الى عشاق الشعر.. هدية منتدى السودان الثقافي بجدة.. ديوان الشاعر ابراهيم المك (تيراب هواك)

مرحبا Guest
اخر زيارك لك: 05-19-2024, 04:29 AM الصفحة الرئيسية

منتديات سودانيزاونلاين

مكتبة الفساد

ابحث

مدخل أرشيف اراء حرة و مقالات

News and Press Releases

اتصل بنا

Articles and Views

English Forum

ناس الزقازيق

مدخل أرشيف الربع الأول للعام 2007م

نسخة قابلة للطباعة من الموضوع ارسل الموضوع لصديق اقرا المشاركات فى شكل سلسلة

« | »
اقرا احدث مداخلة فى هذا الموضوع »

02-26-2007, 07:37 AM

AbuAla

AbuAla
تاريخ التسجيل: 08-31-2002
مجموع المشاركات: 444

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

الى عشاق الشعر.. هدية منتدى السودان الثقافي بجدة.. ديوان الشاعر ابراهيم المك (تيراب هواك)

Quote: في هذا البوست ندعو عشاق الكلمة الرصينة الى سياحة شعرية رائعة يرتحل فيها الشاعر ابراهيم محمد أحمد مصطفي المك عبر قوافيه المتألقة الى فضاءات الخيال الرحيب وسماوات العشق العفيف وتداعيات الحلم الشفيف، يمخر بهم عباب القصائد بقراءات متأنقة ، فينداح خيال الكلمة وجمال الالقاء شلالات ضياء تنثال على المتلقين، فتسري فيهم عدوة هذا الجمال، ويتحدون مع الشاعر في تلك النقطة الفاصلة ما بين (تكية النسمة الحنينة على سواعد أحرفك ..وبين مزلقان عينيك في قاع التهاويم والمحل)، تضم هذه المجموعة الشعرية (تيراب هواك) تجربة الشاعر ابراهيم محمد أحمد مصطفى المك ، رئيس منتدى السودان الثقافي بجدة، وسنقدم في هذا البوست نماذج من قصائد هذه المجموعة، وبعض الدراسات النقدية التي أجريت حولها والتي قدمت في الأمسية التي أقامها المنتدى في شهر سبتمبر الماضي ونشرت في الصحف اليومية، بادئين بالمقدمة التي كتبها الشاعر، ونأمل من الأخوة المتداخلين اثراء هذا البوست بمرئياتهم وانطباعاتهم حول هذه التجربة الشعرية
مع أطيب تحياتي وتقديري
سيف الدين غيسى مختار
أمين منتدى السودان الثقافي

02-26-2007, 07:43 AM

AbuAla

AbuAla
تاريخ التسجيل: 08-31-2002
مجموع المشاركات: 444

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: الى عشاق الشعر.. هدية منتدى السودان الثقافي بجدة.. ديوان الشاعر ابراهيم المك (تيراب هواك) (Re: AbuAla)
مقدمة الشاعر ابراهيم محمد أحمد مصطفي المك ======= بسم الله الرحمن الرحيم والصلاة والسلام علي سيد الأنبياء والمرسلين وعلى آله وصحبه الأبرار الطاهرين السلام عليكم ورحمة الله وبركاته أحييكم تحية فضفاضة وفياضة بكل مشاعر الود والمحبة ..وسـعادتي بطرح هذه التجربة الشعرية أمامكم لا تحد ولا توصف .. و سعيدة قصائدي إلتى ستوقظونها بحضوركم للارتحال معها وعبرها من خلال هذه التجربة الشعرية الخاصة والخالصة.. سادتي الكرام 00 سيداتي الفضليات : حاولت بهذه الخطوة أن اكسر حاجز العزلة، وأحرر قصائدي من قيودها لتنطلق كل مفردة مجنحة تتلمس طريقها إلى عقولكم ووجدانكم ..وربما تضيف قصائدي معاناة إلى معاناتكم أو قد تخفف منها.. ولكن يكفي أن نوقظ نبض التواصل ونلفت انتباه تلك الالفة الدائمة بينكم وبين ساحات الإبداع في شتى صوره .. ولا أنكر أنني تأخرت كثيراً لأحظى بشرف لقائكم ..ذلك لأنني كنت في كل مرة أخطو فيها نحوكم أعود فأتحسس خطى قصائدي المتعثرة داخل أروقة ذاتي .. فأجد أن بينها وبين هرولة الإبداع بون شاسع .. فأنكفي عليها استحثها الإسراع والتجاوز لكل مثبطات الرحيل صوبكم.. وفي هذا اللقاء المتميز باطلالتكم المشرقة سترحب بكم قصائدي التي اتخذت من الغربة ميلاداً وملاذاً .. اخترتها من ديواني المعد للطبع ( تيراب هواك ) وبرغم انتماء هذه المجموعة الشعرية لكل مرافئ السفر والرحيل ، إلا أنها جاءت متصلة بنسب قوي إلى الوطن بكل معطياته.. بل لا أنكر أن الوطن استحوذ على شعري ردحاً طويلاً من الزمن .. وهو محق في ذلك ، ويستحق كل ذلك ،لأنه يبقى على الدوام الأخصب الهاماً والأكثر راحة وايلاماً والأطول قامة بين كل شخوص الإيحاء في عقلي وقلبي ووجداني .. فكتبت له وبه ما أحسب أنه أرضاه عني وإن لم يرضي شعري فيه وله الكثيرين ممن لم يرضوا عني حينها .. ولكننا وبنعمة من الله تراضينا الآن بعد أن رضي الوطن عنا جميعاً .. ولم تك لقصائدي تلك خصومة شخصية .. ولا حظوة شخصية .. ولكنها توالت بخاطري الهام نهـج ، ووحي معتقد، وإيحاء مواقف وثوابت آمنت بها ولا زلت .. لذا لا بد أن أشير إلى أن مساري الشعري في هذه التجربة لا يعني أنني قد تبرأت من تلك القصائد أو أنها تتبرأ ت مني في ظل المعطيات الجديدة في الوطن .. غير أني وفي ظل تلك المعطيات الجديدة الحميدة بادرت فاستبدلت موقع السيف غصناً من الزيتون ... وموقع الرمح حمامة للسلام .. وملئت حنجرتي بالغناء الصداح ، واستدعيت كل مفردات الألفة والمحبة من أجل الوفاق والاتفاق .. وغنيت للسلام، وللسلام ساغني حتى لا تعد لمفردة الحرب مساحة في قاموسي الشعري .. هذا ما وقر في نفسي وقلبي وعقلي وصدقته كتاباتي الأخيرة، تدعمه قناعتي ويقيني بأن الشاعر مبادر بطبعه، وهو أحرى بالمبادرة إن دقت طبول الحرب .. وأحرى بالمبادرة أن عُزفت لحون السلام.. وما من شاعر غرد خارج سربه إلا بح صوته وأصبح نشازاً وانصرفت عنه قوافيه غير مبالية..إذن .. دعوني أرحب بكم فرداً فرداً قبل أن تصافحكم إشعاري ، وأزجيكم الشكر والتقدير والامتنان على اهتمامكم بتشريفي في هذه الزاوية من منتداكم العامر. والشكر أجزله لأخي الأديب سيف الدين عيسي الذي نقل أشعاري الى هذه المحطة الإبداعية ..والشكر موصول لكل محبي الشعر وأساتذتي الشعراء والشاعرات ومرحباً بلقائكم الحبيب وتوجيهاتكم السديدة التي ارتقبها بكل تقدير...ودمتم أنهاراً بين الحفول... ضيفكم/ إبراهيم المك

