|
|
|
 Re: يا أخوانا بجد كرهت السـودان وداير أمرق أي حتة , إن شاء الله أمريكا زاتها !!!! (Re: doma)
|
| Quote: لوول كدي يا احمد ولدي اولا ورينا ديل منو وبعملوا شنو ؟؟ |
هههههههههه
والله يا أُم الكُل ديل أخير ليك ماتعرفيهم هم منو
ولا تعرفي بعملوا شنو ؟؟؟
ديل عبارة عن جُباة
عارف يعني إيه جُباة ؟؟؟؟
للموضوعية هم (مرات) بعملوا حاجات كويسة للمنطقة
يعني في محافظ أو مُعتمد إسمه منو كدة الكباشي
بجد عمل حاجات كويسة
لكن المشكلة إنو البلد فيها فساد
الترابي قال بضع في المئة
غطسوا حجروا
هسع بقى بضعات في المئة
أها بتم تعويضها بواسطة المواطنين عبر المحليات
بإسلوب جد ماكريم
المابدفع ....ــــــــــــــــــــــــــــــــــ(السجـــــن)
| |
  
|
|
|
|
|
|
|
|
Re: يا أخوانا بجد كرهت السـودان وداير أمرق أي حتة , إن شاء الله أمريكا زاتها !!!! (Re: Ahmed musa)
|
صديقي احمد ...سلام ..
تخيل يااحمد احساسك ده نحن ذاتنا عايشنه ونحن بره السودان خاصة البلاد التى نعيش فيها ...يبدو ان الخروج من السودان الى دول قريبة منه لا يمنح الاطمئنان ولا يكفي ...وكل ماكنت بعيد من سودان اليوم بتكون اقرب من سودان الامس الوطن الواحد العايش فينا ونتمنى ان نظل كذلك الى أن تقوم الساعة او تحدث معجزة في توحيد الوطن وزوال كل الظلمة وعودة الماضي الجميل في شكله الجديد ...كنت بحلم بعودة نهائية لكسلا واعمل لي محل في السوق واربى عيالي قدامي واشتري عجلة لكل واحد عشان المدرسة وانا وقريبتك ام العيال نقعد في ضل نيمة بيتنا في العصرية ونشرب جبنتنا ونسمع أغاني التقري والتبداويت في اذاعة كسلا .. ده كان حلمي .. الحلم اصبح حلم وكل مااوجه حلمي تجاه السودان يرجع لى وبقول (هذا الحلم لايمكن الدخول به الآن )...
امرق يااحمد وقبل تمرق افتح جوالك ..
الله ينعل الكان السبب ..اللهم من تسبب في هذا الحال لاتقبل توبته واكتب ليهو النار دنيا وآخرة ..
| |
|
|
|
|
|
|
|
|
|
Re: يا أخوانا بجد كرهت السـودان وداير أمرق أي حتة , إن شاء الله أمريكا زاتها !!!! (Re: Ahmed musa)
|
سلام استاذ احمد موسي
| Quote: يا أخوانا بجد كرهت السـودان وداير أمرق أي حتة |
انبهك قبل ما تتوجه لي حته لازم تشوف ليك اي جواز تاني (تشادي, اريتري ... الخ)
لانو صاحبنا مشي زيارة لاحدي دول الخليج و مدة الزيارة شهر, قال يفتش شغل في الفترة دي
الجماعة قالو ليه وقفنا الفييز للسودانيين لانهم متعطلين و ما برضو باي شغل
صاحبنا حاليا جادي في انو يمشي اريتريا يطلع جواز اريتري و يرجع بيه الخليج
| Quote: تخيل يااحمد احساسك ده نحن ذاتنا عايشنه ونحن بره السودان خاصة البلاد التى نعيش فيها ...يبدو ان الخروج من السودان الى دول قريبة منه لا يمنح الاطمئنان ولا يكفي ...وكل ماكنت بعيد من سودان اليوم بتكون اقرب من سودان الامس الوطن الواحد العايش فينا ونتمنى ان نظل كذلك الى أن تقوم الساعة او تحدث معجزة في توحيد الوطن وزوال كل الظلمة وعودة الماضي الجميل في شكله الجديد ...كنت بحلم بعودة نهائية لكسلا واعمل لي محل في السوق واربى عيالي قدامي واشتري عجلة لكل واحد عشان المدرسة وانا وقريبتك ام العيال نقعد في ضل نيمة بيتنا في العصرية ونشرب جبنتنا ونسمع أغاني التقري والتبداويت في اذاعة كسلا .. ده كان حلمي .. الحلم اصبح حلم وكل مااوجه حلمي تجاه السودان يرجع لى وبقول (هذا الحلم لايمكن الدخول به الآن )... |
جميل انت يا ود القاضي
| |
|
|
|
|
|
|
|
|
|
Re: يا أخوانا بجد كرهت السـودان وداير أمرق أي حتة , إن شاء الله أمريكا زاتها !!!! (Re: حسبو عكاشة)
|
| Quote: انبهك قبل ما تتوجه لي حته لازم تشوف ليك اي جواز تاني (تشادي, اريتري ... الخ) |
لا يا حسبــو جوازي مابقدر أخليه
وجنسيتي مابقدر أنكرها
وشكراً نبهتني
أها النعدِّل الطلب
أي دولة تقبل جوازي ده ...
ولو مالقيت بقعد هنا أنبذ المحليات واحارب الفساد
تعرف يا حسبو
أخو مسئول كبببببببير ونافذ ماخد توكيل من شكرة كببببببيرة ونافذه
ولو داير تشتري حاجة من الفي توكيلها ده إلا تدفع ليهم
ليه ؟؟؟
مامعروف !!!! أها ده يسموه شنو ؟؟؟؟
والدفع بالدولار ما بالمحلي ...تصدق ؟؟؟؟
والراس قالوا بألفين دولار
يعني هو قاعد في صمّة خشمه يدخل حسابه يوميا آلاف الدولارات !!!!!
