من شوفتو طولنا ـ محمد الأمين الأميرة ـ عبد المنعم الخالدي بشوف في شخصك أحلامي ـ وردي مين فكرك يا حبيب ـ محمد ميرغني نور النوار ـ أبو عركي ملاز أفكارنا الهيمانة ـ إبراهيم عوض عيونك كانو في عيوني ـ عبد المنعم حسيب الأماني العذبة ـ خليل إسماعيل بتقولي لا ـ عبد العزيز المبارك أسراب الحسان ـ سيد خليفة طال علينا فراقكم ـ عثمان مصطفى
11-13-2011, 12:24 PM
داليا حافظ داليا حافظ
تاريخ التسجيل: 06-06-2008
مجموع المشاركات: 5055
أرجو من كل الذواقين ترشيح أجمل الاغاني السودانية ذات الإيقاع السريع "الخفيفة" ..قديمة وجديدة ..
وأكون ممتنة
Quote: محمد علي يا أخوي بشوف في شخصك أحلامي دي سمعتها من منو خفيفة..؟ والله دي لو غنتا أماني تايوتا ما بترقص غايتو إلا إنت كانت رايحة ليك رقصة ساي
يا ود الفاروق ـ أنا قاعد لي هنا للرقيص وناس (الطيب عبد الله ) بهناك فاتح ليهم زمن ـ هو الغنا الخفيف لازم يكون راقص يا حبيب الأغنية دي بالذات ممكن تؤدى بإيقاعات مختلفة ـ جيرك ـ سامبا ـ ووربما 3/4 أو 6/8 ـ وأجمل تسجيل الفيهو الصولو الجميل بتاع محمدية أخر ألأغنية كان سامبا ترقص المشلول
11-13-2011, 12:59 PM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
معظم أغاني إبراهيم عوض وسيد خليفة.. يا سلوى قلبي شن سوا.. الدنيا منى وأحلام.. يا جمال دنيانا يا جمالا..
سيد الإسم لي أحمد الجابري عندها وقع خاص.. مرت الأيام كالخيال أحلام مع تسريع الإيقاع.. سال من شعرها الذهب لي ود البادية.. الفنجرية.. لاسلام منك ولا منك تحية حمد الريح.. وين وين يا حلو..الكابلي.. جربت هواه وقليبي أنكوى.. وردي.. لابس البمبي شرحبيل.. يا زاهي لونك حبيت عيونك..وإيه أسباب جفاك زيدان..
11-13-2011, 01:05 PM
عابدون محمد عابدون عابدون محمد عابدون
تاريخ التسجيل: 07-30-2008
مجموع المشاركات: 2607
بشوف في شخصك أحلامي ودنيا تفيض بأنغامي وسحر الدنيا في عيونك يبعد عني أوهامي بشوف الكون جميل وبديع مر أيامي يبقى ربيع احب الدنيا لي حبك ويسعد حبك أيامي رياض وزهور على خديك بديعة بتخلب الأنظار تزيد فوق الجمال الفيك معالم كلها اسرار تخلي الدنيا في عيوني جمال وكمال بيتجدد أمل بسام بيحدوني اغني اليك واتودد ولحني الغالي اهدي اليك وانبت للوجود أزهار
ياحبيبي الدنيا ما احلاها بديعة وحلوة بين ايديك فهل أيامي تنساها إذا ما غبت عن عينيك هويتك صرت ولهانك عشقت الدنيا دي علشانك كتير جددت ذكراها كتير غنيت من شوقي إليك
11-13-2011, 01:10 PM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
شوفي يا داليا الغناء السوداني كلو سمح ما اكضب عليك و طالما قلتي اجمل الأغاني فياخ ما تقولى دي تقيلة ودي خفيفة خلي الناس تكتب الأغاني العاجباها . لكن بأكد ليك انو إي زول بعد يكتب تاااااني بقوم بتذكر أغنيات جميلة و قلبوا بيأكلو عشان كدا قبل قلبي يأكلني بقول ليك :- كل أغاني الحقيبة جميلة . وكل أغاني الكاشف جميلة و كل أغاني أبو داؤود جميلة و معظم أغاني حسن عطية جميلة و معظم أغاني إبراهيم عوض جميلة و كل أغاني الكاشف جميلة و كل أغاني شرحبيل جميلة و معظم أغاني وردي جميلة اخص منهم (خاف من الله - الود - جميلة ومستحيلة - اقابلك - بناديها) معظم أغاني ود الامين اخص منها ( بتتعلم من الأيام - الموعد - ذاد الشجون - قلنا ماممكن)
كما ارشح اغنية (اسحار الجمال) للمنافسة بقوة كاجمل الأغاني . و ارشح عدد من اغنيات عبد الدافع عثمان (البحيرة - مرت الأيام) و ارشح (هذه الصخرة) للعاقب محمد حسن. و ارشح (بعد الغياب) لصلاح مصطفي (بس ما بصوت صلاح) و ارشح عدد مهول جدا من اغنيات محمود عبد العزيز .
يا داليا الموضوع دا كبيييير ياخ و ما بقدر اكملوا و ما بقدر اسكت منو فمعليش ياخ .
11-13-2011, 03:52 PM
محمد النيل محمد النيل
تاريخ التسجيل: 10-08-2009
مجموع المشاركات: 5899
لكين يا جماعة إنتو دايرين الجد؟؟؟ أنا تقييمى للأمر بختلف تماما
فى وقت من الأوقات كان أجمل أعنية عندى بتاعت وردى حققنا أخلامنا لكن فى وقت آخر أصبحت أغنيتى المفضلة بتتعلم من الأيام لى ود الأمين وفى وقت كانت أجمل أغنية عندى قلبى دقة لشرحبيل
شنو اللى بيبقى الأغنية سمحة؟؟؟
أنا إكتشفت متأخر جدا بغض النظر عن الكلمات أنو صوت المطرب ونوعيته وطلاوته هو اللى بيبقى الأغنية سمحة مع اللحن المعقول
مثلا : أغنية مرت الأيام المستهلكة جدا فى أوقات مضت أصبحت بالنسبة لى وقد تكون لكثيرين أغنية عادية وملولة من كثرة الإستماع لها فيما مضى وأحياها فى فترة من الفترات فى بدايات الثمانينيات المطرب سيف الجامعة وبعد ذلك ظلت أغنية عادية
.........
لكن بعد أن أدتها فهيمة عبد الله بذلك الصوت المتفرد ذى الإمكانيات الخرافية أصبحت هذه الأغنية بالنسبة لى أجمل أغنية بل أجمل أغنية منذ أن أصبح هناك غناء فى السودان المعاصر إبتداء من خليل فرح والى اليوم
صوت المطرب وأداءه هو الذى يحدد مصير الأغنية ووضع مكانتها من قبل المتلقيين طبعا بعد إجازة القصيدة وكلماتها
من أبسط الأغانى فى السودان لحنا وكلمات هى أغنية ( إنتى كلك زينة) لحمد الريح ولو غنيتها فى مكان إحتمال يضحكوا فيك... لكن لو غنتها فهيمة بهذه الأمكانيات الصوتية بنفس أسلوب حمد الريح سيكون لهذه الأعنية شأن
إذا الحكاية فى صوت المطرب
.......
وعليه أرشح مرت الأيام بصوت فهيمة وحتى إشعار آخر
11-13-2011, 04:04 PM
khaleel khaleel
تاريخ التسجيل: 02-16-2002
مجموع المشاركات: 30134
تحياتي ياداليا ... وضيوف الأغاني الجميلة ... عيدكم مبارك .. شوفي الخليل ده بالله كتب شنو ( عبد المنعم حسيب كبرياء وعيونك كانو في عيوني) غايتو عيونك دي أنا لم أسمع ما يقاربها لحنا وكلمة وطربا .... .... بالله ياخليل نزل الأغنية دي بصوت المرحوم عبد المنعم حسيب ... هذا وبعد إذن صاحبة البوست ... الشفيع إبراهيم
11-13-2011, 05:52 PM
سفيان بشير نابرى سفيان بشير نابرى
تاريخ التسجيل: 09-01-2004
مجموع المشاركات: 9574
اها يا داليا يعني عايزاني كل ثانية اتذكر و اجيك هنا شايل أغاني زي خليل اخوي دا !!؟
كدي امشي كدا علي النعام آدم او امشي كدا ابراهيم موسى ابا او شوفي رمضان زايد و شوفي عبد العظيم حركة و شوفي محمد البدري و تعالي اسمعي وشوشه عند عادل مسلم ياخ القصة دي صعبة وما بتحدد و هي ذاته حاله نفسية ومزاجية عند اى زول او زولة برااااااهم كدا .