02-26-2007, 07:47 AM

AbuAla

AbuAla
تاريخ التسجيل: 08-31-2002
مجموع المشاركات: 444

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: الى عشاق الشعر.. هدية منتدى السودان الثقافي بجدة.. ديوان الشاعر ابراهيم المك (تيراب هواك) (Re: AbuAla)
القصيدة الأولى (تيـــــــــــراب هـــــــواك) كان باستطاعتك تنتظر ... تفتح معابر لخبايا عميقة في جواك وتتريث تفكر بتأني وبمهل أو كان تمد خطوك على شرفة مخابي النور وتنبش في ثنايا الذات عن الصدق المدفق في ملامحها بالهبل تنقر براس قلمك على لوح الشرافات المعلق في مداخل من بقايا الذكرى ينبح فيها ناقوس الرجاءات والأمل كان صحى نقرك هاجس الشوق من رقادو وشب في تمرة فؤادك، شاف أنينك وشال حنينك واتكل والله شارياك ياولد .. ريدة ما صداك فيها حجر دُقش .. لا اتسهدن عينيك فيها ولا فؤادك بالمحاذير انشغل دغشك حلب ضو من ضروع الغيم وجاب رضعة رضاك.. يلا أنبسط .. وإدفا بجكة مشاعرك شان تصل؟ بس خوفي ما تقدر تزامن نقزة الشوق في خطاها ومن جديد يرجع يضمك ارتهانك تاني لنفس النهايات والأجل أو ينبهل منك جراب صبرك تقيف.. تقعد تلقط في حَصى الرحمات وترجم حظك العاثر مباري شوارد النجم الأفل سارح بعيد في حتة مابين تكية النسمة الحنينة على سواعد أحرفك .. وبين مزلقان عينيك في قاع التهاويم والمحل عارفك رزين ... لكين مشوش فكرتك هم زول متيرب بهواك فاتح عليك ساقية حنانو بجدولين مسروفة بيك ريدة وغزل صدت متاريس جفوتك وكمان قساوة قلبك المعروفة فيك باب العشم ما خلى موجب لرضاك لكين رضاك بابو انقفل شُغلك بطر.. بطران فؤادك بالجفا المطبوع مع فطرة وجودك ، وقام نديدك من زمن حبيان مشاعرك في دريبات الجهل فرت جناحها الغيمة ناداك الهرع غلبك تقاوم انعكاس اللوحة في ظل الظروف الراهنة.. أو نوبة شقاك المفتعل وخرّت إيدك من حنان زولاً ينوم يتوسدك وصباح يفك الريق بشوفتك مكتفي.. زولاً وفي.. ومتروس مشاعر إلا بس كاتلو الخجل ونفضت ايدك من فرَق إيدو الحنينه كشح غبار سفرك علينا مرقت من عينيها لا اتجيهت لا الحال برحيلك إنعدل يا ما هديتك ما اهديت .. قبال تغرز فيك نوايب الوحشه تنهش من فؤادك.. وقبلما يتوكرن رجليك في وسط المتاهات والوحل أسع بقيت واقف براك ؟ والعتمة زمت بمخاريز جفوة مدت في سماك تحزم شفايف الضو .. وتكشح في مقام الرؤيا دمعات في تجاويف المُقل مضاري من همك .. تفتش للمخارج في زوايا السكة تخبت في المسافات المدى، ومالقيت انيس غير الصدى وضلك زحف من خطوتك غادي ورحل سادر مودر سكة لا عرفتك توديك لقناعات عشعشت جواك وهم.. محتارة ما عرفت تجيبك صادي لعُقب الأهـل بس شوهت إشراق بهاك .. جفت محاجرك فوق محابرك لا في حد هماك لا هميتو لا فتش دريبك تاني لا منك سأل شمتانة فيك نسمة عصاري مودعاك كيفن تعبي براح قليبك بالسموم يبراك في السكة المسيجة بالملل؟ نوّح براك .. وافرش على الشوك المحاصر سكتك شئ من مقاطع في غناك.. واصبرعلى همك عساك فرجك قريب أو محتمل ... دفقت سعنك فوق رهاب الأمنيات ما قلت ليك : عمرو الهرع ما كان سحابات يترجن .. لا كان ندىالغيث الهطل يا ما هديتك يا ضنين بسمعك الطنش بعيد... قالوا المحرش ما بكاتل ... والرهاب ما جم مويه.. والمقدم ديمه راجع ... وما بصل ما قلت ليك .. قالوا ان بقي الزول ماهو واثق من قساوة قلبو ما يفارق يباري الأمنيات الباهته بين ياريت .. وهل؟ أجبد مقاديفك على صدرك .. واتزمل بسيطان شوقك الغلاب تعال ... قبال تفرها عينها تغمد من سهادها يكون خبر جيتك وصل يمكن نلاقيلك مبرر لانفرادك بالجفا ويمكن يسامحك قلبها النديان محّين بالوفا أو بين قناعاتها : (المسامح ربنا ... عزَ وجل) أرجع كفاك، ما تبقي زول ساكت مكابر مافي من ريدك فكاك.. ان كان صحيح قلبك من الرجس اغتسل أرجع تعال .. يا مشلعيب الحوبة توبة ان كان تمد رجليك أطول من لحافك.. أو تبيع قنطار فرح جواني بشوية زعل وأنا برضي ما كت ناوي أسامحك .. بس سمعتك في ندى الليل الأخير بارك تتمتم : توبة .. يارايداني توبة....... توبة من كل الحصل توبة من كل الحصل.. ابراهيم المك جدة - يناير/2006م (عدل بواسطة AbuAla on 02-26-2007, 08:06 AM)

