|
|
 يا وليد: ممنوع الحداد لامن نعدل الصورة
|
الأخ وليد
سلام و أشواق و شكر على هذا النظم فى بوست الأخ منصور, مسادير.
Quote: جيتكم شايل اقلام الشعر مكسورة
شيف زي فجيعة بورسودان محضورة
كلاشنكوف بقابل وردة او عصفورة
حيكومةالبلد اللاعبه بيناالكورة
ممنوع الحداد
_____________________________
هل يعقل مجازات الحجر جبخانة
قرتيق المسيرات قنبلة رمانه
من اولاد البلد تتملي الشفخانة
منو الرفع البلد ومين الخانا
يتكال الرماد |
وكانت فكره جميلة لإفراد هذه المساحة لتسجيل خواطر عن مذبحة بورتسودان
فأتمنى أن يكون هذا البوست ملكك تحرسه و ترفعه بما أشهده لك من نشاط فى المشاركة. و هذه مساهمتى و التى كتبت جزء منها فى مسادير:
حكومة البلد بى سوأتا المضمورة
قايلا الدنيا دايمه وبيها كم مغروره
إن طال الزمن دول الأيام, مكروره
يمهل ربى مابهمل نفوس مغروره
_________________________________
مابنعلن حدادنا و النفوس مقهوره
بورسودان بلد عزه واسودا هصوره
جيوش ادروب تقابل نارا كاشفا صدورا
ممنوع الحداد لامن نعدل الصوره
________________________________
مات ابو فاطنه شامخ فى كرامه وعزه
عوجات مافى من تحتو الارض تهتز
ادروب يحكى جرحو الغار ودمو النز
حكاية والى مرعوب من هديرن فز
____________________________
والى اليابا قالن ليهو أخوات عزه
دا الكاشف عروضن ولى قرينن جز
لامن جض برتين الحرابة و رز
ادروب حفلن شكره وعليهن هز
مع خالص تحياتى
|
|
 
|
|
|
|
|
|
|
|
Re: يا وليد: ممنوع الحداد لامن نعدل الصورة (Re: khider)
|
الحبيب خدر
لك التحية و الإحترام
أقرأ لك كثيرا وأعلم أن قلمك صادق يحيى ميت الشعور.
لست بشاعر و لكن يمكن أن أعبر عن نفسى شعرا عندما يكون الجرح نازفا.
أبك ياخدر واجعل قلمك يبكى فوالله من لم تبكيه حال وطننا الآن لا قلب له.
ليه ما نبكى ياخدر الظلم بطال
وفى الشرق الحبيب سال الدمع هطال
دارفور شافعة مكسوره وعلاجا محال
وارقين باكية ثكلى وحالا نفس الحال
| |
|
|
|
|
|
|
|
|
|
Re: يا وليد: ممنوع الحداد لامن نعدل الصورة (Re: وليد محمد المبارك)
|
بشر وقال دبايوا وتانى هش وبش
جوا الحاره تلب-ياوليد- دون رعشه
دم ابو فاطنه فى طرف المداين رش
سلم روحو بالدنيا ام قدود ماانغش
________________________________
بورسودان هيجى وفورى و اكرجى ضرسك
ادروب هب يوم الحاره جمل عرسك
الباغى اللعين يوم قاد جيوشو يفرسك,
ما قرا فى الصحف ود دقنه جمل غرسك?
