الإنحناءة لهذا القلم .........الفاتح يوسف جبرا

Quote: فهو يملك قلم مبدع وعقل ذكي يلتقط التناقض العبثي ليخلق منه مقال و حكاوي تشرح وتحلل وتترك الكثير من الأسئلة العميقة.

Quote: الحاوي وفك التسجيلات أصابت الدهشة كل (العالم) وهو يستمع إلى هذا الخبر الذى تناقلته وكالات الأنباء العالمية وبثته (الفضائيات): فى (الخرطوم) وبعد أن تم تبادل الأدوار (سلمياً) وصار (المسؤولون) هم (الرعية) وأصبحوا خداماً (للشعب) الذى أصبح بدوره (مسؤولاً) عنهم وبعد أن أصدر (الشعب) بعض القرارات الخاصة بترشيد (السفريات) الخارجية للمسؤولين وتخفيض (بدل السفرية) لهم من (خمسميت دولار فى اليوم) إلى (خمسين دولاراً فقط) تجمع عدد من المسؤولين فى الميدان المسمى بـ(ميدان أبوجنزير) وقاموا بتسيير (تظاهرة) وهم يحملون اللافتات التى كتبت عليها شعارات تندد بقرارات (الشعب) الأخيرة هذا وقد تصدت (شرطة الشعب) للتظاهرة حيث قامت بفضها مستخدمة الهراوات والغاز المسيل للدموع مما جعل (المسؤولين) يهربون مستخدمين (الأزقة) ويحتمون ببعض (المحلات التجارية ) هذا وقد وقعت بعض الإصابات فى صفوف (المسؤولين) حيث تم نقلهم لتلقى العلاج بالمستشفيات كما تم القبض على بعضهم هذا وفى تصريح أدلى به (الشعب) أفاد أن المقبوض عليهم سوف يقدمون لمحاكمات عادلة فى الأيام القليلة القادمة. -إتخيل قالوا (المسؤولين) مشو (للشعب) عشان يديهم (تصريح) بتسيير المظاهرة قام رفض وما أداهم!! -والله الشعب عمل كويس.. هم زمان قاعدين يدو زول تصريح؟ -هم مشكلتهم إتعودوا على (الترطيب) والراحات عشان كده (التخفيضات) دى بقت ليهم حاره -لكن هم بثبتو؟؟ ما مما هبشوهم (الجرسه) ما تديك الدرب -عليك الله شفتا نحنا زمانك (ثبتنا) ليهم كيف؟؟ على باليمين قبل الجماعه ديل ما يجو كنت عايش أولادى (التسعه) ومعاهم (أمهم) هسع نزلت المعاش اولادى التسعه ما قادرين (يعيشونى) أنا براى!! -آآى والله (هلكونا) شئ جبايات وشئ أتاوات وشئ رسوم وكل يوم يطلعوا لينا فى (القرارات) -بى مناسبة (القرارات) دى قالو (الشعب) الليلة الساعة 8 فى المساء عندو(بيان) للمسؤولين ح يطلع فيهو (قرارات) وح يكون (مذاع) و(متلفز)!! بيان من (الشعب) للمسؤولين فى تمام الساعة الثامنة مساء تماما توقفت الحياة تماما فى كل المدن والأحياء وخلت (الشوارع) من المارة و(تسمر) الجميع أمام شاشات التلفاز وأجهزة الراديو للإستماع (للبيان) الذى سوف يحتوى على (القرارات) التى سوف يتخذها (الشعب) تجاه (المسؤولين): الإخوة المسؤولون الأعزاء السلام عليكم ورحمة الله تعالى وبركاته إن الحياة كما تعلمون لا تسير بوتيرة واحدة وكما تقول الحكمة المأثورة ( فيوم لك ويوم عليك ) وبعد أن صار (الشعب) هو (الحاكم) وأنتم (الرعية) فقد جاء اليوم (العليكم) فأحسن تثبتوا وتبطلوا (الجرسة) زى ما (الشعب) زمانك (ثبت) وربط (الحزام).. الإخوة المسؤولون: الحقيقه نحنا فى (البيان) ده عاوزين نوريكم (سياستنا) الجايه بالواضح كدا عشان بعد ما (المسائل) إتقلبت والأوضاع (إتغيرت) تعرفوا البيكم والعليكم.. الأخوة المسؤولون الأعزاء: أولن بالتبادى عاوزين نقول ليكم حضروا (حزاماتكم) من هسع والما عندو (حزام) يمشى يشترى ليهو (حزام) ليهو ولى (عيالوا) وناس بيتو عشان خلاص البذخ و(الفشخرة) والقروش السايبه و(العربات) واللاندكروزرات و(الضبائح) والعوازيم والعطلات الخارجية والسفر والطيارات والنسوان (المثنى وثلاث ورباع) ده كلو (الشعب) ح يضع ليهو (حل) وكان بتفتكرو إنو كلما (الشعب) يطلع ليهو (قرار) إنتو ح (تقوموا) مظاهرات تكونوا (غبيانين) لأنو (شرطة الشعب) ح تتصدى ليها بقوة وحزم شديدين وبراكم شفتو الحصل ليكم فى (مظاهرات أمبارح).. إنتو مشكلتكم إنكم كنتوا بتفتكرو إنو الشعب ده (خدامكم) وجاء الوكت الإنتو تعرفو فيهو إنو إنتو (خدامين للشعب) وإنو (الشعب الفضل) ده هو القاعد يدفع ليكم مرتباتكم (المليونية) وبدل سفرياتكم (الدولاريه) وبنزين عرباتكم (الفارهة) والحاجات التانية الأحسن (نخليها مستورة)!! – ثم فى حزم وجدية - أيها (المسؤولون) لقد قرر (الشعب) إنفاذ القرارات التالية: قرار رقم 1: زوجة واحده لكل مسؤول بهذا فقد قرر (الشعب) أن تكون فى عصمة كل (مسؤول) زوجة (واحدة) ما لم يثبت (المسؤول) أن زوجته (عاقر) أو (مصابه بمرض) تستحيل معه الحياة الزوجيه.. القرار ده يعنى بالعربى كده (عرس) بتاع متعه و(عدم موضوع) تانى مافى… يعنى تانى حكاية الواحد فيكم جاب ليهو (سكرتيرة) عجبتو وقام (متنى) ده خلاص إنتهى.. أو شاف ليهو (واحده) فى (مؤتمر) قام (متلت).. دى تانى (تلقوها عند الغافل).. إنتو طبعا عملتو لينا (الزواج الجماعى) أها نحنا ح نعمل ليكم (الطلاق الجماعى)… القرار ده بيقول من بداية الشهر الجاى إنو أى (مسؤول) فيكم (يحتفظ) بى (مرا) واحده بس و(يسرح) الباقيات..- مواصلا- عليكم الله هو بس لو كان عندكم إنتو شوية (خجل وإستحاء) أنحنا (أفراد الشعب) ده الواحد (مرا) واحده ما قادر عليها يعنى (بيت واحد) ما قادر عليهو بس معقول إنتو الواحد عندو فى ذمتو (تلاته وأربعه) ؟؟؟؟ الناس دى بتأكلوها من وين؟؟ وبتشربوها من وين؟؟ وبتسكنوها أفخر السكن من وين؟؟ وبتعلموها أرقى التعليم بى شنو؟؟ وبتركبوها أحدث (العربات) من وين؟؟ وبتمشوا بيهم (لندن) و(باريس) بى ياتو تذاكر وياتو (نثريات)؟؟ - مواصلا فى حزم - شوفو يا أيها (المسؤولون) قدامكم أسبوع ( فك تسجيلات ) كل مسؤول فيكم يقعد فى الواطه ويحدد (عاوز يسجل منو) ويقوم يشطب الباقيات!! نعم بعد ده إنتهى عهد (التثليث والتربيع): (الكاميرا) تركز على شخص يقف خلف (المتحدث) الذى يتلو البيان مباشرة (وهو يرفع عصا أبنوس) ويهتف صائحا: - لا تثليث ولا تربيع يا مسؤول خليكا مطيع - (أصوات تردد خلفه): لا تثليث ولا تربيع يا مسؤول خليكا مطيع قرار رقم 2: صالح شعبى عام بموجب هذا القرار سوف يتم تخفيض (جماهير) المسؤولين وإحالة 99% منهم (للصالح الشعبى العام) بعد أن ثبت أن (نصف) عدد (السكان) هم مسؤولون فى الدولة.. شئ وزراء (ساكت)… وشئ وزراء (دولة).. شئ إتحاديين… وشئ ولائيين… وكل وزير عندو (مدير مكتب) و(سكرتير) وسواق (للمدام) وسواق (للأولاد) وسواق (ليهو) وبعد ده كمان نجى للمستشارين وعددهم حتى الساعة العاشرة والنصف من صباح الأمس كان 31124 مستشاراً وكل مستشار عندو (سواق ليهو) وواحد (للمدام والأولاد) بعد داك نجى لـ(المحليات) و(المحافظات) و(المعتمديات) شوفو البلد دى فيها قريب التلاتين ولايه وكل ولايه فيها قريب الكم وكمين محافظة أها يعنى يكون فى كم محافظ؟؟ ونائب محافظ؟؟وكم معتمد؟؟ وكم نائب معتمد؟؟ وكم رئيس محلية؟؟ وكم نائب رئيس محلية؟؟ وكل واحد فى ديل عندو (مدير مكتب) وسكرتير وسواق (ليهو) وسواق (تانى) وكل واحد من ديل عندو قال إيه (مستشار إعلامى) ومستشار (شنو داك) - مواصلا وهو يرفع رأسه من الورقة – ثم مواصلاً – عليكم الله يا (مسؤولين) إنتو هسع عارفين (ربع البصل) بى كم؟؟ وللا عارفين (ملوة الفيتاريتا) بى كم؟؟ - وهو يرفع رأسه عن الورقة مواجهاً الكاميرا - وحكمت الله يوم واحد ما شفنا لينا واحد من (جيش المسؤولين) ده إشتكى قال (مرتباتنا إتأخرت) أو ما صرفت (ماهيتى)؟؟ قرار رقم 3: ركشة لكل مسؤول الأخوة المسؤولون (الشعب) قرر بعد دراسة مستفيضه (سحب) جميع (الركشات) من (الشوارع) وتعويض أصحابها تعويضاً مجزيا ومن ثم منح هذه (الركشات) للمسؤولين وإعطاء كل مسؤول (ركشة) من أجل تنقلاته بدلاً عن (الليلى علويات) و(التاتشرات) و(المرسيدسات) و(الـ BM دبليوهات) الفارهة والتى يكفى ثمن الواحده منها لإطعام خمسيت مليون (جائع) من غالب (قوت) أهل البلد – مواصلا متهكما- إذا كان رئيس وزراء (اليابان) قاعد يستخدم (عجلة) فى تنقلاتو ولمن يكون متأخر قاعد يقوم (سدارى) يعنى إنتو يا (مسؤولينا) أحسن منو؟؟ واللا بلدنا أغنى من (اليابان)؟؟ أها تانى بس (ركشات) نشوفكم تانى ح (تظللوا) شنو؟؟ قزاز مافى!!!. قرار رقم 4: الحساب ولد الشعب بفتكر إنو فى (مسؤولين) بفتكرو إنو (الشعب) ده (عوير) وريالتو (سايله).. يعنى (المسؤول) أول ما يتعين يكون ساكن ليهو فى بيت (جالوص) وباب الشارع بتاعو (زنكى) وضلفه بتقفل والتانية مسنوده بى (حجر) وعفش البيت كلو (دولاب هدوم) وخمسة سراير و(بنبرين) وتربيزة و(الشفع) كل يوم طاردنهم من (الدرس) عشان ما دفعوا (الرسوم) يقوم (المسؤول) بعد كم سنه من تعيينو تلاقى (الشفع) كبرو وقاعدين يقروا (طب) فى جامعات (خاصة) وساكنين فى عمارة (المنشية) ومأجرين عمارة (قاردن سيتى) وخالين (الفيلا) بتاعت (كافورى) فاضية!!. - مواصلاً فى حزم- الشعب قرر إنو يدى (المسؤولين) ديل فرصة (أسبوع) عشان يجيبوا (الحاوى) العمل ليهم (الشغل ده)!! وأى مسؤول يفشل فى ذلك فسوف تنزع منو هذه (الحيازات) لصالح (الشعب).. الإخوة المسؤولون الأعزاء إن (الشعب) كله أمل فى أنكم سوف تلتزمون الهدوء وضبط النفس والتعامل مع هذه القرارات (بمسؤولية) ولتعلموا بأن أى محاولات إحتجاج من تظاهرات وخلافه سوف يتم التعامل معها بحزم وقوة كما حدث لتظاهرة الأمس والتى قام بها بعض (المسؤولين) الرافضين لقرارات (الشعب) الخاصة بـ(تخفيض) بدل السفرية وتقليص (الرحلات الخارجية)!!. الإخوة المسؤولون لا يخفى على أحد منكم أن (الشعب) قد صبر على (مهازلكم) طويلاً ينظر إليكم وأنتم فى (أبراجكم العاجية) تأخذون أضعاف أضعاف ما تعطون تلبسون (حرير) الثياب وتأكلون (لذيذ) الطعام وتمتطون فاره (الجياد) وتحجون إلى بيت الله الحرام (ملح) ومن أموال هذا الشعب (الغلبان) وتتطاولون فى بنيان (الفلل والعمائر) وتنكحون ما لذ لكم وطاب من النساء غير عابئين بهذا (الشعب) الذى أذله الفقر وهدته (المسغبه) وأضناه (المرض) فأصبح أفراده كالأيتام على موائد (اللئام)!!. أيها المسؤولون لقد حان الوقت أن تمشوا على العجين وما تلخبطوهو.. والقرارات دى أول (الغيث) ويا نحنا يا إنتو ووراكم والزمن طويل والسلام عليكم ورحمة الله وبركاته!!. تداعيات القرارات فى حديقة إحدى (الفلل) الفاخرة بأحد الأحياء الراقية جلس المسؤول ومعه جاره (المسؤول الآخر) يرتشفان (القهوة التركية) وأمامهم (سبائط) من العنب و(الخوخ) والتمر (الشفاف) يستمعان إلى (القرارات): - الشعب ده جن وللا شنو؟؟ طيب إذا هو (مسؤول مننا) نحن نكون (مسؤولين) من منو؟؟ - شوف والله بعد (الضرب) الإنضربناهو فى (المظاهرة) أمبارح ده الظاهر (الشعب) ده جاد فى الموضوع - يا خوى كان كده أحسن الواحد (يبيع) ويتخارج - يا حبيب بيع شنو؟؟ إنت ما سمعت فى (البيان) هسع قالوا أدونا (إسبوع) نجيب (الحاوى)؟؟ - إنت (الحاوى) ده سيبو هسع (فك التسجيلات) ده نعمل معاهو شنو؟؟ (النسوان) ديل نوديهم وين؟؟ - (يبتسم فى خبث): والله أنا (حمتى خفيفه) ح أطلق (واحده) وأخلى (واحده) زى ما الشعب قال فى قرارو؟؟ - طبعا يا أبوها ح تفك (القديمه) عكس الهواء!! - يعنى إنت فاكرنى ح أفك (النوبيرا تو) وأخلى (الهيلمان)!! - (وهو ساهم): والله المشكلة مشكلتى أنا هسع (الأربعه) ديل يفكوا منهم ياتو (تلاته)!!! بينما كان هذا الحديث يدور فى الحديقة بين المسؤول وجاره كانت (ست البيت) زوجة المسؤول (الرابعه) تجلس مع زوجة (المسؤول الجار) الأولى على إحدى البلكونات وهن يناقشن القرارات: -والله ووالله يلحق (يفك تسجيلى) إلا أفك ليهو رقبتو!! كمان أنا بلعب واللا بلعب -والله يا (ست النفر) ياختى الرجال ديل ما عندهم ضمان وقالوا (الجديد شديد)!! -بتقصدى شنو يعنى يا (شيراز)؟؟ عشان إنتى يعنى جديده و(نمرة أربعه)؟؟ -لا ما كدى والله لكن (الرجال) ديل أنا عارفاهم كان فى (فنيش) بفنشو ناس (الخدمة الطويلة)!!. -خدمة طويلة خدمة قصيرة.. وحاتك إنتى دى يلحق يفنشنى إلا (إفنشو ليكى من الدنيا) – مواصلة- وهو ذاتو بينى وبينك قالو ليكى بعد ما يشيلو منو (العمارة) دى و(العربات المكندشة) دى ويركبوهو (ركشه) ويحرموهو (السفر) أنا عايزه بيهو شنو؟؟؟ فى (فيلا) أخرى لا تبعد كثيرا عن (الفيلا) الأولى كان مسؤول آخر وزوجته يديران حوارا من نوع آخر: -أنا يانى العارفاها.. من زمان أنبح ليك يا (سعادتو) سجل العمارات دى للأولاد.. أنبح ليك يا (سعادتو) سجل العمارات دى للأولاد!! أها هسع نعمل شنو؟؟ تجيب ليهم (حاوى من وين)؟؟ -والله صدقتى السودان كلو فيهو حاوى واحد.. (خضر الحاوى) ومات!! -إنت صدقت حكاية الحاوى دى؟؟؟؟ والله حاوى ما يعمل العملتو ده!! الناس كلها عارفاك (موظف دوله) مما قمت معقولة بس (ماهيتك) تعمل العملتو ده!! والله (عماراتك) دى ياها الشايلنها شايلنها!!! – مواصلة فى شماته- هسع كان سمعت كلامى وسجلتهم ليا ولى وليداتك ديل ما كان أحسن ليك؟؟ -أنا عارفك زعلانه عشان سجلت (بيت كافورى) للمرا التانيه!! -والله (الشعب) يقلعو منها زى العجب.. إنت قايل فى حاجه على (الشعب) ده بتندسا؟؟ فهم (سعادتو) من كلمات (زوجته) الأخيرة بأنها سوف تقوم بالوشايه به وتفضح مسألة تسجيل (بيت كافورى) لزوجته (الثانية) وأن ما قالته ليس إلا (تهديداً مغلفاً) فقام بتصعيد الحوار معها حتى درجة (الغليان) وما لبث أن رمى عليها (يمين الطلاق) وهو يقول فى نفسه: -أهو الواحد يرتاح منها وكمان (يفك تسجيلات)!!!! تظاهرات: لأن (الشعب) ضايق (الشغلانه) فى نفسو وعارف إنو (قرارات التخفيض) بالنسبة (للمسؤولين) هى كما (قرارات الزياده) التى كان يفرضها عليه المسؤولون وأنه لا يوجد فرق بينهما سوى (علامة سالب بره القوس) فقد وضع (الشعب) كل قواته على أهبة الإستعداد تحسباً لأى تظاهرات أو (أعمال شغب) يقوم يها (المتضررون) من هذه القرارات وقد كان حدس (الشعب) سليماً وفى (محلو) إذ سرعان ما إنتظمت فى اليوم التالى مباشرة المظاهرات التالية: الإتحاد العام لزوجات المسؤولين نظم الإتحاد العام لزوجات المسؤولين تظاهرة سلمية تحركت من أمام (مول عفراء) مشياً على الأقدام متجهه لمبنى ( الأمم المتحدة) لتسليم (المندوب السامى لحقوق المسؤول) مذكرة مندده بقرارات الشعب الأخيرة.. المتظاهرات رفعن (لافتات الإحتجاج) الملونه وسرن فى خطوط متناسقة.. التظاهرة تعبق بمختلف (الروائح الباريسية).. (الحنن) المنقوشة مرسومة (بعناية).. الثياب (شيفون) و(توتال) أصليه.. الجزمة لون (شنطة اليد الجلدية Genuine Leather) وشنطة اليد لون (التايير) و(دهب الخليج) يزبن (الأيادى) الناعمة التى لم تذق (غسيل العده) يوما ًوالتى تمسك بلافتات صغيرة كتب عليها: (عين الحسود فيها عود )…. (بس معقول نركب ركشات).. الـ (الله بيديهو منو البحميهو ) (لا تخفيض للسفريات ) بينما كن يرددن بعض الهتافات: - مافى طلاق مافى طلاق… موتو موتكم يا عولاق!! - بى (بنوكنا) وبى (شــركاتنا) ما بنخاف من الجاتنا الهيئة العليا لأولاد وبنات المسؤولين فى تزامن ينم عن تخطيط محكم للفت أنظار (العالم) لهول المأساة التى تحدق بهم وبمصائرهم إنطلقت من أمام (شارع المشتل) وفى ذات الوقت الذى إنطلقت فيه نظاهرة (زوجات المسؤولين) تظاهرة أخرى نظمتها (الهيئة العليا لأولاد وبنات المسؤولين) مستخدمة فيها (العربات) التى جلس بداخلها (أولاد) و(بنات) المسؤولين من كافة الأعمار وبعضهم قد قام بإخرج (رأسه) من خلال (الزجاج) حاملاً بعض (اللافتات) وها هو (هيثم) و(لينا) يقومان بتنظيم المسيرة قبل إنطلاقها: -ياجماعه.. يا جماعة… ناس (الفستو) الصفراء يجو الصف القدام ده.. وبعدهم العربات (الأتوس) الحمراء.. يا جماعه أى زول سائق BM أو مارسيدس يكون بالجنبات… يا…. -يا هيثم كلمتهم إنو (البارد والسندوتشات) فى اللاندكروزر بتاع (شيرين) و(حماده)؟؟ -يا وليد.. ياوليد كلم السواق يجينا بعد نهاية (المظاهرة) طوالى وما يتأخر!! وإنطلقت التظاهرة بعد أن تم (تنظيم ألوان صفوف العربات) وبدأ ترديد الهتافات عبر (مايكرفون) مثبت فى عربه (لاندكروزر 2008 ) بيضاء (مظللة) وتعالت الهتافات: -بيرقر بيرقر ماكنتوش… ليه عاوزننا ناكل بوش ثم فى (نبرة) أكثر جدية وتشنجاً: -شعب جبان عايز كشه.. ليه عاوزنا نركب ركشة لم تمر دقائق حتى توقف (الركب) لتتم إذاعة (رسالة عبر الموبايل) من (أولاد المسؤولين) الذين يدرسون بالجامعات (البريطانية): -إخواننا أبناء المسؤولين (بالداخل) نحيي فيكم روح الصمود.. ونرجو منكم التصدى بكل قوة وحزم لهذه القرارات (الجائرة).. إخواننا.. سيروا وعين (الله) ترعاكم.. وما تشتغلوا بالشعب (المسكين) ده - دى قرارات (فشنك) ساكت!!! وما أن إنتهى (مذيع التظاهرة) من (إذاعة المحادثة) على (المتظاهرين) حتى دوى (تصفيق حاد) وهتاف متقطع حفزه لقراءة (البرقية) التالية: -وهذه برقية من إخواننا أبناء (المسؤولين) الذين يدرسون بالجامعات (الإسكندنافية) تقول: ولا يهمكم دى حساده ساكت.. قف.. لو حصلت ليكم أى حاجه تعالوا لينا هنا.. قف.. الـ (الله بيديهو منو البحميهو؟؟) تلاقت المظاهرتان (أبناء المسؤولين وأمهاتهم) عند تقاطع (سانت جيمس) وإزدادت حده الهتافات: - يا شعب يا جبان.. إنت حاسد وللا (بغران) -بيرقر بيرقر ماكـــنتوش.. ما بتجبرنا ناكل البوش بينما كانت (شرطة الشعب) تراقب (المظاهرتبن) فى حذر… إتجهت المظاهرتان نحو مكاتب ( الأمم المتحدة) بشارع الجامعة لمقابلة (المندوب السامى لحقوق المسؤول) بعد أن قامت (زوجات المسؤولين) بالركوب مع أبنائهن فى (العربات) وهن يمسكن بزجاجات (المياه المعدنية البارده) ويصلحن من مكياجهن الذى أفسدته (حرارة الشمس). عند وصول (المظاهرتين) لمكتب المندوب السامى تفاجأ الجميع بوجود (تظاهرة) صغيرة (غاضبة) يقودها عدد من الأشخاص ذوى (الملابس المزركشة الغريبه) والعمائم (الملونه).. أحد المتظاهرين كان يمسك بثعبان ضخم من فصيلة (الأصلة) يلفه حول عنقه بينما آخر يقوم بإبتلاع (سلسلة من الأمواس) وعدد آخر يقوم بإخراج بالونات (لهب) من فمه بينما إنهمكت مجموعة أخرى منهم بالمشى على (النار) وهم جميعا يحملون (لافتات إحتجاج ) غاضبة. إتجهت زوجة أحد المسؤولين (قائدة التظاهرة) غاضبة نحو أحدهم: -شنو يعنى؟؟ ما تشيلو (دبايبكم) وحاجاتكم دى من هنا.. يعنى عاوزين تبوظوا لينا (مظاهراتنا) دى؟؟ -ما تبوظ كان باظت.. إنتو (رجالكم) ديل ما بوظو (سمعتنا) وفضحونا (فضيحة).. هسع ( أكبر حاوى) معانا هنا من الشايفاهم ديل بيقدر يبنى ليهو (عمارتين) بى عشرين (مليار) من ماهيتو؟؟؟