02-26-2007, 08:02 AM

AbuAla

AbuAla
تاريخ التسجيل: 08-31-2002
مجموع المشاركات: 444

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: الى عشاق الشعر.. هدية منتدى السودان الثقافي بجدة.. ديوان الشاعر ابراهيم المك (تيراب هواك) (Re: AbuAla)
القصيدة الثانية في رثاء عبقري الأغنية السودانية مصطفي سيد أحمدد حبيبنا المغني النبيل يا راحلاً بين النبض والوريد ، ورافلاً في ترف المحبة في قلوب عاشقيك .. ونازلاً في نعيم الخلود بإذنه تعالي .. منذ رحيلك عنا صدئت اللحـــون ... وانزوت الأشعار ورحلت عنا أسراب العصافير .. لك الوفاء والمحبة والدعاء .. لمحــتك ، تغـــربل غــنانا وتنعمْ وتدخل حروفك بيتوتنا وتســـــــلِمْ تفاصل ، تجـــــادل ، تناقش، تفهِمْ تفِـــرح، تضــحِك ،تَبَكِـي وتألِـم لمحتك توَسِــــمْ وتمهر غنانا .. تلوِن هوانا تحلي وتطعِمْ تجلي وتجمِــل مداخل ســـمعنا تغـــني وتصــحح بوعي المعلـمْ * لمحتك توالـف خطــاك الرحيل مكندك عيونك غـــبار السفر محقِـــب جروفـنا ومحـزَم بنيل يزامن رحــيلك رحـــيل القمر تفتش مـواني الأماني القبيل حرازِن مخاصــــم مجافي المطر مراكبك محّرق شِراعن وراك وبينك وبين المــواني البحر لحونك تمازج ملامح رضاك تمازج ملامـــح همـوم البشر تبنت ضلوعك شجون المعاك شــــجونك تبنت نحـيب الـوتر * لمحتك تعالج مواجـــــع الغُنا تســابق خطاك الرحيل الطــويل تداقش متابع خطاك الضني بصبر المغـــني العفـيف النبيل تتربل جداول حروف المني وتزرع بـذور الأغـــاني النخيل نجوم الأغاني البشعن سنا يضـــــون مـــراتع (بثينة وجميل)* يشرف حضورك هناك وهنا تنور مداخــل الغُـنا المستحيل * لمحتك تنقــر جـــدار الســـكون وتفـتح مخابي المواجـع نـواح تكحــل مـراويد غناك العــيون يســـامر أنينك أنين الــرياح تلـــون مــــدادك مـداد الشـجون تلـون بلــون الغـــروب الـبراح ترتــب غنانا ومجـــيه يكـــون تغني وغـناك الجمــيل انــدياح يداوي الدواخل غناك الحــنون يغـرق دواخلك نزيف الجراح * لمحتك تضيف الاطار الجـــديد يشكل إطــارك معاني وإضــافه تعاف الكـلام المكبل بقـيد تعاف المعاني الســـقيمة الخرافه تباري ارتحال النوارس بعيد تنقي الاغـــاني التشكل ثقـــافـه تجيب الكلام البيهتف نشـيد يمر من خــلالك ويطلع قـيافه تغالب هموم ارتحالك وحـــيد طموحك مسابق همومك مســــافه لمحتك برغـم جراحك سعيد تأســس غنانا السـليم المعافي * لمحـــتك وكان ارتحالك وشيك تطرز حواف الحروف بالنغم تجيك الحروف العطـاش ترتجيك غناك الــرزين يستفز الألـــم تعــــاند حصار المـداين تجـيك مخافك عليهن يقوي العشــــــم تخـت الحــروف الـــتوابع عليك موانع لحونك تصــد الوهـــم برغـم الهمـوم والعــذاب العليك ولا مرة عمرك عرفت الـندم * لمحتك تقارب نهاية المطاف مشارف مفازة الطريق المخيف موسد حنايا الضلوع الرُهاف هموم الغلابة البسكوا الرغيف مودع سنين الرحيل العجاف وزادك مقاطع غناك العفـيف وراجع تقالد نداوة الضفاف بصـدق المغـني الرقيق الرهيف يقالد وسامة صباك العفاف ربيعنا وشتانا وغـيوم الخــريف *** لمحتك تقــاوم قساوة الظـــروف تطارد شوارد الحروف الغمــام توشح يباب الصحـاري الجـروف يحرض غــناك القـوافي النيام تعلــم مـوالف الرتابة العــزوف تغني الكـلام المفــيد التمام تنور حـروفك ضــلام الكهــــوف تفتح نســــايم غـــناك المسام تدغــدغ لحونك مـلاين الحـروف تبرد حشاهن ســــكينة وسلام تفتـــــش علــينا وتشـق الصفـوف قيام ياصفوف للمعلم.. قـــــيام تأمّــنْ وتضْرَعْ عشـــــــانك كفـوف تأمّل مقــــامك كــريم المقام برحمة الاهـنا الرحـيم العطـــوف معزز مكـرم في دار السـلام برحمة الاهنا الرحيم العطــفوف مكرم معـزز في دار السـلام معزز مكـرم في دار السلام ابراهيم المك جدة 2002 ألقيت في حفل تأبين الراحل المقيم الأستاذ/ مصطفي سيد أحمد أقامه منتدى السودان الثقافي بجدة * يكنيه أحباؤه بجميل بثينه( زوجته الغالية

