|
|
 هل كانت فعلاً أضغاث أحلام أم رؤى مستقبلية ؟! وما علاقتها بالأحداث الجارية في القاهرة والخرطوم؟!
|
كنت قد كتبت في هذا المنبر قبل أيام قليلة من إندلاع أعمال التظاهرات في القاهرة والخرطوم ثلاثة بوستات عبارة عن أحلام شاهدتها في منامي ... وكانت مشاهدها في غاية الوضوح والدقة بصورة لم أعهدها من قبل ..!! حيث أنني لم يسبق لي أن تذكرت حلما حلمته بتفاصيله الدقيقة إلا هذه الأحلام الثلاثة وقد رايت أن أحكيها لأعضاء المنبر ليشاركوني تفسيرها !!
وبعد أحداث التظاهرات الأخيرة في القاهرة والخرطوم رجعت للبوستات مرة أخرى فوجدت أن كثيرا من المتداخلين قد اعطوا تفاسيرا قريبة للأحداث التي نشهدها الان .. كما أن هنالك الكثير من المشاهد والصور لم نجد لها تفسيرا ..!! إلا أنني أزعم أنني وجدت تفسيرا لها الآن من خلال وقائع الاحداث التي تجري الأن في القاهرة والخرطوم ..
سنستعرض الأن بعض العبارت والتفاسير التي وردت في تلكم البوستات وستجدون شيئا غريبا وتطابقات مذهلة حد الدهشة ..!!
|
|
 
|
|
|
|
|
|
|
 Re: هل كانت فعلاً أضغاث أحلام أم رؤى مستقبلية ؟! وما علاقتها بالأحداث الجارية في القاهرة والخرط (Re: ناذر محمد الخليفة)
|
كان حلمي الأول كالتالي :
Quote: []الحلم بيبدأ وأنا في حتة غريبة .. خلا أو قرية أو حدود .. الكلام دا بالليل ..!! في طرمبة بنزين فيها عاملين إتنين قاعدين قداما (والعاملين ديل ما إتحركو من مكانم كلو كلو لحدي نهاية الحلم) ..!! أنا جيت طالع من الطرمبة دي شايل لي سرير تعبان ومرهق مشيت بعيد شوية من الطرمبة دي زي مية متر كدة وختيت سريري ورقدت فيهو وأنا بعاين للطرمبة .. وراي طوالي في بحر جاري وعلى يميني وأنا راقد في غرفتين لونم أبيض .. والحتة قاحلة وما فيها أي حاجة .. بعد شوية أنقرو الجا منو سايق عجلة .!!
جا زميلنا انور التكينة لابس ليهو رداء وقميص شاكيهو تحت الردا لونم الإتنين كاكي ولابس في كراعو بوت طويل وشراب لونو كاكي برضو .. زي لبس المغامرين الإنجليز زمان .. وقف عجلتو جمبي ونزل سلم علي وسلمت عليهو .. قلت ليهو الجابك هنا شنو ؟! قال لي جيت أصور !! قلت ليهو وينا كميرتك ؟! الزول طلع لي كاميرا بمبية لكن كبيرة قدر التلفزيون 14 بوصة .. وقال لي يا ها دي ..!! الزول بدا يصور .. بيصور في شنو أنا ما عارف .. الحتة ما فيها غير الطرمبة وسريري الراقد فيهو والأوضتين ووراي في بحر جاري ..!!
فضلت أعاين ليهو بعد شوية قام جاني قال لي أنا داير أقول ليك حاجتين .. قال لي أعمل حسابك من البحر الوراك دا لأنو غدار وإحتمال لو أنا نمت البحر يفيض ويغرقني !!! والحاجة التانية إنت عارف أنا جيت هنا أصور شنو ؟! قلت ليهو شنو ؟! قال لي الرئيس حسني مبارك عندو بتين وهم نازلين في الغرفتين ديل ..!! كل واحدة في غرفة .. وهسي هم أظنهم ناموا وأنا ماشي لمن يصحو ويطلعوا برة ناديني عشان أصورم ..! قلت ليو جدا يا أنور بناديك .. أنور طوالي ركب عجلتو وإتخارج ..!! والعجلة سبحان الله !! سريعة جدا أسرع من الموتر لأنو إختفى طوالي !!
عاينت للغرفتين وعاينت للطرمبة .. ما في شي غريب .. رقدت نمت وأنا بين نايم وصاحي سمعت جوطة وناس بتكورك : سرقو بت حسني مبارك !! حصلو الجماعة ديل !! صحيت لقيت في لمة جمب البحر والناس بتعاين في البحر ..! سألت واحد من الجماعة الحصل شنو ؟! قال لي إنت نايم وما شايف شغلك وفي ناس خطفوا بت حسني مبارك !!(مع إنو ما في زول مشغلني حسب علمي في الحلم) !! عاينت للطرمبة لقيت الاتنين ديلاك في نفس قعدتم ولا حتى إتحركو من مكانم ..!!
بعد شوية أنور التكينة جا تاني بالعجلة زعلان وهائج !!: يا خي انا ما قلت ليك خلي بالك من البنات ديل ؟ هسي خطفوا واحدة ؟! أنور هاج ودق جرس بعد شوية جات عجلة تانية وقفت أنقروا العجلة التانية السايقا منو ؟!!
العجلة التانية جا سايقا حسني مبارك زاااتو ..!!
