الدوحة تلك المدينة الساحرة اتينا اليها مهرولين فمكثنا فيها زهاء التسعة سنوات وذهبنا عنها مرغمين وسوف نعود اليها صاغرين سوف اتحدث عن تلك الايام المحفورة في الذاكرة ابتداء من مطعم عبدو ودوسة وجلسات الونسة بصحبة الراحل المقيم الاستاذ مصطفي سيداحمد وقفشات اخونا عبدالمنعم سليمان وحاتم الرشيد وشهاب مرسي مرورا بتمرين الجمعة وكباية الشاي الكرك في القهوة بعد التمرين الي ان نصل الي مرغني هندسة ومطعمه في الريان وعنده يطيب لنا الجلوس ثم ادلف الي السنتر وماادراك ما السنتر حور وحسان يسرو النظر لك الشكر دوحة الجميع فلم تجعلينا نحس بالبعد عن وطننا
04-07-2008, 06:34 PM
معاوية محمد الحسن
معاوية محمد الحسن
تاريخ التسجيل: 03-22-2008
مجموع المشاركات: 1590
يامتولي ياخوي سلام مالك عاوز تقلب علينا المواجع بهذه الذكريات التى لاتنسي والراسخة فى اذهاننا وياحليل ايامكم فى الدوحة ونزهة الخميس فى الكورنيش مع اخونا صديق أحمد على والحريق فى شقة الصادق وبطيخة اخونا حاتم العزال وقعدات الأرض فى شقة عبد المنعم وليه يامتولي ناس عبد المنعم ماكان عندهم سرائر ؟ طبعاً انا عارف السبب ماعارف انت عارفو ولا لا ، ثم ندلف لغرفة ابو سعد المهندس حسيب وبعد داك نركب العربية البيوك ومطعم الرغيف الساخن وماتنسي ضحكات اخونا الباشمهندس يوسف الطيب وحلة العدس الزي الكبدة زى ماقال دكتور حسن اخو حذيفة وشقة اولاد بحري فى المنصورة والحفلات التى كانت تقام فيها حنة فلان ووداع علان ويالها من أيام ياموتي
04-07-2008, 06:44 PM
عزام حسن فرح
عزام حسن فرح
تاريخ التسجيل: 03-19-2008
مجموع المشاركات: 8891
هلا يا متولي وكل الشوق ايها الصديق الجميل وفي الدوحة ايام وايام يا حليلها.. وفي انتظار سيرة الايام الخوالد في الدوحة واحنا طبعا الجيل الجاء بعدكم طوالي يا متولي فالدوحة في تلكم الفترة حقا كانت جميلة ومدهشة... وفي الانتظار
04-08-2008, 01:15 PM
Mutwali Malik
Mutwali Malik
تاريخ التسجيل: 12-08-2005
مجموع المشاركات: 2720
الاعزاء معاوية - عزام - كيكي بمروركم سوف يزدان البوست رونقا وجمالا اخي عزام حسن فرح ان انسي ما انسي كيف لي ان انساكم وكان ان مررنا علي غرفتك الانيقة علي مااذكر بحي المنصورة وكعادتك منسق ومنمق وصاحب ذوق رفيع تلك ايام خالدات لن تنمحي من الذاكرة معاوية محمد الحسن واصل معنا وانا علي يقين انك سوف تنداح معي في الذكريات بعد شوية يجيك عبدالمنعم سليمان ويقول بطلو اندياح كيكي صديقي ليك وحشة وشاكرين لك هذه الاغنية الرائعة ولي ذكريات مع هذا الشاب الرائع عصام محمد نور في الدوحة وكذلك فرفور ونادر خضر ايضا في الدوحة سوف اتطرق لها واصل معانا
