|
|
 الذين بددوا العمر أسفارا- قصص من الواقع.
|
الطفشان والنجوع والطشيش الشراد والدواحة كلمات مترادفة بمعني انو الزول يسيب اهلو و ناسو ويطش ويكوس لو بلد وناس تانيين.
75% من رواد المنبر دا ناس طاشة في ارض الله الواسعة
بعضهم طفش أملا في حياة أفضل, والبعض طفش نتيجة مشكلة صبيانية تافهة ,والبعض طفش استكشافا للمجهول.
بعضهم حظي بحياة كريمة وأيسر وتزوج .
والبعض لم يجد سوى سراب بقيعة .
وجميعهم خاسر..خسر العمر الذي تبدد في المدن الغريبة.
|
|
 
|
|
|
|
|
|
|
|
Re: الذين بددوا العمر أسفارا- قصص من الواقع. (Re: معاذ حسن)
|
قصة دفع الله ود التوم
كان الصبية في بلدتنا يطفشون لأبسط الأسباب وكانت وجهة الهاربين منطقة تسمى (الصعيد) لا اعرف حتى الآن أين يقع هذا الصعيد وظل هذا الاسم عند الصيبة الذين يفكرون في الهرب كلمة مليئة بالغموض والسحر ومعظم الذين نجعوا عادوا مرة أخرى والغريب أن معظمهم صادف نجاحا وأيسروا وأصبحوا من أصحاب الأملاك غير أن بعض هؤلاء الناجعين صار عبرة لمن اعتبر.
من أشهر قصص النجيع عندنا قصة دفع الله ود التوم ,بعد أن قضي عامان في الخلوة بدا دفع الله حياته العملية في الساقية مع أخوه الأكبر وأبوه التوم ود أمحمد.. كانت حياته بسيطة وأحلامه متواضعة... ربي ثورين كان يحلم أن يبيعهما ويتزوج أم الحسن بت العوض ويعيش كما عاش آباؤه وأجداده..... وذات يوم نشب خلاف بينه وبين أخيه الأكبر فاحتكما إلى الأب فأنصف الأخ الأكبر, وفي فجر اليوم التالي غادر دفع الله البلدة... هلعت والدته ولم يهتم أبوه كثيرا ظنا منه أن سوف يعود بعد ساعات ولكن دفع الله لم يعد في ذلك اليوم ولا الذي يليه... ولا بعد عام ...وظلت أمه أعواما طوالا تزاور الطريق الترابي الذي يمر أعلى البلدة تتسقط أخباره لدى المسافرين سائقي اللواري القادمة من الصعيد ولكن لا احد رأى دفع الله أو سمع عنه.
وذات أصيل وبعد أربعين عاما من هروب دفع الله كانت بخيتة بت النور (فازعة) تحتطب في أطراف البلدة التي توسعت كثيرا فإذا بشيخ يدنو منها قادما من مغرب الشمس, ويحمل (بقجة)على كتفه بسطت كفها اليمني ووضعتها أعلى عينيها لتخفف من أشعة الشمس فتبينت وجه القادم, شيخ طويل اللحية مهدم يجر رجليه جرا اقترب منها.
- السلام عليكم
- وعليك السلام.
- دحين آ بت أعمي دي مي حلة ود العقيد؟؟
- بلحيل ياها.
- الحمد لله... بدور بيت التوم ود أمحمد.
آلاف الأسئلة دارت في ذهن بخيتة عن هذا الشيخ الغريب الذي يسال عن عمها التوم الله يرحمو.ردت عليه بسرعة:
- وصلت آود أعمي,وأردفت بفضول... انت جاي من وين؟
- أنا جاي من بلدا بعيد أمشي وأسعل لمن وصلت باقي عندى أهلاً لي في الحلة دي ومطول منهن.
- اهلك ناس منو؟
- أهلي ناس التوم ود أمحمد أنا دفع الله ود التوم.
صمتت بخيتة دقيقة كاملة تتأمله وتذكرت دفع الله اليافع الذي كان يقف في الدلوكة ويختف شبالا من أم الحسن ويركز ليتعشى عشرة سيطان بالعنجاوي ولا يبالي بعد ذلك الشبال أين يقع السوط, دفع الله الذي هرب من القرية قبل عشرات السنين لا تدري عددها وانقطعت أخباره والآن هاهو ذا شيخ مهدم أمامها.
- لا حولا ولا قوة إلا بالله.. عاد الحي بلاقي آد فع الله... أنا مان بخيتة بت النور ما عرفتني؟
- بخيتة كيفنك انك...وبابتسامة متعبة... مالك عجزتي كدي؟
ضحكت بخيتة عن أسنان لم يبقي منها كثير.
- عاد عاجبني انت الما عجزتا... وين بلدك الزمن دا كلو؟
فأجابها بسؤال ملهوف... أمي وابوي حيين؟
- هي يا يابا..امك و ابوك الله يرحمن ميتين ليهم سنين ودنين.
طفرت دمعة من الشيخ لم يبالي بمسحها واردفها بسؤال آخر... والسارة أختي واحمد اخوي وبلاله؟
- السارة وبلاله الله يرحمن ...علا احمد أخوك حي لكن تراهو يوما هنا ويوما هناك.
- وأم الحسن؟؟
- أم الحسن الله يرحما ماتت قبال سنة ووليداتا ووليدات وليداتا رجال.
سألته ما قت لي... وين بلدك وولادك وين؟؟.
أجابها بحسرة ومرارة...
- آبخيتة لا خليت الصعيد ولا خليت القضارف ولا خليت الحبشة ولا عندي مره ولا جنا ولا تنا.
واستمر الشيخ يسأل من بين دموعه ومعظم الذين سال عنهم قد رحلوا عن الدنيا.
قاطعت بخيتة أسئلته وقد عبرت غصة في صوتها:
- انت آشقي الحال اسع الجابك شنو؟؟؟ ما كان تندمس في بكانك دا نامن تموت الجابرك شنو على جنس دا؟؟؟
بقي ذلك الشيخ في القرية عام أو بعضه في منزل أخيه احمد الذي لم يوليه كثير اهتمام وربما لم يشعر بعودته فقد كان في مرحلة خرف متقدمة وتوفي ودفن في ذات الأرض التي هجرها يافع وعاد إليها شيخا يحبو إلى القبر.
| |
|
|
|
|
|
|
|
|
|
Re: الذين بددوا العمر أسفارا- قصص من الواقع. (Re: معاذ حسن)
|
يا معاذ مالك علينا عايز تحبط معنوياتنا من الصباح بقصتك دى
الحمد لله الان الحال تغير يعنى ممكن تنجع فى اخر الدنيا لكن اخبار
اهلك بتكون معاك بصورة يوميا مع ناس ( موبتل وسودانى وايريباوكنار )
يعنى ناس ام الحسن وبخيتة واولاد التوم ديل كلهم تلقى كل فيهم الان شاليهو جوال .
يلا اكتب لينا عن سفرك للعرس والفى شنو والمافى شنو وكدا
وبعدين العرس فيهو برضو جلد واركز والكلام داك ولا الشغل خرطومى
فى انتظارك ........
أحمد العمار
| |
|
|
|
|
|
|
|
|
|
Re: الذين بددوا العمر أسفارا- قصص من الواقع. (Re: احمد العمار)
|
Quote: الحمد لله الان الحال تغير يعنى ممكن تنجع فى اخر الدنيا لكن اخبار
اهلك بتكون معاك بصورة يوميا مع ناس ( موبتل وسودانى وايريباوكنار |
صديقي العمار
انت ناس ليبيا ديل قصتهم شنو؟
ليبيا دي ما فيها تلفونات والا الناس ديل ما عندهم حق الاتصال.؟؟
Quote: سفرك للعرس والفى شنو والمافى شنو وكدا
وبعدين العرس فيهو برضو جلد واركز والكلام داك ولا الشغل خرطومى |
والله يا ابو حميد سيرة العرس سمحة تب
وزي ما بقول واحد قريبنا ( العرس عنكوليب الونسة)
بس كدي نطلع من( منقار) الوزه دا ..وبعد داك الباقي هين.
