|
|
 إعتذار للجميع ....
|
بهذا أعلن إعتذاري للجميع عن البوست الذي وصفت فيه البعض ضمنياً بالكلاب الضالة حتي وإن كان بدون تخصيص .. وأعتذر عن حِدة خطابي الذي لم أكن أعي أنه سيبقي بعدي كأثر سيئ بعد مماتي .. وأرجو أن تكون هذه الكليمات ماحية له .. فكل من يسطر حرفاً هنا يوماً سينعيه الناعي وسيقي هنا ماكتبت يداه ..
وأعترف بأني جهلت بذلك القول وبذلك الوصف الذي لا يليق بأحد حتي وإن حسبته مخطئاً ..
وثانياَ أعتذر للسادة المراغنة عن إبداء الغضب لهم بهذه الجهالة الفجة ، إذ أنهم لا يحتاجون لأمثالي للدفاع عنهم بتلك الطريقة البعيدة عن خلقهم الرفيع وأدبهم الموروث .. فقد ظللت أنأي عن التصدي لمن يتعدي عليهم لأني أعلم أن ذلك يحتاج لمقام يليق وليس لعنف لفظي هم في غني عنه ..
وأخيراً وفوق كل شئ أستغفر الله العظيم ..
|
|
 
|
|
|
|
|
|
|
|
Re: إعتذار للجميع .... (Re: Munir)
|
Quote: بهذا أعلن إعتذاري للجميع عن البوست الذي وصفت فيه البعض ضمنياً بالكلاب الضالة حتي وإن كان بدون تخصيص .. وأعتذر عن حِدة خطابي الذي لم أكن أعي أنه سيبقي بعدي كأثر سيئ بعد مماتي .. وأرجو أن تكون هذه الكليمات ماحية له .. فكل من يسطر حرفاً هنا يوماً سينعيه الناعي وسيقي هنا ماكتبت يداه ..
وأعترف بأني جهلت بذلك القول وبذلك الوصف الذي لا يليق بأحد حتي وإن حسبته مخطئاً ..
وثانياَ أعتذر للسادة المراغنة عن إبداء الغضب لهم بهذه الجهالة الفجة ، إذ أنهم لا يحتاجون لأمثالي للدفاع عنهم بتلك الطريقة البعيدة عن خلقهم الرفيع وأدبهم الموروث .. فقد ظللت أنأي عن التصدي لمن يتعدي عليهم لأني أعلم أن ذلك يحتاج لمقام يليق وليس لعنف لفظي هم في غني عنه ..
وأخيراً وفوق كل شئ أستغفر الله العظيم ..
|
قول..لا ينم ما بدواخلك صدقا..
فانت الا سقيم بما يعتمل ...فيك..إإ
كل عنوانين بوساتك...تجلى عرفانى..
فتيقن...اى حرف...يتجاذبك.
..
| |
|
|
|
|
|
|
|
|
|
Re: إعتذار للجميع .... (Re: Munir)
|
Quote:
بهذا أعلن إعتذاري للجميع عن البوست الذي وصفت فيه البعض ضمنياً بالكلاب الضالة
|
LIKE
Accepted and appreciated though I don't count myself as one of that insulted group and I believe none
| |
|
|
|
|
|
|
|
|
 Re: إعتذار للجميع .... (Re: ود الخليفه)
|
تحياتى اخى منير ..
انت رجل يستحق الاحترام ... وانا من المتابعين لما تكتب هنا... واعجبنى قولك بان الحروف ستبقى محفوظة حتى بعد مفارقة هذه الفانية ... عليه من الافضل لنا جميعا النأى عن اى تجريح او اساءة ناهيك عنها، اذا لم تكن مكتوبة فحسب ... بل حتى لو قيلت شفاهة فان اثرها والمها سيظل محفورا على امل نسيانها مع مرور الايام ... لكن الاساءة المكتوبة ستظل محفورة كما جرح غائر فى الجسد لن تمحوه تجاعيد ومرور السنين ...
وهذه دعوة لكل من سيطر عليه شيطانه فى لحظة غضب واخذته العزة بالنفس ان يبادر الى محو كل ما ساءة به لغيره ... والكريم من رد اساءة غيره بفطنة وحكمه ... والعقلاء باستطاعتهم التمييز بين الرث والثمين ...وبين المسىء والمساءة اليه ... وبالتالى معرفة من يستحق الاحترام ومن سيبقى نكره لا تحمد سيرته ...
| |
|
|
|
|
|
|
|
|
|
Re: إعتذار للجميع .... (Re: حسام عبد الرحيم)
|
العفو والعافية يا زول..
ممكن تتراجع لينا عن نبؤة فلس امريكا ولا الموضوع دا برا من يديك 
----------
بعدين يا سفيان ياخي مامكن يعتذرو ليك بالاسم بهناك وتجي تزاحمنا في الجماعي دا:)
| |
|
|
|
|
|
|
|
|
 Re: إعتذار للجميع .... (Re: حسين نوباتيا)
|
Quote: أعتذر عن حِدة خطابي الذي لم أكن أعي أنه سيبقي بعدي
كأثر سيئ بعد مماتي .. وأرجو أن تكون هذه الكليمات ماحية له . |
الإعتذار يجُب ما قبله.
تسلم أخي منير...
| |
|
|
|
|
|
|
|
|
|
Re: إعتذار للجميع .... (Re: معاوية المدير)
|
سلام يا منير
والله كم مرة قربت أعلق على بوستك المعني لكن لسبب ما لم أفعل فقناعتي كانت أنه لا يشبهك. ما حأقول ليك شكرا على الاعتذار فهو واجب لكن بحمد الله لم تخيب الظن فيك.
| |
|
|
|
|
|
|
|
|
|
Re: إعتذار للجميع .... (Re: smart_ana2001)
|
يا منير يا حبيب كيفنك وشبابك والبرد عندكم ..
قطعا جزء كبير من الاعضاء هنــا لا يعلمون كثيراً عن خلفاء الختمية فقد ترعرع ابناء الشعبية تحت ناظريهم
رحم الله من انتقل منهم الى ربـه واطال من تبقى فى طاعته ...
قطعاً طوال حياتنا بقرب الختمية لم نسمع عن احد منهم رفع صوت ناهيك عن اساءة احد
لذلك يجئ الغضب حين وصف شخص منهم بطريقة لا تمت باى صورة الى مثلنا وسلوكياتنا ...
