|
|
|
 Re: هذا البوست برعاية دهـن الكركــار (Re: shiry)
|
هذا الكريم (يطري) جضومك استعمليه
والنتيجه النهائية خراب لا يمكن تلافيه ولا لتفه ولا غسيله ولا حتى النظر اليها الا بقلب مكدود وعيون يطير من الشرر .. .. وتجي امك داخلها ومن ورائها حبوبتك وانت عارفه (نقة ) حبوبتك . اذ تستلم موضوع ، انسي..
وتكتشف أمك ان توبها الذي لم تريه لجاراتها ولم يسمع به اخواتو وان ملاءتها التي تعبت كثيرا ولفت كل اسواق الشرق الاوسط حتى تجدها ، ان (كريمك الماسك) ودهن كركار حبوبتك ذاك قد (بشتنا) واصبحت لا تسوي بصله .. وساعتها سوف تجن جنونها _(وانت تعرفين ان المرأة السودانية .. تحب كنز اثنين الذهب عيار 21 والذهب الابيض المعروف بالتوب والملايات ..
وحبوبتك سترهقكم كلكم في فهم وجهة نظركم ان مافعلتيه كان حادث عن غير قصد .. ولن تنجحوا مهما فعلتوا من وساطات ولجان تحكيم في (ثنيها) عن رفع شكواها الى لجنة الاثار التابعة للامم المتحده وسوف تتحد سوية مع لجنة البحث المشكلة من اجل ايجاد (اثار) العراق ودهن كركار حبوبتك ..
وامك ايضا سوف لن تنسي لك ذلك أبداً ،وتفكر جديا في انتقام يفوق انتقام امريكا من الذين جعلوا 11 من سبتمبر علامة فارقة في التاريخ الانساني .. وبما انك صرت من (التخانة والمتانة ) بحيث انها لا تستطيع ان تغرز (اصابعها ) في شحمك ولحمك وتؤدبك مثلما تفعل كل الامهات . . فكان لابد لها ان تستدعي تدخل اخوك الاصغر منك شوية .. وبما انك تعرفين ان اخوك ذاك مغيوظ منك ومفقوعة مرارته من تصرفاتك الاخيرة . فانه سوف لن يتواني في احضار ما يعتبر في حقوق الانسان من (المؤذيات ـ والمفطسات والمشلخات) حتى يضربك ضربا مبرحا .. فينتهي وجهك (الكريمي) ذاك
الى فلقة هنا ، وشخطه هناك ، ومعيطة بي جاي ، وكدمات اسفل العين وشج في الحاجب) وشلخة كبيرة في الجضم ،عشان اخوانك لمن يتاغظوا منك يجوا يكوركوا ليك باسم (كومار ابو شخله) وتصيري مثلي تماما (كومار ابوشلخة) النسخه المجانيه مني ..ويروح جمال اسمك ونضارة وجهك (شمار في مرقه ) .. وياتعب السنين وضياع الكريمات التي لو امكننا جمعها لاحتجنا الى مساحة بحجم قاعدة السيلية بقطر ..
ويا تعب ابهاتنا التعبوهوا في شراء الخروف والسماية ..
شوفتي الحسادة بتاعتي وصلت لحدي وين ؟؟
..
اها ياشباب .. يدي وجعتني
زحوا الكاميرا دي شوية خلوني
النشرب لي شااااهي
| |
 
|
|
|
|
|
|
|
|
Re: هذا البوست برعاية دهـن الكركــار (Re: HOPELESS)
|
اختى شيرى
صدقينى
لو فى اتنين منك كانت منتجاتنا التجميليه
اتفوقت على انتاج فرنسا وانجلترا من مساحيق
تجميل ولكانت بروك شيلدز جعلت من الخرطوم محطه دائمه
لها ولو كانو فى اتنين منك لوجدنا جاكسون يطلخ بدهن
الكركار فى نص النهار ولو كانو فى اتنين منك لوجدنا نص بنات السودان مجاهدات
صدقينى متى ما وجدت نفسى تعبان حيران زهجان بجد نفسى دالف فى بوست من بوستاتك العجيبه والغريب فى الامر بطلع فرحان نشوان قولى لى من وين بتجيبى الكلام ده
| |
|
|
|
|
|
|
|
|
|
Re: هذا البوست برعاية دهـن الكركــار (Re: waleed500)
|
سلام مربع
وليد 500
وينك انت يامااااان
سمعتها كذلك عندي اخواني
عساك طيب
ليك مده ماباين
نقلبها سلام جوابات
واجابات موباليه
لاني حقيقي ماعارفه اقول ليك شنو؟
اووووووووووبس
توقف ياهذا لقد (كعوج) اطراءك كلماتي
سلمت ياسيدي للطله
وسلمت اكثر للاطراء
| |
|
|
|
|
|
|
|
|
|
Re: هذا البوست برعاية دهـن الكركــار (Re: كبسيبة)
|
ٍسلام مربع
كبسيبه
ومين سمعك !!
كلم ناس التلفزيون اول شيء يمنعوا
مثل هذه الدعايات التي تحبط عديل
كده ..
الواحدة تعمل ليك دعاية لشامبو وشعرها من ماولدوها بتقصوا
كل اسبوع ولونها مهما اكلت من كمونيه
يظل محافظا على نضارته
وياحسره علينا نحن
الواحده لو (سرحت) شعرها ساكت كل اسبوع او غسلتو
يتمعط سبيبه سبيبه
ويخبرونك ان هذا الشامبو
يطول شعرك ويقويه
دا كلام دا
| |
|
|
|
|
|
|
|
|
|
Re: هذا البوست برعاية دهـن الكركــار (Re: shiry)
|
شيري العسل
انتي عارفة اجمل شي مع شعرنا السوداني العجيب هو المشاط
المشاط بيدي جمال وجذب غير عادي
حتى ان بنات الغرب بقن يتصلبتن فيهو وانت جاريات للتسريحات العجيبة
التي لا تناسب شعرنا الذي صمم خصيصا للوجه الاسمر الجميل
| |
|
|
|
|
|
|
|
|
|
Re: هذا البوست برعاية دهـن الكركــار (Re: كبسيبة)
|
سلام مربع
يا كبسيبه يا اخوي
نحن لا تسريحة كاري
ولا افروو
ولا حتى المشاط
ينفع مع هذه (الدومات) التي تعتلي رؤوسنا
الا ان نتوكل على الحي الذي لا يموت
ونجيب (قماش) تيل قوي
ثم نربط به هذه الدومه
ولا من شاف ولا من دري
| |
|
|
|
|
|
|
|
|
|
Re: هذا البوست برعاية دهـن الكركــار (Re: shiry)
|
شيري
تحيات طيبات لك وللآخرين
بوستاتك تذكرني بشخص كان يقف أمام القسم المخصص للصحــف -الحائطيةعلى أيامنا - في مقهى النشاط بجامعة الخرطوم ، ويجتمع حوله بعض المشاغبون فيكونون حلقة نقاش ، زيها زي حلقة الجمهوريين أو غيرهم ، وهذا الشخص كان يتحدث عن أنشتاين ، وكارل ماركس وافلاطون ونظرية النسبية ونظرية كذا وكذا ، وبشكل غير مرتب ، فيسميه الناس مجنونا ، لكنه على كل حال لا يعدم من يستمع إليه ويطرح له أفكارا تعينه على الاستمرار في النقاش ، فأصبح جزءا من مقهى النشاط وأحد نكهاته ،ربما أكون من الذين لا يستطيعون التجميع وبالتالي فإني لا أفهم تفاصيل ما تكتبين لكني استمتع بها وأنا أقرؤها كما أفهم هدفك النهائي ، ومن هنا و رغما عن أني دائما أجد ذلك الشخص يقفز إلى مخيلتي عند رؤية أي بوست لك إلا أنني ظللت متابعا . وقد سماها بعض الزملاء هترشة وأنا أعتقد أن هترشة مثل هذه جديرة بأن تتابع ، سأزور مقهى النشاط وأرى إن كنت تجلسين هناك وتديرين ركنا للنقاش
| |
|
|
|
|
|
|
|
|
|
Re: هذا البوست برعاية دهـن الكركــار (Re: ودقاسم)
|
ٍسلام مربع
ود قاسم
الحمد الله انه كان شخص
وانا شخصه
اقصدانا شيري بت ام شيري
تلك الايام قد ولت ساعة ان كنتم تجلسون في النشاط او تسيرون في اتجاه الداون تاون وفي ايديكم كاسات الشاي
دون ان يجرؤ (بودي قارد) ان يمنعك من الدخول من بوابة النشاط
او يزحك من طريقه لانك قلت كلاما لم يعجبه
مثل هذه النشاطات التي كنتم تستعمون لها وانت في امن وامان
ولت ايامها ولم تعد في النشاط لا نشاط ولا يحزنون
انما سيخ ، وعلب ملتوف
وعصي ..