Quote: سيناريوهات:عمران (الغمران) (عمران) شاب في مقتبل العمر، على الرغم من أنه كان فى بداية حياته الزوجية ولديه أسرة صغيرة مكونة من طفلين لم يتجاوز أكبرهما العام ونصف إلا أن ذلك لم يمنعه من أن يلبى نداء (الجهاد) وينضم إلى أحد (المتحركات) المتجهة إلى (الجنوب) فى بداية التسعينيات من القرن الماضى. فى إحدى المعارك الشرسة التى خاضها (عمران) تمت إصابته بطلق نارى استقر فى قاع (الجمجمة) فتم إجلاؤه من ساحة المعركة بإحدى المروحيات إلى الخرطوم بين الحياة والموت. بعد وصوله إلى الخرطوم ومعاينة الأطباء لحالته أوصى الأطباء بضرورة نقل (عمران) إلى (ألمانيا) حيث تتوفر هنالك أدوات الجراحة (المايكروسكوبية) اللازمة لاستخراج (المقذوف) النارى. فور وصول الطائرة التى كان على متنها (عمران) تم أخذه مباشرة بواسطة عربة الإسعاف المجهزة إلى إحدى المستشفيات الألمانية المتخصصة فى جراحة المخ والأعصاب حيث تم عمل الفحوصات اللازمة له على الفور وأخضع لعملية دقيقة تم فيها استخراج (المقذوف) وبعد انتهاء العملية تم استدعاء الشخص المرافق لعمران إلى حجرة الجراح حيث أخبره (الطبيب) الجراح الذى قام بإجراء العملية بأن (المقذوف) الذى كان مستقراً فى قاع الجمجمة والذى تم استخراجه قد أتلف بعض الأنسجة الدقيقة بالمخ المسؤولة عن بعض الوظائف الحيوية مما سوف يجعل (عمران) معتمداً اعتماداً كلياً على الأجهزة المختلفة لتأدية تلك الوظائف وإن هذه الحالة تعرف بحالة (الموت الإكلينيكى) وأنها لا علاج لها إلا لمعجزة إلهية!! دخل (عمران) إلى موسوعة (جينيس) للأرقام القياسية كصاحب أطول حالة (موت إكلينيكى) إذ انه ظل لفترة قاربت السبعة عشر عاماً فى (غيبوبة) كاملة يعيش بواسطة تلك الأجهزة المعقدة التى تقوم بتأدية الوظائف الأساسية حتى حدثت المعجزة. فى أحد (الصباحات) وبينما كانت (السستر) المكلفة بمتابعة الأجهزة الخاصة بعمران تقوم بعملها الروتينى فى كتابة التقرير اليومى لاحظت بأن (عمران) يقوم بمحاولة (فتح) عينيه بصورة بطيئة فهرعت إلى الطبيب المناوب المسؤول الذى بعد أن قام بمعاينة (الحالة) قام بالاتصال بالطبيب المختص وفى أقل من دقائق معدودة كان يقف أمام (سرير) عمران (كونسولتو) من جميع التخصصات. تم إجراء عدد من الفحوصات والأشعة المتنوعة التى أثبتت لدهشة الجميع بأن الجزء التالف فى (المخ) قد بدأت (أنسجته) فى النمو كحالة لم يسبق حدوثها أبداً وأن (عمران) قد بدأ يتماثل للشفاء. بعد ثلاثة أشهر: احتلت صورة (عمران) وقد تخلص من معظم (الأجهزة) التى كان يستخدمها معظم الصفحات الأولى للصحف والمجلات الألمانية والعالمية وتم الحجز له بإحدى رحلات (اللوفتهانزا) المغادرة (للخرطوم) يرافقه طاقم طبى (ألمانى) حيث استقبلته أسرته - التى كانت تتابع تطورات الموقف- فرحة بنجاته وعودته إلى الحياة بعد كل هذه السنوات الذى قضاها فى تلك (الغيبوبة). ظل عمران نائماً يحيط به الطاقم الطبى المرافق وبعض من أفراد أسرته طيلة اليوم الذى وصل فيه إلى البلاد وفجأة قام بفتح عينيه بصعوبة وتطلع إلى من حوله مركزاً على أفراد أسرته: - أنا ليا كم يوم يا جماعة (غمران)؟؟ تفاجأ أفراد الأسرة والذين كانوا يحيطون بعمران حتى أفراد الطاقم الطبى الالمانى بهذا السؤال الذى لم يكن قد وضعوا له إجابة مدروسة (طبياً) مسبقاً ولكن وفى سرعة أشار أحد الأطباء إلى (حسان) شقيق (عمران) الذى كان يرافقه فى رحلته والذى (أتقن الألمانية) أن يخبره بالواقع: - والله يا (عمران) فى الحقيقة إنت كنت فى (غيبوبة) ليك ذى سبعطاشر سنة كده!! - (فى إاندهاش) يعنى هسعدى (سنت) كم؟؟ - ده يا (عمران) شهر أغسطس سنت ألفين وستة - قلتو سنة كم؟؟ وهنا فقد عمران وعيه الذى لم يعود إليه إلا بعد محاولات مضنية بذلها الطاقم الطبى (الألمانى) المرافق الذى طالب أسرة (عمران) بعدم تعريضه لأى نوع من أنواع الإجهاد إلا أن (عمران) أصر على متابعة طرح أسئلته وطلب عودة جميع من كانوا بالغرفة إليها خاصة عمه ووالد زوجته فى نفس الوقت (قاسم) الذى كان يحبه كثيراً.. - أها يا جماعة الحرب إنتهت يا عم قاسم؟؟ - الحمد لله انتهت - والجماعة دخلوا (الإسلام)؟ - لا دخلوا (القصر) - (فى استغراب) احتلوهو؟؟ - لا ما احتلوهو.. هم جنحوا للسلم - وبعدما جنحوا للسلم ما قاعدين تشيلوا منهم (الجزية)؟؟ - لا أديناهم جزء من (السلطة) وجزء كمان من (الثروة) - الكلام ده كيف؟؟ - الجماعة ديل (أخواننا) والسودان ده بتاعنا كلنا وعندهم فيهو ذى ما عندنا. - و(الشيخ) رأيو شنو؟؟ قبلان بالكلام ده؟؟ - الشيخ منو؟؟ - هو أنحنا عندنا (شيخ) غيرو؟؟ - الشيخ قال إنو (الحرب) دى ما كان فى داعى ليها!! - (فى اندهاش) قال شنو؟؟ - يا (عمران) دى قصة طويلة وإنت مفروض ترتاح.. كدى خلى مسألة الحصل ده لامن تستريح شوية!! - إستريح شنو؟؟ أنا (نص) عمرى (ضاع) كمان النص التانى ما أعرف الحصل فيهو شنو؟؟ - خلاص (نتونس) معاك شوية وترتاح - كدى قبل ما تتونسو معاى ورونى (الشيخ) بطل يمشى (عرس الشهيد)؟ - يا عمران شيخ شنو هو ذاتو بقى شهيد - (فى ذهول) كيف يعنى مات؟؟ - يا (عمران) دى قصة طويلة خليها هسع لامن تتعافى - لا يعنى عاوزين تقولو ليا هو هسع ما موجود وما (مهيمن) على (الشغلانيه)؟؟ - يا (عمران) شغلانية شنو؟؟ و(مهيمن) شنو؟؟ هو ذاتو كان (مسجون) - وين فى (غوانتينامو)؟ - (نامو) شنو يا (عمران) إنت الكنت نائم - يعنى شنو؟؟ - كان مسجون فى كوبر يا (عمران)... فى (كوووووبر) - دى أنا عارفا.. مش أمشى ريئساً وأنا أمشى (حبيساً) - حبيساً شنو يا (عمران) دى بعد داك بى كتير - (فى توسل) عليكم الله وروونى الحصل شنو؟؟ - يا (عمران) خليك هسع من الحصل ح نحكيهو ليك بعدين.. بس إنت أبقى طيب - يا جماعة والله أنا كويس.. أحكوا ليا الحصل شنو - الحصل يا (عمران) إنو (الشيخ) مشى السجن حبيساً (جد جد) - يا جماعة أنا (الكضب كضب) عارفا وروونى (الجد جد) دى حصلت كيف؟؟؟ - (يا عمران) إنت طالع من (غيبوبة) وحالتك الصحية عاوزه ليها فترة عشان تستقر إنت إرتاح ونحنا (كلو) ح نحكيهو ليك.. تحت إلحاح (عمران) وبعد أخذ الإذن من (الفريق) الطبى تطوع (قاسم) عم عمران ونسيبه وقام بسرد (القصة) الكاملة (للمفاصلة) و(الانشقاق) وما جرى فى (الرابع من رمضان) وأتبعها بسرد لاتفاقية السلام من (الداخل) ثم من (الخارج) وإيقاف (الحرب) وحلول السلام ولم ينس أن يحكى له فجيعة البلاد برحيل القائد (قرنق). - لكن يا جماعة زمان لامن كنا بنحارب كان (الشيخ) بيقول لينا الحرب دى من أجل (العقيدة والوطن) ده هسع (الوطن) العقيدة وين؟؟ - يا (عمران) ما قالو ليك الشيخ (لحس) كلامو - والله أنا ما بصدق الكلام ده؟؟ - يا(عمران ) إنت مؤتمر شعبى وإلا شنو؟؟ - (فى استغراب) مؤتمر شعبى يعنى شنو؟؟ - والله يا عمران القصص دى طويلة وما بتنتهى حقو تستريح والأيام الجاية نحكيها ليك.. وتحت إلحاح (عمران) قام عمه (قاسم) بقص (الحكاية) له والتى ما إن سمعها حتى فقد وعيه الذى لم يعود إليه إلا بعد محاولات مضنية بذلها الطاقم الطبى الألمانى المرافق الذى طالب أسرة (عمران) بعدم تعريضه لأى نوع من أنواع الإجهاد إلا أن (عمران) أصر مرة أخرى على متابعة طرح أسئلته وطلب عودة جميع من كانوا بالغرفة إليها. - يا (عمران) ما معقول نحكى ليك سبعتاشر سنة فى ساعتين. - لا لازم تورونى يعنى هسه البلد فى سلام ومافى حرب؟؟ - والله يا (عمران) بعد (حرب) الجنوب وقفت قامت حرب فى (الغرب) لكن (الحكومة) برضو عملت ليها (اتفاقية سلام) ووزعت (الثروة) و(السلطة). - (فى استغراب) يعنى ما فضل ألا (الشرق) و(الشمال). - والله يا (عمران) الشرق هسه الحكومة قاعدة تتفاوض معاهو وإن شاء الله تتوصل لإتفاق (سلام) معاهو و(توزع) ليهو كمان شوية (ثروة) ومعاها شوية (سلطة) والموضوع ينتهى. - توزيع (السلطه) عرفناهو... شنو كل زول عاوز توزيع ثروة.. توزيع ثروة... هو أنحنا عندنا شنو؟؟ - (فى اندهاش) هو أنا ما قلت ليك يا عمران؟؟ - قلت ليا شنو؟؟ - مش أنحنا طلعنا (البترول) وبقينا دولة (نفطية)!!! - طلعنا شنو؟؟ - أيوه يا عمران طلعنا (البترول) - بالجد بالجد - ايوه يا عمران وهنا لم يتمالك عمران نفسه من الفرح ففقد وعيه الذى لم يعود إليه إلا بعد محاولات مضنية بذلها الطاقم الطبى الألمانى المرافق الذى طالب أسرة (عمران) بعدم تعريضه لأى نوع من أنواع الإجهاد إلا أن (عمران) أصر مرة أخرى على متابعة طرح أسئلته وطلب عودة جميع من كانوا بالغرفة إليها. - يعنى هسع بقينا نصدر البترول زي (السعودية) وبلدان (الخليج) وكده؟ - أيوه يا عمران.. وأقول ليك كمان حاجة.. كل يوم والتانى يقولوا ليك فى الجرايد ماشين يحتفلوا بافتتاح حقل جديد وآخر حاجة أمبارح افتتحوا ليهم حقل اسمو (ثارجاس) - طيب لكن ليه الناس شكلها (تعبان) كده و(كالح) وعروق وشها (طالعه) طالما (الحرب) الكانت بتكلف (مليون دولار) فى اليوم دى انتهت.. وكمان البترول طلع وبقى يتصدر؟؟ وقبل أن يجيب (عم قاسم) على سؤال عمران (الوجيه) هذا انطفأت أنوار الغرفة وعم الظلام وصاح الجميع بصوت واحد: (الكهرباء قطعت) - هسع نعمل شنو؟؟ ما حضرنا لينا (جناريتر) - قالها عم قاسم فى أسى - - (يفتح أحد أفراد الفريق الطبى الألمانى شنطة جلدية مربعة الشكل ويخرج جنريترا صغيراً) وهو يقول: - مافيش مشكله نحنا عارفين كهرباء بتقطع عندكم عشان كده عملنا حساب بتاعنا وجبنا معانا (جناريتر) من ألمانيا!! - (عمران فى استغراب) الكهرباء دى ما خليناها قبل سبعطاشر سنة بتقطع.. لى هسع وبعد (البترول) ما قلتو طلعوهو لسع برضو قاعدة تقطع؟؟ خاف (عم قاسم) ان شرح له الواقع وكيف أن سعر الكهرباء قد ازداد أثناء (غيبوبته) هذه أضعاف المرات وأن المواطن قد أصبح يدفع ثمن استهلاكه مقدماً وعلى الرغم من ذلك فإن (القطع) يحدث بصورة يومية وغير معلنة (خاف) عليه أن يدخل مجدداً فى (غيبوبة) لذلك فقد حاول أن يغير دفة الحديث ليكون إيجابياً قائلاً: - هسه إنت يا عمران عارف (خالد) ولدك ده.. وبتك (ثويبه) دى الخليتهم فى الحضانه ديل قاعدين يقرو وين؟؟ - صحى والله ما سألتهم.. إنت يا (خالد) بتقرأ وين؟؟ - أنا يابوى أول ما نجحت وجبت 52% كنت محتار أدخل جامعة (المحيريبا) لعلوم الفضاء وإلا جامعة (المحيريبا) لعلوم الأحياء الدقيقة لأنو جامعات (المحيريبا) الإطناشر جو الأوائل فى التصنيف الإقليمى الأخير بتاع (جامعات دول السافنا الغنية) قمت غايتو دخلت (هندسة مجرات) فى المحيريبا لعلوم الفضاء!! - وأختك دى بتقرأ شنو؟؟ - والله كانت امتحنت (أدبى) وجابت ليها 51% وقالت عاوزة تقرأ (فيزياء) أنا كان الرأى بتاعى انها تدخل (هندسه حاسوب) لكن أمى أصرت ودخلتها (طب أسنان) وقالت ما مهم تدفع ليها كم مليون فى السنة ومستقبلها ما يضيع وإن شاء الله بعد داك الناس دى (خشومهم) ما يفضل فيها (سن) واحد!! وهنا قام (عم قاسم) بشرح الأمر (لعمران) وكيف أن البلاد قد شهدت طفرة وثورة تعليمية كبرى أنشأت فيها 4213 جامعة أتاحت لكل من (هب ودب) أن يدخل الكليه (العاجباهو).. وخوفاً من أن (يروح) عمران فى غيبوبة مرة أخرى لم يشأ (عمه قاسم) أن يخبره بأن معظم هذه (الجامعات) هى فى (الأصل) مدارس (ثانوية) تم فيها تعديل (المطبخ) ليصبح (معملاً) وتعديل (مكتب الوكيل) ليصبح (مكتبة) وأن هذه (الجامعات) تفرخ (خريجين) لا يعرفون (الألف) من (الواو الضكر) وحتى إن كانوا يعرفون فهم لا يجدون لهم فرصة عمل (واحدة)!!! وبينما كان (عم قاسم) سارحاً يستعرض حال (ثورة التعليم العالى) فاجأه صوت (عمران) وهو يقول له فى ذهو: - يا سلام يا عمى أهو دى ثمرة من ثمرات (المشروع الحضارى) القاتلنا من أجلو!!! يعنى إذا التعليم الجامعى بقى متاح لأى زول تبقى مجانية التعليم (الأساسى) إتطبقت خاصة بعد البترول والسلام وإلا مش كده؟؟؟ - خاف (عم قاسم) ان شرح له الواقع وكيف أن (الدولة) قد رفعت (يدها) عن (التعليم) وأن (التلميذ) عليه أن يقوم بدفع فاتورة كهرباء المدرسة وفاتورة (المياه) وإحضار (كرسيه) و(كتبه) و(كراساته) ثم بعد ذلك يجلس فى فصل آيل للسقوط... (خاف) عليه أن يدخل مجدداً فى (غيبوبة) لذلك فقد أوضح له أن (الدولة) قد جعلت (التعليم الأساسى) إجبارياً لكل من بلغ (السادسة) من عمره وأن جميع المدارس قد احتوت على جميع المناشط من أحواض سباحة وقاعات رياضية مغلقة و(معامل حاسوب) وإنترنت حتى أن أصغر (تلميذ) يقوم باستخدام بريده الإليكترونى الخاص به!! - كده نقدر نقول (مشروعنا الحضارى) اتحقق والواحد بكره يمشى (يغير) للجرح ده فى (المستشفى) وكمان يشوف (الثورة الصحية) عينك.. عينك - ثم مواصلاً - وألا ما كده يا عم قاسم؟ - قال (عم قاسم) مخاطباً نفسه: (يا جماعة دى مصيبة شنو؟؟ هسع لو (عمران) ده قلنا ليهو إنو الحاجات دى كلها (متردية) وإنو بعد ده كلو (المواطن) بدفع ليهو مية ألف جباية يعمل شنو؟؟) هسع الواحد يقول ليهو شنو؟ يقول ليهو إنو (الدولة) رفعت إيدها برضو من (العلاج).. يقول ليهو عشان يغيروا ليك الجرح بتاعك ده لازم تدفع قروش.. ولازم تمشى تشترى (الحقنة) و(الشاش) من بره وتجيب (أدويتك) بى طريقتك... وإنو (الفحص) بى قروش و(الأشعة) بى قروش والسرير ذاتو كان ما دفعت ما بترقد فيهو وإنو (العنابر) وسخانة وإنو (الأطباء) الموجودين كلهم (امتياز) أو (طلبة) قاعدين يتدربوا.. وإنو (الاخصائيين) قاعدين فى عياداتهم وكشفهم وصل (مية ألف) جنيه!!! - المستشفيات يا (عمران) آخر (نظافة) والعلاج متوفر وأحسن حاجة عملها (المشروع الحضارى) إنو ده كلو (بالمجان) والمواطن ما عليهو إلا (يمرض) والدولة بتتكفل (بالباقى)!! - يا سلام يا جماعة والله (غيبوبتنا) الطويلة دى ما راحت (هدر) ساكت و(مشروعنا الحضارى) القاتلنا من أجلو ثمارو طلعت وبانت!! حاول عم قاسم إدارة دفة الحوار إلى موضوع آخر حتى لا يصاب (عمران) بالإغماء مرة أخرى فقام بمخاطبته مبتسماً: - تعرف يا عمران إنت جيت فى جو جميل جداً.. الدنيا خريف والمطره... ولكن قبل أن يكمل حديثه قاطعه (عمران) قائلاً: - طبعاً أكيد تكون ((البرك) و(الطين) و(الذباب والناموس) و(المستنقعات) الزمانك ديك انتهت و(الحكومة) أكيد تكون (ظبطت) ليكم الشوارع.... يعنى ح تودى (الزفت) بتاع (البترول) ده وين؟؟؟ هنا أسقط فى يد (عم قاسم) الذى لم يكن يعلم بأن تغيير دفة الحديث لم يكن فى مصلحته فقال فى نفسه (عمران ده ما عارف حاجة ساكت... نحنا حياتنا كلها زفت.. الشئ الوحيد الما فيهو (زفت) شوارعنا!! يقول ليا (بترول) ونحنا كان شفنا (البترول) لامن نشوف (الزفت) بتاعو؟؟؟ المطرة (الشكشاكه) بتاعت امبارح دى شوف (العاصمة) بقت كيف... لم يقطع على (عم قاسم) سرحته تلك إلا صوت (عمران) وهو يخاطبه: - قلت ليا يا عمى الشوارع بقت كيف؟ - عال العال يا عمران... كلها (اتزفتت).. والمطرة لو نزلت الزول (يفتش) للمويه يا عمران ما يلقاها!!! - نعمة والله من الله... الحمد لله رب العالمين... يا سلام يا جماعة ده الكلام والله (الثورة) وعدت فصدقت!!! هنا طلب (الفريق الطبى) الألمانى من (حسان) أن يقوم بإخراج أسرة (عمران) من الحجرة حتى يستريح قليلاً من هذه الأسئلة الطويلة التى قام بطرحها... وبينما كان (حسان) يقوم بتنفيذ إخلاء الغرفة طرق باب الغرفة طارق تبين أنه (الأسطى عوض) خال (عمران) والذى جاء (يتحمدل) السلامة لعمران وبعد أن قام بمعانقة عمران وشقيقه (حسان) بادرهما على الفور: - والله أنا مفروض أكون عندكم من بدرى لكن واقف للمواصلات ليا تلاتة ساعات - (عمران فى دهشة) ليه.. فى شنو يا خالى عوض؟؟ - عشان الحافلات ما عاوزة تشتغل!! - وما عاوزة تشتغل ليه؟؟ - عشان الحكومة أمبارح زادت (البنزين) و(الجازولين) - (فى دهشة واستغراب وذهول ) زادت شنو؟؟؟ - (البنزين) و(الجازولين).... وكمان (السكر) يا عمران هنا (إنحبس) الكلام فى (حلق) عمران من هول ما سمع وكضم كضمة واحدة... هرع نحوه الفريق الطبى المرافق... أخلوا الغرفة من الجميع... قاموا بتدليك (القلب) ووضع جهاز (التنفس) وجميع الإسعافات الممكنة... وبعد دقائق خرج أحد أفراد الفريق الطبى (الألمانى) من الغرفة... مخاطباً الجميع بلغة عربية مكسرة والأسى يبدو عليه: - البركة فيكم يا جماعة... مشروع (هدارى) مات... مستر (أومران) مات!!!!!! الفاتح يوسف جبرا