سلامي للاسرة.
| |
|
|
|
|
|
|
|
|
|
Re: الذين بددوا العمر أسفارا- قصص من الواقع. (Re: معاذ حسن)
|
ماهى الهجرة ذاتها
منذ ان قرأنا كتاب كاتبنا الكبير
الطيب صالح موسم الهجرة الى الشمال والناس السوادنة ... حد هاجة
لكن بختلف معاك في انو في السفر والهجرة فوائد كثيرة
كان السفر عشان المال او العلم او
فهذا هجرته او طفشه ان شاء نحسبه في سبيل الله واكيد متل النوع
ده سوف يحظي | Quote: بحياة كريمة وأيسر ويتزوج |
كمان
اما من كانت هجرته شان
| Quote: مشكلة صبيانية تافهة |
فهو لن يجنى الا
وبحييك يامعاذ حسن على كتاباتك الرائعة
| |
|
|
|
|
|
|
|
|
|
Re: الذين بددوا العمر أسفارا- قصص من الواقع. (Re: سيف الدين حسن العوض)
|
قصة (البعيو)
كثيرون في حلة ود العقيد لا يعرفون إسمه الحقيقي وأنا احدهم ,ولكن لا يوجد أحد في البلدة لم يسمع بقصة البعيو.
ذات ليلة صيفية قاتمة غادر البعيو ابن العاشرة ومعه اثنين من أقرانه غادروا البلدة على دوابهم إلى البلدة المجاورة حيث توجد حفلة دلوكة.ربطوا دوابهم عند أطراف الغابة المجاورة للبلدة واكملو سيرا على الأقدام إلى بيت العرس ,وفي أوج الحفلة وفي غفلة من الساهرين ساعد عليها (علالة العرضة) وضو الرتينة في غفلة من الجميع تكونت في الأفق عاصفة صيفية عاتية .
ومثل هذه العواصف عندنا أمر معتاد الحدوث في الصيف ولا يستطيع أن يتخيلها من لم يراها,تبدأ العاصفة على جانبي الأفق وتمتد في شكل دائرة إلى إن تطوق المنطقة تماما وتعتم للحظات لا تجد فيها هواء تتنفسه وبعد هدوء قاتل فجأة تهب كمارد وتبدأ مقدماتها بأصوات (الطشاتة والجرادل) والأشياء التي تطيع بها إلى أن تعم كل شيء وتصبح حقيقة فوضوية في ثوان,وأفضل ما تفعله في مثل هذه العاصفة هو أن تبقي حيث أنت وان تحرص على أن ترفع رجليك عن الأرض لأن العاصفة سانحة لخروج (الدعت) فإذا هبت وأنت في سريريك فاحرص أن لا تترك طرف الملاية يتدلى إلى الأرض.
المهم إن هذه العاصفة وصلت فجأة إلى بيت العرس وأطاحت بالمكرفون (الجردل) الموضوع على الحيطة وخلطت الحابل بالنابل.
هام الطفل البعيو على غير هدى ينادي رفاقه إلى أن وجد نفسه خارج المنزل ولم يتبين إلا أشباح أشجار الغابة تهم بالانقضاض عليه وصفير الريح المرعب بين أغصانها,حاول العودة فلم يهتدي إلى شيء,كان أكثر ما يرعبه شجرة في طرف الغابة يقال لها (شجرة الجمل) حيكت حولها عشرات الأساطير ولا يجروء أشجع شجعان البلدة على الاقتراب منها في رابعة النهار ناهيك عن طفل وفي مثل هذه العاصفة العاتية, يروي أن هناك جني في شكل جمل ضخم يسكن هذه الشجرة وتروى كثير من القصص عمن طاردهم الجمل,كانت فكرة أن يجد نفسه تحت هذه الشجرة تكاد تقتل البعيو من الرعب فاستمر مهرولا تدفعه الريح أنى شاءت وكلما هم بالجلوس خيل إليه بشبح الجمل ينقض عليه من بين الأشجار,استمر البعيو سائرا طوال الليل بكي حتى جفت دموعه وصرخ حتى بح صوته ولكنه استمر سائرا يصطدم بالأشجار ويقع في الحفر ويطأ على الأشواك .
أشرقت شمس اليوم التالي خجولة باهتة فتبين البعيو بصعوبة أماكن حوله لم يعرفها سمع (رزة) عربية قادمة فجرى نحو مصدر الصوت تشعلق البعيو بالعربية التي بدت له كسفينة نوح , طفق يسال الركاب عن قرية ود العقيد بعد أن روى لهم قصته وللأسف لم يسمع أي منهم بقرية ود العقيد انتهت مسيرة البص في مدينة صغيرة استضافه احد ركاب البص من سكان المدينة عدة أيام.
هذا الجزء هو المتفق عليه حول قصة البعيو...!
وما تلاه من حياته تضاربت حوله الأقوال ومصدر ذلك التضارب هو روايات البعيو المتعددة والمختلفة لكل من يسأله عن قصته فمرة يروي انه عمل في تلك المدينة صبي عربجي وجمع مبلغ من المال ثم سافر عبر قطار الشمال إلى مصر ,ومرة يروي انه قد اختطف من قبل مجموعة من التجار وأنهم قد باعوه في تركيا ويشطح في هذه الرواية بعض المرات ويمزجها بقصة سيدنا يوسف ولكثرة الروايات فسأتجاوز عنها واقفز بك إلى عودة البعيو إلى قرية ود العقيد.
بعد خمسة وعشرين عاما عاد البعيو إلى قرية ود العقيد يرتدي ملابس غريبة مزركشة ,وبسهولة وصل الى بيت أهله وقال لهم- ما معناه - أنا ولدكم الرايح وروى قصته بلغة لم يفهم أهله كثير من مفرداتها وروى انه أصبح من أصحاب الأموال ولديه عقارات في تركيا وتجارة.
قوبلت رواية البعيو بكثير من الشكوك ومصدر ذلك- بالنسبة لأهل القرية- انه قد عاد يتحدث لغة غريبة حروفها معووجه ومقلبنة وبدا لونه فاتحا أكثر من إخوته الذين كانوا بلون الأرض التي يكدحون عليها لكن النصيحة (الكشر والخلقة) ياها ذاتا خلقتم أقيمت الولائم ونحرت الذبائح وتقاطر الناس لرؤية الطفل الذي تاه في العاصفة قبل خمسة وعشرين عاما.
سرعان ما تبددت الفرحة بقدوم البعيو بالأخص بالنسبة لإخوته بعد أن سمعوا الكثير من الأكاذيب ولم يروا له مالا حتى الشنطة التي جاء يحملها اتضح أنها لا تحوي سوى ملابس غريبة لا نفع منها ,وزاد من حنقهم أكاذيبه و تصرفاته المخجلة الغريبة على أعراف البلدة, كان إذا وضع الطعام شمر عن ساعديه واعمل فيه يديه الاثنين وغيرها من التصرفات الغريبة ولا احد يعلم من أي ماخور تعلم البعيو هذه الحركات البايخة,بعد أن قضى شهرا قفل البعيو راجعا من حيث أتى واعدا أهله انه ذاهب لتصفية تجارته وبيع عقاراته والعودة نهائيا إلى البلدة.
مضى على مغادرة البعيو الأخيرة للقرية تسعة سنوات ولم يعد حتى هذه اللحظة.
| |
|
|
|
|
|
|
|
|
|
Re: الذين بددوا العمر أسفارا- قصص من الواقع. (Re: معاذ حسن)
|
قصة معاذ حسن.
رسالة إلى أمي...
صورة مع التحية للمذيعة/ غادة عبد الهادي.
سيدتي الحاجة / نفيسة بت الفضل.
