|
|
 سربعة مبالغ فيها !!!! إنا لله وإنا إليه راجعون
|
سبعة مبالغ فيها
آسف !!!
قصدي أقول سربعة مبالغ فيها!!!
نقلناها ليكم من منتديات الراكوبة
Quote:
بقلم : الاستاذ محمد عبد الماجد
قلنا في مرة سابقة ان فريق المريخ عندما خسر امام فريق شبيبة القبائل 1 - 3 في الجزائر رد الخسارة حسب افادات اعلام المريخ وجهازه الفني الي (الالعاب النارية) ·· وقالت مصادر قريبة من القرار في المريخ ان (العجب) الذي لعب في المريخ وحده اكثر من عشر سنوات (خلعتو) الالعاب النارية وسببت لدفاع المريخ (خلوعة) في الطوحال·
* وكأن الايام ارادت ان ترد علي اعلام المريخ وجهازه الفني اذ ارجعت الكلية المريخية خسارة المريخ (السباعية) في الاردن للبرد والموية·
* وهذا امر عكسي تماما لسبب الخسارة في الجزائر ·· اذ كانت الخسارة هنالك لعامل (النار) ·· فان الخسارة في الاردن كانت بسبب (الموية) حسب تصريحات ابراهومة ·· في الوقت نفسه ارجع مازدا خسارة المريخ للبرد·
* برد مين يا عم؟·
* ناس المريخ لو مشوا يلعبوا تاني في الاردن كلموهم يشيلوا معاهم (بطانيات) مع احذية المطر·
* خلوا الوالي يرقد ليكم (السيوترات)·
* عملتوها لينا كلها طوب وسيخ ·· ونسيتوا (فنايل) السقط·
* نحن نلقاها من (المطر) ولاّ (البرد)؟·
* في التحليل الفني للمباراة كان مفروض يقولوا ان اثر (البرد) كان واضحاً علي مدافعي المريخ ·· و(رجفة) امير دامر لم تكن من مهاجمي (الوحدات) وانما كانت بسبب (البرد)·
* سفاري كان واضح ضاربو (البرد) ·· عشان كدا كان مندسي خلف المهاجمين·
* المباراة كلها نحن بنتغالط·
* بتتغالطوا في شنو في (البرد) دا؟·
* كنا بنتغالط في (الشغيل) ··· قلنا الزول دا ما مشي مع المريخ الي الاردن ·· كنا متخيلنه مع المنتخب الرديف·
* اتاريه طلع ما مع المنتخب (الرديف) ·· طلع مع (الوصيف)·
* اول مرة اشوف لي (ارتكاز) ما راكز·
* مجاهد داك خلوه ··· كان رائح عديل ·· الزول دا يكون فاكر نفسو بيلعب في (جزيرة الفيل) الي الان ·· دي كورة شنو يا مجاهد القاطعها لينا من رأسك دا؟·
* البرد خلوه ·· عرفتوا ابراهومة قال شنو·
* قال شنو؟·
* قال الهدف الاول اتسببت فيه (الموية)·
* عدينا ليه الكلام ··· سكتنا·
* قالوا ليه طيب والهدف الثاني؟·
* قال الهدف الثاني اتسببت فيه (الموية)·
* عملنا فيها رايحين ·· ما قلنا شيء·
* ناس الرشيد بدوي عبيد ويوسف السماني ·· قالوا ليه في الاذاعة الرياضية ·· طيب والهدف الثالث·
* قال ليهم الهدف الثالث اتسببت فيه (الموية)·
* انت يا ابراهومة قايل المباراة ما كانت منقولة··· المباراة دي نحن شفناها ·· للهدف الرابع نحن واقفين معاكم·
* وقت خذلتونا ·· وقفنا مع (البرد)·
* يا ابراهومة غير لينا شوية ·· قول الحكم ·· قول الشغيل ·· قول البرد ·· شنو شبكتنا الموية ·· الموية ·· كورة هي والا سمك؟·
* ابراهومة ·· سألوه من الهدف الرابع؟·
* قال الهدف الرابع بالذات اتسببت فيه (الموية)·
* دخلنا في ضفورنا·
* والهدف الخامس يا ابراهومة·
* الهدف الخامس بالتحديد سببو (الموية)·
* والهدف السادس·
* الهدف السادس ·· برضو جاء بسبب (الموية)·
* طيب الهدف السابع·
* الهدف السابع كان بسبب (الموية)·
* انتوا لاعبين وين؟ ·· في خور ابوعنجة·
* اول مرة اعلام المريخ يخلي (الحكم) ويقبل علي (الموية) ·· فريق يتغلب بسبب (الموية) ·· راجيين منه شنو؟·
* راجين الري؟·
* في الجزائر عذرناكم وانتوا بتقولوا سبب الخسارة (النار)·
* لكن كونكم تقولوا السبب (الموية) ·· بتبقي الحكاية شينة في حقكم ·
* كلامكم دا اوعكم تقولوه في الفضائيات بتفضحونا ·· في الاذاعات الخاصة ممكن تقولوه·
* جماهير المريخ زمان كانت بتهتف (التحكيم فاشل) ·· هسع بقت تهتف (البرد قارس)·
* دي ما في زول سبقكم عليها·
* اكرم الهادي سليم كان (حارس ما شافش حاجة) ·· أي كورة يفكوها فيه قون·
* أي كورة تجيه قون ·· المعلق فتر من الاقوان·
* لو حارس المرمي بتاعكم كان (بلة جابر) ما كان بتدخل فيه سبعة اقوان·
* كورة هي والا مزرعة بطيخ·