لابس زي لبس أنور التكينة وفي الحلم بدا شبابي شوية طوالي دخل قدامي في دراما : بنتي ..!! يا لهوي !! وجلكسات المسلسلات ديك وأنور التكينة خايف وأعصابو بايظة وأنا زاتي أعصابي باظت .. وفضلت أهدي في حسني مبارك وأقول ليهو أصبر وحا نلقاها ليك وهو يعييييييييط !!! بعد شوية قال لي أنور أمشي نادي بتي التانية ..!! أنور سرعة سرعة مشى واحدة من الأوضتين جا وجاب معاهو البت التانية .. الغريبة بت حسني مبارك التانية كانت سمرا تشبه السودانيين لكن بتتكلم مصري ..!! طوالي وقعت في حضن أبوها وقعدت تعييييييط : أخدوها اختي يا بوي !! بي لهجة صعيدية ..!! وحسني مبارك بيحاول يهدي فيها .. قال ليها انتي بس أعملي حسابك وما في حد حا ياخدك مني ..!
بعد شوية حسني مبارك قبل علي وقال لي إنت ما شايف شغلك وإنت قاعد ساكت (وأنا مستغرب شغلي شنو والمشغلني منو!!) .. أنور التكينة جا يتدخل حسني مبارك نهرو ليك وقال ليهو إنتو الإتنين أنا حا أأدبكم وقام نادى : يا عمر سلمان ؟!! يا عمر سلمان ؟؟! جات ليك عجلة تالتة وقفت (أنا ما عارف قصة العجلات في الخلا داك شنو!!) جا ليك عمر سلمان واقف .. (أنا لحدي هسي ماشفت عمر سلمان مدير المخابرات المصرية على الطبيعة .. لكن حكمة ربنا شفتو في الحلم وعرفتو طوالي) ..!! حسني مبارك قال لي عمر سلمان أحرس لي بتي دي وشوف لي البت التانية لو في طريقة ترجع ..! عمر سلمان مشى على البحر ومعاهو أنور .. عمر سلمان بيعاين للبحر وأنور يصور سااااااي في البحر وأنا واقف متمحن ..!! بعد شوية جا عمر سلمان قال لي حسني مبارك خلاص أنا عرفتها بتك مشت وين .. إنت أمشي إرتاح وأنا الصباح برجعا ليك .. (ولد دا .. والله كان بيرجعا ليو ما عارف) ..!!
حسني مبارك دور عجلتو وإتخارج وأنور التكينة ردف بت حسني مبارك التانية في عجلتو ووصلا أوضتا ودي كان أخر مرة أشوف أنور التكينة في الحلم !!
بعد شوية عمر سلمان قال لي أنا حا أسامحك على تقصيرك في شغلك لكن لازم تخلي بالك من بت الريس التانية (وأنا لحدي هسي مستغرب شغلي في الحلم كان شنو والشغلني منو !!) قال لي لو شعرت بي أي حركة كدة ولا كدة بس كورك لي وأنا بجيك على طول ومعاي التعزيزات ..!!
ودور عجلتو وإتخارج على كدة ..!!
عاينت لي الطرمبة لقيت الطير ديلاك قاعدين ولا شغالين بالموضوع عاينت للبحر لقيت البحر قرب شديد من سريري !! داير احرك السرير بعيد من البحر السرير أبى يتحرك .. دقيت طناش ونمت على كدة ..!!
صحيت على حاجة بتتحرك في جسمي (النوم والصحيان دا كلو في الحلم يا اخوانا) !! صحيت لقيت في يدين كبار طالعات من البحر وجارة بت حسني مبارك دايرة توديها البحر والبت تكورك ..!! سرعة سرعة نطيت من السرير وقبضت البت وأنا بجر من هنا واليد ديك تجر من هناك البت تكورك :
ألحقووونييييييي وأنا أكورك يا عمر سلمااااااااان !!
ألبت تكورك : يا لهوييييييييييييي وأنا اكورك يا عمر سلماااااااان !!
بي هنا البت تسكـلـب : يا خراااااااشييييي !! وأنا بي هناك :يا أنور التكييييييييينااااااااا !!
اليد تجر على البحر وأنا أجر برة البحر وعمال الطرمبة زي المرسومين شايفننا لكن ما دايريين يتحركوا !!
البت تكورك : ألحقني يااباااااااا : وأنا أكورك : يا عمر سلمااااااااااان !!بعد شوية جاني كف طاير !!
فتحت عيني لقيت المرة مخلوعة : قول بسسسسسسسسسم الله !! عمر سلمان دا منو البتكورك ليهو وش الصباح !! |
:
لاحظو للجمل المكتوبة بالأحمر ..
أول أمبارح تقريبا كنت بتفرج في قناة العربية لي مشاهد تنصيب عمر سليمان نائب لرئيس الجمهورية .. أنا أول ما شفت عمر سلمان جاتني رعشة .. !! لأني في الحلم أنا قلت :
| Quote: أنا لحدي هسي ماشفت عمر سلمان مدير المخابرات المصرية على الطبيعة .. لكن حكمة ربنا شفتو في الحلم وعرفتو طوالي |
والرعشة كانت بي سبب أني أول مرة أشوف عمر سلمان في التلفزيون وقبل كدة ما شفتو .. فإكتشفت إنو عمر سلمان الظهر في حلمي هو نفسو عمر سلمان الكان بيأدي القسم قدام حسني مبارك !! نفس الملامح والشبه وطريقة الوقوف وكل شي .. بس في الحلم كان لابس لبس المغامرين الأنجليز باللون الكاكي .. ..
