|
|
 العطش ...
|
الي ..
شهداء الحركة الطلابية ..
طارق , سليم , التاية و محمد عبدالسلام
عليهم السلام اجمعين ...
( انهم يعزفون الحانا محرمه ... بمزامير محرمه )
( من فيلم Brave heart )
( 1 )
منعم محمود :-
كان ذلك ظهيره النحيب الحزين لحاجه آمنه حين أوصد منعم وجه سلمى فى غرفة
نائيه خلف سهوب الذاكره ... لم يشعر برغبة البكاء اذ تأجل ذلك سنوات عديده عندما ألفى
نفسه ينشج بين ذراعى أمل عند الضفة الاخرى لنهر مزيف , فى مدينة غريبه , بعد عشرون عاما
من النحيب الحزين لحاجه آمنه ..
حدق مليا وجه أمه - منذور هو للبهاء , ومبارك عند الرب هذا الوجه - وهو
يكاد يشتعل بالحزن , وفاجعة الرحيل , وهذا الصمت الموجع ... من اين لنا هذه القسوه ؟..
وهذا الحنان الداكن الملمس , والعميق جدا حد الموت ... من أورثنا هذا الفصام مع اللغه ..
اوكلما اوغل المعنى فى احترافه فينا , سكت الكلام ...
كان الصمت نبيلا جدا بالحضور الشاهق لحاجه آمنه ... سرى منه شيئا كالنحيب الحزين ,
وتمتمات صلاة فجر , واحتدام مطر ... تدفق العرق من مسامه غزيرا ... وأمدرمان فى
تمام صيفها ذو الشمس المستبده ذات الملمس العنيف .. وحاجه امنه تواصل نحيبها فى الروح ,
لم أشاركها النحيب الا بعد عشرون عاما .. عند الضفة الاخرى لنهر مزيف فى مدينه غريبه
أحسست بالرحيل بالرحيل يهبط ثقيلا فى الفراغ بينى وبينهم , أمى وحاجه آمنه ومنى وهى
تجئ بابريق الشاى وتغادر الغرفه .... أين ستذهبين بحزنك يا منى ... أعرف أنك لا
تتطيقين الوداع , ولكن مهلا .. دعينى أحاول البكاء لديك قليلا ... دعينى أملا حشاشاتى بوقود ما
سيأتى من حريق ... كم أنت صغيرة على البكاء ... وكم أنا مجبر على الرحيل , مكره
اخاك يا منى .... كم أحسست بالفزع عليه أخبرتنى ذات هاتف أن أبنك يشبهنى
- عيناه كعينيك يا منعم ..
أجبتك مازحا
- يبدو ان أمدرمان لم تتطهر من جراثيم الحزن بعد ...
- متى ستأتى ؟؟
- عندما أعود ...
ساعتها فاجأتنى سماعه الهاتف بذات ذاك النحيب الحزين لحاجه آمنه ( رحمها الله ) ... قد
اورثتك كل شى يا منى .... حتى النحيب
صببت الشاى لأبى وهو مطرق فى صمت مهيب , تماما كنبى يتلقى وحيه وهو يستبصر
خلف حدود الادراك ما سيأتى من نقيض ... بدا كخلاصة من أرواح اجداده العركيين فى جسد
نبي حزين .. سيصلب عند الفجر .. ويغدو الها.
(عدل بواسطة محمد حيدر المشرف on 08-26-2007, 06:59 PM)
(عدل بواسطة محمد حيدر المشرف on 08-30-2007, 09:09 PM)
|
|
  
|
|
|
|
|
|
|
|
Re: العطش ... (Re: محمد حيدر المشرف)
|
طاردنى هذا الخاطر طويلا , حتى بحت بسره لمحمود ... ونحن فى منتصف
الكاس المليون بعد العطش . فى فندق اندهش رواده لمرأى نزيلين بهذا السواد ..
فى ليلة الميلاد بقريه صغيره خارج العالم , تبدو كقطعة ثلج فى خريطه اسهب
رسامها فى التفاصيل . التفت محمود الى زاهلا ..
- اما زلت تصلى ؟؟؟
- تماما بعد الوضوء .
أخذ أبى رشفة من كوب الشاى .. وكأنها شهقة من روحه التى اخذت فى
التسلل اليها ... كان السودان املا اخضر يضئ والنيل حلما من القطن
والماء والكهرباء ... اخرجنى صوت أبى من لوزة القطن واحلام المياه ...
كان صوته عميقا جدا و وحزينا جدا وهو يقول ...
- أدرك تماما اتساع الهوه بين ما انت عليه وما تريد .... أنتم جيل الخروج
فلتذهب .. حاولنا كثيرا ان نورثكم هذا السودان معافى ... حاولنا اللا نورثكم
هذا السودان ممزقا ... احلامنا كانت عصية على التحقيق .. فانقلبنا وبالا عليها
وانقلبت وبالا علينا ... هم , لم يحلموا ابدا بوطن جميل , سعوا وراء
احلامهم الصغيره , فأدركوها وانخزلنا ... لا نقوى حتى على النسيان , لذا قدرنا
ان نبقى فيه ... وليكن قدركم الرحيل ولكن ... ليكن الرحيل دوما اليه , انت
من هنا , فى الحقيقه نحن الراحلون ... قد لا تجدنى حضورا عندما تعود ,
وقد تجدنى حضورا فى الغياب , وفى الحالين قد زرعت فيك بذرة لن تموت ..
هذا الوطن لعنه , فاحرص ان تصاب بها ... رغبتى الا تزرع بذورك فى رحم
غريبه ... لا تجعل من احفادى هجينا ماسخ , عندها سترسخ فى اغتراب
لا يموت ... تذكر دائما ان ( النى للنار ) نجض امورك كويس , شد حيلك
ومع السلامه ...
| |
|
|
|
|
|
|
|
|
|
Re: العطش ... (Re: محمد حيدر المشرف)
|
كان صوته عميقا جدا و وحزينا جدا وهو يقول :Quote: أدرك تماما اتساع الهوه بين ما انت عليه وما تريد .... أنتم جيل الخروج
فلتذهب .. حاولنا كثيرا ان نورثكم هذا السودان معافى ... حاولنا اللا نورثكم
هذا السودان ممزقا ... احلامنا كانت عصية على التحقيق .. فانقلبنا وبالا عليها
وانقلبت وبالا علينا ... هم , لم يحلموا ابدا بوطن جميل , سعوا وراء
احلامهم الصغيره , فأدركوها وانخزلنا ... لا نقوى حتى على النسيان , لذا قدرنا
ان نبقى فيه. |
هم , لم يحلموا ابدا بوطن جميل
هم , لم يحلموا ابدا بوطن جميل
هم , لم يحلموا ابدا بوطن جميل
يا لها من حقيقة
ويا له من رجل.
التحية له ولك يامحمد.
| |
|
|
|
|
|
|
|
|
|
Re: العطش ... (Re: محمد حيدر المشرف)
|
أدار النذير محرك العربه الذى انطلق بخشونة ظل صداها يرن فى
اذنيه فى كل مساءات الرحيل ... امه , حاجه آمنه , منى , النور صاحب
الدكان ... الشوارع تعدو ... الفجيعة تكبر , تطل من حوائط البيوت ولونها
الاصفر الباهت , والاسفلت المهترى , وعيون البنات , وموت الرجال , وشواهد
القبور , وساعة البلديه , وقبة الامام , وحديقة المورده , و ... وجه سلمى الذي
اخذ فى التسلل من غرفته النائيه خلف سهوب الذاكره لمجرى الدماء , اه
يا منعم أين تهرب من دماك ..؟ هكذا همس منعم لنفسه قبل ان يطلب
من النذير اغلاق الراديو , حينها بدأ النذير بالكلام ...
- بالمناسبه جمعت ليك مجموعه كويسه من الشرايط , مصطفى وعركى
والبلابل وابوداؤود ... وفى كمان تسجيل الاذاعه بتاع ( الود ) , وشريط سعاد
بتاع كابلى ... ياخى ما عارفك بتسمع كابلى ده كيف .. حتى سعاد عندو بقت
زوله غريبه , ما سعاد بتاعت الدوش ... تذكر يا منعم اول مره نقراها. .
كنت معاكم فى كافتيريا صيدله لما طلعت سلمى القصيده من شنطتا و ..
شنطة سلمى ,,, شنطة سلمى , وأحس منعم بالعطش يجتاح فيه كل الخلايا ..
سلمى وأحمد وعثمان و .. ترى اين انت يا عثمان الان ؟؟.. اى خمر
تحتسى .. واى قوافى تسوقها الان نحو جحيم معناك العصى ... وارتسمت امام
عينيه تفاصيل يوم هو كألف عام ...
| |
|
|
|
|
|
|
|
|
|
Re: العطش ... (Re: محمد حيدر المشرف)
|
كانوا خارج كافتيريا قانون فى طريقهم نحو المين روود ... طلابا فى سنتهم
الاولى .. والنقاش مازال محتدما بينهم .. كان يتحدث بحماسة جديرة بسنه
- يا اخوانا انا ما عندي مانع او اعتراض على العلاقات الجامعيه بين
ولد وبت , انا عندي اعتراض على الاسفاف الحاصل ده ...
يعنى شنو اعرف لى بت عشان اقشر بيها وسط الشباب , وطبعا لازم
تكون شديده ومبكيه الناس ... واسوقا كافتيريا بزنس واتظر ربع ساعه
عشان القى لى كبايتين واجيها شايل الليمون وانا عاضانى نحله من النحل
الملموم فى حله الليمون , وحتى الليمون نصو مدفق فى الجزمه وراسم ليهو
خرايط غريبه جدا .. ونشرب ونحن بنعاين لى بعض ونغرود فى عويناتنا
ونتكلم عن عرس فلانه وحفله نجاح اميره وشريط ايمن بورسودان ... ده
كلام فارغ .