..السلام عليكم
مضت سنوات ست على ذلك الصباح الأغبر من حزيران في العام الأخير من القرن الماضي.ذلك الصباح الذي حملت فيه شنطتي الهاندباق ويممت شطر المجهول. ذكريات ذلك الصباح لا تزال واضحة جدا في ذهني. أتذكر انك وكعادتك عندما أكون مسافرا ألححت على تناول وجبة خفيفة مع شاي الصباح الذي جهزتيه قبل أن استيقظ لا أدرى إن كان النوم وجد طريقه إلى عينيك في تلك الليلة أم لا؟.وكعادتي رفضت حتى تناول الشاي,وكعادتي أيضا ودعت الجميع وداع متماسك فاتر ظاهريا في حين إن داخلي يمور. أتذكر إصراري الغبي والغريب في لحظات الوداع على أن لا يتجاوز احد معي عتبة الباب,أتذكر رفضي لكل مظاهر الحزن في ذلك الوداع .أتذكر إني عللت ذلك بان الأمر لا يستحق وإنها سنة واحدة وارجع.
مضت السنة الأولى والثانية والخامسة وها هي ذي ست أعوام قد مضت .
سيدتي
صحيح إنني قطعت لك كثير من الوعود وكانت جميعها كمواعيد عرقوب أخاه بيثرب.وصحيح انه اكتنف غيبتي من الغموض ما يبعث على القلق .
أنا بخير وسأرجع قريبا...
ولكن ...ثمة أمر واحد أخشى حدوثه..تأكدي إذا حدث هذا الأمر فلن ارجع إلى يوم الدين!!!!!.
كل يوم جمعة اجلس (ويدي على قلبي) لمتابعة برنامج مراسي الشوق..وفي كل لحظة يخيل لي إني سأطالع وجهك القديم المريح جالسة إلى المذيعة غادة عبد الهادي وهي تخاطبك بقولها: يا حاجة(نفيسة) نتيح ليك الفرصة ترسلي رسالة لولدك.
وأتخيلك من بين دموعك تقولي ( يا ولدي يا معاذ تعال أرجع ..عايزين نشوفك قبل الموت...يا ولدي كفاية أرجع..
وأتخيل المذيعة غادة تختم اللقاء الحزين بقولها : نرجو من كل من يعرف معاذ حسن أن يتصل بالبرنامج ويفيدنا عن مكان وجوده.
تأكدي يا سيدتي لو حدث مثل هذا الأمر فلن أعود مرة أخرى.وانت عارفة إنو راسي ناشف ودماغي (جزمة قديمة).
أرجع عشان الناس تقول : شوف دا بالله ما كان عايز يرجع الا لما أعلنوا عنو في التلفزيون!!!.
ويا أستاذة غادة :بطريقتكم دي بدل ترجعوا الناس حا تطفشوهم زيادة.
والسلام
| |
|
|
|
|
|
|
|
|
|
Re: الذين بددوا العمر أسفارا- قصص من الواقع. (Re: حيدر حسن ميرغني)
|
Quote: درسنا في مكان
وتزوجنا من مكان آخر
وعملنا في عدة اماكن أخرى
لكننا
نطوى جوانحنا على حب الوطن |
صديقي حيدر ميرغني
هذا قدرنا
عذرا ..والله وأثناء كتابة هذه المداخلة حدث امر لم اشهد مثله في حياتي ولا بد انه سيعجل برحيلي عن هذه الديار الظالم اهلما. تخيل عاملة بنغالية ضيعيفة مسكينة اضطرتها ظروف الفاقة للعمل خادمة انهال عليها صاحب المكتب الذي استقدمها وهو مكتب يجاورنا في العمارة
ضربا وركلا واهانة لكرامتها الانسانيةبصورة وحشية.
والله يا حيدر أنا الان محبط ومستاء وقرفان للاخر.
| |
|
|
|
|
|
|
|
|
|
Re: الذين بددوا العمر أسفارا- قصص من الواقع. (Re: سيف الدين حسن العوض)
|
Quote: منذ ان قرأنا كتاب كاتبنا الكبير
الطيب صالح موسم الهجرة الى الشمال والناس السوادنة ... حد هاجة |
سيف الدين حسن العوض..تحياتي
صدقت والله السودانة ديل تقول مكتوب عليهم النجيع من الله خلقهم.
غايتو أنا بصنفهم في المرتية التانية بعد ناس الشام ولبنان.
رايك شنو؟ وبالله شاركنا بقصة.
| |
|
|
|
|
|
|
|
|
|
Re: الذين بددوا العمر أسفارا- قصص من الواقع. (Re: سيف الدين حسن العوض)
|
الاخ معاز لماذا الرؤية منصبة في اتجاه واحد اليس في الاسفار خمس فوائد,هوي يا ناس بره ما تشيلكم الهاشمية ساي,اسألو مجرب ولا تسألو طبيب ,والله كل شي ماشي بالغلط,ومرات يراودك الاحساس دا في نفسك,معاز اخوي ما تعذب الناس ديل بالنستالوجيا, فقط وازنوا بين العاطفة والعقل, ودمتم سالمين اخوكم ابنكم محمد المختار الزيادي
| |
|
|
|
|
|
|
|
|
|
Re: الذين بددوا العمر أسفارا- قصص من الواقع. (Re: معاذ حسن)
|
والله بوست حزين فعلا ..
بيبكى الحجر ..
ان شاء الله يقراهو حبيبنا قير تور ..
عشان يلطشكم بكرة ويعتذر ليكم بعد بكرة ..
ناذر ..
بلاهى انت بتتأثر برضو بالغربة والاغتراب ..؟
ياخى ماتفكها فينا ..
انت غربتك حدها ود العقلي ..!!
تسلم يامعاذ ..
| |
|
|
|
|
|
|
|
|
|
Re: الذين بددوا العمر أسفارا- قصص من الواقع. (Re: الطاهر ساتي)
|
Quote: ان شاء الله يقراهو حبيبنا قير تور ..
عشان يلطشكم بكرة ويعتذر ليكم بعد بكرة ..
|
استاذنا الطاهر ساتي...سلام
حبيبنا قير زعلان من ناس المنبر وشكلو مخاصمنا
في المقال الاخير قال لن يذكر اسم اي حد تاني من ناس المنبر.
ليه كدا يا قير..دا احنا بنحبك.
تحياتي لكما.
| |
|
|
|
|
|
|
|
|
|
Re: الذين بددوا العمر أسفارا- قصص من الواقع. (Re: معاذ حسن)
|
معاذ حسن كيفنك
حقيقة انا ما اعتقد نفسي ذي ابو جيهنه لانو ماعارفوا ليهو كم في أسفارو الماتهت دي انا بالمفيد لي طاشرات كدا من السودان والبلد ولكن مالفت نظري وإستهواني أكتر المفردة اللغوية في التعبير والثرد للقصة القصيرة التي تمتلكك من واقع الخيال الحقيقي للذاكره أو تنشيط علبة الخيال الخصب لربط القصة لواقع مايعيشه الناس اليوم كمعالجة باسلوب يرقي للمضمون الذي تريد إصاله
أقترح عليك بالمواصله في هذا المشروع لانه مهم والاهم انك تملك وسائله
ومع عمرك ده ممكن تهز بلد طبعا مابرجاله لكن بما حباك الله به وأنت رجل متعلم وما بتفوت منك شاردة -مع تقديرى
خلاصة
-----
فيك رئحة الجروف
| |
|
|
|
|
|
|
|
|
|
Re: الذين بددوا العمر أسفارا- قصص من الواقع. (Re: عبود احمد النصيح)
|
عزيزي معاذ
التحية لك و للأخ عبود
القصة الآتية تختزل معاناة الكثيرين في الغربة .. رغم أن الوفاء و الإخلاص من الشيم الأصيلة في الشعب السوداني .. إلا أن المغترب دائماً ما يكون كبش فداء أي عادة دخيلة علينا ::
***
تناديه أمه منذ أن كان طفلاً بالــ ( دُخْرِي ) ...
