أيــْــن الخيــــــمة

أين خيمة الحاردلو أيها المسئولون عن البورد؟ بحثت عنها في كل الصفحات فلم أعثر حتى على أثر لأطنابها .. اين هي؟
أحس برغبة عارمة لغفوة في تلك الخيمة .. حتى أعود إلى نفسي التي أعرف وتعرف انها نفسي

خلاس .. قنعنا من خيمتنا القديمة .. نقعد قبلنا .. ونسوْ غنانا

بريد ألبِل بريد ننزل قبنّا
بريد التعّلن ليهن زقنّة

أو كما قال أهلي اللحويين

والله الليلة يا أهل العوض متقمصني شيطان عمي أبّكٌر ود شنتير. الله يستر

يازول!!! جبت لينا زول من المَهَرِيّة (هكذا سمعتها من الهمباتة)؟
يا ألف مرحب بكل زول نجيض .. ومرحب يا عزت والف مرحب .. وخلينا نوديك معانا "السادّة" نزورك الخليفة ونشرب لنا معاهو بن .. ونسلم على العازة بت قلبوس .. ونبقى سادرين

ديـــــك السادّة غشّينا الخليفة نزورو
نشرب بن ونتبرّك تمـــــام بنورو
فريق العازة ردينا السلام لحورو
من السنّة عبقن فوق كفوفنا عطورو

أها أبقى داخل

العزيز فوق العادة .. ود كلي ... الله يديك العافية واللقمة الدافية
تعرف أنا في مشيتي للسودان قبل كم يوم .. واحد من أصدقائي المقربين حرّّق روحي بتكرار انتماء كمال شانتير المحامي للشناتير .. و أصدقك القول بأنني لا علم لي بذلك .. ولا ابغض كمال شانتير المحامي .. كبغضي لتسميتي باسمه هنا. وقد قلت لصديقي الذي طلّع روحي بأني أنا ود شنتير .. و كمال المحامي ود شانتير .. رغم العلاقة القبلية التي حاول تأكيدها صديقي

المهم .. أنا شنتير .. وود شنتير .. ومن الشناتير .. وكمال شنانتير ود شانتير .. بس من الشناتير .. إن صدق صديقي. ولا علاقة لي بشانتير .. إن كان من الشناتير أو من الوطاويط

أنا بقول في شنو؟ والله ما عارف الخلاني اقول الكلام ده شنو. أها نسّيتك البلا .. اتظكرت يا سيف ود كلي .. فرقك علينا صعيب .. زي عمدة كلي. اتظكرت انا بقول في شنو. اسمي ده لو بقى شانتير انا بكلم بكري يغيرو طوالي .. والمحيرني انو كيف اسم مكتوب شنتيـــــــــر بالانجليزية الفصحى يقوم الناس بقدرة قادر يقروه شانتير؟ والله راسي مليان لحدو .. وناس كتيرين في البورد ده بيقروه شانتير!!!ه ده موضوع آخر

أها سيف ود كلي .. كلامي الفارغ انتهى .. ونجي للكلام المليان البنعرفو

من سروال عجيب قام شرْفَهن متزارد
السلّيت رقابهن .. والحشا المتمارد
ستّات المناقِد والخُلال الشارد
جــين في أب دم ضحى وعرقن سمير أم بارد

من أقوال شيخي ومولاي يوسف ود عب شبيش .. عليه الرحمة

سيف .. عليك الله كلامي الفوووووق داك ما تعتبرو عتاب ولا حاجة. أنا بهترش معاك لا أكثر ولا أقل. وأبقى معانا

ده يا أبنوس أخوي أياهو الباقي علينا كلنا. أنا غايتو بتجيني رعشة .. ولمن أطوّل منه وأسمعه بدمّع في الحال

ذكرتني الاشرطة. أهدى لي أحد أصدقائي شريط لواحد كباشي قاصع قصعة خارقة العادة .. اسمو النور ود شيخ إدريس .. بالله الشريط نسيتو قبلو. أما العطوية فهم الوحيدون الذين وجدت في بعض أشعارهم تأكيداً مكرراً لقناعتهم بأن الناقة قد خلقت لهم .. وبغيرهم لا حياة لها ولا دليل .. أو كما قال العطوي

فتّانة الخلوق .. الناقة
غير عطوية وين تلقي التبات والفاقة
قومك هاجّة .. عربك سوّوا عجّال لاقى
فتنوا الشوكة في النار .. والسبيدر قاقا