النذير
- ياخى عليك الله خلينا ... اصلو انتو المثقفاتيه ديل بتعقدو اى حاجه
وهو فى الذ من ليمون بزنس يا بزنس
عثمان
- النذير خلى الكلام الفارغ البتقول فيهو ده ... منعم كلامو صاح
احمد
- بس يا منعم كده ممكن نفقد العفويه فى العلاقات الانسانيه البسيطه
وكمان النذير بفقدنا البعد الجوانى والجوهري لمفهوم علاقه اطلاقا ... المنو
ممكن نحدد الجدوى من العلاقه .. وما نتجاوز
النذير
- أمٌك ... جابت ليها بعد جوانى وتجاوز ... عارفين يا جماعه انا
فعلا ما مهتم بى مساله البعد الجوانى دي ... انا مهتم اكتر باللستك
الجوانى خصوصا مع البنات ... يا اخوانا المساله دى واضحه .. انا
كده .. عليكم الله ما تبوظوا لينا البنات بى كلامكم ده ...
قاطعته صائحا
- انت اساسا ما فيك فايده ... بنية وعيك التناسلى اتولدت بيها
وحتموت بيها , والجامعه دى ما حتستفيد منها اى حاجه غير تفقد
السودانيين مقعد فيها , لا حتقدم البلد دي ولا تاخرها ... ماشى ساكت
كده ورا اصغر حاجه فيك ...
النذير
- وده كلوا ما عشان البلد , يا منعم التناسل ده فلسفه ... بس انتو
ما عارفنها ساى
ضحك عثمان وهو يمازحنى
- ده كلو هين ... بس يا منعم عرفت من وين انو الجاري وراهو
النذير اصغر حاجه عندو...؟
اجبته ضاحكا
- شفتو ... والله العظيم شفتو ... زمان ونحن فى تانيه عام وانا فى
البيت بعد المغرب كده اسمع ليك زول بكورك لى من ورا حيطتنا الفى
الزقاق ... اطلع القى ليك صاحبنا ده لابس ليك فنله داخليه .. آى والله بس فنله
وكمان لابسها بالقلبه ... سالتو والضحك كاتلنى يا زول مالك ... فى شنو ؟
قال لى وهو يمط فى الفنله ... كشه , كشه يا (.........) ... , جيب لى حاجه
البسها سريع ... قلت ابرمج بيهو شويه و لكن بالجد الموقف ما كان
بستحمل ... اخينا ده اتضح انو كان فى الزقاق الورا الاميريه ... والكشه
جات , تصورا جاري من زقاق السينما لغايه بيتنا فى حى البوسته
عريان ... وبعد ده كلو ما تاب .... هذا النذير حياتو ما حضر معانا
لا الحصه التالته ولا الرابعه ولا الخامسه ... يمشى الزقاق فو الفسحه
الكبيره ما يجى الا فى الفسحه الصغيره ... واليغيظ اكتر برضو يطلع
اول الفصل .. كيف ؟ ما عارف
استغرقنا فى فاصل من الضحك والنذير يردد
- خلاص فكيت التعرصه ... انشالله تكون ارتحت
- انا ما برتاح الا انت تفكر فى الكلام البقولو ليك ده ... اصلو
وفجأة قاطعنى عثمان وهو يقول ...
(عدل بواسطة محمد حيدر المشرف on 04-12-2009, 05:36 PM)
(عدل بواسطة محمد حيدر المشرف on 04-12-2009, 05:38 PM)
| |
|
|
|
|
|
|
|
|
|
Re: العطش ... (Re: محمد حيدر المشرف)
|
- منعم كده خلينا من التنظير بتاعك ده ... ديك سلمى الكلمتك عنها ,
وشكلها جايه علينا
النذير
- والمعاها دى منو ... تنفع تكون فتاة غلاف .. السماحه دي بيجوبوها من
وين ..؟؟
والتفت انا منعم محمود , التفت تلك الالتفاته الشهيره , والتى لم يغادرنى
بعدها وجه سلمى قط .... حتى بعدما اوصدته فى غرفة نائيه خلف سهوب
الذاكره , ظهيرة النحيب الحزين لحاجه آمنه ... لحظتها طافت بذهنى احداث
عشرون عاما مقبله .. عرفتها , عرفت سلمى ... فجيعتى التى اعلنتها انتحابا
بين ذراعى امل عند الضفة الاخرى لنهر مزيف فى بلاد غريبه ... اعادنى
صوتها المطير من ذهول الرؤيا والانصعاق وهى تحى عثمان
- عثمان ازيك ...
فقط لا غير - تماما - كاحترافيه المعني حد الفصام مع اللغه ...
صوت له رائحه الدعاش وذاكره المطر واشياء اخرى كثيره لا تشتهي
الرحيل , ولكنها تابى الاقامه ... تمدد احساسى بالصحراء , تذكرت حديث
هاشم صديق عن الحراز والمطر ..... ولاول مره بعد التفاتتى
الشهيره - والتى بها تؤرخ اشيائى - احسست بالعطش
عثمان
- اهلا سلمى .. كيفك .. ده احمد , النذير , منعم ... احمد فى اقتصاد
النذير فى هندسه معمار وانت لاقيتيهو قبل كده ... ومنعم
قاطعتيه يا سلمى
- فى طب معاك ... اهلا يا دكتور , دى نسرين معاى فى صيدله
وزاد احساسي بالعطش ...
| |
|
|
|
|
|
|
|
|
|
Re: العطش ... (Re: محمد حيدر المشرف)
|
د . محمد حيدر المشرف
تحياتي
لعمري أن لك قلم لا يبارى ولا أملك إلا أن أحترم هذا السرد الروائي المتميز .
لا تدع هذه المواهب تموت في الغربه وهذا ما خلصت به من روايتك الأولى .
طبعاً هذا بجانب الشعر
عادل التجاني
| |
|
|
|
|
|
|
|
|
|
Re: العطش ... (Re: محمد حيدر المشرف)
|
أ/ عادل التجانى
يا امدرمانى فنان ..
أن تكون امدرمانيا تلك والله كمن سبق الحواس بى ركعة ..
وأن تكون امدرمانيا وفنان ..
فهى الأثقل ميزاناوايم الحق ..
شكرا على فضل كلماتك على قدرى ..
وشكري ..
| |
|
|
|
|
|
|
|
|
|
Re: العطش ... (Re: محمد حيدر المشرف)
|
Quote: وأمدرمان فى
تمام صيفها ذو الشمس المستبده ذات الملمس العنيف .. وحاجه امنه تواصل نحيبها فى الروح |
تعرف يامشرف .
Quote: خلف حدود الادراك ما سيأتى من نقيض ... بدا كخلاصة من أرواح اجداده العركيين فى جسد
نبي حزين .. سيصلب عند الفجر .. ويغدو الها. |
دخلت المنبر هذا ، إنتظرتُ كثيراً لكي اطالع شئ يجذب .
استمتعت بهذه العطش ، وهذاالسرد،إيما حضور ، إيما عطش ، أخذتني تفاصيل البناء
السردي عندك (وذاد إحساسي بالعطش)حركة الجملة المرتاحة التفاصيل وحتي كسر الدارجة داخل الايقاع ،
وهذا امر يحتاج فعلاً لكاتب ببالك .
اكتب ياصديقنا ( لمجرد الكتابة الصديقة للاحوال) ، أكتب و(.. تذكر دائما
ان ( النى للنار ) ، نجض امورك كويس , شد حيلك )
ومع السلامه ...
| |
|
|
|
|
|
|
|
|
|
Re: العطش ... (Re: Ibrahim Algrefwi)
|
( الكتابة الصديقة للاحوال )
نعم ولكن ..
الحال تورمت
ا/ابراهيم
نحاول الالتصاق بذواتنا ريثما تعود الينا خلايا الجسد
( الكتابة الصديقة للاحوال )
نعم ..
تحياتى
| |
|
|
|
|
|
|
|
|
|
Re: العطش ... (Re: محمد حيدر المشرف)
|
دى واحدة يا مشرف من الأشياء
البتبداها
وتتمنى إنها ما تنتهى
إنحازت ليك كل المزامير والله
وصدحت أنغام الكتابة السمحة
تسمح ايامك إن شاء الله
| |
|
|
|
|
|
|
|
|
|
Re: العطش ... (Re: هبة الحسين)
|
هبة ...
رأيت فيماأري احيانا انك هنا ..
تتوهطين دم الحكاية ..
تكونين سلمى
نسرين ..
امل ..
وحتما .. تكونين حاجة آمنة
هبة ..
اها النصاح ده نلقاهو وين ؟..
سلامات ..
| |
|
|
|
|
|
|
|
|
|
Re: العطش ... (Re: محمد حيدر المشرف)
|
ساعتها ... احسست بطعم كاسى المليون بعد العطش يقفز لحلقى
وانا ومحمود ... عشيه الميلاد بعد عشرون عاما مقبله , فى ذاك
الفندق ... فى تلك المدينه الغريبة خارج حدود هذا العالم ... وانا
اقرأ لمحمود نصا لتاج السر جعفر الخليفه
( كانت لحظة اللقيا ...
تجلجل فى فناء الروح ...
كان الحب يرقص عاريا ..
متجاهلا كل الخرافة , والمعانى السافله ...
كالنيل حين يضج بالايقاع , ينفذ وحده ...
