|
|
 من اين لبلدنا ببطارية بعد ما نزلت بطاريتو (مع الاعتذار لساخر سبيل)
|
البطاريات انواع وزمانك عايشت بطاريات منها بطارية راديو خالي في بداية الخمسينات وكانت بطارية عظيمة الجته وتكاد ان تكون في حجم الراديو ذاتوو وبطارية عظيمة اخري كانت بطارية لوري بن عمتي وارد العلميين وهي بطارية هجمة كدة واكبر من شنطة الصفيح ( للاجيال الخمسينية و الستينية والسبعينية )وتلت تلك البطارية بطاريات اصغر شوية ولكن كانت البطاريات والتي ما زالت حتي اليوم هي بطاريات "البطارية" فالتورش في السودان تعظيما للبطارية يسمي بطارية ولقد ظهرت بطاريات كثيرة من ذات البطارية الاسطوانية فمنها AA و AAA و BF ومنها البطارية التي كانت تظهر في اعلان خائب في القنوات الفضائية السودانية وبطارية سوبرمان الاعلانية ثم اتت بطاريات الساعات مع ظهور ساعة سيكو الديجتال في ستينات القرن الماضي وتلي ذلك اسهال من البطاريات اشكال والوان بطاريات لكاميرات وللساعات وللراديوهات وللمعدات الطبية العامة والخاصة ولمنظمات القلوب التعبانة ولكن اكثر البطاريات صيتا هي بطارية يعجب بها ساخر سبيل وكلنا نحن الذين لا نقدر علي ان تنزل مهما كانت الاسباب .. بطارية الموبايل !! .. هذا الانجاز العظيم الذي يجعلك تتحدث وانت في اماكن ليس من المفروض ان تتحدث فيها وامكان لا يجب ان يرن الهاتف فيها .. وانا انتظر كل جمعة امام المسجد الباكستاني القريب وهو يدعو بالاردو المصليين علي "قفل موبايلاتهم " وهنا اعرف ان الصلاه قربت ...ورغم ذلك فهنالك من لا يقفل الموبايل ....
لقد افرد ساخر سبيل عمودا كاملا لبطارية الموبايل التي نزلت وما سببه ذلك من ضيم والم كبير لاصحاب الموبايل فمنهم الذي استصغر حادث لسيارته كاد ان يروح فيها ومنهم من استصغرت المعجنات والمشويات التي التهمها صاحبي "البطارية التي نزلت" ..
وانامتكدر و محتار في بطارية البلد التي نزلت ..... بلد بحاله ومحتاله بطاريتو نزلت ....وبسبب ذلك ربما يقطع كالاسكراب ويوزع علي العالم وجماعة منا في انتظار مفاعليين ذرييين وليس واحدا لنولع البلد بعد ان طلعت بطارية سد مروي نازلة ...
اين لنا بمن يجرج بطارية البلد ونحن اهو قاعديين في الضلمة وخايفيين نرفع صوتنا يمكن يشوفونا الجماعة ما هم بشوفو في الضلمة .....؟؟
واليكم مقالا لساخر سبيل عن بطاريات نزلت ( منقول من الراي العام يوم 25 اغسطس 2010 ):
Quote:
التاريخ: الأربعاء 25 أغسطس 2010م، 16 رمضان 1431هـ
ساخر سبيل
البطارية نزلت
الفاتح جبرا
ذهبت الى منزل صديقى (مأمون) أحمد له السلامة لنجاته من حادث وهو يقود عربته بالقرب من مستشفى أم درمان ، قلت له وأنا أنظر للجهة اليسرى من العربة التى تهشمت تماماً :
- ياخى والله ده حادث كبير .. الحمدلله ربنا شاف ليك وما جاتك حاجه.
قال لى وهو يبتسم ... والله أنا ما غايظنى الحادث بقدر ما غايظنى شئ تانى حصل مع الحادث،
وبدأ يحكى لى :
العربية العملت معاى الحادث دى عربية بتتبع لإحدى الجهات النظامية .. وأول ما الحادث حصل الناس إتلمت كعادة السودانيين .. واحد من الناس خاطب سائق العربة وقال ليهو يا زول إنتا غلطان .. إلا أن أحد الأشخاص (الواقفين)
إنبرى لهذه الشخص ,وخاطبه بلهجة حازمة قائلاً :
- أسكت يا زول .. ما تتدخل فى الموضوع ده.
ولم يكتف هذا الشخص بردع ذلك المواطن بل عندما أراد أحد الجنود الذين كانو بالعربة التحدث امره أيضاً بالسكوت.
يواصل صديقى مأمون قائلاً :
جاءت عربة المرور وقاموا برسم الحادث وطلبوا منا أن نذهب إلى القسم إلى أن سائق العربة (الجهة نظامية) قال بأن لديه مشواراً قريباً هاماً سيذهب له وسوف يلحق بنا فى قسم المرور ، وقد لفت نظرى حينها أن ذلك الشاب ذا اللهجة الحادة قد ركب معهم فى العربة .