أسأل الله التوبة والاوبه والمغفرة من لدن رحيم ودود
ثم البحث عن العفو ممن جهلت عليه
وهذه هى الاستيكة التى منحنــا اياها سيدى وسيدك رسول الله
| |
|
|
|
|
|
|
|
|
|
Re: إعتذار للجميع .... (Re: jini)
|
منير:
هكذا هم المتصالحون مع انفسهم, يراجعونها
عهدناك متصالحا مع النفس ومتناغم مع الغير
ومختلف في الطرح مع البعض الاخر, لكنك تحفظ الود
كشعرة معاوية.
تشكر يا منير علي المراجعة والاعتذار.
مودتي
| |
|
|
|
|
|
|
|
|
|
Re: إعتذار للجميع .... (Re: Elawad)
|
السلام علي الجميع وأشكركم علي الدعم المعنوي ..
والله يا أخواننا صحيت الساعة ٣ صباحاً ، وقام جاءني خاطر مراجعة للكلام الكتبته في تلك اللحظات الغاضبة .. لقيت أني صرفت ذنوب ساكت في الهواء ده بدون مبرر !! .. الناس الفي المنبر ده بالنسبة لأي واحد فينا عبارة عن صورة بروفايل شايلاها الانترنت وأفكار مفكوكة في الهواء .. أيوة صاح ممكن تكون أفكار قاتلة لكين ....!!
قمت قلت هسه الواحد لو ما اصبح للصباح وشالته النومة الأبدية وهو كاتب ليهو كلام زعل يسئ للآخرين - أها الواحد يقعد يكابس في قبره ويجابد ليهو زول حي ويديهو الباسويرد يقول ليهو عليك الله أمشي خش البورد سريع وأمسح كلامي داك وقول للناس العفو ياناس؟؟ .. بي وين عاد الساعة ديك وإنت راقد بالجنبة وماقادر تتقلب ولا تحرك إيدك وتكورك بدون صوت !!!!!!! .. وصوتك زاتو ما تقدر تسمعه ؟؟ !!!.. كمان يقوم بكري ينقل الكلام كله يخته ليك في مكتبة المرحوم !!! .. يجوا الناس يقروهو من أقاصي الدنيا ويشوفوا الجوطة الكنت عاملها والضحك والقرقراب .. واحدين يقولوا يا حليلو وواحدين يسبوا ويلعنوا .. ولو بقيت محظوظ واحد يقول الله يرحمه ..
فقمت من سريري - سرير شنو ؟كنت نايم فوق الكنبة والتلفزيون فاتح - ومشيت سريع قلت ألحق الجماعة ديل ونختها ليهم كده .. وده قدر قدرتي ..
الشئ التاني يا جماعة أنا زاتي قلت إني غير مؤهل للدفاع عن العترة النبوية الميرغنية .. وأقول ليكم - وعارف جزء كبير منكم منكرين يعني ما معترفين بكلام العترة النبوية - الحذر ثم الحذر من السخرية من أهل بيت الرسول الذين أجمع عليهم الأولياء الصالحين !! .. أنا ماواعظ ولا عاوز أعمل ليكم فيها واعظ - أنا لو قدرت علي رقبتي ما بكون قصَّرت - لكين من باب التذكرة فقط بخطر هذه السخرية .. سيبكم من الآية بتاعة لا يسخر قوم من قوم .. وانتبهو لآية تانية من خصائص الرسول صلي الله عليه وسلم .. وهي قوله 'قل لا أسألكم عليه أجراً إلاّ المودة في القربي' وذلك خلافاً لكل الرسل الذين كانوا يقولون لا أسألكم عليه أجراً إن أجري إلاّ علي الله .. إن أجري إلاّ علي الله .. إن أجري إلاّ علي الله .. هكذا .. ولكن بالنسبة لنبينا قال 'المودة في القربي' وذلك لأن البعض كانوا يؤذون النبي بأذية أهل بيته .. فذلك شأن عظيم وخطير أن يخوض المرء بالسخرية من قربي الرسول .. ياخي الواحد لو ماقادر يحاول يعمل ساتر ويحترس ويضع إحتمال لربما يكون خائضاَ في وحل ..
أيوة أنا معاكم أن السياسة قذرة وأي حاجة، لكن لو نظرنا لأي سياسي سواءً كان حكومي أو معارض فإنه يجتهد فقط وإجتهاده قابل للخطأ والصواب .. والسياسة دي أعتي من أي سياسي مهما كان لأنها ممكن تختك في محك بين الحياة والموت - يا إما تقتل عدوك أو يقتلك - أو تلقي نفسك في موقف منحاز لأخوك أو إبنك أو صديقك الذي سرق مثلا أو ارتكب أي جرم آخر .. وتكون أنت في السلطة فتجد نفسك بين خيار عقابه الذي ربما يؤدي للقصاص أو السجن أو .. ومهما كان الزول معتدل يجد نفسه في مثل هذه الخيارات بين الإحياء والقتل ..
المهم يا جماعة أحمدوا الله إنو الغالبية منكم شغالين كلام ساكت وربما ربنا ما دخلكم في الحكم علي مصائر العباد من موقع سلطة .. لكين الكلام المكتوب ده مع الإنترنت دي بقي خطير .. والمابيخاف من رقيب وعتيد الله جاب ليهو الانترنت دي تسجِّل ساكت .. ولاحظوا برضو إنو المابيخاف من رقابة ربّه الستار ربنا سلَّط عليه التكنولوجيا والكاميرا الخفية وكاميرا الموبايلات التي تبحث عن الفضائح !! .. الله بيسترك لغاية ما تموت لكين البني آدم لو لقي فيك فرصة بيبشتنك !! ..
علي أي حال الكلام الكتبته ده بحاول أذكِّر بيهو نفسي أولاً وقلت لا بأس من مشاركة من رغب وفتح قلبه ليهو .. هو في الأساس تذكير لي أنا ولكني عارف نفسي نسَّاي .. ولو إتشبكت مع زول في باقي العمر ده ما يجيبه لي في كوت ويبتزاني بيهو .. من هسه بقول ليكم البني آدم نساي وما مضمون !!! ..وأنا عارف نفسي كعععععععب ..!!!.. وعارف إنو عندي آراء بتجيب للناس كثافة عالية لكين الواحد يسوي شنو ؟ هذه رؤيتي للحياة ولكم رؤيتكم .. لربما يقود تطابق الرؤي للمودة والتراحم ولربما يؤدي تضادها للصدام والموت .. وهكذا الحياة .. والأعمال بالنيات .. أجمل عبارة تصف هذا: ماقيل عن أن الحلاَّج شهيد قتله مجاهدون !!! ..