يا محمد النيل سلام عليك وعيدك سعيد :-
Quote: مثلا : أغنية مرت الأيام المستهلكة جدا فى أوقات مضت أصبحت بالنسبة لى وقد تكون لكثيرين أغنية عادية وملولة من كثرة الإستماع لها فيما مضى وأحياها فى فترة من الفترات فى بدايات الثمانينيات المطرب سيف الجامعة وبعد ذلك ظلت أغنية عادية
اها شفته مرت الأيام دي لما اتغنت وضعت سد كاامل وكبير في حقل التلحين في السودان و للابد . دي اغنية من الكباار و هي البتجمل الناس مش الناس بتجمله .
رايكم شنو في العزيزة بتاعة اخونا وحبيبنا الموصلي ؟
رايكم شنو في موجة بتاعة سيف الدسوقي و بشير عباس و البلابل ؟
يا جماعة الموضوع دا صعب صعب رايكم شنو في (غرس دمي) لعركي ؟ اقول ليكم حاجة انا تاني ما بجي هنا .
11-13-2011, 05:56 PM
محمد النيل محمد النيل
تاريخ التسجيل: 10-08-2009
مجموع المشاركات: 5899
معليش للتكرار دون قصد لكن والله يا سفيان فاهمك فاهمك والله الشغلانية صعبة
أنا الغناء كلو عندى سمح لكن فهيمة دى أحسن صوت مر فى السودان على الإطلاق ما حكاية إخلتلاف أذواق وآراء انا زول مارست الغناء وقريت موسيقى وبعرف فى الأصوات
فيهيمة دى خلاس نهاية التاريخ فى الغناء السودانى
فهيمة دى مجرمة عندها صوت غتيت أقول شنو تانى عاد ما لاقى لى وصف أقولو
مجمرمة دى بنقولا لى الزول الحريف جدأ
أها التعبير دا مش زى نفس تعبيرك
Quote: اقول ليكم حاجة انا تاني ما بجي هنا
11-13-2011, 06:10 PM
ALZOLZATOO ALZOLZATOO
تاريخ التسجيل: 03-14-2002
مجموع المشاركات: 4216
داليا ... الموضوع مزاج و ذوق ترشيحاتي بالترتيب ... 1. "هل أنت معي" بالعود أبوداود و عزف برعي وحدها لا شريك لهما…فلم أجد أي تقليد مقنع.... ثم بعد ذلك ... 2. كنوز محبه… زيدان 3. قصر الشوق ... زيدان 4. يا مولاي بشكيلك شقاي و غلبي .. الجيلي الشيخ 5. الطير المهاجر … وردي 6. لا شوفتن تبل الشوق… النعام أدم 7. عروس الروض .. ترباس 8. يالغرامك لجسمي ناحل ... خوجلي عثمان 9. ماذا يكون … الكابلي بالعود 10. غرامي الأول … رمضان حسن
عذرا أمبارح كنت معزولة ..تلفزيونا وتلفونا والإنترنت كلهم قطعوا بسبب عطل من الشركة المخدمة ..
وبالمناسبة دي خلوني يا جماعة أقول ليكم جربوا يوم عيشوا من غير التلاتة ديل ..حتلقوا الدنيا هادئة
بشكل ..وحتلقوا زمن كتييير تعملوا فيهو حاجات كتيرة مفتقدنها حتقروا وحتنموا و حتلقوا زمن تفكروا
كدي جربوا ..
نرجع لموضوعنا ..
ما حابا أحجر على زول في إختياراتو ..
لكن التحديد بسبب أنو عندي مشروع ليهو علاقة بالتعريف بالغناء السوداني ..وحبيت ابدا بالاغاني ذات الايقاع الخفيف في البداية وأكتر من كدة ما بقدر أقول وما بقدر اصرح ..لحدي ما الموضوع يتنضج ..
وعموما مرحب بكل الإسهامات ..وانا بغربل منها أعمل شنو مع ناس سفيان ديل
وشكرا للجميع لحدي ما أجيهم واحد واحد ..
11-15-2011, 08:14 AM
بدر الدين محمد بدر الدين محمد
تاريخ التسجيل: 06-13-2011
مجموع المشاركات: 554
الاخت الفاضلة والزميلة الدراسة داليا حافظ كل سنة وانتي طيبة وربنا يحقق امانيك ،، اها نجي للغناء ؛ والله حسب راي الخاص يا داليا انو كل الغناء السوداني جميل حد الثمالة ولك الفنانين السودانيين يطربون من لا يطرب ولكن نحن ذي ما بيقولو اعلامنا الخارجي بدا متأخر لذا لم نجد حظنا من الانتشار وهذا موضوع آخر سارجع لها لاحقا ،،،، وعلى العموم بالجد الموضوع صعب جدا لكن كدي اتذكر ليك من الغناء (الخفيف) حسب طلبك ،،،
1. انا غنيت ليك اغاني 2. عشان خاطرنا ترجع 3. الليل الليل يا جمال الليل 4. انا في التمنى وروعتها بصوت الرائع محمد اسماعيل 5. ارجع تعال عود ليا جدد حنانك ليا 6. الكنينة يا رطب الجنينة 7. اشجيني وخليك قريب واسمعني لحن الهوا بالله يا العندليب 8. بيني وبينك والايام قصة حب طويلة 9. انا صادق في حبك لو قلبي اتصل بي قلبك 10. حياتي حياتي احبك انتي كحبي لذاتي 11. عينيا يا سبب الازى ساهرتي بي آخر جزا 12. زينة البنات ياالسمحة انا جاييك عرسي 13. هجروني هجروني الليلة وا ذنبي 14. حبيب انا وسمير انا يا ضانيا 15 . لون المنقة ياالشايل المنقة وكيف ما عارف كيف نحن بنشقى نحن بنشقى 16 . نور العين انت وينك وين 17. انا ليهم بقول كلام دخلوها وصقيرها حام 18. يا سلوى قلبي شن سوى 19. في مسيرك يا الهبب سلميلي على الحبيب والمهم تلقيهو طيب 20. العجب حبيبي ما ردالي تحية دموعي سالت والمنام ابا ليا العجب حبيب 21. ليه كده الظلم ده ،،، وبرضو لك كانت بصوت محمد اسماعيل 22. كلمني يا حلو العيون حرني صمتك يا حنون 23. افكر فيه واتامل 24. سمح الريد نساني متين العود تاني 25. غزال البر يا راحل حرام من بعدك الساحل 26. ما قلنا ليك الحب طريق قاسي وصعيب من اولو 27. ما هماك عذابنا ولا دموعنا وشقانا نهديك المشاعر وتخون الامانة 28. اسمر لونه لا دن جسمو يزدري بالبروق فر بسمو 29. رسل ليا هدية لطيبة خلت قلبي يحن ويميل ...... يا منديل 30. اسالوه قايل الناس نسوه
وهناك الكثير الكثير ولكن ان إلى الآن لم اختار الاغاني الجميلة هذه فقط الأغاني الخفيفة وهي ايضا جميلة وهذا ما اسعفتني به الذاكرة ولكن لي عودة ...
تحياتي : ياسر العيلفون
11-14-2011, 03:29 PM
khaleel khaleel
تاريخ التسجيل: 02-16-2002
مجموع المشاركات: 30134
معليش يا داليا الواحد لما قال ما بجي هنا مش عشان حاجة او كدا بس عشان كلام الغناء دا حار و بوجع القلب و بسعده و الوجع و السعاده الاتنين صعبات و طاقتهم مع احوالنا العجيبة بي بتودي في ستين داهية كان فرح او حزن فياخ اعذري اخوك ساكت .
بخصوص الغناء الخفيف يا داليا اختى اقعي ابراهيم عوض ملك ملوك الغناء الخفيف و اختار ليك :- ابيت الناس جافيت خلاني خاصمته الكل علشان حباني اها الاغنية دي سماحه و خفه وفيها كلام عجيب قلبك حنين و على قاسي للناس بتلين وانا لي ناسي صابر لمتين جارح احساسي صابر متحمل ازاك يا ناسي انا بالدموع ودعته حبي و بالامل صبرته قلبي الصبر طال كتمته غلبي رضيت بالهم و الهم ابالي و ممكن ترقصيها جيركي كمان يا داليا لانو زمنه عجيب و ايقاعه اعجب قطارو اتحرك شوية شوية من بعيد بايدو شفتو لوح لي بكت عينيه بكت عينيّ متين يا الله ترجعوا ليّ اوعه يقولوا ليك في اخفه و اظرف من كدا ابراهيم عوض دا مابقي زري سااكت كدا دا طلقيبه .
و ممكن برضو تسمعي العجيبه الفريده بتاعة الجابري :- ناسي الحب و قلبك خالي اعطف مرة حن لي حالي يا مسهر عيوني ليالي يا سلام ياسلااااام يا سلااااااااااااام دا الغناء و الله ريدك ما نسيت ايامو حتى عيوني تروي غرامو خليت قلبي في الامو و اصبحت انت قلبك خالي تبسم روحى تبقي سعيدة واشرب من كؤوس الريدة والبسمه عنى بعيدة كان ايه ذنبى مالى ومالى الريد للأحبة مودة والصد لى سده بسده ايام فى العمر تتعدا ليه نقضيها شوق طوالى
ولا حول ولا قوة إلا بالله .