02-26-2007, 08:16 AM

AbuAla

AbuAla
تاريخ التسجيل: 08-31-2002
مجموع المشاركات: 444

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: الى عشاق الشعر.. هدية منتدى السودان الثقافي بجدة.. ديوان الشاعر ابراهيم المك (تيراب هواك) (Re: AbuAla)
القصيدة الثالثة آخــــر شـهقــــة أحسن ترحل ! يمكن بُعدك يشفي غليل الفرحة الماتت في جوانا معاك .. فرحك غائب وانت معانا ... وانت مخبي علينا كتير من حزنك في جواك فاتح درب الحيرة شوارع .. وشارد من عِصيان الدمعة.. وتحبس نفس الهم الطالع وهمك باين في محياك تشطب خط الفرح الزاهي .. تعبي سواد الحبر الجفّ.. وترسم فوق أوراقك ضفه بتحضن حزنك قبل رضاك تزحف وهمك ظاهر ومخفى ... أخفى حنينك خلى إحساسك باهت ومطفي وحاجب عن الشمسِ هواك .. ويبقي سؤالي التايه برضك كيف حتلاحق رزم الغربة وفي جواك الهم مترهل والمشوار بلحيل هداك؟ واحسب عمرك .. كم باقيلك من عافيتك لما تجازف طالع ونازل وتفضل واقف .. وكل عذابك ما كفاك ؟ وكيف تتحمل نار الفرقة وما تتألم؟ وانت فؤادك ذاتو مقسّم !! وانت أساساً سايب عقلك كلو هناك !! أحسن ترحل .. لم أحزانك كان تنجمّ.. وأنسى الناس الحاسة بهمك وما بتهتمّ وقاعدة بتحسب في أوراقها وتتخطاك لم إحساس جواك يترنّح .. وباقي فؤاد بالشوق اتجرّح .. اعكس خط الغربة الطالع وشيل الشيلة الراقدة حِـداك .. يمكن يمرق وجع الهم البارى سنينك ... ولا يزيد تبريحو حنينك .. ويشفع جرحك ولا أنينك عارفك صابر .. وقاسي بُكاك وبرضو كلام الناس ما ساكت !.. قالوا عناد الجرح الغاير .. وكاتم وجعك ساكت صابر.. ووجعك راحل شان يرجاك !! وآخر مرة لمحتك فيها .. كان جواك الشوق مدفّق .. وبان في عيونك لما يشفّق .. إطمنت بانك راجع.. أوعّ يكـون الشوق خلاك؟ كان قلبّت علينا مواجع وانت تباصر مخرج راجع رامي الغربة وليلها الكالح وكل سنين الهجرِ وراك قوم اتلافى شقوق الفرقة.. قبل فؤادك ما يتورط .. وقبل حنينك ما يتوهط وقبل يحاصرك ليل الوحشة وقبل رحيلك من دنياك أنسى الجرح الطوّل غائر .. وباقي هموم الحظ العاثر افرد سيفك حد الرؤية وشق الزمن الاتحداك فوت البلد الكاتم نفسك .. كتم البحر الأكبر منك .. وكاتم كل إبداعك وفنك ... وساجن شعرك جوه غناك يمكن تلقي نداوة فرحة يغطي رزازها يباب الوحشة.. وتفتح تاني مداخل دهشة .. تخلي عيون الغيم الضاحك .. تضحك اكتر يوم تلقاك وانت مكانك ما بيناتنا ... جنب القمر الضوّى الدنيا ... وسط الغيم الراحل غنية.. وبين الريح والنسمة لقاك تنسج وهج النجم الساهروتحــزم نور الصــبح الباهر وتهمس فكرك باطن وظاهر.. فايق ورايق ما هماك قوم قدامك لسه مسافة.. هم الرجعة وطلعة عقبة وكم تغريزة عنيدة وصعبة وطول السكة نزيف أشواك قدرك وفرضك ... ما تتردد.. واصل برضك أمشي وأزحف .. ما تتوقف آخر شهقة في ليل الوحشة.. تلقى عيونهم تستناك .. أحسن ترحل ... الله معاك ابراهيم المك جده 1/1427هـ (عدل بواسطة AbuAla on 02-26-2007, 09:08 AM)

02-26-2007, 04:21 PM

AbuAla

AbuAla
تاريخ التسجيل: 08-31-2002
مجموع المشاركات: 444

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: الى عشاق الشعر.. هدية منتدى السودان الثقافي بجدة.. ديوان الشاعر ابراهيم المك (تيراب هواك) (Re: AbuAla)
UP

02-26-2007, 07:37 PM

omer abdelsalam

omer abdelsalam
تاريخ التسجيل: 04-07-2006
مجموع المشاركات: 3478

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: الى عشاق الشعر.. هدية منتدى السودان الثقافي بجدة.. ديوان الشاعر ابراهيم المك (تيراب هواك) (Re: AbuAla)

Quote: تجربة الشاعر ابراهيم محمد أحمد مصطفى المك ، رئيس منتدى السودان الثقافي بجدة،

تجربة شعرية رائعة . تستحق وقفة للتأمل . نرجو من المبدع سيف الدين متابعة كل جديد لدي مبدعى المنتدى الأدبي السوداني بجدة

02-27-2007, 11:47 AM

AbuAla

AbuAla
تاريخ التسجيل: 08-31-2002
مجموع المشاركات: 444

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: الى عشاق الشعر.. هدية منتدى السودان الثقافي بجدة.. ديوان الشاعر ابراهيم المك (تيراب هواك) (Re: omer abdelsalam)
الصديق الصدوق أبو أنس فعلا هي تجربة تستحق منا التأمل، خاصة على مستوى المفردات والخيال اشعري والصدق في التناول ، والصور الشغرية الرائعة، واليك هذه القصيدة المجنحة بعيدا في آفاق الخيال الرحيب 00 سيف عيسى ===== شايلك ملاذ شايلك ملاذ خاتيك ضرا ونيلك دفق جواي جرى عشم الفرح من غمرة الحزن السرى وشايلك ملاذ شايلك ملاذ من عتمة طلت في الدروب والليل يحاصر من ورا داخرك روى والنيل سراب فجي الضباب جواي حضورك يهزم الهم المعاند يكسر الصمت العذاب وعدك شروق فجر ألاماني الحالمة فينا وطلة الغيم والسحاب وجهك صباح شمس الضحي الفجت ليالي الغربة و القفـــر اليباب أطوي النوى صدق الهوى نتحدى هوج الريح سوا ريدي الملاذ وملاذي ريدك لو نوى الحـزن المهاجر لي يعــــــود تبقي الملاذ تبقي الضرا من وحشة الغربة العدم من غمة الهم والشرود عينيك مداخل للوطن ومعابر الشوق النزف عبر المسافات والحــــدود حضنك مصدات الحزن صبح البشارات البدت في لهفة الشوق الـــودود عشم الفرح من غمرة الحزن السرى شايلك ملاذ خاتيك ضرا ابراهيم المك جدة/2000م