:
:
:
يا منوبيا ياخ إنت أكدت لينا فلس أمريكا تاني أنا أقول شنو إذا شهد شاهد من أهلها ؟؟!! .. أمريكا دي نحن عاوزنها ذخر للبشرية في عمل الخير لكن للأسف السياسة الصعبة سايقاها في طريق الشر !! .. ودورها علي أي حال قرَّب ينتهي .. بس المشكلة أن البديل يأجوج ومأجوج !!! ..
:
:
:
ياطارق الجبلابي شنو ياخ جاي طاير فينا جوز أكتر من مرة؟ الحاصل شنو ياخ؟ هل أنا دايسك علي طرف موجعك ؟؟ .. روق شوية ياخ..
:
:
:
وليكم التحية كلكم ..
| |
|
|
|
|
|
|
|
|
|
Re: إعتذار للجميع .... (Re: محمد عبدالرحمن محمد)
|
اولا...الاعتذار مقبول
واحي فيك هذا المسلك الشجاع ...
بس حاجة للتوضيح..
كغيري .. استهجنت مشاركة السيدين ابناء السيدين ..
لسبب واحد..
هوان السادة زعيمي الحزبين( مع كامل الاحترام لهم ولانصارهم ومريديهم) يمارسون الاستهبال علي الشعب السوداني الغلباااان ..ما معني ان تشارك في طاقم الرئاسة وفي دولة تتبع اسلوب الحكم الرئاسي ( السلطات في يد رئيس الجمهورية) وتقول انك لاتود المشاركة ؟
في ظل هذا الوعي السياسي و عصر المعلومة.. لااقبل ان يمارس هذا السلوك وكأن هذه البلد اقطاعية تدار علي حسب المزاج الاقطاعي.. نعارض نعارض .. او نشارك فلنشارك.. هذا السلوك القطيعي لم يعد له وجود حاليا.. زمانه فات..
| |
|
|
|
|
|
|
|
|
|
Re: إعتذار للجميع .... (Re: محمد البشرى الخضر)
|
Quote:
إعتذار للجميع ....
|
وأنا كمان....؟
العفو والعافية ياخ..
رغم أننا أولاد حله واحدة ولكن يبدو أن أجيالنا أختلفت فلم أسمع بك زمن كنت بها وبالتأكيد لم تعلم بي ولم تعرفني...
وبالتأكيد واليقين تعرف بيتنا وأهلي وأقرب ليك المسافة جارنا عبدالصادق مرحوم البقى حكم بعد مرقتتي .....
المهم...
أكبرت فيك هذا الإعتذار
وتمنيت ملاقاتك وأسأل الله أن نلتقي إن الله مد في العمير،،، مع أنه الباقي ما كتير وإن كتر بيبقى في الخرف....
شكراً منير
وعليك الله ما تسكني في الخرابي دي...
ولك العتبى حتى ترضى
الشايقي
http://www.youtube.com/watch?v=WjNosdjuv7s
[email protected]
http://alkatwah.com
.
| |
|
|
|
|
|
|
|
|
|
Re: إعتذار للجميع .... (Re: عادل نجيلة)
|
ألاخ منير تحية و ســـــــــلام.
أنا عضو فى هذا المنبر منذ عام 2007 .
كنت دائما أتحاشى التداخل معك
وهذة أول مداخلة لى معك
أعتزارك! منى أنا شخصيأ مقبول
و انشاء اللة فى ميزان حسناتك
| |
|
|
|
|
|
|
|
|
|
Re: إعتذار للجميع .... (Re: عابدون محمد عابدون)
|
Quote: هوان السادة زعيمي الحزبين( مع كامل الاحترام لهم ولانصارهم ومريديهم) يمارسون الاستهبال علي الشعب السوداني الغلباااان ..ما معني ان تشارك في طاقم الرئاسة وفي دولة تتبع اسلوب الحكم الرئاسي ( السلطات في يد رئيس الجمهورية) وتقول انك لاتود المشاركة ؟
في ظل هذا الوعي السياسي و عصر المعلومة.. لااقبل ان يمارس هذا السلوك وكأن هذه البلد اقطاعية تدار علي حسب المزاج الاقطاعي.. نعارض نعارض .. او نشارك فلنشارك.. هذا السلوك القطيعي لم يعد له وجود حاليا.. زمانه فات.. |
أنا ومعاي قِطاع كبير من "أولاد البحر" مِن يوم الليلة دي قررنا نبقى إنقاذ وأنصار وإتحادي ديمقراطي لِمُواجهة ما يُسمى بِالـ[الحركة الثورِية السودانِية] لتحرير السودان، ولو الشيطان أب قِرينات سوالو حزب وأكان ضِد ها "الحركة" بنبقى في معِيتو تاااااب
| |
|
|
|
|
|
|
|
|
|
Re: إعتذار للجميع .... (Re: haroon diyab)
|
يامنير الشايقى دا ود حلتنا ووالدته تعتبر من أشهر نساء الحلة الله يديم عليها الصحة والعافية وهى الحاجة فاطمة الداية وتعتبر الام الروحية لشريحة كبيرة جدا من ناس الشعبية ومين من نساء الشعبية ماكانت امنا فاطمة بجانبها بيدها الحانية وتسهر الليل بجانبها تخفف عنها آلام الوضع.
بس انا فى الحقيقة مامتذكر هل هو أكبر أم صديقى المرحوم شقيقه محى الدين رحمه الله واسكنه فسيح جناته.
اوع يكون بى كدة يالشايقى كشفت عمرك الحقيقى.
| |
|
|
|
|
|
|
|
|
|
Re: إعتذار للجميع .... (Re: عابدون محمد عابدون)
|
لا يأتي الاعتذار الا من الشجعان
من ناحية اخرى استغرب يا منير دفاعك عن هؤلاء الانتهازيين المتعطلين المتبطلين ممن تسميهم بالاسياد المراغنة .. اسياد على شنو وعلى منو يا صديق ؟؟ هؤلاء واسرة الصادق المهدي طفيليات تعتاش على الشعب السوداني وتمارس تدمير الوطن بالتحالف مع الانقاذ وكل اعداء الشعب تاريخيا ؛ أو كما قال الشاعر عنهم:
وما ضرّت العلياء إلا عمائمُ ........ تساوم فينا وهي فينا سوائم
| |
|
|
|
|
|
|
|
|
|
Re: إعتذار للجميع .... (Re: Abdel Aati)
|
Quote: رغم أننا أولاد حله واحدة ولكن يبدو أن أجيالنا أختلفت فلم أسمع بك زمن كنت بها وبالتأكيد لم تعلم بي ولم تعرفني...
