تحذير .. ممنوع دخول الكوامر والباصات الحكومية .. والمجروسات .. ولواري السفنجة .. علي الركشات الاتجاه صعودا .. ثم الانزلاق علي الجانب الايمن .. ناس وآآى وآآي ما دايرين .. و المديدة حرقتني .. عليهم التسجيل لدي الاخت علوية .. الاخوة النشالين .. والمرتزقة .. وحارقي البخور .. مراجعة البوابة ..
تحذير .. ككل التحذيرات .. ( مبهم ) وغير مفهوم ..!!
.. ..
ام هلا هلا .. ماتت قي الحلقة الرابعة .. صدمها خوان كارلوس بعربيتو الجاكوار .. لانه كان ما منتبه .. مشغول بعاين لكرستينا ألغيرا .. حتي لم لاحظ ليها .. نط من الموضوع .. وقال ليها .. أريد نبيذا .. وشطيرة شنو كدا ما عارف .. !!
بداية .. ككل البدايات .. ( جايطة ) ..!!
.. ..
سأعود .. ( الموضوع الاساسي بعد بكرة الصباح ) .. تن تش .. !!
02-03-2008, 04:16 PM
humida humida
تاريخ التسجيل: 11-06-2003
مجموع المشاركات: 9806
اساسا يعني الموضوع تسلية تفتح النت ساعة ساعتين في البيت .. وتتوكل علي الكريم زمان بدري علي خريف تمنية وتسعين كدا كان الواحد بخش يشوف الايميل بتاعو ذي خمسمية مرة في اليوم ما في موضوع لا منتديات ولا شات بالمعني المفهوم شغلانة علمية بحتة وصداقات حقيقة ومنفعة تعميم الانترنت وجعلها في متناول كل شخص خلق مجتمع جديد يفرض نفسه بكل قوة مع جيل جديد بمفهوم جديد قائم علي ثورة الاتصالات زمان كان في الحلة تلفون واحد وهو وسيلة الاتصال بالعالم الخارجي تخيل معاي الآن كمية تعدد وسائل الاتصال في نفس الشارع الكل بيوته من الجالوص الواحد بكون عنده تلاتة وتلاتين ايميل وموبايل وعشرين نك نيم وبيشترك في استخدام تلفون البيت عدة منافذ علي العالم الخارجي وهاك يا لخبطة العوض ود امحمد الحسن مأخد شاكوش من تركيا اشراقة المعفنة مجكسة لبناني عم خضر داخل النت بي مكسر قلوب العذارى وود امو عامل فيها مناضل وبنبذ في الحكومة انت قدر الحكومة يا ولد ..!!
02-03-2008, 04:25 PM
humida humida
تاريخ التسجيل: 11-06-2003
مجموع المشاركات: 9806
الموضوع دا بجرنا ( باي ديفولت ) الي النت وتأثير العولمة علي الفتاة السودانية ..! طبعا القاعدات في السودان ديك ما عندهم مشكلة كان ما عرست في بيت أبوها وكان عرست وطلقوها برضو في بيت ابوها ولو ابوها ما عندو بيت ممكن تقعد عند الجيران المسألة كلها عندهن اكمال نص دين بالنسبة للعندهن دين ومظاهر اجتماعية للفارغات وسنة حياة عشان الحياة ذاتها تمشي باي ديفولت بالنسبة للأغلبية العظمي اها في بداية التمنينات الميلادية بدت عندنا الهجرة ناس متزوجة قرت وانتفخت من خير البلد قالت دايرة تهاجر البلد دي سخانة وكتاحة اها ما كان في إشكال وأهو بجو الاجازات بجيبو معاهم لبن نيدو ومرقة ماجي يعني ما كعب الجماعة ديل رطبوا هناك وقعدوا وبقوا نظام الزرعنا غير الله يقلعنا في بداية الالفية الجديدة اتضح لينا انه في جيل جديد اتولد في الغربة جيل كارثة ما عندو اي هوية لا عاش في السودان عشان يفهم الوضع الطبيعي ولا دخل في اهل البلد القاعد فيها عشان يبقا زيهم حاجة كدا ذي ملاح الخدرة بالايسكريم اولاد طايرة ليهم بالمعني الحرفي وبنات امخاخهم نانسي عجرم والشكل فايزة عمسيب تجي الواحدة تقول ليك والله يا اونكل - جمع انكل شمال - انا صاحبتي لويزا قالت لي انتي استايل تعاين للبت من فوق لتحت تلقاها انتيكة اصلو نحن السودانيين لمن نرتاح بنسمن بالعرض بدل الاستايل بنبقا ستلايت عديل كدا ..!!
02-03-2008, 04:25 PM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
أصحاب الأمجادات يحتجّون .. البوم ينعق في هدوء.. ولازال الليل طفلاً يحبو حتّى قلنا يا ليته سكت.. لا وجود للمشردين في هذا البوست .. ذات مرة ودون مناسبة ونحن جلوس في كافتريا العمال زميلتي قالت لي Shut Up Maaaaaan حرف الa كان مرقّقاً بصورة تجعله يدخل بين إتنين يتدافسون على حافلة الشيطة المعمورة وبالعودة.. أما عن المسنجر فحدث ولا حرج !!!! إضافات عشوائية لكل الأسماء التي تبدأ بحرف ال نسرين ..وحذف كل جينات ميم المذكر مع الإبقاء على تاء التأنيث فربما تحتاجها ذات ليل والناس نيام .. أجمل الشعارات لعلها تلك البوسة مع ذاك القلب المكسور .. أقول ليك حاجة يا حمّيدة ؟ جرّب المحشي..
