|
Re: صدور كتابي ... الدغمسة ! (Re: Tagelsir Elmelik)
|
إثنوغرافيا الدغمسة بقلم الأستاذ : عبد الله علي ابراهيم
هذا الكتاب الذي بيدك أيها القاريء غاية في"الزَقلَتة" وآية فيها. والمصطلح، الزقلتة، من بعض ما استفدته من أسرتي من جهة الأم. فهم متى جلسوا للأنس "تزقلتوا" بالتعليقات الطريفة التي قوامها عبث عابث باللغة. والعابث المتزقلت هو صانع للنص المواز الذي يطبق على نص اللغة الأصل فيكيد له كيداً ويبشع بعواره. وتاج السر الملك أعبث العابثين بالعبارة. تواتيه سليقة غير عادية في الحكي العابث
وإذا صح أن نعين لكتاب الملك جنساً كتابياً فهو مما يمكن القول إنه "اثنوغرافيا الدغمسة". والإثنوغرافيا معروفة وهي الوصف الثقافي لظاهرة أو مجتمع ما. أما الدغمسة في مصطلح الملك فهي أسلوب أو (لا أسلوب) التعاطي السوداني الأخرق مع الحداثة التي انتهت زلزلزلتها بهم إلى المهاجر كلوتراب (شختك بختك الأمريكي) وأسايلاب (لاجئون). وتشملنا هذه الدغمسة ضمن طوائف من أهل العالم اتفق للملك تسميتهم ب"بني كجة". ومدغمسنا السوداني الأكبر هو عزو. لا يصور الملك موقفاً مدغمساً إلا كان عزو حاضراً فيه. وللملك هذه السعة للحكى. يخلق النص المزقلت ويكاد يجعل له بطلاً واحداً كأنك في رواية ولست فيها.
والدغمسة قديمة بل أصيلة فينا. فبنو كجة دائبون في علاج العطب الذي يقع في ما بين يديهم من آلآت ب"الترقيع" أو "الترويع" أو "التبديع". قال الملك إن الدغمسة بدأت معنا "منذ عهد ربط "الدبارة" في سنة قلووظ الحنفية المتآكلة لإيقاف نقاط الماء مروراً باستخدام "القناية" لتثبيت التعشيقة عند بعض سائقي بصات السيرة . . واستخراج الجلبة من المركوب ونحت "الوردة" من فيش الببسي واستخدام قطعة البرطوش غمازة لصيد السمك، فعبقري**ة الخلق عندنا لم تتوقف. ويعني بذلك الخلق المدغمس. فنحن نجتمع حول الميكرفون ابو زنة كأننا سنرهبه فيعتدل. ولم نفلح بدليل عودتنا إلى مواقعنا وترك المكرفون ذا الصرير على حاله طوال حفلات وصفها الملك ب "مناسبات للانتحار السماعي الجماعي". وإذا رجع الملك قليلاً للوراء لوجدنا حاولنا إرهاب الرتينة وبابور الجاز قديما بهذا الاحتشاد وما افلحنا: تبقى رتينتنا "مخنقة" ووابور جازنا طافيء. ولما جاء الكمبيوتر داوينا علله ب"الرقي". فالكمبيوتر عند عزو دائماً "إسلو، بطيء". وهناك من إذا استعنت به لإصلاحه عاب فيه شيئاً متعلق ب"الإنستوليشن " . . . دائماً. وهناك جماعة "كدي أقلبها من الناحية التانية" عاجزين غير مستسلمين. أما "التبديع" فهو في جعلنا بعض مستحدثات التكنولجيا بقرات مقدسة.فعقيدتنا في الهلمان ستين والبوكس تويوتا 1976 "خرافية" حدت بالملك ليقول إن السيارتين (آخر من يموت من الحديد الزاحف" وأنها نجت من "الموت الموديلي"
وإثنوغرافيا دغمسة المهاجرين من بني لوتر وأسايل عند الملك "كثيفة" كما يستحسن في مثلها. فعنايته بدقائق ابتذالهم لمنافع البلد المضيف وأعرافه دقيقة. فمتى تزوج أحدهم لتأمين وثائق لشرعية وجوده بالمهجر سماه "زوج ورقي وزوجة ورقية". وأمثال عزو يخاطرون لإيقاع الأذى بأنفسهم طلباً للتعويض في ما تعارفنا على وصفه ب"اللبط".. فتجد من كان بحي لنجوم الفن يمد ساقه ل###### ليعضه مؤملاً أن يكون "دا ###### بوب ديلان ولا باري وايت" فيجزل في مال السترة. ولما استبعد صاحبه أن يكون ال###### لفنان مريش رد عزو غاضباً:"ح يكون ###### منو؟ عبد العزيز المبارك ولا بت قضيم؟". ومتى تمكن عزو من إيذاء نفسه ولزم المستشفى "كاسر مخروقة" يكون سؤال العائدين له: "أها طلعت بكم؟" بدلاً عن "كفارة". ثم يصرف عزو شيك التعويض عن العلة المفبركة فيعلو قدره فيستحقر الآخرين "نحن الفقراء الكادحون الطيبون والمناضلون". ينفذ الملك بزقلتته التي لا ترحم إلى سبل كسب عيش بني كجة في أمريكا ونظم حياتهم بما لا أريد إفساد طرافته على القاريء. فتجد عزو البني كجي يكتشف زنجيته الأفريقانية فيتمسح بالأفارقة الأمريكان يلعن سنسفيل البيض زلفى ويتهددهم ب"الرفليوشون-الثورة". وتجده يلبس "التيشرت" غافلاً عن بعض مغازي المكتوب عليه المحرج، وتراه يفاخر أهل الخليج بمواطنته بباسبورته الأمريكاني الأغر، وترى كيف تبور تجارته حتى حين يلبي نداء "اللاند أوف أوبورتيونتي، أرض الفرص المبذولة". فحين اشتغل لم يقو على كدح الصنعة ولما فتح بيزنسس لم يقدر عواقبه. أما حين يدغمس فتأتيه الشرطة في عقر عمله متعقبة جرائم وقعت فيه. ويعرج على "دين" المغتربين من بني كجة. ويتوقف عند حرصهم الحريص على الكشف عن "شعيرات" الخنزير الدقيقة في كل معروض بالمتاجر على عظمه وتبادلهم نتائج تلك الكشوف. فهذه البضاعة أو تلك مصنوعة من "اللارد" فأجتنبوها. ثم يعرض علينا عصراً سماه "ما قبل البقالات الحلال". ويتهم البقالات الحلال بالتخصص في بيع الطحنية التي انقضى أجل نفعها مع غيرها من المعلبات. أما ذؤابة شغل الملك فتجده في اثنوغرافيا "الروم ميت-شريك السكن" الذي هو "أخ لم تلده أمك". وكذلك في ميلاد المثل الكجي "شغال في مجالو" والعبارة الأخرى :"عندنا هناك في فلوريدا".
