|
|
 دلوا كابس العتبة وختا النشال
|
كليكيلن مكلف وللدرب كلكال
عبرنو الجمال ولقنو ما بنكال
وكت اتزاحمن والميس عليهن طال
دلوا كابس العتبة وختا النشال
تخيلو معى صورة ذلك الدلو الملئ بالمياه بعد ان يفلت من النشال من على حافة بئر عمقها يزيد على المائة متر؟؟!!
هذه مساحة للقول فى هذه المخلوقات العجيبة"الجمال"
|
|
 
|
|
|
|
|
|
|
|
Re: دلوا كابس العتبة وختا النشال (Re: خالد المحرب)
|
Quote: كليكيلن مكلف وللدرب كلكال
عبرنو الجمال ولقنو ما بنكال
وكت اتزاحمن والميس عليهن طال
دلوا كابس العتبة وختا النشال |
هيييييييييييع ود النعيم حلو الرجال
مكلف ود النعيم يعنى سيدو كالفو بالعلوق ما بنادي الشفع يحبسوا علوقو ويمشوا يلعبوا التيوة وتجى الغنم يسفسفنوا منو . ده علاقو في طشت وتحت الطشت شوال كبيييييييييير حق بالة محل ما الكليكيل ياكل وينف ويتلفت ويشتت العلوق برضو بشتتو في الشوال الوسيع ده .
تخريمة :
ود النعيم زمان عندنا واحد اسمو صالح ود دريس . صالح ده بيكلف جمله بالحيل وما بلعب في علوقو وبعدين الدرتية بجيب ليهو جوجاو السمسم بيختو ليهو فوق في ضهر الخف ( بضم الخاء ) والخف قصير اها الجمل بس يمد رقبتو للجاوجاو فوق في راس الخف وياكل مافي بهيمة بتشاركو في اكله .
نواصل
عبرنو الجمال ولقنو ما بنكال افتكر واضحة كناية على مقدرتو وجريهو وصهابتو مافي جملا بلحقو في الاوصاف
وقت اتزاحمن والميس عليهن طال - يعنى وقت السبق والجمال جاريات الحجل بالرجل والميس هو محل الوصول والميس عندنا زمان في لعبة حرت الصبي بيرد الميس طوالى .
يعنى وقت مسافة الميس بقت قريبة ليهن كلهن الكليكيل سيييييييييييييك براهن وخلاهن في الفرقة .
| |
|
|
|
|
|
|
|
|
|
Re: دلوا كابس العتبة وختا النشال (Re: سمية الحسن طلحة)
|
Quote: ده بوست جميل جدا نخصصه للإبل السودانية الأصيلة قصصها وحكاويها وأوصافها ومنقابها وما قيل حولها من الشعر...
|
الاخ ابو حريرة
شكرا على المرور الكريم ، وهذا ما قصدته انا فعلا بافراد هذا البوست فى وصف هذه المخلوقات العجيبة وعن الشعر الذى قيل فيها.
| |
|
|
|
|
|
|
|
|
|
Re: دلوا كابس العتبة وختا النشال (Re: على احمد النعيم)
|
| Quote: وهذا ما قصدته انا فعلا بافراد هذا البوست فى وصف هذه المخلوقات العجيبة وعن الشعر الذى قيل فيها. |
ود النعيم اخوى
احمد ود ابو حريرة
كنت متمنيا لو ان عنوان البوست معلوم للجميع وكان سيكون اجمل لو كان بعنوان :
( افلا ينظرون الى الابل كيف خلقت)
وده كان سيكون اجمل عنوان يمر على هذا المنبر وستكون المداخلات فيهو مشتركة من كل الاعضاء ناس البطانة والبياطرة وناس الفقه وغيرهم .
لكم اطيب المنى
| |
|
|
|
|
|
|
|
|
|
Re: دلوا كابس العتبة وختا النشال (Re: الطيب شيقوق)
|
Quote: كنت متمنيا لو ان عنوان البوست معلوم للجميع وكان سيكون اجمل لو كان بعنوان :
( افلا ينظرون الى الابل كيف خلقت)
|
الاخ ود شيقوق
نعم الراى ما قلت وصدق من قال انو القلوب شواهد . لاننا انا والاخ ابو حريرة قد تطرقنا لهذا الموضوع امس وحاولنا تغيير العنوان ولكننا لم نوفق فهل لك من طريقة؟
دمت
| |
|
|
|
|
|
|
|
|
|
Re: دلوا كابس العتبة وختا النشال (Re: الطيب شيقوق)
|
بوست جميل لما يحتويه من اشعار والفاظ بالعامية
الحقيقة اهلنا ديل ما بنقدرو والله في شعر الوصف والغزل
وللاسف, في زمنا دة, ربع الكانوا بيكتبوهو ما بنقدر نكتب زيو.