ونساء بودقاردات يمنعن الدخول الا بملابس رسميه
..
لن تتعرف في النشاط على ذاك (الطالب) المجنتر
لانهم حبسوه بتهمة الاسقاط والرمزيه
شفت .؟؟
الم اقل لك ان تلك الايام ولت
وانا لست ذاك الشخص
سلمت للطله وسلمت ا كثر للاطراء
| |
|
|
|
|
|
|
|
|
|
Re: هذا البوست برعاية دهـن الكركــار (Re: Abdel Aati)
|
سلام مربع
استاذ عادل عبد العاطي
عين مين ياعم؟
من ينظر الى هذه المجنتره او حتى تشغله ماتقول من هترشااااات
لاني باكل جزر وبحلي بالخيار
وشاي حليب بالقرفه
هل شربت شاي لبن مقنن على (برمه) جااااياك مخصوص
من (بارا) ثم تضع على ذلك اللبن المقنن قرفه؟
مافيش عوجه تب .. طالما ان اللبن المقنن موجود
سلمت ياسيدي للطله وسلمت اكثر للاطراء
وربنا يخليك ياسيدي
| |
|
|
|
|
|
|
|
|
|
Re: هذا البوست برعاية دهـن الكركــار (Re: shiry)
|
شيري بت ام شيري
تضحك الملكى واللابس الميري
والله ضحكت مل شدقى
والشدقين ديل وين بالمناسبة.
بقيت بضحك قدام المراية وبفتش فى الشدقين ولاممكن العرب
زمان عندهم حاجات ماقامت لينا لسع
المهم النصائح غالية نحن بطرفنا نتولى امر الفازلين
وعليكن بالكركار فانه ينفع فى الجو الحار
شفت شعر البنات الفى الدعاية سلسبيل بس
سلسبيل يعنى شنو
واصلى فى دعاياتك برعاية شيري بت ام شيري
او كما قيل
| |
|
|
|
|
|
|
|
|
|
Re: هذا البوست برعاية دهـن الكركــار (Re: zumrawi)
|
شيرى العسل
قومى غسلى الملاية والثوب،لكن المخدة اقنعوا منها،انتى ما عارفة دهن الكركار دة سلاح دمار شامل؟؟؟؟؟عشان كدة لازم تعدموه من البيت،وتجيبوا كريمات ناعمة وحنينة،قبال ماما امريكا توريكم الما بشبه
متعك الله بالعافية
تحياتى
| |
|
|
|
|
|
|
|
|
|
Re: هذا البوست برعاية دهـن الكركــار (Re: مهيرة)
|
سلام مربع
دكتورة مهيره
وين ياطيبه .؟؟ موش السيرلانكيه بتاعتهم غسلتهم بالكرولكس
وخلتهم كلهم قطعه واحد من حيث اللون
والشكل
وحتى الان تقول الاخبار والشمارات التي وصلتني منهم
ان (ام قريدون) صديقتي هذه
قد تلقت اكثر من قرصه زكيه وفلقه مدروسه بعنايه
ورصيع بالجمله .. قد تركت وشها مثل وزارة الاعلام العراقيه
والله يكون في عونها
وشكيتو على الله زيت الكركار وما فعله في ام قريدون
سلمت ياطيبه للطله
| |
|
|
|
|
|
|
|
|
|
Re: هذا البوست برعاية دهـن الكركــار (Re: zumrawi)
|
سلام مربع
زمراوي
قيل في افتتاحيه جريدة (اخبار اليوم) التي تصدرها قبيلة خزاعة
التي اتلصقت مابين قبليتي
ثقيف ، وحلبجه
في العهد الجاهلي
ان العرب تقول ضحك ملئ شدقيه وتعني
انه تضاحك مثل نار القصب
حيث ان نار القصب هذه ذكرها اهل العوض
في المستطاب في الكلام المستعرب
قالوا ان فلان يتكشب اي انه يضحك حتى تبان اسنانه
وكذلك سار على نهجهم الهمباته وعيال شماسه
كنا نقول ان العرب تقول شدقيه ويعنون
شدقيه والمعني اظنه واضح
اما سلسبيل فاني بحثت عنها على كافة الاصعدة والمحاور
وغلبتني الحيلة ، لكني ارجح قول السيرلانيكيه اذ هي تجاورني الان وتفاصحني في ايجاد صيغة تفاهم وتعايش بيننا
وقالت ان سلسيبل هي عين في الجنه
والله اعلم
اما الفازلين فانا لا اعلم عنه كثير اذ انني من جيل ماعاد يقتنع الا بما تعرضه مجلات سيدتي وقدريشونها
حيث ان الشمار الكريماتي واخباره تكثر عندهم وبكثره
والله يعينك
| |
|
|
|
|
|
|
|
|
 Re: هذا البوست برعاية دهـن الكركــار (Re: shiry)
|
العزيزه شيري
ضحكتيني وفرقتي علئ الزهجه , اصلوا بيني وبينك
الليله الويك اند , يوم فلقه الدماغ
قلت النأخد لي خمسه أو عشره دقايق كده في البورد
اهرب بيها من المطبخ
انتي عارفه شعرنا المهبب ده الا الكركار البهبطوا
في قعر الواطه
بس بنتي زات الأربع سنوات عندها الدنيا دي كلها كوم
والكركار كوم تاني
وكمان الفلهمه العليها .. دايرا تفك شعرها
ذي كارولينا المعاها في الروضه
اها دي يقنهوها كيفن
ليك التحيه يا غاليه
زهره
| |
|
|
|
|
|
|
|
|
|
Re: هذا البوست برعاية دهـن الكركــار (Re: shiry)
|
يا شيري
لا يكفي أن تكتبي مثل هذه الكتابات الرائعة كيفما اتفق ثم تمضي
هل جربتي كتابة القصص القصيرة
أظن أن لديك القدرة على كتابة القصة وارجو حقيقة أن تتعاملي معها بالجدية الكاملة
مش كدة يا يحي فضل الله وتماضر وحسن الجزولي ومصطفى مدثر وابكر أدم اسماعيل؟
فيصل محمد صالح
| |
|
|
|
|
|
|
|
|
|
Re: هذا البوست برعاية دهـن الكركــار (Re: Habib_bldo)
|
العزيزة شيرى
سلام
رغم انى لم احضر عهد الركشة ولكنى اعلم انها ممنوعة من عبور الكبارى يعنى كيف انتى تقولى الركشة فى وسط كبرى امدرمان ؟؟؟ انتى مالك عاوزة تحيرينى وتلخبطى معلوماتى كلها ..
الكمونية وعرفناها
الكركار مالك عليه بس عاوزة تشمتى فيه الاعادى
تعرفى ده لو لقى شوية دعاية ثم تعبئة ظريفة ومبهرة حايخترق الارقام القياسية فى المبيعات ويبقى سيد الموقف فى عالم التجميل وبلا منازع ..
