|
Re: زمن العجائب ... خرتيت برى يهاجم اهلى فى التكينة ( مؤكد توجد صور ) (Re: انور التكينة)
|
بين كر و فر .. و مطاردات عنيفة .. شئ بالجرى ، و شئ بالركشات ، و تراكتور كان الامثل فى المطاردة . بين المزارع و الاشجار النيلية امتدت المطاردة لخمسة كيلومترات حتى قرية فضل ، ليتمكن سائق الجرار من ضربه بالمحراث مما ادى الى كسر عموده الفقرى . عادت الكتيبة المطاردة بالتهليل و التكبير ووضعوا الحيوان فى ساحة عامة جوار المقابر لتشهد المنطقة تجمعا هائلا للمواطنين و حضور شرطة قسم المسيد ، التى استلمت الخرتيت مع وحدة بيطرية مرافقة .
المهم : ان هنالك اثنان من نفس الفصيلة شاهدهما اهل البشاقرة شرق و لم يتم العثور عليهما ، و تقوم الشرطة الان بتمشيط المنطقة .
| |
|
|
|
|
|
|
Re: زمن العجائب ... خرتيت برى يهاجم اهلى فى التكينة ( مؤكد توجد صور ) (Re: سناء عبد السيد)
|
Quote: يا جماعة الحلوف او الخنزير البحري , حيوانات عشبية و تواجدها في المناطق دي شيئ عادي لا يستحق كل هذا الضجيج |
انتى حصل يا سناء شفتى الحلوف و لا كلام نظريات ؟ غايتو كان شفتيهو و ما خفتى يكون ليك حق .. لكن مع الكلام المالى البلد عن حيوانات غريبة كل يوم بى شكل ... و تظهر حاجة عمرهم لا شافوها لا سمعوا بيها .... دايراهم يتعاملوا معاها كيف ؟ يا سناء الشئ ده ساكاها البشاقرة كلها لما وقع البحر .. و طلع بالضفة التانية فى حالة ذعر ام هياج لا ادرى ، فحصل ما حصل ... للفقيد الرحمة .
| |
|
|
|
|
|
|
Re: زمن العجائب ... خرتيت برى يهاجم اهلى فى التكينة ( مؤكد توجد صور ) (Re: ناصر جبريل)
|
يا التكينه هو عمل شنو؟؟ هل هاجم الناس مثلا؟؟؟
ولا به ما بيعرفوهوا اهلكم وهم الخافوا منه؟؟؟
اعلم انه حيوان نباتي اي لا ياكل اللحوم.
انا اتفق مع سناء عبد السيد.
بعدين الانقا1 دي شكيتها على الله
شكلها جوعت كل حاجه وجابت الفقر لبلدنا
و الا فلماذا هذه التغيرات في كل ما هنالك حتى الحيوانات البريه
حياتها تأثرت....
كدي اتقصوا وشوفهم بعلموا في البيئه الحولكم شنو(ناس الحكومه)؟؟؟
خلت الحيوانات دي جاءت عليكم في القرى و الحلال.
| |
|
|
|
|
|
|
Re: زمن العجائب ... خرتيت برى يهاجم اهلى فى التكينة ( مؤكد توجد صور ) (Re: أبو عبيدة البصاص)
|
التكينة يا عمكـ أسه يعني ناس البشاقرة و التكينة كلهم خالين شغلهم وخايفين و مطاردين ليهم خنزير بري بيخاف من ظلوا ؟؟؟ ياخ الخنزير ده من أجبن الحيوانات و هو أصلاًَ عشبي يعني ما حياكل ليهو زول و حتى قرونوا دي ما بستعملها إلا في حالة إضطراره الشديد للدفاع عن النفس .. الخوف أن يكون هذا الخنزير لديه صغار تعتمد عليه في تأمين القوت
الكلام ده ما كويس في حق أهلنا ناس التكينة يا عمكـ !!