04-12-2008, 05:56 PM
Mutwali Malik
Mutwali Malik
تاريخ التسجيل: 12-08-2005
مجموع المشاركات: 2720
اليوم كان احد ايام الدوحة الساخنة والرطوبة تلفحك في وجهك كانها تقول لك ارجع المكان فندق شيراتون الدوحة والزمان العام 1995م امتطي الراحل المقيم الاستاذ مصطفي سيداحمد صهوة جواده وكان اول لقاء له مع محبيه وغني وابدع وتمايل الناس معه وكنا نتسأأل هل قدر ان تكون مبدعا ومحبوبا ان تكون متغربا عن وطنك تلك الليلة اعطت الكثيريين الامل في ان اليوم جميل ولكن الغد اجمل لك الرحمة ابا سيداحمد وستظل ذكري ايامك في دوحة الجميع محفورة في الذاكرة
04-21-2008, 05:28 AM
Mutwali Malik
Mutwali Malik
تاريخ التسجيل: 12-08-2005
مجموع المشاركات: 2720
المكان شقتنا بالمطار القديم والتي كانت تضمنا والاخوان معاوية محمد الحسن - خالد يوسف - شهاب مرسي وايام الميز والحلل وكان اليوم علي اخونا شهاب مرسي ولاادري من الذي هداه علي عمل اصعب طبيخ وهو حلة الفاصوليا باللحمة والتي تحتاج الي خبرة ومعرفة اخونا شهاب بعد ان طبخ اللحمة ماكان منه الا ان يضع الفاصوليا ومن الكيس وعلي الحلة ومضت ساعتان واللحمة اتهردت والفاصوليا كما هي ويقوم يزيد كباية موية والحال ياهو نفس الحال وحضرت انا من الشغل ويبادرني شهاب بالسؤال الفاصوليا ابت تنضج وليها ثلاث ساعات في النار فسالتو وانت عملتها كيف قال لي عملت الدمعة وكبيت عليها الفاصوليا فقلت ليهو ماسلقتها بالماء فقال لي لا ماسلقتها فقلت ليهو احسن نمشي نتغدي في مطعم السلطة بتاع عبدو ودوسة وفعلا ذهبنا وبمجرد وصولنا قلت لشهاب اسال دوسة عن الفاصوليا فسالو ووراهو كيف عمل الحلة وانو وضع الفاصوليا من الكيس وللحلة وكان رد دوسة الحلة دي سنة ماتنضج واكملها انت ياشهاب يا اخوي لو عايز فاصوليا ونفسك فيها تعال لي دوسة واشبعك منها التحايا لدوسة وعبدو وصلاح واخونا شهاب وكانت ايام سعيدة
04-21-2008, 05:36 AM
محمد أبوالعزائم أبوالريش
محمد أبوالعزائم أبوالريش
تاريخ التسجيل: 08-30-2006
مجموع المشاركات: 14617
Quote: اليوم كان احد ايام الدوحة الساخنة والرطوبة تلفحك في وجهك كانها تقول لك ارجع المكان فندق شيراتون الدوحة والزمان العام 1995م
إن لم تخني الذاكرة، فقد كان أحد أيام عيد الأضحى .... وكنت حديث الوصول للدوحة (لم أكمل العشرة أيام) .. حضرت بعدها آخر حفلان مصطفى سيد أحمد بفندق الواحة (بعدها بسنة)، والتي توفي بعدها بسبعة عشر يوماً.
ما تسيبك من بلاد العم سام وتعال تاني.