لست في حل مع ذلك من عرض الملك للتراجيكوميدي التي ضاق بها الوطن الأول عند بني كجة حتى تلخص في الخرطوم تحديداً:
"انتفت القرى والمدن الصغيرة من ذاكرتنا الجمعية، فأصبحنا جميعاً أولاد خرطوم". فهو لم يقرأ لمهاجر (إلا فيما ندر) حرفاً يذكر فيه الوطن السابق للخرطوم. الكتابة تبدأ بشقية الحال: الخرطوم. وكأن مواضع ما قبل الخرطوم مثل "الرداء المتسخ القديم نخلعه خشية السخرية أو التقريع". إذا كنت من جوبا لن تسافر إليها إلا في الأغنية. إذا لم تكن لك واطة في الخرطوم فألحق. فالأرض توافرت بعد تحويل المطار من بحري إلى أم درمان. وستبنيه (البيت) وتتيمم بصعيده الطاهر ولن تعود إلى كرمة النزل إلخ. "أها عندك واطا" تنضاف إلى أوهام عديدة اقتنيتها بصبر دون ملل وهم العرق والقبيلة والجندر والولاء والوحدة والديمقراطية والأفريقانية والعباسيزم والحرية. تلاشت كل تفاصيل السودان. أين اختفى السودان؟ وكيف تحول إلى مدينة واحدة وفريقين لكرة القدم؟ وحاكم فرد؟ أين مايرنو، الكرمك، سبعة بيوت؟ كيف صار لنا سوق قندهار وسوق ليبيا الذي لا يقيم فيه ليبي واحد.
عبث الملك باللغة "مبالغة". وهو آلته التي عليها التكلان في فض مغاليق نصوصنا المعتادة المطمئنة بنصه الموازي الهدّام. فهو حرب شعواء على اللغة التي شكلت حياتنا في العقود الماضية وطبعتنا على اللغو كما تتجلى في الأغاني والشعارات السياسة ومما جميعه. فهو يعيد إنتاجها في روتينه ليكشف عن عتقها السخيف أو الكاذب. ففي سعي بني كجة للدغمسة قال الملك، إنه التقى جيل البقالات المهاجر الأول (الذي اشتغل مع التجار اليمانية في نيويوروك بلا علاقة مع الدولة) "بجيل الضرائب والجوازات" أي أولئك الذين اتصلوا بالدولة يدفعون ما عليهم لها ويحصلون على جوازاتها". وله في التربص باللغو صبر على المكاره. فقال إنه في صبيحة انقلاب مايو 1969 صحونا مع الانقلابيين نبحث عن رجل اسمه حمد النيل ضيف الله (اللواء) والذي لا نعلم حتى الآن لماذا سٌمي ب"الهارب". ومم هرب، ومتى؟ وأين؟ وفوق كل هذا وذاك هل تم القبض عليه؟ هل حوكم وهل أدين وهل عوقب؟ ولماذا عوقب؟ وأعظم من كل ذلك: أين تم دفن الأستاذ الشهيد محمود؟ ثم عاد إلى الموضوع في مقالة أخري في سياق حديث عن تأميم مايو "ثم سكت المذياع عن سيرة "حمد النيل" (الهارب). وهكذا نحن نواري سوءاتنا بأنفسنا وندفن في يومنا سخف الأمس . وتواتي الملك اللغة ذات الصدع التي اكتنفتنا وهيفتنا في تداع طليق. فمتى أراد القول بقدم عهد الشيء تذكر بغير سبب أليف "عهد سايكس بيكو" (الموقع في وإليه ننسب كل مصائب العرب). ######ر من "شيقنة" القرى ورومانسيتها فقال عن والده إنه منذ جاء مدني لم يرجع إلى جزيرة مساوي (وهي عتبة ختمية مقدسة) و"عالي النخيل لم يذق ثمره" بالتفات إلى أغنية "أسمر جميل" للكاشف. وقال عن اللمعة التي على وجوه مغتربي بني كجة إنها "باينة بينونة كبرى" عليهم. وقال إنه جاء عليهم الشتاء الأمريكي وهو ليس السقط، الذي هو مثل جومو كنياتا نعرفه. وقال أن مسلمي نيجيريا "كسروا ركب" في سبيل الوصول "إلى منى في غيابي". وقال عن بني كجة إنهم أسطوات هجرة منذ عهد "الغابة والصحراء". وهكذا لا تسلم عبارة مما تداولناه لجيلين او ثلاثة من استدعاءات الملك المتهكمة المتزقلتة حتى "يمسخها علينا" ويحررنا منها فنبدأ الحياة بلغة جديدة.