وبالتأكيد واليقين تعرف بيتنا وأهلي وأقرب ليك المسافة جارنا عبدالصادق مرحوم البقى حكم بعد مرقتتي ..... |
يازول اكشف عن نفسك
معقول ياعبدون الشايقي شقيق عادل ود حاجة فاطمة
ياخي الدنيا ضيقة كيف
طبعا الان عادل جارنا بنصلي في مسجد واحد
| |
|
|
|
|
|
|
|
|
 Re: إعتذار للجميع .... (Re: وليد عبد اللطيف)
|
العزيز المحترم ...منير ...
شكراً ياحبيب على الاعتذار ..وانا شخصياً اقبله رغم يقيني اني كفايز لم تعنيني ..
لكن ياريت كان تثتثني ناس قيقراوى واساسي وكم نفر كده من الاعتذار ده ...
او تحويلهم من الضالة للبوليسية ...
تحياتي ،،
| |
|
|
|
|
|
|
|
|
|
Re: إعتذار للجميع .... (Re: فايزودالقاضي)
|
Quote:
العزيز المحترم ...منير ...
شكراً ياحبيب على الاعتذار ..وانا شخصياً اقبله رغم يقيني اني كفايز لم تعنيني ..
لكن ياريت كان تثتثني ناس قيقراوى واساسي وكم نفر كده من الاعتذار ده ...
او تحويلهم من الضالة للبوليسية ...
تحياتي ،،
|
يا ود القاضي
انك لفي ضلالٍ مبين
وكت ما عنوك التحشر ليك شنو!؟
كبّر الـG و روّق الـD يا حبيب .. المافي شنو!؟
--------
بس امسكوا مني صبري طه بالله!
وكت جينا ممكن نشارك؟
الوصية بالمهلة:
يا منير يا حبيب الحدة عمرها ما اجدت و لا ودت
احرص على توصيل رايك، و خلي الباقين يقولوا رأيهم بسلام
المافي شنو!؟
| |
|
|
|
|
|
|
|
|
|
Re: إعتذار للجميع .... (Re: قيقراوي)
|
Quote: لكن ياريت كان تثتثني ناس قيقراوى واساسي وكم نفر كده من الاعتذار ده ...
او تحويلهم من الضالة للبوليسية ... |
اصيل يامنير ,,
غايتو جنس سناحة ودالقاضي ده ماشفتها الا عند الطيب شيقوق.
| |
|
|
|
|
|
|
|
|
|
Re: إعتذار للجميع .... (Re: عبدالعزيز الفاضلابى)
|
شكراً مرة أخري للجميع .. سأرجع لأدردش بالردود عليكم في هذا البوست لاحقاً ..
الواحد أخد ليهو يومين إجازة قلت الواحد يشيل نفسه من الشغل ويقزقز في الانترنت شوية قامت شاشة اللابتوب ضربت وبورد الإيثرنت بتاع الديسكتوب إتلخلخ وقطع النت .. مشيت اشتريت واحد ويادوبك ركبته وهادي أول تفاعل مع العالم الخارجي .. أتاريهو الواحد بدون انترنت بيكون عايش في سجن .. من أول أمبارح الوليدات طالعين ونازلين ماعارفين يعملوا شنو؟؟ لكين غايتو الحسنة فيها إنو لقينا زمن نتونس معاهم .. زمان الواحد يجي داخل البيت من الشغل يلقي كل واحد مقبل ليهو علي شاشة وتقوم تقول ليهم هييي أنا جيييييت .. مافي واحد يجيب خبرك ..
:
:
المهم بالجنبة كده بقول لدوما وسفيان ياجماعة براحتكم إنتقدوا زي ماعاوزين - ولكن نصيحة ليكم بعدم السخرية .. ما عشاني ولا عشانهم .. إنما عشانكم .. فسخريتكم ستكون في ميزان سيئاتكم وميزان حسنتاهم وأنا بطلع كيت ..
أنا أصلاً ما استفزاني الإنتقاد إنما السخرية والإستهزاء !!.. وناس حلاااتو !! .. لو أصلو الإمارة بالسن فالرسول عليه الصلاة والسلام أمَّر أسامة بن زيد علي رأس جيش فيه فطاحلة الصحابة وهو كان صغير السن فاستنكروا ذلك حتي خرج عليهم الرسول وتكلَّم في الأمر.. ولو الحكاية بالعِلم والشهادات فالرسول زاتو - مدينة علم الله - أمي ، إمتدح الله أميته في القرآن .. وقال 'النبي الأمي' .. ولو أصلو القراية والعلام هي مفتاح الإصلاح ما كان النخب بتاعتنا تتخبط من فشل لفشل وكل واحد فيهم شغال لصالح نفسه وهم خريجون من أعرق الجامعات العالمية .. و..و..
| |
|
|
|
|
|
|
|
|
|
Re: إعتذار للجميع .... (Re: Munir)
|
Quote: المهم بالجنبة كده بقول لدوما وسفيان ياجماعة براحتكم إنتقدوا زي ماعاوزين - ولكن نصيحة ليكم بعدم السخرية .. ما عشاني ولا عشانهم .. إنما عشانكم .. فسخريتكم ستكون في ميزان سيئاتكم وميزان حسنتاهم وأنا بطلع كيت ..
|
شكراً يا منير و وصيتك علي عيني و علي رأسي
تصدق مرات كتيره لما اسخر و اكتب كتابة ساخره
بكون ساخر على نفسي و علي الواقع دا ؟
لكن اوعدك أني اجاهد نفسي الجهاد الأصول بشكموا
بيها طوالي.
تحياتي.
| |
|
|
|
|
|
|
|
|
|
Re: إعتذار للجميع .... (Re: Munir)
|
Quote:
المهم بالجنبة كده بقول لدوما وسفيان ياجماعة براحتكم إنتقدوا زي ماعاوزين - ولكن نصيحة ليكم بعدم السخرية .. ما عشاني ولا عشانهم .. إنما عشانكم .. فسخريتكم ستكون في ميزان سيئاتكم وميزان حسنتاهم وأنا بطلع كيت ..