تحياتي
04-21-2008, 06:28 AM
Mutwali Malik
Mutwali Malik
تاريخ التسجيل: 12-08-2005
مجموع المشاركات: 2720
عبداللة محمد صالح ومحلات المغترب كانت لنا فيها صولات وجولات وملايات تلك ايام وصالح الرجل المهذب الخلوق سكنا سويا في النجمة وشقتنا كانت تضم الاخوان خالد التيجاني - انور - والاخوان الشوايقة محمد واخوه نسيت اسمو بس ماوريتني انت منو اخي وقريبي مامون الدوحة وايامها ولياليها محفورة في الوجدان واهلها الطيبون يجبرونك علي احترامهم فعلا حتي الطير مطمئن فيها سوف ارسل التلفون علي الماسنجر
04-21-2008, 05:11 PM
عبدالكريم الامين احمد
عبدالكريم الامين احمد
تاريخ التسجيل: 10-06-2005
مجموع المشاركات: 32520
كيكي صديقي عبدالمنعم سليمان وبالمناسبة هو عندو عدة اسماء منها علي سبيل المثال عبدالمنعم امواج وعبدالمنعم ابو ------ وعبدالمنعم الهاجري ولديه قصة طريفة مع ابوالخير صاحب مطعم الفايتمينات وفي احدي المرات وكنا نمني النفس بوجبة فايتمينية دسمة عكر من صفوها نقة ابوالخير وينساب في الحكي انا لمن كنت في الجنوب كنت شغال في سلاح الاشارة جاءت برقية فووو طرنا الي ملكال وبعد داك جاءت برقية فووو طرنا الي واو وبعد داك جاءت برقية فووووو طرنا الي جوبا فما كان من صديقي عبدالمنعم سليمان بيجو الا ان يقول انت ابوالخير والا ابوالزنان كل مرة فوووو طرنا فووو طرنا
صديقي الاستاذ صلاح عبداللة لاحول ولاقوة الا بالله له الرحمة اخونا عبدو وربنا يجعل مثواه الجنة الدوحة وناس الدوحة يجبروك علي احترامها واحترامهم ونية الزيارة والاقامة موجودة واتمني ان تكون في القريب العاجل
04-22-2008, 12:49 PM
عامر تيتاوى
عامر تيتاوى
تاريخ التسجيل: 01-14-2006
مجموع المشاركات: 3328
اخي وصديقي تيتا شاكر لك مرورك البهي الدوحة كان لها ظرفائها واعيانها علي سبيل المثال مرغني هندسة صاحب مطعم الريان - المرحوم محجوب الدويم - دوسة - عبدالمنعم سليمان - حسن ووليد جلك - كمال كومي - برهان - ياسر علي الحسن والشهير بياسر الجيدة - المرحوم الاستاذ هاشم مرغني والكثيريين سوف اذكر طرائفهم اخونا المرحوم محجوب الدويم توفيت حبوته وجينا نشيل معاهو الفاتحة وساله احد الاخوان حبوبتك مات كيف فقال ليه محجوب ماتت في الولادة حبوبة وعمرها ثمانون سنة وتسالني ماتت كيف واصل معانا
اخونا واحد ظرفاء الدوحة مرغني هندسة صاحب مطعم الريان الشهير له التحية كان يقوم بعمل فطور عيد الفطر وهاك ياعصايد وشعيرية وسكسكانية ومجانا المهم الشباب اختفو منو شوية وصادف اخر الشهر فقال قولته الشهيرة يالجيتونا وقت البلاش ونسيتونا وقت المعاش
05-07-2008, 05:58 AM
Mutwali Malik
Mutwali Malik
تاريخ التسجيل: 12-08-2005
مجموع المشاركات: 2720
اخونا حاتم الرشيد وفي احدي تجلياته سأل اخونا هجو محمد صالح وكان شغال في الدوريات ومهمتهم قفل الدوارات لمرور الامير انت ياهجو قالو الامير اتزوج ليهو واحدة صغيرة وجميلة حصل شفتها فكان رد اخونا هجو ساخرا انا الامير ذاتو ياالله بشوفو بيجي ماشي فينا فوووووو تقول لي شفتا زوجتو
05-09-2008, 05:56 AM
Mutwali Malik
Mutwali Malik
تاريخ التسجيل: 12-08-2005
مجموع المشاركات: 2720
اخونا وصديقنا محمد زين مدير مدرسة الخليج لتعليم السواقة كان عندو متعلم مصري كل اسبوع يتصل بيهو ويقول ليهو استاذ محمد معاك الباشمهندس فلان انا النهار ده مش حااقدر احضر للمدرسة وصديقنا محمد زين بالو طويل ويتكرر نفس السيناربو الو معاك الباشمهندس فلان ونفس الكلام فماكان من اخونا محمد زين الا ان يوقفه عند حده فقال له اسمع يا اخوي معاك الباشمهندس محمد زين ماجستير مكننة زراعية من روسيا اقوم ازرع ليك نجيلة تنام فيها للصبح فلقتنا كل يوم معاك الباشمهندس معاك الباشمهندس حصل انا قلت ليك انا باشمهندس بالله فكنا لك تحياتي باشمهندس محمد زين
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة