|
|
 أين الخل الوفي...؟ في توضيح لما حدث مع نادر اليوم
|
بسبب معيشتنا خارج السودان، كان الوالد ببذل مجهود كبير انه يعكس لينا السودان بكل تفاصيله... من الحاجات العالقة في ذهني.. ان أولاد الحي لما بت من بنات حيّهم يضايقها احد غريب.. فإنهم يتصدون له، سواءاً استنجدت بهم أم لم تستنجد...
حسين ملاسي .. زميلنا في البورد ... كان ولازال على عداء دائم مع نادر زوجي وزميل البورد... والسبب أن ملاسي يلاحق نادر بصورة شخصية... قبل أيام، شاهدتم جميعاً إفرازات هذه الملاحقة، حين قرر نادر أن يأخذ حقه بيده.. وقرر استقصاد ملاسي... حينها انسحب ملاسي من المواجهة... واختبأ... وترك آخرين يدافعون عنه... في حين وقف من يعرفون نادر يتفرجون... وقد كنت من بين المتفرجين.. فلم يكن المقام مقامي.. .. ما حدث في بوست أصدقاء الزمن الجميل، كان نتيجة إفرازات استقصاد واستفزاز استمر لفترة طويلة، طويلة بطول أربعة سنوات منذ ان تزوجنا انا ونادر.. وشاركنا اصدقاءنا الفرح هنا في البورد... وجاء ملاسي ليهزأ من طريقة الزواج الذي قمت -بحسن نية- بإنزاله هنا في هذا المنبر... لم يتعود نادر ان يسكت عن من يناصبه العداء... وآلمه أن يسخر شخص لا يعرفنا ولا يعرف أهلنا، منهم... ومن طريقة عقد الزواج الذي تم.. وما تتعبه من قدسيه ورباط مقدّس يستوجب الاحترام... وقرر ان يواجهه بقوة.. معظم الاستفزازات التي يوجهها ملاسي لنادر، استفزازات مباشرة... وتقليل من قدره كشخص.. وكزميل هنا في المنبر.. وهو يفعلها مع الكل، ولكنه يتصيد نادر بصورة تدل على "عدم موضوع"...
بعد ذلك.. اتجه ملاسي إلى مضايقتي انا... ومتابعتي في كل ما اكتب.. في زيادة لتأكيد حالة عدم الموضوع والفراغ الكبير الذي يعيشه... وانا التي اميل إلى ان اكتب في مواضيع جادة أحياناً... وفي مواضع مرحة اتواصل بها مع اعضاء المنبر في احيان أخرى...
ما حصل اليوم ذكرني هذه قصة الفتاة التي تتعرض للمضايقة... والتي أجد أن فيها انعكاسات كثيرة على النخوة والشهامة التي وجدتها في الرجل الذي اخترته شريكاً لحياتي... والذي لا يمر يوم دون أن أحمد الله على أن الله قد جعله نصيبي في الدنيا...قررت من زمن بعيد أن أتجاهل مضايقات ملاسي، التي يكتبها لي.. ويقصد بها نادر... قررت ذلك لسبب بسيط، اني لا أرد إلا لمن له اعتبار في نفسي... والذي اهتم فعلاً بعقله وأقيّم رأيه سلباً أو إيجاباً.. أما خالي البال والخاطر، فإنه لا يعنيني في شيء.. وبأقل ما يمكن أن أقول، أنه أقل من مقامي.. وبعيد كل البُعد عن هموم حياتي... تماماً كمن يحاول ان يحظى بنظرة من فتاة غريبة في الشارع.. أو أن يستفزها... أو حتى أن يخيفها.. تعلمت أن أسرع الخطى وان أنظر في الأرض...لأن ردي، سيحقق مبتغاه... وهذا ما فعلته... وسأستمر في فعله...
نادر، كولد بلد.. لا يمكن أن يرضاها... ولايمكن ان يسكت عنها.. وقد عبّر عن احتجاجه هذا في أربعة بوستات... قام بكري بحذفها جميعاً.. وواصل نادر في انزالها، وأصر على ذلك.. وقرر أن حدّه سيكون أن يحذف بكري الباسورد عنه.. وهو ما قد فعله بكري.. وهو ما كان متوقعاً...
أردت أن اوضّح للجميع هنا.. لأني كما كتبتها في بوست التعداد الخاص بي... أفخر بوقوفي بجانب زوجي... البورد مليء بالشلليات والأخوان.. والأصدقاء والمعارف القدامى... ويمكنني أن أجلب الكثير من البوستات الدالة على التحزّب للدم او النسب أو الصداقة.. لا أخجل من هذه الوقفه.. وافخر بها.. وأكون "قليلة أصل".. إن لم افعلها...
لكل أصدقائنا نادر وانا... ولكل من عرفناهم وامتدت معرفتنا بهم... ولكل من اختلفنا معهم... ولكل من عرفناهم... ولكل من لم نعرفهم... نادر لآخر لحظة دافع عن وجهة نظره.. لو في حد في الحياة العادية اتصرف معاه تصرّفات مشابهة، ما بخليه... ولو حد قرّب لزول بحبه، ما بخليه... ولو زول لمس شعره من راس حد من أصدقاؤه ما بخليه... نادر ما عايز يتجمل ويعمل public image... نادر عايز يوضح وجهة نظره، ويبين التعدي الواقع عليه... وهذا ما فعله إلى أن أخذ بكري الباسورد... وقد فعل.. اعرف انه شجاع، لأني لا أستطيع أن أقوم به... وأعرف ان أي منكم لم يقم به... والدليل.. ان الامر وصل إلى هذا الحد..
نادر دافع عن حقه... وطلع من البورد وهو يدافع عن هذا الحق... أما انا فسأظل اتفرّج..
وهذا وقد لزم التوضيح...
بنت الحسين
|
|
|
|
|
|
|
|
|
 Re: أين الخل الوفي...؟ في توضيح لما حدث مع نادر اليوم (Re: Omar Bob)
|
آلمني جداً أن آرى هذا الخلاف بين ملاسي كزول أعرفه وأحترمه وبين زوج صديقتي وأقف متفرجة
ولكن أثرت الصمت لآني لا بحل لا بربط
ولكن لا لسحب باسويرد نادر
واي عضو بدافع عن وجهة نظرو
لا للإقصاء
وعداك العيب يا أصيلة
لو سمحت يا أستاذنا بكري أو بكر
أعد للأستاذ نادر الباسويرد
| |
|
|
|
|
|
|
|
|
|
Re: أين الخل الوفي...؟ في توضيح لما حدث مع نادر اليوم (Re: Omar Bob)
|
الاخت مريم
الاخ عمر
رمضان كريم ..
حقيقة لا اعلم ماذا حدث ..لكن من المؤسف ان يتحول المنبر من ملتقى لتبادل الاراء والافكار والخبرات الى معترك لتصفيةالحسابات والخلافات الشخصية ..ارجو ان يكون ما حدث سحابة صيف ..وان يعم الصفاء والوئام بين الاخوان ..
وارجو ان يستعيد الاخ/نادر كلمة مروره ليتواصل مع اخوانه واخوته ..
| |
|
|
|
|
|
|
|
|
|
Re: أين الخل الوفي...؟ في توضيح لما حدث مع نادر اليوم (Re: Omar Bob)
|
مريم يا حبيبة مساء الخير ورمضان كريم
عمري يا مريم ما حاولت اتدخل في مشاكل البورديين هنا، إلا حسب ما اذكر في مشاكل عامة ليست شخصية، وبصورة سطحية،
لكنك عزيزة عليا وحسيت فعلاً بألمك وغيظك
أنا شخصياً لم اكن أعلم أن زوجك هنا في البورد وأسمه نادر، يمكن لاني مش متابعة باستمرار
وبالنسبة للأخ ملاسي، الحقيقة اندهشت، فعهدي بملاسي، من زماااااان يعني، انسان مؤدب محترم لاذع النقد أحياناً لكن في حدود الأدب والاحترام
وشخصياً- وذي ما قلت انامش متابعة- لم اقرأ ولا مرة مشكلة مع ملاسي مع أياً كان هنا
عايزة اقول ليك، ما حاقدر احكم في الموضوع لاني فعلاً لا اعرف عنه شئ، بس لي تجارب مع كثير من الأخوان والأخوات هنا، كل المشكلة التي كانت تحدث بيني وبينهم، عبارة عن (سوء الفهم)
يعني اعلق تعليق لا اقصد منه أحياناً سوى المزح والمشاكسة البرئية، فأفاجأ (الكلمة دي تعبني استهجائها) اتفاجأ بكرة أن هذا التعليق عمل زوبعة وزعل المعني وبدل أن يكون طرفة ويقرب القلوب ببعض ابتسامة أخوية بسيطة، يعمل العكس، مشاكل وحزازات
كل ما مر بي حليته في البريد الخاص المسنجر، بحل بسيط أن اراسل عضو البورد المعني واوضح اني والله والله ما كان قصدي شر، انا بهزر وممكن يكون هزاري مسيخ شوية لاني -صراحة يعني- مسيخة فعلاً، بس ما اقصد شي
رد الفعل الطبيعي للزميل أن يعتذر أو يشكر توضيحي وممكن كمان نبقى اصحاب، لو حصل العكس ورد عليا بقلة أدب أو استفزاز، ساعتها اعرف انه لا يستحق التوضيح فعلاً ، وابعد، ويا دار ما دخلك شر
بس والله ولا مرة أحد تطاول ورفض توضيح وجهة نظري
اتوقع أن ما بينكم والأخ حسين هذا النوع من سوء التفاهم، وممكن ببساطة يتحل بدون المنازعات اللي ما حتعمل حاجة سوى أنها تتقل القلوب زيادة وتحرق الدم
خصوصاً أننا لا نرى ولا نسمع بعض، لا نرى النظرة ولا نسمع نبرة الصوت، لذلك من الصعب جدا ًأن نحكم(هذا الشخص قاصدنا فعلاً أم فعلاً بتعامل بحسن نية)
تريثي يا مريم، لو مكانك حاطلب من الأخ حسين التوضيح أولاً، لو قال (ايوه قاصدكم) يبقى من حقك فعلاً تزعلي، ولو قال (أبداً أنا بتعامل بحسن نية صافي) فلا عليك إلا التراجع ، ويكون حصل خير
يا مريم يا حبيبتي الدين والعقل بيقول (تريثوا) و (العجلة من الشيطان) فلا تتعجلي لشر ما
وربما سبب غضبتك، انك خلطتي بين أمرين، تصرف الأخ بكري، وموقف ملاسي
صح البورد شلليات وصداقات ويمكن الواحد ما يقدر يشارك أو يتحدث بصدق ووضوح أحياناً خوفاً من ناس (صاحبي قالوا ليه كده يلا ننسف الزول القال كده) دون الرجوع لفكرة الحق اساساً مع مين
في ناس فاهمة فكرة (انصر أخاك ظالماً ومظلوماً) دي غلط ،وما علينا
بس هناك احتمال ولو ضئيل، أن ملاسي برئ من تصرف السيد بكري، يعني ممكن فعلاً يكون بكري تصرف من عنده ، بكري نفسه ممكن يكون فاهم غلط، يبقى لازم نعطي بكري الحق في التوضيح برضو
أنا كمان اطالب بالتوضيح، لماذا سحبت البوستات أولاً؟؟ ولماذا سحب باسورد زوجك نادر ثانياً؟؟
أكيد هناك تفسير منطقي ولما يوضح حتتحل كل الأمور.
ما أظن بعد إدارة منتدى كمنتدى سودانيز أون لاين طيلة الأعوام السابقة، ونجاح المنتدى، يكون بكري بتعامل بعقلية شلليات وأصحاب، فلو كسب ملاسي، أكيد حيخسرك أنت وزوجك، يعني متهيأ لي أكيد في تفسير منطقي للسيد بكري أنه يعمل كده غير موضوع الصحوبية ده
عارفة يا مريم
من مشاكلناالأساسية في الحياة، الأخذ بالظواهر والعصبية الشديدة والتعصب لرأي بسبب الغيظ
نحن (عموما) شعب مستفز، بضم الميم وفتح التاء، شعب أي هبشة فينا تخلينا نفور، لو بس تريثنا و(خلينا نفسنا مكان الآخر) قد نفهم لماذا تصرف الآخر بهذا الشكل.
دمتي يا حبيبة ورمضان كريم
في زول يزعل كده في رمضان؟؟
بعدين ما قالوا الشياطين بربطوها في رمضان، ملاسي ده بكون باقي لي مربوط هسه؟؟
روقي المنقة يا مريم
المنقة زاتها بقت ب2500 جنيه
الوااااحدة ما الدستة
سلمتم جميعاً
| |
|
|
|
|
|
|
|
|
|
Re: أين الخل الوفي...؟ في توضيح لما حدث مع نادر اليوم (Re: مريم بنت الحسين)
|
أردت أن اوضّح للجميع هنا.. لأني كما كتبتها في بوست التعداد الخاص بي... أفخر بوقوفي بجانب زوجي... البورد مليء بالشلليات والأخوان.. والأصدقاء والمعارف القدامى... ويمكنني أن أجلب الكثير من البوستات الدالة على التحزّب للدم او النسب أو الصداقة.. لا أخجل من هذه الوقفه.. وافخر بها.. وأكون "قليلة أصل".. إن لم افعلها...
عداك العيب يا بت الحسين
نادر ده من ايام الجامعة وعز ايام التمكين والحاجات عندو كانت يا سوداء يابيضاء..لذا كانت اخلاقو في طرف سكينتو
اسم نادر ربما لايدل على شخص عنيف لذا لطالما رايت انو المفروض يكون اسمو عبد الجبار..
ليس تخويفا للذين يهرجلون مع نادر بخشونة او بقصد..وانما لاجل سلامتهم..
كامل تضامني لعودة العزيز نادر..
ليس ثمة منهاج واضح لقواعد البورد ..فلا يجب الاحتجاج بهذه القواعد التي اكل عليها البعض وشرب
ـــــــــــــــــــــــــــــــــــ
حكمة اليوم من هذا الشهر الكريم:
البورد ده ليس نهاية الاشياء ولن ياكل عيالك من ارثك في هذا البورد المبهول للعالمين والدواب اشباه البشر..
لذا يجب ان يحرص الجميع على سلامتهم الشخصية..
اللهم قد بلغت..
| |
|
|
|
|
|
|
|
|
|
Re: أين الخل الوفي...؟ في توضيح لما حدث مع نادر اليوم (Re: DKEEN)
|
العزيزة مريم
اولا حمدا لله على وصلك للاهل طيبة
و اعتذر عن تأخرى للوقوف مع اخي نادر و هو يطالب بحقه ، و يمد اصبعه في عين اتخن تخين مدعوم من قبل بكرى او من ينوب عنه في ادارة هذا السوق . و لا اشك ابدا في ان نادر يستطيع اخذ حقه تالت متلت من اي كائن من كان تسول له نفسه المساس بشعرة من رأس اعزاءه ، و لو استدعاه الامر للسفر و اخذ هذا الحق اقتدارا .
اقول للسيد حسين ملاسي لم نتدجل و لم نعلق على الموضوع عندما كان الامر مجرد خلاف بينك و بين الاخ نادر باعتبار انكما لكما القدرة على ادارة اي صراع او خلاف بينكما بمعرفتكما . و لكن ان يتعداه ليصل الامر للسخرية مما تكتب الاخت مريم لمجرد انك تختلف مع نادر فهذه تصرفات مرفوضة ، و تفتقر لشرف الخصومة مع الاخرين ، و تصل لمرحلة المطاعنة و انت تعرف شم من هذه المطاعنة ، فابتعد هداك الله عن اسرة الاخ نادر ، و لك في ما يكتب نادر متسع لابداء وجهه نظرك بكل احترام .
و اقول للاخ بكري او من ينوب عنه في ادارة سوقه هذا ، لما هذا الانحياز الواضح في هذا الخلاف و الوقوف مع المعتدى بحذف المداخلة التى سخر فيها حسين ملاسي من كتابة مريم ، بل معاقبة نادر بتعطيل حسابه و منعه من محاسبة من تجرأ على عائلته في سوقكم هذا بمحاولة لملمة الموضوع و اخفاء سوءة صديقكم ؟ .
و يا نادر الاخلاق و الصفات ما يهزك ريح
| |
|
|
|
|
|
|
|
|
|
Re: أين الخل الوفي...؟ في توضيح لما حدث مع نادر اليوم (Re: خالد عنان عمر)
|
الاخ الوليد محمد الامين
تمنيت لو كانت المداخلة الاولى معك في ظروف افضل... شكرا لك على كلماتك... وموقفك.. وكتابتك...
الطيب عثمان يوسف
شكرا لك اخي على تعليقك.. ولم اعتقد اني سأكون على ما يرام في هذا المكان، ان لم اسجّل موقفاً..
حمد فتح الرحمن
يا اخوي.. الحمدلله اننا طلعنا بيكم من البورد.. وبكل الوجوه النيرة الكتبت هنا... شيء مؤسف ان يسعى شخص لأن يخرج أسوأ من فينا.. ويبحث في سوءاتنا .. كأنه كامل الصفات.. وقفة ليست بغريبة عليك يا ابو البنيّة.. تحياتي لنصفك الحلو..
خالد عنان عمر..
تشرفت بمعرفتك.. وعلى ما يبدو هي المرة الاولى التي نتداخل فيها في هذا البورد في موضوع ما...شكرا لك على تعليقك.. ولك التحية
بنت الحسين
| |
|
|
|
|
|
|
|
|
|
Re: أين الخل الوفي...؟ في توضيح لما حدث مع نادر اليوم (Re: saif massad ali)
|
الاخ abubakr Salih...
اتفهم دوافعك للدفاع عن نادر.. لكني لن ارضى ان يكون التعليق من هذه المنطلقات... لك شكري على الرغبة في الوقوف معنا.. لكني ارجوك ان تغيّر الطريقة.. فلن تفعل إلا ان تضر بك، وبنا جميعا...
سيف مساعد...
لوهلة، لم افهم ما كتبه الاخبر ابوبكر (معليش شهادة عربية).. لكني بعد ذلك فهمتها من تعليقك... شكرا لك... وانا اوافقك الرأي...