* انتوا عارفين لو معلق المباراة ما كان شاطر في الحساب كان فك العدد·
* مباراة ما فيها أي ترشيد للاهداف·
* مباراة اقوانها اكتر من جدعات تماسها·
* جدعات شنو؟ ·· دي مباراة كانت اهدافها اكتر من جماهيرها·
* ليهم حق يلعبوكم في (التمهيدي) ·· بدري عليكم·
* نورتوا التمهيدي يا ناس الوصيف·
* يلعبوا في الجزائر يقولوا (الالعاب النارية)·
* يلعبوا في نيجيريا يقولوا (ارضية الملعب)·
* يلعبوا في تونس يقولوا (الحكم)·
* يلعبوا في الاردن يقولوا (الموية)·
* يلعبوا في استاد الهلال يقولوا (الحفرة)·
* يلعبوا في استاد الخرطوم يقولوا (النافورة)·
* يلعبوا في عطبرة يقولوا (جمهور الامل)·
* عشان كدا مركزين في (الطابق التاني)·
* نعمل ليكم شنو نحن ؟·· نتقطع يعني·
* بمناسبة السبعة ·· نحن ممكن نتقبل سبعة الهلال من المقاولون بشرط تتقبلوا خسارة المريخ من الهلال بالخمسة في احتفالات سوداني·
* اكرم دا من نظرية النعيم رونالدينو اتضح انه ما عندو أي فكرة في حراسة المرمي·
* قلت ليكم اكرم (حارس ما شافش حاجة)·
* قعدتوا تغالطوا·
* انا ما عارف حارس شنو؟·
* الحراسة خليها ·· رأسك رابطو علي ايه؟·
* اول مرة اشوف لي حارس يجيبوا فيه سبعة اقوان ·· يقول عندي (عين سمكة)·
* دي ما عين سمكة ·· دي عين تمساح عديل·
* عين سمكة دي ممكن نقبلها منك وانت مغلوب واحد ·· مغلوب اتنين ·· مغلوب تلاتة·
* اقول ليك حاجة ·· لي اربعة اقوان ممكن نقبل منك (عين السمكة) دي·
* لكن تتغلب سبعة وتقول (عين السمكة)·
* علي منو ؟·· نحن عين السمكة كمان ما بنعرفها·
* علي رأي الكارتيرست نزيه ·· والله انت (اكرم) زول·
* ملحوظة :حقيت الاسم يا اكرم السبعات·
هوامش
* غادر خالد جوليت كشف الهلال وكان جوليت طوال مسيرته مع الهلال مثال للاخلاص والوفاء ·· لذا فهو يستحق تكريم خاص·
* جوليت اخر نسخة من الاشبال·
* ان شاءالله سوف نعود لاحقاً لنكتب عن خالد جوليت·
* سامي عبدالله اضافة حقيقية للهلال مع كاريكا وخليفة طبعاً·
* الخبراء اتفقوا علي خليفة·
* مجلس الهلال ما زلنا نسأله المزيد من التسجيلات·
* حراسة المرمي في الهلال محتاجة لاضافة فورية ·· لا ادري لماذا يتمهل المجلس في التسجيل؟·
* نتمني ان يكون مجلس الهلال صادق مرة واحدة في وعوده ويصل المحترف ديمبا اليوم·
* وفي الانتظار مفاجأة الارباب·
* تجنيس يوسف محمد وحل مشكلته مع فريق سيون افضل للهلال من عودة قودوين وتجنسيه·
* اطراف الهلال لو اصبح شمالها امولادي ·· ويمينها يوسف محمد في وجود ديمبا في الدفاع ومفاجأة صلاح ادريس في الهجوم فان الهلال سوف يصبح قوة رهيبة في الموسم الجديد·
* مازلت اطمع في ان يحل مجلس الهلال مشاكل يوسف محمد مع سيون وداريوكان مع الاسماعيلي حتي بعد التوقيع معه ·· ولو كلف ذلك صلاح ادريس خمسة مليون دولار·
* لا اظن ان الاسماعيلي لو وجد مقابل مالي كبير من الهلال يرفض اطلاق سراح داريوكان للهلال ليعود اليه من جديد·
* ان لم ينجح الهلال في تجنيس قودوين او يوسف محمد فانه لابد من عودة داريوكان حتي لو كلف ذلك الهلال الكثير·
* ميزة داريوكان في كونه لاعب مجنس·
* الوصيف اتغلب من فريق يمني بالستة·
* واتغلب من فريق اردني بالسبعة·
* اوعكم تلعبوا مع فريق فلسطيني يا بتوع التمهيدي·
* تمهيدي في البرد دا·
* تمهيدي بالشنقيطي·
* كروجر حقق الدوري والكاس واصابته لعنة الهلال لتتم اقالته·
* مازدا اهلو في المريخ ما استحملوه ·· نستحملوا نحن كيف في الفريق القومي؟·
* منعوك اهلك ··· او اقالوك اهلك·
* الاسم الحركي لمازدا اصبح (تلاتة مازدا سبعات)·هذا بدلاً لتلاتة ··نجمة ·· سبعة ·· مربع·
* حجازي ادم طالب باضافة (نجمة) لجدول سبعة·
* سبع والا ضبع·
* سبع طبعاً·
* بختكم·
* سبعة ·· سبعة ··الليل نعدو·
* جبل الكحل بتهدو (السباع)·
* السبعة بتصلح المشي·
* لبعتين في الرأس بتوجع ·· والسبعة ايضاً·
* افياني شطبوه ولا لسع؟·
* خبر عاجل : الوصيف مشي الاردن ليه ·· ان شاءالله مافي عوجة· |
|
|
 
|
|
|
|
خضر حسين خليل
فيس بوك
تويتر
انستقرام
يوتيوب
بنتيريست