عبر الصحاري القاحله ...
طوبى اذا احتملت شرايينى هدير القلب حين اراك )
تري اين ستكون حينها ايها التاج ... السر ... الخليفه
يا لصوفيه هذا الاسم ...
أفقت على صوت عثمان وانا مرتجف من برد ليله الميلاد
- منعم مالك ساكت , سلمى بتسأل فيك !...
التفت اليها
- ايوه , ليمون بزنس ما بطال ... ما عندى مانع اعزمك , تعزمينى
مافى مشكله ... المهم فى مسافه بيناتنا لازم نلغيها , ونحدد انت
عاوزه منى شنو ...
وادرت ظهري لهم ومشيت ... استوقفتنى بعد قليل
- طيب اقل حاجه انتظرنى نمشى سوا ... ولا بتحب تقود القطيع ؟...
- انت عارفه انك انتى الجارانى ... معاك قروش ؟؟...
- اهلا ... بدينا , يا دكتور انت العازمنى !...
- ذكرينى بعدين نشترى كراس عشان نقيد حساباتنا .... وصدقينى ما
حآكل الا حقك
- بس دى طريقة سداد صعبه عليك ...
- انى ظلوما وجهولا .. وكادح اليك كدحا فملاقيك
- ما حأشفق عليك
- ما عندك وقت تشفقى فيهو على نفسك
عقدت ما بين عينيها وهى تخرج بعض الاوراق الماليه وتقول
- خليك عارف ... كلو مقيد
.
| |
|
|
|
|
|
|
|
|
|
Re: العطش ... (Re: محمد حيدر المشرف)
|
.
لا حولا يا مشرف ..
ممتع ..
لو أقدر أديك قلده ماهلة .
شكرا يا محمد .. مرتين ..
مرة إنك ماسك ( تلابيب ) الكتابة .. و نحنا .
و مرة على " الحمد لله " التي أقولها الآن .. و كنت ظننتها منسية من طول عقم الحال .
.
| |
|
|
|
|
|
|
|
|
|
Re: العطش ... (Re: Emad Abdulla)
|
الحمد للة ..
مثنى ..
وثلاث ..
ورباع ..
ان انعم علينا بمن هم سعاة الحرف
بجردون -بالليل - الفية المعانى العابرات خلايا وعينا
واجزم انك فيهم
وانك منهم
شكرا
عماد
| |
|
|
|
|
|
|
|
|
|
Re: العطش ... (Re: محمد حيدر المشرف)
|
كانت كافتيريا بزنس كما اشتهيتها تماما ... احضرت الليمون بعد
صراع لذيذ مع ( الكبابى ) .. جلست بجانبها , ولكن .. تعذر الكلام ..
تردد صوت مصطفى سيد احمد يغنى ( ولا بيناتنا المسافه ) .. اغمضت
عينىً كى اعفى الاغنيه من حيز الشتات ... سألتنى بهدوء
- منعم وبتقرأ طب ومتأثر جدا بى مصطفى سيد احمد ...
فى حاجه تاني
- مريخابى ... ومن امدرمان
- منو القال انو المريخاب ديل بس هلالاب زعلانيين
- ممكن يكون نفس الزول القال انو الكيزان والشيوعيين وجهين
لعمله واحده
- داير تقول انو الهلال مؤسسه رجعيه .. يا دكتور الهل...
- داير اقول انت منو ؟...
- شنو ؟!!..
- انت منو ؟؟
- سلمى وهلالابيه وما من امدرمان ... وبكره شوارعها الضيقه
وبيوتها الملصقه وانفعال ناسها ال over بيها
- كده انت صاح
- صاح فى شنو ؟!..
- فى تعريفك لنفسك ... اصلو الناس نوعين ... من امدرمان وما
من امدرمان
| |
|
|
|
|
|
|
|
|
|
Re: العطش ... (Re: محمد حيدر المشرف)
|
سرد وكتابه جميله تجبر علي عدم التوقف..
بس أنا هنا وقفت قدام قول بيعير عن حقيقة مشاعر سائده عندنا في العاصمه..
Quote: - فى تعريفك لنفسك ... اصلو الناس نوعين ... من امدرمان وما
من امدرمان |
تحياتي مع طلب تسجيل حضور..
| |
|
|
|
|
|
|
|
|
|
Re: العطش ... (Re: محمد حيدر المشرف)
|
- يا سيدى اشبعوا بيها ... بس اطلعوا من دماغنا
-انتو الما بتقدروا تطلعوها منكم ... يعنى لو طلعناها منك هسى
حتسمعى غنى وين ... تقري لى منو .. تشجعى كوره كيف .. واهلك لما
ينزحوا يمشوا وين ... امدرمان دى مليون ميل مربع ... ما عندكم
طريقه تتجاوزوها ...
- دى ما مركزيه السلطه الضيعت البلد
- انتو ما هامش لانو فى مركزيه فعاله .. انتو هامش لانكم عاوزيين
تفضلوا هامش
- انت فاكر انو حاحبك لانو افكارك غريبه ... ولا متخيل غنيه مصطفى دى
متآمره معاك ... مغمض لى عيونك .. بالمناسبه ما بسمع مصطفى
- ليه ؟!..
- امكن بعد مريم الاخري غنى غربتو .. وذاتيه اى فنان بتكون خصما
على اضافاتو .. يعنى انا بقرا لى عاطف وعثمان والصادق ... وحبيت
حاجاتم اكتر وهى مكتوبه ...
- يعنى بتسمعى مصطفى
- ما بسمعوا
| |
|
|
|
|
|
|
|
|
|
Re: العطش ... (Re: محمد حيدر المشرف)
|
هتفت لحظتها كاذبه , لم اري احدا اشد منك حزنا عليه يوم رحيله
الحزين ... رأيتك تنتحبين خفيه , واعلنت عيونك الحداد موسمين من الاسى
والدموع .. وفى الخاطر
عشرون من الاعوام مقبله .. ووجهك يتسلل من خلف سهوب الذاكره
وقوافل العشاق تضرب فى تيه الانتماء اليك ... وذاكرة العطش تبعثر ما
تبقى من رمالك فى حلق الغناء ... ومناقير الطيور ... وطعم الحكايا عنك
فى برد البلاد الغريبه ... وتمتمات الشوق اليك ... وحزن القصائد اذ
تشتهيك ... وانت الحضور ... وانت الغياب ... هكذا تمتد الفجيعة فى
الرحيل ... صورة سلمى , وبذرة والدى , نحيب حاجه آمنه ظهيرة صيف
امدرمانى حزين ... ونشيجى بين ذراعى امل عند ضفة اخرى لنهر
مزيف بمدينة غريبه , وأكواب الليمون , قبر احمد , وصوتك المطير ,
ورائحة الدعاش , وذاكرة العطش
| |
|
|
|
|
|
|
|
|
|
Re: العطش ... (Re: محمد حيدر المشرف)
|
أشعلت آخر لفافة تبغ صنعت خصيصا للسودان ... ملأت رئتىَ
برماد الحريق ... والنذير ما زال يحاول تأكيد العلاقه بين
كابلى وادعاءات النخبه الزائفه فى السودان وحسين خوجلى وعمر
الجزلى والتصفويه واقصاء الاخر والتهميش ... ونحن نعبر
الكوبري انتبهت - انا منعم محمود - لحقيقه مرعبه
فقد غادرت امدرمان
| |
|
|
|
|
|
|
|
|
|
Re: العطش ... (Re: محمد حيدر المشرف)
|
يامحمد
ازيك ..
اتخيل القصة ماصمت ولاحاجة ..جيت صباح السبت
وبى نشوة الجمعة ..لقيت البوست دا قدامى
قبل مااقراه قلت (قطع شك البوست دا سمح )
ورفعت البوست ..
الليلة جيت اتأكدت من (فراستى ) ولقيت
البوست نديان بالجمال ..اللغة الرفيعة
والخيال الخصب والتداعى الجميل ..
اضفناك للاسماء التى يجب عندها (ضغط )
الماوس ..
ويبقى الود
| |
|
|
|
|
|
|
|
|
|
Re: العطش ... (Re: محمد عبدالرحمن)
|
محمد عبد الرحمن ..
الزول الماهل وب,,الراحه
ياخى بالجد الواحد متمنى ياسر مبيوع يجى ويسافر تانى عشان يودعنا/نودعو
اما العطش ..
ياريت تكون زى ما بتقولو ..
عارف يجوك ناس يخلعوا يقولو ليك كلام كويس عنها زى الناس الفوق ديل
ويفرحوك جنس فرح اصلو ما معقول ..
غايتو نمشى فى الدرب البطابق حسن ظنهم وظنك يا حبيب
| |
|
|
|
|
|
|
|
|
|
Re: العطش ... (Re: محمد حيدر المشرف)
|
- يا عب قاشر كده مالك ؟ ... وهو فى حاجه يقشرو
ليها
أدار عثمان جهاز التسجيل وانطلق صوت عبد العزيز داؤود
( وداعا ... روضتى الغنا ..
وداعا معبدى القدس ...
وداعا ...)
تناول فنجانه فى هدوء ... اشعل سيجاره ... اطل من عينيه
حزن تواري سريعا قبل ان يفاجئه مامون بسؤال بدا كقنبله
- انت سلمى دى منو ؟...
- سلمى !!!
- ايوه ... سلمى بتاعت القصيده
- قصيدة شنو ؟؟!
- يا دكتور انت ما كنت واعى ولا شنو ؟ ...