لك تحياتى ولى قدام يا ستى
| |
|
|
|
|
|
|
|
|
|
Re: هذا البوست برعاية دهـن الكركــار (Re: قرشـــو)
|
ٍسلام مربع
العمده قرشو
لا بلاش ياعم .. نحن عندنا اشغال تانيه
غير غسيل الملايات وتفريشها
ومراعاة حالتها الطبيعيه وجمالها
وموش فايضين لاي (خربطه) في الجدول اليومي
واعباء (وظيفيه) جديده في البيت كفاية علينا
غسيل الكمونيه التي مسخت من كترة غسيلنا لها
امي ان سمعتك سوف تطلق(حملة تسويقيه) جديده له ، وتشيل يدها من
فاتورة كريماتي ، وتحيلني الى دهن الكركار هذا
وانا موش فاضيه عشان اشيل معاي (منشفه) بحجم الملاية
لازالة اثار وسيلان هذا الدهان
الذي قالت عنه زهره
انه من اسلحة الدمار الشامل
انا قلت وجودها ، ولم اقل انها تمشي عينيك ياتاجر في كبري امدرمان
ومع ذلك كثيرا ما عبرت االكباري التلاثة
بالضحاكات والقنزب هناك في بلد
المليون رئيس كل شي ممكن
سلمت ياعمده للطله
| |
|
|
|
|
|
|
|
|
|
Re: هذا البوست برعاية دهـن الكركــار (Re: Raja)
|
ٍسلام مربع
راجا
طيب ايه رايك
في ملاح الكمونيه
؟
اصلو العمده كون جمعية لحماية
جماعة الكمونيه من الانقراض
وانا كونت جمعيه لمقاطعة ذبح الخراف من اجل
الكمونيه فقط
ايه رايك تنضم الى ايتها جمعيه
| |
|
|
|
|
|
|
|
|
|
Re: هذا البوست برعاية دهـن الكركــار (Re: shiry)
|
شيري
جمعية حماية الخراف أنا معاها لأنه نظريتي ان الانسان يذبح الخراف لأنها أضعف منه فلماذا لا يجرب ذبح الأسود؟؟
أعشق الكمونية.. لكن نجيبها كيف دي المشكلة، بالمناسبة يا ريت تضوقي الكمونية بطريقة الحبش او الاريتريين..ز
حاجة تانية خالص
شيري، الله يجازي شيطانك فتحتي لينا عوالم كنت اظن نفسي بعيدة عنها
رجاء العباسي
| |
|
|
|
|
|
|
|
|
|
Re: هذا البوست برعاية دهـن الكركــار (Re: Raja)
|
سلام مربع
سلام
رجاء العباسي
اولا كيفك .. اصلك ليك مده مختفيه عن الكتابة الصحفيه
تاني شيء ياستي تعمل الكمونيه بطرق كثيرها والنهاية
هي كمونيه
تفضل الواحده(مننا) تشيل وتغسل فيها لمن يتغير لون الكمونيه
ويتغير لون ايدينها
ويبقى السؤال كالاتي
هل هذا الطعم او هذه الشهوانيه الكمونياتيه
تستاهل كل هذا التعب
عن نفسي
كلا والف لع
ايه رايك تجربي تأكلي عدس
او شوربة العدس دون ماجي
الله يقطع ماجي وسنينها
اما (الشطه) الخضراء المدقوقه بالفندق دقااااقه ومخلوطه بالاتي والليمون .. اكيد
تستاهل انك تضيعي كل وقتك في عملها وفي انتظارها واكلها
انشاء الله حتى لو بالكنافه
شوفتي ليك حد اكل الشطه بالكنافه
السيرلانكيه فعلتها ذات مره
ثم كتلها شمار الحلو مر
فشربته بعد ان اكلت ملاح السبروك
وخلصت الى ان السودانيين (مره)بتاعيين (جنجال
سلمت ياستي للطله
| |
|
|
|
|
|
|
|
|
|
Re: هذا البوست برعاية دهـن الكركــار (Re: shiry)
|
بسم الله الرحمن الرحيم
شيري وعين الله ترعاكي
سلام وخوف على المرارة
مع ان كل الذين اعرفهم لا علاقة البته بين اسماؤهم واشكالهم
تقصدي شنو يعني؟ ما تقوليها عديل كدا
إنتي البوست دا إندفق منك ولا شنو؟ شايفو ملأ البورد كله
هسع دي حالتا شافت ليها دعاية شامبو يعني كان حضرت برنامج شاهد على العصر ولا أسماء في حياتنا إلاّ تفوتوا ليها البورد دا
| |
|
|
|
|
|
|
|
|
|
Re: هذا البوست برعاية دهـن الكركــار (Re: shiry)
|
الأخت شيري
لن أكون إستثناء ، ضكحت من أعماقي كما حدث لكل المشاركين
نؤيد رأي الأستاذ الصحفي فيصل محمد صالح ، وأعتقد الكثيرين قد أبدوا هذه الملاحظات من قبل.
ملحوظة زغننة كده
جلبت ليك من بلادالله البعيدة
صنوف من الوجد .. المُلِحْ
قلت ألقاك بالسّمح
درت ألقاك فى السّمح
كنت اصطاد فى الظهيرة
من مناقير الكنار
الكلام لعاطف خيري
هذه الكلمات للشاعر خطاب حسن أحمد، وكما هو معروف فهو شاعر أغنية
البت الحديقة
مع خالص التحايا
رحمابي
| |
|
|
|
|
|
|
|
|
|
Re: هذا البوست برعاية دهـن الكركــار (Re: AlRa7mabi)
|
ٍسلام مربع
مع ان في ناس (هنا) اعرفهم ليس لاسمائهم علاقة مباشرة او غير مباشرة بما يضعون من صور على شمال المتصفح للانترنت ومع ان (نفس ) هؤلاء الناس الذين اشوفهم هنا ، ربما يكونوا متسلبطين في صور (امورات) حلوات لا يشبونهم ومع ذلك فوتناها وسميتها رضينه ..
اها .. مالو هسع (ملاح) الروب ، لوموا لي ..
ماذا فعل الخروف حتى يعملوا فيهو كل هذه العمائل ..راسو وسلقوهو ثم اكلوهو ..
كرعين كسروهم لمن اتحتحتوا حتة حته، وقلنا مالو . اهو كرعين كانن حوامات اهو اتأدبن واتغسلن
كبده ونجضناها ..
وياسلام على ابدمام لمن يشوي على الجمر .. والشطه الخضراء التلهلب ديك
لكن ان نعمل في كرشة تلك الخرفان ونفشفش فشفاشها حتى تنهرد .. هذا ما لا يصح
يعني عايزين تقنعوني انو الخروف بكل طولوا دا ، اكلتوا كلو ، حبكت انكم تقبلوا على الكمونيه بتاعته
طيب ما تاكلوا (جلد) الخروف اهو الوحيد الفضل منو ؟
ابو صفاء
سلام مربع
يسعدني كثيرا ان اسمع هذا الكلام منك ومن الاستاذ فيصل
وسلمت ياسيدي للاطراء . وربنا يخليكم لينا استاذة لنا .. ترفعون معنوياتنا ..
شكرا للتصحيح ، يمكن لاني كنت معقلة مع اغنية شهيق ..