| |
|
|
|
|
|
|
|
|
|
وليد (Re: Balla Musa)
|
مفاجاءة من العيار الثقيل
شعر وليد
انت عندك شعر زى دا جميل
اها انا تانى حاتابع مداخلاتك برؤية جديدة
بله والشعراء هذا عطاء رائع
واصلوا كشف الزيف والظلم والعدوان
| |
|
|
|
|
|
|
|
|
|
Re: وليد (Re: الجندرية)
|
يا ساسة بلادي شكيتكم للعظيم الخالق
شكيتم شكيت زول مغبون حاقد وحانق
عشان كرسي السياسة علقتوا لينا مشانق
لا سلم العجور لا الصغير لا البالغ
ولا الفي المهاد
| |
|
|
|
|
|
|
|
|
|
Re: وليد (Re: mohmmed said ahmed)
|
ده ياني انا وده العندي ما غيرتو
بحب بلدي وتراب بلدي ما ودرتو
بكره اي كضاب اعفصه وادوسها نخرتو
ولو دار الكوار بلاعبه وبرضو بخرتو
ما جف المداد
| |
|
|
|
|
|
|
|
|
|
Re: وليد (Re: Rawia)
|
*******************************
كان بالك علينا يا أدروب أدمدم نوم
خليهو النكد لبلدنا أنهض قوم
بكرة الصقير بي فوقكم يبقي يحوم
والدابي البيلسع سمو جاتو سموم
******************************
غلطانة الحيكومة وياها كوم اللوم
كرار يا عوافي وماتنوم مهموم
ويوسف في السجن قبالنا كان مظلوم
الحق ياهو ظاهر لابد أن يبين الزوم
*********************************
الشعب دابي ينتر حاشاهو تب مابخاف
ولو كتر العدو إن شاء الله كان ألآف
يقضاهم جميعا لا زول سمع لا شاف
والنيل بي حنانو يمسح التجفاف
| |
|
|
|
|
|
|
|
|
|
Re: وليد (Re: Sidig Rahama Elnour)
|
النيل لونه احمر من فعايل احفادو
اندك جبل التاكا حين شاف ظلم اولادو
يدهشني زول بحكم كيف يخونا بلادو
بدل ضمة حنان يفشها فينا كل احقادو
ما يلقى المراد
| |
|
|
|
|
|
|
|
|
|
Re: وليد (Re: وليد محمد المبارك)
|
الأخوة خدر ,وليد , محمد و صديق
و الأخوات الجندرية و راوية
تحياتى لكم/ن وواصلوا جاييكم
الجندرية و راوية ذكرتونى شغبة المرغمابية كانت لا تقل عن الفوارس بل تزيد.
بجيكم راجع
| |
|
|
|
|
|
|
|
|
|
Re: وليد (Re: Balla Musa)
|
يا ود موسى امشي وعود البكان محروس
ما شفت البلد يقدل فيها الورل ويحوس
اللدر سيد الدميره في الشرك محبوس
وتسرح في البلد شلة كلاب ونجوس
رجالتها في العتاد
| |
|
|
|
|
|
|
|
|
|
Re: وليد (Re: Balla Musa)
|
ياعم موسى شوف البلة ولدك جار
ظلمنى ظلم شديد وجعنى وجعا حار
قال لشخصى قولا اثرو زى النار
لكن برضو قلبى بيقبل الاعذار !
العزيز بلة موسى ارجع للردود وحاتلاقانى رديت وقلت ليك بنفس القافية ختاما :
البلد الحبيب مين البيعدل مايلو
صارى الحزن ابدا فى حشاهو وشايلو
الزول الظلوم حتما تظلمو فعايلو
فى يوما قريب بيبهدلنو عمايلو
| |
|
|
|
|
|
|
|
|
|
Re: وليد (Re: نادية عثمان)
|
Quote: البلد الحبيب مين البيعدل مايلو
صارى الحزن ابدا فى حشاهو وشايلو
الزول الظلوم حتما تظلمو فعايلو
فى يوما قريب بيبهدلنو عمايلو |
الزول الظلوم يا ناديه قرب يومو
لو عاس فى الشرق ولاهلنا اظهر لومو
باكر فى الحساب ياما بيصغر كومو
الزارع الشقى لابد يسود يومو
| |
|
|
|
|
|
|
|
|
|
Re: وليد (Re: osly2)
|
الزول الظلوم يااوسلى بسالو الله
كتلو اولادنا ليه مسخت علينا الحلة
سودانا الحبيب فوق اصلو مابدّلى
ياود موسى قول سمح السماح يابلة
وعجبى شديد والله!!
