أغاني البنات شكلت بعدا خاصا في الوجدان السوداني وأرخت لمعطيات مجتمع في فترات مختلفة وتنوعت ما بين تحريض المناضلين علي القتال وبنونة بت المك والخيل عركسن ما قال عدادن كم ومهيرة بت عبود يا الباشا الغشييم قول لجدادك كر .. حيث مثلت لسان حال المجتمع إبان النضال ضد المستعمر ... وهناك غنا الحكامات وما يمثله من توثيق لأحداث وشخصيات لعبت دورا منظورا في المجمتع وهكذا ...
ظهر في الساحة نوع جديد من اغاني البنات حيث وثق للرجل بما يمثله من قيمة مهنية حيث غنن للمهندس الجا ورسم البنا ولدكتور صلاح ولغادة الماشة العيادة .. وفي عهد الإغتراب لما كان بجيب تمنه غنن للمغترب وشيلة ابوظبي والدهب السعودي .. ثم عرجن وغنن للقبيلة وللجعلي وللشايقي ولود الغرب وغنن للفنجري أب جيبين إشارة لرجل الاعمال الثري حتي يكثر من العطاء للمغنية ...وغنت البنات للموديلات من عصر عربيته كورينا والريحة قاردينا وعشان بمشي وبجينا الناس عملوها فينا .. الي عصر الهمر وليلي علوي ... وغنن لأبو شرا وراجل المرة إشارة لإزدياد عدد العوانس في المجتمع وعزوف الكثير من الشباب عن الزواج وقبولهن بالأمر الواقع وتحريض راجل المرة علي مثني وثلاث ورباع...
أما مرحلة الالفية الثالثة وما تمثله من نقلة تكنولوجية هامة في الأدوات والمفاهيم غنن البنات للموبايل
وده كله من وايل قفل الموبايل لا مس كول لا رسايل
ومن عندي ممكن ازيد
واعدتوا في المسنجر نعمل شات شراني شرة عدوك فرح الشمات خش سريع وعمل اوفلاين عامل فيها يعني مش باين
وهناك من يطنش الرد علي الإيميل
ياناس شوفوا لي مالو رسلت لي علي ايميلو في الياهو مارد لي ايميل مالوا حبيبي زعيل ولا غير للهوتميل
وعلي نفس المنوال ممكن نبدل في اغنية ترباس رسلت ليك اجمل خطاب لليلة ردك ماوصل زعلانة ولا شنو الحصل الي
رسلت ليك أجمل إيميل لليلة ردك ما وصل زعلانة ولا السيرفر فصل
تمثل الدلوكة الإيقاع الرئيسي في نظم وتلحين أغاني البنات وفي تعليم الفتاة المقبلة علي الزواج علي فنون الرقيص.. وقدإمتازت هذه النوعية من الأغاني بالبساطة في الكلمات واللحن الذي يصاحبه في العائدة كورس يقوم مقام الاوركسترا ... ومن هذه الأغاني المهيرة التي غلب عريسها الثبات
في جو مشحون بالحروب في فلسطين والعراق وأفغانستان وفي السودان حيث تم تدويل مشكلة دارفور ... قام بعض الشباب مجاراة اغاني البنات فنسمع فنان يغني للطبنجة تقول بعض من مفرداتها:
و بتصدق الحدثك بتصدق قول الناس اضربني بي مسدسك املاني انا رصاص انا مخلص ووافي اخلاصي عندي اساس انا قلبي ربيتو يعيش في الحب حساس اخلاصك انت براك مابقدرو بالماس انا حبك حواني من القدم لي الراس
واغنية القنبلة والتي تجمع حولها رهط من المؤدين والمؤديات وهاك يا دانس علي ايقاع راقص فكانت القنبلة:
قنبله دي قنبله سماحه الزول في الطول والعلا دي قالو احتمال تنفجر......... قنبله تقيف معاك والله ما بجر ........قنبله ما بفيد الصد والهجر والبتحصل انا بقبلا قنبـــــــــــــله العيون سلاح الموت........ قنبله الخشيم دا كاتم صوت ........قنبله بي الجو بي البرشوت جيوشك علي انقلا قنبـــــــــــــله
وعشان البت ما تواكب عصر النت لازم تمحو اميتها التكنلوجية واللغوية هذا مادعت له هذه الأغنية ببساطة
بناتي لو ساي اراده سمح العلم سمح الشهاده حليلو نحن زمنا فات زمنا كان والدك يعاكس لاتقري لاتدخلي المدارس ماقلنا بنحيا قدر ده كله نشوف بنات جيل واعي دارس
الواحده من سن اربعتاشر يديهو للفي تجارته شاطر ابوكي يديهو من غير يشاورك قبال ماتشوفي تقولي حاضر
قريتو الجامعه ورطنتن انقليزي لغة معجن نصه عربي وشيتاً تاني بتفهمنوا براكن انتن سديتن ورديات نبطشي وعتلتن العجل اب جلنطي هندستن الطرق والكباري ودورتن المكن اب كرنكي
اهلنا لاقروا لاقرينا يا الانترنت سويته فينا كلام الحب بقي بالماسنجر يال dsl نحن انتهينا حليلو نحن زمنا فات
احمدن انتن الله سيدكن جبتنه بي الايد وبي شديدكن تسون الشئ الفي مرادكن وتقررن انتن مصيركن
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عمر الفاروق عبد الله الشيخ
فيس بوك
تويتر
انستقرام
يوتيوب
بنتيريست