سوف اعود لتصحيحها .. سلمت ياسيدي
| |
|
|
|
|
|
|
|
|
|
Re: هذا البوست برعاية دهـن الكركــار (Re: shiry)
|
مساءكم منجة
ولأن امامي كيمان من العمل ما قادرة عليها
ولأن الحكمة تقول لا تؤجل عمل اليوم إلى الغد بس ممكن بعد بكرة تعمله
دعيني يا شيري اشاركك بهذه الخبرة المحدودة
عزيزتي الأم (ما عارفة ليه الأم بالذات)
سنخبرك الآن كيف تصنعي دهن الكركار
اضبحوا خروف،،، نصيحة
لانك لو استخدمت الشحم الذي يباع في السوق ،، فستجدينه ماسخاً وناشفاً لانه تحت تحت قالوا ان التجار يزيدونه ملحا فينتفش فيزيد حجما وبالتالي سعراً
تستخدمينه وأنت واثقة من تأثيرة الجميل ومع ذلك يظل رأسك (كدوية) هو هو كما قبل التجلبط كما بعده ، بسبب غش التجار الله لا اداهم عافية
لكن الشحم الذي ستستخرجينه من خروفك لحمك ودمك،،أكثر ضماناً بالطبع
ضعي بعض القرنفل (ينبغي ان اذكر هذه الفايدة في بوست أهل العوض) بلي قليل من القرنفل في موية مع زيت (مجموع) اعتقد،، كما يمكنك إضافة بعض قشر البرتقال المبشور عسى تقوم ليك شجرة في راسك،، اقصد للنكهة أو الرائحة هو ماشين ياكلوا اصلو
قليل من المحلب المدقوق مغربل وضعي هذا الخليط في الكورة مغطى لبضعة أيام حبذا لو استمرت اسبوعا فكلما تخمرت هذه الخلطة كلما زادت الرائحة الجميلة وكلما ازدادت الفايدة وعم (دقنوسك) الجمال
بعدين سيجي الودك أو شحم الخروف وضعي عليه هذا الخليط وفي الموضوع في زيت سمسم ما عارفة وين مكانه ،، ثم ضعي هذا الخليط الذي سيكتسب رائحة المجموع والقرنفل المميزة في البرطمان وتمسحي لااامن يغفر الله لكي
وبعد اسبوع اطلبي من طفلك الصغير تسلق راسك والوقوف في اضانك عساه يشوف الشعر الذي من أجله قمت باختراع هذا الكركار ذو الرائحة النفاذة
وبعيداً عن التريقة،، صديقتي التي هاجسها الأساسي الكريمات،، وصت على كريم تحاكن عنه النسوان ونسوان النسوان من ماليزيا اعتقد، يقوم بتفتيح اللون ويسمح البقع ولا اجدع سنر بوهية،، فالسودانية تظن أن اللون الأسمر هذا ، دخيل ،، تماما كتلوين بقع بوهية بنية في الحيطة البيضاء أي ليس طبيعة لكنه تدخل الحر والشمس السافر
المهم بعد التعب والإرهاق وسهر الليالي والتفكير في الكريم الماليزي ذوي الخصائص اللاعادية
اتوا لها بعلبة صغيرة تشبه حقق الحبوبات،، وتكوني اتقطعت لو عرفتي الحقة دي،، وقد كانت هذه الحقة غالية السعر كمان رغم صغرها
لما تفتحيها تضربك ريحة ودكنا الصافي يا هو زااااتو ،، مما يجعل لديك الرغبة القوية في سب الماليزين وهذا الإرهاق العظيم الذي اصابك مع صديقتك في البحث عنه
وتقول لي اعلانات التلفزيون وتلك النسوة ذوي الشعور الحبالية؟؟
الغريبة يا شيري لما يجيبوا ليك واحدة زعلانة لانه شعرها متقصف قبل استخدام الشامبو الدعاية،، بكون شعرها احسن من نصف شعور بنات بلدنا مجتمعات ، الحالة قبل الشامبو
لكن لضمان استقرارك العاطفي،، فانصحك ما تتابعي الدعايات دي بتجيب ليك حمى نفاس
نهايته
الكركار اختراع كويس والله حتى برائحته النفاذة ،، المشكلة أن السودانية تزيد في استعماله حتى تمسخها وتوسخ الملايات
لكنه لو استخدم باعتدال ، فلا احسن ولا افضل منه لطبيعة الشعر السوداني المنتف
دمتي يا شيري يا جميلة
بوستاتك لها طعم مميز ادركه
خصوصاً مع قلم رصاصك
سلمتي
| |
|
|
|
|
|
|
|
|
|
Re: هذا البوست برعاية دهـن الكركــار (Re: shiry)
|
العزيزة شيري
سلام مثلث
والله قريت هترشاتك لما اتهترشت
وفعلا يعيش الكركار اللي يحول شعر السودانيات الليفي الطابع الى حرير
بس ما قلتي لينا سر الكريم البشربوا البنات مع شاي الصباح وبيخلي الواحدة متوحدة اللون دون ذلك التباين الواضح ما بين اليد والوجه
حيرونا بنات السودان في اختراعاتهم الفاتت الحد
تسلمي عزيزتي
| |
|
|
|
|
|
|
|
|
|
Re: هذا البوست برعاية دهـن الكركــار (Re: shiry)
|
شيري العسل
لقيت موضوع الكمونية ده جرا لحاجات حلوة زي الشطة المدقوقةشديييد ، بالمناسبة انا لست كييفة اكل كمونيات ومرارات.. انا يا دووب آكل الدمعة بتاعتها أو الشطة بتاعت المرارة، شفتي الخيابة دي؟؟!! لكن بحب آكل الملوخية بأي طريقة لو بلحم خروف أو لحم زول عديل كده، فالملوخية لا تقاوم سواء بالدمعة أو مفروكة أو.. أو.. الخ من الطرق الجميلة التي تطبخ بها
أها رأيك شنو؟
شكرا لمتابعتك عملي وفعلا انا الفترة الفاتت كنت مقصرة لكن أوعدك انك تشوفي شغلى كل يوم خلال الاسبوع الجاي
رجاء
| |
|
|
|
|
|
|
|
|
|
Re: هذا البوست برعاية دهـن الكركــار (Re: shiry)
|
انا جيت متاخرة
والناس كلهم قالوا يا مبدعة
اقول شنو ما هى مبدعة جدا
شيرى انت مبدعة حقيقية
قلت لى تتخيلى اسمك هـالة؟؟؟شرفتى لينا الاسم
لكن انا من زما ن يراودنى سؤال كيف فكرت اول حبوبة لنا فى كل من الحلو المر والدلكة والخمرة والى حد ما الكركار
فى زول عنده اجابة
| |
|
|
|
|
|
|
|
|
|
Re: هذا البوست برعاية دهـن الكركــار (Re: hala guta)
|
سلام مربع
اسفه لتاخري في الرد .. لتدخلي لفض الاشتباكات القائمه
مابين ام قريدون وحبوبتها بعد ان اضاعت الاخيره
اطنان من دهن الكركار شمار في مرقه
..
سلمتم كلكم للطله وسلمتم اكثر للكلام الطيب الذي تحدثتم به عني ..وربنا يخليكم لي
بت قضيم حبية البي
حمد الله على السلامه ياستي ، وبركه الشفناك شديده .. الجيتي منهم ..كيفنهن ..
تعالي انسعلك (التوليفة) الكركاريه دي ادوك ليها ناس سودانير ولا جبتيها من ناس العرس .. انت مشيتي تشوفي العروس ولا تصنقري جنب النسيونات البسون الدهن ويدقن الريحه ..
دا موضوع داير ليهو دبل ويك اند عشان نلقط منك فيهو شمارتو ..
راجعة ليك انتظري نهاية الحلقة ..ما تمشي
الكلاكله صنقعت
سلمت ياسيدي للطله ... كدي بالله اسال لي الصيدلي البلقاني دا بعرف خطيب ام قريدون صاحبتي ..عشان ترسل لينا الكريمات اقصد ترسل ليها براها ..اصلي انا متكفيه من الكريمات .. شفت القناعة دي
منعمشوف
بالله كيف كنتو بتقدروا تمشوا (بيهو) في شوارع الخرطوم وامدرمان المليانه غبار وكتاحه ديك ..