| |
|
|
|
|
|
|
|
|
|
Re: وليد (Re: نادية عثمان)
|
Quote: ياعم موسى شوف البلة ولدك جار
ظلمنى ظلم شديد وجعنى وجعا حار
قال لشخصى قولا اثرو زى النار
لكن برضو قلبى بيقبل الاعذار ! |
ن نرجع تانى لى سطرى الكتبتو عتاب
ا الناس ليها بى المعلوم سلام و حباب
د دوبيتك قبيل حييتو دون اسباب
يه يهون لى ناس سلامك غيرى دون حجاب
| |
|
|
|
|
|
|
|
|
|
Re: وليد (Re: Balla Musa)
|
Quote: نرجع تانى لى سطرى الكتبتو عتاب
ا الناس ليها بى المعلوم سلام و حباب
د دوبيتك قبيل حييتو دون اسباب
يه يهون لى ناس سلامك غيرى دون حجاب |
الخبر الجائي من البور قالوا خراب
الناس في حزن زاد العليها عذاب
كتيل النفوس في دينا أصلو مهاب
الحق ما بروح كل شي بيومو عندو حساب
| |
|
|
|
|
|
|
|
|
|
Re: وليد (Re: Sidig Rahama Elnour)
|
الأخ صديق رحمة
لك تحياتى وانحناءة إجلال وإهديك هذى:
هولب لبلبوا تيوس الضلال بى وضوح
وكم فى الخط صناحة فعلهن بتفوح
ركبوا ضهور نفاقن و عوسن المفضوح
ماراعوا العروض , ما حفظوا حرمة روح
| |
|
|
|
|
|
|
|
|
|
Re: وليد (Re: Balla Musa)
|
يراعو العروض !! ديل فوق العروض بيعرضو
البهتك عروضو ما اظن بيحفظ ارضو
لابد يوم حساب كان يابو او كان يرضو
قرب يوم حسابهم وبي لفح السياط ينبرطو
ومشمر الجلاد
| |
|
|
|
|
|
|
|
|
|
Re: وليد (Re: وليد محمد المبارك)
|
Quote: يراعو العروض !! ديل فوق العروض بيعرضو
البهتك عروضو ما اظن بيحفظ ارضو
لابد يوم حساب كان يابو او كان يرضو
قرب يوم حسابهم وبي لفح السياط ينبرطو |
الزول السجم تب ما براعى عروضو
فى ساعة النزال دايما مهلهل عودو
ادروب الشرق لو مات بتبقى وعودو
والروح مابتروح فى شعب صلده حدودو
| |
|
|
|
|
|
|
|
|
|
Re: وليد (Re: Balla Musa)
|
الزول السجم ما براعي ضميرو
مالي كرشو بدم غيرو
ما بهمو كان مات أدروب في الشرق
ولا مات كل أهل السودان في الحرب
| |
|
|
|
|
|
|
|
|
|
Re: يا وليد: ممنوع الحداد لامن نعدل الصورة (Re: khider)
|
ذكرتني ايام الكورة يا خدر
والفريق القومي السوداني تحت 17 سنة سنة 1990-1991
انا سوداني انا
دي الغنية الكنا بنغنيها ونحنا راجعين من التمرين الصباحي من الميدان الشرقي حتى قصر الصداقة
وبتخيل لي سجلنها في التلفذيون لبرنامج عالم الرياضة قبل السفر الى ايطاليا بي يومين وعرضت في نفس يوم السفر الكان جمعة برضو
ليت التلفذيون السوداني يعرضها ان كانت محفوظة
اتاسف على حال الكرة السودانية واحمل نفسي و دفعتي الاسباب
الفرصة كان مواتيه كيما نغير شكل الكره السودانية ولم نغتنمها
| |
|
|
|
|
|
|
|
|
|
Re: يا وليد: ممنوع الحداد لامن نعدل الصورة (Re: Sidig Rahama Elnour)
|
بالدمع الغزير نبكيكا ياادروب
لابد من نشاقق نسلك اقسى دروب
بكره نجيبو تارك وتكتر الحى ووب
والغدرك نعصرو لامن يقول الروب
ما كايسين كتل ، ديل البدوها حروب
وشتتوا شملنا وخلوها هم وكروب
قول ليهم ولادنا بترصوا رص الطوب
ساعة الحارة نبداه الكتل يادوب
وبالصبر الجميل فص الملح بيدوب
ويهنى شرقنا يا بله ويعيش ادروب
| |