بنت الحسين
| |
|
|
|
|
|
|
|
|
|
Re: أين الخل الوفي...؟ في توضيح لما حدث مع نادر اليوم (Re: البدري عبد الله)
|
الاخت العزيزة مريم ...رمضان كريم
للحقيقة لم اتابع ما كان يجرى بين نادر وملاسى وهم الاثنين زملاء فى المنبر
وليس بالمنبر شلليات بالمعنى المحدد للكلمة ولكن انا شخصيا عرفت بعض
الناس من خلال مقابلات شخصية والبعض من كتاباتهم وعرفت من هو/هى الذى يقبل
مزاحى وسخفى وزللى فاصبح عندى اشخاص معنيين اى اصدقاء وعرفت ايضا من اتداخل
معه حسب كتاباته وهنالك اخرون لااصل بوستاتهم مهما يكتبون فقط اقرأ ان وجدت
فيما يكتبون فائده ومتعة..ليس هذا هو المهم..
لكن يحزننى جدا عندما اسمع ان بكرى سحب باسورد شخص ايا كان من هو
بغض النظر عن خلافى او اتفاقى معه،والله يشهد لم اقرأ لنادر ما يعيب فى
هذا المنبر منذ تسجيلى هنا..واقرا سخرية ملاسى صراحه قد يراها البعض مستفزة
ولكن اجدها عادية،لان ما يبطل الوضوء عند شخص لايجرح صيام البعض.
عليه استنكر جدا تصرف ملاسى فى مضايقتك (حسب افادتك لاننى الله يشهد لم ارى ذلك)
واطلب منكم الثلاثة التصافى فى هذا الشهر الفضيل كما نطلب من الاخ بكرى ليتم هذا التصافى
ان يرجع الباسورد للاخ نادر وتفتحوا صفحة جديدة.ولنختلف فى هذا المنبر ايا كان اختلافنا
ولكن بحب،بعيدا عن التجريح والمطاعنة والهمز واللمز،لان كثرة الوفاق نفاق..
ولاشك انكم فاعلون..
الاخ بكرى لااظن انك تتجاهل حديثنا هذا لاننا قصدنا الصلح وفيه خير..
والى ان ياتينا بكرى رمضان كريم وكل سنة وانتم طيبون،،،،
| |
|
|
|
|
|
|
|
|
|
Re: أين الخل الوفي...؟ في توضيح لما حدث مع نادر اليوم (Re: صديق الموج)
|
سلوك بكري انتقائي ومرفوض مرفوض مرفوض،
مسح المداخلات والبوستات وسحب البوستات يتم بشكل اقل ما يمكن أن يقال عنه أنه عشوائي وانتقائي، واللوائح التي يتعلل بها بكري حتى بكري كاتبها لا يلتزم بها،،
ضد سحب باس وورد نادر أو أي شخص في البورد بأي دعاو كانت طالما الأمر يخضع ببساطة لأهواء ومزاج بكري وعلاقاته الشخصية،
لإعادة حق نادر في الكلام والرد
| |
|
|
|
|
|
|
|
|
|
Re: أين الخل الوفي...؟ في توضيح لما حدث مع نادر اليوم (Re: محمد الجزولي)
|
يا الله! ... انا فعلا ما قادرة اصدّق...
انا كتبت البوست ده.. ومشيت نمته.. ده شيء يجعل الواحد يشعر بأن الأمل موجود... وبأنه في ناس بتوازن الامور.. للحظات، كنت حاسه بغبينة وغصّة شديدة... الغصة دي ساهمت في إني أكتب الكلام الكتبته ده.. وسعيدة جداً أن جاؤا اصدقاءنا وأحبابنا جميعاً وكتبوا من أجلنا...
حأرد عليكم واحد واحد... وواحدة واحدة ... وسعيدة ببياض القلوب الظهر.. وبحسن الظن... وبجمال معنى الصداقة والعيش والملح والكيبورد...
لوائح بكري فضفاضة... ومتروكة لتقديره الشخصي... هو ارتأى ان يكون الامر كذلك.. حاولنا في فترة من الفترات أن يكون هناك إدارة.. وقد كان.. ولكن الامر فشل، لأن الإدارة لم تتفق... بعدها.. قرر بكري أن يدير الامور هو.. ولا ألومه في ذلك.. لكني أقول له... ألا يكون القاضي والمحامي والجلاد.. فلن تستيقم العدالة....
اعجبتني عبارة عمو صديق الموج.. أن هناك أصدقاء قندهار... واقدر ان يكون بكري قد أكل معهم وشرب معهم.. وصار له معهم رباط.. لكني لا أقدّر أن يتخلى بهذا الرباط عنا البقية... ولا يتحيز لعلاقات تلك الوجبة...
سأعود لكل منكم على حده.. وخاصة بنت قضيم.. وعمو صديق الموج.. لأن كلاهما ابرز نقطة التصالح... واريد ان ابيّنها هنا..
مع خالص تقديري ومحبتي للجميع
هي المحرية فيكم
بنت الحسين
| |
|
|
|
|
|
|
|
|
|
Re: أين الخل الوفي...؟ في توضيح لما حدث مع نادر اليوم (Re: tmbis)
|
كامل التضامن مع الاخ نادر
ونحن هنا الي حين عودته الي هذا المكان...
واسف يا مريم كوني لم اري السخف المعهود من ملاسي بحقك في البوست الذي تم مسحه..
وهذا الامر يظل يوطن خاصية الارجاف والجبن عند العضو ملاسي الذي عمل علي زج اقدس العلاقات في خلافه مع نادر الذي يجب ان يكون ما بينه وبين نادر دون ملاحقة الاخت مريم ...
وكنت اتمني ان يطل ملاسي لكي يدافع عن سلوكه القبيح ولكنه دوما متسربلا بالجبن
والاستهبال الاسفيري المعهود
| |
|
|
|
|
|
|
|
|
|
Re: أين الخل الوفي...؟ في توضيح لما حدث مع نادر اليوم (Re: tmbis)
|
لو كان نادر زوجك نفس نادر الذي احرجني في بوست اصدقاء الزمن الجميل
فبالله بلغيه عني التحايا الخالصة
والود
ملاسي البعرفه زول كويس بل زول ممتاز
ونادر انا حكمت عليه بانه زول كويس وممتاز
وانت زوله كويسة وممتازه
مرات الكيبورتات بتسوق الناس سواقه
بلغي نادر تحياتي تاني
| |
|
|
|
|
|
|
|
|
|
Re: أين الخل الوفي...؟ في توضيح لما حدث مع نادر اليوم (Re: مريم بنت الحسين)
|
سلام يا مريم الحق حق
والحق معك
بدون كلام كتيير ولا دخول فى صراعات قلنا فيها و ما قلنا
نحن ما بنعرف شخصيات بنعرف كتابات هنا
ويا بكرى لو بتقرا كلامى
فأنت تعلم كم احترمك و اقدرك
واعلم تماما انك تجتهد لتبتعد بنفسك عن اى صراعات بين البورداب
وافهم هذا ايضا
لكن والله قد جانبك الصواب فى هذا الموقف
فانت اذكى من ان يفوت عليك مثل
التى رمتنى بدائها و انسلت
تخريمة:
انا لا اعرف نادر ولكن تابعت بعض مما كتب
كما اعرف كتابات ملاسى جيدا
يا مريم سلام لكى ان تغضبى و تغاضبى حتى يحق الحق
هى معركتك ليس معركة نادر فقط و لااظن انك ستبقى لتتفرجى هو الصحيح
شيلى سلاح حقك و امرقى!!!!!