الاستاذ الطيب شيقوق
قمت بشرح الابيات اعلاه ما عدا البيت الاخير "عنوان البوست"
فهلا تكرمت بشرحه كي اتمكن من فهم المقصود
ولك الشكر والتقدير
| |
|
|
|
|
|
|
|
|
|
Re: دلوا كابس العتبة وختا النشال (Re: على احمد النعيم)
|
لنبدأ بشعراء المديح فى الزمان الاول قبل انتشار وسائل المواصلات المريحة الان وكيف انهم اتخذوا من الابل وسيلة لزيارة المصطفى صلى الله عليه وسلم، وهذا واحد منهم ينتقى احد الجمال بهذه الاوصاف الرائعة من قصيدة "قالو الحجيج قطع"
يا حى يا مجيب ندعوك الفى جمل
على المشهاد و الايد نتدلى المويـــه
بالزاد نجفى البليد نتدلى احبابنا الجمبى
والبعيد نتدلى الفقرا البقرو فى المســـيد
جملى البدورو ما اظنو يتوجد
ابيض فى لونه وعلى الدبلان يزيـــد
افطس قدومو تام شوفو بتاكيد
سمحات عيونو ختما الدق والتبيـــــد
شرفات اذنيبه مكلوفا يا الرشيد
زمامو الفضه اربع تاواق و يزيـــــــد
خناقو الشولق غشيما دهب العبيد
رسنو حريرا بارد لمسك الايـــــــــــد
ان قلت رقبتو كالروقه الفى الهميد
مكوكب زورو والفدعه العند الايــــــد
ضامر حشاهو ماهوالبدين عريض
مرخى عرقوبو شوتال مدقوق جديد
سمحات سيقانو كا ليد الفى الحديــــــــد
مدور خفه فى ا****ه مو عريض
شارف سنامو قبة سيدى العبيـــــد
طبعو المؤدب لو عاصى لو عنــــيد
كدى جيبو و نوخو يا لعرض يا العبيـد
سو فوقو سرجا مكسى محشى جديد
ان قت مجدولا كالفصل الفى العقيــــد
مفروش للفروه يا تويلى يا مرعيد
قام جب بينا يضرب و ينفض الايـــــد
ان جاك ماشى كيف عفرات الصـعيد
يا اخوى اقرأ لو من كونك ماك جديد
حنق للطاره طالب الرسول الســـيد
ريس السفينه قال اهلا مداح الســــــيد
دون شك ادخلو ان شاء الله توافقو العيد
ـــــــــــــــــــــــــــــــــــ
ومن هنا يتضح جليا اهمية الابل وحقا لولا اهميتها لما قيل فيها مثل هذا القول البديع.
لنا عودة ومنتظرين اهل الراى والغنا.
دمتم
| |
|
|
|
|
|
|
|
|
|
Re: دلوا كابس العتبة وختا النشال (Re: Ahmed Yousif Abu Harira)
|
Quote: أنا بتذكر في بيت من الشعر العربي الفصيح يماثل هذا المعنى إن لم يورده احدهم ح احاول اشوفه وين..[/
QUOTE]
نعم ابو حريرة هو البيت لامرؤ القيس حين قال :
مكر مفر مقبل مدبر معاً كجلمود سيل حطه السيل من عل
كميت يزل اللبد عن حال متنه كما زلت الصهباء بالمتنزل
على الذبل جياش كأن اهتزامه إذا جاش فيه حميه غلي مرجل
مسح إذا ما السابحات على الونى اثر الغبار بالكديد المركل
لكم عميق مودتي
| |
|
|
|
|
|
|
|
|
|
Re: دلوا كابس العتبة وختا النشال (Re: الطيب شيقوق)
|
Quote: جاك الليل دحين فج وانقفت ياالراو
هسالك جرو أردح وفارق الهراو
انس الليل مع الما ربربت جراو
وطاك حية الشق والحجر مراو
|
يا بت طلحة المثل العربى بقول:
"قبل الرماء تملأ الكنائن"
وانا والله اعرف ان كنائنكم مليئة بكل بديع ولهذا انزلت هذا البوست لينهل الجميع من هذا المعين الذى لن ينضب.
اطنان من الشكر.
| |
|
|
|
|
|
|
|
|
|
Re: دلوا كابس العتبة وختا النشال (Re: الطيب شيقوق)
|
يلا يا ود شيقوق ورينا حركاتك وبركاتك، ولك العتبى فى اختيار العنوان حتى ترضى، وكما قيل لكل سيف نبوة ولكل جواد كبوة . ولكن اظن ان المعنى المقصود من هذا البوست قد اشرت انا اليه ، وهو يكمن فى وصف الابل ومناقبها، فالرجاء ان تدلو بدلوك او ان تسهب شرحا ، ومتشكرين.
تلفون المحطة الحس نقرتو هلو
يا صوقار ويا ما سك حدود الجو
يا صبار على الجرى والدحيح بالصو
ارح ودينا فى الزهمول فضل فد تو
| |
|
|
|
|
|
|
|
|
|
Re: دلوا كابس العتبة وختا النشال (Re: Ahmed Yousif Abu Harira)
|
| Quote: أنا بتذكر في بيت من الشعر العربي الفصيح يماثل هذا المعنى إن لم يورده احدهم ح احاول اشوفه وين.. |
دة بتاع وصف النعامة؟؟
سفنجة تبرى لاذعر اربد
حكى لي واحد زميلنا مسخوت زيي كدة
قال زنق ليو واحد من اصحابو عامل فيها مقطع العربي وقال ليو اشرح لينا البيت دة
قام قال ليو: يعني سريعة وجراية زي اللوري السفنجة 
| |
|
|
|
|
|
|
|
|
|
Re: دلوا كابس العتبة وختا النشال (Re: الطيب شيقوق)
|
Quote: وين القا اللزم وقر الشديد فوق جوعو
وين القا الخفيف لمسو ومجنح كوعو
وين القا البصيد صى الغفار بى زوعو |
كم لله بى التيه والعتامير هين
يستاهل بيجلخ وقارتيتو معين
هجام السحى الخلا البصر ما لين
المطمور ملان لى علوقو ما بنتدين
يا هضليم نعامات اللخالى الفزن
وخرت اب سمر جنك سهول وقوزن
ريشات قلبى ماك عارف جراحهن خزن
جيب جور جدك الليهو السيوف بنهزن
يلا يا ود المحرب اديتك الضو الاخضر نيابة عن ابو حريره لكى تمتعنا بروائع ود شورانى
تحياتى.
| |
|
|
|
|
|
|
|
|
|
Re: دلوا كابس العتبة وختا النشال (Re: على احمد النعيم)
|
Quote: كم لله بى التيه والعتامير هين
يستاهل بيجلخ وقارتيتو معين
هجام السحى الخلا البصر ما لين
المطمور ملان لى علوقو ما بنتدين
يا هضليم نعامات اللخالى الفزن
وخرت اب سمر جنك سهول وقوزن
ريشات قلبى ماك عارف جراحهن خزن
جيب جور جدك الليهو السيوف بنهزن |
سبحان الله كلام كلف شعرة جلدي عديييييييل يا ود النعيم
هلا هلا المطمور ملان - يعنى ما بكسروا ليهو العيش من السوق بالملوة خيرو وااااااااااااافر .