مطلب الملك في كتابه هذا قريب من مطلب مسرح العبث في الستينات. فقد كان ثورة ضد اللغة بصورة رئيسية لأنها صارت مما نردم به الأخاديد في حياتنا. وصارت لغتنا نحن منذ حين ديدباناً يقينا غوائل الشك في ما اتفق لنا من هراء ولغو وثوابت. والأبرع أن الملك لن يزعجك بمهمة تحريرك من اللغة القديمة. ربما تكون هذه دعوته أو دعواه ولكنه سيضحكك حتى الثمالة وستجد أنك قد اغتسلت من تلك اللغة ضحكاً.
| |
|
|
|
|
|
|
Re: صدور كتابي ... الدغمسة ! (Re: Tagelsir Elmelik)
|
شكر وتقدير
وددت أن أتقدم بالشكر و العرفان مرة أخرى، إلى القائمين على أمرالمنابر الإلكترونية الآتية: المنبر العام: سودانيز أونلاين منبر الحوار الديمقراطي: سودان فور أول منتدى حوار: سودانيات المنتدى العام: الجالية السودانية الأمريكية بواشنطن سودانايل صحيفة أجراس الجرية
شكري الجزيل للبروفيسور عبد الله على ابراهيم، على مقدمته الضافية الكافية، وللأخ العزيز صلاح إسماعيل و الأخت رقية علي ، لما بذلاه من جهد صادق حتي يري الكتاب النور، و الشكر للأخ العزيز الأديب محمد زين الشفيع لقيامه بمراجعة الكتاب و تنقيحه.
وددت أن أشكر قرائي الأعزاء في كل بقاع الدنيا، و أخص بشكري كل الذين طوقوعنقي بأفضالهم، دون منٍ، ودون أن ينتظروا مني كلمة شكر، أُبادلكم حباً بحب، و البادي أعدل. أتمنى أن تجدوا في هذه النصوص متعة و فائدة، فإن كل عمل فني يخلو من متعة و طرافة، لا محالة ذاهب من الذاكرة، ذهاب رغو البحرفي الفضاء.
تاج السر الملك فيرجينيا 2011
| |
|
|
|
|
|
|
Re: صدور كتابي ... الدغمسة ! (Re: فاروق أبوحوه)
|
سلام يا فاروق و الله يبارك فيك
يمكنك تجميع أسماء الراغبين في (أوردر واحد) لو أمكن و ساقوم بامضاء النسخ و شحنها لأي مكان Paypal, Western Union etc... تصلك الشحنة عقب انقضاء اسبوعين من الاستلام على العنوان الذي تحدده
دمت و لك شكري الملك
| |
|
|
|
|
|
|
Re: صدور كتابي ... الدغمسة ! (Re: Tagelsir Elmelik)
|
العزيز تاج السر
تحياتي والف مبروك هده الاصدارة الحديثة وانا موقن انها ستكون حافلة بكل ممتع جميل وخاصة ان صاحبهاكاتب يمتلك قدرة فائقة في تصوير المعاني بخيال رسام حقيقي ينقلها بسلاسة للمتلقي كتلك التى استمتعت بها في كتابك ( ايش لون تمشي الاحمسة) والدي حملني الى ماض جميل وتفاصيل ممتعة عبرت عن جيلي ومشاعري وكان لك فضل دلك ايها الجميل واتمنى ان تشرفنا بحجز نسخة من هدا السفر الجديد والواعد من اسمه بالممتع الجميل و مزيدا من التوفيق.
| |
|
|
|
|
|
|
Re: صدور كتابي ... الدغمسة ! (Re: هشام هباني)
|
سلام يا هباني
Quote: والف مبروك هده الاصدارة الحديثة وانا موقن انها ستكون حافلة بكل ممتع جميل وخاصة ان صاحبهاكاتب يمتلك قدرة فائقة في تصوير المعاني بخيال رسام حقيقي ينقلها بسلاسة للمتلقي كتلك التى استمتعت بها في كتابك ( ايش لون تمشي الاحمسة) والدي حملني الى ماض جميل وتفاصيل ممتعة عبرت عن جيلي ومشاعري وكان لك فضل دلك ايها الجميل واتمنى ان تشرفنا بحجز نسخة من هدا السفر الجديد والواعد من اسمه بالممتع الجميل و مزيدا من التوفيق. |
عاجز عن الشكر يا هشام و أتمنى أن يكون الدغمسة مكملا للمتعة. الملك
| |
|
|
|
|
|
|
Re: صدور كتابي ... الدغمسة ! (Re: فاروق أبوحوه)
|
العزيز تاج السر الملك
ألف مبروك على صدور الكتاب
لا شك ان المتعة الذهنية مضمونة
أتابع بكثير من الإهتمام أي حرف تخطه منذ فترة ليست بالقصيرة
واتجول خلفك في مختلف المنابر الإسفيرية
طبعاً نحن في السودان ...حكاية نشتري با ( الكريدت كارد ) دي متعة ماعندنا ليها سكة
عن طريق تقديم د. عبد الله على إبراهيم ...اللعاب الذهني لن يوقفه إلى كتاب عابر للقارات ترسله مع أي شخص
والحساب قدام على قول الدايرين يقروا سلفقة ساي
ربنا يديم عليك العافية وتمتعنا بهذه الكتابة الرفيعة الأنيقة ...الساخرة بفهم
| |
|
|
|
|
|
|
Re: صدور كتابي ... الدغمسة ! (Re: عمر عشاري)
|
عمر عشاري الصديق
بارك الله فيك و أتمنى أن تجد فيه المتعة ، فيه دي طبعا بعد ما قريت أنك في السودان ما بتكون مستحيلة، سأرسل مجموعة قادمة للسودان وغاليا ما سيساعدني الأخ فتحي محمد عثمان إن عثرت عليه لك شكري و مودتي الخالصة الملك
| |
|
|
|
|
|
|
Re: صدور كتابي ... الدغمسة ! (Re: Rawia)
|
Quote: إن الدغمسة بدأت معنا "منذ عهد ربط "الدبارة" في سنة قلووظ الحنفية المتآكلة لإيقاف نقاط الماء مروراً باستخدام "القناية" لتثبيت التعشيقة عند بعض سائقي بصات السيرة |
بس عشان الحتة دي بس.. ستجدنا تواقون لقراءة هذا السفر والتبحر معك يا تاج بلا "دغمسة"! ألف الف مبروك.. وحتماً سنأتي لمناقشة هذا الكتاب يا ملك.