يتخيل لي (الغبشه) احسن مليون في الميه من (الدهن) المنزنز بكميات من التراب ، والشعرب يعلوهو غبار مثل شجر الصبار
سلمت ياسيدي للطله وسلمت اكثر للاطراء .. وحكاية القصص القصيرة دي ، مشروع لم يأتي اوانه بعد .. افتكر ان الكثير ينقصني حتى اكون تلك (النكهة) المتميزة التي تحدث عنها .وهذه يلزمها كثير من الصبر والجهد والوقت .. وانا عاااااايزه اعيش واهترش
مايا
دقيقة دقيقة .. اقيفن يابنات . مايا دي الليلة جابت ليها كلام
قلت لي البنوت بقن يسون شنو ؟ شراب ؟؟
دي جديده والله .. التركيبه دي ؟ من دربي دا .. ماشه اتصل على السودان .. يظهر انو ناسنا الهناك عملوا لينا (حمد لبد) بالتركيبات الجديده .. كدي النقوم نشد السلك لي ام قريدون .. واحدثها بحديثك دا .. اكان اعرف اطلع لي منها شوية (ريالات) لزوم البشاره
سلمت يامايا . وانا في انتظار هذه ا(الوصفه) الشربه . البلقاها قبل اختها ، تكلمها بيها .. اتفقنا .
AbuAla
سلمت ياسيدي للطله وسلمت اكثر للاطراء .
وربنا يخليك ويجعل كل ايامك (سعادة)
انسانه
اولا حمد الله على السلامه ، ليك مده ماباينه .
ولا يكون انا الموش باينه ؟ .. كيفك
قلت لي جريتي جري لموقع الكريمات السودانيه .. مفروض تجري لي باب شريف
حيث تجدين هناك ان من البائعين وحتى (العيال السريحه) الذين يحملون العراريق يمكنه ان يشرح لك كيف
تصنعين دهن الكركار باسرع طريقه ، او يدلك على طريقه اخرى للاستفادة من (السمك الميت) المعروف بالضفره او كيف يمكنك ان تزيدي مقدرات (ريحتك) القديمه دون ان تخسري درجة واحدة من عتقها) ..
في باب شريف يمكنك ان تعرفي كل اسرار الجمال السوداني .. دون ان تضطري للسفر للسودان
ود العباسيه
سلمت ياسيدي للطله وسلمت اكثر للاطراء
وانا جزء صغير من تركيبة مجتمع مبدع بالفطره ..انت منهم بهذا الزوق العالي الذي تحدثت به
سلمت ياسيدي
هاله قوته
اهلين (سمي) . والاسمها راكب علي شوكه وسنكات . مع اني اجهل ماهي هذه السنكات .. لكن اعرف متى تقال ..
اما هذه السنكات لا اعرف من هو اول من ركبها في جمله مفهومه ..
والله الحلو مر ، دا قصتو غريبة ، وعجيبه ..
لكن الاغرب والاعجب منو يتخيل كده دهن الخمره والدلكه ..
رغم انه مكلف جدا ، ومتعب ومرهق ، لكن مازلن الحبوبات والامهات وحتى المتزوجات حديثا ، يصررن على تعاطيه بل صناعته ؟.
رغم توفر الروائح الباريسيه التي تتعدد نكهاتها وطعمها ،
مع ذلك هو (تميز) لنا من بين كل الشعوب .. حتى شعوب الهند والسند ..
| |
|
|
|
|
|
|
|
|
|
Re: هذا البوست برعاية دهـن الكركــار (Re: shiry)
|
ومازال رأسي يدور مع ساقية شيري ..
إن الكريمات الصناعية تضر بحصة الجلد يا آنسة شيري ..
وأنصح الفتيات بعد الميول لاستخدام كريم ديانا وأي كريم تشويه بشرة ..
نعم أسميه كريم تشويه البشرة لأنه يشوه اللون الطبيعي ..
ما جرني لهذا البوست هو كلمة الكركار .. والتي لا يعرفها إلا الشطار .. وقد كانت الحبوبات تضفي عليه سحر نكهة قشر البرتقال .. والآن أصبح ينكه بعود الصندل ..
ولكن عرفت أن كلمة الكركار كانت الطعم لإيقاعي في الشيمة الدوارة لبوست الأخت شيري .. ومازال رأسي يدور ويدور ..
تحياتي ..
جـــاد
| |
|
|
|
|
|
|
|
|
|
Re: هذا البوست برعاية دهـن الكركــار (Re: shiry)
|
شيري
السلام مليون
قريت كلام فيصل صالح ولا شئ الا ان تكوني هناك الحظة
نفسي ومني عيني زي ما بقولو اولاد بمبا
اعرف انت بتجيبي الكلام دا من وين
الله يدينا خيرك
ويديك العافية
ودايما بوستاتك ما بادخلها الا وقدامي القهوة ما عارف ليه
سلام
عبدالله جعفر
| |
|
|
|
|
|
|
|
|
|
Re: هذا البوست برعاية دهـن الكركــار (Re: Abdalla Gaafar)
|
جاد
سلامة راسك من الدوران .. واتجازي انا وهترشتي معاي كمان اذ جعلتك تلف بحثا عن (كركار) ..
هل تعرف ان غالبيه النساء يعرفن الفرق جيدا بين ان تكون امراة متعافيه سليمة الدواخل وطبيعيه الجلد،
وان تكوني امراة فقط تهتم بقشرتها الصناعية .
يعرفن جيدا ان المقارنه اصلا غير ممكنة . ومع ذلك تهتم ان تكون في الجانب الذي يهتم بقشرته الصناعية على حساب عافيته ..
من اجل ان تكون جميله صناعية ..
سلمت ياسيدي للطله .
سلام مربع
عبد الله جعفر
ابي ايضا كثيرا ما يقول ذلك . ما ان يجلس في غرفتي ليعرف اخباري ، الا وطلب عشرة وثلاثين قهوة دون ان نضع اعتبارات للكاسات الشاي ..
اذ تظل هترشاتي تجيبه من عالم وتدخله عالم اخر .. حتى ينااااااام ..
ومع ذلك على الدوام يرغب في هترشتي .. رغم مؤشرات الضغط العاليه التي تجلبه له ..
ماعارفه ليه .. يمكن لانو ابوي مستحملني ..
سلمت ياسيدي للطله وسلمت اكثر للاطراء .
| |
|
|
|
|
|
|
|
|
|
Re: هذا البوست برعاية دهـن الكركــار (Re: shiry)
|
عزيزتي شيري ..
في الحقيقة يا شيري ليس بحثاً عن الكركار لكن بحثاً عن الشمار ..
وتحياتي لك مرة أخرى ..
وأحي فيك تاني مرة قدرتك الاستيعابية العالية ..
في بنات ما عندهم هذه الكفاءة على طول يعملوا زعلانين ..
أهنا متل ديل لهن العافية .. ولنا حسن العزاء ...
التحية لأخي الكبير قرشو .. نعم فهو أخ أخوتي الكبار ..
خليني يا قرشو أصغر عمري شوية ...
تحياتي ...
جــاد
| |
|
|
|
|
|
|
|
|
|
Re: هذا البوست برعاية دهـن الكركــار (Re: JAD)
|
انا طبعا يا فيصل زيك
ما بقرا لى شيرى... وبضحك واتامل وبس ، لا بل بفكر فى انه استثمرها كيف؟؟ الهف موهبتها دى كيف؟؟ اجيبها فى الخط كيف؟؟؟
شيرى ،ما يقولوا ليك هترشة ويصنفوك هتراشة
انتى مبدعة كاتبة مكتملة النصاب والدسم، والله ما شايفة اى فرق بينك وبين جارسيا ماركيز
هو بهترش كدة ، بشتت سكسك النص وبرجاك فى اخر النفق ، بالخيط والنضامة... ويمسكك سبحة واصلة فى آخر الكلام
انتى بتعملى كدة يا شيرى
ما بهمنى كريماتك دى ، المهم انا استثمرك كيف؟؟؟
وما بفوت قبل ما اعلق على الكريمات ، وعلاقتى الاسطورية بيها
فى السودان المعجبات كانوا قايلنى بتاعة كريمات، لانى طبعا ، ُ
ممسلة... ؟؟
والذ حاجة انى جاية الطيش عدييييييل فى ثقافة الكريمات ، ولمن ادعى انى راكبة الموجة واشترى واحد ،
اقول كدة اجدعو ليك فى اقرب درج ويقول كدة يصادفنى بعد شهرين تلاتة
واكون نسيت ملامحو وميزاتو السحرية
، وارفعوا واعاين ليه باستغراب واضح ، ولسان حالى يقول: ياربى دة شنو؟؟؟
والذ حاجة لمن يتفتح موضوعهم فى ونسة ستاتية اصيلة ،
الخلطات دى هى البتحيرنى، حافظنها ليه؟؟؟ فكروا فيها كيف؟؟؟ بعرفوا نتايجها كيف،
حقل تجاربهم منو، عندهم فئران معامل ، او جقور يجربوا فيها خلطات الوش دى قبل ما ينفذوها فى وشهم ؟؟؟ ولا
ماشين بى مبدأ
what is the matter??? Amby zalata!!!!