البقية واضحة يا ابا بكر مش؟
| |
|
|
|
|
|
|
|
|
|
Re: دلوا كابس العتبة وختا النشال (Re: الطيب شيقوق)
|
الاخ على النعيم
الجمال الرجال قالو فيها كلام وكانت فارطه
منها 0 الشراد 0 البليم 0 تيس قنه 0 القمرى
العبادى 0 الجمام0 ابحنك 0
كلهن ديل دخلن التاريخ وصالن وجالن
هاك العايله دى وبرجع ليك مجيه تب
شديراتن ببينن عن كتير النص
جاهن كفو زى مكن الخياطه برص
اسرع لى بريريب اللرايل الحص
عجلك ترو لاحظ لى السرج لاتقص
| |
|
|
|
|
|
|
|
|
|
Re: دلوا كابس العتبة وختا النشال (Re: خالد المحرب)
|
Quote: الشراد يناتل فى الرباط كل ليلو
عارف النيه سفره وليها شامخ حيلو
الشغل الفكر تيه مشى وحيلو
ناير ونادى عالى على الشباب اسكيلو |
والله يا ود المحرب كلام حرى به ان يقال ويدون ويوثق
دلاى السرج قال لى الحكار منفك
قتلو صدق براى ما خدنى فيهو الشك
اب كوعا سليم من الظبت والحك
دنا الوجناتو طير الريدة فوقهن رك
آناس انجدونا عووووووووووووك
| |
|
|
|
|
|
|
|
|
|
Re: دلوا كابس العتبة وختا النشال (Re: على احمد النعيم)
|
لى ود البياخد المَحَفَلْ ...الحي شوقو
حُرْ عنَافِي ماهو فَدِينْ .....بِغَلِّْب سُوقَو
اريت اب ضَلْعَه كان مربوط وهَمِّى عَلُوقو
جملاً بِقْلَعْ الرَكّّابْ .....وسَرْجُو الفُوقُو
-----
ود شوراني
فوق جمله أب ضلعه بعد ان كُسرت رجله
| |
|
|
|
|
|
|
|
|
|
Re: دلوا كابس العتبة وختا النشال (Re: خالد المحرب)
|
يا هضليم نعامات اللخالى الفزن
وخرت اب سمر جنك سهول وقوزن
ريشات قلبى ماك عارف جراحهن خزن
جيب جور جدك الليهو السيوف بنهزن
--------------------------------------
ات عارف ياود النعيم
دى مى رحله فى تراى استار بعد الاستواء فى الجو
والسرعه جات الخريطه فى الشاشه الكبيره وجه الطياره
السرعه وخرت ابسمر جنك سهول وقوزن
جيب جور جدك الليه السيف انهزن
دايماجايب البرنجيه
| |
|
|
|
|
|
|
|
|
|
Re: دلوا كابس العتبة وختا النشال (Re: خالد المحرب)
|
كم لله بى التِيه والعتَاِمير...هَيّّْن
يستاهل بيجلخ ...وقارتيتو مَعَيّّْن
هجَّام السَحِى..الخلا البصر ما َلّيّْن
المُطْمَر ملان لى عَلُوُقو ما بنَتْديّنْ
--------
رحم الله شيخ عبدالله ودحمد ود شوراني
| |
|
|
|
|
|
|
|
|
|
Re: دلوا كابس العتبة وختا النشال (Re: Ahmed Yousif Abu Harira)
|
آدم قولو...عاد عهد الغنا وتجديدو
ما دام تبّّ جاهلاً ....كل راوي بريدو
بصرى الكان قبيل مو من طوالا غميدو
عُُقُب اب تِلّه رايح...في لجيجو يزيدو
--------
الحامينى اخلِص .......في نميمو واجيدو
عدم الشوفه لى الخَالْ الدهب ...في جيدو
العربانو نازلين قوز حمّار......وصعيدو
عسى في الدنيا ياعلي يوم ظروفنا تصيدو
--------------
الُقود والمِِدرْعَات ....والوحَشْ في هويدو
قاصرات من صُبا الأبى يستشّد .....مريضو
طُرق التوبة وين ما اقول سِهِلْ ..تمهيدو
يظهر لى سماحا ......تانى ابدا قصيدو
-------------
سيد توه الجمال العصرو اضحى فريدو
ارغمنى وحكمنى ..الماضى كلو اعيدو
حرقان زولو هِلّيجْ الطبيب..ما بفيدو
يكفح موية البرد ...النزل تـهييدو
-------------
الساهل مجالو ...وقاسى عند تحصيدو
قلبى ورايى متفقات ....على تمجيدو
وفّر كيل جمالو..الفضلة جمّبو رصيدو
ديسو بـهيم ظلام الليل يفوق تسويدو
------------
المرض البيكتر .....يوم بياخد سيدو
والحاس بيهو ما فيش داعى لى ترديدو
الجهمورو غير ما نزورو..كيف تخميدو
يستاهل يكون الضير ....عليهو شديدو
| |
|
|
|
|
|
|
|
|
|
Re: دلوا كابس العتبة وختا النشال (Re: Ahmed Yousif Abu Harira)
|
Quote: ات عارف ياود النعيم
دى مى رحله فى تراى استار بعد الاستواء فى الجو
والسرعه جات الخريطه فى الشاشه الكبيره وجه الطياره
السرعه وخرت ابسمر جنك سهول وقوزن
جيب جور جدك الليه السيف انهزن
دايماجايب البرنجيه |
تلفون المحطة الحس نقرتو هلو
يا صوقار ويا ماسك حدود الجو
يا صبار على الجرى والدحيح بالصو
ارح ودينا فى الزهمول فضل فد تو
والله يا ود المحرب كم سألت نفسى كثيرا كيف اهتدى هؤلاء الناس لتجسيد مثل هذه المعانى ولكن ارجع واقول لله فى خلقه شئون.