| |
|
|
|
|
|
|
Re: زمن العجائب ... خرتيت برى يهاجم اهلى فى التكينة ( مؤكد توجد صور ) (Re: أبو عبيدة البصاص)
|
العزيز أنور سلامات يبدو أن أهل التكينة لا يفرقون ما بين الحلوف وهو الخنزير البري ووحيد القرن وهو الخرتيت الحلوف حيوان عادي ويمكن أن يوجد في أي مكان حتى ولو كان هذا المكان جوار الخرطوم وليس التكينة وذلك لسبب بسيط وهو أن الخنزير هو حيوان عشبي وفي سبيل البحث عن العشب يمكن أن يسرح في طريقه إلى أي مكان فواضح ان الحنزير ذهب مع الريح من الجنوب إلى الشمال على خط النيل. أما الخرتيت فإذا ظهر هناك فلا يستطيع هؤلاء الأهالي التصدي له على طريقة الركشات والحصار البشري في ساحة مكشوفة الله لا وراكم الخرتيت فهو مثال للفراسة لما يتوحش. مع خالص مودتي لك وللمتداخلين
| |
|
|
|
|
|
|
Re: زمن العجائب ... خرتيت برى يهاجم اهلى فى التكينة ( مؤكد توجد صور ) (Re: باسط المكي)
|
وصورة ملحقة لحلوف يشبـه ما عندنا فى شرق الســودان، كما فى إثيوبيا، حلوف مسالم ونباتى، يعنى لو قدمت ليه هامبرقر ما بيتناولو منك.. البوست قال أن حيوانا غريبا (اخر زمن ناس التكينة بقو حناكيش)
ظهر فى قرية التكينة وقام المواطنون بعد مطاردة لعدة كيلومترات قتلوه بتراكتور.. وأستلمت الشرطـة (الجثـة).
يعنى بالله لو أسروه ووضعوه فى مكان فى القرية وأدوه علف وماء، لكان مصدرا خصبا لخيال الأطفال وتعجب الكبار، ولأضفى على القريـة نوعا من التصالح مع البيئـة ودرجـة كبيرة من (الطبيعيـة)..
وبهـذه المناسبـة أعيـد نشـر (قرنتية) هنا أيضاً
قرنتية
لا دبابة برمائية
لا جاسوسة مدسوسة
لا غواصة روسية
لا جندية في حركة
لا مختلسة مال شركة
لا قصفت حدود فشلا
لا كسرت صريف كسلا
ولا معروفة ختمية
قرنتية
لا صعلوكة لبست شورت
لا بتعرف شنو البظبورت
لا محتاجة جنسية
هي قايلة النيل سقف بيتا
وقايلة ضفافو محمية
جات منسابة عز الصيف
قايلة الناس بكرمو الضيف
قايلة النيل أمان والقيف
وقايلة الحاضرة عصرية
قرنتية
جات بصغارا دايرة الخير
لا شافت يفط تحذير
لا نزحت تكوس توزير
لا جاطت حركة السير
لا درات وسام تقدير
لا مستغلة عشرين وش
ولا بتعرف تعيش بالغبش
كان محتاجة بس للقش
وجات أحلامها دوغرية
قرنتية
لا بلعت عديل السوق
لا نضمت بدون طايوق
لا كنزت دهب أمو ماس
لا ظلمت بدون إحساس
لا عصرت شباب الناس
لا كتمت على الأنفاس
لا قطعت عشم بي فاس
لا داستنا زندية
قرنتية
لا دست سلع في الخيش
لا شربت مريسة العيش
لا ضبطوها في التفتيش
لا سجنوها شالو الفيش
لا خانت قسم أوديش
لا اجتمعت بمستر جون
لا أكلت مونة العون
لا سدت علينا الكون
لا سبت كتاب أو دين
لا سامتنا حمرة عين
ولا باعتنا ضهرية
قرنتية
جات مشتاقة للخرطوم
تزور أحبابها خايفة اللوم
تصيح وتنادي بالحلقوم
جنينة النزهة وين يا زول؟؟
لقت حال الجنينة خلا
حليل زمنها وحليل أهلها
لا قرنتية لا أصلة
لا صوت كوكو
لا بغلة
لا حلوف
ولا أسداً مهاب بالخوف
لا نمراً يشد الشوف
لا ضل فيل
لا تتيل
جريهو جميل
ولا غزلان ولا طاووس
يباهي النيل
لا زفة طيور ونعام
لا نمراً دفر قدام
كل الشلة يا غرنتية غمضة عين
أحالوهم لصالح عام
تقول الدنيا مهدية!