| |
|
|
|
|
|
|
|
|
|
Re: أين الخل الوفي...؟ في توضيح لما حدث مع نادر اليوم (Re: مهيرة)
|
الاخت مريم
سلامات ورمضان كريم
كنت متابع محاولات الاخ نادر لافتراع بوست يناقش فيه خلافه مع الاخ حسين
كتب ثلاثة بوستات بسبب الحذف تحت عنوان قلة "ادب ملاسي " وكان يعرف ان الباسويرد سيكون عرضة للسحب بحسب ماكتب هو نفسه ذلك في ثنايا البوست
ليته اكتفى بعنوان لايتسبب بمصادرة الباسويرد ويضع كل حجته داخل البوست
طالما كان القصد توضيح تعدي ملاسي عليه كما يعتقد
لم اطلع على خلافاتهم في البوست موضوع الخلاف
وكنت اتمنى ان لا يحذف بكري المداخلات سبب الخلاف حتى تكون حجة لمن لم يطلع عليها من قبل
أتمنى ان يتجاوز الجميع هذا الخلاف بحكمة
واطالب بعودة نادر للمنبر
| |
|
|
|
|
|
|
|
|
 Re: أين الخل الوفي...؟ في توضيح لما حدث مع نادر اليوم (Re: حيدر حسن ميرغني)
|
الأخت الكريمة بنت الحسين سلامات
زمن من أيام بوستات التقنيات
رمضان كريم و تصومي و تفطري على خير
الأخ نادر و أنا على خلاف كان لآخر مداخلة بيننا
نفسو حار و يهاجم ببعض الحماقة لكنه شخص محترم في النهاية
ملاسي شهادتي فيه و قد قابلته في أكثر من لقاء أنه رجل مهذب بكل ما تحمل الكلمة من معان
المسألة و ما فيها مُجرّد خلافات منبرية فلا تنبروا لها بما هو غير ذلك
| |
|
|
|
|
|
|
|
|
|
Re: أين الخل الوفي...؟ في توضيح لما حدث مع نادر اليوم (Re: علاء الدين يوسف علي محمد)
|
الابنة مريم
مسكاقمي
شهر مبارك وكل سنة وانت ومحمود ونادر بخير
حقيقة لم اتابع ما حدث بين نادر وملاسي
وكم انا حزين ان يصل بين الابناء الملاسنة لهذا الحد
هذا الشهر شهر العطاء والتسامح والغفران
وأمل من الاخ بكري ان يعيد للابن محمود الباسوورد
الابنة مريم
انا وكيل نادر هنا وخال كل البورداب وشيخ المحس والرطانة كلهم
وما يهمك يا ابنتي ومافي حد يقدر يتعرض ليك
عافيلقو
| |
|
|
|
|
|
|
|
|
|
Re: أين الخل الوفي...؟ في توضيح لما حدث مع نادر اليوم (Re: حمزاوي)
|
الاخت مريم
سلامات ورمضان كريم
واتمني صادقا دوما الا تتحول اختلافات وجهات النظر بين اعضاء البورد الي خلافات واستقصادات شخصية تؤدي الي خصومات مقيتة
وادعو الله تعالي بفضل هذا الشهر الفضيل ان تزول جميع الخلافات وان يتصافي الاعضاء ويتسامحوا ويتساموا فوق الخلافات
واضم صوتي مع الاخرين مناشدا الاخ بكري باسترجاع باص ورد الاخ نادر
هذا مع كامل احترامي لك
| |
|
|
|
|
|
|
|
|
|
Re: أين الخل الوفي...؟ في توضيح لما حدث مع نادر اليوم (Re: حمزاوي)
|
الاخ حيدر حسن ميرغني..
شكرا لك على احقاق الحق.. معاك حق في كل ما ذكرت.. واتمنى ان يعيد بكري الباسورد لنادر
علاء الدين يوسف علي محمد
بوستات التقنية قريب عندي نية اكتب عن برنامج شغاله فيه حاليا اسمه drupal.... برنامج رائع... بس اخلص منه، واجي اكتب عنه... شكرا لك على التعليق رغم اختلافك مع نادر...
عم حمزاوي.. مسكاقمي
انت خالنا كلنا، ما بس المحس والرطّانه.. والله كلمة "يا بتي" دي أثرتني بشكل.. شكرا ليك.. وربنا يخليك لينا يا رب... "هيرقو" موش صاح كده؟
بنت الحسين
| |
|
|
|
|
|
|
|
|
|
Re: أين الخل الوفي...؟ في توضيح لما حدث مع نادر اليوم (Re: Mohammed Elhaj)
|
سلام يا بت الحسين
ورمضان كريم .
سؤال مباشر لبكري ابوبكر :-
هل كتب نادر شي يستحق عليه سحب الباسويرد ؟
من متابعتي قرأت بعض البوستات المعنونه
باسم حسين ملاسي وهو أمر طبيعي وكثير من
البورداب يكتبون عناوين باسماء بعضهم البعض!
بشكل اوضح يابكري تعال وضح لينا نادر عمل ايه ؟
لنادر ولغيره الحق في الرد والحوار مع إي أحد كان .
| Quote: لإعادة حق نادر في الكلام والرد |
| |
|
|
|
|
|
|
|
|
|
Re: أين الخل الوفي...؟ في توضيح لما حدث مع نادر اليوم (Re: Omar Bob)
|
الاخت مريم..
رمضان كريم
علي ما اظن انو نادر كان عارف حيسحبو منو الباسويرد ..
لانو نزل (اربعة) بوستات بنفس الاسم وانسحبت منو..
السؤال ..ما راجع نفسو في الاربعة مرات دي انو يغير عنوان البوست؟؟
نادر يا مريم اساء اساءة واضحة ومباشرة بي عنوان البوست لي ملاسي..
شتمو عديل من العنوان..فالمتداخلين ديل يا يقولوا النصيحة انو نادر غلط زي ما بيغلطوا ملاسي..يا مافي داعي يكتبوا..
وهم بالطريقة دي بيمارسوا في الشلليات العندهم فيها رأي وبالتالي مافي واحد فيكم عندو مبدأ...
في واحد فيكم شاف عنوان البوست؟؟
ولا هو نظير ساي؟؟
مريم علبك الله انا عارفاك زوجتو...وعارفة انو ملاسي ونادر متلقحين بعض وعارف ملاسي غياظ...بس عنوان بوست نادر كان صح؟؟؟
علي العموم سلامي ليك ولي نادر..ومافي شي بيستاهل يا اخوان..
| |
|
|
|
|
|
|
|
|
|
Re: أين الخل الوفي...؟ في توضيح لما حدث مع نادر اليوم (Re: سارة علي)
|
نادر عباس من الناس البتحبو فى المكان دا ..
زول واضح ودغرى ..فقط يحتاج لان يكون اقل انفعالا
فى التعامل مع الذى يحدث هنا ...غير كدا .. ود
(جدع) ولو (اتختا) فى الجرح يطيب ...
بنفس القدر اخونا حسين ملاسى يفترض انو لايتعمد
اثارة نادر طالما ان التجربة اثبتت قبل سنوات
انو امورهم مابتمشى مع بعض ..هذا كل مافى الامر ...
وعلى فكرة كغيرى لم اشاهد البوست المحذوف ...
أتمنى أن يعيد بكرى باسويرد اخونا نادر ...
| |
|
|
|
|
|
|
|
|
|
Re: أين الخل الوفي...؟ في توضيح لما حدث مع نادر اليوم (Re: خالد عويس)
|
محمد عبدالرحمن
حرارة نادر دي سببها انه ما بدور الحال المايل.. يا ابيض يا اسود.. هو الحالة اتصلّح كتير :)...
عمتي عشه ازيك..
والله عاد نسوي شنو.. الواحد باله "سلبه".. لكن مرات بصل مرحلة لازم يعمل فيها شي.. رمضان كريم، والايام دي مع الحاج والحاجه.. ماما سألتني منك والله امس دي..
خالد عويس..
شكرا جزيلا يا صديقنا
بنت الحسين
| |
|
|
|
|
|
|
|
|
|
Re: أين الخل الوفي...؟ في توضيح لما حدث مع نادر اليوم (Re: عشة بت فاطنة)
|
تحية طيبة للجميع
من خلال معرفتى بـ حسين ملاسى من خلال هذا البورد ، (اشك) فى انه قد كتب ما يعيب فى حق (نادر)
فارجو مدنا بالتفاصيل ان كان هذا قد حصل !!! لا اعرف ما كتبه نادر فى حق ملاسى ! و لكن يدبو انه امرر جلل
عشان كده سحبو الباسورد حقو !!! فـ بعيدا عن العاطفة ارجو التوضيح اين اخطاء ملاسى ؟!!
ما عارف باسورد نادر سحبو ليه او عشان هو كتب شنو !!! عشان كده ما ح اقول رجعو ليهو باسوردو حتى اعرف ما كتب
و مع تطبيق القانون على الجميع حتى لا يصبح البورد غابة لا قانون لها
| |
|
|
|
|
|
|
|
|
|
Re: أين الخل الوفي...؟ في توضيح لما حدث مع نادر اليوم (Re: هيثم درار)
|
الاخ محمد الامين احمد...
لقد كتبت تفاصيل الموضوع أعلاه.. واتى الاخ حمد فتح الرحمن مشكورا بنص البوست الذي كتبه نادر.. ويبقى كلام الاخ محمد حيدر المشرف هو التلخيص الحقيقي لما جرى....فاسمح لي بأن آتي به هنا...
Quote: لم يوفق نادر فى عنوان بوست ..
سحب منه الباسويرد ..
..
تنجح كل ضربات ملاسي تحت الحزام
وتنتاش سهامه المسمومه من يريد
ويؤذى من يريد .. وقتما يريد
فيحتفظ بالباسويرد ..
..
سودانييزاونلاين |
الاخ محمد حيدر المشرف.. كلماتك لخصتك كلماتي الكثيرة.. وشرحت باختصار غير مخل، لكل ما جرى، وسوف يجري مع بقية الاعضاء.. هذا السيناريو ليس بجديد.. بل هو يعيد نفسه مع اشخاص كثر غيرنا..فشكرا جزيلا لك.. فقد كفيتني الكلام..
الاخ هيثم درار
شكرا جزيلا لك على التعليق.. وتشرفت بمعرفتك.. اعتقد انها اول مره نتقابل في بوست..
بنت الحسين
| |
|
|
|
|
|
|
|
|
|
Re: أين الخل الوفي...؟ في توضيح لما حدث مع نادر اليوم (Re: عشة بت فاطنة)
|
الاخت سارة دي صورة من واحد من البوستات الكتبه نادر ، و بالنسبة لكلمة قلة ادب دي اعتقد انها وصف لما يراه نادر من تطاول من حسين على زوجته .