| |
|
|
|
|
|
|
|
|
|
Re: دلوا كابس العتبة وختا النشال (Re: على احمد النعيم)
|
Quote: آدم قولو...عاد عهد الغنا وتجديدو
ما دام تبّّ جاهلاً ....كل راوي بريدو
بصرى الكان قبيل مو من طوالا غميدو
عُُقُب اب تِلّه رايح...في لجيجو يزيدو
|
والله يا اب حريره قولك هذا يذكرنى
بعد ما بدعت وفى القراية بدعت
شبت ليا جاهلة وللكتب جدعت
اتنين واربعين بنارو اتلطعت
ما تلومونى شن جنيت وشن بدعت
| |
|
|
|
|
|
|
|
|
|
Re: دلوا كابس العتبة وختا النشال (Re: على احمد النعيم)
|
داك شرف الطليح مرعى النعم والصيد
يا الضير جيتو فى غاية الزعل والغيد
على الجريحو نحير كبده مو فريض
نفضك للسرج جاب فى البتات قريض
لعناية اب حريره وود شيقوق وود المحرب والغايبة بت طلحة، والمغرم بشعر ود الشلهمة حتى الثمالة الاخ بله موسى
| |
|
|
|
|
|
|
|
|
|
Re: دلوا كابس العتبة وختا النشال (Re: على احمد النعيم)
|
ياعلى أحمد النعيم
السلام مطر يا عشا البايتات
عمك ودشورانى بعد أن (تبندر) بمدينة بحرى وشاف التاكسى قال:
يانار بت فلانة الفى ضميرى سكنتى
قبالك براى مطعون وسايقا مكنتى
التكسى البلف بى شارع اللسمنتى
هرعى المتلو يامخلوفتى منو ازمنتى
وقالوا -والعهدة على الراوى- ختوه فى منقد فى هذا التخليط رغم روعته.
يا شيخ على
عشمنا فيكم يتحول هذا النفاج من ونسة دقاقة لشغل موثق مع التوضيح اللازم دون خلل بالمعنى. كلام الناس ديل فيهو شغل غميس يهبش علوم الجغرافيا والتاريخ والإرصاد البيئى والجوى والزراعة والبيطرة, هذا إضافة لعلوم الجمال فى روائع الأدب والنقد.
هنالك صوالين أدبية يقام فيها أوسكار سنوى لتتويج فحول شعراء البطانة ويقمن على هذه الصوالين نساء هن مصدر إلهام هؤلاء المتصوفة فى علم الجمال.
مازال صالون التاية بت اللمين قائما فى ود اب صفية والذى تم تتويج شاعرنا الفرجونى فيه كأحد فحول النمة والمسادير منافسا لودفراج الكنانى.
ليت الفرجونى ياخد عضوية فى هذا المنبر!!
| |
|
|
|
|
|
|
|
|
|
Re: دلوا كابس العتبة وختا النشال (Re: على احمد النعيم)
|
Quote: يانار بت فلانة الفى ضميرى سكنتى
قبالك براى مطعون وسايقا مكنتى
التكسى البلف بى شارع اللسمنتى
هرعى المتلو يامخلوفتى منو ازمنتى |
ود النعيم والاخوة الكرام
واصلوا نحن متابعون بشقف
سنواصل مداخلاتنا بعد التفرغ من زحمة الشغل
لك مودتى
| |
|
|
|
|
|
|
|
|
|
Re: دلوا كابس العتبة وختا النشال (Re: الطيب شيقوق)
|
هجَّام السدود ..عَقَبْ التريعه يسدّى
كاجْرنى وجَفَل ..قَلَعْ الرَسَنْ من يدّى
ما بِتْبَارَى..وكتين جَمْ قفاهو يندّى
سُرعُو بروق وضَهَرو المُرْكَبْ البِتْعَدِّى
-----------------------
شوف الجمل ده عليك الله ...زي سفينة الفضاء ... قلع الرسن (عدة الملاحة) من يد صاحبو واشتغل بالطيار الآلي !!!
| |
|
|
|
|
|
|
|
|
|
Re: دلوا كابس العتبة وختا النشال (Re: Ahmed Yousif Abu Harira)
|
Quote: سُرعُو بروق وضَهَرو المُرْكَبْ البِتْعَدِّى
|
بعدين يا شيخ احمد شوف جمال الوصف فى البيت الاخير من حيث السرعة التى شبهها بالبروق ومن حيث الراحة التامة . فيكون الراكب على ظهره كمن هو على على ظهر مركب شاقة العباب "بدون اى نهزى"
لله درهم من ناس
| |
|
|
|
|
|
|
|
|
|
Re: دلوا كابس العتبة وختا النشال (Re: على احمد النعيم)
|
أحمد ودعلى ود النعيم
السلام عليكم وعلى ضيوفكم أهل ألبل الكرام
الكمبيوتر تاعبنى ودا السبب المنكم غيبنى
ومادام شديتو مخاليفكم فوق العنافيات أكربوا
الحزام وجدوا السير ونحن نحدوكم...