قرنتية
جت زي ضيفة ما غارة
لا محتاجة لي فيزا
ولا تصديق على زيارة
جات والشوق دموع حارة
تجدد في العيون الشوف
بين توتي وعلالي أبروف
قايلة الدنيا لسة سلام
ما خيم زمان الخوف
ولسة هناك ضعاف حرة
ما مطمورة للمرة
قايلة الناس بعزو الضيف
ما بسوقوهو لي حفرة
وجوار القيف
ما بيكلوهو في السفرة
ومصيرو مخيف
قايلة الحاضرة ما غابة
وقايلة حقوقها محمية
قرنتية
لا قدلت في شارع القصر
لا حامت في وقت الحظر
لا خشت على المأمور
ولا نطت سلك أو سور
لا دخلت على أمدرمان
ولا كسرت قفل دكان
لا دفرت على التلفاز
لا عضت كراع فنان
لا ذاعت بيان للناس
لا احتلت كمان حيشان
ولا نصبت شبك للحش
جات بصغارا كايسة القش
تلاقي القوت
صبح محظور
وخير البقعة جوا السور
سماحة الدنيا منسية
قرنتية
لا بتعرف عجن أو لخ
وجات أحلاما دوغرية
عجب ساقوها جوة الفخ
عجب من طولها وقعت تخ
عجب سلخوها صبحية
عجب
ونحنا
بنسلخ الانسان
كيف ما نعذر الحيوان
عجب والدنيا عصرية!!
قرنتية
لا دبابة برمائية
لا جاسوسة مدسوسة
لا غواصة روسية
لا جنيدة في حركة
لا مختلسة مال شركة
ولا حزبية بعثية!!
هاشم صديق
11/8/2001
| |
|
|
|
|
|
|
Re: زمن العجائب ... خرتيت برى يهاجم اهلى فى التكينة ( مؤكد توجد صور ) (Re: Abureesh)
|
Quote:
" ، ليتمكن سائق الجرار من ضربه بالمحراث مما ادى الى كسر عموده الفقرى ." |
damn
يا ناس التكينة إتقوا الله..
هـذا الحلوف من شرق لســودان وإثيوبيا معروف، وهو نباتى، مسالم.. سوى ليكم شنو؟
هل إتهجم على زول؟
هل دخل زراعة وخربها..
ألا تحبون الطبيعـة؟
دى نعمة الله ساقها ليكم، لتفرجوا الأطفال فى مخلوقات الله المختلفة.. فى أروربا الناس تسافر عشـان يشوفوا الطبيعة.
ألا توجد سلطات فى الســودان لحماية الحيوانات النادرة؟
| |
|
|
|
|
|
|
Re: زمن العجائب ... خرتيت برى يهاجم اهلى فى التكينة ( مؤكد توجد صور ) (Re: محمد عثمان الحاج)
|
كدى خلونى من الفلسفة و ناس التكينة ما عندهم ذوق و ما عندهم رحمة .. دى حاجة اول مرة يشوفوها فى حياتهم ، عشان كده قلت زمن العجائب .. يا اخى ده مخلوق قبيح و مخيف ، حتى الثانية صباحا لم يستطع عبد العزيز ابنى ذو التسع سنوات النوم من المنظر الذى راه ، شوفو القرنين و الاضالفين و ورونا ده خرتيت و لا حلوف و لا خنزير ؟ و ما هى مناطق تواجده الطبيعية ؟ و ما الذى جاء به لشرق النيل .. المنطقة التى وجد فيها ؟ العارف يقول ، وز الما عارف يستغرب زينا من الامور البقت مايلة دى .