| |
|
|
|
|
|
|
Re: صدور كتابي ... الدغمسة ! (Re: Rawia)
|
شكرا يا السر يقول بني كجة بعد انتهاء أي موقف "والله انا ذاتي كنت عايز اقول كدة" فانا والله لو كانت لدي البراعة والقدرة لكنت قلت ماقاله عبد الله علي إبراهيم في مقدمة الكتاب، ولو كثر الذين كانوا يريدون أن يقولوا، فبالله اكتبني أول واحد سعيدون أنك جمعت هذه المقالات في كتاب، فنحن قوم نحب الحاجات كلها مع بعض وسننتظر يوما كان مفعولا لنظفر بنسختنا، غابتو حا أربط لي عمر عشاري شكلو كدة أول من سيتحصل على الكتاب تشكراتي ومودتي
فيصل محمد صالح
| |
|
|
|
|
|
|
Re: صدور كتابي ... الدغمسة ! (Re: قيقراوي)
|
الف مبروك لينا وليك ياستاذ تاج السر
Quote: سلام يا فاروق و الله يبارك فيك
يمكنك تجميع أسماء الراغبين في (أوردر واحد) لو أمكن و ساقوم بامضاء النسخ و شحنها لأي مكان Paypal, Western Union etc... تصلك الشحنة عقب انقضاء اسبوعين من الاستلام على العنوان الذي تحدده
دمت و لك شكري الملك |
اذن ارسل لنا العنوان ليتم التنسيق وشكرا يافاروق
| |
|
|
|
|
|
|
Re: صدور كتابي ... الدغمسة ! (Re: Tagelsir Elmelik)
|
طبعا انا سعيد اني حاضر و متابع طباعة "الدحمسة" و حا اشتري اوي نسخة تطلع حاااارة من المطبعة و معاها نسخة تانية لاكتر زول بحبني في العالم و اجيبها ليهو معاي , اها منو البحبني ؟
____ فيصل و عمر و قيقا, كيف الابتزاز ده معاكم؟
| |
|
|
|
|
|
|
Re: صدور كتابي ... الدغمسة ! (Re: ايمان بدر الدين)
|
مبروك يا ملك ..
شكلنا حنشكو مع الاحمسة ونفتح بوابات الفرح والمتعة على بعض ...
انا سلفا اعددت ليك البلاتفورم عندنا للاحتفال بالدغمسة - لمن تجينا جيب
معاك طارق ابوعبيدة بالله...
I'm ready when you are.
| |
|
|
|
|
|
|
Re: صدور كتابي ... الدغمسة ! (Re: محمد البشرى الخضر)
|
كنت قد ملحتنا في الأحمسة ونراك الآن تعتمد التكنولوجيا التي نجهلها لتروح منا الدغمسة غايتو نجازف ناس كيكي الناقشين ديل وفي جاههم نلوك ونقرأ في يدك معانا يا هندسة والتحية وانت تخرج بنا مع رهط قليل من فضاءات المشافهة لويلات الكتابة ودريهماتي جاهزة ، حتى لو غشتني مسغبة
| |
|
|
|
|
|
|
Re: صدور كتابي ... الدغمسة ! (Re: الفاتح ميرغني)
|
يا لذاك المكان الولوف .. لايقف الناس عادة عند هذه الخواتيم..لكن تخيل عمل في اخوك عمايل..فرجينيايامعلم..فرجينياتلتين الدنيا..
لقد وفقنا الله واطلعنا على الكتاب والسنة والاحمسة..نساله التوفيق وان يهبنا من لدنه تلك الدغمسة..
-------------
طرف من خبر الاحمسة
ارخ تاج السر للسودامريكان في فصل فريد عبر كتاب شيق فريد وشديد العمق .. ومن يقع عنده في مظن السؤ فقد دام فيها ابد دهر آلات الطبع والنشر ما دامت..ومن يقع عنده في حسن الظن فقد ربح هجرته.. ولن ينال فهم الكتاب الا من قضى طرفا من الدهر في الدنيا الجديدة..فتفاصيل الكتاب أوضح لمن راي ولمن سمع.. اقصد بذلك ان الذين قصدوا امريكا- وشاف وسمع - هم الاكثر استمتاعا بهذه الاحمسة..وهو في عموم امره وصف يُدهش وفي خصوص أمره حالات نفسية لايدركها الا الذين صبروا.. بقراية النصوص فتاج مثقف حقيقي..فنان سوداني قلوبال شديد يعيش كسوداني مع مراعاة فروق الجغرافيا ويعيش كما يجب.. شكرًا ياتاج ..لقد حببتا إلينا فرجينيا وفان دورن ستريت والهندوس والكبرتة على مرمى ضراع من البوتوماك..