|
|
|
|
|
|
|
|
|
Re: يا وليد: ممنوع الحداد لامن نعدل الصورة (Re: وليد محمد المبارك)
|
الشامخه المأصلا فى المعانى فريده
ياطيف الخيال جيب ليا فيها قصيده
فى التاريخ جذورا عميقه حاجه اكيده
مانتكست يمين , خربان فكر مابصيدا
******************************
كم جار الزمن ايام عليها عديده
من ابناها.. كم عانت غباين وغيدا
العاق ان قدح نيرانو فيها يقيدا
تطفى اسبابا بى حكمه وسماحه شديده
*****************************
ولدت و ربت الأجيال عيالا زينه
عند النهمه يلحقوا زى سحاب العينه
إن حر الزمن كشر نوايبو الشينه
كروا وبرزوا قالولك حبابك جينا
**********************************
ولدت.. وربت الأزرق سليل الجنه
والهادى الوسيم ابيض عديم الهنه
جوك.. اتقابلوا فرحه وعناق و محنه
سالوا وفاضوا نيلا خيرو كفى أهلنا
***********************************
سيتيت انزلق من قممو مسرع بارع
والقاش ساعدو مفتوله وقوامو الفارع
سيدون والبطانه و كسلا فيها يضارع
بى مايا نضيف اسقاها احيا مزارع
***************************************
السوباط دلق ماهو البكفى نداهو
والابنوس شرف عزم الهشاب ناداهو
نهر الجور سرف القيف كسر هداهو
داك بحر العرب فات الكرم عداهو
*************************************
فيها الحاضره, فيها الباديه ناس وداب على و حسان
فيها سلام و فيها حباب وفيها عناق و فيا حنان
بالكرم الاصيل قدح المعانى ملان
وحرم فيها تقعد يا عشا الضيفان
****************************************
فيها امدرأمان والخاطر المسموح
وفيها العندليب شارك بلابل الدوح
فيها بنات جبينن ضوا عم السوح
يقابلوك بى نغيماتن ترد الروح
******************************************
فيها مريدى فيها التاكا فيها كريمه
فيها نيالا و الدامر وشندى القيمه
فى دفتر كرام الاصل حلفا قديمه
ود مدنى انبرت حوت المحافل ديمه
******************************************
فيها الساحه, فيها السمحه قلعة ريره
فيها عروس رمالا برا مارق خيرا
فيها سماحه فيها نداوه.. حلوة جيره
فيها شهامه كامله وديمه تنجد غيرا
*******************************************
جبل مره العظيم فيها, وجبل رجاف
فيها سهول وفيها المروى فيها الجاف
برق القبلى هبت لك نسايمو لطاف
والعبادى جاب ريحة الكليت والشاف
*****************************************
فيها العرضه,فيها الرقبه,فيها التله و المردوم
فيها ام كيكى والطنبور والدلوكه و التمتم
فيها المهدى,فيها الضال وفيها العابد القيوم
وفيها شيوخ طريق ياليلى جافوا النوم
*****************************************
فيها سواد و فيها بياض و فيها سمارا, احلى الوان
فيها نسيج فريد صنعة يد المنان
فيها خلاوى فيها اجراس كنايس وفيها صوت آذان
وفيها حلاوة الترحاب وفيها بشاشا فيها أمان
**********************************************
فيها نخيل وفيها حراز وفيها البفره
و السافنا فيها و الصحارى القفره
فيها الكرا فيها الصوله فيها النفره
فيها رجال عيونن حمرا خيلن دفره