| |
|
|
|
|
|
|
Re: زمن العجائب ... خرتيت برى يهاجم اهلى فى التكينة ( مؤكد توجد صور ) (Re: انور التكينة)
|
حسى العالم دى كلها ملمومه فى الحيوان المسكين ده
زى يوم اتلمو فينى يوم مشيت التكينه (بهظر معاك )
ياخ التكينه دى حلوة حلا وناسا حلوين انا اول مره ازورها عيد الاضحى عندى فيها ناسا عزاز
احلى حاجه عندكم يا انور الناس بتنوم فى الحوش والنجوم عندكم كتييييره
والجو يجنن والبحر والشجر والطيور والحنانه رخيصه (اتحننت عندكم)
بس وسعو الشوارع عشان العربيه تخش
(شطحت انا ولاحاجه ؟)
| |
|
|
|
|
|
|
Re: زمن العجائب ... خرتيت برى يهاجم اهلى فى التكينة ( مؤكد توجد صور ) (Re: Abureesh)
|
الم جنها نظريات و فلسفة بشكل ؟؟؟؟
يا عالم الحلاليف متواجدة بكثر في المزارع بالاخص المزارع الكثيفة زي مزارع الموز ... و عندنا في كسلا متواجدة بكثرة ... و اذكر انه في حلوف طلع من مزلاعة موز في كسلا في عام 1980 و شف حي الترعة جنوب الى ان وقع في بئر ساقية في نفس الحي ... و عندنا حي اسمه حي حلوف ... يعني الحلوف ما هربنا من غابة الدندر و لا من اي غابة او مزرعة مهجورة ... بطلوا خرافات و فلهمة في الفاضي و نطريات ة تعليق كل شئ في ؤقبى حكومة الجن دي ...
بالمناسبة في دول الباسيفيك ياكل الحلوف زي و زي اي خنزير حايم
ما تخلوني اطلع فيكم قرفة مبارة مصر و الكميرون
| |
|
|
|
|
|
|
Re: زمن العجائب ... خرتيت برى يهاجم اهلى فى التكينة ( مؤكد توجد صور ) (Re: انور التكينة)
|
Quote: كمان برى فيها حلاليف ؟ |
تسألنى أنا عن برى يا أنور؟
ما تسأل نفسك طيب ياخ؟
تعرف أول مرة أجى بالقطر من بورسودان.. بالتذكرة كانت إتنين وتمانين قرش من بورسـودان للخرطوم عمومى. نزلت مع أبناء عمنا فى بحرى (المزاد) ثم الى أمدرمان.. يعنى برى دى لا شفتها ولا مريت بيها إلا فى الطريق لمعرض الخرطوم الدولى. والحلايف دى ونحن صغار كنا نشوفها فى غابات العدليب جنوب طوكر، حيث خلقنا الله من أجداد جدودنا وجدود أجدادنا.
| |
|
|
|
|
|
|
Re: زمن العجائب ... خرتيت برى يهاجم اهلى فى التكينة ( مؤكد توجد صور ) (Re: انور التكينة)
|
فطستنا من الضحك بس ما زي فطسه حلوف التكينه ذكرتني المثل التسوي كرت تلقياها في جلدها ===== يا ناس هوي انور جاب ليكم خبر وشكلو متوقع صم سيمباتي...تقومو تشبكوه التكينه وما ادراك ما الكدروك وما الحلوف والرفق بالحيوان وهلم جرا ===== لكن والله اتكيفت من البوست واتخيلت المنظر ....ياخ ده فلم جاهز للاوسكار في الكوميديا ==== علي اي حال كل تضامني مع ناس التكينه ونرجع نقول للكدروك تموت تستاهل وتستحق تتقرص لحدي ما تموت تاني البوديك لي نا ما بشبهوك شنو ==== انور التكينه حلفتك عليك الله ما تزعل مني ...خلي روحك رياضيه
وكل التحيه والاحترام لك ولجميع الاهل بالتكينه
===== تخريمه انتو يا العارفين الشيء ده صحي لحمو بتاكل؟ يعني في ناس في السودان بياكلو؟