أنا أصلاً ما استفزاني الإنتقاد إنما السخرية والإستهزاء !!.. وناس حلاااتو !! .. لو أصلو الإمارة بالسن فالرسول عليه الصلاة والسلام أمَّر أسامة بن زيد علي رأس جيش فيه فطاحلة الصحابة وهو كان صغير السن فاستنكروا ذلك حتي خرج عليهم الرسول وتكلَّم في الأمر.. ولو الحكاية بالعِلم والشهادات فالرسول زاتو - مدينة علم الله - أمي ، إمتدح الله أميته في القرآن .. وقال 'النبي الأمي' .. ولو أصلو القراية والعلام هي مفتاح الإصلاح ما كان النخب بتاعتنا تتخبط من فشل لفشل وكل واحد فيهم شغال لصالح نفسه وهم خريجون من أعرق الجامعات العالمية .. و..و..
|
خلينا بندأ من الآخر (امية الرسو)
لو بي فهم [القراية والعلام ] فقد جانبك التوفيق .. او لوجه الدقة المسألة دي جدلية
في رأي انو الرسول صلى الله عليهو سلم كان بقرأ و بكتب، اما علمه فهوى وحي ممن احاط علمه كل شئ عديييل
راجع هنا :
Quote:
حديث صلح الحديبية عن البراء بن عازب الذي جاء فيه ..
(( ثم قال لعلي : " امح رسول الله " ، قال : لا والله لا أمحوك أبدا ، فأخذ رسول الله صلى الله عليه وسلم الكتاب ، فكتب هذا ما قاضى عليه محمد بن عبد الله))
و قد ورد في صحيح البخاري كتاب الصلح - حديث:2573
و في صحيح مسلم كتاب الجهاد والسير - حديث:3423
و في كثير غيرها من الصحاح !! (راجع الجابري للإستزادة)
|
و جزى الله دكتورنا و حبيبنا ود القرشي خير الجزاء بمحو اميتنا نحن ديل في القرن الحادي و العشرين
Re: القصة الملفقة لهجرة عمر بن الخطاب للمدينة - لا ثكلتك امك لاشئ
و يمكن الاطلاع على : http://www.ahewar.org/debat/show.art.asp?aid=73939
و http://quran.maktoob.com/vb/quran48614/
دا رأي مخالف : http://www.saaid.net/Doat/moslem/13.htm
اقول ليك كلام : اتفضلوا :
http://www.google.com.sa/search?hl=ar&source=...0l344l2312l2-4.4l8l0
المافي شنو
انا شخصياً اقتنعت بان رسولنا الكريم كان يكتب و يقرأ ..
الحق احق ان يتبع يا حبيب
--------
اما بعد
على عكسك لا أرى قداسة لبشر .. خصوصاً انو اختار الدخول لمعمان السياسة
حصل يوم سمعت ليك (سوداني) بتكلم في سيدي الحسن بسوء!؟
امر الطائفة يهم الطائفة .. اما الشأن العام بيؤثر علي حياتي اليومية دي ..
و حتى علي حقها في الوجود دا ذاتو ياخ!
كيف ما اعمل اي حاجة!؟
الحق حق ..
هلا جلس في بيت امه و ابيه و ناله سوء من أحد!؟
| |
|
|
|
|
|
|
|
|
|
Re: إعتذار للجميع .... (Re: قيقراوي)
|
| Quote: لو أصلو الإمارة بالسن فالرسول عليه الصلاة والسلام أمَّر أسامة بن زيد علي رأس جيش فيه فطاحلة الصحابة وهو كان صغير السن فاستنكروا ذلك حتي خرج عليهم الرسول وتكلَّم في الأمر.. |
معقول يا منير ..عايز تقارن أسامة بن زيد بالعاطل عن كل شئ ..ولد الميرغنى .
أما عن الإعتذار ..فياريت يكون صادق .
لأنه ليست هذه الإساءة الأولى ..
شخصيا طالباك إعتذارات كتيرة .
| |
|
|
|
|
|
|
|
|
|
Re: إعتذار للجميع .... (Re: AMNA MUKHTAR)
|
كما قالت العزيزة دومه .
Quote: عن نفسي قبلانه اعتذارك
ولا اعدك بان الا انتقدهم
فلا قداسه في السياسه |
ولكن نتقد كل من تولي امر من امور شعبنا مهما كانت
مكانته اونسبه لان لكل منا نسب يعتز به مايهمنا
هو الوطن الذي نتساوي فيه .
| |
|
|
|
|
|
|
|
|
|
Re: إعتذار للجميع .... (Re: يوسف السماني يوسف)
|
سلام للجميع ..
الشايقي سلام وتحية والعفو لله والرسول .. ياخي أنا خايف إنو الخلاني - لا شعورياً - أجيب سيرة الكلاب دي هو قصة الهوهوة الفكيتها فوقي في بوست الشرانية آمنة مختار .. هههه ..
ياعزيزي كونك من الشعبية دي براها بتخلينا أكثر من أخوان ، وثانياً كلمة شايقي دي - جيب أضانك - عندها وقع خاص عندي .. وأنا زول أعتز بالإرث الشايقي - رغم أني ما قَبَلي كما وصفتني - ومسمي نفسي الشايقي :) .. والحقيقة أنا زاتي لا حظت إنو أي زول خشيت معاه في خصومة ومشاكل عنيفة - منذ الطفولة - في الآخر يطلع شايقي !! .. وبتخايل لي إنو الشوايقة ديل فيهم خاصية موروثة بتاعة مصادمات من قُبَّال زمن مهيرة ومعركة كورتي - حيث أن القبائل كلها استكانت لاسماعيل باشا إلاّ أجدادنا الوحيدين الوقفوا شوكة حوت وحاربوا !!!.. تجي تشوفهم في السياسة تلقاهم سايطين الكوزنة والشوعنة وتلقاهم راس هوس في الطرفين !!! ..
أنا ياخي ذاتي بأعتذر ليك عن أي تجريح والواحد زاتو ماعارف متين بقي بتاع ملاسنات ومشاكل !!! .. والله تعرف إنت بتكون ما بتعرفني لأنو أنا أساساً زول مسكين مغمور والغنماية تأكل عشاي .. وكنت زول بريئ ومتأكد إنو الناس البعرفوني بيكونوا مستغربين بيقولوا منير ده متين بقي كده؟؟ أنا زاتو بقول يا ريتني لو رجعت زي زمان زمن البراءة والمسكنة .. الواحد بدل يمشي لا قدَّام رجع لا وراء !! .. دي مصيبةً كيفنها ؟؟.. الواحد لو استمر في التدهور ده في الآخر حنقعد نكابس بس في حسن الخاتمة .. !!! ..