-------------------- اماناتك وصلت بعد صبر ومجاهدات..
| |
|
|
|
|
|
|
Re: صدور كتابي ... الدغمسة ! (Re: الفاتح ميرغني)
|
صدور كتابكـ دي زي صدور دجاج كنتاكي ولّ كيف؟؟ ألف مبروكـ لزعيم البني كجه .. وألف مبروكـ لبني كجّه بي صمّة خشمم!
Quote: و معاها نسخة تانية لاكتر زول بحبني في العالم و اجيبها ليهو معاي , اها منو البحبني ؟ |
عمر البشير!!
| |
|
|
|
|
|
|
Re: صدور كتابي ... الدغمسة ! (Re: Magdi Ahmed Elsheikh)
|
سلامات ومبروك الكتاب بعد قراءة التقديم الممتعة، يبدو الكتاب مغري فعلا بالقراءة والاقتناء بس أنا حبيت أسأل عن كلمة "الدغمسة" هل الكلمة الصحيحة هي دغمسة لا جغمسة ولا كل قبيلة عندها "..غمستها" الخاصة بيها؟ بصراحة أول مرة أسمع كلمة "..غمسة" بحرف الدال كانت من عمر البشير بس أنا لجهلي الشديد قلت البشير ما بتلام لانه أصلا ما بعرف يتكلم ولغته واقفة من زمن كانوا بلعبوا الدافوري. أتاريه القصة ما كده ودغمسة دي طلعت كلمة صحيحة وطلعت أنا المابعرف الكلام
| |
|
|
|
|
|
|
Re: صدور كتابي ... الدغمسة ! (Re: rummana)
|
السلام والإحترام ل (الملك) يا عزيزي العزيز حكاية المرسال والشحن والدفع الإلكتروني والهتش دا نحن ما عندنا ليهو ضهر فشنو ... متين يطلع الكتاب في المكتبات عشان الواحد تنقش تنقش يشيل قريشاتو يمش يشتريه بالباب الواحد دا؟ أرجو الافادة ضروري ومهم جدا .
| |
|
|
|
|
|
|
Re: صدور كتابي ... الدغمسة ! (Re: Mohamed Foto7li)
|
الاخ العزيز تاج السر الملك تحياتي وألف مبروك وأنشالله بداية وأستمرارية لكتابات انفع واكثر أبداعا أنت عارف أخوك من فقرأء الارض بالله رسلي الكتاب هدية مع أول زول جاي السودان ممكن نعمل لكتابك دا أعادة قراية وترويج يا فنان لك ودي
| |
|
|
|
|
|
|
Re: صدور كتابي ... الدغمسة ! (Re: زهير عثمان حمد)
|
* الأكرم : الأستاذ / تاج السر الملك تحية وكثير تقدير لانفلات شخصكم الكريم من وصمة الثقافة الشفهية ، وبدأتم الكتابة ، فهي خطو مُتسع في زمان العولمة ... التهنئة القلبية لهذا العمل ، ونتمنى دوماً أن يكون الكتاب مُشجعاً تسويقاً لصاحبه كي يكتُب أكثر ، ويفض أغلفة العقل الوثاب ، ليُخرج لنا عوالم مدهشة . ألف تحية لك *
| |
|
|
|
|
|
|
Re: صدور كتابي ... الدغمسة ! (Re: أمين محمد سليمان)
|
جميل يا تاج -
و عليك الله ورينا بعدين جابت كم !
عارف اجمل شئء انو طريقة طرحك للكتاب و البي بال منعت اي سكة للدغمسة المعروفة (و نسختي وين !) و قيل ان حبيب نورة خسر من الدراهم ما لا تعد في سبيل توصيل روايته لاصحابه الذين (فلقوه) بـ( عليك الله رسل لي نسخة ) ! و هذا ما يسمي بـ (الكتابة تأتي بالساحق و الماحق للكاتب في دغموس الثقافة )!
بارك الله في البي بال اينما حل و ارتحل !
| |
|
|
|
|
|
|
Re: صدور كتابي ... الدغمسة ! (Re: هيثم طه)
|
Quote: و معاها نسخة تانية لاكتر زول بحبني في العالم و اجيبها ليهو معاي , اها منو البحبني ؟
|
يعوضنا الله
اها انا دا!!
-------
المضطر يركب الصعب .. باقي لي اسي ما (شفنا) اشلون تمشي الاحمسة ياخ اها نسخة الدغمسة .. و كمين نسخة دحمسة
و قديماً قيل : الحب في ذاتو مبرر كافي
بنكون في الانتظار
| |
|
|
|
|
|
|
Re: صدور كتابي ... الدغمسة ! (Re: محمد سنى دفع الله)
|
محمد السني ود دفع الله
سلامي و تحياتي بمعونة الله بوزع أنا مثلما فعلت مع الأحمسة دور النشر ديل فلم هندي من عينة البطل ما بلقا اخوهو حتى لو وراهو العقد الفي الرقبة داك، و الجرحة بتاعة الترتار ( الكرو)
عموما لو عملتو جمعية زي ناس الامارات، ممكن بالويسترن يونيون و الدي اتش إل يجيكم الكتاب زي العجب، شاور شوف في كم زول جنبك، ولو ماعندك مشكلة مع ال Pay Pal اتوكل على الله ونسختك بتجيك (لى عن) بابك سلام لحسان ياخ تاج السر
| |
|
|
|
|
|
|
Re: صدور كتابي ... الدغمسة ! (Re: أبو ساندرا)
|
أبو ساندرا سلام
Quote: كنت قد ملحتنا في الأحمسة ونراك الآن تعتمد التكنولوجيا التي نجهلها لتروح منا الدغمسة غايتو نجازف ناس كيكي الناقشين ديل وفي جاههم نلوك ونقرأ في يدك معانا يا هندسة والتحية وانت تخرج بنا مع رهط قليل من فضاءات المشافهة لويلات الكتابة ودريهماتي جاهزة ، حتى لو غشتني مسغبة |
إنت حتكون بعد ود البشرى مباشرة في صف الأخمسة حتى تكتمل لديك الصورة الملوحة ما سمحة، وسعيد بوقوفكم معي في وجه أعاصير ويلات الكتابة الدريهمات مردودات في جديد بناتك ، تستبرى من المساغبات.