يا داليا بحثك دا شنو ياخ شركي اخوك معاك لوجه الله ياخ .
قولو إتنين مسو نوركم الأغنية دي فيها كلمات جميلة جداً سيد عبدالعزيز
مسو نوركم كلمات: سيد عبدالعزيز
************ مسو نوركم شوفوا المن جبينة صباح والصباح إن لاح لا فايدة فى المصباح ********* هل اتاك حديث الكوكب النضاح قمرة تمطر خمرة حارسا الفضاح لو تحيجنا محاسن شمس للايضاح مابتحيجنا محاسن محيها الوضاح ********* نور جمالا دهشنا معشر الفصاح بين ناطق صامت بين صامد صاح غانية غالية محاسن فيها شوف يا صاح الجمال الفيها..كل معناً صاح ********* ننظر الايات من نور على الالواح المعانى الفُرد ومُنية الارواح فى العيون المُرد والسحر لاواح تجلب الالباب ويفرح النواح ********* القوام اللادن والاريج الفاح من جسيما الناعم الاسمر التفاح خلا عقلى وخلا فى هواى كفاح جيش هواها احتل قلعة الاصفاح ********* روضة غنى جمالا يجلب الافراح حورا من الجنة فيها تسقيك راح كل هذا تراه ما بزيل اتراح من بحبو تهالك واستراح وراح
********* ياليالى احبابى ما شفيتى جراح بل شفيتى فؤادى ومدية الجراح صرت اتلو حديثك فى الوجود بصراح لو تليت بو كتابى سميت بالشراح ********* كم نظرنا مناظر يعلم الفتاح لو قفلنا قلوبنا كانت تكون مفتاح ادرى ام لم ادرى صرت كالملتاح لو رضاكى هلكنا للهلاك نرتاح ********* ما جنيت بهواى ما على جناح إشتكيت للقمرى لم يعيرنى جناح يكفيك لسانى الغنا فيك ليك لوناح لو رثيت بو حياتى ما إحتجت لى مناح *********
11-14-2011, 11:03 PM
مامون أحمد إبراهيم مامون أحمد إبراهيم
تاريخ التسجيل: 02-25-2007
مجموع المشاركات: 5380
المهرجان .. الكاشف أسمر جميل . الكاشف أنا من شجوني باكيات عيوني مابصدقكم .. عثمان حسين الناس بتلوم .. صلاح محمد عيسى البعدو يجنن .. أحمد المصطفي غني يا قمري .. للعاقب محمد الحسن ياحليلك يا أسمر .. العاقب سكر سكر ... الكابلي صدفة غريبة .. إبن البادية أسمر .. محمد الأمين قالوا متألم شوية .. محمد الأمين ياحاسدين غرامنا .. محمد الأمين نبيع الكمبا .. خليل إسماعيل إنت ياحلوة .. أبوعركي سهرنا الليل .. أبوعركي
ولسة يا داليا في بالنا الكتير لكن الليل أليل !
على أى حال فكرة التوب تن لأجمل وأرق أغنية سودانية دي فكروا فيها ،،،، يعني بعد ما يتم حصر الأغنيات الخفيفة الما عندها حد دي ، ممكن نعمل تصويت لأجمل وأعذب وأجود عشرة أغنيات خفيفة سودانية !
ومن هسع المهرجان حتكون في التوب .. وبعدها إحتمال أنا من شجوني !
تصبحوا على ألف خير
11-14-2011, 11:46 PM
smart_ana2001 smart_ana2001
تاريخ التسجيل: 04-17-2002
مجموع المشاركات: 5695
في البوست دا انا تاني مابجي == الشمار كتير انا تاني مابجي اها دي كيف ياداليا ياجماعة والله الواحد مستمتع بالبوست للطيش لانكم بتذكرونا حاجات حلوة ومعها ذكريات وخلونا نعاين فيكم بس من الافضل عشان من نسك ليكم من ( من بعيد لي بعيد وري العين جمالك لو لحظات قليله ) الى نصل ( محبوبي سافر الليله ياناس بقطر حداشر )
Quote: زمان قطعت نفس الشباب قطع .
انت زاتك هنا مقطع نفسنا وانا زاتي تاني هنا مابجي == خلوني في نوم إتقلّب
كل سنة والجميع بخير
11-15-2011, 08:49 AM
Emad Ahmed Emad Ahmed
تاريخ التسجيل: 08-12-2009
مجموع المشاركات: 12705
سارة الضارة.. بري يا اختي أسأليني تاني..:-) والله انا زاتي لمن إتهجمتا بعد قريت كلامك ده.. وين وين؟؟ ياخ آه وفي ال آه معاها نقزة كابلي بي كراعو اليمين ديك.. طبعا انا قلت نقزة عشان بكري ما يعولق لي الكلمة :-) بالمناسبة إتوفقتي في أسامة الشيخ والعجب أغنية حسن عطية يا الله القوي انا شن بسوي سافر حبيبي بي التكس الجوي... وياداأ.حياة..حبيبي السااأدة ..والليلة مااا جا.. وما أدراك ما بي حبك نعم آمنت وأهلا قلبي سلمتك..جمالك ما جمال عادي ملكتي زماماي ةاقيادي وصدر في حكمك ابعادي...
تنويه بسيط.. الأغاني الأخيرة دي ما عندها علاقة بيك يا سارة عشان ما يتشابه عليك البقر يعني..
11-15-2011, 09:28 AM
سفيان بشير نابرى سفيان بشير نابرى
تاريخ التسجيل: 09-01-2004
مجموع المشاركات: 9574
المصير - ابراهيم عوض نور العين - وردى جميلة ومستحيلة - وردى اقابلك فى زمن ماشى وزمن جاي وزمن لسع اشوف الماضى فيك باكر واريتو باكر يكون هسع-وردى الجؤيدة - محمد الامين الساقية - حمد الريح ما فى حتى رسالة - الجابرى الزمن كان مبتسم- صلاح مصطفى الذكريات - عثمان الشفيع بالناسبة فى اغنيات لا حصر لها ممتازة وجميلة وكل ما اتذكر سأضيف مع خالص تحياتى
11-15-2011, 11:43 AM
Dalal Ezzaldin Dalal Ezzaldin
تاريخ التسجيل: 06-19-2008
مجموع المشاركات: 1406
الاخت داليا سلامات واضح ان هنالك جائزة معتبرة لمن يعرف اجمل اغنية سودانية لذلك حاولت استعين بصديق لمعرفة اجمل أغنية سودانية ، ووقع اختيارى بأن استعين بابنتى . سالتها عن اجمل اغنية سودانية فاجابت اغنية فاكرنى سالتها عن الفنان قالت هيفاء وهبى وطارت الجائزة المخفية
11-16-2011, 11:32 AM
داليا حافظ داليا حافظ
تاريخ التسجيل: 06-06-2008
مجموع المشاركات: 5055
صديق الكحلاوي رايكم فيهو شنو ؟ الكحلاوي دا ملك الهجيج و الطرب و الغناء الراقص و صاحب اجمل روح في ساحة الغناء السوداني اهو استلموا و خمو وصروا.
ازاني سرف دمعي بلاني لي هادي شرحو عيني بيك فرحوا قلبي فتكتي جرحوا و امسكي عندك تاااااني الكحلاوي حبيبي أنا أمتي ارك في نعيمك في ظل ضراك أنت مفرد مالك شراكه في المحاسن مختص براك آمنت بالله العلي العظيم دي اغنية بتكل رسمي و فيها هجيج الف انصح بسامعه انو يختها بصوت الكحلاوي و الدنيا ليل . تاااني الكحلاوي هاك امسكي ريدة الزمان يا هووووووي هوووي يا هوي الله لي انا احي ناس الريله الريله الريله جفو لي ريدة الزمان يا حليل عااااد ريدة زمااان يا حليله عاد كان زمان الناس موده وكان كلام الريد حنان كان حديث الحب منأجاة و كان لقاء المحبوب آمان دا الكحلاوي لما كان بغني (على اخر عهده و كنا صغار) كانت الثورات كلها تتلمى في حته واحده . تاااااني الكحلاوي هاك امسكي طريقك حبك فرح عمري وطريق الجنة للشقيان وحبك فوق كلام الحب يتابك الزول يقوم فرحان يا جماعة الله كلمناكم قلنا ليكم سيرة الغناء دا بتجيب اجل الزول ياخ ارحمونا بالله . تاااااني هاكم الكخلاوي صرح وقاصد وداري و قال فاتني و حياة خداري عاليات الشلاخ مدارع يا الساكن غرب داري اضيع انا الله حي غزالي يا غزالي حبيب تعال شوف جفاك ازالي غزالي يا غزالي دي ممكن ترقصي فيها و يرقص اي زول وزولة و اقفين جمبك حتى لو كانو شنو داك .