02-03-2008, 04:36 PM
humida humida
تاريخ التسجيل: 11-06-2003
مجموع المشاركات: 9806
المحشـــي بلا بصل ..!! .. .. سؤال .. ربما يدور في الخاطر .. انت يا اخينا .. البوست بتاعك دا محل خردوات ..
باي استرت فووور ورد .. فتحت البوست .. ولدي رغبة في الكلام .. عن أي شئ .. عايز اتكلم معاكم في قوانين السوق و نظريات الاقتصاد المقارن في ظل الانفتاح وعولمة السوق .. ولو كلامي ما عجبكم حا احكي ليكم عن اثار الحرب الاهلية الامريكية علي المسيرة الصناعية .. و الانهيار الاقتصادي الذي واكب تلك الحرب .. واثاره علي سير الصناعات وتحول امريكا الي اكبر مصنعي الاسلحة في العالم .. ولو ما وقع ليكم كلامي اتكلم ليكم عن تكالب قوي العالم الاول .. وان كنت اعترض علي تسمية العالم الاول دي .. تكالبهم علي مصادر الثروات الافريقية واثر ذلك علي المدي الطويل علي البشرية ..
ولو عايزين كمان ممكن احكي ليكم .. عن تلك التي خرجت من شرايين المطر وانثالت دررا لتسقي ارض عمري الجدباء لتحيلها بساتين وحدائق ..
الفــــورة مليون ..
.. ..
جيب ( سفة ) يا عمر .. عشان اتفها ليهم في نهاية البوست ..!
02-03-2008, 04:44 PM
humida humida
تاريخ التسجيل: 11-06-2003
مجموع المشاركات: 9806
والله يا عمر .. من حيث الفهم ..الفهم قسم .. وكر علينا الما قسموه لينا ...(عذرا لمريم تلفزيون).. لقد ارهقتنى جدا بالرجوع الى معجمى اللغوى .. او ماتبقى لى فى الذاكرة من قصيدة عاطف خيرى ( شهيق ) المعنى ان كل شخص مسئول من فهمه على حسب البعد التفكيرى ( بتاعو).. الى ان يأتى صاحب الحق ويجقلب عيونو.. ربع الحقيقة .. استعصى على الامر من ناحية سين سؤالك .. بعد استلام الفايل امنت ذاتو بالضحك ..وشتت النبق الى ما لانهاية .. وغلبنى حساب الرقم الوسطانى ..لانو فيه شتات تقيل ياااااااااااااخ .. صديت الى حيث سألتنى... وجدت عدة اردية ..ارتديت الاطول .. والله المعين..!
02-03-2008, 04:55 PM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
Quote: زمان كان في الحلة تلفون واحد وهو وسيلة الاتصال بالعالم الخارجي
كنّا في الحلّة بوابة الناس للعالم الخارجي .. ما عشان أولاد عز لكن لأنو جينا بدري في الحي .. العنقريب بيشيل ميّة لو النفوس إطّايبت .. محاسن في إنتظار زوجها من السعودية في تلفونا .. في نفس العنقريب أبو عبيدة في إنتظار ابوطالب من امريكا .. نففففس العنقريب فيهو سلمى تنتظر محادثة لتحديد العرس من ابوظبي .. النفوس لسة طيبة والعنقريب فيهو شافع صغيير يقول وصية لي أبوهو مفادها " أمي قالت ليك أضرب عند ناس شيخ الدين بالليل أسة الناس زحمة" .. حاولنا نستفيد إن شاء الله بي تريننق لي انا عشان الكورة من السعودية ما ظبطت .. مرة مرة بنستفيد من ترحيل ناس محاسن ونركب معاها لحدي السوق العربي مستفيدين من جيتها أمبارح وأسلاكنا تنقل لها الخبار السارة بتحويل الريالات .. ده كللللللللللو هيّن لكن تعال شوف البيت الساعة 3 عصر .. الخطوط الملونة بقوس قزح في التلفزيون والفنان يغني في إنتظار نشيد العلم والقرأن الكريم .. فجأة يكتظ البيت بي السكّان من قبيلة الجيران من أطفال بلادي .. والغريبة بيتحكموا في درجة صوت التفزيون ويطالبون بالغداء مع إستخدام التسالي كما قلّاية البن ..
ياخ أقول ليك حاجة ؟ عندكم DSL؟
02-03-2008, 06:07 PM
Maawya Hussein Maawya Hussein
تاريخ التسجيل: 12-27-2007
مجموع المشاركات: 10136
حامد بريمة ... وفى مشهد اخر ..ودنفاش دخل القراش... وبنشر ابو العباس ناصية او كان محطتى التى انزل فيها لاننى كنت اجهل انه هناك مواصلات .. مكونة من البرينسات الصغيرة تدعى الثورة الحارة العاشرة ... وتنقش ..تنقش ..تنقش قرابة الكيلو متر كيما اصل الى المنزل .. فارة .. كبير .. او كما الذين .. يرفعون شعار الدنيا حلوة .. وهم يدعون ان اى مجتمع لابد ان يكون كامل وان لم يكن كذلك فعليه السلام.. وقبل ذلك حكيتهم نظرية (فرويد) تلك .. الانا العليا .. والانا الدنيا .. ومابينهما نقطة التوازن التى كانت نحن .. ولكن اكثرهم لايعلمون .. ثانية.. اذا مات ابن ادم انقطع عمله الا من ثلاثة.. سازور تلك المقبرة من حين لاخر لاقرأ الفاتحة على امواتنا المغضوب عليهم .. عسى ان يغفر الله لهم مافعلوا..
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
humida
عمر الفاروق
Maawya Hussein
فيس بوك
تويتر
انستقرام
يوتيوب
بنتيريست