ما عرفتك بتقصد عبدالصادق ياتو؟؟ في واحد كان بيلعب في فريق الصداقة - ويبدو لي التاني برضو كان في الصداقة - والاتنين أنا شفتهم ماسكين الصفارة .. لكين عموماً حسب كلام عبدون يمكن كنت في حلة فريق الصديق يعني شرق السوق .. وأنا في المربوع غرب ميدان الصداقة .. مننا والهجرة ومزرعة فنوس .. وبصراحة حِلة الصديق دي ما كنت بعرف فيها أي زول في البداية لغاية ما بقينا نجي جامع الختمية وأتعرفت علي إخوة أكارم وجالسنا الخليفة كانكيج عليه رحمة الله في عز الصبا وبواكير الشباب في ليليات المولد في أجمل وأصفي أيام عمري !!! .. أيا ليت أيام الصبا والصفاء تعود .. !!!..
وإنت طبعاً عارف إنو الشعبية مقسمة لحواكير حسب الفرق الرياضية .. ففيها حِلة الصديق وحِلة الشعلة حِلة الهدف وحِلة الصداقة - بالرغم من إنو الصداقة كانت أكثر قومية :) - وفيها برضو حِلة الفلاح وحِلة المارد وتقطع الزلط تلقي ناس حِلة الجهاد وحِلة النجوم والنسر و..و.. فأكيد مع المعمعة دي ما بيكون في زول مشهور غير نجوم الكورة زي ناس عبدون وصلاح شكوكو والمفك وناس جقدلي و..و.. عندي ذكريات عن الكورة في الصفحات الأولي في بوست الشعبية فما تهيج أشجاننا ياخ .. لكين قول ليك كلام ؟ رغم أني شعباوي سكنت الشعبية جنوب وشمال إلاّ إنو بيتنا عبارة عن قطعة من البلد في الشمالية - في الشارع نقول أيوة وجوة البيت أييي .. وأخوك زول طمبور درجة أولي.. قضيت أمسياتي كلها شايل طمبوري وقاعد فوق بلوكة قدام خشم الباب من زمن كنت في الابتدائي والعام والثانوي .. الحقيقة في الثانوي اتطورت بقيت أجيب كرسي :) .. وياوليد ليك علي لو إتلاقينا حأسمعك طمبور لامن تأمِن .. ياوليد إنت عندما كنت بتجي في شارع صاحبك نزار لو كنت ركّزت شوية وعاينت في شارعنا كنت شفتني قاعد بطنبوري ، مرات براي ومرات معاي جمهور !! .. يعني بإختصار كده يا الشايقي العبدلله ما بتاع مشاكل والله يكفينا شر المشاكل ياخ .. بس مابقدر أوعدك أني أجيب كثافتك بآرائي السياسية .. مع إني أصلاً ما بتاع سياسة .. إلاّ بس البورد الهامل ده نبرطع فيهو ساكت ..
والشئ التاني: حكاية السياسة دي أنا زي ماقلت سابقاً مافي زول بيقدر عليها .. والفي البر عوَّام .. وأي ابن آدم ما بيخاف الله لو مسك سلطة ما تضمن إنو يسرق ويقتل ويعذِّب مهما كان مدعياً الشرف والبطولة وهو خارج السلطة !!..
ناس عمر البشير ده كانوا قايلنها باردة وأتذكر إنو عمر البشير في أول أيامه قال إنو هم عساكر زي جون قرنق وبيعرفوا يحلوا مشكلة الجنوب كعساكر بيناتهم بيعرفوا يتفاهموا مع بعض .. أهو في الآخر لقي نفسه في معارك أكبر من جون قرنق وأكبر منه .. الترابي ذاتو جاء قايل نفسه عنده المفتاح السحري الاسلامي وأراد أن يعمل جبهة إسلامية عالمية بديلة للإتحاد السوفيتي - في الآخر تنكَّر لكل أفكاره وطموحاته الإسلامية ، وحتي إنه قرَّب يرتد زاتو .. تمسك في الجانب التاني تلقي العاملين فيها قوميين أو علمانيين مسكوا البلاد شرقاً وغرباَ وأذاقوا الشعوب مرارة الديكتاتورية !!!.. وحتي الثوريين الأفارقة الذين استولوا علي السلطة بعد وقت قليل بعد الإنقاذ تلقاهم حتي الآن مكنكشين في الرئاسة .. من ملس زناوي ، مروراً بإسياسي افورقي ولغاية إدريس دبي .. كلهم فاتوا العشرين سنة سلطة !!! .. وما تنسي موسيفيني وبتاعين رواندا وولد كابيلا في الكونغو .. أما عمك آراب موي داك فلغاية ما دوَّد فيها عديل .. فالشغلانة عبارة عن هتافات وشعارات .. وعند المحك القصة بتبوظ لأن شهوة البشر للسلطة ما عندها حدود ولا قانون !!!!!! ..
:
:
الواحد أسحن يقيف هنا لغاية ما نجي ندردش مع الباقين واحد واحد ..
العنب يتأكِل حبة حبة
(جني) ..
| |
|
|
|
|
|
|
|
|
|
Re: إعتذار للجميع .... (Re: Munir)
|
| Quote: وأي ابن آدم ما بيخاف الله لو مسك سلطة ما تضمن إنو يسرق ويقتل ويعذِّب مهما كان مدعياً الشرف والبطولة وهو خارج السلطة !! |
منير سلامات
والله اليوم كسيلاني
لا حديثك دا ممكن نتناقش حوله ان الله ادى العافيي ومد في الاجل
| |
|
|
|
|
|
|
|
|
|
Re: إعتذار للجميع .... (Re: doma)
|
Quote: والله اليوم كسيلاني
لا حديثك دا ممكن نتناقش حوله ان الله ادى العافيي ومد في الاجل |
عزيزتنا دومة .. مادام الكلام ده حيكون فيهو مناقشة معناتها حيكون فيهو غلاط .. ههه ..
أخدي ليك نومة وتعالي .. ترانا قاعدين ..
ياخي إنتي زاتك المحيرني فيك إنك كيف جيتي أقحمتي نفسك في البوست داك؟ الحكايي شني ..ذكرتوني ناس ياسر عرمان وباقان عندما مشوا حشروا نفسهم في كومر البوليس - يوم المظاهرة ديك - عشان يقولوا أعتقلهم النظام :) ..
:
:
لا كمان قالليك ناس قيقراوي وودالمشرّف جوا بمؤثرات صوتية وموسيقي تصويرية .. آمنت بالله ..
| |
|
|
|
|
|
|
|
|
|
Re: إعتذار للجميع .... (Re: Munir)
|
.. وكمان حيَّرني واستوقفني الأخ آدم عمر القال بيتحاشي التداخل معاي ده !!!