و استوعب معنى المسمى تماماً ... و إلتصق بذاكرته و ملأ دواخله ..
يفرهد بدواخل أمه أملٌ بأن يكون بالفعل ذخراً للأسرة ..
و أنه مدَّخر كما الـ ( دافْنِنُو في بطن المطامير ) ..
و أنه كما ( البركاوي و البتمودة ) في القساسيب ..
و عندما ضاق به الحال في البلد ... هاجر كبقية الطيور ..
و في غربته ما تسلم غير وظيفة ( أمين مستودع ) ...
و لكى يقوم بدور ( الدخري ) ... و لكى لا يخيب ظن أمه و الأهل .. ما قصَّر مع ( زول ) ..
شارك في كل ( فزعات الأهل ) و ( الأحباب ) و ( الجيران )..
( شيلة ) الشفيع ( ود خالتو ) ..
( برندة ) العَمَّة ( حفصة ) الكسحتْ مع المطر
( طهور ) أولاد الزين ( الجار الساكن في الشارع خلف بيتهم ) ..
عملية الغدة لـ ( فاطنة ) زوجة ولد عمو ...
تصليح ( التاكسي ) بتاع ( تاج السر ) صاحب أخوه بابكر
حفلة نجاح ( هالة ) بت ( سيد الدكان ) عند نجاحها و دخولها الجامعة.
و عندما أتاهم ( إيد ورا و إيد قدام ) .. بعد أن مكث عاما في سجون غربته لأن ( الجرد ) إكتشف تلاعبه .. لاحظ أن كلمة دخري إندثرتْ حتى من على ( خشم أمه ) ..
و أن ( الشفيع ) لم يأت حتى لزيارته متعللا بالمشغولية .. و لأن زوجته تعاني من تبعات الحمل و ( الوحم ) ..
و ( العمة حفصة ) لم تستضيفه في برندتها الجديدة .. فقد أجلسته على ( عنقريب الحبل ) في الحوش مع كوب من ماء الزير ( موية زرقا )..
و ( الزين أبو وليدات الطهور ) ألقى إليه بتحية باردة أمام البيت و لم يقم بتعريفه بأولاده .. بل إكتفى بالقول : دة الزول ال رسل ليكم حاجات الطهور.
و ( فاطنة ) رجعتْ من بيت الجيران و لم تأت للسلام عليه .. فقالت شقيقته بأنها قالت لها :
( يطرشني ما سمعت الدخري جا ) ..
و ( تاج السر صاحب التاكسي ) .. أوقف التاكسي و سلم عليه و نظره يتنقل بينه و بين الشارع .. ثم إلتقط زبوناً وإنطلق.
و ( هالة ) إكتفتْ بالإيماء له برأسها لأنها لا ( تصافح الرجال يداً بيد ) ..
| |
|
|
|
|
|
|
|
|
|
Re: الذين بددوا العمر أسفارا- قصص من الواقع. (Re: ابو جهينة)
|
| Quote: وعندما أتاهم ( إيد ورا و إيد قدام ) .. بعد أن مكث عاما في سجون غربته لأن ( الجرد ) إكتشف تلاعبه .. لاحظ أن كلمة دخري إندثرتْ حتى من على ( خشم أمه |
أستاذنا الأديب أبو جهينة تحياتي
قرأت قصة الدخري وأحسست بقربها من واقع عشناه جميعا
وهي نظرة الأهل والجيران وناس البلد للمغترب كحلال للمشاكل وشخص يلعب بالفلوس التي لا تنقطع عن يده ولا يشكل الحصول عليها مشكلة بالنسبة له.
وكان عندنا نفس التصور قبل نغترب بس هسي اكتشفنا انو قرش المغترب أصعب قرش وبيطلع بطلوع الروح وتمنو غالي ندفعو من العمر والأعصاب والصحة .تمنو أجمل الأيام التي تضيع مع السراب. والسنين التي تجري بسرعة 120 حصان. وفجأة ذات صباح تستيقظ وتنظر في المرآة لتجد الزمن وقد رسم خطوط طولية وعرضية على ملامحك والشيب قد غزا راسك تجد نفسك أصبحت صديقا للأمراض المزمنة ومحصلة غربتك صفر كبير.
وفي تقديري ساهم اخوانا المغتربين في ترسيخ هذا الفهم بتصرفات البوبار والخمج.
أشكر مرورك وربنا يرجعنا سالمين غانمين.تامين صحة وعافية ولامين قروش.(لول)
يا أستاذ معليش القصة دي طازجة وحارقاني لو خارجة عن الذوق اسمح لي.
امبارح سألنا واحد عمنا من الصوفية وكانوا عامين احتفال بالمولد
قلنا ليهو يا حاج أدينا دعاء كارب كدا الواحد يمسكوا قال يا أولادي قولوا ( اللهم كتر قروشنا وقوّي خرطوشنا).
| |
|
|
|
|
|
|
|
|
|
Re: الذين بددوا العمر أسفارا- قصص من الواقع. (Re: عبود احمد النصيح)
|
الاخ عبود أحمد
أشكرك يا سيدي على الاهتمام وقراءة المحاولة واشكرك على كلماتك وأرجو ان استحق بعضها.
| Quote: ما اعتقد نفسي ذي ابو جيهنه لانو ماعارفوا ليهو كم في أسفارو دي انا بالمفيد لي طاشرات كدا من السودان |
هههههههههه
ذكرتني قصة مرة ايام الثانوي ادونا امتحن رياضيات صعب جدا كل الناس رسبت فيهو.
واحد كان جايب (7 وفي واحد اسمو عكاشة جايب (صفر) الزول الجايب سبعة كل ما واحد يسألوا جبت كم؟ يقول أنا جبت سبعة لكن عكاشة جاب صفر!!
| |
|
|
|
|
|
|
|
|
|
Re: الذين بددوا العمر أسفارا- قصص من الواقع. (Re: معاذ حسن)
|
الاخ معاذ صباحك ندى ، وكنت قد طالعت كل القصص الواردة لدنك اعجبتنى طريقتك البسيطة فى التناول لاحداث (معلنه)من القرية او مكان انت فيه رغم عدم تحديدك اسم المكان ، وهذا امر ضرورى ، فانت واجد فى كتابات الروايه المكان اكثر اهمية ، لكن كل القصص تحكى بصدق عن اناس حقيقيين، وهذا ما اعده بداية لروائى كبير ،كنت قد طالعت رواية لفتاة امريكية ما تزال الى الان تعيش فى نورث كارولينا ، الفتاة حكت قصتها وتصادفت مع ناشرة فى مطعم كانت تشتغل فيه المهم ان الناشرة اخذت المذكرات وطبعت الكتاب ،بدوره كان احسن المبيعات فى العام الفين وواحد، ما اود قوله ان مثل هذه القصص لو تمت ترجمتها للغة الانجليزية صدقنى لن تقل عن قصة تلك الفتاة التى حدثتك عنها ، لكن هذا يحتاج منك لبعض المجهود فى التفاصيل اكثر ،الملامح لدى الشخصية ، اللون لطول السن الى اخره ، التفاصيل للمكان نوع التربة المناخ ، الى اخره ، مزيد من التفاصيل مزيد من النجاح فى الكتابة الروائية واثق فى مد معرفتك لما اقول ، لانك اعدتنى الى حقل النقد وهو تخصصى ، اشكرك على مشاركتنا اياك هذا النوع من القصص الذى يستهوينى ، وهو النوع الذى خلد عظماء الكتاب الروائيين ، لك مودتى
| |
|
|
|
|
|
|
|
|
|
Re: الذين بددوا العمر أسفارا- قصص من الواقع. (Re: سلمى الشيخ سلامة)
|
_____________________
صديقي العزيز: معاذ حسن
تحية مسائية عاطرة .. وبعد
اعد وتمعّن قراءة هذه الأسطر جيداً
| Quote: الاخ معاذ صباحك ندى ، وكنت قد طالعت كل القصص الواردة لدنك اعجبتنى طريقتك البسيطة فى التناول لاحداث (معلنه)من القرية او مكان انت فيه رغم عدم تحديدك اسم المكان ، وهذا امر ضرورى ، فانت واجد فى كتابات الروايه المكان اكثر اهمية ، لكن كل القصص تحكى بصدق عن اناس حقيقيين، وهذا ما اعده بداية لروائى كبير ،كنت قد طالعت رواية لفتاة امريكية ما تزال الى الان تعيش فى نورث كارولينا ، الفتاة حكت قصتها وتصادفت مع ناشرة فى مطعم كانت تشتغل فيه المهم ان الناشرة اخذت المذكرات وطبعت الكتاب ،بدوره كان احسن المبيعات فى العام الفين وواحد، ما اود قوله ان مثل هذه القصص لو تمت ترجمتها للغة الانجليزية صدقنى لن تقل عن قصة تلك الفتاة التى حدثتك عنها ، لكن هذا يحتاج منك لبعض المجهود فى التفاصيل اكثر ،الملامح لدى الشخصية ، اللون لطول السن الى اخره ، التفاصيل للمكان نوع التربة المناخ ، الى اخره ، مزيد من التفاصيل مزيد من النجاح فى الكتابة الروائية واثق فى مد معرفتك لما اقول ، لانك اعدتنى الى حقل النقد وهو تخصصى ، اشكرك على مشاركتنا اياك هذا النوع من القصص الذى يستهوينى ، وهو النوع الذى خلد عظماء الكتاب الروائيين ، لك مودتى |
الأستاذة: سلمى الشيخ
لك الشكر ولك خوالص التحية ...
