|
|
 شكرا للاخت الكريمة (هبة الماحي) على هذه المرافعة الشافية!!
|
عزيزي القاريء وخصوصا شريحة(المهاجرين)
احببت ان اشرككم بعضا من خيط هام حاليا بالمنبر للاخ عضو المنبر معاوية المدير وقد اعجبتنى فيه جدا مداخلة اختنا المهاجرة في بلاد العم سااام العزيزة (هبة الماحي) والتي قررت ان افرد لمداخلتها خيطا خاصا بها لاهميتها وقد قدمت فيها مرافعة راقية وشافية في الدفاع عن شريحة المهاجرين امام المتهجمين عليهم وواصميهم بالجبن والخيانة وعدم الاحساس بقضية شعبهم بل يحرمون عليهم الانفعال بقضية اهلهم بالداخل
عـايـش بـرّه الـسـودان ؟؟؟ ... أمـسـك خـشـمـك عـلـيـك !!! ...
Quote
: يعني يا تكون جوه السودان يا تقفل خشمك.
شئ عجيب والله!!!
والله يا معاوية يا أخوي زي ما قلت حاجة تحير !!
كان عندي رد طويل بتاع زول ممغوووس من واحد من البوستات البتقول إنه ناس
الخارج ما حاسين بالناس في السودان ! بس للاسف ساعتها لقيت باسوردي رايح
في حق الهكر !!
هسة كدي النحاول نتفشي في بوستيك دا آود أمي ..
منو القال المغتربين كلهم منتشين و عايشين في نعيم!! غايتو ديل بكونوا
مغتربين الخليج أو الحتات التانية المرطبين ديل أما ناس نحنا المجدوعين
بعييييد في بلاد العجم فلينا الله و عيشة السوق إلا من رحم ربي ، دا بخصوص اولا"
ثانيا" منو القال المغتربين ديل مهما وجدوا من راحة في المعيشة ما حاسين بالناس
الجوة ؟ هي الناس الجوة دي أصلا" المقصود بيها منو ؟ مش ياهم الاهل و اقرب الاقربين ؟
كيف انا اكون مرتاااحة و بالي رااايق ( مها كانت تلاجتي مليانة ) و أمي في السودان
عيانة و مشت لي 20 دكتور و كل واحد تشيخصه مختلف عن التاني ؟
كيف ما اتكلم عن سوء الاحوال في السودان و أبوي متلتل من إدارة لي إدارة ومن مكتب
حكومي لي مكتب حكومي عشان يطلع ببضع ملاليم من معاشه كموظف حكومي لي اكتر من 35 سنة؟
كيف ما اطالب بالتغيير و حكومة السجم ما جايبة خبر للناس البتموت بالفشل الكلوي و الامراض
المعوية بسبب تلوث مياه الشرب بمياه الصرف الصحي حتي لو انا في اغترابي هناك قاعدة اشرب
موية مطعمة بالعسل !!
كيف ما ألعن سنسفيل الخدمة المدنية و أطالب بتغيير السياسات الحكومية ( أضعف الايمان )
و انا اخوي خريج كلية الطب ليهو 3 سنوات و لحدي هسة ما أتعين !! لاحظ انه انا بقول ليك
كلية الطب مش كلية الفنون ولا كلية اللغات ( ليس تقليلا" من شأن هذه الكليات و لكن لعدم كفابة
الاطباء في المستشفيات العامة ) و برضو ما بيعينوا الخريجين !! دي سياسة شنو دي ؟
كيف انوم مرتاحة و ما افتح خشمي ( رغم انه اولادي في بلاد الفرنجة بدرسوا في احسن المدارس ) و انا
اولاد أختي بدرسوا في مدارس عبارة عن دار جباية ( و بقولوا انها حكومية و شبه مجانية ) و بعد دفع
كل الاموال المطلوبة تلقي الواحد فيهم كل همه ينجح في المادة المعينة بس عشان الاستاذ ما يضربه و عشان
ابوهو برضو ما يضربه ( الابو قلبه واجعو علي القروش الدفعها خلال السنة ) و بعد الامتحان بي ساعة واحدة
تلقي الطالب نسي كل كلمة كانت في المقرر !
للمرة التانية أصلا" نحنا جايين من وين ؟ و الناس الجوة ديل منو ؟ مش ياهم أهلنا و حتة مننا !!
و أي وجع يحسوا بيهو بطًلع عينا معاهم حتي و نحنا مأكلين و شاربين و نايمين كويس ؟
عليكم الله أتقوا الله فينا يا خلق الله .
معاوية أعفي النبي فيك طولت عليك و علي ضيوف بوستيك لكن يا ود امي الوجع في الجوف كتييير
|
|
  
|
|
|
|
هشام هباني
فيس بوك
تويتر
انستقرام
يوتيوب
بنتيريست