تضامنوا مع اسر ضحايانا (الفطايس) المضللين في حرب الجنوب!

(عدل بواسطة هشام هباني on 05-15-2007, 02:04 PM)

Quote: كنت فى القاهرة بكتب برنامج اسمه ( ربابات الاسى ) ضد الحرب ولمن لقيت لى فرصة قلت اوريك بعض تجاربى فى مناهضة الحرب ودى مجموعة من القصص عن الحرب واحدة منها ليك ولكل مناهضى الحرب وكل الماتوا بدون سبب الحال مايل الزول مذهول وحاير ، حتى التاهت فى درب كل الحاجات شايفا تلاتة تلاتة ، وامكن عشرة عشرة ، الجتة ميته ، بس الروح المامرقت من الوهن الكان عليها ، الروح مشتته ( كنت راجع من الحرب ، مدروش ، ما فى شيتا يبين انى مجروح لكنى مليان بالجروح ، من اولى لاخر نقطة فى جسمى ، فى الصباح كنت بقوم على صوت البروجى ، بنقيف صف للتمام ، الكل قرفان قرفا باين فى الصمت الكان لافينا ، وكان الصمت هو الكلام والقشة البتمسك بيها كل واحد فينا ، وبحاول يلقى اجابة على سؤال مرعب نحنا هنا ليه ؟معنى وجودنا شنو ؟ الاشواق الزى طعم الطين الناشف تتفتت لمن تكتر ، الحزن زى لون الارض لمن ما تمر عليها المطرة ، غبشا وناشفة ونازفة ، وما بتقدر تكون بدون حزن لانك ممكن تكون من دون اكل ، لكين من دون حزن ؟ حتعيش كيف ؟ كضاب لو قلت ما بتحزن ، والحزن بقى زى الضل ، ما بنقدر نفارقو ولا بنقدر نلمو علينا ، كل شى هنا زي الضل ، حتى روحك تحس بيها كده ، والاسئلة كل ما ليها زايدة ، متين دا كلو بنتهى ؟ وهل حيكون فى حساب للكان السبب ؟ ولا زى عوايدنا عفا الله عما سلف ؟ كنت كل يوم بسأل السؤال دا لنفسى ، منو المسئول عن مهانتنا ؟ وعن مذلتنا ؟ هنا ولا هناك ؟ لانى كنت كل يوم بتمنى اموت ، ما كنت حاسى انى عايش ، كل يوم تنزل دموع الاسى منى تخيط الخد الذابل بالملح ، وما فى غير الذكريات ، ذكريات مخبية فى جيوب الشنط ، ناس بتطلع لمن تفتح الشنطة ، عيون بتعاين ليك منتظرة اجابة ، بقينا نمرق كل يوم ذكريات واحد فينا ، كل واحد يتكلم معاها ، وواحدين كانو خلاص الذكريات كملت عندهن بقوا يألفوا ، ومع كده ما كنا حاسين بغرابة، لانه الواحد حتى لمن يألف ما هم ناسو ، اصحاب، اخوات ، اخوان ،القعدات الليلية ، تنسرق الحكايات تتنسب لى زول جديد ما مهم ، المهم انه الواحد يقول ، واحيانا بتحصل خصومات حول القصص : انت سرقت قصتى ، لا ديل ما اهلك ، ديل اهلى ، يا زول ما تلخبط ، العملت الحاجات دى امى ، وينوم معانا الاسى وعيونو مفتوحة ونازفة دموع القلب ، ما فى كلام غير فى الحرب ، عن الحرب ، وما فى حرب ، لاننا ما بنمرق الا فى الاوقات المحددة ، ما بنسمع صوت الحرب الا فى جوانا ، كنا معتقلين لاننا قلنا لا للحرب ،وعشمنا تنتهى الحرب ، نرجع لاهالينا ، نفتح لى عيون الشوف من الناس البعاد وحنان ، نرجع للقلب دقاتو كان ترجع ، ونفتح للسلام احضان كان صوت الرصاص يبعد ويسعد قلبى بالناس الشوفتن تفرح وترجع للربوع تدق طبول السلام

Quote: التحيه لمرشحنا هباني العنقالي وهو ينتبه لكل المعذبين من أبناء شعبنا....