هذا الفتى "معاذ حسن" كاتب مجيد فعلاً ولكنه
باع نفسه للتقييم السلبي كثيراً وأنا واثق
بأنه سيكون ذا شأن ذات يوم
التحية لكل مبدعي بلادنا ومشجعيهم
| |
|
|
|
|
|
|
|
|
|
Re: الذين بددوا العمر أسفارا- قصص من الواقع. (Re: هشام آدم)
|
Quote: _____________________
صديقي العزيز: معاذ حسن
تحية مسائية عاطرة .. وبعد
اعد وتمعّن قراءة هذه الأسطر جيداً
|
الصديق الاستاذ هشام تحياتي
قرأت عبارات الاستاذة سملى بتمعن واهتمام ونحن منها بمقام التلميذ
خالص ودي لكماوشكري على الاهتمام.
| |
|
|
|
|
|
|
|
|
|
Re: الذين بددوا العمر أسفارا- قصص من الواقع. (Re: سلمى الشيخ سلامة)
|
| Quote: وكنت قد طالعت كل القصص الواردة لدنك |
الأستاذة سلمى الشيخ سلامة
تحياتي ومودتي الصادقة
أولا أحييك وأشكرك أن اقتطعت من وقتك لمطالعة ما نكتب ولو لم تكتبي سوى الفقرة محل الاقتباس لكان ذلك فقط كافيالاثارة الغبطة في نفسي.
وقد قرأت يتمعن مداخلتك وإشارتك إلى مواطن الخلل البنائي في محاولاتي المتواضعة وقمت باسترجاع بعض ما قرأت من اعمال لكبار الكتاب فوجدت إشاراتك في محلها من حيث افتقاد المحاولة لعناصر الزمان والمكان والتفاصيل المحيطة.
يا سيدتي نحن هواة تسللنا لعالمكم من البوابة الخلفية فاغفروا لنا تطفلنا
ومما يثلج الصدر وجودك هنا ووجود أساتذة كالأستاذ عجب الفيا وأبو جهينة وهشام ادم وغيرهم فانتم بركتنا.
مرة أخرى أشكرك على الاهتمام .
وتقبلي صادق مودتي
| |
|
|
|
|
|
|
|
|
|
Re: الذين بددوا العمر أسفارا- قصص من الواقع. (Re: معاذ حسن)
|
الطاهر كيفك ...
Quote: والله بوست حزين فعلا ..
بيبكى الحجر ..
ان شاء الله يقراهو حبيبنا قير تور ..
عشان يلطشكم بكرة ويعتذر ليكم بعد بكرة ..
ناذر ..
بلاهى انت بتتأثر برضو بالغربة والاغتراب ..؟
ياخى ماتفكها فينا ..
انت غربتك حدها ود العقلي ..!!
|
والله إنت ما بتعرفني ولا بتعرف إحساسي المرهف وجوانحي المتل قليب العصفور ..
أسأل مني عبود النصيح الفوق دا وكيف كانت غربتنا في حواري وأزقة الهند من بومباي لي نيو دلهي لي بنقلور ..
غربة الهند حارة يا الطاهر ياخ عشان كدة ليو حق الواحد يبكي ..
| |
|
|
|
|
|
|
|
|
|
Re: الذين بددوا العمر أسفارا- قصص من الواقع. (Re: ناذر محمد الخليفة)
|
| Quote: والله إنت ما بتعرفني ولا بتعرف إحساسي المرهف وجوانحي المتل قليب العصفور |
ههههههه
يا ابو النيز بالله طلب في اغنية لمحمود ما عارف اسمها لكن فيها كلام كدا مناسب لموقف احساسك المرهف و جوانجك المتل العصفور دي.
جزء منها بقول:
مكتوب علي سفر الشقا.. وكاني مديون للعذاب بدفع سنين من عمري دين.. سمعنا ليها لو عندك بليز.
سلام..
| |
|
|
|
|
|
|
|
|
|
Re: الذين بددوا العمر أسفارا- قصص من الواقع. (Re: معاذ حسن)
|
الاخ هشام كل مافى الامر ان الكتابة صادرة عن القلب ببساطة لغة ومفردة غير معقدة ، وهذا ما استفزنى ، اضف الى ذلك اننى اكتوى بنار الغربة ، زائدا ان الكتابة هنا فى امريكا لم تعد ذلك الكم المعقد الذى ما يزال اخوتنا فى السودان يتعاطونه كلما اوغلت اكتابة فى الباطة كلما كانت اقرب اليك ولعلهم كما نرى فى كاباتهم تيطر اللغة البسيطة على الكتابة لو قرات لاى كاتب امريكى تجد ان المفردة عادية مثلما يكتب الاخ معاذ تحرك الوجدان وهو اهم عنصر فى الكتابة تحريك الدواخل وليس القول (مافاهم حاجة )كما كنت اردد لحظة ان اطالع اى رواية سودانية مؤخرا ، انتهى عهد اللغة المشحونة لغة غير مفهومة وعاد عهد اللغة الكلاسيكية البسيطة وهو ما يسمونه هنا الواقعية الجديدة ،لكما مودتى
| |
|
|
|
|
|
|
|
|
|
|
Re: الذين بددوا العمر أسفارا- قصص من الواقع. (Re: معاذ حسن)
|
الاخ معاذ لكم هو رائع ان تنشر غسيلنا في العراء للسابلة لعلهم يتعظون، اذا كان هناك من رضيى بالعودة بعد فوات الفوات فلا نملك الا ان نحنى قبعتنا له لأنه انتصر اخيرا، لكن ماذا نقول لصديقي الدكتور الذي ربط الحبل حول عنقه ذات نهار يوناني غائظ منتحرا وهو يقول للدنيا ؟ ماذا نفعل في صديقي الذي ما ان قرأ رسالة بنته التي تركها ماءا في بطن امها وهي قد تزوجت بعد عدد سنين ماذا نقول له بعد ان تبخر بالغاز وانتحر قائلا للدنيا ؟ وماذا عسانا فاعلين بصديقي الذي قفز من مؤخرة السفينة منتحرا والموج يضحك في شهر مارس؟ الغربة قلعة جملية حسناء من بداخلها يريد الخروج ومن بخارجها يريد الدخول، وبي للغرباء في اوطانهم وفي انفسهم، واصل خربشاتك على جدار العدم، واصل رسمك على فضاءات الفراغ، واصل جنونك على الجنون ذات نفسه، ما لى الجنون عندما يكون اسفيريا،عشت ولضمي.