امبارح الميز كلوا سمعك وانت بتقول فى القصيده ... وبالمناسبه
... القصيده لغتها عاليه جدا , ومتماسكه جدا ... السكاري
الامبارح ديل كلهم سكتوا وانت بتلقيها ...
سلمى دى منو ؟...
اطرق عثمان وابو داءؤود يردد
( ولما لم اجد سلوى .. )
احس بالاغنيه تدنو من بقايا سكره الواهن , والصداع ... ومن
سلمى , آه يا سلمى ... ما زلت تنسلين من نسيج ذاكرتى
وتهدينى هذا السلام ... ترى , اين انت يا منعم محمود ؟...
تحت اى غيمة تكتب الشعر ... واى بلاد تستفيق على اساك
ولا تنام ... وكيف تحلم بسلماك العصيه ... وسلماى المستحيل ؟..
تذكر اول لقاء بين منعم وسلمى ... نعم كان المين رووود
فى تمام ضجيجه ... كانت الدهشة تطل من اعيننا .. والعزم يطل
من عينيها , ومنعم يبادرها بدعوة دونما اى مقدمات
- ايوه .. ليمون بزنس , بس انا وانت ... اعزمك تعزمينى ما
مشكله , بس فى لسه مسافه بيناتنا نحاول نلغيها ... ونحدد
نحن عاوزين شنو ... وكيف .. ومتين .
| |
|
|
|
|
|
|
|
|
|
Re: العطش ... (Re: محمد حيدر المشرف)
|
ساعتها , اغمضت عينى بشده فى انتظار سماع صفعه مدويه ...
وفتحتهما اثر ضحكة واثقه وسلمى تستأذننا فى هدوء وتنفلت وراءه
كالطيف ...
كنا مأخوذين تماما بالدهشة ... لم نعرف اينا اكثر دهشة من
الاخر ... غير ان النذير كان اول من تمتم فى ذهول
- بالله شوفو الزول ده !! ... قبل شويه كان بقول شنو
عن ليمون بزنس ...
احمد
- ديل كانوا راجين بعض ... اهلا نسرين
وعرفت ان دهشة احمد كانت لاشعار آخر
نسرين
- اهلا احمد وعثمان و ...!؟
النذير
- النذير ... اوعك تنسى الاسم ده تانى ... وبالمناسبه عازمك
ليمون فى بزنس عشان برضو فى حاجات كده وكده ... وبعدين انا
صاحب البطل طوالى
نسرين
- لا شكرا ..
- طيب منقه فى علوم
- شكرا
- كركدى هندسه اى حاجه
وانقضى ذلك اليوم ولا اثر لمنعم وسلمى ...
هجمنا عليه عندما عاد ليلا للبركس ... كانت خلاياه باديه العطش
بعينيه بريق خافت ... وحزن عميق
- يا زول وين انت ؟ والحصل شنو ....
- لقيتها ...
النذير
- لقيت منو ؟...
- سلمى
- وهى كانت رايحه ؟...
وبصوت عميق الاسى .. ما زال صداه يثير رجفتى ... رددت
عليه يا منعم
- لا ... حتروح
واحسست بطعم الليمون يقفز لحلقى
| |
|
|
|
|
|
|
|
|
|
Re: العطش ... (Re: محمد حيدر المشرف)
|
تمتم عثمان فى سره ومامون يصب له فنجان أخر من جبنه خالتى
اسيا...
ترى ... اين انت يا منعم محمود .... قسرا تساق كل يوم
لرحيل .. متى تعود ؟ .. كان احمد اول احزاننا , لم اكن اعلم
انى سأحمله ميتا فى ذراعى .. ما زلت اشم رائحة الدم فى
يدى , لم نكن نحارب ... كنا داخل اسوار الجامعه , نهتف بالصوت
ليس الا حين باغتنا النزيف ... اين كان النذير يومئذ ؟؟, فقط
تأوه ... نظرت اليه ... هالنى الحزن بعينيه ... لم يكن الما , كان
ذات الحزن الذى عرفته بعد ذاك طويلا ... شاهدت انبثاق الدم من
ثقب صغير بصدره ... اتسعت دائرة الحزن بعينيه , اطلت منها نسرين
.. وخالتى التومه ... والصغيرة تيسير , والهتاف ... الهتاف يصم اذنى
الجامعه تدين .... تجار الدين
والرصاص يدوى ... وثقب الدم ... ودائره الحزن تتمدد ... مدنى ,
ود ازرق , مدينه البحوث , حديقه وقيع الله , بانت , حنتوب , والرصاص
يدوى من جديد , والهتاف ... ورائحة الدم
صرخت فيه بفزع
- احمد فى شنو ؟؟ ... احمد مالك ؟؟..
صرخت فيك وانت ما زلت تهتف ... واصوات الطلقات ترن .. نظرت
الى بدهشه ... ثم اليه , صرخت
- عثمان ... احمد مالو ؟...
.
| |
|
|
|
|
|
|
|
|
|
Re: العطش ... (Re: محمد حيدر المشرف)
|
يامشرف ,
لينا عظيم الشرف , بهذا الكلام المشرف
والمعانى المشرّفات .... هذا الكلام مُشرِّف !
قل لى بربك , أنت مُشرِف على ماذا ؟!!
سلامات وأشواق منذ الأزل .
| |
|
|
|
|
|
|
|
|
|
Re: العطش ... (Re: محمد حيدر المشرف)
|
وحملناه سويا يا منعم ... كم كانت دماءه غزيره .. عبرنا شارع النشاط
... البوابه , حتى وصلنا شارع الجامعه , انحرفنا واحمد بايدينا فى
اتجاه قاعة الشارقه , عبرناها واحمد بايدينا ... اكان ميتا انذاك ؟ ,
اذكر ان دماءه مازالت تسيل ... دماء احمد تسيل , تسيل يا .. تسيل
والدخان يزكم انفى ..شى كالنار يزحف بعينىً .. ودوي الرصاص .. والهتاف ياتى من
بعيد ..
الجامعة تدين .. تجار الدين
ودماء احمد تسيل على ثيابنا , اهابنا , خلايانا , و حتى ارواحنا اصطبغت
بذاك بالاحمر القانى .. اكاد احس لزوجته فى اصابعى الان ... اكان ميتا
انذاك ؟؟... ونحن نجري , و نجري ولا شى سوى عربات الشرطه .. توسلنا
اليهم , اطل من عيونهم الحزن والتردد ... ثم انتصرت ارواحهم لانتماءها
الكريم ... وانطلقت بنا عربه الشرطه ... شارع الجامعه , المك نمر ,
السيد عبد الرحمن , الحوادث , الموت , الموت ... لماذا لم تبكى يا منعم
... اذكر ذاك بوضوح ... بكيت انا على صدرك .. انتحبت كالنساء على
صدرك .. ولم تبكى , ولكنى احسست بالعطش وقد اجتاح فيك كل
الخلايا ...
| |
|
|
|
|
|
|
|
|
|
Re: العطش ... (Re: محمد حيدر المشرف)
|
توافدت مجموعات صغيره من الطلاب ... وبعد قليل تحولت مستشفى
الخرطوم وما حولها لساحة محاصرة بعربات الشرطة والتى تمركزت فى
نقاط محدده بينما راحت عربات رجال الامن تجوب شوارع القصر والسيد
عبد الرحمن وبيويو كوان والشارع الداخلى المؤدى للمستشفى بسرعات عاليه
مع اطلاق زخات من الذخيره الحية من بنادقهم الاليه ... علمت فيما
بعد ان خبر استشهاد احمد قد سري بين الطلاب كسريان النار فى
الهشيم , كان هدف السلطات الامنيه منع طلاب المجمع الطبى
من التوافد على المستشفى ... بعد ان تم حصار طلاب السنتر بعد
مصادمات عنيفه داخل وخارج الحرم الجامعى ..
تم اقتيادنا انا وانت يا منعم محمود لمكتب الشرطه الصغير بالمستشفى
لمقابله احد رجال الامن الذي بادرك بالقول
- اهلا بالمناضل الكبير ... شايف نتيجة البتسوا فيهو ده ؟..
مش انت منعم محمود ولا انا غلطان ..
لم ترد عليه فقال
- مش مهم ترد .. ثم وجه لى الكلام
- انت ... الطالب المات ده من وين ؟...
- مدنى ...
- بتعرف بيتهم
- ايوه
- خلاص تتحرك حسع مع الجثمان .. ونادى احد الرجال لاقتيادى
مع التعليمات باكمال الاجراءات , وسرعه مغادرة المستشفى .. اقتادنى
الرجل وانا اسمع ضابط الامن يقول لك ..
- انت حتمشى معانا .. عاوزينك تشرفنا شويه ..
| |
|
|
|
|
|
|
|
|
|
Re: العطش ... (Re: محمد حيدر المشرف)
|
تحركت بنا عربه رجال الامن اللاندكروزر بعد المغرب بقليل ... معى
ثلاثه منهم بالاضافه للسائق ... وجثمان احمد مسجي فى الخلفيه ..
راقدا فوق الحماله المهترئه لمستشفى الخرطوم ... كنت خائفا , وحزينا جدا
حد الموت المكوم خلفى ... كانوا يتبادلون الحديث ببساطة متناهيه ...
يثرثرون ويضحكون وهم فى حضرة من قتلوا ... كانوا يمازحوننى بالصفعات
لم اكن اعلم قبل هذا اليوم ان بصدري ما يتسع لكل ذاك البغض الذي
احسسته تجاه اؤلئك البشر ... وصلنا مدنى نحو التاسعه .. هيئت
نفسى كى اصف لهم الطريق ... لم يطلبوا منى شيئا ... تجاوزوا ود ازرق
حاولت ان اشرح لهم ذلك .. انهالت على الصفعات , ثم غطوا عينى
بقطعة قماش ... سرنا نحو ربع ساعه حتى توقفت العربه , وامرونى بالنزول
... قادونى حتى ادخلونى غرفة اغلقوها على بعد ان اوثقونى بالحبال ...