| |
|
|
|
|
|
|
Re: زمن العجائب ... خرتيت برى يهاجم اهلى فى التكينة ( مؤكد توجد صور ) (Re: انور التكينة)
|
تحياتي ليك استاذي العزيز/انور وسلام لأهلنا في التكينة تصور أن الخبر جاني من ودراوة انو في حيوان ظهر في البشاقرة والصباح قريت في الجرايد انو دخل التكينة ياسيدي حمدآ لله على السلامة وبالجد حاجة مش تخوف دي ممكن تقتل عديل والسبب انو اهلنا الطيبين ديل ماشافوا حيوان بالشكل المرعب ده وانا من هنا استنكر وبشدة تعاطف بعض الأخوة واعتراضم على قتله يعني مطلوب من الناس كان تنتظرو لغاية ما يموتوا نفرين تلاتةمن الخوف حتى بعد داك العكاكيز تقع ولا رايك شنو اختنا منال حكاية الرفق بالحلوف اقصد بالحيوان دي اهلنا ما بمارسوها مع مصيبة قدر ده تاني سلامة اهلنا في التكينة ومايشوفوا تاني لا حلوف ولا مرفعين
| |
|
|
|
|
|
|
Re: زمن العجائب ... خرتيت برى يهاجم اهلى فى التكينة ( مؤكد توجد صور ) (Re: انور التكينة)
|
سلام يا التكينة,,, ونبارك لكم هذا النصر المؤزر على الكدروك شقى الحال المسكين الجعان الجاكم يستنجد بيكم طالبا اللجوء الإنسانى,, أبوريش الطوكراوى ما البُرّابى سأل سؤال حيرنى الأقولو فيهو وأترك الإجابة لكم,,Quote: ألا توجد سلطات فى الســودان لحماية الحيوانات النادرة؟ |
إنتو ابوريش دا بى جدو!!!!! يا ابوريش!!!!!!!!!!!!! دى جات صدفة ولا قاصدا؟؟؟؟
أجمعوا فلاسف هذا الزمان فقد تجدوا عندهم الإجابة!!!!
فعلا مفروض يكون فى سلطات لحماية الحيوان ولكن قبلها فلتكن هنالك سلطات لحماية الإنسان من السلطات,,
إنا لله زى ما بقول عماد عبدالله!!!!!!
مرة أخرى حمدا لله على سلامتكم أخى أنور,,
الركشة الوداها التكينة شنو بالمناسبة دى؟؟؟؟
تحياتى,,
| |
|
|
|
|
|
|
Re: زمن العجائب ... خرتيت برى يهاجم اهلى فى التكينة ( مؤكد توجد صور ) (Re: زهير حيدر صديق)
|
يا التكينة نسيت أقول ليك وإنت زول أخونا ومننا وفينا,,,
أنا كان محلك برفع أكبر تلفون وأصحى أبصلعة أقول ليهو هسسسسسسسسسسسسسسسسسسسسسسسسسسسسة هسسسسسسسسسسسسسسسسسسسة ما بكرة أقطع الفيلم دا,,
لأنو كان دينق صحى قبل كده كلنا نشوف لينا بلد نطلب منها لجوء,, جيتو مقنطر وإنت عارفو ما بقصر فى الملح
يا بكرى رأفة بأخينا التكينة ,, الحقو وأنقذو من دينق,,
خرتيتكم زاتو بمبى زى كاميرتكم,,
إنت متأكد ديل ناس التكينة ما قاردن سيتى؟؟؟؟؟؟؟؟؟؟؟
| |
|
|
|
|
|
|
Re: زمن العجائب ... خرتيت برى يهاجم اهلى فى التكينة ( مؤكد توجد صور ) (Re: هشام هباني)
|
Quote: الناس الما شافت وحيد القرن في القروش ولا في كتاب العلوم ما شافته لا في حديقة الحيوان ولا في التلفزيون ولا في النت؟!!!!! واضح إنو خنزير بري وأسمه (بومبا) لمن يتابعون تيمون وبومبا |
طيب رد على المقطع الفوق ده..وسوف نؤجل قصة اهل العوض الى ما بعد حين..!!