*من متشرد ما زال يوهم نفسه انه مغترب او متغرب او غريب او غراب!!!
| |
|
|
|
|
|
|
|
|
|
Re: الذين بددوا العمر أسفارا- قصص من الواقع. (Re: محمود الدقم)
|
حبيبنا معاذ الوهم
عجبتني شلاقة البعيو الذي سمع "رزة عربية" وتشعلق فيها وجاء راجع بعد خمسة وعشرين سنة بتاع مكنات...
كذلك أعجبني كلام الاخت سلمى الشيخ سلامة وأرجو أن تنتبه له بصورة خاصة ...وأنا من الناس المتوقعين أن يكون لك شأن...وبالمناسبة أنا ح أحاول اترجم الكلام ده بعد إذنك طبعا...لأغراض المتعة الشخصية أولا وعشان نتعلم الحجامة في رؤوس اليتامى ثانيا... وكان لقينا الترجمة تصلح للنشر أهو نكون ساهمنا بي حاجة مفيده..
| |
|
|
|
|
|
|
|
|
|
Re: الذين بددوا العمر أسفارا- قصص من الواقع. (Re: محمود الدقم)
|
| Quote: لكن ماذا نقول لصديقي الدكتور الذي ربط الحبل حول عنقه ذات نهار يوناني غائظ منتحرا وهو يقول للدنيا ؟ ماذا نفعل في صديقي الذي ما ان قرأ رسالة بنته التي تركها ماءا في بطن امها وهي قد تزوجت بعد عدد سنين ماذا نقول له بعد ان تبخر بالغاز وانتحر قائلا للدنيا ؟ وماذا عسانا فاعلين بصديقي الذي قفز من مؤخرة السفينة منتحرا والموج يضحك في شهر مارس؟ |
الاستاذ محمود الدقم ..تحياتي
قاتل الله الغربة والاغتراب
في المملكة حوادث الانتحار امر عادي بالنسبة للاسويين اتذكر حادثتين وباسلوب واحد (الانتحار شنقا في المروحة) حدثت في اقل من عام في الحي الذي اسكن فيه.
يا حافظ يا حفيظ.
تسلم يا سيدي.
| |
|
|
|
|
|
|
|
|
|
Re: الذين بددوا العمر أسفارا- قصص من الواقع. (Re: سلمى الشيخ سلامة)
|
ها أنت يا معاذ تعود مره اخرى لكتاباتك التى تجعل للمنبر طعم ولون ، مجرد ما نجد اسمك نتسابق لفتح موضوعك الذى يخطه يراعك او قل كى بوردك ، عندما تقرأ بوست فى هذا المنبر ويملأك بالتوتر انصح القراْء جميعا باللجوء لبوستاتك التى تريح الاعصاب وتعيد للقارىء توازنه .
شكرا لك وواصل
مع التحيه والاحترام والتقدير
| |
|
|
|
|
|
|
|
|
|
Re: الذين بددوا العمر أسفارا- قصص من الواقع. (Re: معاذ حسن)
|
أيّها الوهم معاذ .. مليون تحيــة
كنتا فاكرك و هم و بس .. لكن كل يوم أكتشف أنك وهم كبير .. ياخى عايز أصاحبك عشان بعد كم سنة يشار إلىّ بالبنان و يقال "هذا صديق معاذ" .. و فيها إيه لو الواحد قشر بيك
الغربة تبدأ بأمل و تنتهى بإدمان .. خرجت لسته أشهر عشان أصلّح الأوضاع .. مضت الى الآن عشرة أعوام تحققت فيها معظم الآمال .. فأنتقلت لغربة أخرى .. هناك هاجس آخر يطاردنا .. هو غربة الوطن .. لا نريد أن نكون "دفع الله ود التوم" أو "البعيو"
بس أمسك فى نصيحة الأستاذة سلمى قوى حتّى تكتّر من "البنانات" .. التى تشير إللينا
| |
|
|
|
|
|
|
|
|
|
Re: الذين بددوا العمر أسفارا- قصص من الواقع. (Re: Ali Alhalawi)
|
| Quote: خرجت لسته أشهر عشان أصلّح الأوضاع .. مضت الى الآن عشرة أعوام تحققت فيها معظم الآمال .. فأنتقلت لغربة أخرى .. هناك هاجس آخر يطاردنا .. هو غربة الوطن .. لا نريد أن نكون "دفع الله ود التوم" أو "البعيو |
صديقي الحلاوي
أعادك الله سالماغانما
قيل( المال في الغربة وطن..والفقر في الوطن غربة)
ترى ماذا يكون الفقر في الغربة؟؟؟.
صنفرة:
واحد صاحبي - ما أنا- قال عايز يتزوج عراقية نشمية... في طريقة!!
سلام يا صديقي
| |
|
|
|
|
|
|
|
|
|
Re: الذين بددوا العمر أسفارا- قصص من الواقع. (Re: عبود احمد النصيح)
|
| Quote: الاخوة ابوجهينه ومعاذ تعرفوا انا الدخري زاتو عشان ماتكون ابو سن بضحك علي ابوسنين |
و(الهرم) يضحك عليهم الاتنين.!!!
الاخ عبود ما اكثر امثال (دخري)ابو جهينة .
بس تعرف امثال هذا الدخري رغم المرارة والحسرة على العودة خالي الوفاض الا ان الواحد يعود راضي عن نفسو طالما ادى رسالة تجاه اسرتو واهلو.
شكرا لمشراكتك مرة اخرى.
| |
|
|
|
|
|
|
|
|
|
Re: الذين بددوا العمر أسفارا- قصص من الواقع. (Re: معاذ حسن)
|
يا معاذ والله ناس حلّتكم ديل بائسين وحزينين ساي ..
نحن الغربة في حلتنا غير (زي جدة)..
خالد واحد من الشباب الذين كانت علاقتهم بالمدرسة كما علاقتي بي اللغة الفارسية ..
لا يرتبط خالد بالمدرسة إلا من خلال الزيّ المدرسي (رداء كاكي وقميص ابيض وشارة مطبوعة على القميص)..
كانوا يطلقون عليه " العريبي" يحمل شنطة دمورية مطبقاً شعار نلبس من ما نصنع ..
كل يوم في المدرسة نسمع جرس الإنذار يضرب وطابور اضطراري في الساعة العاشرة صباحاً وحينها نعلم ان كفوة حصلت وحان وقت العقاب على الملأ ..
ما ان نقف إلا ويأتي الأستاذ يجر "خالد " من شعيراتو ويحكي :
يا جماعة اخوكم ده جابو لينا غفير مدرسة البنات بعد ما لقاهو بيتلب بي الحيطة الفاصلة بين المدرستين وووو ثم يخرج أربعة من عتاولة المدرسة ومن ثم واااااااي وااااااااخ وتاااااااااااني ما بعمل كده ..
ليأتينا فقي اليوم التالي ببلوة أخرى ..
أخيراً انتهت العلاقة بين "خالد" والمدرسة المتوسطة بعد عام واحد فقط شهد علاقات متوترة بينهما لعدم التفاهم ..
من دكان لي دكان ومن نيمة لي نيمة كان يقضي خالد صباحه وعصراً مع الكورة وبالليل أحلى ضومنا وحريق ..
وفي إحدى جلسات " الضومنا" يرمي خالد الشيش بي البيش ويقول يا شباب انا بعد اسبوع مشتت السعودية واخليكم هنا للوهم بتاعكم ده سخانة وكتاحة وشلهتة يا فارات ..
أحلى حفلة وداع عملوها الشباب ليمنا جكس الحلة وغنينا ليهو اغاني الوداع :
مفارق كيف تخلينا ..