اما بالنسبة لموضوع شللية و ما شللية فاعتقد انه لو في شللية اصلا كان مفروض شلة نادر يتدخلوا في المشكلة البين نادر و ملاسي من زمان . و لكن تدخل اصدقاء نادر في الوقت الحالي لعدة اسباب ، الاول سخرية حسين من كتابة مريم و المعروف ان هناك عداء بينه و بين زوجها، و الثاني سحب المداخلة التي سخر فيها حسين من مريم بدون ايقاف حسابه و ذلك يعتبر غتغتة لخطأ حسين ، و السبب الثالث ايقاف حساب نادر و هو الشخص المعتدى عليه .
| |
|
|
|
|
|
|
|
|
|
Re: أين الخل الوفي...؟ في توضيح لما حدث مع نادر اليوم (Re: محمد عبدالرحمن)
|
المحترمة مريم ..
تابعت ما حدث في البوستات المحذوفة
كتب الأخ نادر في البوست المحذوف:
| Quote: معاكسة زوجتي مريم بنت الحسين |
والذي كان عنوانه:
| Quote: قلة أدب حسين ملاسي |
إستعمال نادر لمفردات كالتي تحتها خط يعطي القارئ غير المتابع إنطباع أن ملاسي يحاول "التحرش أخلاقياً" بمريم زوجة نادر
وهو مالم يحدث مطلقاً .. ومحاولة تصويره بهذا الشكل لا أريد أن أقول أنه يدخل في باب عدم الأمانة
ما كتبه ملاسي لم يخرج من إطار سخريته ومشاكسته وسغالاته المعهودة ولكم كامل الحق في عدم هضمها وتقبلها والضجر منها
ليس لملاسي الحق في ملاحقة أسرتكم الكريمة وهو تصرف غير مقبول تماماً
وليس لنادر الحق في إلباس ما يفعله ملاسي ثوب التحرش الأخلاقي بك وتأليب الناس على أساس "معاكسته لك"
هذا مع المطالبة بعودة باسوورد الأخ نادر
| |
|
|
|
|
|
|
|
|
|
Re: أين الخل الوفي...؟ في توضيح لما حدث مع نادر اليوم (Re: تيسير عووضة)
|
العزيزة، الاصيلة، مريم...
سلامي وتحياتي العظام، لك، وللأخ العزيز نادر...
والله يامريم، مرات بحس أنو "بكري ده"،لا في العير، ولا في النفير، على المستوى الشخصي، أرسلت له أكثر من عشرات الماسنجر، ولا رد، وقررت عدم أنزال، أي بوست شخصي، سوى مداخلات، عند اللزوم،وكفى... والله ماعارف بدير المنتدى كيف....
تسلمي، ونرجو، من الإدارة، أرجاع كلمة مروروه، للأخ الفاضل نادر، عاجلا، ..
ورمضان كريم..
اخوك كرم الله
| |
|
|
|
|
|
|
|
|
|
Re: أين الخل الوفي...؟ في توضيح لما حدث مع نادر اليوم (Re: تيسير عووضة)
|
الحقيقة تقال نادر الذي قرأت له مداخلات طيلة ثلاثة سنوات بالبورد شخص إنفعالي للغاية ويستعمل كثيراً من
الألفاظ الجارحة عندما يختلف معه أحد أما ملاسي فهو وظيفته في البورد السخرية السياسية من كل عدو سياسي
له ولو أنه ذو بال طويل وغير خادش الألفاظ وهو يدافع دائما عن الكيزان والحكومة حتي وهي تهين بلد بأكمله
أما انت يا بت الحسين مريم انت من رواد البورد عفيفة الكلمة نظيفة اللسان حتي مع غريمك السياسي فليهنأ
البورد بمن مثلك....هذا هو رأي في ما عهدته دون مجاملة أو تحيز
| |
|
|
|
|
|
|
|
|
|
Re: أين الخل الوفي...؟ في توضيح لما حدث مع نادر اليوم (Re: صباح حسين طه)
|
Quote: أختنا مريم سلام عليكم و رمضان كريم
في بوست النصري بتاع الساندوتش أنا شفت ملاسي عمل كوتيشن لكلام إنتي كتبتيهو و خته تحتو إبتسامه و جا بكري سحب المداخله دي ، هل ده كل الموضوع و لا في حاجه تانيه ما أنا شفتها ؟
|
طالما الأخت مريم ما ردت أرجو من أي من الاخوه أو الأخوات يجاوبني ، لانو أنا كنت متابع بوست النصري ، و ملاسي كل العملو كوتيشن لكلام مريم و خت ليه إبتسامه صفراء ، هل في حاجه تانيه و لا ده الموضوع ؟!
| |
|
|
|
|
|
|
|
|
|
Re: أين الخل الوفي...؟ في توضيح لما حدث مع نادر اليوم (Re: أمين محمد سليمان)
|
معليش يا اخوانا، انا كنت ما موجودة.. وعارفين رمضان ودوشته.. وحاليا انا مع اهلي في الامارات، بنطلع كتير.. عشان كده غبته فترة طويلة....
اسمحوا لي جميعا مع احترامي للجميع ان ارد على الاخ أمين محمد سليمان...
| Quote: طالما الأخت مريم ما ردت أرجو من أي من الاخوه أو الأخوات يجاوبني ، لانو أنا كنت متابع بوست النصري ، و ملاسي كل العملو كوتيشن لكلام مريم و خت ليه إبتسامه صفراء ، هل في حاجه تانيه و لا ده الموضوع ؟! |
الاخ أمين.. اعتقد اننا ما اتعارفنا قبل كده.. وما حصل تداخلات بيناتنا.. فأهلا بيك... الموضوع عنده background قديمة .. مع ملاسي، ما ممكن تقيس حدث واحد، وتجي تقول انه ده الحصل... دي تراكمات كتيره... بعدين الكوت الانت بتتكلم عنه، محتواه نفسه يدل على رغبة في توصيل رسالة لنادر... بالإضافة إلى كده.. المسألة دي اتكررت اكتر من مرّه، في مواضيع تانية، كتبتها انا، على قلة مشاركاتي في الفترة الفاتت ... والهدف دوماً النيل من نادر عبري... وبصراحة اكتر، لو ما بكري شاف انه المشاركة الانت بتتكلم عنها في بوست النصري اتضررنا منها، ما كان سحبها.. ولا شنو؟؟
اذا انت عايز تحكم في الموضوع ده، بناءاً على الquotation الانت شفته في بوست النصري، فقط، فإنت بتحكم ظلماً (معليش على الكلمة)... لان الأمر له أبعاده التاريخية...
خليني اجيب كوت لكلام عجبني جداً... كتبهم هنا كل من اخونا محمد حيدر المشرف وأخونا حمد فتح الرحمن.. فهم البلخصوا الحاصل كله...
Quote: تنجح كل ضربات ملاسي تحت الحزام
وتنتاش سهامه المسمومه من يريد
ويؤذى من يريد .. وقتما يريد
فيحتفظ بالباسويرد .. |
| Quote: و لكن تدخل اصدقاء نادر في الوقت الحالي لعدة اسباب ، الاول سخرية حسين من كتابة مريم و المعروف ان هناك عداء بينه و بين زوجها، و الثاني سحب المداخلة التي سخر فيها حسين من مريم بدون ايقاف حسابه و ذلك يعتبر غتغتة لخطأ حسين ، و السبب الثالث ايقاف حساب نادر و هو الشخص المعتدى عليه . |
اتمنى ان يعذرني الجميع ... I'm overwhelmed بالردود التي وصلت.. وهي بحق، تجعلني سعيدة .. وبها كلها... وهي حتماً تُسعد نادر
بنت الحسين
| |
|
|
|
|
|
|
|
|
|
Re: أين الخل الوفي...؟ في توضيح لما حدث مع نادر اليوم (Re: مريم بنت الحسين)
|
ساره علي... تحية وشكرا ليك على التعليق
عنوان بوست نادر ممكن اطلع ليك امثاله من الأرشيف.. أقلهم البوست القريييييييب ده نزّله اخونا هشام هباني (مع احترامي ليه) وفيه نبز صريح ومباشر لبكري حسن صالح.. متذكراه؟ لو متذكراه يبقى case closed.. الموضوع فيه خيار وفقوس يا ساره، وده البزعّل...
رأيي الشخصي في عنوان بوست نادر، لو من ناحية مبادئي الخاصة، بكلمه بيه هو بصورة مباشرة... ولو من ناحية قوانين البورد.. ردي في موجود في الفقرة السابقة...
شكرا ليك مره اخرى.. وحقيقة كنت منتظره متين ارد على مداخلتك.. بس ما حبيت اتجاوز كل من خصص وقت عشان يكتب قبلك..
لك التحية.. والشكر والتقدير
بنت الحسين
| |
|
|
|
|
|
|
|
|
|
Re: أين الخل الوفي...؟ في توضيح لما حدث مع نادر اليوم (Re: صباح حسين طه)
|
العزيزة تيسير.. تحية
اعتقد انك الوحيدة التي وصلت إلى هذا الفهم .. واعتقد ان كل منا حين ينزل موضوعاً... لا يكون بهذا الوضوح في اوله.. ويستمر هو في توضحيه من خلال تساؤلات الاعضاء والعضوات... ولكن نادر لم يجد الفرصة لكي يوضح او يشرح... اما كلمة "قلة أدب".. فقد كتبت لزميلة سارة علي من قبلك بان هذه الكلمة كُتب من قبل أسوأ منها كعناوين لبوستات هنا.. فلو كان معيار بكري العنوان، فهو ميزان مختل، انفلت منه كلمات اقبح من قبل.. وان كان معيار بكري سوء الفهم، فمن حق نادر ان يشرح نفسه..