(عدل بواسطة اسعد الريفى on 05-27-2009, 00:43 AM)

(عدل بواسطة اسعد الريفى on 05-28-2009, 06:30 PM)

Quote: نحن البلد الوحيد الذى يعمل فيه (شرطى المرور) شاكى وقاضى ومتحصل وأمين خزينة .. فهو يوقفك متضررا من خرقك للقانون (شاك) ويثبت ضدك التهمة (قاض) ويستلم منك قيمة المخالفة (متحصل) ويضعها داخل الشنطة (أمين خزينة) !

Quote: مستشار لشئون التنفيس ! (لم ينشر) لم يدر بخلدى يوماً أن أصير مسئولاً فأنا لا أحب ان أكون مسئولاً عن أحد لعلمى بأن ذلك سيوردنى مورد التهلكة يوم لا ينفع مال ولا بنون ولعهد قريب جداً كنت أتعجب لأولئك الذين هم مسئولون عن الأف (البشر) بل والملايين منهم ، حتى تم أختيارى مؤخراً وبعد كمية من الإستجداءآت و(كسير التلج) للمسئولين ، مستشاراً لشئون التنفيس لأنضم إلى قبيلة المستشارين بالبلاد ! ولم يكن ذلك إلا لعلمى بأن ذلك المنصب (ما فيهو مسئولية) بمعنى أننى لن أكون مسئولاً عن أى شخص يعنى (إستشارات تنفيسية ساااكت وكده) ! - شوف يا استاذ .. بعد الإطلاع على كل مقالاتك الإنت كتبتها سوى فى الصحف أو من خلال موقعك على الإنترنت ومن خلال دراسة قمنا بيها لقينا إنو لازم نستعين بيك كمستشار (للتنفيس) ! - كيف يعنى سعادتك ما فاهم ! - أيواا أفهمك يا أستاذ … بتعرف حلة (البرستو)؟ - (فى تعجب) : أيواا مش الحلة بتاعت (الضغط) البعملو فيها الأكل دى ! - (مبتسماً) : عليك نووور بس ياها ذاااتا - وده دخلو شنو فى مقالاتى سعادتك - أنا ح أفهمك براحة براحه بس طول ليا بالك - كويس - شوف يا أستاذ أى شعب فى الدنيا عشان حكومتو تقدر تحكمو لازم (تنجضو) شويه عشان (يتسبك) ، فى حكومات (بتسلق) الشعوب وفى حكومات (بتقليها) وفى واحدين (بيشووها) لكن نحنا لقينا طريقة (البرستو) دى أحسن طريقه وبتسبك الحلة أقصد الشعب تسبيك تمام ! بس فيها مشكلة وااااحده ! - اللى هيا شنو سعادتك - مشكلتا إنو الضغط لو زاد على الشعب الجوه الحلة ده ح ينفجر وبعدين ما يحلنا إلا الحلا بله ! - طيب والضغط ده بتعملو ليهو شنوووو؟ يعنى بتتحاشوهو كيف؟ - بالتنفيس … كلما الضغط يزيد نخلى الحلة أقصد الشعب يتنفس شويه ! - يتنفس كيف يعنى ؟ - أها بقى ده شغلك .. مال نحنا جايبنك (مستشار شئون تنفيس) ساااكت - أيوااا كده فهمت والله الزول مرات بيكون بليد جنس بلاده !! – مواصلاً- أها وح أمسك الشغل متين؟ - قبل ما تمسك الشغل لازم تعرف إنو أى مسئول يتعين عندنا لازم يمشى (أكاديمية إعداد المسئولين) ياخد دورة (لمدة شهر) هناك حتين بعد داك يجى يؤدى (القسم) ويمسك وظيفتو ! فى صباح اليوم التالى وهو الموعد المقرر لبدء الدورة قمت قبل وقت كاف بإرتداء (بدلة العرس) الكحلية والكرافته (لسه ما أدونا بدل لبس) وجلست منتظراً العربة الحكومية الفارهه (ما خلاص بقينا مستشارين وكده) ! والتى ما أن توقفت أمام منزلنا المتواضع فى ذلك الحى الشعبى حتى إشرأبت رؤوس الجيران من خلف الأبواب تحمل نظرات الدهشة والإستغراب والتى إزدادت حينما نزل السائق وقام بفتح باب العربه الخلفى (لسعادتى) حتى أركب ! ، فى أحد المبانى الراقية المطلة على النيل توقف السائق أمام مبنى أنيق زينته لافتة كتب عليها بخط جميل (أكاديمية إعداد المسئولين) ، هممت بفتح باب العربة والنزول (ما ما متعود وكده) غير أن السائق كان قد قام بفتحة فى همة ورشاقه ، عبر البوابة الفخمة سرت فى طريق مرصوف بالبلاط الملون تحفه شجيرات قصت بعناية أوصلنى إلى صالة أنيقه يتوسطها مكتب يجلس عليه شاب صبوح الوجه أمامه جهاز (كمبيوتر) ما أن رآنى حتى هب واقفاً : - أهلا سعادة المستشار - مرحب بيك أهلن - الحقيقة سعادة عميد الأكاديمية منتظر سعادتك من قبيل .. إتفضل تقدمنى الشاب إلى باب خشبى ذو مقبض ذهبى قام بإدارته لأجد نفسى فى مكتب غاية فى الفخامة والأناقه وشخص أربعينى يهب واقفا مرحبا - مرحب بيك يا أستاذ … مرحب بيك سعادة المستشار .. - أهلن مرحب .. - الحقيقة ذى ما عارف سعادتك الأكاديمية دى وظيفتها إعداد (المسئولين) فى كافة المناحى عشان العمل (الحكومى) يكون فيهو (هارمونى) وماشى بى أسس واحده وكده ! - لا جميل والله - لو تسمح سعادتك قبل ما المحاضرات ما تبدأ بس آخدك فى جوله كده أعرفك بمبانى الأكاديمية المكتبة : فى حجرة المكتبة الأنيقه التى يلفها الصمت جلس بعض (المسئولين) هنا وهناك وهم يمسكون بالكتب يقرأون فى نهم ، وقد كانت بعض عناوين الكتب التى بين أيديهم : - كيفية تعلم السلوك المتعالى للمسئولين وأصحاب المعالى - كيف تواجه الكوارث وأنت مبتسم - دليل الحيران فى الهروب من المواطن الغلبان - كيف تكون رجل أعمال ناجح ومسئول حكومى فى ذات الوقت - كيف تنشئ شركة داخل وزارة فى 3 ساعات - القول المشهود فى سفر الوفود عندما لاحظ مرافقى الدهشة على محياى وأنا أطالع عناوين الكتب سألنى : - مالك يا أستاذ مستغرب كده؟ - لا ما مستغرب ولا حاجه بس يعنى كنت بفتكر ألاقى كتب ذى التبيان في آداب حملة القرآن للإمام النووي- أو الجامع لأحكام القرآن للقرطبي أو المواعظ لإبن الجوزي أو الـ…… - (مقاطعا) : لا الحاجات دى المسئولين بتوعننا قروها زمااان وحافظنها صم .. وهسه ما بحتاجوا ليها ! – متخارجا من السؤال- يلا يا أستاذ نفرجك على باقى المبانى حقت الأكاديمية ! حجرة جمباز : عندما أدخلنى مرافقى إلى هذه الصالة خلت نفسى داخل أحد صالات الأندية الرياضية ، عدد لا يستهان به من المعدات والآلات الرياضية كتلك التى يتم الإعلان عنها فى شاشات التلفزيون … - شوف يا استاذ نحنا عارفين إنو (العقل السليم) فى الجسم السليم وعشان المسئول عقلو يكون شغال كويس وقراراتو تكون سليمة لازم كمان جسمو يكون سليم ومعاف خاصة وإنو مسئوليننا بكترو من أكل (اللحوم) والدهون ودى فيها طبعن (كلسترول) كتير ولازم يتحرق ويكون الجسم ما فيهو شحوم ورشيق والمسئول أول ما يدقو ليهو (النار ولعت) يقوم ينطط ويهز ذى فرخ (الأسد) ! بدون ما يتعب أو نفسو يقوم ! - لا والله تمام كمان فيها إعداد بدنى ورياضى - لا وإنت شفت حاجه يا أستاذ نحنا فى الأكاديميه هنا حتى المسئولين بنوريهم يلبسو كيف ومتين يشيلو عصاية الابنوس ومتين يشيلو عصاية المحلب ومتين يلبسو مركوب النمر ومتين يلبسو مركوب الأصلة – مواصلاً- يلاك يا استاذ نفرجك على قسم (الأزياء) ! دلفنا ومرافقى إلى قاعة فسيحة مكبفة الهواء تنتشر فيها (مجسمات) لأشخاص (مسئولين) يرتدون أطقم مختلفة من (الزى الوطنى) شئ (رمادى) وشئ (سمنى) وشئ (بيجى) وشئ (أبيض ناصع) شئ (زبده) وشئ (سكروته) ، العمم جميعها (توتال سويسرى) غير أن الملافح تختلف فى أشكال (النقشة) المطرزة عليها وفى ألوانها كذلك كما تختلف أنواع (العصى) وألوانها وأطوالها وأشكال مقابضها فتلك ذات مقبض على هيئة (رأس ثعبان) وتلك على هيئة (رأس صقر) أما (المركيب) فهى من الجلد الطبيعى للنمور والثعابين بأنواعها المختلفة أما الساعات (السويسرية) فعلى حسب لون (الجلابيه) فالبيضاء ذات (ميناء أبيض) و(إستيك جلدى أسود) والبيج ذات مينا ذهبى و(كتينة) جلدية بنية أو (ميتال مذهبة) ! - القسم ده عملناهو يا أستاذ عشان نحنا بنؤمن إنو (الجواب من عنوانو) وإنو المسئول الما بهتم بى مظهرو وأناقتو ما بهتم بقضايا المواطنين هسه لو عاينت يا أستاذ لأى مسئول ح تلاقيهو لابس واحده من (الطقوم) القدامك دى لأنو أختاروها لينا خبراء أزياء عالميين يعنى ما جات ساكت كده ! - لكن أنا ملاحظ إنو كل المجسمات دى ملبسنها الساعة باليمين - ما لازم يا أستاذ باليمين عشان ما نتشبهه باليهود والنصارى والكفار البلبسو الساعه بالشمال ! محاضرات : بعد خروجى ومرافقى من صالة الأزياء أتجه نحونا ذلك الشاب الصبوح وهو يشبر إلى مبنى قريب منا وهو يقول : - يا أستاذ المحاضرات ح تبدأ عاوزنك - ده المبنى الفيهو قاعات المحاضرات أنا أسيبك يا أستاذ تمشى تخش المحاضرة وفى وكت تانى أفرجك على بقية مبانى الأكاديمية أتجهت وأنا أحمل دفترى وقلمى إلى القاعه التى وجدت بداخلها عددا لا يتجاوز أصابع اليدين معاً من الطلاب (المسئولين) ، ألقيت عليهم التحية وجلست بينما كان المحاضر منهمكاً فى كتابه إسم الدرس الأول على (السبورة) وهو (فقه الأولويات) - طبعا يا جماعه إنتو ح تكونو مسئولين وكده وح تقابلكم (حاجات) كتيرة مفروض تنفذوها بس السؤال البفرض نفسو هو : شنو المفروض يتنفذ قبل التانى؟ يعنى البحكم قصت الأولوية شنو؟ يعنى بمعنى تانى شنو المعايير البنحدد بيها (الأولويات بتاعتنا) ! - مواصلا- ممكن واحد فيكم يتكرم يجاوب؟ - (1) : أنا بفتكر الأولوية بتحددها (الأهمية) بمعنى إنو كلما كانت الحاجه مهمة كلما كانت هى عندها أولويه - (2) : أنا بفتكر إنو الأولوية بتحددها (الحوجه) بمعنى كلما كانت الحاجه (محتاجين) ليها أكتر كلما كانت الأولويه ليها - (3) ممكن يا دكتور تدينا مثال؟ - كويس لو فرضنا إنو عندنا أربعه مليون دولار نشترى بيها 250 مكنة بتاعت غسيل كلى وإلا نشترى بيها (يخت) ؟ ياتو العندو أولويه ! - (الجميع) : طبعن مكنات غسيل كلى ! - ليه؟ - مش قلنا ليك يا دكتور إنو (الأهمية) و(الحوجه) هم البحددو (الأولويات) ؟ - كلامكم صاح - وتيب ! - بس فيهو حاجه واااحده غلط - اللى هيا - إنو (الأهمية والحوجه) دى بتحددهم (الحكومة) ! كانت تلك أولى المحاضرات والتى أعقبتها محاضرات أخرى فى عدد من المواد التى المختلفة التى شملت سايكلوجية (التطنيش) ، (فن التصريحات) ، (فرز العطاءآت) ، (فقه العقود) ، (فقه الإتفاقيات) ، (تجاهل الإشاعات) وأبواب لمواد أخرى لا يتسع المجال لذكرها . توزيع الشهادات : بعد إنتهاء الدورة تم عقد (إمتحان) لنا ثم بعدها بأيام وفى إحتفال صغير حضره لفيف من كبار المسئولين تم توزيع الشهادات حيث ولدهشتى العارمة قد جئت (أول الدفعة) ، إنتهى الإحتفال وجدت السائق فى إنتظارى ، فى المسافة إلى المنزل سرحت بخيالى بعيداً تخيلت صورتى تحتل مكانها فى الصفحة الأولى وأنا أؤدى القسم وتحتها بالبنط العريض (الفاتح جبرا مستشاراً لشئون التنفيس) والتهانى تنهمر إنهمارأ شئ مسجات وشئ إيميلات وشئ مكالمات و(الحاقدون والحاسدون) وهم يهمهمون تحت تحت (إشتروهو … إشتروهو .. هو قايلنا ما عارفين) ، لم أفق من سرحانى هذا إلا والسائق يفتح لى باب العربة بعد أن وصلنا للمنزل الذى ما دخلت إليه حتى قابلتنى زوجتى قائلة : - فرحان على شنو؟ - كيف ما أفرح جيت أول الدفعه وح أكون سعادة المستشار وإنتى ح تكونى زوجة سعاده المستشار ! - (فى برود) : ما ظنيت ! - كيفن ما ظنيتى يعنى؟ - ما سمعت الرادى ؟ شالوك هسه فى نشرة تسعه !! - (بدون تفكير) : معقول ؟ يشيلونى كيف وأنا لسه ما سافرت ماليزيا !

Quote: دق مندوب شركة تحصيل فواتير ( التلفونات) باب منزل جارنا (حاج الطاهر) - ده منزل الطاهر فضل الله - نعم - نحنا فواتير التلفونات ( وناوله فاتورة التلفون) أخرج (حاج الطاهر) نظارة القراءة من جيب جلابيته وبدأ يقرأ في تفاصيل الفاتورة .. محادثات عالمية محادثات محلية .. هاتف جوال ... ضريبة.. دمعة غريق -(حاج الطاهر) في استغراب وهو يضع أصبع سبابته أمام ( دمغة غريق) مخاطبا المتحصل : - كدى اقرا ليا دى شنو ؟ دمعة شنو؟ - دى يا حاج ما دمعة ... دمغة ... بالغين مش بالعين .., دمغة غريق .. ألف جنية بس - مش في ألف جنية بس.. هي ذاتا شنو؟ - والله يا أستاذ أنحنا بنحصل بس القروش لو عندك أي أسئلة أمشي (شركة التلفونات) هناك يشرحوا ليك الموضوع في الشركة:- -عاوز أقابل الزول المسئول عن التحصيل - شفت الممر داك.. أمشي عديل تأني لف شمال تأني لف يمين أول مكتب يقابلك دا مكتب مديرالتحصيل وبالفعل بعد أن قام (حاج الطاهر) بمتابعة (الوصف) وجد نفسه وجها لوجه امام مكتب (مدير التحصيل) - السلام عليكم - وعليكم السلام. - والله في الحقيقة أنا بس عندي استفسار.. - (مبتسماً) هتفضل - الحقيقة جاتني فاتورة التلفون وفيها ألف جنية مكتوب قداما دمغة غريق.. اول حاجة الشئ الانحنا عارفنو انو الدمغة دى (طابعة) بلصقوها لمن الزول يجى يقدم طلب ... والحاجة التانية غريق شنو ؟ وأنا مالي ومال المسالة دي.. محادثاتى وبدفعها ليكم .. تأني ما عندكم معاي حاجة ..انتو يعنى لازم تاكلو اموال الناس (بالباطل)؟ - (بعد ان استعدل المدير فى جلسته) يا أستاذ ما ( تهيج) ساكت.. اول حاجة انحنا ما قاعدين ناكل مال زول بالباطل لانو المسألة دي أجيزت من المجلس التشريعي للولاية..وانتو النواب ديل انتخبتوهم .. يعنى هم بمثلوكم .. يعنى هم موافقين نيابة عنكم .. يعنى بالعربى انتو موكلنهم .. وهم اصدرو القرار دا ونحنا ما علينا الأ التنفيذ.. والحاجة التانية (الحكومة) ما شغالة بالتسميات شغالة بالجوهر.. بالمضمون ..الدمغة بلصقوها .. يدبسوها .. ما مهم المهم تندفع .. هسع لو المسائل تسميات كان تكون فى حاجة اسمها (المساهمة الإلزامية) - أها وهسع حكاية (دمغة الغريق) دى شنو ...؟ - والله أنا ما بقدر افتيك لكن لو عاوز تعرف أكثر.. لحسن حظك ( منظمة الغريق) ذاتا المبنى بتاعا أهو داك.. العمارة الصفراء ديك ممكن تمشي تأخذ منهم معلومات وتعرف الحاصل شنو. في المنظمة:- مبنى المنظمة عبارة عن ( فيلا) فخمة ذات سياج معدني أنيق معلقه عليه بعض اللوحات الإعلانية التي تحض المواطن على تقديم الدعم والمساعدة للمنظمة من أجل القيام بدورها الاجتماعي فتلك لوحه تقول ( أيها المواطن الكريم تبرع بكفن غريق تكسب ثواب ) وأخرى تقول ( من كفن غريقا فكأنما أطعم عشرين مسكيناً) وثالثة تقول ( الغرقى أخوانكم فتبرعوا لهم).. (الغرقان فى ذمة العايش) بعد أن قام (حاج الطاهر) بقراءة كل تلك اللوحات .. ومتع ناظريه بذلك (القطيع)من السيارات البيضاء الفارهه موديل العام (المرصوصة) فى المكان (المسقوف) المعد لها ... قام بدخول المبنى حيث طلب من موظف الاستقبال مقابلة المدير العام للمنظمة . مع المدير :- دلف (حاج الطاهر) الى مكتب المدير العام .. المكتب فسيح .. التكييف مركزى .. تتدلى من حيطانة ستائر ايطالية بينما غطيت ارضيته بالسجاد الايرانى .. به طقم جلوس امريكى فاخر وقاعة إجتماعات انيقة من الخشب المصقول اللامع .. امامها مكتب نصف دائرى يجلس عليه السيد المدير بوجه لامع تبدو عليه أثار النعمة و(الراحات) و(التكييف طويل المدى) - السلام عليكم - وعليكم السلام ورحمة الله تعالى وبركاته (اتفضل- مشيرا الى احد كراسى الجلوس الوثيرة) وجلس(حاج الطاهر) ثم قال مخاطبا السيد المدير : - والله فى الحقيقة أنا جاتني في فاتورة التلفون دمغتكم دي وقلت أجي أقابلكم أعرف الحاصل شنو ؟ وما مدى ( مشروعية) دفع الدمغة دي. - والله يا أخي نحنا (بنثمن) فيك الروح الطيبة دي وتجشمكم مشاق الحضور لي دارنا المتواضعة عشان تتعرف على ما تقوم به هذه المنظمة من عمل خيري يهم المسلمين جميعا. في الحقيقة المنظمة دي جات نتيجة لتزايد حالات الغرق..كل يوم والثاني يقولوا ليك ثلاثة أصحاب مشوا البحر غرقوا...ناس مشوا رحلة ما رجعوا .. وحافلة وقعت من الكبري الركاب ما إتلقو.. وجثه طافية في النيل.. الناس ديل كلهم ( الحكومة) تجيب ليهم ( غطاسين) من وين ؟؟؟ ونجيب ليهم ( بكاسي) تشيل جثثتهم من وين ؟؟؟ .. ونجيب ليهم ثلاجات تحفظ جثتهم لحدت ما أهلهم يتعرفوا عليهم من وين ؟؟؟... الإجراءات.. حمل الجثمان للمشرحة.. وضعة في الثلاجة.. تشريحه.. تصويره وعمل إعلان في الجرائد عشان اهلو يتعرفوا عليهو.. وفي حالات عدم التعرف تكفينو ودفنو.. من وين ؟؟؟ وما تنسى مرات بيكون الزول الغرقان دا ذاتو ( مكتول) وفي الحالة دي نحنا في المنظمة بنتابع مع (الشرطة).. الصرف دا كلو الحكومة تصرفوا من وين .. في (ميزانية الدولة) في بند ذى دا ؟؟ ما لازم( منظمات المجتمع المدنى) والمواطن يساهم في المسألة دي.. أنت هسع ذاتك ما ممكن بكره تقع بيك عربية في النيل( يجيبو ليك غطاسين من وين )؟ بإختصار نحنا مسئولين من (الغريق) من لحظة دخولو المويه الى لحظة دخولو (القبر) - دا كلو كلام جميل لكن أنا ذنبي شنو؟ - ذنبك شنو كيف يا أستاذ.. مش أنت زول مسلم والبغرقوا ديل كلهم إخوانك فى الإسلام ؟ - (حاج الطاهر فى إستنكار) لا .. البغرقو ديل كلهم (مواطنين) لكن ما كلهم مسلمين وكلامك دا ضد (الدستور) وإتفاقية ... - (المدير مقاطعاً) لا أنحنا الناس الما مسلمين ديل عندنا ليهم (إدارة) براها فى المنظمة إسمها (إدارة غير الناطقين بها) .. بالشهادة يعنى - لكن هسع ( السودان) كلوا يدفع ( للغريق) دا؟مسلم على غير مسلم ..يعنى لو التلفونات دى فيها مليون مشترك وانتو قاعدين تاخدو الف جنيه من كل واحد يبقى بتجمعو ليكم مليار جنيه فى الشهر .. دا غير العاوز يطلع او يجدد جواز او بطاقة او رخصة قيادة أو عاوز يطلع شهادة بحث دى كمان مليارات ..إنتو بتودو القروش دى وين؟ أصلو القاعدين (يغرقو) ليكم فى الشهر كم؟ - يعني أنت بس دي ( بالذات) عاوز تعرف أنها ماشة وين انت هسع ( الباقين) عارفم بمشوا وين ؟ عندك هسع دمغة ( الطريح) ودمغة ( الشليق) ودمغة (الحابل) ودمغة ( النابل) زائد كنانه والرهد ديل كلهم عارفهم بمشوا وين؟ - (حاج الطاهر محتداً) هو نحنا (تطير عيشتنا) ما نعرف ولا حاجة .. يا أخى انا بس عاوز أعرف دى .. أيوه دمغة الغريق دى .. الباقى دا بيجى يوم نعرفو - (المدير فى برود) : أكيد تكون يا استاذ افتكرت انو القروش دى كتيرة .. أول حاجة يا أستاذ لازم تعرف انو مسألة انتشال الجثث دى مسألة مكلفة .. لنشات وغطاسين وجازولين وخلافه .. عندك مثلاً الراجل الوقع من كبرى (الإنقاذ) وانتحر الاسبوع الفات عشان ما قدر يدفع مليون جنيه رسوم ولدو الدراسية .. دا نحنا بس عشان نلقى الجثمان بتاعو المسألة كلفتنا تلاتة مليون .. - طيب لو كان أديتو المليون ما كان أنتحر - يا أستاذ انا بكرر ليك دى ما مسئوليتنا .. دى مسئولية ديوان الزكاة .. صندوق التكافل .. الرعاية الاجتماعية .. طلاب دعم الصندوق .. لكن مسئوليتن تبدأ من لحظة موت الغريق داخل الموية وحتى ندفنو - (فى استنكار) يعنى القروش دى كلها .. يعنى كم مليار جنيه فى الشهر كلها غطاسين ولنشات وجازولين .. معقول بس - طبعا لا يا استاذ .. القروش البتفضل قاعدين نوظفها .. قاعدين نعاين للمستقبل .. هسع لما يجى يوم الناس دى كلها تغلبها المعايش تكابس البحر وتنتحر والله ما تلقى الا المنظمة دى تسترها .. نحنا – يا أستاذ- مستعدين للغرق (الجماعى) ال ح يحصل وعاملين حسابنا .. ومش كدا وبس نحنا عملنا مشروعات استثمارية نوظف فيها القروش دى عشان تنمو وتعمل رصيد كويس نقدر نجابه بيهو اى (غرق) . - ذى شنو؟؟ - طيب تعال اتفرج على الصور (وفتح السيد المدير البوم كبير ملئ بالصور الملونة) شفت دى الشايفها دا .. المبانى أم اربعين طابق دى .. دى (أبراج الغريق التجارية) فى قلب الخرطوم وبتنفذ فيها شركة (صينية) و ح نبيعها شقق ومكاتب .. (يقلب الصفحة) والبصات السفرية السياحية الفاخرة دى .. دى مية وخمسين بص أسسنا بيهم شركة (سفريات الغريق) الخرطوم/مدنى/بورتسودان/دنقلا ... (يقلب الصفحة) وكل صيدليات (الغريق) الفى العاصمة دى بتاعتنا .. ولسع عندنا مشروعات كتيرة .. دا كلو يا أستاذ استثمار عشان (الغريق )....يعني السودان دا كلو لو ( غرق) أنحنا ممكن بي امكاناتنا دي( نحصلو) ونشيلو ندفنو.. اها بعد دا فى زول يقول نحنا قاعدين نهمل الغريق؟؟ زول يقول إنو البلد ما فيها (آليات) لدرء الكوارث - طيب انتو وكت القروش دى كتيرة كدا وعملتوها عمارات وشركات واستثمارما تفكرو تساعدو المواطنين (الغرقانين) فى (الديون) و الفقر والمرض ودا ذاتو يكون شئ وقائى عشان ما يمشوا و(يغرقو ليكم) - والله يا استاذ حسب النظام الاساسى لمنظمة الغريق نحنا بنعنى بمساعدة الغريق (البحرى والنيلى) وحتى البغرق فى (ترعة) .. لكن (البرى) دا ما معانا..دا مسئولية (الرعاية الاجتماعبة) .. (مواصلا) شوف يا استاذ نحنا المواطن الغرقان دا همنا الاول والاخير ولازم يلقى عناية تليق بيهو مش هنا وبس حتى لو بره السودان .. نحنا الاسبوع الجاى ح نفتتح مكاتب (جهاز شئون الغرقانين بالخارج) عشان نكون مسئولين من البغرق برة السودان كمان . - ودى طبعا ح تكون دمغتها بالدولار والريال والاسترلينى؟؟؟؟ - اكيد .. نحنا عملنا المنظمة دى عشان نحفظ للمواطن السودانى (الغريق) حقو فى انو يغرق غرقة لائقة .. يعنى مش معقول يعيش (ممرمط) و(مشلهت) ولما تتسدا الابواب فى وشو ويقوم ينتحر ويغرق كمان تانى (يتبهدل) تعليق لكاتب المقال : وانتو ما (بتغرقو) مالكم ؟؟ غواصات ؟؟ الله لا كسبكم

