|
|
 الشهيد محمد طه يبريء زمته امام الله والشعب وانا اشهد بذلك
|
ظل طوال حياته الاخيره كاشفا لفساد النظام واجرامه و فاضحا لممارساته الغير اخلاقية دليله ضميره وزاده نقاء سريرته واصالة سودانيته في بوست للاخ الفاضل الحبيب هشام هباني اورد مواجهة مباشرة بين الشهيد و اركان فساد النظام ومعهم كبيرهم الذي يحدث نفسه ببطولات يدفع ثمنها ابناء شعب السودان مدعيا في دجل واضح بانه اميرا للمؤمنين وما هو الا امير للمفسدين واماما للجهل :
انتو يا سعادتك صحي جادين في المواجهة وعاوزين تواجهوا الاستكبار العالمي بالحرامية والمفسدين وبشعب جعان وفقران وما لاقي حق العلاج ولا التعليم.. والناس بتموت بالكوليرا والايدز والجوع.. يعني شعب حاقد عليكم ويتمنى زوالكم في اي لحظة وبعدين حسن نصر الله شنو البشبهكم ..حسن نصر الله ده زول ثائر ومجاهد وبخاف الله ونضيف ذمة وما حرامي...واول حاجة نضفوا ذممكم امام رب العالمين والشعب وبعد داك تعالوا اتكلموا عن جهاد.. ولا شنو يا سيد الرئيس!!!)..وهنا تداخل احد الحاضرين مقاطعا محمد طه وهو يهدأ النقاش وحدة محمد طه التي خلقت جوا مفعما بعدم الرضى من المقربين من الريس وتدخل احد رجالات الحراسات وقد ذهب وهمس في اذن محمد طه..وهنا صاح محمد طه: ما حتقمعونا وصوت الحق لا بد يعلو وخلو النفاق والكضب..الانقاذ الحاربنا عشانها شعبنا كلو والعالم كلوورضينا كل تجاوزاتهاانتهت زمان واولاد الناس الشهداء ربناارحمهم واتقبلهم قبول حسن.. وانا باذن الله شان ابرىء ذمتي امام الله وامام الشعب حاكشف كل المسكوت عنه.. وكل المظالم الاسترنا عليها......!!)
قد تكون المشادة المشهودة بين محمد طه وعبد الرحيم الحرا... حضور البشير هي..؟!!
|
|
 
|
|
|
|
|
|
|
 Re: الشهيد محمد طه يبريء زمته امام الله والشعب وانا اشهد بذلك (Re: محمد حسن العمدة)
|
ود العمدة سلامات
تعرف يا حبيب شخص بمثل هذة الشجاعة لابد ان يذبح
فالأنقاذ لا تتحمل مثل شخصه .. اما عبد الرحيم بزاق
فقد كان يتحاشي اي لقاء يجمعه به
بخصوص موضوع براء الزمة .. هاهو الأخ الطاهر ساتي
يؤكد نفس الأمر
اليكم
شركاء الجريمة ... ( 1 )
الطاهر ساتي
* عصر الجمعة قبل الفائتة جاءني صوته المألوف عبر الهاتف .. " الطاهر كيفك .. أنت كويس .. لمن تجي ماشي لمكي المغربي تعال سوقني معاك .. والله انتو الدناقلة ديل إلا الواحد يخلص حقو منكم بس مواصلات .. " ... ولعطل في عربتي نصحته بالاعتماد على مكي المغربي في التوصيل ، أوالانتظار حتى الساعة التاسعة حيث موعد انتهاء الحاج ورَّاق من كتابة زاويته ليقلنا سويا ، فاختار المغربي قائلا .." خلاص .. انتو بتتأخروا .. أنا بتصل بمكي ونتلاقى هناك .. أصلاً ما فيكم فايدة ... " .. وضحكنا ثم افترقت أصواتنا ..!!
* و التقينا هناك .. وعند الاستقبال و الترحاب داعبته سائلا .." اها .. ما سمعنا رأيك في مسيرة الشيوعيين الفاتت . ولا في مسيرة الأنصار الجاية ....الجماعة ديل دايرين يستردوا حقهم ولا شنو ... ؟؟ " .. رد سريعا .. " والله جماعتنا ديل غريبين خلاص ... ياخي انت راكب فوق ضهرم و ما دايرهم يحتجوا .. مالو ما يطلعوا مسيرة .. في دولة في العالم ما فيها مسيرات .. بالعكس ... الحكومة القوية البتثق في قراراتها ما بتخاف من المسيرات .. ياخي اقنعم بدل ما تقمعم ... لكن ناسنا ديل نقول ليهم شنو بس .. غايتو الله يهون .. و.....و...."
* وامتدت الجلسة .. والحوار الطويل و النقاش ، كان - رحمة الله عليه - في تلك الليلة متألقا كعادته في الحوار والنقاش ، يحاور الحاج ورَّاق في قضية وما أن يتفق معه فيما يمكن الاتفاق عليه يتحول إلى عادل سيد احمد و يناقشه في أمر ما ثم يفتح موضوعا مع صلاح عووضة و ما أن ينتهي يبدأ مع مكي و الطاهر حسن التوم و ناصف صلاح الدين و يوسف محمد الحسن ...و.. و.... كانت ليلة حوار مفتوح على مصراعيه أداره شهيد الرأي محمد طه مع كل الحضور بلا قيود ، حزبية كانت أم فكرية ... تحدث كثيرا باقتضاب في حزمة قضايا المرحلة و شخوصها .. وأسهب في الحديث و كأنه كان يرغب إخراج كل ما في فكره و عقله و صدره قبل غدر الثلاثاء ...!!