لا اعلم كم مر على وانا بذاك الحال حتى اخرجونى ... احسست
بلسعة الشمس وقد تسرب لعينىَ المعصوبتين بصيص ضوء ... تحركت بنا
العربة من جديد .. سالونى عن موقع البيت .. شرحت لهم موقعه بدقه
حتى توقفت العربه ... من صوت حركتهم علمت بانهم انزلوا جثمان احمد
جائنى احدهم وانزلنى بعنف , فكوا وثاقى , دفعونى حتى ارتميت على
الارض , سمعت انطلاق العربه بسرعه جنونيه , نزعت قطعة القماش عن
عيونى .. غمرنى الضوء الباهر لضحى شمس الصيف ... بدات اعى
المشاهد رويدا رويدا , وجدت نفسى بوسط الميدان المجاور لمنزل احمد ,
و جثمانه مسجى بجانبى .. بدأ بعض الاطفال فى التجمع .. وبعض
النسوه ... الاوغاد قد جاؤوا بالجثمان فى هذا الوقت بالذات كى لا
يكون الرجال حاضرون ... بدا بعضهم فى سؤالى ... لم اقوى على
الكلام , حتى جاء شيخ كبير رفع الغطاء عن وجه احمد ... وابتدأ
العويل ...
| |
|
|
|
|
|
|
|
|
|
Re: العطش ... (Re: محمد حيدر المشرف)
|
مرت عدة اشهر كالحات ... لم نلتقى فيها الا لماما , حتى جائنى
النذير واخبرنى ان نسرين تريدنا الان و معا ... آه يا نسرين , كيف
القاك الان وانا لم انسى بعد طعم المرارة فى حلقى ... والانكسار
والهزيمه , حين وجدتنى اهتز كعصفور صغير امام خالتى التومه و هى
تسألنى لماذا اتيت باحمد ميتا ؟... وبكاء الصغيرة تيسير ما زال يرن
فى اذنى كقرع آلاف النواقيس .. كنت اعرف ان رصاصه اخري ستغرز
فى صدرى عندما ألقاك يا نسرين , التفت الى النذير قائلا
- منعم عارف ؟..
- راجينا فى امدرمان
ترددت قليلا ... ثم سألته
- نسرين عاوزانا ليه ؟..
- احتمال عرفت انو الجامعه قربت تفتح .. وقدرت انو
احسن نتلاقى قبل كده
- وسلمى ؟.. عرفت انها جات الخرطوم
- والله ما عارف يا عثمان .. انا اصلا متضايق من الموضوع ده
واحسن ننتهى منو سريع .. يلا منعم منتظرنا
.
| |
|
|
|
|
|
|
|
|
|
Re: العطش ... (Re: محمد حيدر المشرف)
|
وهكذا التقينا .... كم كنت مشتاقا لك يا منعم ... تعانقنا - فى
صمت - طويلا , ثم انتحبت انا وهطلت دموع النذير غزيره , ولكنك
لم تبكى ايضا ...
وصلنا بعد المغرب بقليل ... جلسنا فى الحوش ... جاءت نسرين
قرأنا الفاتحه .. ثم جلست , جلسنا ... لم نقوى حتى على تبادل
السلام ... لم تسعفنا اللغه ... تذكرت حديثك عن احترافيه المعنى حد
الفصام مع اللغه ... كسرت انت حاجز الصمت بهدوء قائلا
- كيف احوالك يا نسرين ؟..
- الحمدلله .. اسمعوا يا جماعه ... انا ماسكه نفسى بالقوه وما
عاوزه ابكى ... لاسباب كتيره فضلت القاكم هنا قبل ما نتلاقى
هناك ... انتو عارفين انا بعزكم قدر شنو ... وقدر شنو انتو
قريبين .. وفقدنا واحد ... ... بس ما حأقدر امارس علاقتى بيكم
زى اول ... احمد , الله يرحموا .. مات مره واحده و وانا بموت فى اليوم
الف مره .. بموت فى اللحظه دى بالتحديد وانا شايفاهو طالى وبنفس
ضحكتو ديك من عيونكم ... بموت لمن القاهو حاضر فى تفاصيلى كلها
... انتو فاهمنى واكيد حاسين بالكلام العاوزا اقولوا ... انا ما حاقدر
الاقيكم تانى .. ما حاقدر
وبذات هدوءك كان صوتك عميقا جدا يا منعم وانت تقول لها
- اصلا ما عندنا خيارات كتيره يا نسرين ... ما حنتفرق الا
عشان الحاجات البتلمنا ... خوفك مننا من حاجاتك العندنا وما فيشه
... خوفنا منك من حاجاتنا العندك وما فيشه ... والخوف ما زى الحزن
يا نسرين ... الخوف بكبر .. والعطش بزيد ... بس بيفضل عندنا
عندك حاجات لسه فى ... خلى بالك من نفسك ... وحافظي على
نفسك ... ولو اتخلصنا يوم من الخوف الكبر جوانا ده ... امكن
نتلم تانى ونتعافى ونصالح زمنا من جديد ... يلا شدى حيلك ,
ومع السلامه ...
| |
|
|
|
|
|
|
|
|
|
Re: العطش ... (Re: محمد حيدر المشرف)
|
و نهضنا ... وانفجرت نسرين بالبكاء , غالبت دموعى والتفت
اليك يا منعم ... لحظتها , عرفت ان كل خلية فيك تشكو
من العطش ... كنت تحدق خلفى تماما ... التفت , رأتها ...
رأيت سلمى .. كيف كانت قريبه منى لهذا الحد ولم احس
بسريانها ذاك العنيد فى عروقى ... كيف لم احس بدبيب نبض
العشق يموسق نبض القلب حال اقترابها منى .. لم تنطق هى - سلمى -
بشى .. اخذت بيد نسرين وقادتها لداخل المنزل ... ساد الصمت
بيننا طويلا .. والنذير يقود العربه بتوتر ملحوظ وصوت مصطفى
يغنى ..
( قطع شامة هواك من قلبو ..
الا هواك نبت تانى
وملا الساحات .. )
وبدون اتفاق مسبق اوقف النذير العربه امام احد
الكافتريات المطله على النيل ...
.
| |
|
|
|
|
|
|
|
|
|
Re: العطش ... (Re: محمد حيدر المشرف)
|
نزلنا ... طلب النذير القهوه , التفت انت الى النادل
مصححا ...
- شاى ... عاوز شاى ساده ..
باغتك النذير بالسؤال ...
- لاقيت سلمى الفتره دى ..
- آخر مره اتلاقينا كان معانا احمد ... فى الميدان الشرقى
تتصوروا !... كنا بنتكلم عن الموت ... عن الناس الاختاروا الموت
... مايكوفسكى , وعبد الرحيم ابوذكرى والعلاقه البيناتم ... احمد كان
بفتكر انو فى بعد صوفى فى الموضوع ... الحقيقه المطلقه البنمشى
ليها بغض النظر عن الاداة المستخدمه فى فعل الموت نفسو ...
ممكن تقع من الطابق العاشر , وممكن تتكيف ذهنيا مع الموت
وتموت .. وده بفسر موت المبدعين بدرى ... عبدالعزيز العميرى
مثلا ... اصرار محمود محمد طه كان برضو جزء من مشيهو
للحقيقه المطلقه .... موت صلاح احمد ابراهيم بعد على المك
بشويه ... والناس الاقل شفافيه بختاروا الغياب كموت بديل ...
والناس الماعندهم شفافيه بقعدوا ... عثمان مالك ساكت ؟...
رشفت من فنجانى وانا ما زلت امد بصرى فى الظلام
الكثيف اليلف توتى ... ثم قلت
- عارفين انو غياب احمد خلانى اكتشف انو موجود فى
حياتى بصوره غريبه ... تفاصيلى كلها ما بتم الا بيهو .. احمد
كان هادى فينى ... جزء كبير من فهمى للحاجات كان من
تاثير احمد على .... زى فنان كان بلون فينا بى ريشتو , وبدون ما
نحس نطلع اجمل ... يا الله يا احمد ...
.
| |
|
|
|
|
|
|
|
|
|
Re: العطش ... (Re: محمد حيدر المشرف)
|
وتحدثنا كثيرا ليلتها .. ضحكنا طويلا , وطويلا مارسنا
الحزن .. وقبل ان نفترق قال النذير
- غريبه انو نضحك ... بس كنت حاسس انو احمد
كان بضحك معانا ... الايام الفاتت كنت بحس بالذنب
لو لقيت نفسي بضحك ...
التفت يا منعم محمود اليه قائلا
- يا عزيزى ... عندما تصبح التجربه اقوى من الالم ...
ينمحى الاحساس بالذنب
صاح فيك النذير
- انت الكلام ده بتجيبو من وين ؟!..
