|
|
 سيرتك..
|
مابحكيك
سَكَتّك..ساي..
أنا دسيتك
وشوش نغم الليل بي سيرتك
أنا وصيتو يوم وصيتك..وكنت براك معاي
ومعاو أنا كنت براي
كلّمتو يدس البيني وبينك..قايلو غتاي
ووشويش الليل..في ملعب حس الناس يازولي حريف
كان الدنيا أواخر زيف كان كاتلانا احوال الناس وكان كاتلنا الحر
وكان فاقدنا خريف
مااتخيلتو يخون السر
أنا كنت ملفّح بيها ملامحك ..ملامح زول حبوب
وانت تصلح شكل أناي تقلل منو في طرف التوب
شافك وجاني بيسأل عني..قايل انو معاك مامعاي
يفضح شوق الناس الفي جواي
ناس بتريدك انت بجد
يومك تظهر..
كل الخير الفيها بيكبر
يصل الحد
تفرح تجري تقالد ايدك في إيديّ
تزاحم كل أصابعي تفر حقاتك تدخل بين فرقاتا شويّة..شويّ..
ومابحكيك
إلا الليل غناك في غناي
أنا دسيتك إلا الليل صارحتو بشوقك
فاكرو بيدسدس وصفي الفوقك
شال السيرة وحام الحلّة القالوا سماي
يدخل نجمة ويمرق يدخل تاني في نجمة وكلما يمرق نورها يزيد
أعرف سمعت سيرتك ونارها تقيد
انا ختيتك في اعماقي المابيشوفها سواي
الا الخلق الريدة ويوم سرّيت للليل بهواي..
كانت غلطة..
مامني
من الشوق العبَّ الحتّة وغرّق صوتي الشالك وجاي
دون مااقصد أنا كنت بقولك ساي..
لمّا أترنّم..
صوتي الغنى
ولا الليل الغنى
يمكن صوت الليل البشبه صوتي وكت مايصدح هوّ بي ريدك
فضح الحال الظاهر فيني عيان
وانا عيّان
قال للدنيا اني بريدك
ومازعلان
بالعرفوا الناس
أصلو الحب وسواس..
ومابدسَّ
مهما تغتغت برضك فيهو بيفضح حالك والاحساس
انت الريد الاديتني أشيلو كهرّب نبرة صوتي
بين الحرف ونقطة بيشعل ماس
وصدّقني كبير..
تعّب قلبي كتير..
كان قسمتو بين الناس ألقاهو تملّي بزيد
أدّي الشفع حتّة ريدك..
يدفروا في ابواب الحلة ودفرة ايدم تدي الباب شكل الفرحة التمسح دمعة
نفوس منشرحة
والكان من فرحة ليهو زمان ماكان
وناس الحلة وحتّة ريدك..
الزعلان من جارو هناك يجري يقالدو حنين فرحان
أدّي النيل حتّة ريدك..
تصدّق إنو بيجري..يبوس في سحابة تجري تصب في حرازة هناك
كل ترابها يجيك رويان!
بفكّر أدّي عساكر البلد النام حزنان..
خايف نصبح نلقى الجنّة ونبقى في عالم آخر..
وأنا متمنّي أعيشك أول وآخر..
دنيا وأشيلك زاد للاخر
وخايف أحكيك.
|
|
 
|
|
|
|
|
|
|
 Re: سيرتك.. (Re: تماضر الخنساء حمزه)
|
Quote: مهما تغتغت برضك فيهو بيفضح حالك والاحساس
انت الريد الاديتني أشيلو كهرّب نبرة صوتي
بين الحرف ونقطة بيشعل ماس
|
تحتمل الرؤيا الأحلام ....
حينَ أُحِبُّكِ _ تتحضَّرُ آلافُ الكَلِمَاتْ ،
تتشكَّلُ لفةٌ أخرى، مُدُنٌ أُخرى ، أُمَمٌ أُخرى ،
تُتسارِعُ أنفاسُ الساعاتْ ، ترتاحُ حروفُ العَطْف .
وتَحْبَلُ تاءاتُ التأنيثِ ، وينبتُ قمحٌ ما بين الصَفَحَاتْ !!
تسلمي تماضر ،، وأنتِ تشعلين الماس والإحساس !!
محبتي ...
وصال عالم
| |
|
|
|
|
|
|
|
|
|
Re: سيرتك.. (Re: مدثر محمد ادم)
|
| Quote: تزاحم كل أصابعي تفر حقاتك تدخل بين فرقاتا شويّة..شويّ.. |
سلام يا عبق الريدة العبا انوفنا عطور و أسية
و شوق من تال النجمة الفاردة جناحها خيوط وردية
حنان القيفة الحاضنة امواج النيل و بتشبع منو شوية شوية
سلام يا نخلة بتطرح ود و وئام و كمان حنية
ابداع يا تماضر ،،،
| |
|
|
|
|
|
|
| |
وصال عالم
علي طاهر
فيس بوك
تويتر
انستقرام
يوتيوب
بنتيريست