| |
|
|
|
|
|
|
|
|
|
Re: يا أخوانا بجد كرهت السـودان وداير أمرق أي حتة , إن شاء الله أمريكا زاتها !!!! (Re: Ahmed musa)
|
ود القاضي ..| Quote: تخيل يااحمد احساسك ده نحن ذاتنا عايشنه ونحن بره السودان خاصة البلاد التى نعيش فيها ...يبدو ان الخروج من السودان الى دول قريبة منه لا يمنح الاطمئنان ولا يكفي ...وكل ماكنت بعيد من سودان اليوم بتكون اقرب من سودان الامس الوطن الواحد العايش فينا ونتمنى ان نظل كذلك الى أن تقوم الساعة او تحدث معجزة في توحيد الوطن وزوال كل الظلمة وعودة الماضي الجميل في شكله الجديد ...كنت بحلم بعودة نهائية لكسلا واعمل لي محل في السوق واربى عيالي قدامي واشتري عجلة لكل واحد عشان المدرسة وانا وقريبتك ام العيال نقعد في ضل نيمة بيتنا في العصرية ونشرب جبنتنا ونسمع أغاني التقري والتبداويت في اذاعة كسلا .. ده كان حلمي .. الحلم اصبح حلم وكل مااوجه حلمي تجاه السودان يرجع لى وبقول (هذا الحلم لايمكن الدخول به الآن )... |
لو سمحت ما تكتب لينا كلام زي دا تاني
برانا دموعنا ع الهبشة وما ناقصين
الله يسامحك ياخ
_____________
أحمد موسى الله يسامحك انت برضو
إحنا ياخي المصبّرنا على وجع الغربة الأمل في نهايتها و النظر لحال الفي البلد
متمتعّين و حامدين ربهم وشاكرين
النوع البقول ليك السعودية دي كان جاتني هنا في خشم الباب ما بمشيها افوت البلد دي وين أنا
زي دا بطمّني و بخلّي الأمل عايش
| |
|
|
|
|
|
|
|
|
|
Re: يا أخوانا بجد كرهت السـودان وداير أمرق أي حتة , إن شاء الله أمريكا زاتها !!!! (Re: شمائل النور)
|
Quote: هو انت تطول تبقى عميل..؟؟
عندي صحبتي بتقول ،، نحن لو ما ايماننا قوي مابنعيش في البلد دي ، ولو مادخلنا الجنة نكون دقسنا
قول لا اله الا الله |
لا إله إلا الله ...شمائل أُختي
لا إله إلا الله
تعرفي عندي صاحبي مرة مشينا االتهجد في جامع السيدة سنهوري
لقينا ليك العربات مالية الجامع
قال لي والله قلنا الأغنياء ديل يعيشوا دنياهم ونحن نسرق الآخرة
لكن الظاهر الناس ماكلين دنيا وآخرة ...!!!
أها قولي لصاحبتك دي أتطمني
نحن من هسع دقسنا ... خلينا نكوس الرحمة بس
| |
|
|
|
|
|
|
|
|
 Re: يا أخوانا بجد كرهت السـودان وداير أمرق أي حتة , إن شاء الله أمريكا زاتها !!!! (Re: cantona_1)
|
أحمد موسى,,Quote: ولو قعدت تلاتة أيام ولقيت سوداني يجيني مزاج أحضنه وأبكي
لكن بجد قرفت |
ياخ والله دى حاجة تحير وتحبط,,لكن إنت من زمان بكاى وحنين
ناس إنتو والحمام المعاك داك نحن متفائلين بيكم وقلنا أهو الصناديد قاعدين
رقم ميولكم المريخية وكدا
..
كان خربت شديييييييييييد كلمونا وخلونا نشوف نلاقيكم وين فى اراضى الشتات ولا الأراضى المحررة ولا الأرض الجديدة
سنو سلاحكم أو جوازاتكم,,,,
المهم لازم تسنوا حاجة غايتو,,
| |
|
|
|
|
|
|
|
|
|
Re: يا أخوانا بجد كرهت السـودان وداير أمرق أي حتة , إن شاء الله أمريكا زاتها !!!! (Re: cantona_1)
|
Quote: يا أحمد موسى يا زول خليك معانا نحن.. نحن القابضون على الجمر .. الواطين الجمرة.. الإيدنا في الموية السخنة أو النار.. الصابرين وراضين بقضاء وقدره.. لكن عشمنا في الله كبير الحالة تتصلّح والأمور تمشي عال العال بقدرة العلي القدير.. قول آميييييييييين.
|
أها يا كباشي كلامك إقتبسته تب
وحأحفظه صم
يلا شوف لي طريقة في لندن العفينة دي
وليك علي أكتر ليك من جمر القضية دي لمان تآمن !!!
| |
|
|
|
|
|
|
|
|
|
Re: يا أخوانا بجد كرهت السـودان وداير أمرق أي حتة , إن شاء الله أمريكا زاتها !!!! (Re: Ahmed musa)
|
يا أخوانا عليكم الله (الإسلام) كدة ...؟؟؟
عشان مانكون كمان ما موضوعيين
البلد إتغيرت فيها حاجات كتيرة للأحسن
بس تغيير ما بشبه قدراتها
فدراتها اكبر وأعظم ... لكن التمكين
والهيمنة على الإقتصاد
وكل زول يقول انا مؤتمر ما تقربوني أقربوا التانيين هو الغطس حجر البلد
عليكم الله يا أخوانا (الإسلام) قال أظلموا ولا قال أعدلوا ؟؟؟؟
ليه أنا معاك تديني انا ما معاك تضايقني تكرهني البد ؟؟؟
البلد دي بلد منو ؟؟؟ بلد ناسها ولا بلد حزب ؟؟؟؟
أي نحن كان ويمكن مازال عندنا أمل ما في الإصلاح
لكن بجد نحن ماشين لهاوية والمصلحجية ماهاميهم
أُفٍ للمصلحجية وتباً لهم
| |
|
|
|
|
|
|
|
|
|
Re: يا أخوانا بجد كرهت السـودان وداير أمرق أي حتة , إن شاء الله أمريكا زاتها !!!! (Re: Tumadir)
|
Quote: تعال أمسك الشغل ده وأسكن فى البيت ده
( وأمسك الأولاد ديل)
وأنا بمشى هناك ...
ايه رايك؟؟ |
موافق ...
بس قصة الاولاد دي خليها محل تفاوض ...
تعرفي يا تماضر
عندنا صاحبنا أكيد بتكوني بتعرفيه
إسمه عوض حامد ... لقبه عوض كوبر
زمااااااااااااااااااااااان حكي لينا قصة واحد صاحبهم
شالوه واحدة من دول شرق أوربا للقراية
وعملوا ليه بارتي مكرّب أيام البارتيات المكرّبة
وسافر ...
بعد إسبوع ... لفوة قاااااااااااااااااااعد في ضُل ضحوية
إستغربوا سألوه ..مالك ؟؟؟؟؟
قال ليهم وعيونه مرقرقة (والله ماقدرت أفوت السودان)
أها أنا من سلالة الزول ده
لكن قهران بس
وجاي أفضي قهري هنا مع أخواني واخواتي
بس
لكن عرضك ده كدي خليه نتناقش فيه
ورينا تفاصيل الماهية والمصروفات وياريت بالسوداني لأني ضعيف شوية في الدولار
عشان أقرر ...!!!!
| |
|
|
|
|
|
|
|
|
|
Re: يا أخوانا بجد كرهت السـودان وداير أمرق أي حتة , إن شاء الله أمريكا زاتها !!!! (Re: Ahmed musa)
|
المؤتمر الوطني حزب بالغ القساوة في تعاملاته السياسية
دخل السياسة بفكرة صهيونية تقوم على السيطرة على الإقتصاد
وبقت شيلني كحزب وأشيلك كمستثمر
دخل عدد من الإقتصاديين والمستثمرين السياسة
خربوا السياسة
ودخل عدد من السياسيين السوق وخربوا السوق
وخرب البلد ...
