها غيرت. و تاني طقينا حنك لحد خمسة صباحا.
قبال ما أنوم قالت لي إنها عندها boyfriend . ثم شكت لي من تلفونات فلان البيلاحقها دائما و
قالت لي مرة مشت بيته و قعد يحضنها بدون مناسبة و يقول ليها إنت جميلة و إنه عنده تلفزيون
كبير و قروش كتيرة. قلت ليها إنت عاوزة كدا عشان كدا مشيتي بيته. نفت كلامي و قالت ما كانت
عاوزة تكسفه. قمت قلت ليها you like adventures . في النهاية قلت ليها: لو ما كان عندك
boyfriend لكنت أغويتك. و نمت.
| |
|
|
|
|
|
|
|
|
|
Re: تقلية كُشنتها تقيلة، أو؛ أنا عاوز عروس يا (أُم مُروّة)..المتزوجون يمتنعون و كذا الآنسات (Re: ابوعسل السيد احمد)
|
في الصباح ( بصراحة نمت لي زي ساعتين بس) قمت بحذر و ما ولعت النور. دخلت الحمام أخدت لي دش
بارد و إتوضيت. رجعت لي غرفتي حيث ما تزال الفتاة الجميلة تتمدد على المرتبة. كان بياضها مع
غبش الظلمة يوحي بأشياء أخبرها للمرة الأولى. صليت الصبح. صحت البنت على تلاوتي للقرآن. نظرت
إلي ثم سألتني ماذا أفعل. أكملت صلاتي و أخبرتها إنها الصلاة المفروضة على المسلمين. إعتذرت
ليها عن قطع النوم عليها. قامت و استأذنتني دخول الحمام. و ريتها وين بخت البشاكير النضيفة و
الصابون. في الوطن من زمان خليت البشاكير من زمن الداخلية لمن لقيت زميلي العربي بيدي بشكيري
لضيفه.
سألتها عاوزة شنو في الـbreakfast قالت ما بتشرب قهوة. عملت ليها شاي أخضر، و شوربة خضروات.
رجعنا تاني لطق الحنك. قلت ليها تاني had you had a boyfriend, I would have seduced you
ضحكنا سوا بعد ما طبقنا من الشاي الأخضر مشروب الصحراء الخالد. مشت و جاتني المساء. قالت لي
آخر حاجة إتوقعتها:
| |
|
|
|
|
|
|
|
|
|
Re: تقلية كُشنتها تقيلة، أو؛ أنا عاوز عروس يا (أُم مُروّة)..المتزوجون يمتنعون و كذا الآنسات (Re: ابوعسل السيد احمد)
|
تمام يا أخي يا أبو عسـل
المصائب (بيني وبينك) احم احم
هي المشاكل ياخ المصائب هي المشاكل أيوا
وهي تجمع المصابين أي الذين تعرضوا للمشاكل,
عرفت كيف؟
يعني الخلافات هي المشكلة وهي ما يحدث ويجمع بين الذين حدثت لهم وبالتالي فأنا هنا لهذا السبب تحديدا,
لكن يا بوعسـل, انتا بس افهمني , البوسـت دا ممتع كتير وأنا دخلت للمتعة لا غـير, السياسـة عندي فيها من ألاطفه ويلاطفني (كيفما اتفق )
كل الشروحات دي عشان نقع في إطار مرحلة (مرحـبـاُ) ودي مسألة مهمة للضيف والمضيف,
ليك التحية يا رجـل وآمـل أن لا تكون شبكاتك مثقوبة كشبكاتي,
أحمـد الشايقي
| |
|
|
|
|
|
|
|
|
|
Re: تقلية كُشنتها تقيلة، أو؛ أنا عاوز عروس يا (أُم مُروّة)..المتزوجون يمتنعون و كذا الآنسات (Re: أحمد الشايقي)
|
Quote: تمام يا أخي يا أبو عسـل
المصائب (بيني وبينك) احم احم
هي المشاكل ياخ المصائب هي المشاكل أيوا
وهي تجمع المصابين أي الذين تعرضوا للمشاكل,
عرفت كيف؟
يعني الخلافات هي المشكلة وهي ما يحدث ويجمع بين الذين حدثت لهم وبالتالي فأنا هنا لهذا السبب تحديدا,
لكن يا بوعسـل, انتا بس افهمني , البوسـت دا ممتع كتير وأنا دخلت للمتعة لا غـير, السياسـة عندي فيها من ألاطفه ويلاطفني (كيفما اتفق ) |
كان كدي يا الشايقي
إت دا زولنا تب. و كمان راسنا واحد إلا دبنا بس فرق
واحد من أهلنا الفي غرب السودان بقى بعثي أيام نميري (و كان شاب وجيه و حبّيب). و كمان بقى بيكتب في الحيط بالأحمر. و كمان زاد على كدا إنه كان عنده آلة كاتبة في البيت لزوم طباعة البيانات. المهم كان عنده صاحبا و زميل دراسة من عيال دار الصباح. و كان بعثي زيه و بزوره في البيت. أم قريبنا الغرابي بتراعي ليهم ساكت الزمن دا كله. المهم قاموا ناس البوليس السري (الأمن الداخلي وقتها بس كله عند أهلنا بوليس سري خاصة و مرات تلاقي الواحد كاتب في اليافطة بتاعت بيته :صالح محمد التاج و تحتها البوليس السري زي ما في ناس بيكتبوا مثلا دلدوم السر الصافي و تحتها السلطة القضائية) المهم يا سيدي قاموا الجماعة إياهم قبضوا على الولد أب كدمول دا( دا لقبوا عند أمه البتحب الألقاب زي معظم ناس الغرب و بقية السودانيين) و الدنيا قامت و قعدت:
-فلان أب كدمول قبض ( بكسر القاف المعجمة و الباء)
-و آها قبض شان شنو؟
-قالوا قبض شان بحثي ( لاحظ الحاء بتاعت بعثي) !