عزيزتي، المسألة ليست السغالة وسوء الهضم.. المسألة هي زجي في مشاكله مع زوجي ... وعدم اتاحت الفرصة لزوجي للوقوف ضده .. بكري راح مسح السغاله البتتكلمي عنها دي زاتها.. حتى انا ما بقدر اوريك ليها الآن... !
شكرا لك على التعليق.. وكل عام وانت بخير
عبدالغني العزيز ازيك ... بكري ده ما تشتغل بيه.. وما تحرمنا من كتاباتك عشانه.. من يومه ما برد.. ومن الله خلقه ياها دي حالته.. لو عايز تتكلم معاه، امشي مع ناس قندهار ديل.. لكن عليك الله كان تخلي الكتابة هنا عشانه..! كل سنة وانت طيب...
صباح حسين طه.. والله يا عزيزتي زي ما بقولوا "ما شكّرتيني".. نحن كزملاء في البورد بتمنى فعلا انه علاقاتنا تقوم على الاحترام المتبادل.. لكن لكل منا طريقته في التعبير عن نفسه.. انا هنا لا ادافع عن طريقة زوجي في النقاش.. ولكني اقف معه في محنه.. كنت انا السبب فيها
بنت الحسين
| |
|
|
|
|
|
|
|
|
|
Re: أين الخل الوفي...؟ في توضيح لما حدث مع نادر اليوم (Re: سارة علي)
|
Quote: الاخت مريم..
رمضان كريم
علي ما اظن انو نادر كان عارف حيسحبو منو الباسويرد ..
لانو نزل (اربعة) بوستات بنفس الاسم وانسحبت منو..
السؤال ..ما راجع نفسو في الاربعة مرات دي انو يغير عنوان البوست؟؟
نادر يا مريم اساء اساءة واضحة ومباشرة بي عنوان البوست لي ملاسي..
شتمو عديل من العنوان..فالمتداخلين ديل يا يقولوا النصيحة انو نادر غلط زي ما بيغلطوا ملاسي..يا مافي داعي يكتبوا..
وهم بالطريقة دي بيمارسوا في الشلليات العندهم فيها رأي وبالتالي مافي واحد فيكم عندو مبدأ...
في واحد فيكم شاف عنوان البوست؟؟
ولا هو نظير ساي؟؟
مريم علبك الله انا عارفاك زوجتو...وعارفة انو ملاسي ونادر متلقحين بعض وعارف ملاسي غياظ...بس عنوان بوست نادر كان صح؟؟؟
علي العموم سلامي ليك ولي نادر..ومافي شي بيستاهل يا اخوان.. |
سلام يا سارة رمضانك كريم (انتى و اخيتك وولده)
انا ما شفت و لا واحد من البوستات الاربعة
و كتبت مداخلتى على ما قرأت من قبل
و على ما عرف و ما افهم يعنى على حسب شوفى
شكرا على التنبية يا سارة
لكن بقول العدالة يحب ان تسرى على الجميع
اذا كان فى "عقاب" ما ببقى على الاساءات فى العنوان بس
والا ده عشان ظاهر و قاعد وش يا ما فى مداخلات تطمم البطن!!!!
مع العلم اننى ضد سحب البوستات و المداخلات
الا ما حالات محددة ومحددة دى فى عضمها مشكلة
دايرة الناس يقعدو فى بطن الواطة!!!!!!
والله انا بكتب كلام صعب خلاس
يعنى هل ده ممكن؟؟؟!!!!
اقول ليك حاجة يا سارة ياخ انا مرقت من هنا
اصلو الصداع مطلع زيتى زاتو!!!!!!!!
(عليك ناصرينى اصلو المناصرة قالو مجانية)
| |
|
|
|
|
|
|
|
|
|
Re: أين الخل الوفي...؟ في توضيح لما حدث مع نادر اليوم (Re: مامون أحمد إبراهيم)
|
صبري الشريف
ألف شكر على التعليق... وعايزه اسألك.. حد يشيل صورته مع اوباما.. معليش، نانسي عجاج رهيبه.. لكن داك اوباما!
سفيان بشير نابري
ألف شكر لك على التعليقات والاسئلة التي لن تجد إجابة بكل تأكيد... شكرا جزيلا لك...
عمو مأمون .. تحية لك وللعائلة الكريم.. ويبلغك الوالد والوالدة السلام.. نحن معاهم حاليا في الامارات في اجازه.. شكرا لك على كلماتك الجميلة
بنت الحسين
| |
|
|
|
|
|
|
|
|
|
Re: أين الخل الوفي...؟ في توضيح لما حدث مع نادر اليوم (Re: مهيرة)
|
الله يا سهام المجمّر... والله كلامك رصاص حي... شكرا لك والله رفعتي معنوياتي.. وخليتيني أقوى...
خالد العبيد..
شكرا لك على التعليق يا خال وجن.. ونلاقيك في ايام اسعد.. وظروف اجمل...
د.مهيرة..
لك التحية.. ورمضان كريم.. شكرا لك على التعليق.. ورفع البوست.. الوقوف بجانبنا...
بنت الحسين
| |
|
|
|
|
|
|
|
|
|
Re: أين الخل الوفي...؟ في توضيح لما حدث مع نادر اليوم (Re: محمد الجزولي)
|
تعرف يا عمو صديق الموج.. انت بالذات.. لو نبذتني انا وراجلي وولدنا.. بنحس انه حاجه نابعه من "نانيش" قلبك.. نيتك واضحة وظاهرة... وجواك معروف.. شكرا لك على محاولات الصلح.. والتي اتمناها ان تؤتي أوكلها...
محمد الحاج..
نرفض جميعا هذا الاسلوب.. ونتمنى ان يعود الحال على ما هو عليه... شكرا جزيلا لك..
محمد الجزولي، ابوحسن.. شكرا ليك على المطالبة بعودة كلمة السر بتاعت نادر.. وما نلقاك في محنه..
بنت الحسين
| |
|
|
|
|
|
|
|
|
|
Re: أين الخل الوفي...؟ في توضيح لما حدث مع نادر اليوم (Re: DKEEN)
|
الأخ البدري عبدالله
شكرا لك على مطالبتك بعودة باسورد نادر.. وفعلا لم نكن نريد للبورد ان يتحول إلى ساحة صراع بالهمز واللمز...وإنما بالفكر...
بت قضيم يا حبيبة...
سعيدة انا بمشاركتك هنا.. وفعلا انت قلبك أبيض، لذلك لا يمكنك ان تعايشي ما يحدث.. من ناحيتي، انا اود لهذا الامر ان ينتهي اليوم قبل غد.. ولكن الامر اعقد من رسائلك الصافية عبرالماسنجر.. تمنى لي الخير عزيزتي.. وشكرا لك
دكين...
سعيدة جداً بوجودك هنا.. وسعيدة أكثر انه نادر استعادك كصديق من خلال هذه المحنة... شكرا لمناصرتك.. وكلماتك ميزانها تقبل...
لفترة كنت قايلاك زعلان مننا..:)
بنت الحسين
| |
|
|
|
|
|
|
|
|
|
Re: أين الخل الوفي...؟ في توضيح لما حدث مع نادر اليوم (Re: مريم بنت الحسين)
|
الابنة مريم
اشهد الله انني لم ار منك الا كل تهذيب واحترام
ولكن زوجك رجل لا يحترم احد ويتحرش بالناس ويطاردهم بساقط القول
وقد فعل معي هذا وكتب بوست بعنوان تافه جدا وسئ الادب وهذه عادته
عليه ان يكف عن ملاحقة الناس وشتمهم
مع رفضي لسحب اي باسورد من حيث المبدأ
_____
لا اود احتراما لك ان احضر من الارشيف ما كتبه لي من ساقط القول
| |
|
|
|
|
|
|
|
|
|
Re: أين الخل الوفي...؟ في توضيح لما حدث مع نادر اليوم (Re: مريم بنت الحسين)
|
سلامات مريم
الحمد لله علي وصولك و محمود بخير لاسرتك الكبيرة
حقيقي أنا ملاحظة للحاصل بين ملاسي و نادر وطبعا مضايقني
ملاسي اعتبره احد اصدقايي الاسفريين الاعزا جدا
و انت و الله عزيزه جداً علي قلبي و معزتي لنادر من معزتك
أتمني ان ينتهي الموضوع كلو علي خير
____________________________
اكتر حاجه مضايقاني هي انك زعلانه
| |
|
|
|
|
|
|
|
|
|
Re: أين الخل الوفي...؟ في توضيح لما حدث مع نادر اليوم (Re: طارق جبريل)
|
تحياتي للجمبع...وتحياتي لصاحبة البوست ورمضان كريم
اولا انا مندهش غاية الاندهاش من الناس القالو انو السيد ملاسي شخص مهذب ومحترم ...انا ما بعرف انو الشخص يكون محترم كيف !!! وهو يتناول موضوع زواج احد الزملاء زي ما ذكرت السيده مريم بنت الحسين : | Quote: وجاء ملاسي ليهزأ من طريقة الزواج الذي قمت -بحسن نية- بإنزاله هنا في هذا المنبر... لم يتعود نادر ان يسكت عن من يناصبه العداء... وآلمه أن يسخر شخص لا يعرفنا ولا يعرف أهلنا، منهم... ومن طريقة عقد الزواج الذي تم.. وما تتعبه من قدسيه ورباط مقدّس يستوجب الاحترام... |
الاحترام اصلا ما بيعني انو السيد ملاسي يحشر (نخرتو) في خصوصيات الاخرين
والتهذيب ما بيعني انو السيد ملاسي يجدع ليهو كلمتين وهو مختبئ قابعا وراء شاشة كمبيوتره خلف غرفته المظلمه يحرق بيهم فشفاش زول تاني ....