يعني زي ماقلنا في تغيير كويس حاصل لكن مابشبه القدرات
تمسك أي شارع ...صاح هو في ... موجود ... وده خير
لكن ترجع للشركة العملته وعلاقتها بشيخي وشيخك وجزاك الله خير
تلقى نص الظلط بقى مجاملات
والله يقدرك يامطرة تنزلي تبين كوكة الظلط في مخاتضة الخريف
| |
|
|
|
|
|
|
|
|
|
Re: يا أخوانا بجد كرهت السـودان وداير أمرق أي حتة , إن شاء الله أمريكا زاتها !!!! (Re: Ahmed musa)
|
Quote: يلا شوف لي طريقة في لندن العفينة دي
وليك علي أكتر ليك من جمر القضية دي لمان تآمن !!! |
يا أحمد موسى ... شيل الصبر أنا جاييك خلال اسبوعين بحكي ليك الحاصل.. أحسن من السودان مافي.. أبعد من ساس يسوس.. أمشي جنب الحيط .. تربِّي عيالك بسهولة ويُسر.. الرزق عند الله. لندن تمام التمام .. القروش في .. والراحة في .. والجو مكندش طبيعي .. لكن الزيّك إنت الحِنين دا هنا بموت قبال يومه بالمرض الاسمه Home sick . تقدر تقعد 3 شهور ما تشوف سوداني إلا في الجامع أو في جنازة – بعيد عمك- تضرب لزول تلفون تقول ليهو جاييك . يقول ليك: آسف ما تجي عندي إرتباط مُسبق. يوم 28 في الشهر تجيك فواتير: الكهرباء .. الموية .. الغاز .. التلفون .. الموبايل .. رخصة التلفزيون .. ضريبة المجلس Council Tax . فاتورة الكريد كارد ممكن يكونن 3 فواتير.. لو بكيت ما في زول بسمعك .. أها تجي الحملة؟
كبـَّـاشي الصــَّافي
| |
|
|
|
|
|
|
|
|
|
Re: يا أخوانا بجد كرهت السـودان وداير أمرق أي حتة , إن شاء الله أمريكا زاتها !!!! (Re: cantona_1)
|
| Quote: يا أحمد موسى ... شيل الصبر أنا جاييك خلال اسبوعين بحكي ليك الحاصل.. أحسن من السودان مافي.. أبعد من ساس يسوس.. أمشي جنب الحيط .. تربِّي عيالك بسهولة ويُسر.. الرزق عند الله. لندن تمام التمام .. القروش في .. والراحة في .. والجو مكندش طبيعي .. لكن الزيّك إنت الحِنين دا هنا بموت قبال يومه بالمرض الاسمه Home sick . تقدر تقعد 3 شهور ما تشوف سوداني إلا في الجامع أو في جنازة – بعيد عمك- تضرب لزول تلفون تقول ليهو جاييك . يقول ليك: آسف ما تجي عندي إرتباط مُسبق. يوم 28 في الشهر تجيك فواتير: الكهرباء .. الموية .. الغاز .. التلفون .. الموبايل .. رخصة التلفزيون .. ضريبة المجلس Council Tax . فاتورة الكريد كارد ممكن يكونن 3 فواتير.. لو بكيت ما في زول بسمعك .. أها تجي الحملة؟ |
أها يا شباب
لندن العفينة لحقت إسرائيل ومصر
لندن إستبعدناها من الخيارات
جني وجن فواتير الكرديت كرد دي
لأنه ماعارفه هو شنو
وجني وجن فواتير شئ ماعارفه هو شنو ؟؟؟
...
...
...
والله يا كباشي البلد مامقصرة معاي والعيال
وبجد هي ماكعبة بالعكس انا مرات بكون ماشي بالعربية كدة
(لاحظت العربية كدة دي ) ؟؟؟
أها بقول ياربي نحن في الخرطوم ؟؟؟؟
بحس بفخر وبرفع رأسي مع ناس إم تي إن
لكن تعاين للمشهد بكلياته تتغاظ
يعني معليش ومع إحترامنا للناس العملوا مجمع النور ديل
علييييييييكم الله ياناس الدين والفهم
هسع أهم المجمع ولا بحقه كان تتبني مدارس وتتأهل مستشفيات ومراكز في الريف ؟؟؟
خلونا واضحين عدييييييييل كدة وما ندسدس الحاجات تحت تحت
ده مجمع مبالغة ومصروف فيه قروش مبالغة بجد كان ممكن تحل مشاكل
صاح هو ببقى والحكومة بتفوت
وببقى معلم يتحسب للبد ما للحكومة
لكن ترتيب الأوليات كمان مهم أكتر ولا شنو ؟؟؟
انا ماعندي مشكلة مع المجمع بالذات لكنه نموذج لمشكلة بلد
بذكّر زمان قالوا جورج دبليو بوش الإبن جه البلد
كان نائب رونالد ريجان على ما أظن
أيام المجاعة
زار المعسكرات لمن جه عملوا ليه عزومة كاربة
إستغرب وقال ليهم ده شنو ؟؟؟ قالوا ليه (فوود) قال طيب الناس دي جعانة ليه ؟؟؟
رجع وقال السودان فيه مشكلة توزيع موارد ما مجاعة !!!!
| |
|
|
|
|
|
|
|
|
|
Re: يا أخوانا بجد كرهت السـودان وداير أمرق أي حتة , إن شاء الله أمريكا زاتها !!!! (Re: بشير أحمد)
|
Quote: مولانا احمد
تحياتي؛؛؛
البلد تمام زي الفُل وعدّينا فيها الاجازة كانها اسبوع ؛ |
يادكتور والله أنا زاااتي قبل كدة قضيت فيها إسبوع زي الفُل
يلا تعال خليك جنبنا ونسمع بعدها شهادتك
البلد ماكعبة
البلد سمحة ناسها سمحين
لكن المصلحجية والمفسدين يكرهوك
تلقى الحاجات ماشة صاح لكن ببطء يغيظ يخليك تفكر في أمريكا زاتها
أو لندن العفينة دي
والله يا دتكور بلدنا دي تستاهل تكون أحسن بلد
موش تستاهل لا هي مؤهلة لكدة
بس منو بخليها تمشي قدام
تلقى الوزراء مستشمرين
والمستثمرين وزراء
ونحن هايصين في نص البلد ماعارفين كوعنا من بوع الحكومة !!!