تتختر براك من صافى لا خدير
داخرك لى صعيدا دودو ليهو كرير
إما الحزمة فوق الدومتو ليها خرير
وإما مبتة دفانا الضبع والطير
وتسلموا يا الأهل
| |
|
|
|
|
|
|
|
|
|
Re: دلوا كابس العتبة وختا النشال (Re: سمية الحسن طلحة)
|
Quote: تتختر براك من صافى لا خدير
داخرك لى صعيدا دودو ليهو كرير
إما الحزمة فوق الدومتو ليها خرير
وإما مبتة دفانا الضبع والطير
|
يابت طلحة والله العظيم فقدناك كتير وجيدن جيتى والمثل بقول البل بقودوها بى هاديها وانتو ياكن اهلها، دحين عليك الله لا تكترى الغيبة وطلينا يوت اوعى من شراب الربع.
| |
|
|
|
|
|
|
|
|
|
Re: دلوا كابس العتبة وختا النشال (Re: على احمد النعيم)
|
ضُهرالجمعة صليتو وقلبـ(ت) فوق تيسى
مربوط..ساسو غَالِق..فوتريت مو حميسى
تقديرى ومناى .......ومظنتى وقييسى
اهجمبو المسمح صورتو ....رب النيسى
--------------
قلبـ(ت) فوق تيسي: أسرجته
تيسي: الجمل والعرب احيانا يشبهون الجمل بالتيس اي فحل الصيد
ساسو : يعني اساسه
غالق: قوي ومتعافي (قافل)
فوترتيت: نوع من الذرة
حميسي: نوع من الذره قيمتها الغذائية أقل من الفوتريته
قييسي: قياسي
أهجمبو: أصل به إلى هذه الجميلة وقت الهجمة
| |
|
|
|
|
|
|
|
|
|
Re: دلوا كابس العتبة وختا النشال (Re: على احمد النعيم)
|
| Quote: وطلينا يوت اوعى من شراب الربع. |
ود النعيم صبحكم الله بالخير
أهلك العرب قالوا كترة الطلة بتمسخ خلق الله
وزر غبا تزدد حبا
لكن لأجلكم تشد الرحال ويبقى الغب محال
من اللايميب قام بى طايش
متل ديك الهضاليم المرايش
قطع دباى سرى وفات العرايش
تقول سكران يخب فى لجة دايش
| |
|
|
|
|
|
|
|
|
|
Re: دلوا كابس العتبة وختا النشال (Re: سمية الحسن طلحة)
|
Quote: قمز من شايتو بى دلعة وسراعة وعيد
قصدو اليوم يشوف الفوقو نخل الريد
الخلا الهرع ......يعمل جفيل الصيد
تقيل قدمو....ومشيهو ممايحة وسنيد
|
ربنا يعلى مقدارك يا اب حريره. وهاك اسمع دى:
للوزر المعاك الليلة ماك مرفق
وجات حالتك بلا الدغش البليبو يصفق
شن جابرك على الوكر الدبيبو يشفق
غير زولا وجيهو من الملاحه يدفق
عليك الله شوف خيال الناس ديل قدر ايش
| |
|
|
|
|
|
|
|
|
|
Re: دلوا كابس العتبة وختا النشال (Re: على احمد النعيم)
|
Quote: قمز من شايتو بى دلعه وسراعه وعيد
قصدو اليوم يشوف الفوقو نخل الريد
الخلا الهرع ......يعمل جفيل الصيد
تقيل قدمو....ومشيهو ممايحة وسنيد |
ود ابو حريرة
ود النعيم
ود المحرب
بت طلحة
ام احمد
الزبير
كنت مشغول وفتحت البوست ده وخلعنى الابيات الفوق ديل قت آخد لى فيهن جمة شوية واحكي ليكم الصورة الجميلة التى رسمها هذه البدوى عن هذا الجمل الاصهب .
قمز من شايتو ( الشاية الدقاقة المربوط فيها الجمل وتفوح من حولها رائحة خلوها لى براى وبراكم ما تحكوا بيها لاولاد البندر هم ما بحبوها لكن نحن ووووووووووووب منها تتغلل جوة انفاسنا زي ريحة الكبريت )
القمزة ( التقلقلة السريعة وبى همة )
بي دلعة ( الانسان الدالع هو السدرو ملان وبدين وعاجباهو رقبتو ساااااااااااى ونفسو تقول ليهو يا دنيا ما فيك الا انا زى ود المحرب الله يطول عمرو )
| Quote: تقيل قدمو....ومشيهو ممايحة وسنيد |
هنا وبس البيت جنني عدييييييييييييل
تقيل قدمو يعنى ( يمشى الهوينا كما يمشى الوجي الوحل) وممايحة وسنيد بتذكرني الجمل الشايل لو قراف مليانة ومن فوق ليهن شوال عيش مليان طاب لقرناتو مو شوالا مخلخل ) وجملنا ده يمشى مشية القيد حرن كية على المابين .
انا شغال لكن ما بتخلونى بتجيبوا لي البولع فيني النار ابطل الشغل واتفرج في محن الغنايين ديل .
تحياتي لكم كلكم بسلامتكم يا عولى
مع تحياتي لو بكار
وود العقيد
وجنى شنتير
| |
|
|
|
|
|
|
|
|
|
Re: دلوا كابس العتبة وختا النشال (Re: على احمد النعيم)
|
قال لي..ضارع الفَرَقَه المنّسَّلْ جدو
بوريك دِكة الضارب الشباب لاحدو
أكان تقدر على رسنى المريب شدو
بدرى الليلة عِِدُّو بمسكك في يدو
-----
ود النعيم
شفنا شاعر بيخاطب الجمل لكن هذه المرة الجمل يخاطب الشاعر...