Quote: خلوها مستوره كانت هذه المره الأولى التى يتم فيها إستدعاء (وزير شئون الغابة) من قبل (ملك الغابه ) بهذه الطريقة الرسمية فقد جرت العادة أنه حينما كان الأسد يود أن يقابل (وزير شئون الغابة ) أن يتصل به هاتفياً عن طريق رقمه السري ويطلب منه الحضور إليه ولكنه فى هذه المرة أرسل له خطاباً رسمياً يستدعيه فيه لمقابلته مما جعل (النمر ) يتوجس خيفة . بعد أن أفاق النمر قليلاً من (خيفته) طلب من سائقه الخاص الذهاب به إلى مبنى (قصر الحكم ) لمقابلة (ملك الغابة) كان (الأسد) متجهماً يحمل فى يده نسخة من صحيفة (أخبار الغابة) التى يرأس تحريرها (الثعلب ) متجاهلاً التحية التى ألقاها عليه (النمر) الذى وقف مندهشاً لهذا النوع من المقابلة الذى لم يعتاد عليه ، وبعد برهة قليلة رفع (الأسد ) رأسه مخاطباً (النمر): - يا أخ ما من زمان قلنا ليكم أعملوا حسابكم والغابة دى (ضيقة) وما تفضحونا - (فى إندهاش مصطنع ) ممكن أعرف الحاصل شنو ياملك الغابه ؟ ودون أن يرد عليه (الأسد ) قذفه بالصحيفه التى تطايرت صفحاتها على الأرض فأخذ يلملم فيها ثم أخذ فى قراءة العناوين الرئيسية فى إمعان ، وما أن إنتهى من قراءتها حتى رفع رأسه مخاطباً (الأسد) والعرق يتصبب منه : - لكن سعادتك .. - ما لكن ولا حاجه إنتو عاوزين تفضحونا .. يعنى هسع لو ماناس (أمن الغابه) ديل صاحين ومشوا صادروا العدد بتاع بكره دا من جريدة الثعلب دى من المطبعة قبلما يتوزع كانت (الحيوانات) دى كلها عرفت عمايلك دى - لكن ياسعادتك الكلام دا - (مقاطعاً النمر) عاوز تقول ليا الكلام دا إشاعة ساكت؟وهنا قام (الأسد ) بسحب درج المكتب الذى يجلس عليه وأخرج عدداً من الأوراق قام بقذفها نحو (النمر) ثم قال له مخاطباً: - كان إشاعه ديل شنو ؟ مش صور من عقودات الإيجار بتاعات عماراتك دى (ثم مواصلاً فى غضب أكثر) هسع فى (حيوان ) وزير ومعروف إنو لمن إتعين ماكان عندو (سجم رمادو) يقوم هسع يكون عندو سته عمارات وقاعد يشطب فى السابعة ؟ وفى أحسن مواقع فى الغابة ؟ وأسقط فى يد (النمر) عندما تيقن تماماً بأن المسألة موثقه وأنه لن يستطيع مواصلة الإنكار فقام مخاطباً (الأسد) فى إستسلام وضعف : - والله الظاهر (ياملك الغابه) الواحد قعد وزير مسافة طويله عشان كدا ماخلا بالو إنو العمارات دى بقت كم (ثم واصل ) .. هسع العمل شنو ؟ - العمل إنو لازم تتصل بمدير (جهاز أمن الغابة) هسع وتمشوا تعتقلوا (الثعلب) دا وتفتشوا بيتو ما يكون داسى ليهو نسخ تانيه من العقودات دى .. توجهت قوة من جهاز أمن الغابه يقودها مدير الجهاز بنفسه الى منزل (الثعلب) حيث قامت بتفتيش كل ركن فيه وتم جمع كل الأوراق الموجودة وإعتقال (الثعلب ) والذهاب به الى مكان مجهول . فى اليوم التالى لإعتقال (الثعلب)خرجت كل صحف الغابة الموالية لحزب الغابه الحاكم وعلى صدرصفحاتها عناوين من شاكلة (قوات الأمن تقتحم صحيفة أخبار الغابة وتعثر على وثائق خطيرة) .. (الوثائق تثبت تورط الثعلب بالتخابر مع جهات أجنبية).. كما قامت بعض الأقلام (الموالية ) بالإشادة بدور (الأمن ) فى الحفاظ على السلام الإجتماعى واجتثاث كل مهدادته ووصفت (الثعلب) بانه (طابور خامس) كما جاء فى عمود (بصل مردوم ) بصحيفة (الغابه) .. اما كتاب الأعمدة المحسوبه على (المعارضة) كعمود (مناشير) بجريدة (رأى الغابه) فقد امتلأت تنديداً بما وصفته حجراً على (حرية التعبير وتغولاًً على حقوق مواطنى الغابة التى يكفلها لهم الدستور الذى يمنع احتجاز أى مواطن دون توجيه تهمة محددة له . ومع أن ( التمساح ) كان حتى عهد قريب مشاركاً ً فى حكومة (حزب الغابه المفترس) الا أنه قاد حملة شعواء ضد شريكه السابق(النمر) واصفاً إياه بالتسلط والفساد ومطالباً باطلاق سراح (الثعلب ) مماحدا ببعض المراقبين بوصف سلوك (التمساح) بانه نوع من المكايدة السياسية. إنتشر الخبر فى الغابة كإنتشار النار فى الهشيم وأصبح حديث مجالسها فها هى بعض الحيوانات المجتمعة فى (عزومة ) سماية (الأرنب) الذى رزق مولوداً بعد أن تم توزيع (العشاء) لها تناقش الأمر ، قالت (الجدادة) وهى تضع صحن (الكوكتيل) الذى فى يدها فاتحة باب (الشمار) : - عليكم الله (النمر) دا مش بالغ عديل كده ؟ هسع (مليارات) العمارات (اللغفا) دى مش كانت إشترت اينا مصل نتعالج بيهو من (الأنفلونزا) القرضتنا قرض دى ؟؟؟ ردت عليها (التعامة) بصوت خافت وهى تضع زجاجة المشروب جانباً وكأنها تخاف أن يسمعها أحد : - والله يا (الجدادة) وما طالبانى حليفه أنا (الصقر) الحى وموجود ده قال ليا قبل مدة كان (خرمان) وطاير بفتش ليهو فى سجاير قام شاف ليك (النمر) قاعد (يلقط) فى الإيجارات وكمان (بالرسمى) هنا تدخل (الديك) قائلاً فى تهكم : - هو بالله فى موظف حكومة بيقدر يبنى جنس العمارات دى ؟؟ أنا هسع ما ليا عشرين سنة (موظف) غير (العشة) المبهدلة دى عندى شنو يا الجدادة ؟؟ (ردت الجدادة وهى تمط منقارها) : - يا خوى إنت ما (ديك) ساكت ما بتقدر على الحاجات دى - آآى أنا (ديك) لكن ديك (نضبف) ما (ديك) وسخان خاف الجميع أن يتطور النقاش بين (الديك) وحرمه (الجدادة) لذلك قال (ودأبرق) الذى كان يقف على أحدى الفروع محاولاً تغيير الموضوع : - عليكم الله شوفو حالة الغابة البائسة دى ؟ لا علاج لا تعليم ذى (الحيوانات) والأغرب من دا الواحد لو عاوز يطير يدفع رسوم ولو عاوز (يرك) يدفع رسوم وقروشنا كلها أتارى ماشة (سيراميك) وطوب وأسمنت . توقف (الضب) الذى كان (يمزمز) فى طبق (الناموس) الذى أمامه عن الأكل وقال وهو يخاطب (ود أبرق) : - والله يا (ود أبرق) يا خوى أخير إنتو .. أنحنا الواحد فينا ما لاقى ليهو (جحر) يلمو .. عليك الله هسع عمارة واحدة من عمارات (النمر) دى بتعمل ليها كم مليون (جحر) ؟؟ لم يشأ (الحمار) ألا يشارك بالحديث فأراد أن يشارك ولكن بطريقة (خالف تذكر) – يا جماعة ما تقوموا فى (النمر) ده ساكت ده إتعين وزير من سنة ألف وتسعمية و ….. (وقبل أن يكمل قاطعه الديك) قائلاً : ياخى قول إتعين وزير من سنة ألف وتسعميه (قبل الميلاد) تعال (نضربا) هى (ماهية) ولا حاجه تانية؟؟ تزايدت حملات الدعوة لاطلاق سراح (الثعلب) تدخلت منظمة (حقوق الحيوان) كما تدخلت جميع منظمات الغابة المدنية . بعد عشرين يوماً من الإعتقال والتعذيب تم نقل (الثعلب) من مكان إحتجازه (فى إحدى البيوت) الى مبانى (أمن الغابه) معصوب العينين .. حيث وجد (النمر) شخصياً فى استقباله. - عامل لينا فيها راجل يعنى؟ (الحيوانات) الفى الغابه ديل كلهم عارفين عندى سبعه عمارات… يعنى إنت شاطر عاوز تجيبا فى الجريدة؟ - (الثعلب) فى لماضه) : يعنى إنت ورثتها من أبوك والا إغتربت ليها ..ما(لغف) ساكت - (النمر يهوى بيده صافعا الثعلب ): إنت خليك فى قلة أدبك دى شوف أنا أعمل ليك شنو؟ - يعنى ح تعمل ليا شنو (ياحرامى ) .. وما أن سمع (النمر) كلمة (حلرامى) حتى هاج وماج وأخذ يضرب (الثعلب) بدون رأفه وبصوره عشوائيه وفى اى مكان من جسده …. ولم يتركه الا جثه هامده.. فى اليوم التالى وفى خبر صغير وزعته وكالة أنباء الغابة للصحف جاء فيه التالى : بينما كان الثعلب يعبر الشارع المؤدى الى جهاز أمن الغابة دهسته سيارة يقودها (القرد) مما أودى بحياته.. هذا وقد تبين أن (القرد) كان يقود السيارة تحت تأثير الكحول. إتجهت معظم حيوانات الغابه صوب منزل (الثعلب) لمواساة زوجته واطفاله الذين أخذوا يتمرغون (بالتراب) بينما اجهشت النساء بالبكاء والصراخ والعويل فهذه (الزرافه) تولول وتنوح وتوصف : - ووب عليا .. يا أب صوف يا الما بتعرف الخوف .. أحى يا ود أمى يا ما بتحرق البخور وما بتخاف من (النمور) … - وتحت شجرة أخرى كانت النعامه تهيل التراب على رأسها وهى تولول وتقول: أحى .. أحى .. ياود امى الكتلوك (الهمباته) ورقدوك (السباته) ..حى وووب حى وووب يا الكشفت ( المستور) وخشيت القبور.. (ثم قالت وهى تقشقش دموعها ) - هو الثعلب ما قال الحقيقة والله (الصقر) الحى وموجود دا قبل مده قال ليا كنت طائر بفتش ليا فى (سجائر) لقيت ليكى النمر قاعد يلقط فى الإيجارات … اما القرنتية وما ان رأت (الجثمان) وهو يخرج من منزل الثعلب الا واخذت فى الصراخ : حى وووب ..حى وووب ..حى وووب ..حى وووب حى وووب ..حى وووب ..حى وووب ..حى أحى أحى حليلك يا النضيف يالظريف يالما بتعرف (المظاريف) حليلك يا الجبت الشمارات وطلعت (العمارات) ..وووب .. وووب . انتهى العزاء ولكن بعد أن تكون فى الغابه رأى عام بأن الثعلب قد مات فداء للغابه مضحيا من اجل حيواناتها بمحاولته لكشف فساد (النمر) لذلك فقد فكر (النمر) أن يستقبل كنوع من (المخارجه) : - والله ياملك الغابه أنا عاوز استقيل بقيت ما عارف أودى وشى وين من (الحيوانات) دى .. - (فى تهكم) : خلاص عاوزتتفرغ للتشطيبات . - لا أصلو .. - شوف يا (النمر) أنت لو إستقلت ح تتعبنا ساكت لأنو بعد شويه تانى ح نشوف ليك وزارة نختك فيها عشان كده أنا كلمت ليك (مدير جهازأمن الغابه ) يتكتك ليك موضوع (الثعلب) ده ويحلك منو بالفعل قام (مدير جهاز أمن الغابة) بتوضيب وإخراج (مسرحية) من اجل إبعاد الشبهه عن (النمر) واعادة الهدوء للغابه. تم اقناع (القرد) بتقديمه اللى محاكمة صوريه بتهمة قتل (الثعلب ) عن طريق دهسه بالسيارة عن سبق الاصرار والترصد وذلك حتى يتم نفى التهمة التى تتداولها مجالس الغابه والتى تتهم (النمر) بلإغتيال وقد وافق (القرد) على القيام بدور المتهم فى تلك المسرحية. المحاكمة: إنتشرت قوات حفظ النظام فى جميع الطرق المؤدية إلى مبنى (محكمة الغابة) .. تقاطرت (الحيوانات لرؤية (القرد) الذى تم إحضاره فى سيارة (مصفحة) تم إدخالها إلى قاعة المحكمة فى موازاة (قفص الإتهام) الذى أدخل إليه (القرد) وهو مكبل اليدين والرجلين بينما كانت كاميرات (القنوات الفضائية) تسجل احداث المحاكمة فى (بث مباشرعلى الهواء) . وبعد أن إستمعت المحكمة إلى شهود الإتهام الذين جهزهم (النمر) لأداء المهمة والذين أكدوا بأن للقرد (ضغائن وأحقاد ) سابقة مع (الثعلب) وأن قتله له بالسيارة كان مع سبق الإصرار والترصد رفعت الجلسة للنطق بالحكم . حيثيات الحكم : لقد وجدتك المحكمة مذنباً تحت المادة 130 من قانون عقوبات الغابة وذلك بقتلك المدعو (الثعلب) مع سبق الاصرار والترصد وحكمت عليك بالاعدام شنقاً حتى الموت …………… محكمة إلى هنا والأمر يسير وفق الخطة التى تم الإتفاق عليها ووفق (المسرحية) التى وافق (القرد) على المشاركة فيها ولكن وعلى عكس ما كان يتوقعه (القرد) فبدلاً من وضعه فى (العربة المصفحة) وإعادته إلى السجن ومن ثم إطلاق سراحه فقد تم إقتياده مباشرة بعد النطق بالحكم إلى خلف مبنى المحكمة حيث نصبت له (مشنقة) تطل على (ميدان) إمتلأ بالحيوانات (الهتيفة) الذين أحضرهم (النمر) وهم يهتفون : يحيا العدل … يحيا العدل … دماء الثعلب لن تضيع … . دماء الثعلب لن تضيع … دماء الثعلب لن تضيع … لن تضيع .. لن تضيع وضع (الفيل الجلاد) الحبل على رقبة (القرد) الذى وقف مذهولاً وهو يصرخ - يا جماعة إتفاقى معاكم ما كان كده … يا جماعه أنا ما كتلت الثعلب …….. ضاعت صيحات (القرد) وسط (الهتافات) بينما كان (الفيل الجلاد) يخاطبه : أركز يا القرد وخليك راجل .. أنت الجماعة ديل عاوزين يخلوك تغش (شعب الغابة) ده كلو ما يغشوك إنت؟؟ الوداك (تمثل) معاهم شنو ؟ (ثم ضغط على مزلاج المشنقه وهو يقول له) : - إتشنق شنقك وخليها مستورة

(عدل بواسطة Magdi Is'hag on 06-01-2009, 01:57 PM)

Quote: قد يتساءل البعض عن ماهي الأسباب التي تجعلنا نؤمن بأن الفاتح جبرا مبدع يستحق الإنتشار? لا أدعي الأحاطة بعلوم النقد و التحليل الفني ولكن كقارئ أستطيع أن أحصر كثير من التفاصيل التي تجعلني أستشعر قيم الجمال في كتاباته و فوق ذلك إحساسي الداخلي بالمتعة لهو خير معيار ذاتي بإبدعه. لانختلف بأنه أدب السهل الممتنع الخالي من التعقيد النابع من التفاصيل اليومية التي نعيشها في كل صباح فتجد نفسك تعيش تفاصيلها فهي تفاصيلك تتفاعل معها فرحا وغضبا وسخرية.تساعدك في غسل أدران الحزن و الإحباط تفرغ شلالات الغضب المكبوت وتعيد إليك جزء من توازنك المفقود فإن لم يكن هذا هو الإبداع فماذا يكون

(عدل بواسطة اسعد الريفى on 06-02-2009, 08:36 PM)

Quote: أسس لنا مدرسة " كشف المستور فى عظائم الامور" بكلمات من قلمه مباشرة الى عقول صدئة مشبعة باحباط الحاضر الذى أغتال أمسنا .. و ها هو يأتى على مستقبلنا ... كما النار فى "الهشيم ".. بما يكتب .. ترن أجراس الخطر و تومض أشارات التحذير .. لقوم يعقلون

Quote: .إذا كان رئيس وزراء (اليابان) قاعد يستخدم (عجلة) فى تنقلاتو ولمن يكون متأخر قاعد يقوم (سدارى) يعنى إنتو يا (مسؤولينا) أحسن منو؟؟ واللا بلدنا أغنى من (اليابان)؟؟ أها تانى بس (ركشات) نشوفكم تانى ح (تظللوا) شنو؟؟ قزاز مافى!!!.