وكان واضح من طريقة تعامل حسني مبارك مع عمر سلمان (في الحلم قصدي) أنو عمر سلمان هو نائب حسني مبارك وكان بيديهو التعليمات وحتى وكلو يفتش بتو الشالا البحر !!
إذا كان من الواضح إنو عمر سلمان ظهر لي كنائب لي حسني مبارك قبل تنصيبو في المنصب دا بفترة بسيطة ..!!
أما أنور التكينة الكان بيتابع المنظر وبيصور في اللاشي فالتفسير الوحيد إنو بيمثل قناة الجزيرة في الحلم .. لأني ذكرت إنو الكاميرا ظهرت كبيرة قدر التلفزيون أربعطاشر بوصة .. ولأنو أنور (قناة الجزيرة) وصل للموقع أول زول وقعد يصور في اللاشي كأنو بيفتش عن أخبار حتى لمن جا يمشي قال لي لو بنات حسني مبارك صحو وريني ..!!
الحاجة الغفل عنها المفسرون ناس كيكي وباقي الشباب في البوست إنو بنات حسني مبارك في الحقيقة ما بيمثلو وحدة السودان ولا بيمثلو النيل والديمقراطية زي ما أتصوروا .. في تفسيري الخاص وبالقياس لي الأحداث الجارية حاليا في مصر .. بنات حسني مبارك في الحقيقة هم أولادو جمال وعلاء !! والبحر الجاري دا هو المظاهرات الشغالة هسي ..!!
طيب كيف ؟!!
انا ذكرت المكان منعزل وما فيهو حاجة والناس كلها في حالة ترقب .. ومكان زي دا بيجيهو الزول البيكون بيحضر لي شي أو بيتجهز لي شي .. ما في شي بيجيب بنات حسني مبارك (اللي هم أولادو) لي حتة منعزلة بعيدة عن الناس إلا لو داير يجهزم أو يهيأم لي شي بعيد من العيون !! وبالقياس للحلم بنلقى إنو بت حسني مبارك الشالا البحر (المظاهرات) هي ولدو جمال مبارك الأبوهو كان بيهيأو لخلافتو ..!! وعمر سلمان لمن جا البحر وعاين للمظاهرات قال لي حسني بكرة الصباح برجع ليك بتك (جمال) والقصد إنو لمن الأمور تهدأ أنا بتنازل من منصبي لي ولدك جمال ..!!
أما علاء مبارك فيبدو إنو عندو دور بيلعبو والجماهير حاولت تختفوا وتلحقوا أخوهو جمال (في إشارة لرفض توريث الأبناء) بس أنا صحيت في الوكت المناسب وقبضتو في أخر لحظة .. ولمن أنا بكورك لي عمر سلمان وأنور التكينة يلحقوني وما جو فدا بيدل إنو قناة الجزيرة وحتى عمر سلمان كنائب أول لرئيس الجمهورية ما عارفين علاء أبوهو بيهيأو لي شنو ..!!
دا الحلم الأول والله أعلم ..!!
| |
|
|
|
|
|
|
|
|
|
Re: هل كانت فعلاً أضغاث أحلام أم رؤى مستقبلية ؟! وما علاقتها بالأحداث الجارية في القاهرة والخرط (Re: ناذر محمد الخليفة)
|
الحلم التاني فيهو تداخل غريب :
Quote: مسرح الحلم المرة دي شارع زلط في حتى كدة في الخرطوم .. الفنان المرحوم بادي محمد الطيب ظهر بيغني بي كل هيبة وجلال أغنية في الفؤاد ترعاه العناية .. وأنا شغال معاهو بالطبلة وعلى يميني قاعد بعام بتاع حفلات معروف في الخرطوم ساكت ساااااي بيكشف للحاصل بس !!وجمبي طوالي في كورس بتاع شيالين مصريين كلهم بعرفم .. الكورس بقيادة الممثل المصري محمد سعد (اللنبي) وباقي الكورس مصريين (نقاشين وسباكين) كانو شغالين معاي في الشركة ..!
الملاحظة الأولى الحتة البنغني فيها دي ما فيها جمهور .. والمصريين الشيالين حافظين الأغنية دي تماما .. بادي غنى : (نحن للقومية النبيلة ما بندور عصبية القبيلة ، علمونا جدودنا وقبيلا قالوا نفدي الوطن العزيييييييز) !! قمت أنا إنتشيت وصرخت (أُو) ودي هي الصرخة البيصرخا بادي لمن ينتشي في الغنا وتجيهو حالة الجذب ديك ..!
بادي حمر لي شديييد وجا جمبي قال لي (أو) دي ما بتقولا إنت .. بقولا أنا .. والمصريين مسخنييين مجتهدين في الكورس ..!! بادي دخل في بيت تاني وصوت الساوند عالي جدا (مرفعين ضبلان وهازل شق بطن الأسد المنازل النبقى حزمة كفانا المهازل نبقى درقة وطني العزيز) .. قمت أنا جاتني الحالى سبعطاشر وما مسكت روحي قمت صرخت بي طريقة بادي المعروفة (أوووك) !! بادي تاني حمر لي وجا علي .. قال لي دي أخر مرة أسمعك تكورك .. المرة الجاية بكسر ليك طبلتك دي في راسك !! قلت ليهو طيب إنت قول (أُو) دي عشان أنا ما أقولا !! قال لي أنا بعرف أقولا وين ومتين إنت بس خليك مع الطبلة ...!!