رددت عليه
- محمد شكرى ... رواية وجوه , عندى فى البيت
وحاديك ليها ... بس تقراها كويس
بعدها ما افترقنا قط .. الا بعد رحيلك الحزين
عن امدرمان ... حبلك السري ... او عن تلك الشامه التى قطعتها
من قلبك , فازهرت بستان عشق فى باحة روحك العطشى ... سلماك العصيه
... وسلماى المستحيل
وها انذا اعود اليك يا خرطوم .. ليس فى يدى سواك
ماذا بيديك لى .. ايتها اللعينه
.
| |
|
|
|
|
|
|
|
|
|
Re: العطش ... (Re: محمد حيدر المشرف)
|
( 3 )
منعم محمود
الدنيا ليل .. غربه ومطر , وها أنت يا منعم محمود
- وفى كل المساءات الغريبه - تعود , لرحم الارض امدرمان .... ولمدارات
خروجك الحزين ظهيرة النحيب الموغل فيك ابدا ... وها أنت الغريب فى
المدن الغريبه لا شى سوى جرثومة متحوصله فى كبد الغياب ...
لا تمنع الذكري , ولا تقوي على هذا المطر الشجين ... وسلمى
... عليها اللعنه , مازالت تمارس ايغالها الموحش فيك بذات هدوؤها
المستفز ... الواثق ... الشفيف , سلمى العصيه على كل الكؤوس ,
والمسافات البعيدة ... و الرحيل , هل كنت تحبها حقا ؟... حدث منعم
نفسه هازئا بالاجابات المعلبه ... راقب جيدا احتقان السؤال على زجاج
النافذه .... ابتسم بمرارة لصورته الشبحيه المنعكسه على زجاج النافذه قبل
ان ينتبه ل ( آنَا ) وهى تحييه بحميميتها الدافقه
.
| |
|
|
|
|
|
|
|
|
|
Re: العطش ... (Re: محمد حيدر المشرف)
|
هتفت به آنا
- عزيزى منعم كيف حالك اليوم ... لا تبدو بحال جيده رغم
الابتسامه .... هل تذكرت احدى الخائنات
- عزيزتى آنا .. كم انت ماكره , لكنه ريتشارد من يدفع ثمن
ذلك ... اليس كذلك ؟ كيف حاله
- ليس لديه الكثير هذه الايام ليورط نفسه فيه ... ولكن ما الذي
اتى بك باكرا هذه الليله ؟...
- هناك موعد ... ولكن وكما قلت لك نحن قد نلتزم باى شى
الا المواعيد
- وهل يوجد شى آخر تلتزمون به .. انتم الافارقه لا تتعلمون
ابدا
- دعك منا ... والان اين ليزا لتاتينى بالبيره البارده ... اما انت
يا عزيزتى فلتذهبى لافريقيا لاستعمارها من جديد ,, ولا تنسى
ريتشارد
- ولماذا اذهب وانتم هنا !.. ما رأيك سأبدأ بك الان ... وان
كنت لا اثق بالنتائج ... اووه عزيزي المسكين منعم , كلهم يأتون
هنا ليفرحوا قليلا الا انت , تشرب كثيرا كى تحزن ... البارحه
سألتنى احداهن عنك , من هذا الاسود الوسيم , رأيت بعينيها
بريق لهفة فنصتحها بالرحيل لاقصى قرية فى الشمال لتطفى لهيبها
فى الثلوج هناك ...
اذا رحلت ... فسنلتقى , فانا يا عزيزتى الراحل الابدى عبر
المساءات الغياب .. والمسافات العصية , والابتلاء ... ولكن لماذا تأخر
محمود ؟... تمتم منعم لنفسه وهو يتامل الذهبى ذو الرغوه
العنيفه .. جرع منه وهو يدعى الانصات ل آنا وهى تمارس ثرثرتها
الاليفه حتى اقتحمهم محمود فجأة ... كان شديد الاشراق كأنه نازل
للتو من السماء , حاضر الوسامة والالق ... وحميم جدا هذا
المحمود ...
- معليش على التأخير .... الجو سى جدا مش كده , كيف
حالك يا آنا
- بخير كيف حالك انت ؟.. ها قد اتى صديقك , فلتسعد
- انا اسعد بك حقا يا آنا
جلس محمود بعدما عاد بكأس ... وعينيه ما زالت تومض بشده ..
عرفت ان لمحمود ما يخفيه .. تعمدت الا اسأله لاخبتر قدرتى على
الصبر ... ورحنا نثرثر
.
| |
|
|
|
|
|
|
|
|
|
Re: العطش ... (Re: محمد حيدر المشرف)
|
- كيفك يا محمود , وكيف ساميه وهبه
- كويسين ... ساميه مصره ارجع بيك فى يدى , بكره اجازه
وما عندك ايى طريقه للزوغان
- خلينى بكره اجى اتغدى معاكم ... اصلا مشتاق جدا لى هبه
- هبه حتفرح بيك ... تصور بقت تقول اسمك بطريقه لذيذه
( اموو موونئيم ) ... لكن ما عندك طريقه .. حتمشى معاى الليله
ساميه عامله حسابك على العشا , وبكره يوم مفتوح وعندها ليك
مفاجئه .. الموضوع ده محسوم , سمعت تصريح الطيب الخير
الاخير ؟...
- ابدا ... لكن بتوقع يحصل انشقاق فى حزبهم قريب
- اتوقعت المساله دى كيف ؟... التصريح فعلا هجوم عنيف على
القياده ... مع انو كان اقرب الشباب للسِد ..
- شوف يا محمود ... الطيب عندو جلابيه لكل مرحله ...
بغير جلدو كل ما يحس انو ضاق عليهو ... بكره حيطلع
ليهو بيان وينشق مع مجموعتو ... بعد بكره يرجع الخرطوم ...
وحينتهى وزير ... حساباتو دقيقه جدا ... ايام الجامعه كان
صوتو اعلى مننا .... كان صوره مثاليه لمناضل شرس وعنيف ..
لكن تتصور انو اصلا ما تم اعتقالو ... بعد الجامعه اتفاجأنا
بانضمامو للحزب الكبير .... نفس الحزب الكان بهاجمو ... استقبلوه
هنا استقبال الابطال ... ومشى فى الحزب بسرعه الصاروخ ....
لو عرفتو يا محمود حتلقى دكتاتور كبير جواهو ... هو مثابر
لكن افقو السياسى ضيق جدا ... ولو رصدتو كويس حتلاقيهو
حايم فى كل المواضيع بى بره ... حياتو ما اتجاوز اليافطه
والشعارات ... عندو ذاكره فوتوغرافيه للاحداث , لكن قدرتو على
التحليل صفر ... صدقنى يا محمود النوع ده خطير جدا
وللاسف , بوصل لاهدافو ... دى يا محمود مأساة بلد زي
السودان
.
| |
|
|
|
|
|
|
|
|
|
Re: العطش ... (Re: محمد حيدر المشرف)
|
- عارف يا منعم ده كلام غريب !... انا لاقيتو
كم مره وكان دايما بسألنى عنك ... بذكر آخر مره
هاجمك بى شكل غريب ... هو بفتكر انك نزلت من
قطر النضال فى محطة الجامعه ... ده تعبيرو بالظبط
انا افتكرت انو الموضوع نوع من الزعل منك والاهتمام
بيك ... بس يا منعم بغض النظر عن الجزء الغير
معلن فى هجومو عليك .. لكن
- عاوز تقول انو فيهو جزء من الحقيقه ...
عارف يا محمود قصة القطر دى هى ذاتها المشكله ...
المسار الواحد البوصل لى محطه واحده حددتها السلطه فى
السودان ... السلطه بى معناها الواسع , البتلمهم كلهم
حكومه , معارضه , احزاب , عساكر و حركات عسكريه , بيوتات كبيره
وتجار زيت وسماسره .... ونحن ما مسموح لينا الا بى خيارهم الواحد
ده , يا نركب معاهم او يجردونا من الالقاب والنياشين ...
وحتى لما نتناول خيارهم ده فى النقاش معاهم ما مسموح
لينا بى نقاش افقى فى ارضيه واحده , لانو شكل التواصل
عندهم راسي من فوق لى تحت ... وده تصور اساسو الدين
والطائفه والايدلوجيا ... السودان ده ابدا ما قام فيهو نقاش
حقيقى ... ما قعدنا يا محمود فى الواطه دى ومسكنا ورقه
وقلم وحسبناها ... زمان فهمت سودانوية احمد الطيب زين العابدين
كده ... وكلامو عن ( البرش ) البنقعد فيهو كلنا بى شكل
دائري ... خيارهم الواحد ده بفرض علينا انو نناضل عشان
يصلوا ... يلبسوا جلابيه الديمقراطيه ويحكموا ... او بدله العساكر
وبرضو يحكموا ... والطريقه المعروفه قطر النضال بتاعم ده
.
| |
|
|
|
|
|
|
|
|
|
Re: العطش ... (Re: محمد عبدالرحمن)
|
محمد سلامات
سنواصل وان كان حظها من الاقبال ضعيف ..
عارف يا صديقى
كثيرا ما اتساءل عن ملائمة هذا النوع من الكتابة
للنشر الالكترونى
تحياتى
| |
|
|
|
|
|
|
|
|
|
Re: العطش ... (Re: محمد حيدر المشرف)
|
محمود
- حتى لو كان كلامك ده صاح ... وانا ما معاك فيهو ,
تبقى انت والهامش الكبير فى السودان السبب الحقيقى ... السلطه
مسلمه موجوده .. وحتكون موجوده تخدم فى مصالحها وحتى وانت
سلبى معاها يتهبشك ... السلبيه والصوت المافى بتاعك ده خلى
احساسك بالهزيمه متضخم جدا .. الهزيمه يا منعم شرك وقعت فيهو
... وين قدرتك على ابداع نضالك .....؟ انت طلعت من السودان
ليك سنوات طويله ... ولسه سلبي قدام هزيمتك , ما قادر او
ما عاوز تتعامل معاها ... عايش ليك فى سراب داخلى ...