ليش وقنا وذكرى ماضينا ..
وكيف بعد يكون الحال وكيف تصبح ليالينا..
وخالد ينطط في نص الناس وهو نجم الحفلة يضحك مع دي ويتونس مع دي ويطلع من الساحة ليستلم جواب من الحاجة سعدية لإبنها المنقطع لأكثر من سبعة سنوات ..
ويصافح راجل كبير خارج باب الشارع واعداً له بإرسال راديو كبير يجيب ليهو لندن ومونتكارلو جوووة بيتو ..
ونختتم الحفلة بي:
أودعكم ؟؟؟ لاااااااااااااا..
افارقكم ؟لاااااااااااااا..
لا لا لا كااااا بقدر دموع بتغطي عيني
ولكن اه لكن اه اااااااااااااااااااه اه ..اه بدزود الالم ..
ويبكي خالد ولأول مرة يكتشف الناس إنو الزول الفاشل زول طبيعي زيو زي باقي الناس يبكي ويضحك يتأثر ويشتاق ويحن ..
سافر خالدلا يحمل من الخبرة إلا الشهادة الإبتدائية وبداية معرفة بالنايل كورس والدكتور تروتة وشفتنة منقطعة النظير ..
خمسة سنة لا إحم لا دستور فردو الشطار بقوا دكاترة والما شطار شديد اكملوا الجامعات وجكسوا في البينشات وجاي من الليكشر وماشي الليكشر ونتقابل في الاندر لاب وووو
اما ناس كنبة ورا فمنهم المكنيكي والسايق حافلة وووو..
الساعة 7 ونص صباحاً والناس واقفين في المحطة الموظفون منهم في إنتظار حافلات الخرطوم الثورة الشباب العاطل جاي عشان يودع بنات الثانوي العالي ويستمتع بمنظر الزي اللبني واجمل بنات الحي (دوما ما يكون بنات العالي عندنا اسمح من بنات الجامعة) ..ومجموعة أخرى كانت في إنتظار سيد المكتبة لقراءة العناوين الرئيسية لمباراة الهلال والموردة ..
عربية "جيمس" أمريكي سوداء ترمي إشارة شمال ومستفة للحلق بي الشنط مظللة بالكامل وعليها إعياء السفر من غبار وسخانة مكنة ولكنها كانت فارهة للحد البعيد ما تعودناها ونحن الذين تعودنا في الرفاهية على "الكوريللا 81" وعليها بخور "الند" كحد أقصى ..
ياهو خالد زااااااااااااااااااااااااااتو الما بيغبانا ..
النضارة السوداء الما خمج واللبس "الكاجوال" كما يقولون والترطيبة الباينة في الشكل ..
انتقل مسرح الاحداث من المحطة لي بيت ناس خالد الذي يقرب المحطة كثيراً ..
ما بين احضان هذاومشاغلات ذاك وزغاريد الاخوات ودموع الوالدة ومباركات الوالد كان خالد محفوف بالناس..
لو شاهدت المنظر لأدركت أن الناس فرحة بهذا اليوم أكثر من اليوم الذي احتفل فيه "مزمل" بتخرجه من كلية الطب جامعة الخرطوم ..
ولو شاهدت علامات الرضا في وجه خالد لأدركت أنه الان ينافس ود الجبل ...
عاد خالد وفي محفظته وجدنا كرتاً مكتوب عليه :
الشركة العربية للإتصالات..
المهندس خالد ...
مدير مشاريع ..
جوال0500765811
ايميل [email protected]
| |
|
|
|
|
|
|
|
|
|
Re: الذين بددوا العمر أسفارا- قصص من الواقع. (Re: عمر الفاروق)
|
Quote: عاد خالد وفي محفظته وجدنا كرتاً مكتوب عليه :
الشركة العربية للإتصالات..
المهندس خالد ...
مدير مشاريع ..
جوال؟؟؟؟؟؟؟؟؟؟؟
|
عمر الفاروق
قصة خالد رائعة والاروع النهاية الجميلة والاروع من ذلك السرد البسيط المدهش (نظام نفخة كدا)
بالجد استمتعت بالقصة.
وقمت بالاتصال بالمهندس خالد بس عشان اقول ليهو ود حلتكم عمر الفاروق قاعد يشهر بيك في النت.
من زمان انا داير اشوف فيك يوم ودي كانت الفرصة المناسبة بما انو خالد شرامي وكان قاعد يجلدكم في المدرسة وهسي قاعد معانا في الرياض دي.
حظك من السماء الرقم خارج الخدمة.
لكن الايميل موجود.
عموما الايام الجاية اعمل حسابك وحسن علاقتك مع اللبناني والمصري المعاك في المكتب
يمكن تحتاجهم في فزعة.
| |
|
|
|
|
|
|
|
|
|
Re: الذين بددوا العمر أسفارا- قصص من الواقع. (Re: معاذ حسن)
|
!!!!!!
Quote: يا ابو النيز بالله طلب في اغنية لمحمود ما عارف اسمها لكن فيها كلام كدا مناسب لموقف احساسك المرهف و جوانجك المتل العصفور دي.
جزء منها بقول:
مكتوب علي سفر الشقا.. وكاني مديون للعذاب بدفع سنين من عمري دين.. سمعنا ليها لو عندك بليز.
|
| |
|
|
|
|
|
|
|
|
|
Re: الذين بددوا العمر أسفارا- قصص من الواقع. (Re: معاذ حسن)
|
والله إنت ما بتعرفني ولا بتعرف إحساسي المرهف وجوانحي المتل قليب العصفور ..
أسأل مني عبود النصيح الفوق دا وكيف كانت غربتنا في حواري وأزقة الهند من بومباي لي نيو دلهي لي بنقلور ..
غربة الهند حارة يا الطاهر ياخ عشان كدة ليو حق الواحد يبكي ..
أشهد
| |
|
|
|
|
|
|
|
|
|
Re: الذين بددوا العمر أسفارا- قصص من الواقع. (Re: عبود احمد النصيح)
|
يا زول يا وهم والله حمداً لله على السلامة
وكمان بركة الجيت يا صاحب حامد ورجب
والله ليك وحشة بالجد جد... بعدين انت
متين بقيت للجرسة والبكى من الغربة
هي شن الغربة اليادوب ستة سنة بس
على العموم اصلاً العشرة سنين الاولى من
الغربة كده ولا يهمك بعد كدة بتبقى عادي
على قول ناذر كسرة
يجيبوا ليكم طيب ... أقد البعيو
| |
|
|
|
|
|
|
|
|
|
Re: الذين بددوا العمر أسفارا- قصص من الواقع. (Re: الشيخ إبراهيم الشيخ)
|
Quote: هي شن الغربة اليادوب ستة سنة بس
على العموم اصلاً العشرة سنين الاولى من
الغربة كده ولا يهمك بعد كدة بتبقى عادي
|
الشيخ ..سلام
بالله انت في سنة كم؟ شكلك تجاوزت الطاشرات.
تعرف يا الشيخ كلامك صحيح كلما طالت الغربة كلما تخن الجلد وقل الاحساس
وفعلا اول سنة اصعب سنة جرسة وخطابات وتلفونات تليها التانية وهكذا ولما الزول يصل العاشرة دي بتبقى ما فارقة كتير .
سلامي..
| |
|
|
|
|
|
|
|
|
|
Re: الذين بددوا العمر أسفارا- قصص من الواقع. (Re: عبود احمد النصيح)
|
Quote: والله إنت ما بتعرفني ولا بتعرف إحساسي المرهف وجوانحي المتل قليب العصفور ..
أسأل مني عبود النصيح الفوق دا وكيف كانت غربتنا في حواري وأزقة الهند من بومباي لي نيو دلهي لي بنقلور ..
غربة الهند حارة يا الطاهر ياخ عشان كدة ليو حق الواحد يبكي ..