02-27-2007, 11:50 AM

AbuAla

AbuAla
تاريخ التسجيل: 08-31-2002
مجموع المشاركات: 444

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: الى عشاق الشعر.. هدية منتدى السودان الثقافي بجدة.. ديوان الشاعر ابراهيم المك (تيراب هواك) (Re: omer abdelsalam)
الصديق الصدوق أبو أنس فعلا هي تجربة تستحق منا التأمل، خاصة على مستوى المفردات والخيال اشعري والصدق في التناول ، والصور الشغرية الرائعة، واليك هذه القصيدة المجنحة بعيدا في آفاق الخيال الرحيب 00 سيف عيسى ===== (شايلك مــــــلاذ) شايلك ملاذ خاتيك ضرا ونيلك دفق جواي جرى عشم الفرح من غمرة الحزن السرى وشايلك ملاذ شايلك ملاذ من عتمة طلت في الدروب والليل يحاصر من ورا داخرك روى والنيل سراب فجي الضباب جواي حضورك يهزم الهم المعاند يكسر الصمت العذاب وعدك شروق فجر ألاماني الحالمة فينا وطلة الغيم والسحاب وجهك صباح شمس الضحي الفجت ليالي الغربة والقفـر اليباب أطوي النوى صدق الهوى نتحدى هوج الريح سوا ريدي الملاذ وملاذي ريدك لو نوى الحـزن المهاجر لي يعود تبقي الملاذ تبقي الضرا من وحشة الغربة العدم من غمة الهم والشرود عينيك مداخل للوطن ومعابر الشوق النزف عبر المسافات والحـدود حضنك مصدات الحزن صبح البشارات البدت في لهفة الشوق الـودود عشم الفرح من غمرة الحزن السرى شايلك ملاذ خاتيك ضرا ابراهيم المك جدة/2000م

03-03-2007, 01:22 PM

AbuAla

AbuAla
تاريخ التسجيل: 08-31-2002
مجموع المشاركات: 444

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: الى عشاق الشعر.. هدية منتدى السودان الثقافي بجدة.. ديوان الشاعر ابراهيم المك (تيراب هواك) (Re: AbuAla)
درويش الــريد ابراهيم المك هاك أحبك ... وهاك أريدك .. تبقي رسمه وتبقي وشمه فوق قليبك وفوق وريدك تبقي تعويذة حنان ضاميها جيدك هاك أريدك والكلام الداير اقولو قالو زولاً متلي عاشق لما نال في الريدة غايتو ولما أصبح شيخ طريقه وعالية بين حيرانو رايتو وسوى وجه الحلو لوحـو والغيوم حبرو ودوايتو وبقرأ في عيون الجميلة بقرأ في كتاب الفضيلة وقالوا من ولدوه بقرأ ولسه ما كمل قرايتو... قال لي واحداً كان حوارو اسـمع احكيلك حكايتو... كان زمان زولاً مسافر فوق دروب الريد مهوّد كان بيدي جميلة موعـد ويدي تاني جميلة موعـد وكان مناهو وكل همو انو يلقى عيون تضمو ومن عذاب احزانو يبعـد وكان بحس بالفوضى في قلبو ومشاعرو وبضياع الغربة في حرفو وخواطرو وفجأة في عيون الجميلة شاف كتاب اسمو الفضيلة وكانت أول صفحة فيهو هاك احبك وهاك أريدك تبقى رسمه وتبقي وشمه فوق قليبك وفوق وريدك وتبقى تعويذة حنان ضاميها جيدك هاك اريدك ... وعاد صبح من يومو داك شيخ للطريقة . ولما جيتو... ولسه ما قلت العليّ وما حكيتو .. قالي في عينيك بشوف طيف الحبيبة والدريب الفتنا قبلك من خطاك باين مشيتو.. والمدد في الريدة لازمك طالما قدرك رضيتو وقال لي في أول وصيتو: قال لي ريـدا وبرضو ريدا وناجي محبوبتك تملي وأجرد الإحساس وزيدا وأبقي زول عاشق مُوحـد صفي في الريدة العقيدة وخلي محبوتك طريقتك وابقي في الحضرات مُريدا وزيدا تقابة مشاعرك من لهيب الشوق وقــــيدا وصحي عشقك نوبة هايمه فيها إيقاعات عـديدة وابقي زاهد في سواها وأرقع الجبة الجـديدة وابقي درويش في هواها وتوه مع الحضرة الفريدة ولما توصل لي مداها .. زيد مداك واتعدى ريدا ... ولو بتعرف قولة أريدك أغلي من أجمل قصيدة ولما جيتك يا جميلة وزي حوارعاشق رجيت طلة الحضرة الجليلة وجيت وأول ما قريت صفحة في كتاب الفضيلة قلت يا دايم مشيت ســــكة الريدة النبيلة وفي خلاويك اتكيت شلت لالوبتي الطويلة وكل نبضه تهاتي بيك : أريدك ... أريدك .. أريدك.. ياجميلة... ام درمان 1980م

03-03-2007, 01:38 PM

الدكتور حسام الدين مصطفي

تاريخ التسجيل: 02-26-2007
مجموع المشاركات: 0

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: الى عشاق الشعر.. هدية منتدى السودان الثقافي بجدة.. ديوان الشاعر ابراهيم المك (تيراب هواك) (Re: AbuAla)
الأستاذ سيف الشاعر المك قصائد رائعة لنا تعليق فور الانتهاء من نشر جميع القصائد دمتم حسام الدين مصطفي