********************************************
ما بتستعجل الشينه و طويلة بال
وزى شيخ الطريق فى الحضره صاحبة حال
إن جار الزمن و الحال صبح بطال
تهز الدنيا تتحطم رواسى جبال
*************************************************
كم ياعزه ليك ترخص دمانا تسال
وكم فى هواك صبح مزن العيون هطال
ملينا الرقاد ياعزه نحنا شمال
مديلنا اليمين بينا الفراق قد طال
*******************************************
ما تعابينا والله البنخسر نحنا
من فتناك جار بينا الزمن قمحنا
إن سبتينا خسرانين دلقنا سمحنا
ياغوث عزه ارح عايشين براك فى محنه
**********************************************
عليك ضمينا خلينا الندس عيبتنا
جار بينا الزمن صقر المحن خبتنا
ماحفظناك فيك قصرنا واخيبتنا
أمنا ديمه إنتى و ليك لومنا ثبتنا
**********************************************
يرعاك ربى دايمن فى نعيمك رافله
بالهنا و السلام يارب ايامك حافله
إن فاتك زمن ماتعيشى دهرك غافله
يادار عزه اصحى و قومى الفى القافله
_______________________________________________
بله موسى
فلادلفيا 12-7-2003
| |
|
|
|
|
|
|
|
|
|
Re: يا وليد: ممنوع الحداد لامن نعدل الصورة (Re: Balla Musa)
|
يا بله الشعر هيلك وهيلو سنين
برّد همنا وادينا شعر رصين
ابواتك اسود يا ولدة الزينين
حراس للبلد من رفقة الظالمين
بي نار البلد يا بله متدفين
يوم العرضه تر ورينا لي التفنين
بتجاروا النجوس متل النعام جارين
زمان عندالمخادة الكوكة قلوا تبين
| |
|
|
|
|
|
|
|
|
|
Re: يا وليد: ممنوع الحداد لامن نعدل الصورة (Re: عبدالله وداعه الامين)
|
شوقى مرحبتين حبابك و اليوم السعيد الليلة جابك.
فتحت البوست وجاتنى منو ريحة دعاشاتن ترد الروح فعرفت أن شوقى قد أمطر فأطفأ شوقى.
دخلت عليك كتير فى بوستاتك الشعرية الرائعة و لكن أظن قد كان بك لبس مابين سكوت البالتوك و بلة سودانيزأون لاين.
أحييك و أرجو أن تبرق وترعد و تمطر لتطفئ أشواقنا.
| |
|
|
|
|
|
|
|
|
|
Re: يا وليد: ممنوع الحداد لامن نعدل الصورة (Re: Balla Musa)
|
Quote: شايل سيفو متقفى الأثر أدروب
سابل عرضو فايت فى الصبر أيوب
ثابت زى جبال التاكا مو مرعوب
كيف يتهنى ياهشام و البلد مخروب |
يا ود موسى ما شفت الهلال الهله
روح ادروب تنادى وتسرى فى خلق الله
المر ما بفـــوت ومـن الحلق يـتدله
لازمكم صبر كان انت كان عبد اللــه
| |
|
|
|
|
|
|
|
|
|
Re: يا وليد: ممنوع الحداد لامن نعدل الصورة (Re: osly2)
|
Quote: يا ود موسى ما شفت الهلال الهله
روح ادروب تنادى وتسرى فى خلق الله
المر ما بفـــوت ومـن الحلق يـتدله
لازمكم صبر كان انت كان عبد اللــه |
لايكين الصبر قاصعنو جره و غله
وقايمين ليلنا راجين الفرج من الله
فرعون افترى واستهزا بى دين الله
وين موسى الكليم ماحل وقتو و هل?
| |
|
|
|
|
|
|
| |
Balla Musa
khider
osly2
Rawia
munswor almophtah
mohmmed said ahmed
الجندرية
Sidig Rahama Elnour
معتصم دفع الله
يازولyazoalيازول
خدر
معتز تروتسكى
saadeldin abdelrahman
فيس بوك
تويتر
انستقرام
يوتيوب
بنتيريست