عندى قريبتى ممسوخة كدة ، جاتهم مرة ضيفة صديقة قديمة لامها وابوها ، فشافتهاتبدو عليها "فسخة" واضحة فى الوجه والجضمين ، فقالت لامها ، ما عارفة عندك بت صفرة كدة ، انتى يا بت الجابدك منو؟؟؟
قالت ليها: جبدنى عمى بتنوفيت
bitnovate.
ولوووول منك يا زووول
مشيت السودان لقيت فى موضة بعملوا خلطة قبل الدخان ، يعنى الواحدة تضرب وشها بالخلطة وتتدخن
الناس كلهم لمن يجى ذكر الخلطة دى ، يلولحوا كفة يدهم يمنة ويسرة ويقولوا ليك
"الوش دة يلمع"
ومن الخلطات كلها جيت شايلة معاى علبة كركار
بنات الفرقة اتمسحوا بالكركار مرة فى " الحجرة الخضراء" ... ودى غرفة تغيير الازياء خلف المسرح يا جماعة ، وطبعا هن ثقافتهن اميريكية نص وسودانية بالقوة من وجودهم فى الفرقة تلاتة ارباع ،
وهم بتمسحوا تستطيع ان تسمعهم بوضوح وهم يرددون
Oh, My God! It is soooooooo soft.
المهم جينا وقفنا خلف الكالوس و مذيعة البرنامج واقفة معانا فى حته ضيقة جدا والدنيا ضلام والانفاس محبوسة قبل بداية العرض
بدت تشمشم... وما علقت
وسوست ليها فى اضانها كلام مختصر عن انك فى اللحظة دى بتشمى كركار
وناهد وسوست ليها انه كريم سودانى ناعم وكويس للجسم والشعر ،
وهى وسوست لينا بأنه ظاهر انه كويس لى اى شى الا للانوف
واسقط فى كركارنا
شيرى انا استثمرك كيف؟؟
| |
|
|
|
|
|
|
|
|
|
Re: هذا البوست برعاية دهـن الكركــار (Re: shiry)
|
أستاذه شيرى..طبعا بعد الكلام اللذى نطق به مبدعوا البورد.. كلامى ده ما ح يودى ولا يحيب.. فقط اردت ان اقول لك اننىأستمتعت بهذا البوست للنهايه..أرحو ان لانتحرم من قلمك ابدا..فأنت لاتدرين كم ظلمة تضيْين , وكم دبرسه تفكين..
الموضوغ كبير.. وكان لدى الكثير لاقوله ولكن ساؤجله ليوم اخر.. وسوف اكتفى بقراءتك..
واصلى يا اللتى لاتفوتها شارده او وارده فى حياتها..
سلامى وحبى
| |
|
|
|
|
|
|
|
|
|
Re: هذا البوست برعاية دهـن الكركــار (Re: shiry)
|
شيري انا جايك حسي في استشارة كريمية بحتة
دايرين وصفة كدا تدي الحياة و الحيوية للوش...و تسمح الزول كدا
وذلك لاقتراب موسم الاجازات ...و الاعرس و كدا(ما اعراسنا طبعا
شيري اقتح ليك ركن زي دا بمشي شديد يا بت امي
يلا معاك سلام
| |
|
|
|
|
|
|
|
|
|
Re: هذا البوست برعاية دهـن الكركــار (Re: ensana)
|
سلام مربع
انسانه حبيبة البي
نصيحتي ليك عشان وشك يصبح منور زي القمرا
اكلي جزر .. وخيار
صباح ومساء 24/24 ساعة في اليوم
واحذري ان تفتحي الفضائية السودانيه
ولا قناة الجزيرة
ولا تصريحات الرؤساء العرب
والحذر ثم الحذر من المرايا
وانقعي رجليك سيدتي طول اليوم في الحنه
وبعد ماطلعيهن من الحنه انقعيعن في النعناع
النعناع يطول العمر
هذا ان استحملك ناس البيت عموما وسابوك تمارسي هذه العادات الحلوة والراحات ومادفق تشط النعناع في راسك
ثم قبل ان تنامي تاكدي من رؤية 15 او 30 دعاية في قناة ال بي سي
او الفيوتشر عن الشامبوهات والكريمات
وشاهدي كويس (مس لبينون 2003) عشان ماتحردي ليهن
تاء التأنيث
يمكن لمن تقومي من النوم لونك يصبح زيهن
او شعرك يكون احسن منهن
شفتي نصيحتي غاليه كيف ؟؟
لقد عملت بهذه النصائح
والغريبة حتى الان لم استيقظ لاجدني مثلما ما حلمت او تمنيت
افعليها سيدتي(تلك)( الامنيه
واحلمي بها
يسعد صباحكككك
سلمت يانسانه للطله البهية
| |
|
|
|
|
|
|
|
|
|
Re: هذا البوست برعاية دهـن الكركــار (Re: shiry)
|
الكريمة ... شيري سلام بيجي زي لون ديانا لمن تلخبطي مع الروز
الرسول التجريبيها، بت جيرانا عملت إتخبطت .. لا أقصد إتخطبت في غضون يومين ونصف اليوم !!
أولا معليش على الخشة الشمال، كدي خلينا نسلم على الجزر والبطاطس والحناء، وكل خضرواتك الطازجه والجميلة المزينة بيتك العامر ( عيني باردة)
عندي إقتراح .......
خلطة بت ستين كلب وقطة... قطة مليانة قبطة
وإليكم المقادير :
عدد 2 فجل
عدد 3 ربط جرجير أخضر
عدد 1.5 قرنفل
عدد 1 كليكة برسيم طازج
عدد 1 كيلو دقيق فينة
عدد 6 بيضات بط بيجي اللون
أعجني المقادير دي كلها مع بعض، واعملي منها كريمة ، وإنشاء الله يكون عندك غنم في البيت (أووب على أصلو ما بصدق ما عندكم غنم )
ما مشكلة جيرانكم عندهم غنم ، أكلي الغنماية تلاتة مرات من الخلطة وأسقيها موية حارة .
الغنماية إنشاءالله تكون ما " غارزة " واكان غارزة ادي الخلطة لي عتوتها ، ما مشكلة .
المهم احلبي الغنماية مرتين في اليوم، ما تقلي اللبن، لانك سقيتيها الموية الحارة قبيل، لحظة بس بجيكم هساالباب دق...
أها كنا وين .... آآي اللبن الحار، خلي في السعن المرة الداية .. قصدي المرة الجاية حا أكليك تعملي بيهو إية
أها ودعتكم الله ...
الخلطة دي برعاية شركة ألبان غنكمو
| |
|
|
|
|
|
|
|
|
 Re: هذا البوست برعاية دهـن الكركــار (Re: shiry)
|
شيري اللذيذة
ده الجن الجديد بالكركار
شايفه بت قضيم ادتنا الوصفة كاملة
بس نسألكم سؤال
منو المرة الاكتشفت الاختراع ده؟؟؟
والله عندهم اختراعات صعبة شدية
انا بسأل امي دايما
بقوليها منو الاخترع ملاح الويكة ده؟؟؟
!!!!