الاخلاق والاحترام والتهذيب اصلو ما بتعارضو مع الظرافه والكياسه ...
انا احترم السيد نادر جدا لانو رجل شجاع لان غضبته كانت علي حق ... وتالله لو كنت محل نادر لعملت الشئ نفسه وربما أكثر ...
الاخلاق لا تتجزأ ...عندما تعرض السيد ملاسي للتعريض باسرته واصله لم نقف مكتوفي بل ادنا ذلك ...وكنت اعرف ان السيد ملاسي يلاحق الاخرين متهكما من غير كياسه دامجا ودامغا الخاص بالعام ....لذلك فرضية ان السيد ملاسي رجلا محترما فرضيه لا تجد الترحيب عندي وعند غيري من الزملاء في هذا المكان ...
اذا كان السيد ملاسي له شخصيتان واحده تتغمسه اثناء جلوسه اثناء ردوده واخري ظاحكه (ضاحكه) وودوده ليجمع حوله الصحاب ظاغطا علي الشخصيه الاخري فهذا يسمي في القواميس بالشيزوفرنيا (Schizophrenia) وحتما سيحتاج الي علاج ...ويبقي السيد نادر مصدر فخرا لكل من عرفه هنا لان قلمه لا يعرف التغبيش وgray (grey) areas
| |
|
|
|
|
|
|
|
|
|
Re: أين الخل الوفي...؟ في توضيح لما حدث مع نادر اليوم (Re: Elsanosi Badr)
|
| Quote: الاخ أمين.. اعتقد اننا ما اتعارفنا قبل كده.. وما حصل تداخلات بيناتنا.. فأهلا بيك. |
أختي مريم سلام عليكم و كتر خيرك علي ردك علي قبل بقيه الاخوان و الأخوات .
أنا لي تقريبا أربعه شهور في البورد ده ، لكن كنت متابع قبله بفتره ، و الله - بحلف ليك و أنا صايم - إنت من أكتر الناس أدبا و تهذيبا في هذا المكان و والدك دكتور أحمد الحسين - رغم مخالفتي الكبيره لفكره - من قلائل الناس هنا إحتراما لنفسه و للناس . أخونا نادر ما حصل قريت ليهو عشان كده ما بقدر أحكم عليهو من كتابتو هنا لكن كونو هو زوجك و نسيب دكتور أحمد معناتها ما ممكن يكون زول ساهل .
أخونا حسين ملاسي ما عندي بيهو أي علاقه شخصيه و ما تم بينا أي إتصال من أي نوع .
المقدمه دي ضروريه لانو من خبرتي الطويله جدا في سودانيزاونلاين - أربعه شهور - الناس بتصنفك أول بعدين بتقراك و ليس العكس ، يعني لو أنا قلت رأي مخالف لرأي الناس في البوست ، فده معناتو لاني بدافع عن صحبي أو عندي مشكله مع الطرف الاخر . فحبيت أوضح ليك إنو أنا مش ما عندي مشكله معاك ولا مع الاخ نادر ، بالعكس ما عندي ليكم غير المشاعر الطيبه . و في نفس الوقت ما عندي علاقه من أي نوع مع ملاسي .
| Quote: الموضوع عنده background قديمة .. مع ملاسي، ما ممكن تقيس حدث واحد، وتجي تقول انه ده الحصل... دي تراكمات كتير |
| Quote: اذا انت عايز تحكم في الموضوع ده، بناءاً على الquotation الانت شفته في بوست النصري، فقط، فإنت بتحكم ظلماً (معليش على الكلمة)... لان الأمر له أبعاده التاريخية... |
أنا يا مريم ما قلت حاجه و ما حكمت : أنا سألت بس ، عشان لمن أجي أقول ولا أحكم أكون عارف رقبتي بسوي في شنو .
Quote: بعدين الكوت الانت بتتكلم عنه، محتواه نفسه يدل على رغبة في توصيل رسالة لنادر... بالإضافة إلى كده.. المسألة دي اتكررت اكتر من مرّه، في مواضيع تانية، كتبتها انا، على قلة مشاركاتي في الفترة الفاتت ... والهدف دوماً النيل من نادر عبري... وبصراحة اكتر، لو ما بكري شاف انه المشاركة الانت بتتكلم عنها في بوست النصري اتضررنا منها، ما كان سحبها.. ولا شنو؟؟
|
أها هنا أنا مختلف معاك تماما ، لانو بفتكر بكري سحب المداخله بتاعت ملاسي ما لانكم تضررتو منها ، لكن لانكم إشتكيتو منها ، بمعني شنو الضرر الممكن يكون وقع عليكم لمن زول يجيب كلامك و يخت تحتو إبتسامه ، إنتو ما مشكلتكم تصرف ملاسي ، إنتو مشكلتكم ملاسي في عضمو ، و الدليل علي كده ، حميده عمل كوتيشن لنفس كلامك و خت نفس الابتسامه تحتها و عملها قبل ملاسي بكميه من المداخلات ، و لا إنت و لا نادر ما إشتكيتو .
و حكمه الله مداخله أخونا حميده - اللي هي نسخه طبق الأصل لمداخله ملاسي - قاعده لحدي هسي :
صورة سندوتش KFC الجديد ..منو والقبر
نادر فتح أربعه بوستات بعنوان (قله أدب حسين ملاسي ) ، قال إنو حسين ملاسي بيعاكس زوجتي ، إستعمل لفظ (يعاكس) في وصف تصرف ملاسي معاك يا مريم ، فهل ممكن العملو معاك ملاسي يكون إسمو معاكسه ؟
البجي يقرا البوست ده و مستعد أحلف إنو تسعه و تسعين في الميه منهم ما عارفين بالظبط الحصل شنو ، ممكن يكونو كلهم عارفين الbackgrounds القلتيها .
لكن البجي يقرا كلامك هنا و كلام نادر في البوستات المحذوفه يقول ملاسي قال فيك ما لم يقله مالك في الخمر ، في حين إنو كل العملو - و إتحذف - كوتيشن لكلامك و تحتو إبتسامه صفراء !!!!
كلنا عارفين إنو هذا المكان ما فيهو قانون و لا منطق ، القانون و المنطق هنا عباره عن قانون و منطق سيد بكري قدس الله سره ، يحذف ، يلغي ، يسحب باسورد بسبب ، من دون سبب ، مافي زول عندو عند سيد بكري شي البورد بوردي عملته وحدي ...الخ . و كلنا عارفين و ساكتين و مرتضين المسأله دي . بكري سحب البوست الأول ، نادر نزل التاني ، بكري يسحب و نادر ينزل و نادر كتبها إنو أنا حدي سحب باسوردي و ده العملو بكري .ما عارف نادر كان متوقع شنو غير إنو بكري يسحب باسويرده !
بعدين الناس المعترضه علي عدم سحب باسويرد ملاسي ، ملاسي ما بيشتم و لا يسيئ ، و عارف الكلام ده ما بيعجب الناس هنا ، لكنها الحقيقه . ملاسي بيستفز الناس و بالذات الناس العارفهم بيكرهوه زي أخونا نادر . هل في زول بيفتكر إنو ملاسي مفروض يتوقف عشان جاب كوتيشن لكلام زول و خت إبتسامه تحتها ؟!! ملاسي لعبو كلو قانوني عشان كده ما توقف و لا حا يتوقف ما عشان صاحب بكري و لا عشان بمشي قندهار !
All that been said والله بتحير كيف ملاسي يكون عندو المقدره إنو يجيش كميه الكراهيه دي عند الناس و ما تتهز فيو شعره . ما ممكن يكون في زول بيستمتع بكراهيه الناس ليو ، حتي لو بيعملها بدون إساءه و شتايم .
لي رجاءين لو في زول شغال بي ، واحد لاخونا ملاسي إنو يا أخي ما تستفز الناس لدرجه إنو المسأله تبقي حاجات الناس كلها في غني عنها . الرجاء التاني لسيد بكري إنو يرجع الباسويرد بتاع نادر .
و شكرا يا مريم علي استحمال نقتي الكتيره دي ، و تحياتي لنادر و دكتور أحمد .
| |
|
|
|
|
|
|
|
|
|
Re: أين الخل الوفي...؟ في توضيح لما حدث مع نادر اليوم (Re: أمين محمد سليمان)
|
الاخ السنوسي..