03-06-2007, 03:57 PM

سيف الدين عيسى مختار

سيف الدين عيسى مختار
تاريخ التسجيل: 03-02-2007
مجموع المشاركات: 1364

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: الى عشاق الشعر.. هدية منتدى السودان الثقافي بجدة.. ديوان الشاعر ابراهيم المك (تيراب هواك) (Re: الدكتور حسام الدين مصطفي)

يا ابراهيم

Quote: كان صحى نقرك هاجس الشوق من رقادو
وشب في تمرة فؤادك، شاف أنينك وشال حنينك واتكل
والله شارياك ياولد .. ريدة ما صداك فيها حجر دُقش ..
لا اتسهدن عينيك فيها ولا فؤادك بالمحاذير انشغل
دغشك حلب ضو من ضروع الغيم وجاب رضعة رضاك..
يلا أنبسط .. وإدفا بجكة مشاعرك شان تصل؟
بس خوفي ما تقدر تزامن نقزة الشوق في خطاها
ومن جديد يرجع يضمك ارتهانك تاني لنفس النهايات والأجل
أو ينبهل منك جراب صبرك تقيف.. تقعد
تلقط في حَصى الرحمات وترجم حظك العاثر
مباري شوارد النجم الأفل
سارح بعيد في حتة مابين تكية النسمة الحنينة
على سواعد أحرفك ..
وبين مزلقان عينيك في قاع التهاويم والمحل
عارفك رزين ...
لكين مشوش فكرتك هم زول متيرب بهواك
فاتح عليك ساقية حنانو بجدولين
مسروفة بيك ريدة وغزل
صدت متاريس جفوتك
وكمان قساوة قلبك المعروفة فيك باب العشم
ما خلى موجب لرضاك لكين رضاك بابو انقفل
شُغلك بطر..

وألف حمد الله بسلامتك
وألف بعدالشر عليك
يا ولد شايل حلاها
ويا وطن بنحن اليك

أسأل الله أن يمن عليك بالصحة والعافة وتعود الى التحليق في عوالم الجمال من جديد. وهي وعكة طفيفة ألمت بشاعرنا المرهف ابراهيم المك، نسأل الله له عاجل الشفاء.

سيف الدين عيسى مختار

(عدل بواسطة سيف الدين عيسى مختار on 03-06-2007, 03:59 PM)

03-10-2007, 09:03 PM

سيف الدين عيسى مختار

سيف الدين عيسى مختار
تاريخ التسجيل: 03-02-2007
مجموع المشاركات: 1364

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: الى عشاق الشعر.. هدية منتدى السودان الثقافي بجدة.. ديوان الشاعر ابراهيم المك (تيراب هواك) (Re: سيف الدين عيسى مختار)
ما عاد يا أم در يجدي عتابك أخي عبد العزيز العميري .. ..الى روحك الندية في مثواها الطيب، تبلغها محبتي ومحبة أهل السودان لعميري الانسان الفنان .. لك يا رفيق صباي ورفيق شعري وعمري دمعة حرى ودعاء لا ينقطع لك بالرحمة والمغفرة والنعيم المقيم يا أخي الحبيب الراحل.. مالك يا أم در لونك قاتم ؟ نفسك كاتم ؟ آهاتك طالعات من الجوف وكيف هان يا أم در تتحملي طعم الفرقة المر وتفارقي جناك الزول البي ريدك موصوف ؟ والحب البينك وبينو كبير الولف البينك وبينو كبير الود البينو وبين ناســك معروف ما اتمسي بعيد عن حضنك يوم في بعدك كان بيحس بالخـوف وان غاب في ليلة بعيد منك ... يسأل في كل صباح عنك ويبيت في عيونو الشـوق ملهوف كيف هان يا أم در فارقتك جناك؟ والحزن اتحكر في محياك دمعاتك لاقن دمـع ابروف الزول العاش عمرو عشانك الليلة اتوسـد احضانك واتبرد بالدمع المزروف واحزني عليك .. * والهفي عليك ياليل أم در نجمك شارد.. صمتك بارد .. بدرك ياليل مهموم سـارح مالك يا نيل موجك ساكن ؟ لونك داكن ... وجهك كالح واتشر اسـاك على طول مجراك طعمك يا نيل أصبح مالح وين شاعرك وين ؟ فــــنانك وين ؟ الزول السمح المتسـامح كيفن خليتو وكيف خلاك؟ ما كان في جنبك لي امبارح ... وآحزني عليك .. * وآحزني عليك .. ما عاد يا أم در يجدي عتابك وكيفن يا أم در بطيقي وداع الناس الصفوة في أصحابك ؟ دا عميري الكان اسمو الرنان محفوره حـــروفو على بابك ما كان بخاطرك يمشي بعيد لا كان بخاطرو وقت سابك لكين الموت الحق عزال اختار الغالي في أحــبابك فارقتي ( عزيز) الغالي عليك صبرك يا أم در عزّ مصـابك ما فرق بينك وبينو الموت دا اتوســد ريدو على ترابك وآحزني عليك .. * واحزني عليك يا فارس أم در جوادك مسـروج في الساحة ورحيلك كان الصبر المر يا فارس الكلمة الســواحه يا حزن الوتر البات مفقود ورحيل النغمـه الصـداحه والحزن الخيم في جواي ما فضّل للفـرحة مسـاحه انا قلبي وراك يا ( عزيز) مفصود من بعدك ما عرف الراحـه اتصبر كيف ؟ وانعيك لمين؟ وأنا عمري وراك كلو مناحه وآحزني عليك ... ابراهيم المك** جدة/1998م

03-11-2007, 00:41 AM

ghariba

ghariba
تاريخ التسجيل: 03-09-2002
مجموع المشاركات: 13231

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: الى عشاق الشعر.. هدية منتدى السودان الثقافي بجدة.. ديوان الشاعر ابراهيم المك (تيراب هواك) (Re: AbuAla)
نطلب من المولى عز وجل ان يعيد لنا ابراهيم بصحة وأكثر اشراقة وانطلاقة ابداعية لقد تابعت البوست منذ بدايته وآثرت أن لا اشارك فيه إلا بعد حين . فالاخ ابراهيم رغم قصر معرفتي به ولكني وجدت فيها انسانا آخر تنبع منه شلالات من الابداع والجديد فمزيدا من العطاء .. مزيد من الإثراء .. ( بعض من خلجات قلبي نحوكم ) صلاح غريبة - الرياض