اصله برنامج
بس اصعب اختراع عارفين شنو
الابري او ( الحلو مر)ده شي صعب شديد
برنامج طويل مش؟
تحياتي ياجميلة
| |
|
|
|
|
|
|
|
|
|
Re: هذا البوست برعاية دهـن الكركــار (Re: Hozy)
|
ٍسلام مربع
ابو القنفد
يعني معليش وحات نظري حيرتني عديل كده
حاولت اعرفك انت صيدلي
ولا مزارع
ولا بتاع اللبن
اول شيء يعني شنو غارزه
؟؟
تاني شيء وحات نظري وصفتك دي
غنم ناس سكينه يحردنها
لانو بعد استعملوها
لا يتخليهم غنم
ولا بقر
ولا تراكتورات
احسن شيء انت الوصفه دي تدسها من اللجنة الدولية للطاقة
عشان ما تجيب للسودان التهمه
انو شعبو ارهابي ، حتى نسوانو بعرفو يصنعوا
اسلحة دمار شامل
ونحن اصلا خلقة موضوعين في قائمة الارهابيين
يعني الحكاية موش ناقصه
سلمت ياسيدي للطله البهية
هوزي
كضبنا كاضب ياهوزي .. الابري ساهل زي المويه . جيبي لي حاجاتو
وانا الغوصو ليك في دقيقتين
غايتو مابضمن ليك بطلع حلو مر
ومرض بس
..
لكن تعالي انا اديك ثلاثة ايام نضفي لي فيها الكمونيه..
يعني حاجة تحير فعلا .. الخرف دا كلو وبكامل اعضائه اكلوهو
يعني حبكت لازم ياكلوا فشفاشو ومصرانو الاعور .. شوف اسمو اعور ومصرين انو ياكلوهو ..
| |
|
|
|
|
|
|
|
|
|
Re: هذا البوست برعاية دهـن الكركــار (Re: shiry)
|
العزيزة اللذيذة
شيري
كيفك ياغالية؟
ياحليلك ياشيري الابري 3 دقائق!!! ؟
انتي عارفه انه بزرعه اول شي في البيت
لمدة شهر او اكتر
وبعدين يطحنو (يدققوه) وبعدين ماعارفة بيعملوا ليه شنو
وبعدين يعوسوه
حتى بعد مايبقى خلاص ابري
عاوز ليه 10 دقائق في الموية
يعني في اصعب من كدة
والكمونية دي برضو من المشاكل والتعقيدات البيحبوها السودانية
الخروف ده مابيخلو فيه الا الجلد
خايفة زول يقول لي الجلد ذاته بقه ياكلوه
!!!
| |
|
|
|
|
|
|
|
|
|
Re: هذا البوست برعاية دهـن الكركــار (Re: shiry)
|
الكريمة .. شرشورة .. الأحلى من البندورة (على الطريقة الحنكوشية) سلام ..
اجي يا بت أمي إنت الحيرتيني .. وبعدين سكينة دي منو؟ بس أوعا تكون سكينة بت جيرانا .. أبرا يا يومة كدي من الصدمات واللكمات والصعقات، سجمك يا بت أمي سكينة شغالة في الكهرباء.
شكيتك على الله يا بت أمي، نحنا ما إرهابيين كيف !! وطيب أكل التركين والكول دة مش إرهاب دة تطرف معوي حاد.
وللشفاء من متلازمة الارهاب الجوعي إليك هذه الوصفة، بالمناسبة الوصفة دي برعاية كوفي عنان ...
عدد دبوكة من الصيادلة
عدد12 دبوكة مزارع
عدد 1.5 دبوكة لبّانة
أخليطهم وأعجينيهم في فدان أرض، وكبي فوقهم 12 برميل موية، شرطا من النيل. وجيبي 20 دبوكة بقر مستورد ومحلي. واعملي منهم خليط متجانس.
أها الكريمة البتطلع دي شفاء لكل أطفال السودان من الملاريا .. والكوليرا .. والدفتيريا .. وسوء التغذية.
أها فتك عافية يا بت حشاي، لغاية ما ألقاك في الجكة .. لا قصدي الخلطة الجاية، (طبعا بالليمون مع التحفظ، شرطا يكون من بيزنس)
| |
|
|
|
|
|
|
|
|
|
Re: هذا البوست برعاية دهـن الكركــار (Re: SAdo7)
|
سلام مربـــع
هوزي : العسل
اذكر مره واحده ومن زمن عندما زرت السودان في احدى اجازاتنا شاهدت في بيت حبوبتنا وهم فارشين(الزريعة) على سراير ومغطاءة بشوالات وبما اني فتاة شمشارة لا تترك الحاجات المغتغته في حال سبيلها فاصريت ان اشاهدها .. لكن للاسف لم اصبر شوية لاري العملية الابداعية الجميله في تصنيع وصناعة وعواسة الابري ..ومع ذلك برضو انا شايفاهو عسل على قلبي بعد كل التعب دا ..
بس كل شيء ولا الكمونيه .
ياااااااع على الكمونيه وسنين الكمونيه
ابو القنفد
شوف يا ابو القنفد. اجمل اكله سودانيه بعد (ملاح النعيميه) هي الفسيخ بالطريقة السودانيه وخاصة في الفطور يوم الجمعة .. البصل .. الشطه الخضراء التي تلهلب .. والليمون .. والدكوة ..
لكن التركين دا .؟ يعني للاسف دا موش اكل .. اهو دا الممكن الواحد يقول عليهو .. يعني الدنيا موش ضاقت للدرجة دي والسمك موش انتهي من البحر وبطل يجي ، عشان ناكل التركين
مع اعتذاري للذين يحبونه ومن ضمنهم اخي الصغير .. بس صراحة كده
اما الكول فانا ماشفتو وماعارفاهو هو شنو ذاتو .. يعني طبيعة تركيبتو كيف ؟
وكدي النسألك ياخوي دبوكه دي شنو
وبعدين دي تركيبات شنو دي العايز (تخرب) بيها زينة بنات الناس
دي تمشي تقدم بيها بحث الى منظمة الفاو .. وتقول دي مساهماتي في علاج امراض الوادي المتصدع
وجنون البقر ..
وليس جنون الكريمات والشامبوهات
سلمت يا قنفد
عادل عثمان
اول كيفك . .ليك مدة ماشايفاك
تاني شيء .. مجنتره تعني مجنونه في لغة الرندوك
والسؤال الثاني :
انا في انتظارو طبعا ..ولا نسيتوا في البيت
؟؟
صدوح
سلمت ياسيدي للطله وسلمت كميات كتيرات لحديث الاطراء
والله يخليك يازوق
| |
|
|
|
|
|
|
|
|
|
Re: هذا البوست برعاية دهـن الكركــار (Re: shiry)
|
شيري ... مع التحية
لك التحية وأنت تعبقين البوست بكريماتك وقفشاتك الأحلى من ملاح الكمونية !!
أجي يا شيري ما بسألك ما بتعرفي الغنماية الغارزة .. طيب ومال لو قلت ليك الدارة بتقولي شنو !!
أحلى أكلة سودانية هي أم فتفت بالشطة والليمون .. تخلي عرقك يهتف هتف ..!!
لكن أووب علي من ملاح السلج بالقراصة .. دي لمن (ماما مع التحفظ على اللفظ)، أقصد أمي، تعملها لينا كنا بندك درس العصر .. وبنعمل إعتصام لمدة يومين .. لحين لحس أخر فضلة من المُلاح.
أما ملاح الكداك، أوووب علي منو، ويخصي عليهو وعلي حلاوتو وجمالو، دي قريبتي رسلتو لي من أبوظبي (أنا مقيم في الشارقة وعزابي) يا ستي ببساطة دكيت يومين من العمل، وأعلنت حالة الطوارئ لحين رحيله الميمون !!
أما شوربة العدس، سجمك وسجم مصارينك ومعدتك، لو كان الصحن مليان وبراكي .. ما حا تقيفي أبدا .. إلا يقرعوكي قرع !!
أما الدبوكة، فهي المائة من الابل بلغة أهلنا في الغرب .