تحياتي .. وشكري لك على كلماتك القوية.. وتحية لك في هذا الشهر الكريم... لك تقديري
الاخ أمين محمد سليمان.. تحية مره أخرى
والحقيقة انني لم اكن اعرف ان هناك نقاش دائر بينك وبين د.احمد.. وبالمناسبة، أفكاره هي افكاري... انا أيضاً جمهورية.. واتمنى ان اعكس هذا الامر بصورة تتناسب ومع هذه الفكرة التي اعتبرها عظيمة...
بالنسبة لسودانيز أونلاين.. انا معاك في انه هنا بيتم تصنيفك... وبعداك القراءة ليك.. وده شي ممكن ألقى ليه عذر لأنه الناس هنا كلهم في عالم افتراضي.. الواحد بحتاج يمسك في حاجه عشان يفهم بيها شخصية التاني ... للأسف الامر ده بخلي الواحد يتظلم في مواقع كتيره جداً.. وانا طبعا ما افترضته انك حكمته.. لكن فضّلت ارد على تساؤلك.. لأنك كتبته مرتين.. وحاولت أستعجل فيه قبل ما ابدأ أرد على البقية.. وانا ما متعودة أقول شي ما اعمله.. قعدت لبعد السحور وانا برد على الناس الكتبوا لي هنا واحد واحد وواحده واحده زي ما كتبته وألزمت نفسي.. اتمنى انه مساعي ملاسي للتقليل من اهتمامي بردك ألا تلقي بالاً لديك... فقد رددت عليك قبل أن ابدأ بالرد على 31 شخص قبل... وعشان تعرف انه انسان بحاول يزرع الشقاق بين الناس وبفتش لأخطاءهم بياتو طريقة...
ممكن أوافقك في دوافع بكري في سحب مداخلة ملاسي... وممكن أوافقك الرأي.. لكن بقدر اقول ليك برضه انت ما في مكاني... حميّده كتب نفس تعليق ملاسي.. وانا رديت عليه... وكان ممكن ادخل معاه في نقاش لو حاول يكتب تاني ويعلّق تاني.. والحقيقة نادر ما بتدخل لما اختلف مع اي من الاخوان والاخوات الموجودين هنا... لكن نادر بعرف اني متجاهله ملاسي تماماً.. ما برد عليه ولا بعلق على شي بقوله... لذلك اخذ على عاتقه انه يرد بدلي... لذلك مقارنة رد ملاسي برد حمّيدة ما اعتقد انها مقارنة سليمة... كلامي في البوست هنا عبارة عن سرد تاريخي لعلاقتنا مع ملاسي.. ولو انت دخلت في مشكلة معاه، حتقدر تعرف طريقته واسلوبه اكتر..
موضوع الشتيمه وكونه مبرر لسحب الباسورد ولا لأ... انا بشوف ناس كتيرين بكتبوا كلام موش بس فاشح وبذيء، والله ما بقدر اعمل ليه كوت زاتو... وبرضه بستمروا ويواصلوا.. ميزان العدالة في النقطة دي مختل.. وبكري لأنه ما بقدر يتابع الناس كلها بتكتب شنو، ما من حقه يجي يحقق العدالة هنا!
| Quote: لي رجاءين لو في زول شغال بي |
وبالطبع شغالين بيك، وبحترم رأيك.. المسألة مافيها شك.. وبتمنى ليك صيام مقبول..
بنت الحسين
| |
|
|
|
|
|
|
|
|
 Re: أين الخل الوفي...؟ في توضيح لما حدث مع نادر اليوم (Re: Hussein Mallasi)
|
| Quote: وكت انت الساكنة في البورد سكنة ما اتذكرتي يبقى اقتياد السنوسي من أذنيه أمر ثابت. |
ماتعتمد كتير على النقطة دي عشان تلقى ليك مخارجة
وماتعتمد على إنك مهم وبتتبع مداخلاتك
لانك مرات كتيرة دمك بيكون واقف وتقيل
وبتسيء للناس متعمد مع إنك اكتر زول في البورد دا مابيتحمل زول يدوس ليك على طرف
ومن واقع سكنتي في البورد بقول ليك الكلام دا
| |
|
|
|
|
|
|
|
|
|
Re: أين الخل الوفي...؟ في توضيح لما حدث مع نادر اليوم (Re: nadus2000)
|
من حق اي زول يبقى الشي العايزو ويطرح نفسو وفق مايشاء ومايشتهى
عنيف ..عادي ..خروف..او مايشاء..
من حق اي زول يحدد ويهن تكون اخلاقو ..في طرف نخرتو او في طرف الاخرة..
بس ليس من العدل ان يتشال باص ويرد زول بحجة اللوائح واللوائح مآكلة تبتدي في البورد وتنتهي في قندهار..
اعد للرجل باص ويرده يابكري
..
حاول مط اللوائح دي تاني حبة لتستوعب حاجات نادر فلقد استوعبت عجبا قبل ذلك..
| |
|
|
|
|
|
|
|
|
 Re: أين الخل الوفي...؟ في توضيح لما حدث مع نادر اليوم (Re: سارة علي)
|
Quote: tmbis
شكرا لك على رفع البوست... |
.. لا شكـر على واجب ..
.. طبعا البقول الحق في البورد دا .. بيطلع اي كلام .. أي كلام .. لكن احيي بعضهم هنـا وبعضهن في هذا البوست كتبوا ما هو واضح بالعين المجردة .. دون الانحياز إلى مبدأ الصداقة والمعرفة .. أو البعووولة أو الأخوانيات .. أو العشرة وحق الجيرة ..
مع الاحتفاظ بوجوه بعضهم .. الذين اتوا فقط للنيل من حسين ملاسي لخلافات ما زالت قايمه ويتصيدون فقط الفرصة للرجم .. كما حاول أن يفعل السيد نادر وارتدت له محاولته وخرج من هذا المكان بتفصيل صاحب الموقع الذي يقوم بكل العمليات .. الفنية والاخراجية.
تم ابعادي من قبل .. بنفس الفكرة .. حالتي ما كتبت لي بوست في عنوانو ادعاء بطولات وهمية ..
ياخ انا كتبت .. ناس المريخ وقفو وارقو .. لقيت نفسي واقف .. التقول بكري دا عبد الحميد الضو حجوج الله يرحمو ..
سوف لن يعود نادر البطل إلا بعد أن يتم فترة فرضها صاحب الموقع لامثاله من الخارجين عن القانون .. سوف لن يرجع وهذا افضل له في رمضاننا هذا .. يشوف ليهو سبحة وتبروقه ومصحف .. ويقرا ما تيسر له من كتب عن الطوفان .. وتعاليم الاستاذ محمود محمد طــه عشان يعرف ما يشتم الناس .. ويبطل حركاتو بتاعت مساعد صاجه .. ومساعد حلـه دي .. لانو دي حركات بتاعت ناس ما مثقفين .. وهو طارح نفسو مثقف .. وطارح نفسو أنو لسانو طويل..
طبعا بتكون بتقرا في كلامي دا .. انا بعتذر ليك لاني ما بحب اكتب عن زول وهو موقوف .. لكن ما يمارس في هذا البوست لهو مضحك .. وأنا والله ما عايز الناس تضحك عليك اكتر من ضحكانهم عليك ..
على العموم .. احتفظ لك بحق الرد على شخصي الضعيف وطويل حالما ينتهي رمضاننا هذا ويتم فك اسرك.. من ناحية أخرى سأعمل بكل استنفار من أجل رفع هذا البوست .. ولو بنقطه وذلك اضعف الايمان .. لكن لو بكري رجعك في رمضان دا؟! أنا اكون بالغته .. امثالك يجب أن يوقفوهم مع نهايات شهر شعبان .. أو مع غــرة رمضان من كل عام ..
سوف يكون البوست ذا جدوى اكتر لو مر الجمهوري حيدر بدوي من هنا وحاضرنـا عن لزوم ما يلزم ووصايا الاستاذ محمود وعرج بنا إلى المدح .. والذم .. إلخ ..
( الســـاكسفونست ) المدهش .. خالد عبد الماجد ..
..
| |
|
|
|
|
|
|
|
1
|
صفحة 1 „‰ 3: << 1 2 3 >>
|
|
|
| |
مريم بنت الحسين
Omar Bob
وجن
البدري عبد الله
بت قضيم
محمد عبد الماجد الصايم
حامد محمد حامد
Rawia
saif massad ali
الطيب عثمان يوسف
حمد فتح الرحمن
خالد عنان عمر
abubakr salih
أمين محمد سليمان
صديق الموج
Mohammed Elhaj
محمد الجزولي
tmbis
عبدالكريم الامين احمد
وليد محمد المبارك
Siham Elmugammar
خالد العبيد
مهيرة
حيدر حسن ميرغني
Abdelgadir Galal Ahmed
Yassir Tayfour
Hussein Mallasi
سفيان بشير نابرى
مامون أحمد إبراهيم
كمال عباس
سارة علي
محمد عبدالرحمن
عشة بت فاطنة
محمد الامين احمد
محمد حيدر المشرف
هيثم درار
عبدالغني كرم الله
smart_ana2001
طارق جبريل
Elsanosi Badr
أسامة عبد الجليل
nadus2000
فيس بوك
تويتر
انستقرام
يوتيوب
بنتيريست