ضارع الفرقة: وصف للجمل ولعل الوصف للسرعة
المنسل جدو: مأصل ومعروفين جدوده
بوريك: سأريك
دِكه: مضارب أو مسكن
الضارب الشباب لاحدو: يعني ماخدا البرنجية على البنات
البيت الأخير وعد من الجمل لصاحبه بانه سيوصله إلى محبوبته وقتا بدري شرط انو صاحبو يقدر علي ما يستصحب هذا الجري السريع من مخاطر..
| |
|
|
|
|
|
|
|
|
|
Re: دلوا كابس العتبة وختا النشال (Re: على احمد النعيم)
|
الشيخ عبدالعزيز :
خـرت العاصي وتـّر فوق جرانواتواتـا
بَشّــت دُومتـو خَـرَبتــّو القـلادة شَتـَاتا
الدرعَـــا الوضِــيبا يغـلـِّب المشّـاطـة
بدنِيهو الماهو أفس حَدبَات قِيافتو تلاتـة
أشـقا وصدرو موغريقان بعد مااتناطا
عرقوبو وحنوهــو دور قادِف النوّاتا
سُـراع إيديهــو مابردن تمَلـّي كلاته
واغِـل هَجمَـة اللمَاتـُــو بيهــو تلاتــة
| |
|
|
|
|
|
|
|
|
|
Re: دلوا كابس العتبة وختا النشال (Re: سمية الحسن طلحة)
|
Quote: خـرت العاصي وتـّر فوق جرانواتواتـا
بَشّــت دُومتـو خَـرَبتــّو القـلادة شَتـَاتا
الدرعَـــا الوضِــيبا يغـلـِّب المشّـاطـة
بدنِيهو الماهو أفس حَدبَات قِيافتو تلاتـة
|
شكرا بت طلحة على مرورك الكريم وعليك الله زيدى من غرفك من مطاميرك العامرة.
تحياتى،،،
| |
|
|
|
|
|
|
|
|
|
Re: دلوا كابس العتبة وختا النشال (Re: على احمد النعيم)
|
ود المُره والفايق ....جنا الشرّاد
قطع ايد الهواد ...المِقْدِرْ العرّاد
هجّام اب سلاحاً..... لى القلب هرّاد
جَمَع الصَي عليهو..وجاهو غير ميعاد
-----------
ود النعيم
شوف التنسيل ده حدو وين ؟ الجمل ده امه اسمها المُره وابوهو إسمو الفايق وجده اسمو الشرّاد..
لاحظ وصف السرعه "جمع الصي عليهو" ووصل إلى حيث يقصد قبل الموعد.. وربما من غير ميعاد أصلا بدليل الهجوم في المقطع الثالث...وبيني وبينك الأرجح أنو مافيش مواعيد أصلا لأن ثقافة المواعيد دي لم تكن موجودة في ذلك الزمان...
| |
|
|
|
|
|
|
|
|
|
Re: دلوا كابس العتبة وختا النشال (Re: على احمد النعيم)
|
Quote: ود المُره والفايق ....جنا الشرّاد
قطع ايد الهواد ...المِقْدِرْ العرّاد
هجّام اب سلاحاً..... لى القلب هرّاد
جَمَع الصَي عليهو..وجاهو غير ميعاد |
ود الحوري من كان سمينا ملجة
يبس دورو بالبركة ورقاد الدلجة
رقاد المراتب والبرش الضفيرتو العلجة
منو ابعدنا للكباشي بلد ام فلجة
هيييييييييييييييييع ود ابو حريرة
| |
|
|
|
|
|
|
|
|
|
Re: دلوا كابس العتبة وختا النشال (Re: على احمد النعيم)
|
يوم تلقاني فوق ضهر الجرايدو حديد
مابهددنا ضرب السوط وقطع الليد
أم شعراً مردّم وسيدا باقي عقيد
يوم بنجيبا لى الحافظ المجال موبليد
JJJJJJJJJJJJJJJJJJJJJJJJJJJJJJJJJJJJJJJJJJJJJJJJ
مالك قلبى جرحك بالوحيح عورتو
ومالك ياشقى البصر البنوم سهرتو
والضق هاجمو بالشانيتو باريا وترتو
لونو ولونو مشتول قيف ونابعة مترتو
ياسلااام ياود النعيم الناس ديل درسوهم البلاغة دى وين !؟
لونو : اللون
ولونو : الليونة
جناس تام وطباق بديييع .
تسلم يا الأخو .
| |
|
|
|
|
|
|
|
|
|
Re: دلوا كابس العتبة وختا النشال (Re: سمية الحسن طلحة)
|
ود شوراني - مسدار ابودليق
-----
يا الهَرَعْ الجفيلك طبعة ماك مسيوق
لِِْف من المبانى..دربنا عارق السوق
بُريب العَفَا ...المِن الزَوَّالْ مدروق
خلّّى زراق قفاك...فوق مُحجمك مدفوق
---------
الهرع: اسم الجمل
جفيلك طبعة ماك مسيوق: يعني ماشي بالدفع الذاتي دون ضرب بالسوط أو لكزه بي كراع الراكب على ظهر الجمل.