| |
|
|
|
|
|
|
|
|
|
Re: يا أخوانا بجد كرهت السـودان وداير أمرق أي حتة , إن شاء الله أمريكا زاتها !!!! (Re: Ahmed musa)
|
احمد موسى
تحياتي لك والمتداخلين كلهم
تعرف البوست ده جاني في جرح لي كم يوم بحاول افتح بوست اني كرهت الغربة وعاوز ارجع للسودان
رغم اني لي في الغربة ثمانية اعوام فقط ونزلت السودان اكتر من 18 مره سنويا بنزل مرتين لقربي من السودان ( مكة ــــ بورتسودان) ومعاي الاسرة في حلي وترحالي وبنزل كتير لاني زول حنيين بحب الناس والشلة والدافوري والاجتماعيات بصفة خاصة
هدفي من الغربة حقته ولله الحمد وعملت مشروع وبقيت بي سبب ومن غير سبب افتش براي اي طريقة عشان انزل
وخايف بس من لما ارجع اندم ولو استمريت نار الغربة ما بترحم
السودان جميل بي ناسه
نرجو النصيحة والدعم بالنصائح والتجارب السابقة وما خاب من استشار
| |
|
|
|
|
|
|
|
|
|
Re: يا أخوانا بجد كرهت السـودان وداير أمرق أي حتة , إن شاء الله أمريكا زاتها !!!! (Re: خالد العطا)
|
يا احمد ياخوي ؛النفسيات العليك دي انا عارفها من شنو :
لمّ فيكـ واحد وقال ليك بتعرف فلان داك العمارة دي حقتو
المشروع الفلاني داك حق الكوز ابو دقن فلان واداني عمولة طاشر مليون
ونص المشروع الفرتكاني قلعوه من عمنا
_________
ازيدك نفسيات زيادة
مشروع قرطبة للدواجن جهة قرية ألتي عارفو حق منو ؟(ع.ع)
الشركة الكويتية للدواجن مساحتها 10الف فدان ؛ تقع قصاد بتري وبعدتفتيش سوبا
مباشرة وانت متجه للباقير
عارفها اتباعت لي منو ؟والآن شغالين فيها فلل سكنية والمستثمر اجنبي.
الكلام ده انا لمن سمعتو جاتني اكتر من نفسياتك دي
| |
|
|
|
|
|
|
|
|
|
Re: يا أخوانا بجد كرهت السـودان وداير أمرق أي حتة , إن شاء الله أمريكا زاتها !!!! (Re: بشير أحمد)
|
Quote: يا احمد ياخوي ؛النفسيات العليك دي انا عارفها من شنو :
لمّ فيكـ واحد وقال ليك بتعرف فلان داك العمارة دي حقتو
المشروع الفلاني داك حق الكوز ابو دقن فلان واداني عمولة طاشر مليون
ونص المشروع الفرتكاني قلعوه من عمنا |
يادكتور والله القصة ماقصة لم فيني زول
ولا قصة عمارات
ما العمارات من بدري معروفة دي حقت منو ودي حقت منو
الله يزيدهم
القصة كلها محاربة الفساد
محاربة الفساد بتخت الحصان قدام العربية زي مابقولوا أخوانا ناس السياسة
(طبعاً أنا ‘تزلت ساس على نصيحة أخونا كانتونا 1) ولو مانفعت برجع ليها وليه ..!!!)
أها محاربة الفساد
ثُم محاربة الفساد
ثُم محاربة الفساد كلكم تجوا ترجعوا هنا وتشتغلوا
وتعملوا لينا طبق البيض هُوادة مع الجدادة ...!!!!
| |
|
|
|
|
|
|
|
|
|
Re: يا أخوانا بجد كرهت السـودان وداير أمرق أي حتة , إن شاء الله أمريكا زاتها !!!! (Re: Ashraf el-Halabi)
|
سلامات أحمد موسى
ربنا يكون في عون الجميع فالحال مايل ومن زمنا بعيد طول والفساد والمحسوبيه ما بيحتاجو إجتهاد عشان الزول يلحظهم في السودان
سلامات كانتونا
| Quote: خليك متفائل وبلدنا ماشي على خير .. إنتبه للضوء الخافت في نهاية النفق إنّه الخلاص |
نظرنا ولم نرى لا الخير لا عثمان النو وإنتبهنا لا شفنا الضوء لا فاروق جبره
| Quote: نحن القابضون على الجمر .. الواطين الجمرة.. الإيدنا في الموية السخنة أو النار.. |
أُمـــك !! (تقال للتعجب في العاميه السودانية) من الخير والضوء جابت ليها جمر !!
| Quote: أحسن من السودان مافي.. أبعد من ساس يسوس.. أمشي جنب الحيط .. تربِّي عيالك بسهولة ويُسر |
دي النجيضه يعني !!؟
| |
|
|
|
|
|
|
|
|
|
Re: يا أخوانا بجد كرهت السـودان وداير أمرق أي حتة , إن شاء الله أمريكا زاتها !!!! (Re: مرتضى احمد عبد القادر)
|
يا حبيب
مشتاقين
سنة 2004 بعد ما إنتهيت من الإمتياز وعايز إشتغل طبيب عمومي قلت أمشي نهر النيل
نظام الأهل أولي
مشيت وزراة الصحة في عطبرة قالوا لي ما عندنا ليك رقم وظيفي
قلت ليهم : كيف الشورة ؟
قالوا لي تسجل إسمك وتنتظر
قلت ليهم أنتظر قدر شنو ؟
الموظفة قالت لي : سمعت بالدكتور الغرق في بربر داك
قلت ليها : ايوة ، الله يرحمو
قالت لي : ده آخر رقم وظيفي فضي ، واديناهو دكتور كان منتظر 8 شهور
يعني عشان اشتغل دكتور عمومي بمرتب 500 جنيه في ولاية نهر النيل كنت لازم انتظر دكتور يموت أو أتوكل واشيل سكيني وأبعج واحد منهم
___________________________________
قوض خيامك عن ارض تهان بها *** وانصب فإن لذيذ العيش في النصب
وارحل إذا كانت الأوطان مضيعة*** فالمندل الرطب في أوطانه حطب
| |
|
|
|
|
|
|
|
|
|
Re: يا أخوانا بجد كرهت السـودان وداير أمرق أي حتة , إن شاء الله أمريكا زاتها !!!! (Re: Hisham Ibrahim)
|
الأخ/ أحمد موسى
تحياتي
لمن قلت ليك ( تمرق من ذنوبك)، قد وصلتك رسالتي تماما
| Quote: آمين، تصدق يا حماد كلامك ده نبهني إنو إحتمال يكون الحاصل لي ده تطهير ؟؟؟ |
أحيانا تلقى الواحد عايش في غاية السعادة، تقوم ذنوبه تعتر ليه، فيسعي بظلفه لشقاوة ما أنزل الله بها من سلطان
وأحياناواحد ما يشكر النعمة فيحسد نفسه ويجدها طارت لجزر الواق واق. وتقريبا دي حال كثير من المغتربين، وأحسبني
واحدا منهم، وبعد ما تقع الفاس في الراس، يحلك الحل بلة.
دم طيبا وإرتع بمهلة والباب البجيب الريح سدو وإستريح.
وبالمناسبة ما تغرك الغربة، كضـــب ساكت، وسماح النبق في الطبق.
وخاصة بعد التقسيم الإضطراري للأسر بسبب الجامعات، والأصعب لمن تكون من تتعلم بنت، تحتار تسوي شنو؟؟؟
ترسلها وحدها مشكلة، ترسل معها أمها مشكلتين، تعود نهائي أم المشاكل .... أحمد ربك عديل وأسكت...
| |
|
|
|
|
|
|
|
|
|
Re: يا أخوانا بجد كرهت السـودان وداير أمرق أي حتة , إن شاء الله أمريكا زاتها !!!! (Re: حماد الطاهر عبدالله)
|
Quote:
أحيانا تلقى الواحد عايش في غاية السعادة، تقوم ذنوبه تعتر ليه، فيسعي بظلفه لشقاوة ما أنزل الله بها من سلطان |
والله يا حمّاد إنت زول صالح
صدقني
تعرف ؟؟؟؟
كلامك ده أخطر من كلامك ده
والله كدي أختك صاحبي وأحكي ليك وللتانيين
وحأضطر أأجل إيميل هشام ميرغني البكاني
وخلاني أفكر ... كيف أراضيك ياوطن ؟؟؟
كيف أتوب من ذنبي فيك ؟؟؟
الظاهر البوست ده عمل ردود أفعال مختلفة على عدد من القُراء
ومنهم صديقي هشام ميرغني
وللأسف سار البوست في مسارات أدخلتني مع الوطــن في أزمة
فهي بلادي
علمتني
ربتني
منحتني الامان
والإنتماء
لذا فإني احبها حد المرض
وسأعود لذلك ...