03-11-2007, 01:30 AM

seham_musa

seham_musa
تاريخ التسجيل: 12-30-2004
مجموع المشاركات: 761

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: الى عشاق الشعر.. هدية منتدى السودان الثقافي بجدة.. ديوان الشاعر ابراهيم المك (تيراب هواك) (Re: ghariba)

أخي ابراهيم

Quote: كيفن تعبي براح قليبك بالسموم يبراك في السكة المسيجة بالملل؟
نوّح براك ..
وافرش على الشوك المحاصر سكتك
شئ من مقاطع في غناك..
واصبرعلى همك عساك فرجك قريب أو محتمل ...
دفقت سعنك فوق رهاب الأمنيات
ما قلت ليك : عمرو الهرع ما كان سحابات يترجن ..
لا كان ندىالغيث الهطل

أروع من هذا الشعر لا..
أجمل من هذا الشعر لا
أصدق من هذا الشعر لا

انه الشعر الذي يموسق هذا البوست وينثر فيه عطر الكلام، وحلو الكلام

أسأل الله أن يمن عليك بالشفاء التام

سهام
الرياض

03-11-2007, 06:10 PM

سيف الدين عيسى مختار

سيف الدين عيسى مختار
تاريخ التسجيل: 03-02-2007
مجموع المشاركات: 1364

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: الى عشاق الشعر.. هدية منتدى السودان الثقافي بجدة.. ديوان الشاعر ابراهيم المك (تيراب هواك) (Re: seham_musa)
الأخ صلاح غريبة الأخت سهم شكرا على المرور ما زالت قصائد المك تترى ، وذلك الى أن يحصل على رقم الاشتراك في عضوية هذا المنبر، أليس غريبا أن لا يكون أمثال هؤلاء المبدعين أعضاء في المنبر العام/ منذا الذي سيثري هذا الموقع بالموضوعات الجادة الهادفة؟ سيف الدين عيسى

03-11-2007, 06:14 PM

سيف الدين عيسى مختار

سيف الدين عيسى مختار
تاريخ التسجيل: 03-02-2007
مجموع المشاركات: 1364

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: الى عشاق الشعر.. هدية منتدى السودان الثقافي بجدة.. ديوان الشاعر ابراهيم المك (تيراب هواك) (Re: سيف الدين عيسى مختار)
فرحك طغى ابراهيم المك فرحك طغى ... وإتشر اكبر من مواعـين ابتهاجك بالرجوع ماليك حق ..راجع مجرتق بالأمل مبسوط تقالد فرحتك بنشوة في كل الجموع تريان معزة بقدلتك وسط الفريق في موكب الفرح المنوّر بالزغاريد والشـموع سعدك بدا.. وحاجات رضاك وصلن معاك واتشكلن لوحـة ترف لبهجتك من كـل نوع بس بيني بينك والوفا.. ماشفت زول متخبي في حضن الأسي ومضاري بحزنو الموشح بالدموع ؟ تاه في الضجيج شكلو ا تنسى وضاعت ملامحو وسـط نداوة الفرحة والعطر البضـوع حتت طيوف الذكريات المرة في خاطرو العدم موكب رضاك اتوطا فوق قلبو القنوع عودتو يترجي الفرح وفتحت قلبو على العشم لا كنو ما اتعود على دربك ركوع فرحك صفع خد حزنو ليه مستني يصفعو مرتين ؟ ليه تفترض كل البحب لازم يدير ليك خـد يسوع؟ فرحك طغى ... ابراهيم المك جدة/ 1/2006م

03-18-2007, 03:38 PM

سيف الدين عيسى مختار

سيف الدين عيسى مختار
تاريخ التسجيل: 03-02-2007
مجموع المشاركات: 1364

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: الى عشاق الشعر.. هدية منتدى السودان الثقافي بجدة.. ديوان الشاعر ابراهيم المك (تيراب هواك) (Re: سيف الدين عيسى مختار)
متاهات شعر ابراهيم المك متاهات .. يامتاهات تهت فيك توهان وأنا حازم رحالي وجيت وجيت عشمان معاك انسي جراحات الهوى الغلاب أكان يجدي مع جرح الهوى نسيان وحين وصفوا بلادك ليا من جوف الحزن جيتك وقد كان اني حبيتك ولا أملك عى طيش الهوى سلطان لذلك جيت .. وجيت شايل صبابات الهوى من قيس لحدي أنا... وماشي على الجمر حفيان غريب سادر وزادي الشوق ويا للشوق .. مراكب جات تدافر الموج وريحاً هوج وأنا غرقان وحين لاحت ضفيراتك على الشطين تلوح لي تغازل في جرف نديان اخدني الموج وأنا باكي وإيه يجــدي نحيب العاشق الولهان إذا انو قليبك اصلو لم يرحم ... ولا في يوم يندي حنان متاهات ليه ؟ وقصدك أيه ؟ ومما جيت ولى دا الحين وحتي الآن .. وفي بلدك ... أنا مصلوب على وعدك ولا طايل سوي الحرمان وحين وصفوا بلادك ليا ما وصفوا جفاف دربك ولا قالوا بلادك مرتع الأحزان ولا قالوا بانو الريدة في بلدك شعور ممنوع .. وان في غفوة الحلمان ورغماً جيت وقد زادوا مظاليم الهوى واحد وكان فنان متاهات ... تهت فيك توهان وتاه الحب ، وتاه الشوق ويا للحسرة تاه في دنيتك إنسان ابراهيم المك الدمام 1983م