- آها و البحثية ديل يا تُم يا أهلنا؟
- و الله مانا دريانين!
المهم المراسيل جرت شرق و غرب لمعرفة حكاية البحثية ديل. الخبر اليقين جاء بعد فترة و إجتمع الأهل و تهامسوا الخبر:
-أتاري البحثية مع الشويعية راسهم واحد إلا دنبهم بس فرق.
شكرا آشايقي و خلي أقرب من قريب
| |
|
|
|
|
|
|
|
|
|
Re: تقلية كُشنتها تقيلة، أو؛ أنا عاوز عروس يا (أُم مُروّة)..المتزوجون يمتنعون و كذا الآنسات (Re: محمد نور أحمد)
|
زولي العزيز
محمد نور
كلامك دا أسمح منه ما في و الإعتراف بالشواكيش فضيلة تصب في معين الشفاء الصحيح و العرس الأصح. المهم آلكاشف أخوي، قشة واحدة ما تعتر ليك بحول واحد أحد. يا ني المرسل ليك الشريط من غير قيد أو شرط. و الله يلمك في البت الشرط، قول يامين!
أما خارطة طريقنا دي و كلامك القلت فيها دا فكله حاصل عليّ بجملة الأيمان و أغلظه. مانا سُفها إلا شُغُلنا شفافية ساكت، و حرّم نلقى بت الحلال البوست دا ذاته ما بنتمه. إلا بس حنرد على المتداخلين في الماسنجر، شفت الكلام دا كيف؟
.
.
.
.
شقة بعيدة:
قروش الـ UPS عفيناها ليك في الله ، و اعتبرها مساهمتنا في خروجك من ظلمات العزوبية في بلاد العم سام إلى جنة العرس الما خمج.. تاني قول يامين..
البوست آخره سمح كان الله قال ينتمّ
| |
|
|
|
|
|
|
|
|
|
Re: تقلية كُشنتها تقيلة، أو؛ أنا عاوز عروس يا (أُم مُروّة)..المتزوجون يمتنعون و كذا الآنسات (Re: عبدالرحمن عزّاز)
|
صديقي الجميل في المنافي البعيدة؛ عبد الرحمن و د عزّار
وين بلادك آلحبيب؟ آها لسّاعك لا لامي في العزابة و لا المتزوجين؟
الكلامات دي عشمانين تسخن بالناس الوجهاء الزيك ديل و يقوموا كدا يعرسوا. و لّلا الراي شنو؟ أما نحن ديل فكنا لابدين لينا فوق راياً أعوج بالحيل. حسعة راسنا جا طبّ. إلا باقي لي لازم ندُشر الفي بطنّا دا كله أو تجي الحبيبة و نمشي ليها بقلب سليم. دا كله برغم كيد الأصدقاء الحاقدين زي ناس سفيان نابري الجميل داك. تلاقيه ذاته لابد ليه فوق شاكوشا مرزبة، إلا خاتيه في حنانه، و يشيل يقرقر على أبوسنّّاية ما طال ( طالما) هو أبو سنّايتين. إلاّ آلحبيب التقيل بالجد بالجد جاييكم ورا. بس المسألة دايرة ليها نظام تسهيلات و كدا. و لّلا نجيب من جوة كدا ملوص؟ "التسهيلات" ما حتكلف كتير.