الملك
| |
|
|
|
|
|
|
Re: صدور كتابي ... الدغمسة ! (Re: محمد البشرى الخضر)
|
ود البشرى سلام ياخي
شكراً ليك و الله جزيلاً وسوف أقوم بإرسال الكتب للإمارات فور وصول العنوان و الذي منو بالنسبة للأحمسة فقد نفد نفادا لا رجعة فيه، نفس المطبعة التي نفذت الكتاب ده أرسلت لهم بنسخة الاحمسة الالكترونية أتوقع أن يطبعو عدد محدود من النسخ، بمجرد الإنتهاء، ليك على، أبعث ليك نسختك، الفترة بتكون قصيرة إنشاء الله. تحياتي مرة تانية الملك
| |
|
|
|
|
|
|
Re: صدور كتابي ... الدغمسة ! (Re: امينة عيسى)
|
Quote: بعد قراءة التقديم الممتعة، يبدو الكتاب مغري فعلا بالقراءة والاقتناء بس أنا حبيت أسأل عن كلمة "الدغمسة" هل الكلمة الصحيحة هي دغمسة لا جغمسة ولا كل قبيلة عندها "..غمستها" الخاصة بيها؟ بصراحة أول مرة أسمع كلمة "..غمسة" بحرف الدال كانت من عمر البشير بس أنا لجهلي الشديد قلت البشير ما بتلام لانه أصلا ما بعرف يتكلم ولغته واقفة من زمن كانوا بلعبوا الدافوري. |
الدغمسة غير الجغمسة
الجغمسة ديك فيا الحاجات بتكون مجغمسة ..... بي مسكنة شديدة اما الدغمسة .. ففيها دغمسة جد
البشير لم يسبق بروف ع ع ابراهيم ... اقلو بالنسبة لي
Quote: ولن أفصل لأن "فائض القيمة" كان من اختصاص الرفيق عثمان أمان شرحاً أو دغمسة في مدارس الكادر لا يقبل بغيره مثل لوح في مولد الختمية.
|
سئول من الخير: إنت ماركس طفش وين ... بقلم: د. عبد الله علي إبراهيم
| |
|
|
|
|
|
|
Re: صدور كتابي ... الدغمسة ! (Re: Tagelsir Elmelik)
|
سلام عليكم اجمعين تاج السر "ابو زينب" والحاضرين
الكنية دى يخيل لى احسن ليك من "الملك" كتير
ههههههه عارف الناس فى جيهات الشرق هناك، نواحى طوكر وسنكات وسواكن لامن تقول ليهم "تاج السر ابو زينب" يبقى خلاص "الحديس" قفل، تاج السر اللحاق فى بحر المالح على قول شيخنا حاج الماحى، عليك الله هو الزول الملوك داير بيهم شنو ؟ كيف الحال اما بخصوص الكتابة، ونسبة لعدم عرفتنا واحاطتنا بأمور الأدب ودروبه وما فيه، لكين يبدو من البريلوشن او الانترودكشن حقت شيخنا عبد الله انه سيد الموقف القوى والمسيطر فيها هو خلطة الساتاير والموكرى Satire & Mockery وأكيد بنسب متفاوتة حسب ما يقتضيه كل موقف وحال، لكين ال كل موقف وحال دى شنو، الله اعلم عاد، ومافى طريقة يتعرفو الا الزول يتوكل ويقرأ مجمل الكتابة، وفعل التوكل هنا جاى من حتة انه الواحد والله ما ميال كتير لقراية البروس لأنه زى ما عارف يا استاذنا تاج السر انه وخصوصا فى الزمن الأغبش الفينا ده، معظم البروس بكون بروس البروس اللولانية طبعا جايه من نضم السادة الانجلوساكسوناب Prose والتانية حقت اهلنا السوداناب ديك، الشى او الزرع البقوم فى الواطا ساى داك يمكن والله اعلم، مبعث عدم عصرتنا على الكتابة البروس، بروس اللنقليز، هو تحيزنا وتعصبنا الشديد والكعب فى نفس الوقت، للشعر وانه، وتانى الله اعلم، الشعراء ديل ورثة الأنبياء والركون لى ال كونسبيرسى ثيورى انه المقولة دى اتحؤفت واتحورت والجماعة تآمرو على الشعراء وختو بدل منهم العلماء ما علينا واكيد طبعا ما كل كتابة البروس كعبة وما فيها طعم ولا حرفنة، اللهم الا ما ندر، وعموما نحن "واسغين" فيك والله وعارفين كتابتك لا تأتيها "البرسسة" من امامها ولا من خلفها وضقنا طعمها والله ومن هذا المنطلق زى ما بقول ناس البوليتيكا، نتقدم لمقام كتابتكم الكريم، برغبتنا فى الحصول ونيل سقيا حبركم الجميل وبامنياتنا انه تتوفر الدغمسة فى سوق الله اكبر ونشيل منها نسختنا كنت داير اقول "لمقام سموكم" على اساس روياليتكم المثبتة والملحقة بالإسم لكين اتذكرت انه غيرنا ليك الإسم لى تاج السر ابو زينب، يلحقنا وينجدنا، عشان انت تلحقنا وتنجدنا بنسخة ممهورة كمان بتوقيعكم وبركتكم
والسلام عليكم
| |
|
|
|
|
|
|
Re: صدور كتابي ... الدغمسة ! (Re: أبوذر بابكر)
|
أبوذر بابكر الصديق
شكرا على مداخلتك الضافية، و هنيئاً للشعراء بوراثة الأنبياء، نحنا ياهو البروس و الترتوس ده وكل نفس بما كسبت رهينة، أها نحنا في جهات سودانيز دي ما بعرفو ابو زينب فقلنا نقول الملك لمن نمشي جهات طوكر و القاش نقول ابو زينب، عيب لى ناس فهد و عبد الله ديل؟؟ إنت أتوكل و اقرا البتجي منك تجي، بعداك نشوف خلطة الساتاير و الموكري نسبتا قدر شنو إن دايرة زيادة موية نكشحا، كان طلع بروس، ناطاهُ، وإن كان موليتة برضو سمح.