بريب العفا: صيد الخلا
من الزوال مدروق: مجافي ومبتعد عن المستعمرات السكانية واماكن تواجد البشر
زراق قفاك: مادة لونها اسود تخرج من مؤخرة راس الجمل
المحجم: مؤخرة رقبة الجمل.
| |
|
|
|
|
|
|
|
|
|
Re: دلوا كابس العتبة وختا النشال (Re: الطيب شيقوق)
|
| Quote: احمد اخوى الكلام ده غير |
الطيب
كيفنك؟؟
قصدك الشرح غير صحيح؟؟
Quote: تذكر ايام الرشاشية وقت القش يقوم جديد والبهائم تكد كدان بيحصل شنووووووووووووو؟
بالذات وكت الموليته تقوم والحمير يكدنها . |
تذكرت هذا المشهد لكنني لم استطع ربطه بي كلام ود شوراني الفوق ده
أرجو منك أستاذي ان تصوبني إن اخطات..
| |
|
|
|
|
|
|
|
|
|
Re: دلوا كابس العتبة وختا النشال (Re: Ahmed Yousif Abu Harira)
|
Quote: ياسلااام ياود النعيم الناس ديل درسوهم البلاغة دى وين !؟
|
على الطلاق يا بت طلحة دا الشئ المحيرنى فيهم
لأن بلاغتهم جد فاتت حد الخيال. واخبرنى الاخ احمد ان السواد العظم من شعراء البطانة الفحول اميون!!! ولكن لله فى خلقه شئون يا بت طلحة
| |
|
|
|
|
|
|
|
|
|
Re: دلوا كابس العتبة وختا النشال (Re: على احمد النعيم)
|
يا الهَرَعْ الجفيلك طبعة ماك مسيوق
لِِْف من المبانى..دربنا عارق السوق
بُريب العَفَا ...المِن الزَوَّالْ مدروق
خلّّى زراق قفاك...فوق مُحجمك مدفوق
-----
استاذ الطيب..
الشاعر عايز يقول في الجزء الأخير من المربوع ان الركض وراء هذه الجميلة التي تشبه الصيد البري قد جعلت العرق يتدفق من "دوماتك" حتى يصل إلى محاجمك دلالة على التعب..ومعروف أن العرق الذي تفرزه "دومات" الجمل لونه أسود وتفرزه غدتان في "دومات" الجمل اي مؤخرة رأسه يعني عند مربط الرسن والقلايد في أعلى عنق الجمل..طبعا هناك خلط واضح عندنا في السودان بين اللونين الأزرق والأسود...عشان كده تلقى في زول اسمه الأزرق والمقصود الأسود وليس الـ Blue .
| |
|
|
|
|
|
|
|
|
|
Re: دلوا كابس العتبة وختا النشال (Re: Ahmed Yousif Abu Harira)
|
Quote: ود المُره والفايق ....جنا الشرّاد
قطع ايد الهواد ...المِقْدِرْ العرّاد
هجّام اب سلاحاً..... لى القلب هرّاد
جَمَع الصَي عليهو..وجاهو غير ميعاد |
ود المرّة والشراد.. تِرِكتَ الفايق
حد راحتك كِمِل.. الكرامات الـ 3 وسايق
علي بلد الخدودة رتينة حظّها رايق
20 ميل تكيلِن في 8 دقايق..
ود شوراني برضو (باقي لي)
| |
|
|
|
|
|
|
|
|
|
Re: دلوا كابس العتبة وختا النشال (Re: على احمد النعيم)
|
اللصهب الماريق علُوقُو واكلو
والدرب البِهابنو الجُمال شركلو
دِريب الحِلة ما بتلملمو ويضحكلو
علي المتبورة ما برتالو ينعل شكلو
---------
من وِلِدتا مالقيت في الزمن مبدوع
عِجلك تُرُو فِج بي كُوعك المفدوع
مسك السِكة هِضليماً ختمنا بزوغ
طالب القرنو مِنّو بِدفِّق المجموع
----------
الكلام دا غنا كبابيش ..أهل البادية الغربية ..قلنا نديكم السلام ..
| |
|
|
|
|
|
|
|
|
|
Re: دلوا كابس العتبة وختا النشال (Re: Balla Musa)
|
خلّّى زراق قفاك...فوق مُحجمك مدفوق
-----
ــــــــــــــــــــــــــــــــــ
ودشيقوق عليك النبى تكرس ( تسكت )
ماتجيبلنا واحدتا مى أياها
والله أنا بقيت مما أشوف زوال بلة ود موسى
دا بخت إيدى فوق قلبى وأقول أن نعل مافى عوجة !؟
الشيخ عبد العزيز قال :ـ
بشت دومتو خربتو القلادة شتاتا
ــــــــــــــــــــــــــــــ
تذكار ال بقول لى أمو جانا حبيب
خلا حروت قماقمك ينترنو كبيب
النال حازمو والشق تحتو فيهو دبيب
ــــــــــــــــــــــــــــــ
أشرح يا أحمد ( قال مولبتة ) !!!
| |
|
|
|
|
|
|
|
|
|
Re: دلوا كابس العتبة وختا النشال (Re: سمية الحسن طلحة)
|
| Quote: طالب القرنو مِنّو بِدفِّق المجموع |
يا الله يا قيسان عشا الضيفان ذكرتنا يا الحبوب الضفائر التى تعبق بالخمر . وهاك اسمع دى يا قيسان واظنها من نفس البيئة:
عربا لينا قاموا وعكرولى صفاى
وحب الجاهلة اصبح فى القلب شواى
لوحة فاطرك وروبة قرنك النداى
مشيك سنيد وكفلك للهدم علاى
تسلم اخى قيسان وارجو ان توسع المكيال وتغرف لينا من تلك المطامير المليانة روائع وعليك الله امسكها من اعالى الهواد حتى مصبه ناثرا تلك الدرر التى قيلت وما اظنها ستتكرر.
تحياتى بلا حدود
| |
|
|
|
|
|
|
|
|
|
Re: دلوا كابس العتبة وختا النشال (Re: الطيب شيقوق)
|
| Quote: بضم الزاى وليس بفتحها |
حرررم آآآ الطيب دي بالغت فيها عديل ....