وأخوكم في الحلم مجضم الطبلة دي جضيم السنين .. بادي واصل في غناهو والمصريين بيشيلوا معاهو ويرقصو .. بعد شوية كدة أنا إندمجت مع الطبلة وحركة المصريين في الرقص وغيرت إيقاع الغنية لي عشرة بلدي .. المصريين إنبسطو للطيش وطوالي عملوا دايرة وقام اللنبي طلع في تربيزة وقعد يرقص زي رقيصو الشفناهو في الفلم بتاعو داك !! وأنا بالرغم من تغيير الإيقاع شغال (أو) (عووووووك) ومتكيف جدا انو المصريين ما منعوني ..
بعد شوية عمنا بادي جا علي زعلان جدا وقف التعليمة الحاصلة دي ! وقال لي ما تشتغل معاي بالطبلة دي لأنك خربت الإيقاع إشتغل لي بالبنقز بس ... أنا أبيت دقيت جرس والمصريين برضو دقوا جرس معاي . قالوا كمان هم ما بيشيلوا مع بادي إلا بالطبلة .. بادي زعل جدا إختفى من قدامي كدة وظهر تاني شايل البنقز أم تلاتة عيون داك وشال مني الطبلة ورفعم مع بعض .. قال لي إختار يا الطبلة يا البنقز ؟ المصريين بقيادة اللنبي شابكني ليك : إختار الطبلة يا عم ؟ أهو نحن مبسوطين معاك ومش ما نعينك تقول (أُو) زي ما حضرتو بيمنعك !! عمنا بادي هرشني وقال لي إختار سريع .. وأنا قلت أحسن ما أخسر عمنا بادي (إحتمال اشتغل معاهو بي عدادات تقيلة في باقي الأحلام الجاية) قمت طوالي شلت البنقز ..
المصريين زعلو جدا .. واللنبي إتوتر وعمنا بادي فرح شديد وقال هو ماشي وأنا لا زم أجهز حالي للحفلة الجاية .. عمنا كانت عربيتو قدامو بوكسي أب زيك موديل 78 ولا كم ما عارف .. دور البوكسي وشتت خلاني مدور شمطة مع المصريين وأنا بحاول أبرر ليهم ليه أنا اخترت البونقذ ما الطبلة وهم جايطين ....
صحبي اللنبي زعلان جدا وقال هم راجعين مصر وتاني ما دايرين كلام معاي تاني وهم حا يرجعوا السودان إلا لمن يعرفوا أني رجعت للطبلة تاني وخليت البنقذ !!
حكمة ربنا فجأة كدة يجي بص فخم جدا في نص الزلط يقيف مكتوب فيهو الخرطوم - القاهرة !! المصريين تلبوا جو البص وأناوالبعام البيباري الحفلات داك تلبنا وراهم بحاول أقنع فيهم وهم راسم ناشف !! بعد شوية جا كمساري البص .. الكمساري واحد جارنا في الحلة عندو ركشة سايقا ما عارف ركشتو وداها وين والجابو البص شنو !! ..
في حاجة مهمة .. البص كبير وواسع ومقاعدو فاضية ما فيها زول .. ورغم كدة أنحنا كلنا كنا واقفين شماعة !! الكمساري سألني قال لي إنت ماشي القاهرة . قلت ليهو لا لا .. نزلني في أبو حمامة أنا وصحبي دا !! صحبي دا عاين لي قال لي ويييييييييييين أنزل معاك ؟!أنا اشي القاهرة مع المصريين ديل .. قلت ليهو إنت جنيت ولا شنو ؟ البيوديك القاهرة شنو ؟ قام اللنبي عاين لي بي زعل وقال لي أنا بوديهو معايا إنت أطلع منها خالص ..!!
البص وقفني ليك في محطة أبو حمامة ..! نزلت شعرت بالجوع .. أبو حمامة فيها محل بتاع طعمية رهيب خلاص (دي بالجد ما في الحلم) .. مشيت لي بتاع الطعمية قولت ليهو أديني سندوتشي !! بتاع الطعمية قال لي إنت من زمن الطعمية ؟ أنا بدري خليتا وهسي عندي حاجة تانية تجربا ؟! طبعا كنت جعان قلت ليهو أديني منها ..!!
صحبي دا قبل كدة وجاب لي كُشري ..! قلت ليهو دا شنو دا ؟ قال لي دا ألذ كشري حا تاكلو في حياتك كدي جربو .. شلت المعلقة أول لقمة أبت تنبلع وقفت لي في حلقي ..!! قلت ليهو أديني موية أنا خنقت .. قال لي لا لا موية ما في اكل كدة بس (يعني بلع ناشف) ! اللقمة التانية كانت حارة عدييل شعرت بيها وهي نازلة إنها جرحت لي حلقي ..! قعدت اكورك : عليك الله أديني جغمة موية .. وبتاع الطعمـ .... قصدي بتاع الكشري قال لي موية مااااااا في .. أكل كدة بس ..! قلت ليهو خلاص ما داير أكل .. قال لي ما علي كيفك .. جا جمبي شال المعلقة وبقى يأكل فيني بالرجالة وأنا شاعر الكشري دا ما داير ينزل من زوري !!وهو يأكل فيني لحدي ما الصحن فضى وأنا شعرت حلقي إتجرح وبقى ناااشف ..