المهم يا حماد كلامك الاول وقفني , التاني وقفني اكتر وصدقت فيهم الإتنين
أها أنا (محامي) والمحاماة زي مابقولوا ماشة معاي باسطة والحمدلله
وربنا رازقني منها كويس خالص
ساكن
ماكل
شارب
راكب عربية
الحمدلله ... ماقصّرت معاي بتاتاً ...البوديني أتشالق شنو ؟؟؟
الرسول (ص) قال (من رُزِق منكم من باب فليزمه)
البخليني ما ألزمه شنو ؟؟؟؟
البوديني أتشوبر شنو ؟؟؟؟
وزي ماقلت أنا بجد كنت عايش في غاية السعادة
البوديني بظلفي لشقاوة ما أنزل الله بها من سلطان شنو ؟؟؟
إنت محامي خلاص امسك قوي ما تفرط
ما تتشوبر وتمشي بظلفك تقول داير أتوسع وأوسع وأستثمر مال
مالك ومال الإستثمار ؟؟؟
دي فرشـــة وبجيها تاني وبجي لإيميل هشام ميرغني البكاني !!!!
| |
|
|
|
|
|
|
|
|
|
Re: يا أخوانا بجد كرهت السـودان وداير أمرق أي حتة , إن شاء الله أمريكا زاتها !!!! (Re: Ahmed musa)
|
سؤالين :
من ينظّر لحرزب المؤتمر الوطني ؟؟!
من يحكم البلد ؟؟!
السؤال الأخير تتباين حلوه الآراء
فمن يقول هي الأجهزة الامنية
ومن يقول بل الحركة الإسلاممية
ومن يقول بل هما معاً
ولكن مايحيرني أنا من ينظِّر للحزب ؟؟!
ومن يرسم له سياسته الإقتصادية ؟؟!
التمكين بالخدمة المدنيةأساء للحزب
أفقده شرفاء وأكسبه ( نفعنجية)
الهيمنة على الخارطة الإقتصادية أشعل بارود الغضب
كيف ؟؟!
لنفترض انك شيخ (جزاك الله خير)
وأنا (عنقالي) تباً لي
ونحن نعمل في مجال تجارة الرملة الحمراء
أنا أورد رملة حمراء للمنازل تحت التشييد
وأنت تورد للمؤسسات الحكومية
لأنك (جزاك الله خير) وأنا (تباً لي)
ممنوع إقترابي أو تصويري للمؤسسات الحكومية
أنت تنفذمشروعات كبيرة
وأنا زول رزق اليوم باليوم ...
أها ... تجي الرسوم المفروضة على تجارة الرمل
ونقول هي 30.000 سنوية
وهي حق للدولة مؤكد وواجب
أها الشيخ (جزاه الله خير) تحصل ليه إمتيازات
وربما إعفاءات
والدولة تحتاج لهذه الـ 30.000 جنيه
تتلفت الدولة
تنظر يميناً
يساراً
لا مناص إلا بإلزامي أنا بسداد هذه الـ 30.000 جنيه
تباً لي
وللرملة
فأتركها ... وأهاجر لضل عطالة أقعد فيه أشكي وأبكي وألعن سنسفيل النظام
أها دي نظرية إقتصادية صحيحة ؟؟!
لسع جاييكم تاني أصبروا ... !!!
| |
|
|
|
|
|
|
|
|
|
Re: يا أخوانا بجد كرهت السـودان وداير أمرق أي حتة , إن شاء الله أمريكا زاتها !!!! (Re: Ahmed musa)
|
عارف يا سيد أحمد، عندي صاحبي بريطاني دكتور في الادارة العامة، مرة بنتناقش حول سؤال محدد "هل الاصلاح الإداري شرط من شروط التنمية أم أنه نتيجة من نتائجها؟". الاصلاح الإداري طبعاً بيشمل مكافحة الفساد، فصاحبي دا وجهة نظره إنو النزاهة وانخفاض معدل الفساد هو نتيجة من نتائج التنمية، وليس شرطاً من شروطها، وطبعاً أنا واقف عكسه تماماً وبفترض إنو مكافحة الفساد أول، أها قمتا قعدتا زي ساعتين كدا أشرح ليهو في الحاصل في السودان، والتجارب المريت بيها، والقصص القاعد أسمعها عن الفسـاد في السودان، وصاحبي فاتح خشمو ومقلع عيونو ! عارف قال لي شنو بعد انتهيت ؟
"There is a difference between corruption and organized crime"
| |
|
|
|
|
|
|
|
|
|
Re: يا أخوانا بجد كرهت السـودان وداير أمرق أي حتة , إن شاء الله أمريكا زاتها !!!! (Re: ود شاموق)
|
| Quote: "There is a difference between corruption and organized crime |
لاحول ولاقوة إلا بالله !!!!
يعني يا ود شاموق نحن جريمتنا المنظمة دي مدلعينها ؟؟!
وزايدنها كوز موية للتخفيف ؟؟!
والله يا ود شاموق أما قناعتي بلدنا دي فيها فريقين
فريق مخلص بجد للإصلاح وداير يعمل تنمية
وبعتقدصادقاً إنو التنمية هي الأمن الإجتماعي الحقيقي
وفريق داير يلغف والسلام
وبعتقد البلد دي ضيعة حقته
يشيل اليشيله ومافي زول يسأله
وده بحارب النظام الهو شغال معاه
لأنه بزيد الغبن والضيق داخل النفوس
وبهيئ البلد للإنفجار قُصاد مصالح ذاتية ضيقة
تعرف يا ود شاموق
نحن زماااااااااان كنا دايرين نعمل تجار
وفتحنا كنتين صغيروني كدة
أها جبنا فكرنا نفذناها ...
قلنا نجيب باقة الزيت ومانربح في الزيت نبيعه بسعر تكلفته
وبقينا نربح في الباقة بس
تصدق القصة دي نجمت وبقينا نبيع كمية من باقات الزيت في اليوم
الربح زاد والدكان إستمر زمن طويل جداً
أها ناس افريق التاني دي ناس ألغف قبل أن يرتد إليك طرفك ديل
لو ربحوا بس في الباقة بدوا النظام ده عمر طويل جدا ...!!!!
| |
|
|
|
|
|
|
|
|
|
Re: يا أخوانا بجد كرهت السـودان وداير أمرق أي حتة , إن شاء الله أمريكا زاتها !!!! (Re: Ahmed musa)
|
وكتب ايمن دياب ما اراد كتابته هارون دياب
Quote: كلام محبط بالجد ومخيف بالنسبة لينا المقيمين خارج السودان..