أريتك أكان خليتها علي الموليته
الشيء زولك العاشق الموهوم دا ما لقى يعبر عن شوقو لي محبوبتو التاعبه جملو ده إلا بوصف زراق جملو (بضم الزاي) ؟؟؟
وفي رأيك جملو بي حالتو دي بيوصلو ؟؟؟
--------------------
بله ....حررررم ما تقول شيء!!!
| |
|
|
|
|
|
|
|
|
|
Re: دلوا كابس العتبة وختا النشال (Re: الطيب شيقوق)
|
الله يضحك سنك يا شيخ الطيب
طيب اذا سلمنا جدلا أن الشاعر يقصد الزراق بضم الزاي ...باقي البيت ده بتودي وين؟
| Quote: خلّّى زراق قفاك...فوق مُحجمك مدفوق |
المُحجم دا شنو وبيقع وين من كلمتك المضمومة في أولها دي؟؟
| |
|
|
|
|
|
|
|
|
|
Re: دلوا كابس العتبة وختا النشال (Re: الطيب شيقوق)
|
| Quote: الزول ده جملو ماصع ومن ضنبو بجدع في دوماتو هييييييييييييييع |
طيب ما تقول لي كدي من قبيل...
قصدك يعني شغلتو دي كلها صقع جِره (ساااااااااااي) علي قولك؟؟
أكان كدي معليش ...لكن جمل زولك دا "سوبركاميل" السايب؟؟
------------
إنت قبيل قلت الملكة هي الوحيدة الفهمتك...بس نحن عايزين نعرف فهمتك يعني بمعنى انها متفقه مع ما ذهبت إليه من تفسير؟
مع إنو أنا متاكد 200% انك هجمتها في صمة خشمها ...لكن لا مانع برضو نسمع منها..
| |
|
|
|
|
|
|
|
|
|
Re: دلوا كابس العتبة وختا النشال (Re: Balla Musa)
|
| Quote: يالطيب عندى ليك هدية بيتين من شاعر شايقى بس منتظر تقول هاتن. |
بلة يا اخوى اكرم ابا حريرة واسكت مالك غلبك السكات
منتظر قول الشوايقة بس ما يكون القول المعاعو الصفقة والتسيككة بكرعيهم ماني زولهم طاااااااااااااااااب .
| |
|
|
|
|
|
|
|
|
|
Re: دلوا كابس العتبة وختا النشال (Re: الطيب شيقوق)
|
يا جماعة الطيب ده اتعبني وح يتعبني أكثر ....لأنو ح أضطر افتش كل اشعار الدوبيت الفيها الشعراء بيتكلمو عن زراق الدومات بفتح الزاي (ختيت لك القدرك يا الطيب زمنا ده كلو بنسمعها ونقراها بالفتح ات داير تجيبلها ضمه في آخر الزمن) دلالة على مشاركة الجمل وجدان الشاعر في التعب للوصول للحبيبة وهاك دي يا الطيب:
يا أب شنشون ...خبارك من الدهم بتزاول
بشيش دومك ......علي رسنك مسيلو جداول
علي انس الفي الفريق بي برا ما بتقاول
بوطيك حية الشق .......والهنيس العاول
------
الطيب لاحظ للبيت الثاني...
ما تقول لي الجمل ده زارق (جداول) علي رسنو
وبرجع لك تاني
قال بي ضم الزاي...قال
| |
|
|
|
|
|
|
|
|
|
Re: دلوا كابس العتبة وختا النشال (Re: Ahmed Yousif Abu Harira)
|
.......والهنيس العاول
لالالالالا انا خليني في البيت ده احمد اخوى الشاعر قاصد ( الانيس العاول ) ده حرم زى البوتوجاز والانيس ده لا ينمو الا في ارض حرة والبخات يقعوا ارض الانيس .
والله يا احمد اخوى لو شفت السمسم في ارض الانيس ووووووووووووووووب انا منو . انتم في البطانة محرمون من من السمسم آآآآآآآآآآآآه منو يا احمد اخوى ثفافتكم فيهو ما بتعجب انتم ناس عيش سااااااااااااى ومطامير .
| |
|
|
|
|
|
|
|
|
|
Re: دلوا كابس العتبة وختا النشال (Re: الطيب شيقوق)
|
ود النعيم
و ضيوفه الأكارم:
ود المحرب
العريبي ود شيقوق صاحب كتاب ( الشمار المدقوق )
أبوحريرة
الشاعرة سمية آل طلحة
و بقية العقد الفريد
الحديث عن هذه الكائنات الجميلة حديث ذو شجون، سيما
إذا جاء بأدوات ماضية مثل الشعر الذي إشتهرت به منطقة
البطانة و بقية البوادي في سوداننا الكبير.
آمل أن أتمكن أكثر من مزيد من الاطلاع على هذا الخيط
القيم، و إن أراد الله سوف تكون لي بعض الاسهامات فيه.
إلى ذلك الحين سأستمتع بشعركم و وصفكم و شروحاتكم أيضا.
ودادي الأكيد.
بوعسل أبوعسل
| |
|
|
|
|
|
|
|
|
|
Re: دلوا كابس العتبة وختا النشال (Re: ابوعسل السيد احمد)
|
شر البلية ما يضحك !!!!!!!!!!!!!!!!!!!!!!!!!!!!!
غايتو أنا كلام شيقوق دا مالقيت ليهو مثل غير
قصة مصيبة سمعتها من الشعراوى عليه رحمة الله
قال :ـ واحد ضرب أمه
قالوا ليهو ربنا قال كده حرام
قال ليهم لالا
ربنا قال ولا تقل لهما أف بس
لكن ما قال ما تضربوهم .
( يقولوا تيس يقول .......
( يقولوا زراق يقول.......
(يقولوا هنيس يقول .......
الله المستعان على السمسم والموليتة وال.........
| |
|
|
|
|
|
|
|
| |
على احمد النعيم
خالد المحرب
الطيب شيقوق
Ahmed Yousif Abu Harira
Balla Musa
عبد الله عقيد
gessan
ابوعسل السيد احمد
فيس بوك
تويتر
انستقرام
يوتيوب
بنتيريست