قولوا :"أبوعسل، الله يعرس ليه بت الحلال التنفعه و ينفعها و يخلفوا صبيان و بنات و يعيشوا في ثبات و نبات" و ممكن تضيفوا عليها حرباشة صغيرة و تقولوا: " اللهم.. كان أديته البت الفي نيته ديك يسبحك كثيرا و يعبدك بكرة و أصيلا!"
.
.
hangin' out
down the street
the same old thing
تسلم ود عزّاز.
و يا المخدر عينيك أرجى التُقُل بعد ما تقدم الحرباشات
| |
|
|
|
|
|
|
|
|
|
Re: تقلية كُشنتها تقيلة، أو؛ أنا عاوز عروس يا (أُم مُروّة)..المتزوجون يمتنعون و كذا الآنسات (Re: ابوعسل السيد احمد)
|
ابوعسل ,,
تعرف ,, الهيلمانة القامت حول شخصية "مصطفي سعيد" قامت فى المقام الاول لان مصطفى سعيد لم يحضر زمن العولمة ,, حين إختلط الحابل بالنابل ,, مصطفى سعيد كتر تابوهات كتيرة فى زمانه ,, و من كدة جاءت عبقريته ..
أما اليوم فالتفسير المنطقي الذي يوصف حالة "مصطفى سعيد" و "مصطفى سعيد wanna bes " أصبحت حالة بسيطة ,, غير معقدة ,, و ممعنة فى العادية ,, ايضا تسمى black men, so ashamed of their blackness, they want to free themselves by lusting after white women ,,
sounds familiar, right
انا ما عارفة و الله ,, I would have seduced you بتمشي كيف مع "مشيت الحمام عشان أتوضا" .. لكن طبعا دي تجليات الرجل السودانى المتناقض ,, الماعارف كوعو من بوعو.
يا أبوعسل أبنى ,,شكلك زول و د ناس و كلس ,, ما تباري الامريكان "الوهم" ....
و لو كلامي بايخ ..
سامحني
| |
|
|
|
|
|
|
|
|
|
Re: تقلية كُشنتها تقيلة، أو؛ أنا عاوز عروس يا (أُم مُروّة)..المتزوجون يمتنعون و كذا الآنسات (Re: Outcast)
|
outcast
سلامات و إحترامات كتيرة
آمل أن تكوني بخير. أشكرك كثيرا على مداخلتك القيمة، و التي أعتقد أنه يلزمني العودة إليها لاحقا، لإعتبارات سأفصح عنها، بشكل مفصل. أصدقك القول إنه ثمة أغراض من طرح الموضوع و لا يتضرر منها أحد على الإطلاق بأي حال، و آمل أن أتمكن من تناول بعضها على الأقل ببعض التفصيل. بالعكس ربما تعود بالفائدة على الكثيرين و الكثيرات.
أشكرك كثيرا جدا على حسن ظنك في شخصي الضعيف ( وسوء ظنك بالأمريكان "الوهم" )
لا تنأي عنا من فضلك
تسلمي و تعيشي
| |
|
|
|
|
|
|
|
|
|
Re: تقلية كُشنتها تقيلة، أو؛ أنا عاوز عروس يا (أُم مُروّة)..المتزوجون يمتنعون و كذا الآنسات (Re: محمد نور أحمد)
|
الأخ الكريم: محمد نور
عميق احترامي لك يا سيدي. أرجو أن تكون واثقا أن ما أسميته من جهتك "مقلبا" لم يكن و سوف لن يكون غرضي من طرح أي موضوع في هذا المكان، ببساطة لأنني أحترم و أحب جميع الأعضاء و القراء، لأننا أبناء الاب الواحد السودان و الأم الواحدة الانسانية.
أولا الشكر أجزله لجميع من تداخل هنا جادا كان أم مازحا. و بالخصوص للأخت سودانية التي كانت أول من طرح تساؤلا موضوعيا تغاضيت عن الرد عليه في حينه حتى أمضي في ما أردت لفت الأنظار إليه و بالتالي الوصول إلى النهايات التي نشدت . تساءلت سودانية: "القيل فريند الليك شنو؟" و هو تساؤل أولي و مشروع بل و يشكل حجر الزاوية في صلب الموضوع و حياة الكثير من الشباب السوداني ( ذكورا و إناثا بالمناسبة) في الغرب و ليس بلاد العم سام فحسب، و في المهاجر بشكل أعم. ثم كان أن تفضلت الأخت آوتكاست من منظور تحليلي لحالة مصطفى سعيد بالقفز بالموضوع إلى نهايات أرجوها. عظيم شكري و تقديري للأخت آوتكاست لنبرتها الأمومية و رؤيتها الثاقبة.