السودان جميل وقضيت فيهو آخر إجازة في الضحية الفاتت واستمتعت جداً
بوجود الاهل واللمة.. لكن لاحظت حاجات كتيرة اختلفت..
حتى الشوق بقي خفيف وسلام الناس عادي كأنك جاي من الخرطوم..
واحد صاحبي قال مفروض زيارة السودان ما تزيد عن أسبوعين..
وبعدين دار الغربة (ما بترحم).. والضغوط حاصلة..
ايه العمل..؟ |
مولانا احمد موسي
مشتاقين يازول ياجميل
ياخي حسع السودان الشفناهو في الاجازة دي
وانت فيهو ومعاك اللحلوين ديك...يكون بالشكل ده....؟
تصدق انا قعدت معاكم شهرين وجيت يادوووووووووووب
بس مفكر جدا اني اجي اعيد الضحية معاكم
تجي تطمم بطنا بي كلامك الفوق داك .
ياحبيب....
ماضاقت الا لتفرج
كل الود
| |
|
|
|
|
|
|
|
|
|
Re: يا أخوانا بجد كرهت السـودان وداير أمرق أي حتة , إن شاء الله أمريكا زاتها !!!! (Re: Ahmed musa)
|
الأستاذ احمد تحياتي
اشعر بالحسرة عندما اشاهد الحملات الأنتخابية هنا في امريكا حيث المرشح يبذل مجهود فوق طاقة البشر العادي حتى يقنع الناخبين بأنتخابه وعندما ارى الأعلام هنا في قمة التيقظ والأبداع وهو يأتي بالمعلومة الدقيقة والوافية عن القضايا التي تهم الناس ليس فقط على المستوى الفيدرالي بل على مستوى المحليات.
اي شخص يرشح لمنصب عام يتم تمحيص تاريخه وتكفي اي هفوة بسيطة لأستبعاده تماما وتدمير مستقبله السياسي. انتحر قائد البحرية في عهد الرئيس كلينتون عندما تم اكتشاف انه يرتدي ميدالية صغيرة لم يستحقها في سنوات خدمته الأربعين.
في عام 2004 حكمت المحكمة العليا ضد ادارة بوش بخصوص سجين غوانتانمو ياسر عصام حمدي السعودي الذي ولد على الأراضي الأمريكية وغادرها وهو بعد طفل صغير. عندما اكتشفت مسألة مكان ولادته تم نقله من غوانتانمو الى سجن داخل امريكا. حاولت ادارة بوش التأكيد على ان من حقها التنفيذي تعطيل حقوق مواطنيها الدستورية ولكن قضاة المحكمة العليا فندوا هذا الرأي وأكدوا ان حالة الحرب ليست مبررا لأنتهاك الدستور وحقوق مواطني الولايات المتحدة. والغريب ان تسعة منظمات امريكية قدمت عرائض (amici curiæ) لدى المحكمة العليا دفاعا عن حقوق حمدي وضد ادارة بوش منها اللجنة اليهودية الأمريكية!
اتمنى في يوم من الأيام ان يصل السودان الى هذا المستوى من الرقي السياسي حتى يحس المواطن بأن هذه البلد ملك له وليست ملكا لأقلية سياسية او عرقية او دينية تحتكر السلطة والثروة وهو الأحساس الذي اورثك هذه الحالة من الضيق. و اؤمن جازما ان السودان لايستحق اقل من هذا.
في احد البوستات و في فترة الأنتخابات اقترخ احد الأخوة ان يناظر الرئيس البشير بقية المرشحين على الهواء فرد عليه احدهم قائلا "بالله حاجات بوش وبلير دي ماتجيبوها لينا هنا"! يعني بالنسبة له اصبحت العملية الديمقراطية ومواجهة الجمهور مفاهيم غربية ومنافية للقيم السودانية! هذه العقلية هي التي تعطي الحياة للنظم الأستبدادية.
| |
|
|
|
|
|
|
|
|
|
Re: يا أخوانا بجد كرهت السـودان وداير أمرق أي حتة , إن شاء الله أمريكا زاتها !!!! (Re: Wasil Ali)
|
الاخ العزيز أحمد موسى
لك التحية والاحترام
موضوع بوستيك جميل وجذاب
وعنوانو في السلك
لكن شايفو رجل هنا ورجل هناك
مرة جدية في الطرح
ومرةهزار
ومرة حبة سياسة
انا في الحقيقة عايز أستفيد
لمن واحد من جوه السودان ينتقد البلد من وجهة نظر واعية ومتأملة كلنا نستفيد
قرض على كده عليك الله
هاك الجدية دي
الكثير من المغتربين
في السعودية
ومن أصدقائي
الذين تتقاطع خططهم الشخصية مع ما يدور في الوطن
يتبنون هذه الايام فكرة أو مبدأ
خطييييييييييير
يقولون
لا تخطط لاي شيء في السودان خلال العامين القادمين
يعني لو داير ترسل ولدك أو بنتك يمشي يقرا في السودان
رسلو أية حتة تانية
ما تمشي إجازة للسودان خلال العامين القادمين
وجيب أمك والله أبوك حج والله عمرة والله جيبهم في سوريا أو مصر
وكفي الله المؤمنين شر ( الاستفتاء )
لو داير تشتري ليك بيت في السودان أو واطه الايام دي
أجل الموضوع كده كمان سنتين
وإشتري شقة في مصر أحسن ليك
لو قاعد تبني ليك في بيت
وقف لغاية هنا وبس
خلينا نشوف اللمة دي راح تنتهي على شنو
لو قاعد ترسل قروش للسودان بشكل منتظم
الفترة الجاية ما معروف ترسل كم ؟ وكم سعر التحويل ؟
رأيك شنو في الطرح دي
يا سيد هذا البوست الرائع
تحياتي
| |
|
|
|
|
|
|
|
|
|
Re: يا أخوانا بجد كرهت السـودان وداير أمرق أي حتة , إن شاء الله أمريكا زاتها !!!! (Re: كمال الشادي)
|
امين احمد محجوب صديقي كان عسكري شاطر
بداها من كورة الشُراب (الكديت) في الثانوي
مع عمنا بابكر رزقالله الزاكي طمل
ومن منا لا يعرف عمنا بابكر رزقالله الزاكي طمل ؟؟؟؟
هو مُعلم التربية العسكرية في الخرطوم القديمة الثانوية
تخرج على يديه عدد من العسكريين
وكان إلتحاقك السابق بالتدريب العسكري بالخرطوم القديمة رصيد إضافي لك
يجعلك مقبولاً بالكلية الحربية
هو حفيد الزاكي طمل
زارني صديقي امين احمد محجوب يوم امس
ليُفجعني بوفاة العم بابكر رزقالله الزاكي طمل
في ب21/7/2010 في رواية محزنة سأعرض لها
فهي جزء من تاريخنا وحاضرنا ومستقبلنا
الهام كنّا نتحدث عن حال البلد
وهو للعلم مهندس كمبيوتر شاطر جداً
حاول إنشاء مشروع صغير ... وفشل وبالنهايات لجأ للوظيفة
موظف كمبيوتر بالامم المتحدة ثُم بشركة بترول صينية
كنّا نتحدث عن إستحالة إنشاء مشروع صغير بظل القوانين الراهنة
فضحك حتى إتكأ على جنبه وقال (تعرف الكان بضحكني شنو ؟؟! إنو موظف المحلية يجيك من اول يوم ويكون شايل ليك إنذار نهائي !!!)