ربما أخطأت في بعض مفردات الغنوة .. لكن بطريقتي الخاصة سبكتها وبنفس معناها الأصلي

نرحب بيك يا أبنوس .. وخلينا قبلنا هنا أحسن .. تحت هذا العنوان المبهم الذي لا ينتمي الى أي منطقة بعينها .. رغم انعقاد لواء الدوبيت/الدوباي للحاردلو عليه الرحمة. كل همنا أن نروح عن أنفسنا ونتأمل في ما نسجه هؤلاء البدو. أنا غايتو معترف ليهم تب بالبرنجية في شفافية حسهم الشعري وسلامة حسهم العام

مَسَارِيّاً على كَسَمور بجن قُطّاع
مراديف كلهن من الصعب لا الطاع
قامولهن جنيناً في الطلَق بُتّاع
بكافوبهن سوالْف العقربِن لطّاع

واحدة كباشية للأخ أبنوس

أمك ناقة أبوي ماها الهميلي وداعة
بترضع .. ود سهيت .. متغذي ملْح القاعة
أسرع يا قطر كوستي المشيك بالساعة
والكور خلّو طير عكّة وعشوشو جماعة

البيت الأخير ده فيهو تصوير بديع .. يخلي الزول يترعش

يا سلام عليكم أيها الرجال القماعريت الكزاعِر

يا فارط جمال الميس بعد تتعارَك
سُرْعك صيحة الكرْسة ووهيـــط تتوارَك
يا عفريت سليمان الضرب صفّارَك
على سيدة بنات آدم مغيت ترّارَك

عافي منكم .. أها سووا سووا

كيفنك يا أهل العوض .. إت بيجاي آزول وأنا ماني شايفك؟ الشرح مرات بكون كَوَيّس للزول الرايح عليه المعنى .. لكن أن بقيتن بقى بحالو كدي ببقى أحسن .. بس مرات لا بد من الفرفرة

طريفي أمّات حقيبة الـ بالضهور لفّاف
رقيقاً غَرْدو جايل مو بدين نفّاف
على أم ظَرْفاً بياخد الكبدة والرفّاف
خويرات السِليم جاهن كفوفو خفــــــاف

سيف كلي .. يا سيف كلي .. على الطلاق من الليلة دي نديك الشياخة. هازول إت بالع لك همباتي؟

يا اب عرْج .. القبايل كلهن زهْدنّك
وما بياخك بشر في المولى كبّر ظنك
الخب سيهو بـنَقَع البطانة مفنّك
ابقى الليلة نايرات الخدود طرينّك

سنتي منتي .. يا سلام على التصاوير

أبْ سَعَنة انظكر نزلن ضهاري ملنّو
عَدَلن حالو قشو اللنشهب جلّنّو
الحُمْ قِنْعَن السافل خلاس خلّنّو
مُدْهاجاَ مِوَتِّر يا صعيد عدَلَنّو

عاجبنّي العرب عان نزلتُن ما احلاها
فوق شرْب الما والقش السمح تالاها
بشوف أم بوح مهيّتة مصّعت بخلاها
والْبِل خلْفَتِن قش الحدب جلاها

ها ناس كيف اصبحتوا؟ وان شاء الله مخرفين وبت أم ساق مدرّجة حوارها

سنة الجفاف الله لا جابها تاني .. فعلت في أم زور فعلاً شين وخلت حنينها يقطع قلب العدو قبل الصاحب. في تلك السنة الجرباء .. قال الرجل

نَطّارْة البِروق بحَنِينْها بَكّت
عقيد مَرْعَاها طَبْلَة راسو فَكّت
أم دَرّا قبيل للباكى سكّت
تَرازى وِكِتْ تَهِم للقومة عكّت

الأحباب الأعزاء بدون فرز .. إن شاء الله ربنا يديم مجالسكم ويزيد من امثالكم. شوقي ليكم ازداد أطنان وقريفتي لكلامكم خلتني ما أشوف غير خيمتكم دي واحة اسند فيها كوعي ده وأطلق زفرة حـــــــــــــــارة انفث فيها كل غبايني. تسلموا

بِريق يا مجْمع العشاق سحابك هجعة
لعلع وانتحب صبّح بلابلك سجْعى
جسوماً لدنة كانت في رباك مضطجعة
إبقى مقيمة وللا حدوجها نجعت نجعة
=========
أب قنفة اللفج كوعو وسمح تضريعو
عسراتو اللّكَب حي الشقوق بتريعو
كلْ عامراً مراجي السوق نفِك تقريعو
نحن قراننا زي ما يتفق بنبيعو