ما تضايق يا انور..وتشبكنى بروفايلك واسمك!! نحنا هنا فى موضوع اهل العوض والخرتيت القطعتوا البحر عوم بعد هجومكم البربرى عليه!!
| |
|
|
|
|
|
|
Re: زمن العجائب ... خرتيت برى يهاجم اهلى فى التكينة ( مؤكد توجد صور ) (Re: أيمن الطيب)
|
.. . خرتيت برى هذا الحيوان الغريب اود ان اوضح الاتى : هناك فرق بين الخرتيت والخنزير
الخَرْتيت هو حيوان ضخم وهو واحد من أكبر المخلوقات الأرضية الموجودة حاليا. ويطلق عليه أيضًا الكركدن ووحيد القرن..
اما الخنزير فهو اما عادى ابيض او بتاع مزارع .. ما ظهر فى التكينة وموضح بالصورة هو خنزير برى ( الحلوف ) يصل طول الخنزير البري إلى ما بين 1,10 و 1,80 متراً، ووزنه ما بين 75 و300كلغ.
والله اعلم
_______
حسي بتاع الكرتون دا بعمل ليكم حاجة looooool
| |
|
|
|
|
|
|
Re: زمن العجائب ... خرتيت برى يهاجم اهلى فى التكينة ( مؤكد توجد صور ) (Re: عامر تيتاوى)
|
تحياتي يابن عمي
Quote: تعرف يا محمد زكريا لو ما حلفتنى بى الله كنت خليت نشامى التكينة ينتظروك فى المطار . |
ما يحتاج وما للدرجة دي ( الردم ) هنا ..
والله في كلام زي الدراب .. لمن تقولوا يخلي
الزول يترصد .. كدي شوف جنس البسوي فيهو صديق مهدي
بقية الناس المستغربين من ردة فعل ناس التكينة
خليهم يورونا القيامة القائمة في الخرطوم اليومين
كل أجهزة الإعلام شغالة الحيوان الغريب .. الحيوان الغريب
وفي الآخر طلع كلب ..
موضوع تهويل حكاية الكلب دي ذكرتني طرفة سمعتها من
واحد من أهلنا ناس البشاقرة غرب ..
قال مرة ظهر عندهم في الحلة ( كلب سعران )
قاموا إجتمعوا في النادي عشان يشوفوا حل
صادف إجتماعهم مرور واحد من ناس التكينة الساخرين
سمعهم يتداولون وأحدهم يخاطب الجمع بقوله :
الخطة كالتالي .. فقاطعهم زول التكينة بقوله
ها ناس هو كلب شنو السويتو ليهو خطة
| |
|
|
|
|
|
|
Re: زمن العجائب ... خرتيت برى يهاجم اهلى فى التكينة ( مؤكد توجد صور ) (Re: عامر تيتاوى)
|
تيتاوى قال,,Quote: ممكن تجد من لا يفرق بين دجاج الوادى وديك العدة |
وبين الخرتيت (البّرى) وضكر الكدروك !!!
سبحن الله زى صورة الناس الفوق المتصورين مع الكدروك ديل وشى بوليس وشى إحتياطى مركزى وشى قوات خاصة ذكرتنى صور بنشوفا معلقة فى بيوت سودانية أو أماكن مختلفة بس الفرق بكون إنو الصيدة ,,,أسد ياخ قالو اللبؤة ما بتصورو معاها من حرة قلوبهم ورجالتم !!!! والبوليس الواقف فى الصورة دا حقو يمعطو دبابيرو لو عندو دبابير اصلا,,,
أستاذ التكينة..لك العتبى ,, فقد أمتعتنا اليوم,,,
تحياتى..
| |
|
|
|
|
|
|
Re: زمن العجائب ... خرتيت برى يهاجم اهلى فى التكينة ( مؤكد توجد صور ) (Re: إبراهيم عبد الحليم)
|
Quote: الم جنها نظريات و فلسفة بشكل ؟؟؟؟
يا عالم الحلاليف متواجدة بكثر في المزارع بالاخص المزارع الكثيفة زي مزارع الموز ... و عندنا في كسلا متواجدة بكثرة ... و اذكر انه في حلوف طلع من مزلاعة موز في كسلا في عام 1980 و شف حي الترعة جنوب الى ان وقع في بئر ساقية في نفس الحي ... و عندنا حي اسمه حي حلوف ... يعني الحلوف ما هربنا من غابة الدندر و لا من اي غابة او مزرعة مهجورة ... بطلوا خرافات و فلهمة في الفاضي و نطريات ة تعليق كل شئ في ؤقبى حكومة الجن دي ...