بعد شوية شعرت إني خنقت وطوالي قمت من النوم مخلوع !!
إتلفت كدة لقيت ما في لا كشري لا بطيخ !! حمدت الله وقمت من السرير عشان أشرب موية .. لمن بديت اشرب موية شعرت بي جفاف في الحلق الموية زي الما دايرا تنبلع رغم إني صحيت من النوم ومن الحلم ..!!
ووالله العظيم لي هسي شاعر بي حلقي ما طبيعي وما ببلع أكل و شراب بي سهولة !!
|
حسب المشاهد الحاصلة على أرض الحلم وأرض الواقع في الخرطوم والقاهرة.. الحلم دا مرحلة إنتقالية بيبشر بي بداية التمرد وانطلاق الثورة والمظاهرات سواء هنا في الخرطوم أو القاهرة .. والتمرد والتعنت بيبتدي لمن أنا رفضت أضرب البنقز لي بادي محمدالطيب وأخترت بدلو الطبلة .. من الاول .. والتمرد التاني على المصريين لمن أنا رفضت ارجع للطبلة وأخترت البنقز !! والمصريين في قمة الثورة والغضب قالو حا يرجعوا مصر .. وركبو بص مكتوب فيهو الخرطوم - القاهرة .. ومشو وهم زعلانين وفي قمة الثورة وأظن مشو فشوا زعلم وغضبتم دي في شكل المظاهرات الطالعة هناك اليومين دي ..!!
بالنسبة للخرطوم .. فالتجهيز للثورة كان لمن أنا نزلت في أبو حمامة والمطعم جاب لي كشري وابى يتبلع !!
الكشري كان عبارة عن (نموذج الثورة المصرية) وابى ينبلع دلالة على انو نموذج الثورة دي حاولنا نطبقوا في الخرطوم بإستخدام نفس أدوات الثورة المصرية (الإنترنيت وهلم جرا) .. وعدم مقدرتي على إبتلاع الكشري دليل على فشل تطبيق النموذج دا في السودان رغم محاولات من يسوقوا للكشري (للنموذج) كانت جادة جدا (بتاع الكشري مصر يبلعني النموذك بي نفسو وانا ما بينبلع لي !!)
هذا والله أعلم ..!!
دا بوست الحلم التاني بالكامل :
حلم تاني بحاجة لتفسير عاجل : الفنان بادي محمد الطيب وأ...طبلة والكورس مصري !!
| |
|
|
|
|
|
|
|
|
|
Re: هل كانت فعلاً أضغاث أحلام أم رؤى مستقبلية ؟! وما علاقتها بالأحداث الجارية في القاهرة والخرط (Re: ناذر محمد الخليفة)
|
ناذر احلامك مبااالغة و الله. مسلسلات بس.
__________________________________
كنت فى الابتدائي تانية او تالته (ما متزكره) , كان الكلام ده فى عز زمن نميرى. حلمت انوا فى زحمة شديده جدا. و لما سالت الناس الحاصل شنو قالوا لى نميرى فات. قمت سالت : اها , الحيكمنا منو?. قام اخوى (كان ماسكنى من يدى فى نص الزحمة ديك) قال لى: "ح يحكمونا الناس الديل " و اشر على كمية من الرجال لابسين عمم و جلاليب. صحيت من النوم و كلمت امى. ضحكت على و قال لى : نميرى ان شاء الله يمشي , لكن ما شكله ماشي اى حته قريب.
بعد شهر قامت الانتفاضة. و تذكرت امى الحلم فى اول ايام الجمعية التاسيسة و هى بتعاين فى التلفزيون للعمم والجلاليب
| |
|
|
|
|
|
|
|
|
|
Re: هل كانت فعلاً أضغاث أحلام أم رؤى مستقبلية ؟! وما علاقتها بالأحداث الجارية في القاهرة والخرط (Re: ناصر احمد الامين)
|
شيخ ناذر خليفة
سلام
كنا مجموعة نتابع أخبار إنتفاضة مصر، فعندما أعلن عن تعيين عمر سليمان نائباً لحسنى مبارك تذكرت حلمك العجيب وسردته على الحاضرين.
معنى إسمك (ناذر) (خليفة) ربما لديه مدلول أن تأتى إشارات للأحداث عن طريقك تنذر بها، عن سقوط نظام ومن سيكون خلفه أو الخليفة له.
فى حلمك الأول أتفق معك فى أن البحر يمثل المظاهرات، أو بمعنى أشمل الطوفان الشعبى الذى إجتاح وقضى أو سيقضى على حكم حسنى مبارك
بنتى حسنى مبارك ، ترمزان للسلطة ، البنت الأولى التى أختطفت ترمز لكسر الشعب المصرى لحاجز الجبروت والأمن المتعسف، وفقدان النظام وحسنى مبارك التحكم فى ذمام الأمور، فهو فقدان فعلى للسلطة وإنهيار للنظام، وإن كان يعاند آملاً فى تخطى الأزمة. ويتم تعيين عمر سليمان نائباً للرئيس، ويتحدث معك حسنى وسليمان بمراقبة البنت الثانية والإستنجاد بالأخير إن دعى الأمر ـ ولذلك يستمر البحر فى الإزدياد والطوفان (ثورة الشعب).
