|
|
|
 Re: حمداً لله على سلامة الشاعرة المبدعة / رحاب شريف .. ويا بورداب القاهرة عاودوها .. (Re: عصام دهب)
|
بتنفسك..
رحاب شريف
:::::
بتنفسك.. لحظه زفيرك شهقتي...
و بستنشقك لحظة شهيقك زفرتي ...
**
بتحسسك.. في كل مواطن الحس معاي
ما أظن تفارق دنيتي ....
**
بتقمصك لون الفرح فنان بيرسم بسمتي ...
وراجياك أنا
تتحمل الأهات معاي بلسم بعالج علتي ...
**
دايراك تكون امي وأبوي
تديني قلبك وأي شي ...
**
أمنحني لحظة إنتشاء
لو حتى بموت بنتشي
**
ما ميتة في حبك زمن
حبك بحنط جثتي
**
وينفخ عليها يحركها
ويديها إحساس بالمشي
**
حبك بزيد من قوتي
حبك بجدد في مسانم قوتي
**
أوهبني بهجة بلا تمن
أحميني من غدر الزمن
ونسني في ليل غربتي
وأحضن جراحك بجروحي ونلتئم
**
وحد مواجعك وأنصهر في وجعتك
حدد مكاني ووجهتي
سافرت حا أسافر معاك
لو حتى نمشي وما نجي
**
فكرت حا أفكر معاك بكل حواسي وقدرتي
ولو مرة في الأيام بكيت تسبق مدامعك دمعتي
**
أو مرة ضحكاتك عِلت
شقت سماك وجلجلت
حا تلاقي تشفي بضحكتي
**
أنحتني تمثال من صبر
أعجني شكِّل لوحتي
ساعدني فرج كربتي
وخلصني من قيد أزمتي
**
ما أنت مفتاح جنتي
أنت المسيح الخلقو في شأن نجدتي
و بستنشقك لحظة شهيقك زفرتي ...
يا أغلي زول مُسجِل حضور في دنيتي...
رايك شنو أكتب عليك ممنوع دخولك ومرقتي..
وأقفل وراك كل السكك.. يا سكتك يا سكتي
::: :::
| |
  
|
|
|
|
|
|
|
|
Re: حمداً لله على سلامة الشاعرة المبدعة / رحاب شريف .. ويا بورداب القاهرة عاودوها .. (Re: عصام دهب)
|
أبوي مسكيـن ..
كلمات الشاعرة : رحاب شريف ألحان وأداء الفنان: محمد النصري
فتــح باب الصبر بالديـن .. وشــال منــو
وقف في ايـد الصبـر بالسـوط
جلد في جـلد ابوي لامن مرق جلد الصبر والسـوط
وفتر من جلـد ابـوي والمــوت
عرف بي إنــو ما بيخــاف أبوي منـــو
لأنــو مصيــرو راجيهــو .. ونحــن هناك راجنــو
صغار ينتظـرو في الأحــلام .. ينــومو عشــان يشـوفو العيـش
قبل ما يشيـلو منـو قليـل .. يصيــح ديـــك الصبــاح معليــش
حلمكــم ما بيشبــع ليــش
عشــان حلم الجعــان العيـــش
وعيـــش الحلمــة ماهـــو رغيــف
ومويـــة الحلمــة ماهــا خريــف
صحينــا على حلــم تخـريــف
طشــاش الرؤيــا لاقـى الزيــف
ابوي مسكيــن ومسكينــن كتار زيــو
يبلــو من الصبــر ريقــم
صديقــم ما يفــك ضيقـم
زمــن لا فيهــو زول صاحـب
طريقـن سور الحاجــب
وهمــبت من عيـونم شــوف
ولــون في اليقيــن الخــوف
أبوي مسكيــن .. وما المسكيــن بكـون شحــاد
أبوي عفف أيــادي العفــة في الزهــاد
أبـوي كان بحتقــر شكــل القـروش ما نعمـة في الجحــاد
يعــاف اللقــمة كان اتمسحـت في الــزاد
أبـوي لا سيــد .. ولا كان للبســود عبـــاد
أبوي إنســان وسـوداني ..
طبــع من لونــو لينــا جـــواز
جنسيــاتنا كانت من عيــونو عــزاز
بطاقتنــا النشيــلا معانـا بي إعــزاز
وبصّــم .. بصـم من ريقــو في الانفـــاذ
أبوي إنســان .. ضميــرو عرف حقــوق الزات
أبــوي من قلبــو كان جخـــات
أبــوي علق جلــد مصلايتــو شان ما ضحــى في الأعيـــاد
وضبــح مأساتــو .. شان تفـــرح خلــوق الدنيــا في الميـــلاد
| |
|
|
|
|
|
|
|
|
|
Re: حمداً لله على سلامة الشاعرة المبدعة / رحاب شريف .. ويا بورداب القاهرة عاودوها .. (Re: عصام دهب)
|
ما قلت لي رغم الظروف
حأسكنك جوة الحروف
وسكنت في حرف البكى
لون عيوني ضباب وخوف
تاوقت مابين الرموش
سدت ملامح الوجعة شوف
ورجعت تاني اقول كفاي
غير الحرق ما عندي جوف
مالقينا بيت....
مالقينا بيت....
مالقينا بيت لو حتى من الطينة طوف
لا حتى حتة نسوره ومن حولها ندور نطوف
ونلبي لامن ننكفي وفي وشنا نعيد الوقوف
مالقينا بيت....
مالقينا بيت....
مالقينا بيت يسترنا من عين القدر
ما الدنيا ضاقت بالبشر
فتشنا جحر النملة قصينا الاتر
لمن دخلنا علي النمل قالينا خشو بلا زعل
قرصنا ما قاصد هو شر
عبر عن الفرح الغمر
وبي قلبو لمن شافنا قال
معقولة يتواضع بشر
ويسيب في بيوت الدنيا
يزهد في ترابها وفي البحر
ويخلي كل مفاتنا
وآمالها واحلام العمر
ويعيش مع النمل البكد في
الصخرة شان حبة امل
جحرا مضلم مافي نور
لا حتى طاقة ولا قمر
لاموية لا جدول يكب
لما الخريف يتكي المطر
مالقينا بيت....
مالقينا بيت....
مالقينا غير جحرا تبيت النملة فيهو
وسكنا ما دافعين ايجار لما النمل ما هان عليهو
تلقانا واقعين في الأرض ويدوسنا في سكة مشيهو
وقال لينا في الصيف اسكنو
ولما الشتا يزور الديار نفرح معاكم بي مجيهو
مالقينا بيت....
مالقينا بيت....
ما لقينا بيت نتكل عليو كل الهموم
مالقينا غير ناسا تنوم شان تصحى تاني عشان تنوم
واحلامنا ما بتقدر تقوم
كيفن بتتقطر مطر قبال تكون اصلا غيوم
مالقينا بيت....
مالقينا بيت....
يا دنيا دست في حشاها مساحتا
نكرت ولد انسانا قالت ماخلق آدم زمان من طينتا
يا زايلة زالت من قليبا محنتا
لا نحنا شاحدين حنها لا حتى دايرين سكنتا
باكر على الجنة بنعيش والدنيا تعرف غلطتا
| |
|
|
|
|
|
|
| |
عصام دهب
فيس بوك
تويتر
انستقرام
يوتيوب
بنتيريست