أشهد |
عبود النصيح
هسي يجي اخونا اسعد ابراهيم يقول ليك شهادتك في ناذر دي زي شهادة الزول الدجال بتاع زكية زكريا.
شكرا يا النيز على الاغنية.
| |
|
|
|
|
|
|
|
|
|
Re: الذين بددوا العمر أسفارا- قصص من الواقع. (Re: معاذ حسن)
|
يا معاذ أنت مجنون يا بتسطل عديــــــــــــل!!
الوصف التحت دا وصف مساطيل!!
دي ما نبذة يا معاذ عندي صاحبي يتكيف منك يسب ليك وينعل خاشك من الكيف..
| Quote: تبدأ العاصفة على جانبي الأفق وتمتد في شكل دائرة إلى إن تطوق المنطقة تماما وتعتم للحظات لا تجد فيها هواء تتنفسه وبعد هدوء قاتل فجأة تهب كمارد وتبدأ مقدماتها بأصوات (الطشاتة والجرادل) |
أما عن الكشرة فحدث ولا حرج سبحان الله مابتروح ابدا ابداً!!
| Quote: وبدا لونه فاتحا أكثر من إخوته الذين كانوا بلون الأرض التي يكدحون عليها لكن النصيحة (الكشر والخلقة) ياها ذاتا خلقتم |
ود الدقم(مافي زول وصف الغربة احسن منك..)
100%
| Quote: الغربة قلعة جملية حسناء من بداخلها يريد الخروج ومن بخارجها يريد الدخول، |
اما عن الغربة الهندية ومرارات الغربة الهندية طولو بالكم واقرو!!
http://travel.maktoob.com/vb/showthread.php?t=94299[/B]
| |
|
|
|
|
|
|
|
|
|
Re: الذين بددوا العمر أسفارا- قصص من الواقع. (Re: سامى عبد الوهاب مكى)
|
تستاهل يا معاذ تتبناك الاستاذة سلمي الشيخ سلامة وتتنشر أعمالي البسيطة العميقة في كل الدنيا... والحمدلله تصفيقي ليك من أول يوم قرأت فيه اعمالك ما وقع واطة وانشاءالله بلغت الصحة، وانا حاجزة (اعمالك الكاملة من الان) ولو حبيت الدفع مقدم... لأن ليس كل ما يلمع ذهباً.
(المالكه ما متل المعار
وما كل أصفر من نضار)
وأنت تملك ابداعاً حقيقيا... وسلمت
| |
|
|
|
|
|
|
|
|
|
Re: الذين بددوا العمر أسفارا- قصص من الواقع. (Re: ASAAD IBRAHIM)
|
المبدع معاذ
كلام الغربة ده بيقلب البطن والله
لكن حكاية مارجعت ليك ستة سنة دى عطلة منك ساى
وتعال نحسبها قول السنة الاولى مامحسوبة لانك لقيت شغل فى اخرها
السنة التانية قول بديت تسدد حق الفيزا
السنة التالتة واحدة من اخواتك جابت مجموع كويس لكن مابتدخل بالمجان
ولانك قلبك طيب قلت ليها تقدم فى مامون حميدة او طب الاحفاد وبديت تجادعهم
السنه الرابعة ناس حلتكم دايرين يعملوا مظلة للجامع لان عدد المؤمنين فى زيادة
ولجنة الكهرباء حقت الحلة عشمانة فيكم كتير وكمان ناس النادى دايرين فنايل
للفريق وعايزين ريسيفر بكرت عشان كاس العالم فمفروض طوالى السنة الخامسة تكون رجعت
احكى ليك حكاية واحد من حلتنا كنا بنسمع بيه من نحن صغار يوم رجع بعد كم وعشرين سنة
شايل فى يده كيس كانه جاى من بندة ولابس الجلابية السعودية والغترة الحمراء زى خالد مسعد
لاعب الاهلى قعد ليه فترة سنتين عذب فيها الناس لازم يعملوا ليه رز كل يوم وركب مكيف فى
البيت الايل للسقوط ولكن كل ذلك لم يقنعه فقرر الرجوع كعمرة حتى توفاه المولى بعد سنه
من عمر الغربة الثانية
| |
|
|
|
|
|
|
|
|
|
Re: الذين بددوا العمر أسفارا- قصص من الواقع. (Re: ASAAD IBRAHIM)
|
صديقي ابو السعود...سلام
قطعنا فيك في البوست دا الحمد لله جيتنا براك
مشتاقون.
Quote: فهم خجلون من العودة
وكلام الناس
"بالله دة قعد بره عشرين سنة راجع ايد ورا وايد قدام يخص"
|
تعرف يا ابو السعود دا السبب في الغربة الطويلة لمعظم الناس
وبالذات الناس الحساسين زي كدا .وخاصة انو حاجاتنا كلها مكشوفة هسي عندك المصريين الواحد سنة ويرجع وما هاميهو اي حاجة.
| |
|
|
|
|
|
|
|
|
|
Re: الذين بددوا العمر أسفارا- قصص من الواقع. (Re: معاذ حسن)
|
Quote: ولكن كل ذلك لم يقنعه فقرر الرجوع كعمرة حتى توفاه المولى بعد سنه
من عمر الغربة الثانية |
أحمد التجاني تحياتي..
عمك طه قضى اربعين سنة في خدمة شركة كبيرة في مدينة (جده )انهيت خدماته لبلوغه سن الستين.
وتم تصفية مستحقاته وطلع بمبلغ ما بطال. الا ان عمك (طه) رفض المغادرة وطلب ان يبقى على كفالةالشركة وعمل حارس في عمارة,احد اقاربه كان يعمل في ذات الشركة وحتى يضعه امام الامر الواقع طلب من ادارة الشركة عمل خروج نهائي لعمك طه حتى يقضي ما تبقى له من ايام في بلده.وبالفعل تم عمل الخروج النهائي وبعد شهر قضاه في قريته في شمال السودان رجع عمك طه بتاشيرة عمره. وبدأ يبحث عن عمل جديد الى ان تم القبض عليه في حملات الكشة واعيد مرة اخرى الى السودان.وعندما اغلقت امامه ابوب العودة ( جده) استقر نهائيا في مدينة بورسودان. بس عشان يكون قريب من جده.......
قصية حقيقية.
| |
|
|
|
|
|
|
|
|
|
Re: الذين بددوا العمر أسفارا- قصص من الواقع. (Re: معاذ حسن)
|
الذين بددوا العمر أسفارا
فحصلوا على أجمل نساء الحيّ أقمارا..
لا لشئ سوى أنهم كانوا أكثر بوبارا..
تعرف يا عزوز واحدة من مميزات المغترب(سابقاً ) الواحد منهم يكون كبير العطالة في بلاد الغربة وأول ما يجي إجازة السودان يدخل ليك في أحلى ساونا مع أحلى (ريحة) من ابو خمسة ريال من أقرب جامع بعد صلاة الظهر ويديها ليك غشوة( للهرم) ويشتري قميصين من ابو 7 ريال وتلاتة بناطلين من ابو 9 ريال ..
ويجي الحِلّة يقدل ويضرّع ويشوف ليك أحلى بت من بنات الحلة ويقول يا انتي يا اغرف وكفففففف يختفا ليك من اخونا الكان بيربي فيها من هي في الابتدائي ..
| |
|
|
|
|
|
|
|
| |
معاذ حسن
رشا سالم
سيف الدين حسن العوض
ابو جهينة
حيدر حسن ميرغني
محمد المختار الزيادى
ناذر محمد الخليفة
هشام آدم
نهال الطيب
الطاهر ساتي
سلمى الشيخ سلامة
عبدالمنعم الرزوقي
محمود الدقم
Ahmed Yousif Abu Harira
wadalzain
عمر الفاروق
الشيخ إبراهيم الشيخ
ASAAD IBRAHIM
احمد التجانى احمد
فيس بوك
تويتر
انستقرام
يوتيوب
بنتيريست