تاني الكحلاوي رايكم شنو ؟ كمل صبري و تعبته خلاص شغلني الريد اثر قلبي و ما وجدت خلاص الخدود نوار ريده باستمرار باقي لي عاده يوم مع التيار اقطع المشوار امشي و اتهادى مافي عندي خيار طالما الازهار اصلي رياده ههههههههههههههههههههههههههههههه يا سلام يوم ابيت مصلوب الفكر مسلوب و ابتهج مرات يوم افوت ايوب راضي بالمكتوب حابس الاهات يوم افكر اتوب من هوى المحبوب حتي لو لحظات كل ساعه وحين بي وراء السمحين روحي مشدوده ريده ليها سنين في عيوني تبين عليّ موجوده قولو لي آمين آمين آمين روحي في السمحين تلقى مقصوده يا خلق الله عليكم الله نعزل شنو و نكتب شنو ونقول شنو !!!؟ ياخ بحثك دا ممكن ما ينتهي نهائي يا داليا نهائي .
يلا علي شمبات و اسمعو خضر بشير قسيم الريد لي جود بالطيب يا اخ البدري و اه اه اه اه اه يا الرشا المكحول بي لو تدري قسيم الريد دي مفروض يدرسوها في المدارس رسمي وشعبي
هاكم حرقتني النار النار يا حبيبي اتحدي زول يسمعه و ما يطرب و يرقص و يدستر رسمي و شعبي . و يا حلاوة عليك يا جميل بت النيل النيل النيل خلاني يا الاتنين يا شلتو نوم العين جزيرة بين بحرين يا توتي دربك وين
يا اهل الله والله دي شغلة صعبه شديد الناحر فؤادي موقد جوفي حر اضرم نار وجدي نسام السحر دامع لجه طرفي يام طرفا سحر البسم المفلج للانفاس سحر الله يسألكم في ناس بتكتب شعر او تغني احسن مننا !!!؟ بالبدر او بالزهر هم ما انصفوك يا حليو هم ما انصفوك كيف يجهلوووووووووك وكيف يجهلووووك؟ وعلى الجمال العادي راحو يمسلوك؟
و هاكم القنبلة العجيبة على قدر ما اوصفك لا يمكن انصفك يا فااااتن يا جميل دي مووووت احمممممر رسمي ياخ خلونا ياخ لحنها من السموات و المكاشفي دا بجن فيها رسمي فقد آوتي مزمار داؤود . كنت معاهو هسيييييي البشعوري حسي ولع نار غرامي و مشتاق ليهو لسه اها ح تقولوا شنو في غناء زي دا !! دا هسي غناء يختاروا منو ويخلوا منو !!؟ برضو ممكن تختارى انة المجروح بصوت المكاشفي دا لانها احدى عجائب الغناء السوداني الكتيرجداً في فرايده و عجايبه .
و ايه يا مولاي ايه عسعس الليل فنام فاكتسى الوادي ظلاما إن يك صمتي رهيباً فان في الصمت كلاما وآري الوجه تجلى منه الشعر تدلي عجبت عيني لبدرِ منك فاليل ولى الموت الغير رحيم ياجماعة الغير رحيم نهائي لانو ما ممكن نموت ونخلي غناء زي دا !!؟
قوم بينا نلاقي مناظر تفرح وتسر الناظر تقري الارواح بي شوفه خليك يا صاحي محاذر و افينا وفاءاً نادر وساعدنا كمان بالروقه الأغنية دي سمع وشوف و هجيج اها شنو ليكم ؟
ساهر طرفي ما نمته من يوم شفتك اعلنته أني اسير سلمته و بمن سواك امنتا امنتا امنتا
و هاك عبد الدافع دا حلفتك بالكلمة الحلوة و العهد الغالي يا اجمل ذكرى عشناها ليالي ما تحطم قلبي ارحم بحالي و صوت زي الجرس و حلاوة ونداوة مبالغ فيها . و مرت الايام كالخيال احلام و انطوت امال كم رواها غرام
هبت هبت نسائم الليل و عبد الدافع قيثارة الغناء المجروحه بصوته الملائكي يقطن الارواح مرة و للأبد . دا من الخفيف عند عبد الدافع لكن عبد الدافع دا ذات نفسه يملك اغنية تنافس في افضل ثلاث اغنيات سودانية . صراحة لله بوستات الأغاني اخوكم عاااادي ممكن يروح فيها و خصوصاً لما يكون فيها مفاضلة بين اغنية و اغنية دا بالجد امر قاسي وصعب عشان كدا قبييييل قلته ليكم ما بجي و ماداير معاكم بس ما بقدر كمان .
شمبات شنو ياخ شمبات تطير شمبات خلا فوق للقنا قلبي حباك عيني انا والله سفيان عاد دا كلام دا عايز تمشي في الكحلاوي دا سااااااااااهي بس
Quote: صديق الكحلاوي رايكم فيهو شنو ؟ الكحلاوي دا ملك الهجيج و الطرب و الغناء الراقص و صاحب اجمل روح في ساحة الغناء السوداني اهو استلموا و خمو وصروا.
ازاني سرف دمعي بلاني لي هادي شرحو عيني بيك فرحوا قلبي فتكتي جرحوا و امسكي عندك تاااااني الكحلاوي حبيبي أنا أمتي ارك في نعيمك في ظل ضراك أنت مفرد مالك شراكه في المحاسن مختص براك آمنت بالله العلي العظيم دي اغنية بتكل رسمي و فيها هجيج الف انصح بسامعه انو يختها بصوت الكحلاوي و الدنيا ليل . تاااني الكحلاوي هاك امسكي ريدة الزمان يا هووووووي هوووي يا هوي الله لي انا احي ناس الريله الريله الريله جفو لي ريدة الزمان يا حليل عااااد ريدة زمااان يا حليله عاد كان زمان الناس موده وكان كلام الريد حنان كان حديث الحب منأجاة و كان لقاء المحبوب آمان دا الكحلاوي لما كان بغني (على اخر عهده و كنا صغار) كانت الثورات كلها تتلمى في حته واحده . تاااااني الكحلاوي هاك امسكي طريقك حبك فرح عمري وطريق الجنة للشقيان وحبك فوق كلام الحب يتابك الزول يقوم فرحان يا جماعة الله كلمناكم قلنا ليكم سيرة الغناء دا بتجيب اجل الزول ياخ ارحمونا بالله . تاااااني هاكم الكخلاوي صرح وقاصد وداري و قال فاتني و حياة خداري عاليات الشلاخ مدارع يا الساكن غرب داري اضيع انا الله حي غزالي يا غزالي حبيب تعال شوف جفاك ازالي غزالي يا غزالي دي ممكن ترقصي فيها و يرقص اي زول وزولة و اقفين جمبك حتى لو كانو شنو داك .
استغفر الللللللللللله عيني باردة ودي متعة الكحلاوي لما يكون في قمة المتعة والنشوى فرفور براسو المدوقس دا زمان كنت بدخل ليهو كسرات الكحلاوي دي كانت ممتعة هسه شبكها لينا اوركسترا وهلم جرا ... ( غرقان وبحر الريد ظلوم قالو البتبلبل يعوم ) (يازهرة تتحدى النجوم ... ياقمره فاجة وسط غيوم ) (من يوم رايت شخصك لاخلاقك هويت ) ( ياخي بتغازلنا بالخاتم وتدلل علينا كمان ) (مابعود انا لي طريقك بعد ما خليتني وحدي وبعت عمري من نصيبك ) ( وهديت الباقي من عمري ليكم ياحسان الحور ) (كان زمان اهلنا بقولو كان الحب حلال ماكان حرام ) ياطير ياطير ياطير ياطير انا ياطير محل ما تطير بشوفك ياجماعة لاتنسو بأن الكحلاوي هو من ودع صديقة عبقري الاغنية السودانية الكاشف بأغنية (وداعا روضتي الغنا ) وكانت هذه الاغنية اتفاق بينهم البموت اول يغنيها الاخر في تشيعة ... ودي اسمها الالم اللذيذ
ياسفيان ... بعد ماتنتهي من الكحلاوي دا اطلع الكبري وامشي بحري سر الهوى والغنا في شمبات حليل مجلسنا الحياء والعفاف حارسنا استاذ الغرام درسنا ولي شجر المحنه غرسنا . . انا قلبي لولاها الفي شمبات براها ياسفيان انا خايفك بالشوق تضيع عمري وتكون علي الجاني ههههههه (كنت معاهو هسة ومشتاق ليهو لسه ) ياهو سمرنا وياهو غنانا ياسفيان ناس بحري كمان عندهم غنا براهم سفيان .. سفيان .. تاني ماتجينا هنا انت ماقلت تاني مابتجي مالك علينا ياااااااااااخ والله كل ما واحد من الشباب يذكر اغنية اخوك يعمل ليهو نقزة زي بتاعت عازف العود ولدنا عوض احمودي هوي ياحلوين البوست دا مفخخ
11-16-2011, 12:04 PM
صلاح الدين نزلاوى صلاح الدين نزلاوى
تاريخ التسجيل: 11-10-2011
مجموع المشاركات: 959
Quote: تاني ماتجينا هنا انت ماقلت تاني مابتجي مالك علينا ياااااااااااخ والله كل ما واحد من الشباب يذكر اغنية اخوك يعمل ليهو نقزة زي بتاعت عازف العود ولدنا عوض احمودي هوي ياحلوين البوست دا مفخخ
يا وليد يشهد الله كنت صادق لما قلته أني ما بجي هنا مش عشان ما عايز لا لا بس عشان عارف الشغله دي ممكن تكتل رسمي وشعبي . يا حبيب النقزة خليها انا نقزة و دمعة و ضحكه يمين بالله كل ما يذكروا اغنية تلقاني زي المجنون ردد فيها .