لكن قبلا يجدر بي أن أقوم بتوضيح صغير بخصوص الوقائع التي سردتُ هنا و بالذات ما ورد باللون الأزرق. و هو ببساطة أن هذا "السرد" لا علاقة له بشخصي الضعيف إلا من باب الخيال المستوحى من وقائع عشت بعضها و عايشت معظمها. و لذلك أستميحكم العذر أن استعرت ضمير المتكلم و تماديت في استعماله. و لعله من نافل القول إن نتائج عديدة خلصت إليها من هذا الاستعمال، و هي – هذه الفوائد- قد لا تكون بذات أهمية كبيرة للكثيرين في هذا المقام.
.
.
.
للحديث بقية
| |
|
|
|
|
|
|
|
|
|
Re: تقلية كُشنتها تقيلة، أو؛ أنا عاوز عروس يا (أُم مُروّة)..المتزوجون يمتنعون و كذا الآنسات (Re: ابوعسل السيد احمد)
|
الاخ ابو عسل
تحياتي
من العبارات التي كتبتها في خطاب التقديم لعملي الحالي (I am interested in working in a multi-cultural environment.)
التي كنت لا ادري حين كتابتها انني بعد سنتين من العمل في هذا الجو انني وان كنت في داخل بلدي استوعب مدى التباين والاختلاف في الثقافات حتى لاقرب الدول لدينا والاعجب اختلافات ايضا في داخل مجتمعات هذا الوطن الكبييييييييير جدا.
اهذه حسنة ان تتفتح افاقك لدرجه تستوعب هذه الثقافات ام هى بداية التشوه؟
هل اسلوب التربيه في الاسر السودانيه يجعلنا قادرين على الحفاظ على كياننا وعاداتنا وتقاليدنا المميزه جدا وتثير دهشة كثير من الاجانب الوافدين؟
هذين السؤالين تبادرا الى ذهني بعد محاولتي لتققيم التغيير و التطور الذي طرأ على شخصيتي بعد العمل لسنتين في multi-cultural environment.
واتمنى ان اكون في نفس خط الحديث
| |
|
|
|
|
|
|
|
|
|
Re: تقلية كُشنتها تقيلة، أو؛ أنا عاوز عروس يا (أُم مُروّة)..المتزوجون يمتنعون و كذا الآنسات (Re: Asma Ali)
|
الأخت أسماء علي
شكرا جزيلا على هذه الإشارة المهمة لمسألة التنوع الثقافي في بيئة العمل و خارجها. بالذات في عالم اليوم و بعد أن إجتاحت رياح العولمة معظم بلاد العالم، سلبا و إيجابا، أصبح من السهل على الجميع ملاحظة هذه الفوارق الثقافية و بل الاعتزاز بهذه الفوارق و التمسك بها و مطالبة الآخرين باحترامها. بالتأكيد هذا ينسحب على كل أنواع التعامل و التفاعل الأخرى بين الناس مجموعات و أفرادا. و من أكثر هذه التمظهرات الثقافية شيوعا الدين، اللغة، العادات، التقاليد، و الموروثات.
أعتقد أن هذين التساؤلين مشروعين و في صلب الموضوع تماما، و معك أيضا أتساءل:
Quote: اهذه حسنة ان تتفتح افاقك لدرجه تستوعب هذه الثقافات ام هى بداية التشوه؟
هل اسلوب التربيه في الاسر السودانيه يجعلنا قادرين على الحفاظ على كياننا وعاداتنا وتقاليدنا المميزه جدا وتثير دهشة كثير من الاجانب الوافدين؟ |
و اسمحي لي أن أضيف: هل بالإمكان ذلك عندما نكون نحن أنفسنا أجانبا و وافدين في بلاد الله الواسعة؟
و هل كل موروثاتنا كسودانيين صحيحة و كاملة ، و كل ما لدى الآخر ( الأجنبي أحيانا) خاطئ و منتقص؟
تسلمي، و شكرا مرة أخرى
.
.
.