ذهبت إلى القسم منتظراً حضور العربة وبينما أنا كذلك دخل إلى القسم ذلك الشاب ذو اللهجة الحادة فقمت على الفور بسؤاله :
- الجماعة ديل وين؟
- قاعدين ينزلو ليهم فى حاجات فى بيت اللواء فلان وح يجو هسه ... إنتا عربيتك مأمنة؟
- أيوه مأمنة تأمين شامل.
- خلاس أنا أمشى أخلى العسكرى المسئول من تقارير الحوادث يجى يعمل التقرير ويمشينا بى سرعة.
يواصل صديقى (مأمون) :
دخل ذلك الشاب إلى مكتب التقارير ومكث بعض الوقت ثم جاءنى فسألته عن تأخر (العربة) قال لى :
- الناس ديل ما مفروض يتأخروا عشان بيت اللواء فلان ده قريب بى جاى .. كدى خلينى أتصل فيهم أشوفهم تأخروا ليه.
- (وهو يمسك بالموبايل والمكرفون مفتوح ) :
- أيوه معاك الملازم ياسر.
- أيوه سعادتك.
- مالكم إتأخرتواأنا منتظركم فى قسم المرور.
- خلاس قربنا ننتهى سعادتك.
- يلا تعالوا بى سرعة عشان أنهى ليكم الموضوع ده.
بعد دقائق .. أخرج الموبايل أيضاً ليتصل لكنه أعاده إلى جيبه ومد لى يده قائلاً :
- لو سمحت يا أستاذ موبايلك أكلم ناس البيت الظاهر (بطاريته نزلت)
يواصل مأمون :
أديتو الموبايل .. إبتعد قليلا وهو يتحدث بيديه فى عصبية ... متجها نحو باب القسم ... إنشغلت عنه بعض الشئ ولما لم يعد للقسم خرجت إلى الشارع ... وفص ملح وذاب !!
بعد قليل حضرت عربة القوات النظامية .. سألت أفرادها :
- يا جماعة الملازم ياسر الكان راكب معاكم ده جاء هنا ومشى يكون راح وين؟
- ملازم شنو ؟ تقصد الشاب الركب معانا العربية من مكان الحادث.
- أيوة !
- ده قال لينا يا جماعة وصلونى قدام معاكم !!
إنتهت (البطارية نزلت) بتاعت أخونا (مأمون) وتعالو معى إلى بطارية نزلت من نوع آخر فقد حكى لى صديقى (مصطفى) وهو يعمل مسئولا عن إدارة أحد المطاعم الخرطومية الخمسة نجوم بان أحد المضيفين قد أخبره بان هنالك فتاة تجلس وحيدة لأكثر من ساعة والدموع تنهمر من عينيها ، يقول (مصطفى) بانه قد نزل من مكتبه إلى صالة الطعام حيث وجد الفتاة تنتحب بالفعل ، عرفها بنفسه وطلب منها أن تهدأ وأخبرها بأن المشكلة لو فى (الحساب) فإدارة المطعم تتنازل عنه .. إلا أن الفتاة إزداد نحيبها فطلب منها الخروج من الصالة حتى لا تلفت الأنظار وعندما خرجت وكفكفت دموعها أخبرته بالقصة :
أنا خريجه ليا ستة سنين وبكوس لى شغل وما لاقية .. لقيت فى جريدة إعلانية إعلان عن وظيفة بى نفس المؤهلات بتاعتى .. إتصلتا عليهم رد عليا المدير وقال ليا تعالى نعمل ليكى إنترفيو وجيبى معاكى السى فى بتاعك وشهاداتك الأصلية ، قلتا ليهو الشركة وين ؟ قام قال ليا (جوار المطعم الفلانى) ممكن تنتظرى هناك أنا ح ابعت ليك موظفة تجيبك ، أها لمن جيت فى المواعيد ووقفت جانى زول لابس بدلة وكرافته وشايل ليهو ملفات وأوراق وبعد ما سلم عليا عرفنى بى نفسو وطوالى قام قال ليا :
- لو ممكن بس نشرب لينا حاجة فى المطعم وبعدين نمشى الشركة وهى فى الشارع التانى
.. طلب عصير ومشويات ومعجنات وحاجات كتيرة .. وكان كل مرة يمسك بالموبايل ويقول كلام كبار كبار .. الشيكات .. البنوك ... العطاء .. وفجأة بيتكلم ليهو فى محادثة قام دخل الموبايل فى جيبو وقال ليا لو سمحتى أدينى موبايلك (البطارية نزلت) .. قمت أديتو ليهو .. قعد يتكلم ويأشر بى أيدينو .. ورجع شال الورق الكان شايلو قعد يقلب فيهو ويتكلم وهو ماشى لمن فتح الباب وطلع ! (وهى تجهش بالبكاء) والله يا أستاذ أنا ما حارقنى الموبايل ولا الأكل الطلبو الزول ده ... أنا حارقانى الوظيفة الأملتا فيها !!
كسرة:
تحذير : مافى زول يقول ليك (البطارية نزلت) تديهو موبايلك ! |
|
|
 
|
|
|
|
abubakr
عبداللطيف حسن علي
فيس بوك
تويتر
انستقرام
يوتيوب
بنتيريست