الكحلاوي يا وليد الكحلاوي !!! الحمد لله أنا لقيت لي فرقه في الحياة دي و اتعرفته عليهو و لزيت ليهو عربيتو على مدار تلات سنوات من عمري في المتوسطة كل ما يجي شتاء سنة من السنوات التلاته دي انا و مجدي ولدو تلقانا لازين العربية من الصباح قطع شك مجدي بكون ممغوس لكن انا فرحاااااان . بعدين يا وليد نو الزي الكحلاوي في الرميات و القصص دي !!!! الفخيخ بتاع البوست دا اخوك عرفو من قولت تيت . فالله يستر ساكت .
يا وليد رايك شنو في رمضان زايد ومحبتوا و غناهو لناس بحري !!!؟
هههههههه خليك مع الزمن
11-16-2011, 03:22 PM
khaleel khaleel
تاريخ التسجيل: 02-16-2002
مجموع المشاركات: 30134
حركة ملك ملوك الطرب و من يملك مساحة واسعه في الحانه للفلوت الحنين كروحه .
ارض الحبايب ما يجي يقول لي دي اغنية جيهة الأغنية انا بهجج فيها لما نفسي يقوم.
قلبي ما بيعرف يعادي قلبي شمعه الريح طفاها شفته ليك شمعه بتعادي مها يبدا القسوة قلبك تلقى بالحنية بادي
شفتو حركة دا الكان بعملو في الغناء السوداني !!؟ شفتو غناهو مختلف كيف ؟
مشتاق لحديثك لعينيك مشتاق لنظر من عينيك مشتاق للشامة الفي الخديك هنا الصيوان بيرقص و كل الحوليك بدستروا
زاد زاد زاد زاد زاد الشوق علينا عشان امبدة ترجع دي انا عارف ناس كانو بسببه الليل ما بنوموا و كانت قابضة الجو سنين ودنين .
أنا غنيت ليك اغاني و الله دي فيها فلوت يجنن المجنون ذاتو ودي واحدة من الاغنيات البتتصنف انها من الأغاني الجماعية و عبد العظيم حركة بيجن رسمي فيها و العجب إن سمعتوها من العشق الأبدي محمد ميرغني .
يا قلبي توب توب توب توب استغفر الله يكفيك عذاب شقى ومذلة العذبوك ما بخافو الله يـــــــــــــــــــــــــــــــــلا يا برضو فيها فلوت بجنن جن و فيها هجيج عجيب . العذبوك ما بخافوا الله يـــــــــــــــــــــــــــــــلا القليب الراسمه حنه قلبو من قلبك احن ليهو داير (وهنا بيرقص رسمي وشعبي) ياخ في امرك محنه الأغنية دي البيقول ليك يا داليا ما بترقص الراهب العابد بيكون كضب عليك اقول ليك حاجة البسمع حركة وما يرقص مفروض يكتلوهو
مالك مجنني شاغل علي بالي مالك معذبني ما بتعرف احوالي اعز زول في الناس يا اغلي من غالي ويا الله يا عالي يا مجيد أننا نحب السلام و نحب الجمال و انت السلام انت الجميل فارحم عبدك عبد العظيم حركة فهو ضيفك يا الله فهذا الرجل اهدانا ما يحيينا بسلام و بجمال و انه اسعد الناس اجمعين .
يا دمعة بتحنن قليبك يا سكة للماضي بتجيبك انت عارف كيف بحبك اصلو ما بقدر اسيبك
يا جماعة و الله غنانا سمح سماحة اصلو مافي زيها . و يا قلبي توووب واستغفر الله ربنا يتقبلك يا حركة و يرفعك المقام العالي كما رحمتنا و اسعدتنا في حياتك و مماتك .
11-16-2011, 04:27 PM
khaleel khaleel
تاريخ التسجيل: 02-16-2002
مجموع المشاركات: 30134
يا خلو ياخ فى غنية اظنها لابراهيم عوض كتير كنت بترددها .. شنو كده ومعانا
ياخ ناسيها ... اكتبها بدون تحريف فى النص > دائر اللحن و الكلمة
.....
ياخ ست البوست حصرتنا فى الغناء الراقص لكن يا سفيان فى غنى سودانى مباااالغة > > رشوهوا لينا
حاجات ذى ده >> الطير المهاجر وردى خاف من الله وردى المستحيل وردى ارحل وردى الحزن القديم وردى اسفاى وردى جميلة و مستحيلة وردى الود وردى الصوره وردى : : الحب و الظروف ود الامين كلمة صلاح بن البادية
كتير من اغانى عثمان حسين ........... زيدان ابراهيم كابلى >> اها كابلى ده تعال اسمع ليهو رائعة الحسين الحسن حبيبة عمرى وبعداك قوم لف طوالى
... ذكرت مكانا عزيزا على وانت به وانا و الاخر ذكرت حديثك ذاك الخجوله و صوتك ينساب منه الخفر : : : تقولين ماذا تقولين ويحى وهل كنت افهم حرفا يمر ...... فصوتك كان يهدهد روحى ويحملنى بجناح اغر ...... يحلق بى حيث لا امنيات تخيب ولا كائنات تمر
الخال يا اخواني الجميع اصتمتو قولي البحكي سببي الفراق ودموعي سالت تبكي الشابه الاديبه المطربه الفنانه شبه الملاك يا الرايقه يا نعسانه عقد الجواهر الدر شبيه اسنانه يا الزادوك وظيفه وركبت نيشانه الليل و النهار ببكي واقول احييي الجذبت علي فكري و منام عيني اطري الخوة القبيل يا ثريا ايه اسبابي غير ذاك الجمال السحري يا عيون الحبيب انتو السبب في سهري ظمان انا ما اظن ترويني ما البحري ما لمتوني يوم لو شفتوهو ساكن بحري يا ناس الجمال انا امرو حير فكري في معني الغرام يا روحي ايه تفتكري ياريت العزول ينساني يترك فكري وياريت الحبيب في وصفو يقبل شكري الليل و النهار ببكي و اقول احي الجذبت علي فكري ومنام عيني
هاك المعلمه لي بلدنا مفيدة المعلمة ربنا يزيده المعلمه نور لبلاده و بيها يهتدي احفاده
و الخال تاني ليك حق ما تحني لي و انتي في دنياك دي انا انا انا ليك حق حاشاك ملامه اهووووووووي انا لو الؤم علي ليك حق ما دمتي طاير كل يوم لافيك جزائر و الطيور ترحل تغني للربى او للاذاهر انتي لقلوب تسلبيها لذة الريد و المشاعر انااااااااااااااااااااااااااا ايوة و اللله اهوووووووووي انا لو الؤم الؤم علي لي سؤال في ذهني حائر ليك يا بنت الاكابر حبك البتقولي عنو حبك كبير ما ليهو اخر وين لياليهو الجميلة و كل ايامو النواضر
و الخال دا كلامو براهو و غناهو براهو فراق حبيبي الابي ينضاق الليلة وين يا طيبة الاخلاق انا العيون عيانه دايما عيانه دموع عيني ملايانه الحنينه الما بتنسانا الليلة ويييين يا طيبة الاخلاق كلام الناس كتير هو الناس الناس كتير لا حول لا قوة حبي انا في الحشى جوه باربي تنضف الخوة وووووب جسمي الغذيتو انسله دا انا مولاي قدرتو جبته الجمر فرشتو توب الصبر فصلتو عملته ثياب و بللتو ليه يا دنيا تختار تشيلي حبيبي من داري دا انا القدمته تذكري حبيبي بالعلي ما داري وووووب يا حنينه بت امي اموت ريدك علي دمي اموت نشفان من دمي اموت و توازي ناس أمي
و هاكم هججو و افرحو مع الخال كل عاشق يحمل حنانو بين ايديهو فكرو وجنانو كل عاشق حساس فؤادو دا الغرام و الريد شوفو زادو فكرو تايه في ليل سهادو بالحنان و الحب يلهح لسانو كل عاشق يحمل حنانو مرة يفرح لو حبو وافى مرة يزعل لو ليهو جافى برضو يرجع لو عاد وصافى لي سعادتو وريتو وحنانو
مع الخال مستحيل تغمض عينك
ما كنت بتدورنا وتزورنا وتسعدنا يا امل الزمان الريده بين الناس صله ريدتنا الحق حصله ليه يعني داير تفصله الدنيا حب و مواصله