.. تعال هنا يا آدم ياخي وخلينا ياخ نتناقش أخوان وسيبك من سوء الظن والتوجس !! .. ولو شايفني غلطان أديني علي راسي طوالي .. أنا عارف إنو الرأي السياسي بيؤدي لنزاع وربما كراهية .. لكين كدي خلينا علي الأقل طالما مافي واحد فينا مستفيد سلطة أو ثروة لي روحه دي ، نحاول ننأي عن العنف الاسفيري ما استطعنا .. أنا غايتو رغم إنو مرات مرارتي قاعدة تتفقع لكين من الآن فصاعداً سأحاول أعمل زيك بالظبط وأتجنب بوستات فقع المرارة .. :)
| |
|
|
|
|
|
|
|
|
|
Re: إعتذار للجميع .... (Re: عادل نجيلة)
|
Quote:
يادكتور اعتذارك ما مقبول إلا في حالة واحده بس
وليد عبداللطيف،
لامن منير يجي يغنيلك خلني اللرجبك بي دي |
مشكور كتير محمد عبد الرحمن حاجة زي الورد مع الصباح
| |
|
|
|
|
|
|
|
|
|
Re: إعتذار للجميع .... (Re: Munir)
|
الإخوة الكرام محمد عبدالله مختار وعزام حسن فرح وحسام عبدالرحيم ..
لو الكبر في السن يمكن أيوة أكبر منكم .. غير كده إنتو الأكبر ..
زول يقتطع من زمنه وجهده ليسطر كلمتي تشجيع أعتبره ماقصَّر أبداً، بل زاد ودفَّق في الخير ..
| |
|
|
|
|
|
|
|
|
|
Re: إعتذار للجميع .... (Re: Munir)
|
عليك الله ممكن تديني واحد براي ما دام شيطان الشر تلب منك:)*
وانا ممكن ارسل ليك الاقرار القولتو ليك داك:)
of course i am just kidding*
جميلة هذه الروح التى بذلتها في هذا الخيط وفيها انتصرت على نفسك وهو انتصار لو تعلمون عظيم..
احييك على هذه الشجاعة ومبروك عليك مردودها من الصفاء والراحة النفسية والاطمئنان وروقان البال
وربنا يبعد عنك المنفصم داك:)
بالجد انت امريكا دي حتفلس ولا كنت بتكاجرنا ساكت؟
| |
|
|
|
|
|
|
|
|
|
Re: إعتذار للجميع .... (Re: حسين نوباتيا)
|
حسين نوباتيا كيفك .. والله مش لو جست كيدينق .. لو شنو زاتو لازم تاخد كوتة إعتذارك براك .. إعتذار ياخ عذراً ..
بأمانة إنت جيت داخل بالسلام والتحية وأي حاجة .. لكين إتهمتني إتهامات فاجأتني .. قلت لي عجرفة وتعالي عديل؟؟ .. بالغت ياخ .. ياخوي العبدلله أبسط مما تتصور .. لكين أنا عاذرك .. فالخصومة والعصبية السياسية بتخليك ما بتعرف صليحك من عدوك .. ومن هنا ولي قدَّام برضو حنجي في تقاطع آراء وتضاد .. أنا غايتو مجهز نفسي وشايل نفس عميق وموسع صدري لإمتصاص الغضب .. فإنت جهِّز حالك إذا بتريد ..
فلس أمريكا ده شئ مفروغ منه وأنا جادي .. وماداير أكرر الكلام بتاع بيوت الطين والقطاطي عشان ما تتحسس ، لكني برضو جادي فيهو .. وأرجو إنك تأخده بجدية وبدون إسقاط سالب وتفرغه من مقصده الجاد .. وأظن بعدما أنا كتبت تفصيل عن الخلفية الأنا جيت منها مفروض تقتنع أنه كلامي ليس نابعاً عن تعالي وعجرفة وإساءة لزول..
| |
|
|
|
|
|
|
|
|
|
Re: إعتذار للجميع .... (Re: doma)
|
الخالة دومة تحياتي .. بالنسبة للديمقراطية الغربية ، إنتي ظنيتك ما قريتي رأيي فيها .. ياخ ده فيلم براهو ممكن يجيب لي عاصفة لكين لا بأس من أقوله ليكي بإختصار .. أنا قبل كده كتبت بوست بعنوان عندي رأي في الديمقراطية .. خلاصته هو:
قلت إنو الإعلام يعتبر السلطة الرابعة وشنو شنو إلخ الكلام الثيوري الأكاديمي .. لكني أراه الآن السلطة الأولي بلا منازع .. فالإعلام هو الذي يوجِّه الرأي العام ويحرِّض الشعوب ويلمِّع هذا السياسي ويغطِّس حجر ذاك فبالمنافسة الإعلامية يتم إقتياد الجماهير وتنويمهم مغناطيسياً لصناديق الإقتراع الصورية .. ليتم إنتخاب سياسيين وتنصيبهم فوق رؤوس العباد وكي يخدموا أجندة القوي الإعلامية التي دفعت بهم إلي والواجهة وبقيت هي خلف الكواليس .. فإذا جينا تمعنا في هذه اللعبة نجد أن الشعوب تظن أنها انتخبت شخصيات وطنية لتخدمها وتغفل هذه الشعوب عن أن استُغِلَّت لإنتخاب شخصيات يتم تحريكها من خلف الكواليس .. ومن يحركها هم إمبراطوريات إعلامية تتحكم فيها رأسمالية قوية غير منتخبة وما عندها علاقة بالإنتخابات .. و.. و.. الصورة الزاهية لتلك المجتمعات سببها الثراء والرفاهية التي تغطي علي العيوب والثغرات التي بدأت تتكشف حديثاً واكتشفت الجماهير أن الأموال أصبحت دولة بين الأغنياء وأنهم الظروف كانت مساعداهم بأنهم كانوا ماكلين وشاربين وما شاعرين بالوضع المزيف العايشين فيهو .. هسه بعد الفلس هبش العضم بقينا نشوف المظاهرات في أمريكا وغيرها .. في أسبانيا - أو البرتغال ما بتذكر - قبل أسابيع المظاهرات طلعت مش ضد الغلاء ، بل ضد النظام السياسي زاتو .. لا عاجبهم يمين أو يسار .. أوروبا اليومين ديل حالتها بقت شلش والاتحاد الأوروبي ده أنا غايتو شايف إنو ما حيستمر ومصيره يتفركش .. الانقليز من هسه تضجروا وتململوا وعاوزين يتخارجوا من المركب الغارقة .. شايفة إنو اليونان دقت الدلجة وإيطاليا تترنح و..و.. نشوف ..