بالمناسبة في دول الباسيفيك ياكل الحلوف زي و زي اي خنزير حايم |
تحياتي يا الفاروق وأبا الريش بالله الحناكيش ديل جايين من وين ؟ أنا مرة شفت بعض أولاد المدينة ساكيهم عجل صغير ! إلى وقت قريب كنت أرجع إلى البيت وعواء الكرايات يشق الآفاق بعد غروب الشمس مباشرة. وفي عصر لم أحضره كان الكراي يخطف الرضيع من صدر أمه النفساء ثم يتسلل به ليتعشى به في غابات الدوم بأويتلا. أما الحلاليف دي كنا عادي بنوقف العربية في الشارع حتى يمر قطيع الحلاليف وينصرف كما نفعل مع قطيع من النعاج أو البقر .
أنا خايف بكرة بورداب بكري ديل يفتحون لينا بوست عن صبرة* تهاجم سكان العمارات
_____________ *الصبرة في شرق السودان غير الصبرة في شماله
| |
|
|
|
|
|
|
Re: زمن العجائب ... خرتيت برى يهاجم اهلى فى التكينة ( مؤكد توجد صور ) (Re: مجدي عبدالرحيم فضل)
|
سبحان الله ..العالم كله مفتكرنا معلمين في معرفة الحيوانات وبعضهم مفتكرنا عايشين والتماسيح حايمة بيناتنا في الاسواق( تماسيح المويه قصدي)
يقولوا علينا شنو لمن يعرفوا البلد كلها بطلت شغلتها وبقت أخبار الجرايد(اهالي الحلفاية في مطاردة شرسة حتى الساعات الأولى من الصباح مع (جريو) وشايلين سلاح وعكاكيز كمان) ولا يلقوا حتى أهل القرى ما بعرفوا الخرتيت من الحلوف.
وكمان بيعملوا كمين لقرنتية مسكينة!
يا حليل جنينة الحيوانات يا أنور..الزي ولدك دا كان هسي يكون يعرف كل أنواع الحيوانات وطبيعتها الغذائية والمتوحش من المستأنس والنباتي من الحيواني!
حيرنا القرنتية وجهجهتو الحلوف!
بكرة نسمع البلد في مطاردة عنيفة حتى الفجر مع كديس خلأ!
| |
|
|
|
|
|
|
Re: زمن العجائب ... خرتيت برى يهاجم اهلى فى التكينة ( مؤكد توجد صور ) (Re: مجدي عبدالرحيم فضل)
|
Quote: مافي زول من التكينة زار حديقة الحيوانات تكون دي مشكلة كبيرة خلاص
|
اولا يا سيد مجدى جنينة الحيوانات دى شلعوها قبل كم سنة ؟ و شوف الشباب الفى الصورة و احكم ... ثانيا : التكينة دى مافى واق الواق .. كلها 70 كيلو من الخرطوم، و معظم الموظفين و العمال يسكنون بها و يداومون يوميا بالخرطوم . طبعا انا شفت ناس لما يكونوا ماشين الخرطوم بقولوا نحن ماشين السودان . يعنى زى واحد من المتداخلين استغرب لوجود الركشات فى التكينة ، مع انو الركشات هناك زاحمت الناس فى الشوارع . التكينة يا سادة مثلها مثل اى حى فى الخرطوم و ارقى من كثير من نواحى العاصمة .. كل ما يخطر على بالكم من ادوات التطور و العولمة تسايرها التكينة و ينبغ بعض ابنائها فى بعضها . و اهم من كل ذلك انها احتفظت بقيم القرية السمحة من مروءة و نخوة و شجاعة و تراحم و تكافل ، و ترابط اجتماعى لم تفصم عراه ما اعترى اغلب مناطق السودان بحمد الله .
| |
|
|
|
|
|
|
|