الراجل دا كان عندو محبة و مقدرة في الغناء و حب الناس بطريقة عجيبة
دي ممكن ترقصوها رقبة يا شابات و الله انا شفته عمات و خالات و أمات عملو عمائل في الاغنية دي هاكم اسمعو الخال بغنيها بطريقة عجيبة و صوت اجمل من اي صوت في الوجود واعمام و خيلان و جدود هزوا و رفعو ضرعاتهم في السماء و الخال محمد احمد عوض بسنه الدهب ديك و الطاقية الحمراء و مربع يديهو في صدره حاجة ما تخلص نهائي درب العاشق ابنو خايف لا يحطمنو هوي هوي يا الساده يا الملائكه انا لي حنو حبي الما قدرنو دمي الفي نشفنو هوي هوي يا الساده يا الملائكة انا لي حنو كتير عشاق غيري جنو ما سالين درنا تنو هوي هوي يا السادة يا الملائكة انا لي حنو سالته منو وقلته مالو ؟ قالو لي سدو مالو هوي هوي يا الساده يا الملائكة انا لي حنو دربي الما قبلنو قليبي الحائر جطمنو اها هوي هوي اها وووب وب يا الساده درب العاشق ابنو خايف لا يحطمنو هوي هوي يا السادة يا الملائكة انا لي حنو
و نمشي مع الخال العجيب و نلقي دي ليك ما بنته انا في اشتياق لي شفتك حبيبي و ين انت انا انا انا وييييييين انت ويييين لي مدة من رؤياك يا ليتني كنت شفته ولو في النوم يا اللعهود خنته
الاغنية الفوق دي لما يغنيها الخال في الثورات كان اي زول بغنيها معاهو
ونجي لاخف الخفيف عند الخال و اغنية بتجاوب معاها الخلائق كلهم غناء و رقص وضحك و مشاغلات مع الخال و محموعة الكورس بتعمل فيها عمايل و الخال بيضحك و بيرقص رقصتو المحببة ديك زي الدلرويش المجذوب . ملكة الطرحة و غيرت بالتوب خلتنا في لوعه وفي هواها ندوب في حيرة في لوعه و في هواها ندؤب وصاله بس قاسي ولي كان مكتوب و صااااااااااااااااااااااااااااااااااله لي كان ما كتوب و البعيش ياما يقابل المحبوب القامة مربوعه و ايدا مجدوعه ماشه تتني كالبانه في فروعه و الله هنا في زغاريد وكواريك تجنن الما بجن قالت قالت قالت قالت (الجمهور بكورك هنا و بقولو قالت شنو ) قالت كبرته خلاص و كترو خطابي كترو خطابي كترو خطابي و كل يوم و التاني يدقو في بابي هي لكن اسكيلك العالي ومهرك الغالي خلونى في حيرة و انتى في بالي قالت اسكيلي خلي بعيد ومهري كان غالي دا الغالي يرخص ليك و تحقق امالي القسمه ما باليد وحبي ليك شديد هي بضحي بي ريد واسافر امشي بعيد مناي اسمع بيك يقولو انت سعيد يقولو انت سعيد يقولو انت سعيد لانك اول حب وتاني اخر ريد
دا الغناء الفات مننا ولسه عايش . ربنا يتقبل الخال محمد احمد عوض القبول الحسن لما فعله لنا من معروف عطر به حياتنا و انتشلها من الاحزان و عبئ لنا الفرح للأبد ربنا يرحمو و يعلي مقامه في الجنان فقد اطعم مسمعنا و اطعم ارواحنا و اطعم بطوننا ايضاً نحن أبناء الثورات و طلاب مدارس الحارة السادسة الثورة فقد كنا نذهب اليه في (الكشك) و يعد لنا الطعام بنفسه و كان يخصنا انا و محموعة تتكون من صديقين بأن ناكل معه بعد ان نساعده في تقطيع الرغيف للطلاب . الف رحمة و نور و عطر الله تلك الأيام و سقاها المزن الهواطل .
و امدرمان الثورات ارح الشغل بالي انا بريدو كل امالي اشوف خديدو ما سال عني زاد دلالو ديمة حارمني من وصالو لو يكلمني مالو مالو السرور لي قلبي بيعيدو
هاكم المزيكا المزيك الما زيها نهائي سيد الأسم ... سيد الأسم محبوبي و كتين يبتسم الدنيا يا ناس تنقسم الفرحه تملاها و تزغرد فيها و الشوق يرتسم مرات اقول اديهو كلمة تزعلو حبة عتاب و كلام عتاب انا عارفو ما بتحملو علشان اشوف خدو الحرير الدمعه جاريه تبللو لكني قبال ابدأ بلحظات اقيف اتاملو و اللفته و النظرة البتاخد من عيوني النوم شهور وتجفلو و النظرة والرقة ودلو واشارقو الحلو انسي العتاب الناوي اقولو وارجع منهزم و لما يصل الكسرة موووت انا في العيون ببنيلو دارين من مؤدة ومن منى بضمو في قليبي انبساط ومحبة فياضة وهناء و الله الجابري لما يردد المقطعين الفوق ديل لو كنت بتسمعو صاح بتحس بيهو بموت و يحي تاني .
و ماداير زول يعرفه هههههههه دي زمان اي زول غناها و العجب لو كان بحب ليهو واحده ابوها اسمو مصطفي لي مدة بتذكره و عيني جافو الكرى لو تلقى زول فكره الريده ما بتنكره و ماااااااااا داير زول يعرفه الزكريات مفرحه وديمه العيون تفضحه زهر الربيع فتحه تسبي العيون تجرحه
و هاكم ارقصو و هيصو
حبك ناعم و صدك ناعم تتكلم ناعم وتبسم ناعم الحب في قلبك دابو براعم خلاك احلى و بقيت اغلي و اجمل ناعم اه اه اه اه يا ناعم و الجابري دا سلطان الطرب السوداني الذي مضى و هو لا يملك من هذه الفانية إي شئ فلنتضرع لها بالدعوات فتقبله يا الله و عزه فانك العزيز الرحيم .
يا داليا الكلام دا لو تصدقي لو تكذبي ما عندو حد و صدقيني في ناس هنا دا بموتو و يحيو لما يقرو او يسمعو الغناء دا .
11-18-2011, 08:05 AM
Gaafar Ismail Gaafar Ismail
تاريخ التسجيل: 08-27-2005
مجموع المشاركات: 4951
1- حارم وصلي مالك - عثمان حسين 2- الوكر المهجور 3- أهواك - احمد المصطفى 4- زاهي في خدره 5- من انت يا حلم الصبا- سيد خليفة 6- أسراب الحسان 7- هيجتني الذكرى - إبراهيم عوض 8- أنفاس الزهر 9- وحياة ابتسامتك - محمد الأمين 10- الموعد 11- زرعوك في قلبي - ابو داؤود 12- هل انت معي 13- عازة عز وصالك - الشفيع 14- الشاغل الأفكار 15- يا رشا يا كحيل - الجابري 16- هوج الرياح 17- ليتني زهر - رمضان زايد 18- هذه الصخرة - العاقب محمد حسن 19- الأمان - رمضان حسن 20- افتتان 21- هل تدري يا نعسان - حسن عطية 22- لو انت نسيت 23- ضاع صبري - احمد الطيب 24- يقظة شعب - محمد وردي 25 - الطير المهاجر 26 - لحن العذارى - ابو داؤود 27- الملهمة - التاج مصطفى 28- ضنين الوعد - الكابلي 29- لو تصدق 30- الجندول 31- ما شقيتك - حسن سليمان 32- ماضي الذكريات - عثمان مصطفى 33- انت أغلى - صلاح بن البادية 34 - الفين سلام 35 - في الضواحي - مصطفى سيداحمد ---
Quote: ولماذا لم نتجاوز حيزنا ، ولم نتمكن من العبور للآخر بهذا الزخم الساحر من الجمال والغُنا المامتلو غُنا ؟!!
المأمون أخوي والله سؤالك ذكي و حصيف وحريف و يحتاج لحوارات جادة لكن تصدق رغم وجاهتو دي و رغم انو بيدور في ذهني ايضاً بس انا لما اسمع غنانا دا تاني ما بهمني البعرفوا منو من العالم الخارجي و بيني وبين نفسي بقول و الله العالم دا نص حياتو ضائعة انو ما بعرف غنانا دا .
ياخ هسي اغنيات من إبراهيم عوض بقدر اقارنه بأغاني من طلال مداح ؟!! مع انو طلال دا غنائي غناء الشواطين .