وبتدير مع نفسك منلوجات داخليه .. حتى نفسك عملت منها داخليه
وقعدت فيها ... انت يا منعم ما حاولت مره تنزل السودان عشان
على الاقل تجدد احساسك بيهو .. اتحول السودان جواك لى
فكره ثابته ما بتتحرك ... اتحولت الفكره دى لى طوطم .. صدقنى
يا منعم الخيار ما واحد , الخيارات لسه مفتوحه , فى عوالم
لسه راجياك ... انا ما عاوزك تنفض التجربه بتاعتك .. انا عاوزك
تبنى عليها ... الناس لسه حيه وبتتحرك ... عارف يا منعم اول
احساس جانى يوم اتولدت هبه ... شفتها وسط مجموعه من
الاطفال ... عرفتها , بت سودانيه صاح ... حسيت بالابداع ... بالتجديد
.. بالامتداد فى بكره ... حسيت انو غنانا القبيل داك ممكن يتحقق
.. اولادنا السمر يا منعم .. افراحنا البنمسح بيها احزان العمر
.. ده ما زمن الاسئله الكبيره ... ده زمن الاسئله الصغيره والبسيطه
... التفاصيل اليوميه ... وصدقنى يا منعم اجابات الاسئله الصغيره دى
هى البتقودنا للاجابات الكبيره ... الكميات الكبيره دايما بتقودنا للفوضى
... الشرائح الصغيره هى الربطت العالم .... انا آسف , لكن من
حقى اتكلم معاك ... كلامى معاك ده جزء من حواراتى مع
ساميه ... مشغولة بيك كتير ...وحقيقى عاوزنك تتطلع من الجو
الداخلى العايش فيهو ... اطلب ليك بيره ... منعم , منعم
.
| |
|
|
|
|
|
|
|
|
|
Re: العطش ... (Re: محمد حيدر المشرف)
|
صديقى ود المشرف ...
اراك تتلمس مواطن الكتمان منا...
فهلا عدلت ؟؟؟
ياخ بريييييييييد كتابتك ..
دافية وفيها امتاع مجنون..
واصل يا سمح ...
| |
|
|
|
|
|
|
|
|
|
Re: العطش ... (Re: عوض حمزة)
|
يا عوض حمزة ..
مسكت الوردة من ايديها البتوجعنى ..
عاوز عشرة ونسة معاك ..
لذا .. دعوتى لك مكانها نادى الغولف
البلكونة ديك ذاتها
ولك من الوجع الكتير ..
| |
|
|
|
|
|
|
|
|
 Re: العطش ... (Re: محمد حيدر المشرف)
|
د. محمد حيدر ,,,
مساء الخير .........
____________________________________________________________
أقروك وبالخاطر بعض من المواقيت القديمة ......
زيارتي لكم بمصر الجديدة ويومها كان صاحبي ظافر عبد الله صلة الوصل
ومصادفتنا بالخرطوم دوماً عند فول أبو العباس ... بشارع السيد عبد الرحمن
لك الود بعض الشخوص يبقون في حنايا الذاكرة ......
***
تلك الكتابات صالحه تماما للنشر الاكتروني
لانها تروي العطش لحروف منداحه
في صدق وسلاسه...
تجعلك تقرؤها..
ثم يقتلك العطش في أنتظار المزيد .....
واصل يادكتور
| |
|
|
|
|
|
|
|
|
|
Re: العطش ... (Re: عبد الناصر الخطيب)
|
يااا ناصر
ياخى مشتاقين وجميل جدا ان التقيك هنا ..
كيفك وكيف كيفك يا صديق تلك الامسيات التى كان شعرك فيها ثالثنا
كيف واين الظافر ؟..
عميق مودتى ولنتواصل ..
| |
|
|
|
|
|
|
|
|
|
Re: العطش ... (Re: محمد حيدر المشرف)
|
سادخلكم والتزم بالصف الاخير
والحق ما تبقى
من الركعة الاخيره عندكم , واشيل
باقي شيلتي براي في ركعاتي وتوسلاتي الفايته
متوكلا على حرصكم بي وانكم لا محالة
رحماء بي وبالمؤمنين ...
وماذا عن مداد الركعات الفائته يا مشرف ماذا؟؟؟؟
| |
|
|
|
|
|
|
|
|
|
Re: العطش ... (Re: فيصل عباس)
|
Quote: ساشهد بانك وحدك
في هذا الخيط .. |
لماذا يصادر فيصل وجودى ..
انى هنا ... وللعطش هنا طعم الارتواء
ركعة ووجدوسلام وستذوق طم العطش يافيصل ..
| |
|
|
|
|
|
|
|
|
|
Re: العطش ... (Re: محمد عبدالرحمن)
|
محمد العبد الرحمن
ما كنت اغيب احدا سوى نفسي,
ثم!!
لكني كنت اتبع الخيط واتحسس نفسي في داخل الارتواء من عطش كان
يروينا...
سائلا نفسي هل ارتويتي (اذ ان في الدرب عطش قادم) ؟؟
وتردني بسؤال اكثر عطشا هل من مزيد؟؟
وحينها تاكد لي ان نفسي من بنات جهنم, وتركتها لاتبع الخيط..
ازيك وكل النهارات الرمضانيه الخاليه من العطش
ازيك والمشاوير الجايه
ليـــك
الود ده جميل يا محمد جميل شديد وعطشان كمان..
| |
|
|
|
|
|
|
|
|
|
Re: العطش ... (Re: محمد حيدر المشرف)
|
آه يا محمود ... لا تعلم كم هو موجع انتزاع هذه
الخلايا ... كم هو موجع النزوع اليها ... كم هى موجعه حيث
هى الان .. اعلم ان هذه المسارات الثلاثه غير متوازيه , تقاطعها
داخل هذا الجسد وخارجه ليس خيارا ... ولكن , هذا انا ... تماما
كما قال التشكيلى كاظم العراقى ( هذا انا .. هذا جسدى
اراه فى الرؤيا من الداخل ... كما كنت اراه وانا فاقد الوعى
.... انا استقرئ ولا احلل .. هى الرؤيا تركتها لحالها فانطلقت
حرة مثلما رأيتها ...)
| |
|
|
|
|
|
|
|
|
|
Re: العطش ... (Re: محمد حيدر المشرف)
|
آه يا سلمى ... لماذا تركتينى وحيدا .. زبونا لكل المطارات
البعيدة , والبلاد الماسخه , والشوارع الجحيم ... اشتاق لطعم
الحليب فى غياب ( سيد اللبن ) ... وأزرع الشوارع بالقصائد
والغياب ..
| |
|
|
|
|
|
|
|
|
|
Re: العطش ... (Re: محمد حيدر المشرف)
|
محمد المشرف حرام عليك يادكتور
المين رود
وليمون بيزنس
وطب
وشلة الجامعة
اتزكرت السنة الاولي ولمة الجميع في السنتر ..
شكلي حاقيم في البوست ده
مع تحياتي
اميرة
| |
|
|
|
|
|
|
|
|
|
Re: العطش ... (Re: اميرة الحبر ادريس)
|
ياااا أميرة
ازيك وكيفك وسلامات ..
وانا مازالت تأسرنى تلك الاضاءة الصفراء الخافتة للمين روود
والعاشقون والكاتمون العشق ترينهم يا أميرة تناثروا هنا وهناك
وكل الناس اتنين اتنين
اجزم الا بقعة من الارض شهدت هذا المقدار من الهوى كالمين روود ..
غير ان بعض الضليعين فى العشق يفضلون بعض الازقة فى علوم وقانون..ولربما تشاهدين
بعضهم فى النادى الجغرافى او تحت مبانى معمار
يا .. وتذكرينى الان بلمة السنتر , هذة التفاصيل يا اميرة موغلة فى الجمال
ياخى عشرات حبابك فى البوست
ومنوره ..
| |
|
|
|
|
|
|
|
|
|
Re: العطش ... (Re: اميرة الحبر ادريس)
|
يامحمد ياصديقي
ياخ جد أنا بعتذر ليك لكوني لم أشاهد هذه اللوحة سوي الآن
والله أسف شديد إنو قطعة زي دي الواحد ما يلم فيها بأخوي وأخوك
ذكريات حميمة ومشاهدات سمحة بالحيل . غايتو بليت ريق الكتابة
شكراً يامحمد
| |
|
|
|
|
|
|
|
|
|
Re: العطش ... (Re: محمد حيدر المشرف)
|
وتريد لى يا محمود الآن حبيبة اخري واطفالا قصائد وتفاصيل
اخري رحيمه ..؟
تريد لى يا محمود وطنا اكونه مناضلا وعاشقا وفارسا نبيل ؟؟..
ليس لى الان هذا الوطن ... ذاك التراب الهناك .. محض
تراب .. محض شموس لا تجي الا بالنهارات الزيف والطيور
الميته والمحاذير ... وطن لا يلبى اشتهاءاتنا البسيطه ... ويغتال
حلم اغانينا الفارهات .. تراب لا نطير اليه عشاقا فنلقى
عشاقا ... وطن يقابضنا حبه بالنزيف .. ولكنى ارفض المساومة ,
اذن .. ليس عندى الا ان اتم قصيدتى قبل القيام الاخير
ثم اغيب .. اغيب اليها .. فلسلمى ما تبقى من رحيق ..