Quote: شعب جديد ! إمتلات البلاد بشائعه غريبة ليست ككل الشائعات التى درج المواطنون على سماعها ، شائعه عصية على التصديق بعيدة عن الواقع لكن رقعه إتساع إنتشارها كانت تزداد يوما بعد يوم كان البعض يقابلها بالتندر والسخرية والتهكم بينما يرى البعض الآخر بأن كل شئ ممكن وليس هنالك مستحيل ، فى قهوة العامل التى يتخذها (عمال اليومية) و(الأسطوات) من (كهربجية) و(نقاشين) وسباكين) وخلافه جلس الأسطى (بابكر النقاش) وهو يضع كوب حليب وصحن صغير عليه قطع من (اللقيمات) يخاطب المعلم (عباس المكانيكى) الذى كان يمسك بسجارة (برنجى) ينفث دخانها فى الهواء: - (وهو يمسك بقطعه لقيمات يدخلها فى فمة رافعا كباية الشاى) : سمعت الكلام البقولوهو الناس ده يا معلم - كلام شنو يا اسطى بابكر؟ - الإشاعه القالو فيها إنو الحكومة عاوزة …. - (مقاطعا وهو يضحك) : ياخى دى إشاعه قديمة مش بتاعت إنو الحكومة عاوزة تغيرنا دى - بس ياها أى زول تلقاهو بيتكلم بالكلام ده ؟ تفتكر إنو الكلام ده صاح ؟ - (ضاحكا) : تغيرنا؟ تغيرنا كيف أصلو نحنا (زيت مكنة) ؟ - زيت مكنة زيت سمسم شوف يا (معلم بابكر) الجماعه ديل قالو عاوزين يغيرو الشعب ده ويجيبو شعب تانى - والله يا اسطى بابكر الجماعه ديل حاجه بتغلبهم مافى – وهو يضحك- والله مش يغيروكم ساكت والله يبدلو بيكم عده !! إنتشرت (الإشاعه) وصارت حديث الناس فى كافة الأماكن والمجالس حتى ربات البيوت اللواتى لا دخل لهن بالسياسة والأخبار فبعد أن قامت (سعاد) بإعداد شاى الصباح لزوجها (أمين) وخرج أطفالها إلى المدارس وبينما كانت تقوم (بمضايرت العدة) ووضعها فى حوض الغسيل إذ دخلت عليها جارتها ( أمينة ) : - إنتى ما سمعتى بى الحكومة قالو دايرة تعمل شنو يا سعاد؟ - (فى عدم إندهاش) : يعنى عاوزة تعمل شنو؟ هى الحكومة دى ما كل يوم بتعمل - لا المرة دى بس بالغت شوية يا سعاد؟ - يعنى شنو عملت كيلو الطماطم بى عشرين ألف وإلا عملت الرغيفة بى ألفين - يا ريت والله يا سعاد ياختى ؟ - فى (خلعة) : شنو زادو البنزين تااانى ؟ - الحكاية لو (زيادات) ما كويس يا سعاد - (فى إندهاش) : شنو تخفيضات ؟ - تزغرد فى صوت خافت اليويو يو يووووووى – خفضوا لينا شنو يا أمينة ؟ (الغاز) ؟ والله الغاز ده قطع قلبى يوم والتانى والأنبوبة فاضية وأربعطاشر ألف ! - إنتى جنيتى يا سعاد أمانه فى ذمتك الحكومة دى ليها تسعطاشر سنة يوم خفضت ليها حاجه ؟ - آآى بالحيل خفضت ! - أها الشئ الخفضتو وما عارفنو ده شنو ؟ - بتخفض لينا (تيار الكهرباء) لحدت (التلاجات) دى مكناتا تقعد تكورك !! (يضحكان معا ثم تعود سعاد للسؤال) - عليك الله يا أمينة كان ما قلتى ليا الحكومة قالو عاوزة تعمل شنو؟ - والله يا سعاد بالأول أنا ما صدقت لمن الكلام ده الناس الفى البلد ديل كووولهم قاعدين يقولو فيهو - عليكى الله يا أمينة قولى ليا طوالى حرقتى ليا روحى - أها الحكايه وما فيها قالو ليكى الحكومة قالو عايزة تغير الشعب ده وتجيب ليها شعب تانى ! - أجى يا بنات أمى؟ وانحنا يودونا وين؟ يبدلو بينا (عدة) ! - والله ياهو ده الكلام البقولوهو قالو الشعب ده ما نافع عاوزين ليهم شعب تانى ! - والله ياهو الفضل يا بت أمى قال شنو رضينا بالهم .. والله قسما عظما يجيبو لينا ناس من برة إلا ندقهم دق العيش ! فى الكورة : فى مدرجات تمرين فريق (الثعالب) جلس المشجع ( تور الخلا) ومعه المشجع (خضر طحنية) يتابعان التمرين مع عدد من المشجعين : - هسع بالله قول الحكومة دى جابت ليها شعب تانى ؟ تجيب ليها هلال مريخ من وين؟ - يا زول ها .. هلال مريخ شنو ومرض شنو؟ عليكم الله هسه دى كورة ذى كورة العالم الشايفنها دى؟ - والله كلامك صاح خليهم يجيبو ليهم شعب تانى إحتمال الكورة عندو تتطور بدل كورتنا القاعده فى محلها دى ! – والله يا جماعه هى دى (ما المشكلة)؟ - (بصوت واااحد) : طيب المشكلة شنو؟ - المشكلة كان غيرو الشعب يجيبو ليهم (شداد) من وين ؟؟!! إجتماع هام : - يا جماعه أنا شايف إنو الحكاية بتاعت إننا ماشين نستورد لينا شعب دى ملت الدنيا والناس كلها عرفتا فحقو نستعجل الموضوع ده شويه - والله كلام سعادتك صاح خاصة إنو الإنتخابات قربت ( والشعب) ده ما مضمون يقوم يمقلبنا ساكت ! - أنا بفتكر دى هسه ما المشكلة؟ - طيب المشكلو وين؟ - المشكلة الشعب ده نوديهو وين؟ - أنا أ فتكر دى بسيطه ؟ نعرضو فى مزاد (الشعوب) - والله ما يجيب (تعريفه) ! الشعب ده أول حاجه معظمو (شايل المرض) وحايم بيهو ، شئ (سؤ تغذيه) وشئ (فشل كلوى) وشئ (ملاريات) وشئ (بولهارسيات) ده غير (الأمية) و(الجهل) - (معترضا) : والكرم والشهامة والمروة و … - يا شيخنا كرم شنو وشهامة شنو دى حاجات بقت ما بتأثر فى (اسعار) الشعوب ، أسعار الشعب بقت تأثر فيها (الصحة) والبيئة والتعليم والتكنولوجيا والحاجات دى – يلتفت إليه – قال شهامة قال !! - طيب يا جماعت الخير يعنى (الشعب) ده نوديهو وين؟ - والله أنا بفتكر نوديهو (المنطقة الصناعية) أول حاجه نعمل ليهو (عمرة كاااملة) ونعمل ليهو فرش وبوهية وبعدين نجى (نسوقو) سنة سنتين حتين (نبدلو ) !! - فعلا دى مشكلة لأنو أول ما نجيب الشعب الجديد لازم نتخارج من الشعب ده عشان ما يكون هناك فراغ ! - والله يا جماعة أنا ما شايف إنو فى لزوم هسه لى مسألة إستيراد شعب دى … والله شعبنا ده (هدى ورضى) والواحد ممكن ياكل (ويسف) كمان ويقش أيدو فى (هدومو) ما يعمل ليهو حاجه ، إنا غايتو بفتكر يا جماعة الخيرإنو نصبر عليهو شوية !! - لا .. لا.. لا.. إلا نصبر عليهو دى .. الشعب ده بقى متعب شديد وعاوز ليهو مجهود جبار لى إدارتو - والله كلام سعادتك صحيح شعب بقى غير (النقة) ما عندو حاجه - والله فعلا .. (نقتو) بقت كتيرة .. الرسوم كترت علينا .. الجبايات طلعت عيننا .. الضرائب كسرت ضهرنا .. الما بعرف داك عمل لينا شنو ما بعرف - لا وده كلو كوم و(الحركات) كوم .. كل خمسة تنفار عملو ليهم (حركة) مسلحة (وناطق رسمى) وقالو عاوزين نصيبهم فى (السلطة) و(الثروة) التقول عملو معانا (الإنقلاب) ! - لا ومافى حاجه عاجبه الشعب ده .. الإنجازات الكتيرة دى كلها ما شايفا .. خمسة كبارى .. وسبعه طرق وسبعميت (جامعه) .. ويقولو ليك برضو معقول (عشرين سنة) وديل بس ؟ - لا وكمان ده شعب عند (مرضه) غريبة جدا.. كل دقيقه يقول ليك (قروش) البترول بتمشى وين .. قروش البترول بتمشى وين؟؟ التقول قاعدين ندخلا فى جيوبنا .. هى كلها خمسميت .. ستميت مليون دولار فى الشهر .. بالله دى قروش هسه الشعب ده يسال منها ويعمل لينا (فلقت دماغ) .. لا لا لازم نشوف (شعب) غيرو (مطيع) و(سكوت) ! - ما قلت لينا سعادتك لكن نعمل فى الشعب ده شنو؟ ونوديهو وين؟ - والله مافى طريقه غير نوديهو سوق (الخردة) بتاعت الشعوب نبيعو هناك لأنو مفيش حكومة ح تشتريهو ! - والله كلام سعادتك صاح ونتم عليهو نشترى شعب جديد ! مسيرة إسترحام : تسربت مضابط حوار ما جاء فى ذلك الإجتماع الذى حضره المسئولون إلى بعض قيادات الأحزاب ومنظمات المجتمع المدنى فبدأوا فى عقد الإجتماعات والتشاور حول هذا الأمر حيث كانت نتيجة الإجتماعات هى أن تقوم الأحزاب مجتمعه متضامنة مع منظمات المجتمع المدنى وبقية أفراد (الشعب الفضل) بتسيير مسيرة هادرة تطوفشوارع العاصمة طالبة من الحكومة التريث فى إتخاذ ذلك القرار الخطير وتسليم المسئولين مذكرة إحتجاج بذلك حيث إحتشد الجمع يحملون اللافتات التى كتب عليها : - قبل ما تبيعونا كدى تااانى جربونا - مالكم علينا ما (سادين أضنينا) - أها وبعدين نمشى وين؟ على الرغم من أن (الحكومة) لم تمنح تصريحا واحدا لقيام مظاهرة مناهضة لها إلا أن هذه المظاهرة التى قام بها (الشعب) مترجيا الحكومة عدم إستبداله لم يتعرض لها أحدا بسؤ حيث يعلم المسئولون بانها سوف تكون آخر مظاهرة يقوم بها الشعب الفضل قبل أن تقوم بإستبداله، مضت التظاهرة فى صمت والمتظاهرون يرفعون اللافتات التى تستجدى الحكومة التريث فى الأمر ومراجعه قرارها بينما كان المواطنون ينتحبون بصوت عال ويجهشون بالبكاء وهم يحملون (المناديل الورقيه) يمسحون بها دموعهم التى سالت حتى بللت ثيابهم ، وعند الميدان الكبير توقفت المسيرة حيث إعتلى ممثل الشعب المنصة ليلقى خطابا وهو يمسح عينية بمنديل من أثر البكاء: أخوانى وأخواتى أبناء الشعب الفضل … (ينظر فى وجوههم ثم ينفجر باكيا) .. بيل .. بيل بياللهى نحنا هئ هئ هئ هئ هسه هئ هئ هئ هئ عملنا للناس ديل حاجه؟؟ .. بس شنو البخليهم يفكرو هئ هئ هئ هئ يبيعونا ويجيبو ليهم شعب تاانى … رابطين الحزام عشرين سنة ما قلنا بغم ساكت .. - البنزين يزيد - المتظاهرون وهو ينتحبون : إهئ إهئ إهئ ما قلنا حاجة - الرغيف يزيد - المتظاهرون وهو ينتحبون : إهئ إهئ إهئ ما قلنا حاجة - الكهرباء تقطع - المتظاهرون وهو ينتحبون : إهئ إهئ إهئ ما قلنا حاجة - الموية تقطع - المتظاهرون وهو ينتحبون : إهئ إهئ إهئ ما قلنا حاجة - نتعلم بى قروشنا - المتظاهرون وهو ينتحبون : إهئ إهئ إهئ ما قلنا حاجة - نتعالج بى قروشنا - المتظاهرون وهو ينتحبون : إهئ إهئ إهئ ما قلنا حاجة - الخريف يجى - المتظاهرون وهو ينتحبون : إهئ إهئ إهئ ما قلنا حاجة - والشوارع تتملى - المتظاهرون وهو ينتحبون : إهئ إهئ إهئ ما قلنا حاجة - يشيلو الرسوم - المتظاهرون وهو ينتحبون : إهئ إهئ إهئ ما قلنا حاجة - ندفع المعلوم - المتظاهرون وهو ينتحبون : إهئ إهئ إهئ ما قلنا حاجة - ندفع الجبايات - المتظاهرون وهو ينتحبون : إهئ إهئ إهئ ما قلنا حاجة - نسمع الحكايات - المتظاهرون وهو ينتحبون : إهئ إهئ إهئ ما قلنا حاجة من داخل الصفوف تخرج إمرأة (كبارية) وقد لفت ثوبها حول وسطها وهى (تثكل) وتهيل التراب على وجهها - ووووووووووووووووب ووب وووب ووب عاد الليله نمشى وين ؟ ونقبل وين ؟ أحياااا يا ولاد أمى المغصة ما كاتلانى … مسكونا لحم ورمونا (عضم) ووب – سكته - ووب – سكته - ووب -سكتة- وووووووووووووووووب !! ووب يا الصبرنا ليكم وما نفع فيكم … وووووووب يا العاوزين تبيعونا وتمشو تخلونا وووب ووب - (إمرأة أخرى تتجه نحوها) : إستغفرى إستغفرى يا بت أمى كدى شيلى المنديل ده أمسحى دموعك ديل ده ياهو حال (الحكومات) المتحدث يواصل من المنصة : هسه يا جماعه فى داعى للقرار ده … يعنى الشعب ال ح يجيبوهو ده ح يكون (أحسن مننا) – وهو ينتحب – ما قافلين خشمنا ده علينا ومن صباحات الرحمن نحنا جاريين نكابس فى لقمة العيش …أيش ش ش (ثم نحيب عال) أأأأهاه هاه هاه …أهه أهه… ثم يمسح دموعه ويقف وهو حسير ويواصل متصنعاً الثبات - بإسمكم أيها الشعب الفضل بقول للمسئولين أدونا فرصة تانية وما تتسرعو والله نحنا .. نحنا .. نحنا (يبكى فى ألم) .. ما ح تلاقو ذينا كلو كلو …والس س س لا لا لا ممم عليكم … وسط الدموع والنحيب واصلت التظاهرة السلمية مسيرتها حيث تم تسليم (مذكرة) إسترحام ممهورة بتوقيع مجموع أفراد الشعب الفضل تطالب المسئولين بإيقاف تنفيذ القرار وتعدهم بأنهم سوف يكونون أكثر طاعة وخضوع !! مناقشة المذكرة : إجتمع المسئولون لمناقشة المذكرة (الإسترحامية) التى تقدم بها أفراد الشعب الفضل حيث تضاربت الآراء إلا أن أغلبيتها كانت فى صالح قرار (إستيراد) شعب جديد - والله أنا شايف إنو نمضى قدما فى شراء وإستقدام (شعب) تانى بالمواصفات العاوزنها - والله أنا أوافق سعادتك يعملو لينا فيها مساكيييين كده وبعد شوية تلقى (اللساتك) محروقه فى الشوارع والإضرابات واشنو ما بعرفو داك ! - لا وكل شوية رئيس حزب ناطى عاوز ليهو كم مليار (جبر ضرر) وما عارف أيه ! لا لا لا نغيرو طوالى - يعنى هسه رأئكم الأخير شنو؟ - (بصوت واحد) : الشعب ده لازم يتغير - لكن الجماعه ديل (بكوا عديييل) وقالو يدوهم فرصة ح يمشو على العجين ما يلخبطوهو ! - والله شوف سعادتك .. على العجين على الهجين ده كلو كلام ساااكت والله يلقو فينا فرصة ينسو الكلام ده كلو - والله فعلن أحسن (نغيرهم) .. خلاص بكرة نمشى مع الوفد الكوناهو للشركة العالمية ( لتصنيع الشعوب) نعزل لينا شعب حسب المواصفات الدايرنها ونجيبو بدل الشعب الفضل ده ! فى الشركة العالمية : فى المطار الخاص بالشركة العالمية لتصنيع الحكام والشعوب حطت الطائرة التى يرفرف عليها عليها علم (الدولة) الأخضر ، مدير الشركة وأعضاء مجلس الإدارة يقفون صفا مرحبين (بالزبائن) الجدد ، الطائرة تقف يفتح الباب ينزل (المسئول) يتبعه (وفد عال المستوى) ، بعد الترحيب والإستقبال يتم نقلهم بواسطة عربات فارهه إلى مبانى المصنع حيث يستهل (مدير مبيعات الشركة) الحديث : مدير المبيعات : هذه الشركة كما تعلمون سيادتكم تقوم بتصنيع حكام وشعوب فماذا تطلبون بالتحديد ؟ المسئول : تغيير حكام شنو يا شيخ ؟ والله نحنا لمن (نكنكش) تانى سبحان من يغيرنا مدير المبيعات : هل أفهم من ذلك أنكم تريدون تغيير الشعب؟ المسئول : طبعا طبعا أكيد قطع شك ودى عاوزة ليها كلام ؟ ! مدير المبيعات : ولماذا تريدون تغييره ؟ المسئول : والله ذى ما تقول كده مسالة بتاعت (صلاحية وكده) مدير المبيعات : كيف ذلك ؟ إننى لا أفهم المسئول : دى عاوزة ليها فهم ما قلنا ليك (صلاحيتو إنتهت) مدير المبيعات : لماذ؟ كم عاما قمتم بإستخدامه ؟ ثمانية أعوام ؟ المسئول : لا لا أكتر شويه مدير المبيعات : إذن إثنى عشر عاما ! المسئول : إنت خليك من مدة إستخدامو دى .. قلنلا ليك صلاحيتو إنتهت عشان كده جينا (نتستبدلو) من عندكم بشعب جديد ونديكم الفرق مدير المبيعات : هذا سيدى غير ممكن بالطبع فنحن معنيون بتصنيع (شعوب) جديده ولا نعمل فى (المستعمل) يمكنكم الذهاب فى هذه الحالة إلى (ورشة تأهيل الشعوب) إذ يمكنكم عمل صيانه لشعبكم هنالك ! أحد أعضاء الوفد مخاطباً مدير المبيعات : لا لا لا صيانة شنو؟ أنحنا خلاص قلبنا أباهو مرة واحده .. عاوزين لينا شعب جديد لنج ؟ شعب يكون (كرت) ! زول حكمو قبل كده مافى عضو من الوفد : يا جماعة ما تأخرونا ساكت لو عندكم نماذج تفرجونا عليها ورونا ليها خلونا ننتهى من القصة دى ؟ ورانا صفقات وبزنس مدير المبيعات : أوكى لدينا نماذج لبعض الشعوب الجاهزة التى تم تصنيعها تعالو معى لأفرجكم عليها يذهب مدير المبيعات يرافقه أعضاء مجلس إدارة الشركة مصطحبين معهم (لوفد) فى جولة لمشاهدة نماذج من الشعوب الجاهزة للبيع ثم يعودون بعد فترة من الوقت وقد إنتهت الجولة ليجلسوا على الطاولة مرة أخرى - مدير المبيعات : أتمنى أن تكونوا قد وجدتم ضالتكم ؟ ألم تجدوا شعبا يناسبكم ؟ - المسئول : دى مواصفات شنو العاملنها للشعوب البتصنعو فيها دى ؟ - مدير المبيعات : ماذا تقصد يا سيدى؟ - المسئول : شنو شعب (ديمقراطى) .. وشعب يؤمن بالتعددية .. وشعب (بيتضحك) عليهو (بصعوبة) .. وشعب لا يسكت على الظلم و شعب .. - مدير المبيعات : إذن ما هى المواصفات التى تطلبونها فى الشعب الذى تودون شراءه ؟ - المسئول : مواصفات كتيرة كدى جيب ليك قلم وورقه وأقعد نكتبا ليك المسئول يقوم بكتابه المواصفات على الورقه ثم يسلمها لمسئول مبيعات الشركة التى يضعها فى داخل (دوسيه) ثم يهب قائما وهو يصافح المسئول : - شكرا يا سيدى .. سوف نقوم بدراسة هذه المواصفات وصناعه شعب لكم بالضبط بالمواصفات التى تريدونها هذه فقط أمهلونا أسبوعا واحدا ليقوم فريق التصنيع والتكاليف لدينا بدراستها وسوف نرسل لكم (الفاتورة) على عنوانكم حتى تقومو بتسديد المبلغ وتأتو لإستلام (الشعب) بعد تجهيزه لكم غادر المسئول يرافقه الوفد عال المستوى الشركة العالمية لتصنيع الحكام والشعوب عائدين إلى البلاد حيث وصلهم بعد أسبوع الخطاب التالى يحمل ترويسة وختم الشركة ممهورا بتوقيع السيد مدير المبيعات : الساده المسئولين بدولة المشروع الحضارى : تحية طيبة وبعد : بالإشارة إلى زيارتكم لموقع شركتنا بتاريخ كذا وطلبكم تصنيع شعب بالمواصفات التى قمتم بكتابتها لنا يؤسفنا أن نفيدكم بأن فريق التصنيع بالشركة قد توصل إلى إستحالة تصنيع شعب بهذه المواصفات إذ لا يمكننا تصنيع شعب له المقدرة على الصبر على الظلم والفقر والجهل والمرض والفساد فهذه المواصفات لا تنطبق إلا على شعب واحد من شعوب العالم هو (الشعب) الذى تحكمونه الآن ! فأبقوا عليهو TEN ،،