الحصول على الكتاب موضح أعلاه، إلا كان في السودان، دي ترتيبات تانية. تحياتي و شكرا على المداخلة النيرة. ألملك
| |
|
|
|
|
|
|
Re: صدور كتابي ... الدغمسة ! (Re: Tagelsir Elmelik)
|
التاج المرصع بدرر الكلام
يا البيك نور اقليمك
جاك كلامى ؟ شفت صاحبى صلاح اسماعيل ده واحد من ورثة الأنبياء، وبى تحت تحت هسه تلقاه شبه نبى ونحن ما جايبين خبر
اما بخصوص نحن وين والكتابة دى نلم فيها كيف
فنحن يا سيدى فى بلد يموت ناسها من شدة الحر وسطوة القهبونة
وكان جليت من ديل، الزهج ما بخليك يعنى فى كل الأحوال هالك هالك
ده غير تهلكة النوستالجيا وتباريح البعاد
اريتنا كان فى السودان
لكين كان الله هون بنلم فى الكتاب بلقى لى دبارة
يا زول اول شى شكرا عليك
وتانى شى شكرا ليك
| |
|
|
|
|
|
|
Re: صدور كتابي ... الدغمسة ! (Re: salah ismail)
|
ألف مبروك
وأكيد كتاب ممتع
أها نحن ناس السعوديه كيف ؟؟
ياريت واحد من المقيمين هنا يتبنى تجميع الراغبين
أنا عاوز نسختين
واحده لى والتانيه لأنو عندى حماقة تسليف الكتب ( ولى هسى مافى زول أحمق رجع لى الكتاب الإستلفو )
وبالمره نسختين من الكتاب السابق ( لنفس السبب برضو)
| |
|
|
|
|
|
|
Re: صدور كتابي ... الدغمسة ! (Re: أسامه الكرور)
|
اسامة الصديق العزيز
شكرا ليك على المساندة وأتمنى من قلبي أن تجد بغيتك فيه من المتعة الخالصة
بالنسبة للسعودية، في أخوان اولريدي بعثو عن طريق الويسترن يونيون (الرجاء كتابة ولاية فرجينيا) لو جنبك نفرين تلاتة راغبين بتسهل الشحن كتير لكن عموما ويسترن يونيون أو pay pal تمام لك الشكر و التحية الملك
| |
|
|
|
|
|
|
Re: صدور كتابي ... الدغمسة ! (Re: salah ismail)
|
أخي العزيز صلاح إسماعيل
الدينامو المحرك وراء خروج الكتاب بعد أن كاد يصيبني اليأس من خروجه شكراً لك على كل ما قدمته في سبيل خروج الكتاب إلى النور برغم مشاغلك الحياتية المتعددة و شكرا لك على إعادة إيماني بقدرة تحقق الأشياء، ليتني أستطيع حكاية القصة كاملة من الألف إلى الياء و حتى النقطة التي نقف عليها الآن ولكن لكل مقام حديث، لا أجد أعظم من كلمة الشكر لك و الدعوة بالتوفيق و الله يقدرنا نرد ولو يسيراً مما قدمته لنا.
إنت اوردرك ليه سنة قاعد هنداك الملك
| |
|
|
|
|
|
|
Re: صدور كتابي ... الدغمسة ! (Re: Tagelsir Elmelik)
|
الاخ الملك الف مبروك عليك و علينا الدغمسة ونسأل الله ان نكون من يمتلكونها اهااااا الاحمسة انا مع ودالبشرى والدغمسة انا مع عمر بشارى قلت كيف؟
اقتباس من رمانه "سلامات ومبروك الكتاب بعد قراءة التقديم الممتعة، يبدو الكتاب مغري فعلا بالقراءة والاقتناء بس أنا حبيت أسأل عن كلمة "الدغمسة" هل الكلمة الصحيحة هي دغمسة لا جغمسة ولا كل قبيلة عندها "..غمستها" الخاصة بيها؟ بصراحة أول مرة أسمع كلمة "..غمسة" بحرف الدال كانت من عمر البشير بس أنا لجهلي الشديد قلت البشير ما بتلام لانه أصلا ما بعرف يتكلم ولغته واقفة من زمن كانوا بلعبوا الدافوري. أتاريه القصة ما كده ودغمسة دي طلعت كلمة صحيحة وطلعت أنا المابعرف الكلام "
يا رمانه سلامات انا حصيلتى من اللغة بتقول الجغمسة هى اللخبطة و الحاجة الجايطه ومافى محلها (الجغمسة قد تكون فعل عفوى او يعنى الزول المجغمس ده طبيعة) والدغمسة هى الحاجة المغطية بقصد التعتيم (الدغمسة فعل مقصود يعنى الزول البدغمس ده غتيت و دغيل)
والله اعلم
| |
|
|
|
|
|
|
Re: صدور كتابي ... الدغمسة ! (Re: الجيلى أحمد)
|
Quote: يا رمانه سلامات انا حصيلتى من اللغة بتقول الجغمسة هى اللخبطة و الحاجة الجايطه ومافى محلها (الجغمسة قد تكون فعل عفوى او يعنى الزول المجغمس ده طبيعة) والدغمسة هى الحاجة المغطية بقصد التعتيم (الدغمسة فعل مقصود يعنى الزول البدغمس ده غتيت و دغيل)