طبعاً عارفك حتقولي الرفاهية الغربية دي سببها الديمقراطية !!!.. وأقول: نان التنين الإقتصادي الصيني ده شاف الديمقراطية واللاّ جاء بجنبها؟؟ مو تراهو اليومين ديل قابض الجو بلا ديمقراطية !!!..
| |
|
|
|
|
|
|
|
|
|
Re: إعتذار للجميع .... (Re: Munir)
|
الأخ محمودمصطفي محمود .. غايتو لو ما إسم محمود الفي البداية ده كنت عملت ليك نظام التجاهل التجاهل ..
Quote: LIKE
Accepted and appreciated though I don't count myself as one of that insulted group and I believe none |
ياخي ده الكلام .. بس الناس بتدور الشِبك ساي ..
| |
|
|
|
|
|
|
|
|
|
Re: إعتذار للجميع .... (Re: Munir)
|
الأخ ود الخليفة .. سلامات ..
زعلتي منك ما تزعل إنت منها وذلك لأنها كانت زعلة عاشم .. ولأني معتبرك في صفي ونتقاسم نفس المشاعر .. ولذا كنت أتوقع غضبة مشابهة ..
لكني طبعاً سويتها مشاترة .. فالعفو علي المخاشنة ..
| |
|
|
|
|
|
|
|
|
|
Re: إعتذار للجميع .... (Re: Munir)
|
على محمد الخير
معاوية المدير
Elawad
smart_ana2001
بدر الدين اسحاق احمد
jini
الفاضل يسن عثمان
محمد عبدالرحمن محمد
شرف الدين آدم إسماعيل
محمد البشرى الخضر
عادل نجيلة
Gaafar Ismail
عابدون محمد عابدون
haroon diyab
Abdel Aati
فايزودالقاضي
قيقراوي
عبدالعزيز الفاضلابى
يوسف السماني يوسف
محمد النيل
الأخوة الذين لم أتمكن من الرد عليهم أعلاه .. قلت ألحق أعمل رد سريع قبل الأرشفة ..
كنت عاوز أستمر في الدردشة ولكني اليومين ديل أمر في أيام مفصلية في الحياة .. الله يعين ..
كل عام والجميع بخير ..
| |
|
|
|
|
|
|
|
|
|
Re: إعتذار للجميع .... (Re: ود الخليفه)
|
| Quote: غايتو بعد كده الواحد يحاول يبقي زي سفيان ده .. رجل يكتب بنفس واحد وعلي وتيرة واحدة بدون إنفعال وملاسنات ومهاترات .. أهنئك ياسفيان علي الإحتفاظ بأعصابك وهدوئك في هذه المعتركات المنبرية الساخنة .. |
يا ريت تمشي بنصيحتك دي
| |
|
|
|
|
|
|
|
|
|
Re: إعتذار للجميع .... (Re: Mahjob Abdalla)
|
| Quote: يا ريت تمشي بنصيحتك دي |
الهبيب محجوب يعلم الله ياخي أنا عندما كتبت سفيان إنت برضو جيت في الخاطر وكنت داير أضيف إسمك مثل سفيان كإنسان تحتفظ بوتيرة تفاعلك في مستوي ثابت تُحسَد عليه .. ولا تنزع للمهاترات والاستفزاز .. ليك التهنئة برضو .. وياريك الواحد يبقي زيك لكين النفس أمارة ..
لكين عيبك الوحيد معاي إنك كل مرة بتجي تعمل لي شنكل :) ..
لكني أظن أن البيننا عامرة رغم الضغط السياسي المرتفع .. مع إني ما بتاع سياسة ..
هسه الواحد لو قلَب كورة كمان نخش في عداوات من نوع تاني ..
| |
|
|
|
|
|
|
|
|
|
Re: إعتذار للجميع .... (Re: Munir)
|
الاستاذ منير..
واخاطبك بلقب الاستاذ لأنك باعتذارك اثبت أنك استاذ بحق وحقيقة والاعتذار من شيم الكبار.. وكلنا خطاءون ولكن الذي يستدرك خطأه ويعتذر يرتفع مقامه في اعين الناس أنت قد بلغت الثريا بهذا الاعتذار البليغ.. ولا شك ان عتذارك سيقبله كل من وصله رذاذ من تلك الشتيمة..
وطبعا اي شخص يعكل في العمل العام معرض للإنتقاد وعليه ان يقبل اي انتقاد يوجه إليه ولكن طبعا للإنتقادات حدود وخطوط حمراء لا يمكن ان تعداها مثل أن ننابذهم بألقاب سيئة أو نوجه اليهم اساءات شخصيةليست لها علاقة بالعمل العام...
والله يديك العافية
| |
|
|
|
|
|
|
|
|
|
Re: إعتذار للجميع .... (Re: اميرة السيد)
|
الاستاذة الأميرة -اميرة السيد -
أهو بعد الشكرة دي الواحد راسه يكبر ، فيحبط عمله .. ما تقولي إننا اليومين ديل أصلاً محبطين :) ؟ ..
طبعاً البني آدم لو بيقبلوا النقد والتصويب ما كانت قامت الحروب والمفاسد في الأرض .. ولكن تلك طباع النفوس المعجونة بشيطنة إبليس وسمو الملائكة ويمكن أن تزيد عليهما شراً أو خيراً .. ونسأل الله أن تكون محصلة أعمالنا بالموجب ويثقل ميزان الخير فينا علي موزاين شرورنا ..
لكين للأنا شايفو ده .. المنبر ده شغال معاي بالخسارة :) ..
لكِ التحايا النواضر .. وكل سنة وأنتِ طيبة ..
| |
|
|
|
|
|
|
| |
Munir
طارق الجبلابى
فضل الصادق
doma
عبدالله شمس الدين مصطفى
سفيان بشير نابرى
محمد عبدالله مختار
Mahmoud Mustafa Mahmoud
عمر عثمان
محمد جلال عبدالله
وليد عبد اللطيف
ود الخليفه
حسام عبد الرحيم
حسين نوباتيا
عزام حسن فرح
معاوية المدير
Elawad
smart_ana2001
بدر الدين اسحاق احمد
jini
الفاضل يسن عثمان
محمد عبدالرحمن محمد
محمد البشرى الخضر
Al-Shaygi
Adam Omer
Gaafar Ismail
عابدون محمد عابدون
haroon diyab
Abdel Aati
فايزودالقاضي
قيقراوي
عبدالعزيز الفاضلابى
AMNA MUKHTAR
يوسف السماني يوسف
محمد النيل
Mahjob Abdalla
فيس بوك
تويتر
انستقرام
يوتيوب
بنتيريست