البنت الثانية ترمز للترتيبات الحالية عمر سليمان نائب، وحكومة جديدة، ويستمر الطوفان الذى يكاد يغرق السلطة والتى تتمسك بخيط واهن ان يخارجها عمر سليمان ويجهط ثورة الشباب. من نداءاتك له وعدم ظهوره فهذا يعنى إنتصار الثورة (رغم أن الحلم لم يكمل المشهد)
العجلة (عجلة أنورالتكينة، وعجلة حسنى، وعجلة سليمان) .. كلمة عجلة لغوياً من معانيها الإسراع والتعجيل ، وثورة الشباب وإسقاط حكم حسنى مبارك صارت فى عجل بم يتوقعه أحد. أيضاً هنالك معنى آخر إستخدام العجلة كوسيلة تنقل و(إتصال). وفى الحلم لم تستخدم تلفون أو موبايل للإتصال بأنور التكينة أو عمر سليمان. هذا يشير لقطع وسائل الإتصالات الحديثة أثناء الأحداث .. قطع الإنترنت والموبايلات
والفرجة بالتلفزيون (تلفزيون التكينة) .. والتكينة لو من منطقة الجزيرة بالسودان، بيرمز لقناة الجزيرة
فى الحلم أنور التكينة (وسيلة الإتصال) ردف بنت حسنى السمراء، ربما تعنى نقل أخبار ثورة مصر سيردفها بنقل ثورة السودان!
| |
|
|
|
|
|
|
|
|
|
Re: هل كانت فعلاً أضغاث أحلام أم رؤى مستقبلية ؟! وما علاقتها بالأحداث الجارية في القاهرة والخرط (Re: نادر الفضلى)
|
حلم الفنان بادى وأغنيتة الوطنية من فؤاد ترعاه العناية ... الأغنية كلماتها معبرة وتحكى
واقع حال الشعبين السودانى والمصرى الآن وتحث على تضامن الشعب لإحداث التغيير
(مرفعين ضبلان وهازل شق بطن الأسد المنازل النبقى حزمة كفانا المهازل نبقى درقة وطني العزيز)
الصحيح مرفعينين (إتنين) أحدهما ضبلان والتانى هازل
مرفعنين ضبلان وهازل شقو بطن الأسد المنازل .. نبقى حزمة كفانا المهازل نبقى درقة وطنى العزيز
كلمات رائعة للمرحوم يوسف التنى ... تعنى أن فى فى تجمع أفراد الشعب قوة تستطيع أن تجابه
و تهزم العدو القوى كما فعل المرفعينين الضبلان والهازل بالأسد
الكورس المصرى المصاحب لبادى، إشارة لتطابق كلمات الإغنية بأمر سيحدث فى مصر .. إنتفاضة الشعب
وسفر الكورس المصرى من السودان لمصر حاملاً تلك المعانى
| |
|
|
|
|
|
|
|
|
|
Re: هل كانت فعلاً أضغاث أحلام أم رؤى مستقبلية ؟! وما علاقتها بالأحداث الجارية في القاهرة والخرط (Re: عمر موسي منجي)
|
سمارت ..!!
Quote: كنت فى الابتدائي تانية او تالته (ما متزكره) , كان الكلام ده فى عز زمن نميرى. حلمت انوا فى زحمة شديده جدا. و لما سالت الناس الحاصل شنو قالوا لى نميرى فات. قمت سالت : اها , الحيكمنا منو?. قام اخوى (كان ماسكنى من يدى فى نص الزحمة ديك) قال لى: "ح يحكمونا الناس الديل " و اشر على كمية من الرجال لابسين عمم و جلاليب. صحيت من النوم و كلمت امى. ضحكت على و قال لى : نميرى ان شاء الله يمشي , لكن ما شكله ماشي اى حته قريب.
بعد شهر قامت الانتفاضة. و تذكرت امى الحلم فى اول ايام الجمعية التاسيسة و هى بتعاين فى التلفزيون للعمم والجلاليب |
قوية يا دفعة ..
للأسف الزمن داك ما كان في إنترنيت عشان تحكي حلمك فيهو ههههه
| |
|
|
|
|
|
|
|
|
|
Re: هل كانت فعلاً أضغاث أحلام أم رؤى مستقبلية ؟! وما علاقتها بالأحداث الجارية في القاهرة والخرط (Re: عمر موسي منجي)
|
نادر ..
Quote: معنى إسمك (ناذر) (خليفة) ربما لديه مدلول أن تأتى إشارات للأحداث عن طريقك تنذر بها، عن سقوط نظام ومن سيكون خلفه أو الخليفة له.
|
وأنا مستغرب من إسمي الصعب دا أبوي جابو من وين ؟ حتى ابوي اله يديهو العافية قال بس الإسم جابو كدة !!
تراها الشغلة جايا من فوق هههههههههه
Quote:
العجلة (عجلة أنورالتكينة، وعجلة حسنى، وعجلة سليمان) .. كلمة عجلة لغوياً من معانيها الإسراع والتعجيل ، وثورة الشباب وإسقاط حكم حسنى مبارك صارت فى عجل بم يتوقعه أحد. أيضاً هنالك معنى آخر إستخدام العجلة كوسيلة تنقل و(إتصال). |
أنا طبعا كنت مستغرب في الحلم وبعد الحلم من سرعة العجلات دي واحتمال كبير أنها فعلا بترمز للإتصال وبالذات الفيس بوك !!
