|
|
 انت الحي ونحن الموتى.. يارهف الروح ...اليه /عماد الامين في عليائه - بقلم : عبدالله الخطيب
|
انت الحي ونحن الموتى.. يارهف الروح ...اليه /عماد الامين في عليائه -
بقلم : عبدالله الخطيب ( الامارات )
في ذكرى الرحيل المر
يا عماد
وينك.....؟
يا اخوي
يا حبيب
يا أقرب مني لي
وينك
فت
رحت.....
غبت
فت وين..؟؟
يا حليلك يا شهيق الروح في جوف الجسد
أحي عليك
أحي علينا
منو البعدك
يقاسم فينا الغنية,
اللمة,
النمة,
الصرخة
..... الحب
جفت وراك كل المحاجر والعيون
فترت وراك كل الخطا
الكان زمان
دارجين عليك
ناحت عليك
كل الخلوق
البكن عشمن عليك
شهقن عليك
زرفن عليك باقي مروتن
وقفلن عليك
كل السكك
بعدك
ودرن عليهن
ضهبت معاك كل المنا
اتوشح الدنيا الخبوب
اتهضلمت ارواحنا الماصحت
ألا ...ورحيلك بيلكزها.
احي عليك
أحي علينا
يعني كان لازم تفوت...؟؟
ما الدنيا بعدك
زيف حياة
وحرقة قبيلة اتلطمت
وناس كتار اتيتمت
جروحا قديمه اتفتقت
ونارا كبيره
اتعتمت
يا معتمد
يا معمد فيني من أول
ومعتمد دايما عليك
يا معتمدين عليك
منو البعدك نتكل عليهوسجم غنانا وننسرق
منو البعدك
ننسج منو جلاليب الصبر للهم المافتر
دافر علينا
دافرين عليك
كل الغناوي
الوداعك
فرتكها
فت.......
فد فوت
حرقت وراك بطن الحشا
مابين التحمل والخفؤت
ناده عليك نبض الروح والملكوت
منو الغيرك حرق ضلام الدهشة
وكبت في حلوقنا حد الصوت
يا عماد
عمد بك الموت ياصديقي
غرر بك مزدريا بنا
من يقصد..؟
نحن...!!!!
أننا بعدك
مقتولون
ميتون
نحن الموتى نحن الموتى
وانت الحي
فينا
سندق
سرادق العزاء فينا ا
ننوح على انفسنا ألف مرة
ونبكي علي موتنا ألف مرة
نحن الموتى
بعدك
وانت الحي
فينا
والباقي
فينا
يا عماد
أنت الحي
فينا
أحي علي
يا عماد
|
|
 
|
|
|
|
|
|
|
|
Re: انت الحي ونحن الموتى.. يارهف الروح ...اليه /عماد الامين في عليائه - بقلم : عبدالله الخطيب (Re: محمد حيدر المشرف)
|
أسأل الله أن يتقبله قبول حسن و ربنا يرحمو و يغفر ليو ...
القصيده جميله و معبره ،
لكن أكتر رثاء - مش لعماد بس - لكن لي أي زول هزاني من جوه ، هو رثاء محمد حسبو لعماد في سودان فور أول ، فتح بوست بعنوان ( عماد الأمين، لو نبّهتنا بدري شوية..) و جوه كاتب ليو (يا أخي المعذرة فاجأنا يوم شكرك، و ليس معنا ما يناسب المقام.. ) ! والله كاد الدمع أن يطفر من عيني و أنا لا بعرف عماد الله يرحمو و لا بعرف حسبو ، لكن حسيت تماما بالحاسى بيهو محمد حسبو ،
ربنا يرحمو و يصبركم و إنا لله و إنا إليه راجعون !
| |
|
|
|
|
|
|
| |
mahdy alamin
Amin Mohamed Suliman
عبد الخالق عابد
باسط المكي
عصام علي أحمد
فيس بوك
تويتر
انستقرام
يوتيوب
بنتيريست