ولى منها زاد الاف المساءات المقبله ذات المطر الشجين ,
وخاطر .. وقصيدتين .... وارض الله واسعه .. وستكون واسعه
حتى يغادرنى الحنين .. هكذا اعلن محمود درويش , نعم
الخيارات مفتوحه .. ولكنها غير مستقله لان المسارات غير
متوازيه .. تتقاطع حتما بفعل المساوقه اللااراديه نحو نهايات
متواطأ عليها سلفا .. اذن لا وجود للخط المستقيم .. هذي
هى ثقافة الدوران التى ارفضها .. وانت ما زلت تدور
بسيارتك الصغيره , والمدينة تلبس ثوب دعارتها كى تتعري
من هذا الزيف العالق فى عيون ساكنيها .. وتدعوهم
للجحيم .
.
| |
|
|
|
|
|
|
|
|
|
Re: العطش ... (Re: محمد حيدر المشرف)
|
محمدالمشرف والعطش
العود احمد
كان يدفعني خلال اليوميين الماضيين ذلك التقارب الخفي بين خريجي
الخرطوم فابحث عن هذاالبوست كلما سنحت الفرصة وانا اتلهف
لتزكر تفاصيل ايام جميلة اقراها بين سطورك لتحملني حيث احب
فاستعيد احلامي وزكريات لم يمحها الزمن ..
فشكراكثيرا
ولي عودة اكيدة
اميرة
| |
|
|
|
|
|
|
|
|
|
Re: العطش ... (Re: nadus2000)
|
الحبيب القريب عبدالجليل
بعض الاصدقاء .. بعض الذات
وكل الزاد ..
طوبى لمن كنت انت بعض ذاته وكل زاده
اسعدتنى ايما سعادة بقراءتك للعطش
وعطشى هو بعض من عطشك
واو طاء نون
وحتماستبتل يوما العروق ..
تحياتى
| |
|
|
|
|
|
|
|
|
|
Re: العطش ... (Re: اميرة الحبر ادريس)
|
أميره الحبر ..
سلامات ..
هو وكما قال عبدالله على ابراهيم عبير الامكنه ..
فللمكان خصائص يختص بها ..
له لون وطعم ورائحة ..
له دقائق وايماءات تشير لكنهه
ولة سلطة على جغرافيتية ..
حتى انى كنت اقول كل من دخل حرم جامعة الخرطوم فهو عاشق
الا من رحم ربي فكتم العشق ..او تعذر عليه فهم ذاك الجمال فتكوزن
تخيلى يا اميره ان تطلي على الميين روود من ذاك الممر
ذاك الممر يا اميره الذى يعبر بك تحت المكتبه
تعتلينه بسلالم قليلة وانت قادمه من الميين روود
توقفى حال اعتلائك السلالم , واستديري
يممى وجهك شطر الميين روود ومن ثم البوابة
وأرجعى البصر,هل ترين من فطور
ثم ارجعى البصر كرتين , ينقلب اليك البصر عاشقا وهو جميل
أقترح ساعة المغربية ميقاتا لهذه الصلاة
هكذا أفهم يا أميرة تلك الصلات
تحياتى
تحياتى
| |
|
|
|
|
|
|
|
|
|
Re: العطش ... (Re: محمد حيدر المشرف)
|
محمد حيدر
تابعت البوست مذ كان غضآ ، قبل أن يستوي عوده
فالجمنا دهشة
والقمنا متعة
وضاع الكلام
هاء سكت رافقتني
وحالة شلل في الإبانة
اللهم حل عقدة في لسان
قادر على البيان
أسكتته الدهشة
والجمته المتعة
شكرآ يا دكتور
| |
|
|
|
|
|
|
|
|
|
Re: العطش ... (Re: أبو ساندرا)
|
ابا ساندرا .. واخواتها
شرفت بكلماتك البينات المبينات
وقدرك عالى قدرك
ياالعود وخاتى الشق
والعود هنا حمال اوجه كثيرة
فان شئته بلهجة اهل الخليج .. فهو لك
وان شئته رفيقا لغنانا الاشتر المطرب فهو انت
بيد انى انحاز أكثر لما اراده محجوب شريف
تحياتى ..
| |
|
|
|
|
|
|
|
|
|
Re: العطش ... (Re: محمد حيدر المشرف)
|
الابن محمد ..
إعزازي و تقديــري و دهشتي و إندهاشـي !!
دهشتي لمفاجأتي بهكذا نص ... يتنفس من رئة الروعة و الابداع
و تأتي الدهشة ثانية لغفلتي عن تسرب سنين من بين مسامات عمري لم تتح لي أن أدرك أن (محمد) لم يعد ذلك الشاب الصغير ... ففاجأني النص يقول متبسما أن (محمد) قد فاق قامته علوا و ارتفاعا...
العطش ( و أحسبه عطش كردفاني اللون و الهوي) يتأصل فيه للماء طعم و لون و رائحة ... عطش إذا ما نظرنا الي ما وراء حجبه ، نري المفردة الجميلة و السرد المموسق و التبتل الصوفي ، و إن تعمقنا في ( التفكيك) فهو في مجمله تورية لما يمكن إختزاله في كيمياء ( الحب و الثورة و الأمل)
أعتذر لأن شهادتي لكم و عنكم .... مجروحة و رغما عن ذلك ، جارحة في دواخلي تهتف بكم و لكم و تقول ( ينصــر دينك)
و اليها في عليائها قبلك أيضا أهمس لها و أقول ( ينصر دينك يا حاجة التومــة)
قبل الاستراحة مع النص ، و بكل الصدق ، أعجبني وفاؤكم للمهدي اليهم العطش ! فليرقدوا بسلام....
سلم على الدفعة و ناوله النص ليستعيد ذكري لنا جميلة ( فاكر انتو براكم بس ؟ برضه كان عند كافتيــريا!!)
وآصـل .... فتذكرة سفركم درجة أولي...
| |
|
|
|
|
|
|
|
|
|
Re: العطش ... (Re: hamid murahid)
|
استاذى والعم العزيز
حامد مراهد ... سلامات
رحم الله (حاجة التومة) فقد اورثتنا حنانا وحنين لا ينقطع ..
كما وكان دعاءها لنا صلات ووشائج تمتد ما بيننا والسماء .. فتحس بانك
موصول لا موتور برحمة ربك .. تغشاها الرحمة والمغفرة
وكأنك هنا تستشرف غيبا .. فقد قرأت ما تفضلت به على وانا أكتب مقاطع
من العطش كردفانية الهوى واللون والرائحة
الدفعة بخير وما زال يتنسم السموم والهجير المعافى والغبار الحميم
بامدرمان ..
شرفت جدا بكلماتك .. و
دمت عافية وحضور
| |
|
|
|
|
|
|
|
|
|
Re: العطش ... (Re: محمد حيدر المشرف)
|
يا محمد
يا محمد
!!!!
يا الله
يا الله
غشيـــتنى بالعنوان ( العطش )
دخلت بهدوء
ويا ريت لو دخلت زمان
كان بردت عروق الدهشه
من فيض الجمال
جمال ســردك البديع
ويا...
سـلام
عليك ..
إبتلت العروق وذهب العطش
إعتمدنى من محبى حرفك
دُم كما أود
| |
|
|
|
|
|
|
|
|
|
Re: العطش ... (Re: عبدالله داش)
|
الله يا دكتور لقد لمست ذكرياتي في عمقها تماما ..
المكتبة المين وماحولها ..نجيلتها ..البنشات المقابلة ليها ..
تلك الرهبة التي تكسوها ..حقيقي ندمان من ضيع سنين الجامعة دون ان
يسبر غورها..
وندمان اكثر من لم يسترح في اركانها القصية ..
مكتبة الجامعة يا محمد اجمل ما يها كما المحت انت ان منها تحددالمين رود
وبوابته العتيقةومنها ترسم الصورة لتبقي للابد..
واضيف ان اجمل ما في المكتبة ايضا انها تربط بين "اقتصاد" و"أداب"
شكلي كده يا دكتور اني حاشاركك عديل في البوست ده ابدع فيه كما تفعل دائما
واترك لي الذكريات..
مع ودي
اميرة
| |
|
|
|
|
|
|
|
|
|
Re: العطش ... (Re: اميرة الحبر ادريس)
|
اميرة
سلامات وكيف الحال
عارف يا اميره انا كنت بستمتع بتفاصيل صغيره
جدا فى الجامعة سواء السنتر او المجمع الطبى او شمبات
والاخيره - اي شمبات - فده شيتا كتر بالحيل
اعتقد انو فى اغنيه اسمها الجمعة فى شمبات ..
اوتعلمين يا اميرة فداحة ان تقضى سحابة يومك فى شمبات ..
اولا لماذا الجمعة ..
هو اليوم الوحيد البخليك تحس بامتلاكك ولوحدك كل ذاك الجمال
شفت الدعاية بتاعت زين .. هذه حديقتى وهذا مسبحي فقط
زيدي عليها وهذة الحبيبة
وهذا انا ..
ذات جمعة
وذات شمبات
وذات حبيبة
وطيور ما انزل الله بها من سلطان
اشياء تجعلك تحدق بلا وجه وترقص بلا ساق
وكانك سلطان الغرام او
الملك فاروق
رمضان دخل العضم يا اميرة
| |
|
|
|
|
|
|
| |
محمد حيدر المشرف
Abd Alla Elhabib
سلمى الشيخ سلامة
عادل التجانى
Ibrahim Algrefwi
أبوذر بابكر
بدر الدين الأمير
Emad Abdulla
هند محمد
Muna Khugali
fadlabi
محمد عبدالرحمن
مامون أحمد إبراهيم
عوض حمزة
فيصل عباس
اميرة الحبر ادريس
خضر حسين خليل
nadus2000
أبو ساندرا
hamid murahid
فيس بوك
تويتر
انستقرام
يوتيوب
بنتيريست