Quote: البنزين يزيد - المتظاهرون وهو ينتحبون : إهئ إهئ إهئ ما قلنا حاجة - الرغيف يزيد - المتظاهرون وهو ينتحبون : إهئ إهئ إهئ ما قلنا حاجة - الكهرباء تقطع - المتظاهرون وهو ينتحبون : إهئ إهئ إهئ ما قلنا حاجة - الموية تقطع - المتظاهرون وهو ينتحبون : إهئ إهئ إهئ ما قلنا حاجة - نتعلم بى قروشنا - المتظاهرون وهو ينتحبون : إهئ إهئ إهئ ما قلنا حاجة - نتعالج بى قروشنا - المتظاهرون وهو ينتحبون : إهئ إهئ إهئ ما قلنا حاجة - الخريف يجى - المتظاهرون وهو ينتحبون : إهئ إهئ إهئ ما قلنا حاجة - والشوارع تتملى - المتظاهرون وهو ينتحبون : إهئ إهئ إهئ ما قلنا حاجة - يشيلو الرسوم - المتظاهرون وهو ينتحبون : إهئ إهئ إهئ ما قلنا حاجة - ندفع المعلوم - المتظاهرون وهو ينتحبون : إهئ إهئ إهئ ما قلنا حاجة - ندفع الجبايات - المتظاهرون وهو ينتحبون : إهئ إهئ إهئ ما قلنا حاجة - نسمع الحكايات - المتظاهرون وهو ينتحبون : إهئ إهئ إهئ ما قلنا حاجة

Quote: الفاتح يوسف جبرا كاتب ساخر يكتب من قلبه بعقل منفتح نحو الآمال فلنعمل له تمثال من محبتنا لانه يوحد الأمة بكتاباته

Quote: يستفزنى جداً كمسلم إستغلال الدين والآيات القرآنية وحتى (المديح) فى مجالات (التربح) و(التسويق) بكل أشكاله، فللدين قدسيته التى من المفترض أن نربأ بها عن كل ما من شأنه (إنو يجيب الكلام) حيث ينافى ذلك التعاطى مع مقدساته ذلك التعظيم المرجو والمنشود لشعائر الله سبحانه وتعالى ووضعها فيما لا يليق جعلها فيه ، فليس من المهضوم أبدأ ، أن نجد (عبدو الترزى) قد وضع لافتة على محله يتوسطها (مقص كبير) جاعلا الآية الثانية عشرة من سورة الإسراء «وَكُلَّ شَيْءٍ فَصَّلْنَاهُ تَفْصِيلًا» عنواناً لمحله المتخصص فى خياطة (الزى الإسلامى) أو نجد (بشرى الحلاق) وقد كتب تحت لافتة محله الآية الثامنة من سورة الغاشية «وُجُوهٌ يَوْمَئِذٍ نَاعِمَةٌ» كناية عن براعته فى حلاقة (الذقن) والعوارض أو أحد محلات (العصير) الذى تجتاحه جيوش الذباب وقد علقت عليه لوحة عليها قول الله عز وجل: «وسقاهم ربهم شرابا طهورا»! وده كلو كوم وتلك الإذاعات والقنوات الفضائية التى تخصصت فى (إعادة إنتاج المديح) كوم تانى حيث إحدى القنوات درجت على استخدام (فتيات منشدات) يظهرن فى كامل (ماكياجهن) وبهرجتهن وهن يرفعن عقيرتهن بأصوات (مايصة) ويغمضن أعينهن فى دلال وغنج بدعوى (الإندماج) وكده! أما (الإذاعات) فحدث ولا حرج إذ تم إفراغ كل الألحان الهابطة من (كلماتها) ليتم حشوها بتهريج لا يمت بصلة للمديح الرصين الذى كنا نستمع له فى ماضى الأزمان يقوم بأدائه (فنانون) من زبائن شرطة (النظام العام) الدائمين! بالأمس وبينما كنت أقلب فى محطات الراديو توقفت عند محطه تبث احدى اغنيات الفيلم الهندى القديم (جانوار) ذلك الفيلم الشهير الذى تم عرضه على دور العرض فى (زمننا) مئات المرات فقلت (أهو برضو فرصة الواحد يتذكر أيام شبابو)! والسينما والأفلام الهندية زى (من أجل أبنائى) و(تسرى منزل) والحاجات دى ولكن لدهشتى (القوية) ما أن إستمرت الموسيقى لثوان حتى جاء صوت (الفنان) أقصد (المادح) يقول: - نزور المقام.. حاجة تمام .. لى نبينا عليه السلام!!! (والموسيقى الهندى شغااااله) !!! وأنا أتخيل (شامى كابور) الذى قام بدور (جانوار) وهو يمسك بحبيبته (سبنا) وهما (يتدردقان) من قمة الجبل المغطى بالثلوج!! كنت أعتقد أن هذه (المهازل) هى آخر مراحل هذه الظاهرة غير الحميدة لولا أن صديقى (س) قد أخبرنى بشئ إستحال على شخصى الضعيف تصديقه قال لى صديقى (س) بأنه اثناء قيادته لعربته فى طريق عودته إلى منزله من العمل وبينما كانت (الحركة واقفة) أراد أن (يكسر الوكت) فوضع يده على مؤشر (الراديو) حيث قام بإختيار إحدى محطات (الاف ام) التى أصبحت (كتيره ومسيخة) حيث كانت تبث أحد البرامج والذى توقف (فجأتن) ليعلن المذيع عن موعد رفع آذان العصر ولدهشة صديقى كما يقول فبعد إنتهاء رفع الآذان عاد المذيع من جديد ليقول معلناً ( كُنتم مع آذان العصر برعاية الشركة الفلانية الفلتكانية) وقام بذكر إسم الشركة!! عزيزى القارئ قى ظل هذا الإسفاف لا تندهش وأنت تبحث عن (نعليك) لترتديهما وأنت خارج من المسجد بعد أدائك لصلاة (التراويح) أن تسمع صوتاً جهورياً يقول: - كنتم مع صلاة التراويح برعاية شركة الحديد والتسليح!!

Quote: الأخ مجدي . . السلام عليكم ورحمة الله . . آسف لمخاطبتك عبر المسنجر . . لعدم تمكني من المشاركة في البوست . . نتيجة لإشكالية طلبت من صاحب الموقع حلها. . ولكن طال إنتظاري . . المهم اعجبني جدا بوستك عن الأستاذ الفاتح جبرا . . واقترح ان نتبنى فكرة الإحتفال به باي مسمى تراه مناسب عنواني0........... . هذا إذا راقت لك الفكرة لك خالص الود والتقدير