Quote: وفى الحلم لم تستخدم تلفون أو موبايل للإتصال بأنور التكينة أو عمر سليمان. هذا يشير لقطع وسائل الإتصالات الحديثة أثناء الأحداث .. قطع الإنترنت والموبايلات
والفرجة بالتلفزيون (تلفزيون التكينة) .. والتكينة لو من منطقة الجزيرة بالسودان، بيرمز لقناة الجزيرة
|
يا سلام عليك يا نادر .. أنا ما كنت منتبه لقطع وسائل الإتصال دي ..
وأنور التكينة فعلا من قرية التكينة بالجزيرة ..
كدا خلاص ثبتنا أنور التكينة في الحلم يمثل قناة الجزيرة ..!!
Quote: الكورس المصرى المصاحب لبادى، إشارة لتطابق كلمات الإغنية بأمر سيحدث فى مصر .. إنتفاضة الشعب
وسفر الكورس المصرى من السودان لمصر حاملاً تلك المعانى |
تقريبا دا هو الجا في تفسيري بعد الأحداث ..
تسلم يا نادر ما قصرتمعاي .. قصدي ما قصرت مع حلمي ..!
| |
|
|
|
|
|
|
|
|
|
Re: هل كانت فعلاً أضغاث أحلام أم رؤى مستقبلية ؟! وما علاقتها بالأحداث الجارية في القاهرة والخرط (Re: عمر موسي منجي)
|
عمر منجي ..
Quote: بصراحة مناماتك قوية و الرؤيا جزء من ستة و اربعين جزء من النبوة او كما قال (ص)
|
لا حوللاااااااااااه مالك بعدتها كدة .. هسي أنا قايل لوحي قربت هههههههه
Quote: بعدين انت مناماتك وااااضحة كده ليه " ما قعد تتعشا ولا شنو"
|
هههههههه
أنا لو مناماتي ما كانت واضحة كدة ما كنت حكيت إطلاقا ..!!
Quote: عن بنات حسني مبارك البنات في المنام هن الدنيا و نعيمها
و نعيم الحاكم دائما السلطان و الجاه ولا جاه بلا مال
البنت الاولي هي السلطان و الرئاسة و عمر سليمان يحاول انقاذها
اما الجاه فاحتمال بعد ما "يغور" ان شاء الله بنوك سويسرا تعمل فيهو زي بن علي
و تجمد اموالو "اموال الشعب المسكين"
|
ما عارف لكن كل الدلائل بتشير إنو بنات حسني مبارك هم أولادو جمال ومبارك !!
| |
|
|
|
|
|
|
|
|
|
Re: هل كانت فعلاً أضغاث أحلام أم رؤى مستقبلية ؟! وما علاقتها بالأحداث الجارية في القاهرة والخرط (Re: Nazar Yousif)
|
حبيبنا نزار ..
كيفك وأحوالك ؟!!!
Quote: تحياتى ناذر
وهل يعقل أن لا ينشغل الوعى
واللاوعى بهذا الجنون فى الوطن ؟
نحمدالله أن حلمنا بحياة كريمة لا يستأذن
للدخول فى عوالم لا نحيط بها لنتنفس ولو فى النوم . |
العقل الباطني مرات بيتفاعل مع الأحداث بطريقة عجيبة ..!!
أحيانا يسبق الأحداث وأحيانا يرسم المستقبل في شكل أحلام ..!!
وأحيانا يترجم تمنياتك لي أحلام قابلة للتحقيق ..!!
بس كيف إنت تلقى التفسير الصحيح لي أحلامك وكيف تستخلص منها العبر ..
تحياتي نزار ..!!
| |
|
|
|
|
|
|
|
|
|
Re: هل كانت فعلاً أضغاث أحلام أم رؤى مستقبلية ؟! وما علاقتها بالأحداث الجارية في القاهرة والخرط (Re: ناذر محمد الخليفة)
|
ناذر يا بعاتي
علي اليمين حلمك يخوف
اكتر حته ممكن انظر ليك فيها
Quote: (أنا لحدي هسي ماشفت عمر سلمان مدير المخابرات المصرية على الطبيعة .. لكن حكمة ربنا شفتو في الحلم وعرفتو طوالي)
في بعض الاحيان تمر بنا احداث صغيره ليس لها اي قيمة عندنا, فلا يبقى منها شيء في الذاكرة
لكن المخ العجيب قد يحتفظ بجزء منها لا اراديا في مكان ما وقد تتم استعادة هذا الجزء في وقت اخر و في ظروف مختلفة
اليك هذا السيناريو الافتراضي:
كنت انت ناذر تتحدث في الموبايل مع احدهم و تشاهد التلفزيون في نفس الوقت..
اثناء اندماجك بالمكالمة ورد خبر عن مصر و فيه تم ذكر اسم عمر سليمان و عرض صورته
لم يكن الخبر الوارد بذي الاهمية عندك و لم يلفت انتباهك عن المكالمة, ة بالتالي هذا الحدث الصغير الهايف بالنسبة لوعيك مر مرور الكرام اثناء مكالمتك, لكن الصورة التي رايتها دون قصد و الاسم الذي سمعته دون قصد تم القرن بينهما لا اراديا و الاحتفاظ بهما في مكان ما من مخك. هذه المعلومة المخزنة دون علمك قد يتم استرجاعها في ظروف اخرى عند الحاجة كما حدث معك في الحلم.