ضحك وضحكت وضحك شقيقي الذي كان يتابع النقاش وفيلم في آكشن
قتلنا الهم بالفرح ... وعودة للمحليات !!!
| |
|
|
|
|
|
|
|
|
|
Re: يا أخوانا بجد كرهت السـودان وداير أمرق أي حتة , إن شاء الله أمريكا زاتها !!!! (Re: Ahmed musa)
|
في قانون ولائي عامله مجلس تشريعي ولاية الخرطوم
القانون متعلق بالعوائد
وفيخ جداول لحساب العوائد
بحسب الامتار وضربها في رقم
الرقم المكتوب (3) جنيه
ناس المحلية بيصروا يشيلوا إيجار شهر
برغم إنو القانون ما نص على إيجار شهر ولايوم
لكن من الواضح إنو القانون ما مقنع لموظفي المحلية
وهم مالين يدهم لأن وزارة العدل أدتهم وكيل نيابة
المابدفع يتقبض !!!!
وموش تدفع بحسب القانون (لا) تدفع بحسب تقديرات الموظف
تناقش الموظف بالقانون يقول ليك لا تمشي النيابة
تناقش وكيل النيابة يقول لا امشي المحلية
ويقبضك ... ويفتح ليك بلاغ تحت المادة (7) من القانون
ترجع للمادة (7) من القانون
لا تلقى فيها قبض
لا تلقى فيها بلاغ
تلقى القانون واضح
تدفع
ماتدفع تُنذر
ما تدفع تمشي المحكمة وهناك تقدم دفوعك ومنازعتك أو ماتقدم
أها من وين جاب السيّد وكيل النيابة فتح بلاغ ؟؟! ماتعرف !!!!
وليه كموظف المحلية ماداير يحترم القانون ويحتكم ليه ؟؟؟ ماتعرف!!!
ومنو البراقب ومنو البحاسب ؟؟؟ ماتعرف !!!!
| |
|
|
|
|
|
|
|
|
|
Re: يا أخوانا بجد كرهت السـودان وداير أمرق أي حتة , إن شاء الله أمريكا زاتها !!!! (Re: Ahmed musa)
|
الأخ /أحمد
طيب التحايا لك ولزوارك
Quote: أها محاربة الفساد
ثُم محاربة الفساد
ثُم محاربة الفساد كلكم تجوا ترجعوا هنا وتشتغلوا
وتعملوا لينا طبق البيض هُوادة مع الجدادة ...!!!! |
محاربة الفساد تعني محاربة النظام لأن الفساد ليست في الأشخاص القائمين على أمره بل في النظام الsystem نفسه فانت لا تختلف عن عمر البشير ولا نافع وكذلك انا إذا وضعنا أنفسنا في نفس ظرفيهما فاهم آليّة لدرء الفساد هي توازن القوة وهذا ما يفتقر إليه النظام تماماً الذي رجح ميزان القوة لمصلحة القائمين عليه ، المعني أخي أحمد إن أردت محاربة الفساد عليك بتغيير النظام فهل تستطيع تحمل تبعات هذا الأمر أم أنك ستمارس فهلوة المتعلمين التي نعرفها وتتغاضى عنها وتشوف مصالحك الشخصية !!!؟
Quote: عارف يا سيد أحمد، عندي صاحبي بريطاني دكتور في الادارة العامة، مرة بنتناقش حول سؤال محدد "هل الاصلاح الإداري شرط من شروط التنمية أم أنه نتيجة من نتائجها؟". الاصلاح الإداري طبعاً بيشمل مكافحة الفساد، فصاحبي دا وجهة نظره إنو النزاهة وانخفاض معدل الفساد هو نتيجة من نتائج التنمية، وليس شرطاً من شروطها، وطبعاً أنا واقف عكسه تماماً وبفترض إنو مكافحة الفساد أول، أها قمتا قعدتا زي ساعتين كدا أشرح ليهو في الحاصل في السودان، والتجارب المريت بيها، والقصص القاعد أسمعها عن الفسـاد في السودان، وصاحبي فاتح خشمو ومقلع عيونو ! عارف قال لي شنو بعد انتهيت ؟
"There is a difference between corruption and organized crime" |
ود شاموق تحياتي والله العالم وداري قبل ان أن أقرأ تعليق صاحبك الانجليزي كنت على يقين ان الرجل يتحدث من مربع 300 سنة سيرورة وأنت من زيرو كبير وتبليطة خلف مضيق فرانسيس فوكويا وقد عبرت القوافل المضيق إلي السهل المنبسط قول ليهو يا راجل نحن وين وانتو وين عشان تقول لي النزاهة بتجي بعد التنمية مش نعمل نظام زي العندكم أول و بعدين نتحدث عن ظروف الرفاهية البتخلي الواحد نزيه !!!.
Quote: يا ود موسى
بي صقر جديانكـ دا ( الجواز) ...
أحسن ليكـ من ميسكـ دا ما تتحركـ ..
خليكـ في الحُـفره دي لمن يريد الله امراً كان مفعولا ... |
أما هذه النصيحة فهي غالية جدا أخي أحمد وأمسك فيها عشرة لأنك لو طلعت حاتلاقي زميلك الأقل منك كفاءة من الجنسيات الأخرى بيقبض شي وشويات كما حكي لي مولانا أمير الله يعطيه العافية زميله الأردني 14000 وهو 8000 , وقسما عظما محاسبين أحدهما مصري والآخر أردني الأول 26 عاما والثاني 25 عاما مواليد 85 راتبه 13600 ريال بينما أحد إخواننا السودانين في أو ل الخمسينات ولديه شهادة زمالة ويعمل مديرا ماليّاً لثلاث شركات راتبه 10000 ريال طبعا في ناس قدام في ظائفهم قبل مجيئ الإنقاذ رواتبهم كويسة بحكم قدمهم وسمعة السودانيين القديمة ,ده غير إنو أستاذنا الجامعي لا يسوى أكثر من زول يقابلك الطفل الصغير وانت تتسوق فيأخذ راحته على الآخر ويكلمك بمنتهى الصفاقة وكأنك كنت تجلس بقربه في صف الدراسة والجمع عندهم لوصف السودانيين أو الحديث عنهم ( الأزوال أو الزوّلة ) والله سفيرنا لو نزل السوق لن يجد غيرها .