سأواصل بحول الله
| |
|
|
|
|
|
|
|
|
|
Re: تقلية كُشنتها تقيلة، أو؛ أنا عاوز عروس يا (أُم مُروّة)..المتزوجون يمتنعون و كذا الآنسات (Re: ابوعسل السيد احمد)
|
ما أنا بصدده في هذا المقام هو محاولات الشباب السوداني ( ذكورا ثم إناثا بدرجة أقل ) مسايرة الجانب الاجتماعي في البلدان التي يعيشون فيها و لا سيما الغربية، و على وجه الخصوص مسألة " البوي فرند" و "القيرل فرند" حيث أن هؤلاء ، إفتراضا أكثرهم ذكور، يلجأون لإتخاذ هذا النسق منهجا للحياة بشكل مؤقت أو بلا نهاية معروفة في كثير من الأحايين. غني عن الذكر أن نمط الحياة في هذه البلدان يقوم بالأساس على إقامة علاقة قد تمتد طويلا لتنتهي إما بالزواج، أو الافتراق، أو العيش معا من غير زواج، أو إقامة علاقات عابرة الغرض منها إشباع الرغبة الجنسية فحسب. و عليه فإن شبابنا ذكورا و إناثا يلجأون إلى إقامة تلك العلاقات مع طرف من الوطنيين أو من بلدان أخرى يقيمون في ذات البلد، طالما الأمر برمته سهل التحصيل بالإضافة إلى قلة الكلفة المالية للعلاقات مع أطراف غربية بحكم الاستقلالية المالية التي تقوم عليها حياة الغربيين، و غياب السلطة الاجتماعية التي يخشاها شبابنا المتمثلة في قوى مجتمعنا التقليدية من الاسرة و الجيران و الأهل و المعارف و لعبها دور الرقيب.
لكن هل يحدث هذا من قبل شبابنا لأنهم يحاولون مسايرة أنماط الحياة أو الاندماج فيها في تلك البلدان، أم أن الأمر خاضع أحيانا إلى حاجة ماسة لحميمية الآخر التي يفتقدها هؤلاء في هذا الشتات العظيم؟ بمعنى آخر هل يلجأ من يلجأ إلى خيار "القيرل فرند" و "البوي فرند" بحثا عن إشباع جسدي، روحي، عاطفي كان قد تمتع به في الأصل في الوطن و الآن يحتاجه بشدة و يفتقده؟ أم الأمر أيضا ذو صلة بعدم توفر طرف آخر سوداني مناسب حتى يتم الارتباط به بشكل جدي و تكوين أسرة مستقرة تكفي المؤمنين شر هذه الاحتياجات و ما تستتبع من علاقات؟
.
.
.
سأواصل بإذن الله
| |
|
|
|
|
|
|
|
|
|
Re: تقلية كُشنتها تقيلة، أو؛ أنا عاوز عروس يا (أُم مُروّة)..المتزوجون يمتنعون و كذا الآنسات (Re: ابوعسل السيد احمد)
|
ثمة تساؤل آخر ليس بمعزل عن التساؤلات أعلاه و هو لماذا يتم التغاضي عن تلك العلاقات نفسها طالما تتم بين طرفين سودانيين سواء إذا تمت في الوطن أو في بلدان الشتات و محاولة تسميتها بالـ" الخطوبة" كأن يقال جزافا أن هذا خطيب فلانة أو أن هذه خطيبة فلان في الوقت الذي يعلم الجميع فيه أنه لا خطبة هناك و لا يحزنون، بينما يتم التعامل معها، العلاقات مع الآخر غير السوداني، بشكل من الرفض و العدائية بل و وصفها بالفجور أحيانا؟
مع كل هذا إذا رجعنا قليلا إلى طبيعة الانسان في الغرب التي تتوق إلى استكشاف الحياة و الآخر و عوالم هذا الآخر من باب البحث عن المغامرة و منابع جمال الآخر التي قد تكون كامنة في بشرة داكنة أو ساقين رفيعتين أو شفاه غليظة أو فحولة أسطورية عارمة ترتبط في مخيلة الانسان ذي اللون الفاتح بمختلف تدرجاته عن الانسان ذي اللون الداكن نجدها تحفز هؤلاء على الاقتراب من فتياننا ( و أحيانا فتياتنا) و محاولة تكوين علاقات عابرة قد تطول. في ذات الوقت نفس هذه الطبيعة المغامرة، المستقاة في ظني من رفاه المجتمع في البلدان الغربية و المتجذرة عميقا فيه، أيضا مجبولة على الاستهلاكية بمعنى الفراغ من مغامرة للمضي قدما في درب المغامرات نشدانا لمغامرة جديدة مع آخر مختلف سيما إن كان لدى هذا الآخر مقدرة أكثر على الإدهاش و الكشف عن قدرات غير مستكنهة.
| |
|
|
|
|
|
|
| |
ابوعسل السيد احمد
بدرالدين كاجوري
Asma Ali
محمد نور أحمد
عبدالرحمن عزّاز
Outcast
فيس بوك
تويتر
انستقرام
يوتيوب
بنتيريست