والبقية تأتي مع الوصفات .. سجمي أنا ليسة في المكتب، فيجب أن أذهب الحين، يلا يا كريمة البورد، ...
| |
|
|
|
|
|
|
|
|
|
Re: هذا البوست برعاية دهـن الكركــار (Re: aboalkonfod)
|
سلام مربع
الزول العسل : ابو القنفد
هاهاهاهاا امتني ضحكا ياهذا ..
يا حليلك شكلك كده رايحه ليك ملحات سودانيه
وشكلك كده جيعااااان
اتخيل وانا بتكلم معااااك
تأتيني رائحة قدحة التووووم
يا بختنا اليوم ح ناكل ملاخ خضرا
بس ياخساره شكلها الشطه الحمراء انتحرت مع ملاح الباميه
ياااااع على ملاح الباميه
اخي المفعوص يلحسه لحسا
لما تاخرت ابي اليوم ..
يااااااه لسع ح ننتظر تاني شوية كمان
اتقضلوا معانا ياشباب
ماتخافوا اكله هنيه تكفي ميه
طالما ان البيت يخلو هذه الايام
من الاسوووود وياااع ومليون ياااع
على الاسود
سلمت ياابو القنفد للطله البهيه
| |
|
|
|
|
|
|
|
|
 Re: هذا البوست برعاية دهـن الكركــار (Re: shiry)
|
شيري .......... الما هينة، الرائعة بروعة قلمها المرهف
أقطع دراعي اليمين يا شيري لو ما كنتي بتلفيها،
الزومة التغرقك، كم كرت ؟؟
يعني بتحنديكيني مش كدة !!
الملاحات والملحات الراحو علينا يفتحو بيوت،
ويعرسو لي دبوكة من العزابا المتاعيس.
أمبارح حلمت بي ملاح نعيمية، بي كسرة،
لهطو لهطا مبرحا، دون شفقة أو رحمة.
لمن صحيت من النوم لقيت نفسي كنت بقرض
في الملاية.
لمن ذكرتي ملاح البامية ريالتي سالت بحر بحر،
ودموعي جرن نهر نهر، مشتاق بس أشوفو، أو لمحة
من عيوني.
أكيد الشطة الخضرة الانتحرت، ما زيك لافاها وحايمة
جنب النيل.
وقفة اعلانية وجايين.
| |
|
|
|
|
|
|
|
|
|
Re: هذا البوست برعاية دهـن الكركــار (Re: aboalkonfod)
|
المنتشي بحلم رأي فيه
انه اكل ملاح نعيميه
وانا بدوري ارسل اليك من علي البعد
تهانئ الجميله
واهنئك من كل قلبي على
هذا الطعم الرائع
الذي اصبحت عليه
وعقبال ما تصبح على طعم فسيخ مدنكل
ليمون كتير
شطه خضره خطيره كتيرة
شطه حمراء بالدكوة
وفسيخ يلهلب من النار
عشان تستعيض عن وجبة الفطور
ويبقى معاااك طعم الفسيخ
حتى موعد صلاة العصر .. حيث اننا في هذا التوقيت بالذات
يكون الاكل على الاطباق قد اصبح من الماضي
بس المشكلة في كميات الموية التي يجب ان تقرطعها بعد كل خمسة دقائق
فان لم تكن على مقربة من مزيره او ثلاجة
فحقك راااح
فلتبشر بالعطش اليقطع الوش
مع اني لا افهم هذه المقوله اذا كيف يقطع العطش الوش
قد يقطع راس البني ادم لكن وش ؟
دي ماخاشه لي راسي المدوقس دا
والفهم قسم برضو
تصبح على الف نكهة بطعم الوطن
| |
|
|
|
|
|
|
|
|
|
Re: هذا البوست برعاية دهـن الكركــار (Re: shiry)
|
الى التي هنأت الذي استبشر بحلم رأي فيه
أنه يلهط ملاح النعيمية .................. مع وافر الصحة
أجي يا أختي الطعين لزومو شنو !! من الله خلقك
والجبار طلقك .. شفتي ليك كنفد عندو وش ..
نسيت أقول ليك، كان في صحن بصل كااارب مع العشوة
بتاعت الحلم.
أخاف الفسيخ جدا، لأنه يذكرني بأمواج البحر،
وبعدين الفسيخ بقا مصطلح، زي مصطلح الشرق الأوسط
سمعتي بمصطلح العربية القاطعة وش .. أأه عرفت السبب
أكيد بتكون أكلت فسيخ، أو مغسلينها بي شوربة الفسيخ
طبعا في حالة الموية تكون جاية من النيل مباشرة !!
يا بنيتي كُر .. كُر على النيل المصارينو بقت زي مصارين
الخروف لضاربو الريح، كرشتو مليانة موية( مصاب بإستسقا)
وعروقو جافة تب ... الكترابة يا بت أمي.
تعرفي ... عندما كنت صغير في الابتدائي، كان حلم حياتي
أن أكل (فول بعيش)، وكان ذلك منتهى الترف (نشأت في أسرة فقيرة)
وعندما كبرت وعرفت الفول والعيش عن قرب، بقا ترف لو ما أكلت
الفول والعيش ..!!
لكن بيني وبينك فتة الفول شريرة ولا تقاوم .. حاجة في السلك ..
حاجة كدة وزاد وجدي، اللهم كتر من الكدر.
أتفه (أجمل بصيغة الاعجاب) أكلة أكلتها تركين كافر، مطبوخ، مع صحن بصل، وشطة خضراء مع الحارقة اللهلوبة..
أرخي لي أضانك النقوليك دي .. وحاتك مرة أكلت لي شية
طعم دهينها لحدي هسا في يدي قااااعد زي الحنة في يد
العروسة ..
كان معاي أخوي اللهاط، حرم لقطناها من الصاج قبل ما تنزل،
وحاتك زي القرد البيفلي في أخوهو ..
ومرة كان ناس البيت مافي، وكنت براي، كالثعلب الماكر
تسللت الى قفص (كوكة) الحمام واتناولت لي جوز، وحات
أشعب وجوعو، طعم الحمام الشية لغاية هسة في حلقي واقف!!
أما وصفة الحمام، حا أقولها ليك في المرة الجاية،
دة لو ما طمعت وخليتها في سري .. ودفنت دقن !!
أها يا بت أمي ودعتك الله
| |
|
|
|
|
|
|
|
|
|
Re: هذا البوست برعاية دهـن الكركــار (Re: abusin)
|
سلام مربع
ابو القننفد
اسفي كميات اذ الذنب على هذه العيون التي تختبئ خلف زجاجات سميكه ..
وحقيقي حقيقي الله يجازي محنك ..
خيلتنا قلبنا البوست مطعم خمسة نجوم عديل كده ..
بس بيني وبينك الحمام واكلتوا عندي فيها راي .... اول برج الحمام بجيب لي حساسيه مطلقة الديمومه
ثاني شي ء الحمام مافيهو شي بتاكل ، يعني عامل زي كلو عضام
لكن فتة الفول بالدكوة وجبنه الدويم وزيت السمسم فعلا زي ما قلت شريره
شكلي جعت انا .. احسني مطبمجة زيت سمسم وايدي بشكل الفول والجبنه والدكوه
سلمت ياسيدي . للعزومه الخطيره بتاعة الفسيخ
ود رمليه
مية مسا للناس الكويسه
سلمت ياود رمليه للطله البهيه
ابوسن
بيني وبينك كريم الودك بحمي ، لكن لا يعتني ابدا ، اذا سرعان ما يتلبك كلما غشيه تراب او كتاحه فيتغير اللون الى الاحمر
سلمت ياسيدي للطله
| |
|
|
|
|
|
|
| |
shiry
waleed500
ودقاسم
Abdel Aati
zumrawi
مهيرة
Faisal Salih
Habib_bldo
قرشـــو
Raja
بدرالدين شنا
AlRa7mabi
بت قضيم
Elkalakla_sanga3at
منعمشوف
AbuAla
ودالعباسية
JAD
Tumadir
Outcast
aboalkonfod
Adil Osman
SAdo7
ودرملية
abusin
فيس بوك
تويتر
انستقرام
يوتيوب
بنتيريست