أبو حمـــــــــــــــــد
| |
|
|
|
|
|
|
|
|
|
Re: يا أخوانا بجد كرهت السـودان وداير أمرق أي حتة , إن شاء الله أمريكا زاتها !!!! (Re: عثمان عبدالقادر)
|
| Quote: ود شاموق تحياتي والله العالم وداري قبل ان أن أقرأ تعليق صاحبك الانجليزي كنت على يقين ان الرجل يتحدث من مربع 300 سنة سيرورة وأنت من زيرو كبير وتبليطة خلف مضيق فرانسيس فوكويا وقد عبرت القوافل المضيق إلي السهل المنبسط قول ليهو يا راجل نحن وين وانتو وين عشان تقول لي النزاهة بتجي بعد التنمية مش نعمل نظام زي العندكم أول و بعدين نتحدث عن ظروف الرفاهية البتخلي الواحد نزيه !!!. |
عزيزي عثمان، الراجل دا طبعاً ما كان بتكلم عن بريطانيا، كل كلامنا كان محصور حول تجارب الأمم النامية، وبالتحديد التجربة الصينية والهندية، حيث الفساد والتنمية يسيران جنباً إلى جنب دون أن يعوق أحدهما مسيرة الآخر ! لكن الحاصل في السودان عندنا مختلف حيث لا نزاهة لا تنمية لا أخلاق لا تربية، وهنا مربط الفرس، إنو الحاصل في السودان ليس له علاقة بما يحدث في العالم، والسبب الرئيسي هو أن دول العالم النامية لديها حكومات، اما نحن فلدينا عصابة .
| |
|
|
|
|
|
|
|
|
|
Re: يا أخوانا بجد كرهت السـودان وداير أمرق أي حتة , إن شاء الله أمريكا زاتها !!!! (Re: Ahmed musa)
|
Quote: واحد صديقنا كان مقيما هنا بالسعودية ولديه شركة دعاية وإعلان
نقل استثماراته للسودان ولمع اسمه ﻷنه كان مهادنا
ولكن مع حمى الانتخابات فلت لسانه وذكر الحكومة بكل شر
فكانت المفاجأة الرقم الفلكي الذي قدر عليه كضريبة (ملايين من الجنيهات)
فطفق يذهب هنا وهناك من معارفه من الحكومة التي كانت وإياها سمل على عسل
ولكنه لم يجد أي أذن صاغية ولم يكن أمامه من بد سوى الدفع وخراب البيت
|
والله يا جعفر ياخوي دي المشكلة
زي كأنوا الحكومة دي بتتعامل بردود الأفعال
أنا بصراحة كنت من المتفائلين بقدرة البلد على النهوض
وكنت من المنافحين والمدافعين هنا عن ضرورة إتاحة الفرصة للتنمية لبلوغ مقاصدها
وكنت واثق من تغليب صوت الحكمة على صوت الضغينة
يعني مثلاً أنا (ضدك) سياسياً
لكني تاجر شاطر جداً وصناعي متميز ومقدم خدمة ليك
في تطوير الإقتصاد والصناعة
أها تقوم تساعدني ولا تعاكسني ؟؟!!
انا بعتقد الزول الهو ضدك وبخدم خطك إقتصادياً ولا إعلامياً ولا سياسياً مفروض تساعده
موش تكسره وتصر على الهيمنة
يامعانا ياضدنا
ولو ضدنا الدولة كلها تبقى ضدك
عليكم الله ما حاجة تغيظ ...؟؟؟!!
| |
|
|
|
|
|
|
|
|
|
Re: يا أخوانا بجد كرهت السـودان وداير أمرق أي حتة , إن شاء الله أمريكا زاتها !!!! (Re: عثمان عبدالقادر)
|
اﻷخ أحمد موسى
الجاتك في مالك سامحتك ولكن
الجاتك في بلدك ما سامحتك
هذه المعاناة موجودة ومستمرة منذ مولد اﻹنقاذ
منذ أن قال يوسف عبد الفتاح : من أراد أن تثكله أمه فليقفل متجره أو مخبزه
ولكن يبدو أن حلقتها تتسع كلما ضاقت البلد
واحد صديقنا كان مقيما هنا بالسعودية ولديه شركة دعاية وإعلان
نقل استثماراته للسودان ولمع اسمه ﻷنه كان مهادنا
ولكن مع حمى الانتخابات فلت لسانه وذكر الحكومة بكل شر
فكانت المفاجأة الرقم الفلكي الذي قدر عليه كضريبة (ملايين من الجنيهات)
فطفق يذهب هنا وهناك من معارفه من الحكومة التي كانت وإياها سمل على عسل
ولكنه لم يجد أي أذن صاغية ولم يكن أمامه من بد سوى الدفع وخراب البيت
Quote: المؤتمر الوطني حزب بالغ القساوة في تعاملاته السياسية
دخل السياسة بفكرة صهيونية تقوم على السيطرة على الإقتصاد
وبقت شيلني كحزب وأشيلك كمستثمر
دخل عدد من الإقتصاديين والمستثمرين السياسة خربوا السياسة
ودخل عدد من السياسيين السوق وخربوا السوق وخرب البلد ... |
هذا جزء من الفكرة السيئة وليس كلها
زميل الدراسة الذي لم يكمل المرحلة الثانوية دفع مبلغ 20 مليون بالقديم للحزب
فكانت المكافأة معتمد بإحدى المحافظات !!!
| |
|
|
|
|
|
|
|
|
|
Re: يا أخوانا بجد كرهت السـودان وداير أمرق أي حتة , إن شاء الله أمريكا زاتها !!!! (Re: محمد البشرى الخضر)
|
Quote: أحمد موسى الله يسامحك انت برضو
إحنا ياخي المصبّرنا على وجع الغربة الأمل في نهايتها و النظر لحال الفي البلد
متمتعّين و حامدين ربهم وشاكرين
النوع البقول ليك السعودية دي كان جاتني هنا في خشم الباب ما بمشيها افوت البلد دي وين أنا
زي دا بطمّني و بخلّي الأمل عايش |
ودالبشرى ياحنين
وياراقي
والله كلامي ده ما تاخده محمل جد
ده قهر
وصدقني انا لو جاني السفير السعودي
دق الباب
وحرقتو الشمس
رجع قعد في عربيته
وقالوا ليه انا في الحمام
وإنتظرني
واداني عقد عمل مابمشي
بجد بلدي هي اماني المفترض
لكن مرات القهر يخليك تكره بلدك
يكرهوك ليها ناس زي الدايرين تكرهها
بلدنا مازالت بخيرها يا صديق
والجاي احلى على قول نعيم
| |
|
|
|
|
|
|
| |
Ahmed musa
omer osman
محمد عبد الماجد الصايم
doma
فايزودالقاضي
حماد الطاهر عبدالله
عبداللطيف محجوب
حسبو عكاشة
منتصرمحمد زكى
نادر النور آدم
وليد عبد اللطيف
محمد البشرى الخضر
بشير أحمد
cantona_1
شمائل النور
أيمن الطيب
Tumadir
Safia Mohamed
مرتضى احمد عبد القادر
عزان سعيد
كمال الشادي
Hisham Ibrahim
ود شاموق
عبد العظيم احمد
haroon diyab
Wasil Ali
عثمان عبدالقادر
جعفر محي الدين
إدريس محمد إبراهيم
فيس بوك
تويتر
انستقرام
يوتيوب
بنتيريست