عليك الله يا المأمون اسمع بادي بقول يا جوهر صدر المحافل ياخ دا ترتيل رسمي وشعبي أو اسمعو بيقول :- كم نظرنا هلال ما شاقنا غير هلالو ما اظنو زلال يروينا غير زلالو ياخ عندو حنجرة لا اله إلا الله محمداً رسول الله و الله بادي دا لو حضر زمن ناس سرور وكرومة ذاتهم اظنهم ما يقولو معاهو أم بغم . عليك الله يا المأمون اسمعو كويس لما يرفع حنجرتو ويقول :- آرى الهلال ينقاس وراء محيو يتجلالو يمين الله صوتو هنا يطلق المسجون . او اسمع ذات بادي دا بيغني :- اجسامنا ليه جسمين شئ عجيب في غرامك يا فريع ياسمين بادي دا ما بشر صدقني ما بشر !! وما انا الزول البقدر اتكلم عنو او اقول فيهو حاجة . ياخ برضو اسمعو بيقول :- افكر فيهو و اتامل هلالي الهله و اتكمل اها دايرين ترقصو!!؟ ارقصو لانو غناء وصوت بادي دا كان ما رقصكم حقو تموتو ! اسمع بادي برضو بيقول :- القنيص حين شافو اتخيل جري دمعو سال سيل لما خيل الضل على الاريل في مشارعو الصيد ورد قيل خل عنك الانجم الزهري واقبل انت الموت في النهري هههههههههههههه تقول لي غناء خفيف معقول ياخ !!! بادي معلم المعلمين هو وخضر بشير فناني السماؤات و الاراضين اسمع اسمع بادي ياخ عشان تعرفو نحنا راح مننا شنو عيونك علمن عيني بكى الخنساء اووووووووو اووووو اوووووو اه عيونك فيها مغني خدودك فيها ما يضاعف هيام قلبي المصافيك هذا كله حاصل فهل يا سلمى يرضيك ؟ اووووو اوووووووو ااااااااه انا انا انا التبريح مواليني انت العز مواليك حويتي الرقه و العفه وبها زادت معانيك عيونك علمن عيني بكى الخنساء اووووووو اووووووو ااااااااه غناء زي التان تان مافيهو شق او طق
و اسمعوا بادي بتجيكم الافراح و كل حاجة و تجيكم العافية الدلال و الغرام عيوني و هنته جاف المنام عيوني قات لي عياك زي مر الجفوني قت ليها عقلي وذكاي جفوني و القلب تالف الجفوني و الصدور برزن ارجفوني
و اليجي و احد يقول لي ما رقصته !!! يا سمير بنظرتك او في المعاد العيون الشافتك ما اسعده
دايرين الموت اسمعوهو بغني :- الفي دلالو ما اعظم جلالو استحل هلاكي ولي حرم حلالو يا سلااااااااااام يا سلاااااااام يا سلاااااام الهلال الشغل الناس زلالو الظلام حين شاف محيو انجلالو
و الله الموت الوااااحد دا وبرضو قلبك مشحتف .
وارقصو في الكواكب احتفلو بالقمر رقيص الوزين .
اهلاً وسهلاً يا ليله شرفتي نورتي اليله وما احلى شوفتك يا ليله و امره هجرك يا ليله يا القامتك مافي ليله قمر عشره و ليله
و علي نفس الايقاع الراقص:-
ببكي وبنوح وبصيح للشوفتن بتريح فرع النحل مميح منو المسك بيفيح و كتين صباحو يبيح بلبل قلوبنا بيصيح يا سلااااااااااااااااااااام الله الله
و طوالي :- تم دور و اتدور عم ونور جال فات الحله نور ياخ دي فيها هجيج الهجيج و احدين قالو نور و احدين قالو داب مروي ما بتنور من يقوم يتهور يبري القيف هناك تحتو الدابي كور
العجب كمان عند بادي الجمرو حرقني افارق الروح لو تفارقني حبيبي هواي
و طوالي ما تطلعو من حلبة الرقص و قوم نادي عنان و اتباعه وقفل حوانيت الباعه نزلت للدنيا شفاعه سعت أم درمان لرفاعه
و الله دي الناس عقوله بتطش و تشوفو ليكم فيها جنس خوجال خلوهو ساااكت بس .
صباحك مالو و احبابك جفوني ومالو يا ليل الله الله الله
و ارح الهجيج طوالي فالتدوم في علاك انت زول معصوم و لا انت ملاك يا حليف الصون
و طوالي :- فريع البانة المن نسمه يتمائل حاكي المنقسمه الفم زي خاتم نص قسمه يا الماك داريه بي و الغي قسمه اوووووووك
و سمع وشوف ورقيص لحظك الجراح ازي فيهو و فيه الطرب و الراح مناي زهرة الافرح
و ارحم يا سميري دي بترقص الحفلة كلها و تشوف الناس زي موج البحر و اسمح لي بنظرة لو في الطيف عساءك
و يا من فاح طيب رياهو دي بتكل و تعيد للحياة على ميت الهوى احياهو فؤادي الشوق اعياهو
و سال سيل الدمع هطال و يا عازة برضو بيرقصوها عوم عوامة جد
الله الله يا قائد الاسطول تخضع لك الفرسان ياذو الفخار والطول ارحم بني الأنسان الله تي تي تي مين لي سماءك يطول ما بطولك اللمسان معناك شرحو يطول و الله يا انسان اصدقك كفانا مطول الله الله الله الله لي لي لي
و يا ليل ابقالي شاهد أني احبك عبدك شيخ طه و اترحم عليه كل يوم احبه محبة لوجهك الكريم لانك منحته أن يسعد الناس و خصصته بتجميل حياتنا حتى بعد مماته .
يا المأمون العملتو دالياء دا اسمو الموت الرحيم وغير الرحيم لكن يشهد الله عافي ليها .
11-18-2011, 11:18 AM
Kabar Kabar
تاريخ التسجيل: 11-26-2002
مجموع المشاركات: 18547
داليا..حبابك و حباب الجميع هنا.. نتقيد بالمعيار بتاع خفيفة..و نضيف من عندنا طاعمة و ظريفة.. و نجدع شوية هنا.. معليش ح اخط الغنية بضابنتها..يعين اداء و كلام و مزيكا..
ها نقول نمرة واحد..
كبر
11-18-2011, 11:19 AM
Kabar Kabar
تاريخ التسجيل: 11-26-2002
مجموع المشاركات: 18547
ابراهيم موسى الدنيا يا عاشه بتدور تفرقنا من زعلك حاشا
و هجيج الهجيج لما يغني يعجبنا جديدك يا وطني و نفرح بجديدك يا وطني علشان بنريدك يا وطني
و الناس في دي بتكب كب عجيب و الله والله ما شفنا مثاله في الرقصه تتنى كالبانة مياله فتنات العيون شعرا حلاله فوق الصدير نهودا جواله برز الكتيف اتجلى جمالا لا حوووووووول الله ياخ دي اغنية جميلة و الراجل مغني اكتر من ممتاز
و كمان لما تسمعو ليهو :- سالنا عن اسمك يا بسمة النوار دايرين نشيلو صباحنا نملاهو بالاشعار سالنا عن اسمك قالو لينا صفاء عاشت الاسماء يا جراحنا شفى تاني ما يسمو غير اسمك كفى
و يتواصل الغناء الراقص عند هذا الملاك اجمل ليالي العمر راحت وسلمناها الامر ما عرفنا ليها مصير ما لقينا ليها صبر
و الموت الدربو عديل لما تسمعوهو بيغني :- انت ساكن بين ضلوعي برضي زايد شوقي ليك ديمه شايلك بين عيوني و العيون تسال عليك انت ساكن بين ضلوعي قبل ما اشوفك سنين و لا اكبر امنياتي عامرة بالشك و اليقين انا صابر ومنتظر يا مناي تظهر متين القى في قربك نجاتي و اروي من نبعك حنين
و الكترابه و الغبار بيقوم لما تسمعو في بحر الغرام غرقان قلبي داب لا لقيت ليهو ساحل لااااااااااا يوم قلبي طاب
و إبراهيم فنان صاحب مدرسة متفردة و غناء أتمنى أن يجد إنصاف انت كلام عيونك كل ما نقول قرينا و في معناهو تهنا سافرنا ومشينا نلقي ياداب بدينا و سوا السوا فينا دا جزء يسير جداً من أغنيات لابراهيم موسى ابا اتذكرتو من الرأس مباشرة مع العلم عندو اجمل من كدا بكتير .
و صراحة أدين لوالدتي بفضل انها علمتني إن اسمع إبراهيم موسى ابا و ان اعشق واحب شرحبيل و ان اعشق رمضان زايد و حركة و أدين لها بحفظها القوي للأغاني الجميلة ربنا يديها الصحة و العافية و يطول عمرها .
و يا جماعة و الله الزي إبراهيم موسى ابا لو كان في بلد تانية كان عملو ليها كلية لتعليم الموسيقى ربنا يرحمو و يتقبله و يحشره في الجنان مع داؤود صاحب المزمار .