03-21-2007, 07:10 AM

سيف الدين عيسى مختار

سيف الدين عيسى مختار
تاريخ التسجيل: 03-02-2007
مجموع المشاركات: 1364

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: الى عشاق الشعر.. هدية منتدى السودان الثقافي بجدة.. ديوان الشاعر ابراهيم المك (تيراب هواك) (Re: سيف الدين عيسى مختار)
ماريه ( إلى شقيقتي ودوحتي الظليلة وأم القبيلة .. مارية النبيلة) ابراهيم المك سعيك مشكور خاطرك مجبور واسمك محفور بحروف من نور في ندى الإحساس يا ماريه عظـيمة وأنبل قيمة.. وأوفى الناس سعيك مشكور بتضحيتك ومعاناتك .. ضحيتي عشانا بعمرك كلـو وعدي ربيع العمـر وفاتك واتحـديتي الزمن القاسي نذرتي عشـان عـينينا حياتك دايماً خــيرك واصل غيرك ومـعروف عنك نكران ذاتك وانتي المـنك بدت الغـنوه تهاجـــر هايمه ورجعت جـاتك وليكي رجعنا نغني لماريه الالفه الدايمه ولأوفى الناس سعيك مشكور اسمك محفور بحروف من نور في ندى الإحساس سعيك مشكور يا شـمعه تذوب في نار حراقة وتدي الـنور سعيك مشكور .. ويزيد فضلك في كل صــباح خيرك يكتر جــافت عينيك ســـعد الايام علشـان ما نشـقى ونـتودر ودفنتي ســـنين العمر الـزاهي وعـودك كـان ريان أخضر وذرفتي دمـــوع الصـبر المره عشــان في عـيون الناس نكبر وكبرنا كبرتي ... وما اتغيرتي ونبع حنانك ما اتغـير ورجعنا نغني لوجـه القمر البمـــسي نغني لماريه أمان الضفة البترســـي ونغني لماريه لطيف الفرح المدسي في عيون أطفال في صباح العـــــــيد الجـاي هـسي نغني لمـاريه لخير اللقمـة البتكفــي ونغني لمــاريه أمان الحضن الـــــبدفي ونغني لماريه لصــدق الوعــد البيوفي ونغني لماريه لمعني البِر المتخفــــي نغني لماريه .. لماريه سلام يا ست الكل ياروح الكل يا نبع الحب الجمام يا أم الكل خيرك ممدود ماليهو حدود ومظلل فوقنا سحاب وغمام ايديك خريف وحباب الضيف ولسانك دايماً عـــزّام دعواتنا الصادقة وحب الناس يا ماريه في صدرك أغلي وسام يغشاك سلام وندى الانسام ياماريه ســلام سعيك مشكور.. يا ماريه سـلام خاطرك مجبور.. يا ماريه سلام اسمك محفور .. بحروف من نور في ندى الإحساس يا ماريه عظيمة ...حتفضلي ديمه الحــــب والقــــيمة وأفــــــى الناس سعيك مشكور... ام درمان 1985

03-31-2007, 06:16 PM

AbuAla

AbuAla
تاريخ التسجيل: 08-31-2002
مجموع المشاركات: 444

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: الى عشاق الشعر.. هدية منتدى السودان الثقافي بجدة.. ديوان الشاعر ابراهيم المك (تيراب هواك) (Re: سيف الدين عيسى مختار)
القراء الكرام ستتوالى قصائد هذا الشاعر المبدع، وفي الحلقات القادمة سوف نركز على تجربته في الكتابة وفق اسلوب شعراء الحقيبة بكل ما تحمله قصائد الحقيبة من بلاغة وأفانين الشعر العامي سيف الدين عيسى

03-31-2007, 08:14 PM

شهاب الفاتح عثمان

شهاب الفاتح عثمان
تاريخ التسجيل: 08-28-2006
مجموع المشاركات: 11937

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: الى عشاق الشعر.. هدية منتدى السودان الثقافي بجدة.. ديوان الشاعر ابراهيم المك (تيراب هواك) (Re: AbuAla)
ونحن الفائزون

04-04-2007, 10:40 AM

سيف الدين عيسى مختار

سيف الدين عيسى مختار
تاريخ التسجيل: 03-02-2007
مجموع المشاركات: 1364

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: الى عشاق الشعر.. هدية منتدى السودان الثقافي بجدة.. ديوان الشاعر ابراهيم المك (تيراب هواك) (Re: شهاب الفاتح عثمان)
كلام في السمحة مـــن بلد الجمـــال طــولنا طـــولة وفي الغـــربة العقـول زايد ذهــولها وكــــم عانينا مــن احــــزان مـهولة في عـــز الشــــباب عشــنا الكــهولة ** قصــــيدتك كنت مـــــترقب وصـــــولها وكلامك جاني زي غــيمات هطــــــــولة قوافـــيك يا (حسن ) صــافية وعســولة تلاقــي مشـــاعري ليك واقفــالا طــولها وانا الخــــلاني اقول في الســـمحه قولة ديســــها المنســـدل ســـابل بطــولها عـــيونها مخــــبيات فـــــيهن طفــــولة وضحكتا في الحديث زي نغمه صـولة اصــــيله مأصـــــــلة ومـن بيت رجـولة والــــــذوق والفــهـــم جوهر أصــــولها بتب بعـــــــــــــجل ماهــي الكســـــولة ولي ضــــيف الهجــــــوع واقفـا لو طــولها دي مــــــهره أصــيلة في انســـاب خـــيولها لا هـــــي الجمـــوح لا هـــي الذلــــــــولة ان قـــــــــــــدلت تمـــيس ماهي العجــولة وتمشــــي على نغــــــــــــم رنة حجــــولها ** دي جـــدية وديعــــة تــرتع فــي ســـــــهولها ترنع بي مــهل ماهـــــــلــة ومهـــــــــــولة ما تصـــــدق لقــــــــــــيتها أنا بســــهولة وعانيت يا (حســـــن) علشــان اطــــــولها ابراهيم المك جدة/1993م

[رد على الموضوع]

صفحة 1 „‰ 1: << 1 >>

احدث عناوين سودانيز اون لاين الان

اراء حرة و مقالات	Latest Posts in English Forum
Articles and Views	اخر المواضيع فى المنبر العام
News and Press Releases	اخبار و بيانات

الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة

About Us
Contact Us
About Sudanese Online

اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين

News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums

If you're looking to submit News,Video,a Press Release or or Article please feel free to send it to [email protected]