* عند الافتراق مسك بيدي عند الباب صائحا .." هوووى ... اقيفوا .. البيوصلني منو بعد ما كلكم تفوتو بعرباتكم .." .. فقلت له .." غايتوا انا الليلة زيك ما عندى ليك أي حل ... بس اتشربك في العلماني ده .. وما تفكو إلا قدام بيتك .." .. و حـــين و دعته سألني ".. ياخى انا مش قلت قبل كدة دايرك في موضوع مهم ..؟؟ .. " .. نعم .. تذكرت .. كان قبل شهر تقريبا بأحد مطاعم الخرطوم جنوب وكان معنا صديقه الوفي الحاج ورَّاق .. و كان قد بدأ الموضوع ... " جماعتنا ديل جننوني بالكلام عن كتاباتك .. والله بقولوا أنت اتمردت عديييل .." وحين يضحك وراق يوجه له الحديث محتجا .." و الله يا وراق أنا رأي أي واحد يتكلم و يقول لكن ...." وقبل أن يسترسل في الموضوع تعمدت تغيير مجراه قائلا .." خلاص يا أستاذ .. الموضوع ده نخليهو ليوم تاني .. نحن جينا المطعم ده عشان نرتاح شوية من السياسة و الجرائد .. لكن قول لجماعتنا لو واحد فيهم بيضمن لي انو حيتقاسم معاي بعدين سؤال القبر و عذاب الآخرة انا بتخلى عن ضميري و بكتب بس بضمير الحزب .. شفت المشكلة كيف .. ما بتلقى زول ..عشان كده أحسن نخلي الأمور تمشي والحمد لله بعدين الحساب فرادي ... مش كدة ..؟؟ .." ... كان هذا قبل شهر ... تذكره الفقيد في ليلة الجمعة قبل الفائتة .. و كان - عليه رحمة الله - مصرا على اللقاء و النقاش .. و تركته مع ورَّاق و عادل و بقية الزملاء .. وفارقته على أمل اللقاء ..!!
* و لم نلتقِ إلا بعد أيامٍ أربعة بمشرحة مستشفى الخرطوم حين أتوا بجسده مفصول الرأس و منزوع الروح ، ليكون الوداع الأخير دامعاً ... و ... نواصل لنتحدث غداً عن شركاء الجريمة الذين شكلوا حضوراً قبيحاً في حياتنا حين غابت عنها الحرية و العدالة ...!!
| |
|
|
|
|
|
|
|
|
|
Re: الشهيد محمد طه يبريء زمته امام الله والشعب وانا اشهد بذلك (Re: ahmed haneen)
|
| Quote: و ... نواصل لنتحدث غداً عن شركاء الجريمة الذين شكلوا حضوراً قبيحاً في حياتنا حين غابت عنها الحرية و العدالة ...!! |
نعم اخي حنين يجب ان يواصل الجميع الحديث عن شركاء الجريمة
اتمنى من الاخوة في جريدة الوفاق مواصلة الصدور وتخليد الفقيد الشهيد ولتكن منبرا للحرية والعدالة والكرامة ولتواجهة هؤلاء الوحوش وتكشف خططهم وتعريتهم فكريا ودينيا
هؤلاء لا يخيفهم شي مثلما يخيفهم العقل اذا نطق .
| |
|
|
|
|
|
|
|
|
|
Re: الشهيد محمد طه يبريء زمته امام الله والشعب وانا اشهد بذلك (Re: هجو الأقرع)
|
| Quote: " والله جماعتنا ديل غريبين خلاص ... ياخي انت راكب فوق ضهرم و ما دايرهم يحتجوا .. مالو ما يطلعوا مسيرة .. في دولة في العالم ما فيها مسيرات .. بالعكس ... الحكومة القوية البتثق في قراراتها ما بتخاف من المسيرات .. ياخي اقنعم بدل ما تقمعم ... لكن ناسنا ديل نقول ليهم شنو بس .. غايتو الله يهون .. و.....و...." |
الحبيب هجو سلام
تامل معي في هذه الكلمات
اقنعم ولا تقمعم ...... ولم يدري الشهيد عليه رحمة الله بانه اول المقمعين
| |
|
|
|
|
|
|
|
|
|
Re: الشهيد محمد طه يبريء زمته امام الله والشعب وانا اشهد بذلك (Re: محمد حسن العمدة)
|
الاخ الكريم محمد حسن العمدة
سلام
ربنا يرحم الشهيد محمد طه محمد احمد
ان كان ما ذكرته في حق الشهيد محمد طه من باب اذكروا محاسن موتاكم , فبها
لكن الحقيقة اننا معشر القراء الذين نقيم في السودان لم نري هذه المواقف معكوسة علي صحيفة الوفاق.
اخر هذه المواقف هو تأيد موقف الفريق عبدالرحيم حسين من انهيار البناية ساجدة الشهيرة.
الموقف الذي ذكرة الاخ هشام هباني و ذكرته انت في هذا الخيط لا تسنده مواقف المرحوم المعبر عنها في صحيفة الوفاق. طبعا انا لا اجزم بان ماذكر غير صحيح كوني لم اكن حاضرا و لا يمكن نفي او اثبات هذا الامر لكن الرجوع لصحيفة الوفاق يؤكد ان للمروحوم مواقف تتنافي مع ماذكر.
المؤكد موقف المرحوم المشرف في نقد اعمال الفساد الاولي في نظام الانقاذ و التي نشرت في صحيفة السوداني الدولي.
و شكرا.
| |
|
|
|
|
|
|
| |
ahmed haneen
هجو الأقرع
Tragie Mustafa
فيس بوك
تويتر
انستقرام
يوتيوب
بنتيريست