11-19-2011, 05:29 AM
سارة علي سارة علي
تاريخ التسجيل: 07-08-2008
مجموع المشاركات: 4413
ارح من الصباحية كداالبلابل و عصرهن و الخفيف المازيو خفيف و الرقص الما زيو رقص يا حنين ياطير الجنة يا مرسال شوقنا لاهلنا طير بالاشواق رك في الحنه قول للبنريدو طولنا اها يلا ارح رقيص رقيص رقيص با الشوق يا طير ياااا طييييير زور حارتنا قول للاسمر اسمر على ريدتنا شيل دمع الشوق ومعزتنا البلابل باطشات يا جماعة بطش من لا يخاف شئ
لوووووون المنقه يا الشائل المنقه اها يلا ارح و الله هجيج موت الما عارف كيف نحنا بنشقي نحنا بنشقي دي ممكن ترقص فيها عدد مهول من الرقصات مهرجان مهرجان بس
نور بيتنا شارع بيتنا يوم جيتنا يا الهليت فرحته قلوبنا اها هاكم خمو و ارقصو اه يا الهليت فرحته قلوبنا وطريتنا الليلة وجيتنا نور بيتنا شارع بيتنا اااااااااااااااا كنا فرشنا السكه ورود لو كلمتنا كان بالجية خطوة عزيزة و يوم موعود الخلاك تطرانا شوية و تسأل فينا وتجي حارتنا داب الفرحه الليلة طرتنا الحظ الجانا و غشى سكتنا زارنا وجابك لينا هدية يا الهليت فرحته قلوبنا وطريتنا الليلة وجيتنا نووور بيتنا شارع بيتنا يوم ما جيتنا و الله البلال لو تمو الأغنية دى آآآآآآآآآ نرقص للصباح . و الرقيص الما خمج اسمعوهو في بغني لي ود القبائل يمين تهز لما ضرعاتك تفتر ذاتو
انا القى وين طيبة اهلنا اها دي فيها الرقيص العجيب نص كلتش لما تفهم حاجة اشتهيت جلست عصاري في وطن وسط الحبائب و منظر الطير الخداري مع السواقي الدائرة دائر يا غربة مرة يا ما ورتنا العدائب بس مصيرنا نعود ديارنا و تبقي يا خاطر مطائب اها ارح نص الكلتش مواصل لكن نص كلتش معلمين نحنا ولله ظلمنا روحنا لما هاجرنا ورحلنا البلابل غناء امس و الليلة بذات الطعم و الصحة والعافية (ما شاء الله) البيطلقوها في السودانيين و السودانيات . و غنا كتيييييير راقص يملكوهو البلابل و فرحنا بيهو سنين ولا نزال الله ما يحرمنا منهن .
11-19-2011, 05:51 AM
سارة علي سارة علي
تاريخ التسجيل: 07-08-2008
مجموع المشاركات: 4413
Quote: يا سفيان صباح الخبر.. ياخ بمداخلا تك الدسمة دي بتبور لي سوق الفيديوهات النزلتا .. العب لعب نضيف :) عشان ما نصفرجا..
صباحك نور أختي سارة تصدقي بعد الفديو التاني حقك دا طوالي شرعته تحت سطوتهم للكتابة و التعليق عن الاغنيتين ديل و عن اصحابهم ؟! بس انتي اهو عاجلتيني بالتعليق و بقول ليك ابداً يا ستي الفديهات بتاعتك دي اصلاً ماممكن تبور خصوصاً الأغنيتين ديل . ياخ حبيبي فاكرك معاي دي ايقاعات سااااي بتكل و العجب الخال دا لما يديها لفته كدا و يعاين للكورس و يهز ليهم رأسو و اسمعيهو كويس لما يقول معاااااي دي بقوله ويحير الما بتحير و ركزي معاهو لما يمد في يوووووم لقااااي و لا عشان رضااااااك يمين الله دي حاجة ما حصلت ولا بتحصل و لما يصل سهرته الياااااالي بالجد بتشوفيهو عودو مسلوب وخلي بالك لكتيف يدين الخال علي صدره و ركزي مع حركة الهزة وراء وقدام مع الايقاع ياخ تقولي لي الفديهات تبور تبور شنو ياخ دا الفديو كليب الرسمي والشعبي لا داير ليهو نجوم لا بحر لا طيارات في الجو و قصص حرمنة فارغه.
اما الفديو البغني فيهو (الامنجي) فياخ ياريت لو كان بصوت أبو داؤود الذي لم يخلق مثله في العباد أبو داؤود الذي احتشدت في حنجرته كل جماليات اصوات الخلوق منذ فجر الخليقة حتى لحظة ذهب راجلاً وهو طفل لذاك الحفل في عطبرة و هو قادم من بربر بجلباب الخلوة ، كان ممكن الأغنية دي طااااخ كتلت ليك وليد عبد اللطيف الفوق دا او كتلت ليك محمد المرتضى البيجي يتاوق ويسمع و يمرق سااااكت وفي قلبه شجن ما انزل به من سلطان . لكن اهو ربنا قدر ولطف و غطى عليك عشان ما تعيشي بقية عمرك في حسرة وندم بانك ازهقتي ارواح ناس و خلاك نزلتي الاغنية دي بصوت فرفور . وهذا تقدير ولطف من رب العباد بالعباد و عليه نشكره ما حيينا . و نشكرك انت يا سارة .
و سلام عليكم و الصفرجه ما بتجي ربنا بس يختينا الغناء البكتل .
11-19-2011, 05:14 PM
مامون أحمد إبراهيم مامون أحمد إبراهيم
تاريخ التسجيل: 02-25-2007
مجموع المشاركات: 5380
Quote: المأمون أخوي والله سؤالك ذكي و حصيف وحريف و يحتاج لحوارات جادة لكن تصدق رغم وجاهتو دي و رغم انو بيدور في ذهني ايضاً بس انا لما اسمع غنانا دا تاني ما بهمني البعرفوا منو من العالم الخارجي و بيني وبين نفسي بقول و الله العالم دا نص حياتو ضائعة انو ما بعرف غنانا دا .
الفن ده لغة عالمية وتعبير عن حياة عميقة وثرية وماهلة ! وعن دنيا تانية ومعاني خفية بى كل تفاصيلها ! والفنان إنسان بعيش وسط جماعة ومع ناس بعبر عنهم ويحمل آهاتم وتراثم وآمالم وأحلامم وكل أشواقم ! وهو ليس ملك نفسه بالتأكيد .. وإلا كان كلو واحد يقفل عليهو بابو ويقعد يغني لى نفسو وخلاص ! ويكتفي بى غناهو وترانيمو لما يكون براهو وهو بياخد دش في الحمام ! زي ماكنا بنعمل زمان !
عزيزي سفيان ، أنا مقدر مشاعرك وحبك المجنون لى غنانا ..... لكننا نحن بني السودان لسنا بمعزل عن دائرتنا الإفريقية ، أو العربية ، كما إننا لسنا بمعزل عن العالم ! هذا العالم أصبح قرية صغيرة .. والفن رسالة سامية لابد أن تُرسل ، ولابد أن تصل للآخرين .. لأنها كما أسلفت حلقة من حلقات هذه الحياة البشرية الممتدة، والسائرة بخطا حسيسة ، وصائرة نحو حياة إنسانية متكاملة .... ونحن في الطريق إلى الدولة الإنسانية ! الحيكون عندنا فيها دور كبير جداً .. ..لأننا في ظني المتواضع جداً ، نحمل بذرة أجمل وأرقى وأرق مشاعر إنسانية على ظهر هذا الكوكب ! عزيزي سفيان ، حينما رحل الفنان العالمي : بوب مارلي ..... الناس فرشوا في السودان ، والشباب دقوا صيوانات في الشوارع لتلقي العزاء ! ...... وبرضو شفت براك كمية الحزن والألم حينما يرحل فنان عالمي أو إفريقي أو عربي ، أو حتى من أي مكان من أركان هذه البسيطة !
لا أعتقد عزيزي سفيان أن فكرة الإنزواء بالفن والإستمتاع به بصورة منفردة بعيداً عن الآخرين وبمعزل عن العالم ، فكرة صائبة ! ...... وإلا كانت البرازيل قفلت نفسها ولعبت كورتا دي جوه البرازيل وخلاص !
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
داليا حافظ
حمد عبد الغفار عمر
محمد علي البصير
عمر الفاروق
فاروق عثمان
عابدون محمد عابدون
سفيان بشير نابرى
محمد النيل
khaleel
ALZOLZATOO
Mohamad Shamseldin
بدر الدين محمد
ياسر السر
سارة علي
احمد محمد بشير
ABUHUSSEIN
مامون أحمد إبراهيم
smart_ana2001
وليد عبد اللطيف
Emad Ahmed
Abd-Elrhman sorkati
صلاح الدين نزلاوى
Dalal Ezzaldin
Kamal Seddiq
Gaafar Ismail
Kabar
فيس بوك
تويتر
انستقرام
يوتيوب
بنتيريست