والله اعلم
|
كدا يا حاجة سهام عشرة على عشرة
--------
اها اشرحي لينا الفرق بين الجوبكة و الكوجين
| |
|
|
|
|
|
|
Re: صدور كتابي ... الدغمسة ! (Re: ناجي ميرغني)
|
عاظف ميرغني
بوظان الأعصاب شنو .... بالشبتلي؟؟؟ الفي راسي طارت، المهم الزمت نفسك بالشبتلي، وعارفني براك لايووووق في الحتة دي
عموما الميتين منتظرين فرعتك و انشا الله فرعتك خدرا جيب عموم شباب التاكا
تاج السر
| |
|
|
|
|
|
|
Re: صدور كتابي ... الدغمسة ! (Re: Siham Elmugammar)
|
سهام المجمر أختي العزيزة أولاً العاصي القيقراوي (تلاتة صلايب ) ده عندو راي فوق الدغمسة وصادف شرحك مقتلاً في كل التأويلات بدقة مية مية من أطرف المواقف أن ناشراً لبنانياً أعجبته الكلمة و أصر على الا أغير اسم الكتاب، وقال لي بأن الوقت قد أزف ليتعرف العرب على العامية السودانية، وقد بحث عن معناها بمجهوده الخاص وكانت النتيجة مطابقة لنفس شرحك أعلاه. إلا أنني و الحق يقال، رأيت فجاجتها و دغالتها حينما نطق بها البشير، وأدركت مثلي مثل غيري أنه قد عنى الجغمسة فخانه (الفوكابلري) الشعبي، فأصابته حالة مجغمس الجغمسة، فدغمس الفعل و الفعل مشيرا بعصاه الشهيرة التي لن تكون حية تسعى، ولن ينفلق البحر بإشارة منها. من يومها وصوت المرأة التي غسلت عنا سيئاتنا ، و أكد جلدها على أننا أمة من الأمم الشريفة، لا خمج بيننا ولا دغمسة، و لا قصور تبنى و يخوت تستجلب أكبر من سعة النيل وقدرة موجه على حملها، كل شي ما حاصل، بس بقت المشكلة البنت الناشز دي. عشاري ود البشري هل بلغت اللهم فاشهد يسمع صوت هيييع هيييعات
| |
|
|
|
|
|
|
Re: صدور كتابي ... الدغمسة ! (Re: Tagelsir Elmelik)
|
بعد السلام احيطكم علما بأن اطلاق صفة عاصى وبتلاته صلايب لصديقى قيقراوى عجبتنى شديد هو المافى شنو :)
يا الملك ما دايرة اخرب ليك البوست بدغمسة و جغمسة البشير فى بعدها السياسى والتحية له وهو يشير بعصاة ليطهرنا من فجورنا و سيئات اعمالنا
النجيضة ود البشرى و عشارى كتبى (على وزن قروشى) معلقة فى رقابكم عليكم التنسيق والتوصيل وعلى ال payment فقطن (كما ينون قيقراوى)
| |
|
|
|
|
|
|
Re: صدور كتابي ... الدغمسة ! (Re: mamkouna)
|
الممكونة الصديقة العزيزة
شكرا ليك و ياها المحرية فيك الدعم و المساندة بالنسبة للسوفت كوبي ح تنزل قريبا اونلاين -الكتابين- و نسخة PDA لقراء المحمول و ال ebook s مما جميعو قريب شديد و ده بعد التدشين في اول مارس.
لك تحياتي الملك /BOLD]
| |
|
|
|
|
|
|
Re: صدور كتابي ... الدغمسة ! (Re: محمد أبوالعزائم أبوالريش)
|
يا ابو حوة اتصلت عليك للأسف ما لميت فيك
اها يا ناس الامارات , كما قال الملك بعد وصول العنوان و "الذي منو" سيقوم بارسال الكتب خلال اسبوعين و لتسهيل المسائل يفضل ان نقوم جميعا بالتنسيق وعمل اوردر واحد اها الذي منو المذكرو اعلاه 28.95 دالا يعني 106.3 درهم قول 106 الـبوينت 3 ما بيناتنا عندنا خيارين من خلال الرابط اعلاه يقوم من يرغب بالدفع بالكريديت ( بالديبت كارد العادي ممكن) و الملك يجمع الاسماء لدية ويرسلها مرة واحدة للامارات لعنوان واحد و الشخص المرسل له يتكفل بارساله للبقية او يمكن تحويل المبلغ بالدرهم لحساب شخص واحد منا وهو يقوم بالدفع خلال الموقع و يتسلم الشحنة من الملك ويرسلها للباقين نسمع آراءكم يا شباب
الملك بعد اذنك نعقد الـ لويا جيرغا هنا في بوستك دا
| |
|
|
|
|
|
|
Re: صدور كتابي ... الدغمسة ! (Re: محمد البشرى الخضر)
|
Quote: بعد اذنك نعقد الـ لويا جيرغا هنا في بوستك دا |
اال لويا ما جرغت لسة يا بشرى
محاولة يائسة مني لتجاوز حزن الفقد
يطالعني عبر مداخلتين في البوست من المرحوم رحمه الله رحمة واسعة، وألهم اهله وأصحابه الصبر ة حسن العزاء
| |
|
|
|
|
|
|
|