|
|
 Re: نريدها حكومة وطنية شبابية واحذروا ( الجلاكين)!! (Re: ihsan fagiri)
|
العزيزة دكتورة احسان
تحياتي
خلونا الدور ده يا دكتوره نحن اجيال الترطيبة نتفرج ونشجع اللعبة السمحة لانوانا في راييي الاجيال الجديدة دي تستاهل تحكم البلد وجديرة بيهو لانهم والله مصادمين ومقاتلين وعاشوا معاناة ومقاساة صعبة ومرة جدا ما مرينا بيها نحن فوالله هم افضل من يقود الوطن لبر الامان رغم انو عمرنا لا استوزرنا ولا ضقنا المناصب ولا طمعانين في حاجة من بلدنا غير انو بس انو شعبنا اكون مبسوط .
وبعدين ما تزعلي يا دكتورة من العنوان.........اخوك البكتب ده اكبر ( جلكن) وزاهد في اي حاجة بس طمعان لي في بقية العمر الفضل ده في فت تكسي في المحطة الوسطي ومصنقع من الصباح في جريدة سودانية مليانة ديموقراطية وكلاما زين مع كباية شاي بنعناع وراجينا فطور بفول في ( ابو العباس) وونسة هلال ومريخ وكمان راجينا غدا بمفروكة بامية كاربة من ايد الوالدة اديها الصحة بكسرة بعيش صفراء مع صحن سلطة بجرجير سوداني حار مع طماطم وارد ( قراصة القرشي) وونسة عصيرية قدام البيت شايل خرطوش مويتك تسقي شديرات نيمتك وتشاغل في حاج فلان وحاجة فلانه وبعد داك راجينا العشا ( شعيرية) باللبن( المقنن تقنينا دستوريا ) وبعدها نومة سمحة والواحد موهط في عنقريب ويعاين في سما السودان المشبع بالنجوم وضاربك الهمبريب وريحة الدعاش وما عندك هم عيشة اليوم التاني وقفة الملاح !
| |
  
|
|
|
|
هشام هباني
Tragie Mustafa
فيس بوك
تويتر
انستقرام
يوتيوب
بنتيريست