و كان من الممكن ان يحدث الاسترجاع بطريقة اخرى, كأن تفتح احدى الجرايد مثلا و تجد صورة عمر سليمان فتعرفه دون ان تقرأ اسمه. او ان تمر بالتلفزيوت و تجد عمر سليمان يتحدث في احدى القنوات فتعرفه على الفور, و عند عرض اسمه بعد قليل في الشاشة تفسر ذلك بانك استنتجت الامر لذكائك.
والله اعلم.
| |
|
|
|
|
|
|
|
|
|
Re: هل كانت فعلاً أضغاث أحلام أم رؤى مستقبلية ؟! وما علاقتها بالأحداث الجارية في القاهرة والخرط (Re: عمر صديق)
|
فتحي علي ..
Quote: كنت انت ناذر تتحدث في الموبايل مع احدهم و تشاهد التلفزيون في نفس الوقت..
اثناء اندماجك بالمكالمة ورد خبر عن مصر و فيه تم ذكر اسم عمر سليمان و عرض صورته
لم يكن الخبر الوارد بذي الاهمية عندك و لم يلفت انتباهك عن المكالمة, ة بالتالي هذا الحدث الصغير الهايف بالنسبة لوعيك مر مرور الكرام اثناء مكالمتك, لكن الصورة التي رايتها دون قصد و الاسم الذي سمعته دون قصد تم القرن بينهما لا اراديا و الاحتفاظ بهما في مكان ما من مخك. هذه المعلومة المخزنة دون علمك قد يتم استرجاعها في ظروف اخرى عند الحاجة كما حدث معك في الحلم.
و كان من الممكن ان يحدث الاسترجاع بطريقة اخرى, كأن تفتح احدى الجرايد مثلا و تجد صورة عمر سليمان فتعرفه دون ان تقرأ اسمه. او ان تمر بالتلفزيوت و تجد عمر سليمان يتحدث في احدى القنوات فتعرفه على الفور, و عند عرض اسمه بعد قليل في الشاشة تفسر ذلك بانك استنتجت الامر لذكائك.
|
والله إحتمال تكون نظريتك سليمة . لكن أنا متأكد إني ما شفتو قبل كدة في حتة .. أمكن زي ما تقول شفتو لمحة على السريع أو ظهرت صورتو في جريدة وأنا ما ركزت فيها كويس وإتحفظت في العقل الباطني ..
بس المتأكد منو أنا أتخلعت لمن شفتو في التلفزيون بي نفس الهيئة الظهر فيها في منامي تقريبا لأني عرفتو طوالي ..!!
مشكور على التفسير يا حبيب ..
| |
|
|
|
|
|
|
|
|
|
Re: هل كانت فعلاً أضغاث أحلام أم رؤى مستقبلية ؟! وما علاقتها بالأحداث الجارية في القاهرة والخرط (Re: عمر صديق)
|
فتحي علي ..
Quote: كنت انت ناذر تتحدث في الموبايل مع احدهم و تشاهد التلفزيون في نفس الوقت..
اثناء اندماجك بالمكالمة ورد خبر عن مصر و فيه تم ذكر اسم عمر سليمان و عرض صورته
لم يكن الخبر الوارد بذي الاهمية عندك و لم يلفت انتباهك عن المكالمة, ة بالتالي هذا الحدث الصغير الهايف بالنسبة لوعيك مر مرور الكرام اثناء مكالمتك, لكن الصورة التي رايتها دون قصد و الاسم الذي سمعته دون قصد تم القرن بينهما لا اراديا و الاحتفاظ بهما في مكان ما من مخك. هذه المعلومة المخزنة دون علمك قد يتم استرجاعها في ظروف اخرى عند الحاجة كما حدث معك في الحلم.
و كان من الممكن ان يحدث الاسترجاع بطريقة اخرى, كأن تفتح احدى الجرايد مثلا و تجد صورة عمر سليمان فتعرفه دون ان تقرأ اسمه. او ان تمر بالتلفزيوت و تجد عمر سليمان يتحدث في احدى القنوات فتعرفه على الفور, و عند عرض اسمه بعد قليل في الشاشة تفسر ذلك بانك استنتجت الامر لذكائك.
|
والله إحتمال تكون نظريتك سليمة . لكن أنا متأكد إني ما شفتو قبل كدة في حتة .. أمكن زي ما تقول شفتو لمحة على السريع أو ظهرت صورتو في جريدة وأنا ما ركزت فيها كويس وإتحفظت في العقل الباطني ..
بس المتأكد منو أنا أتخلعت لمن شفتو في التلفزيون بي نفس الهيئة الظهر فيها في منامي تقريبا لأني عرفتو طوالي ..!!
مشكور على التفسير يا حبيب ..
| |
|
|
|
|
|
|
|
|
|
Re: هل كانت فعلاً أضغاث أحلام أم رؤى مستقبلية ؟! وما علاقتها بالأحداث الجارية في القاهرة والخرط (Re: عمر صديق)
|
المسافر ...
Quote: يا سماكي بيه
انت تشوف في البولطي يتاكل قدام عينيك
وأنت ماك مسمك وتروح تتضامن مع الما ليهم سمك
|
تقول شنو بس .. ما جعلي وأحمق !! قلت أطلع ميادة دي وألحق سمك محمد عادل ..!
لا لميت في دوم كردفان لا طلت بلح الشام !!
Quote: تلغرافا عنوانو حاج أمير
خبرو كور كاردوقا كبير
تور عثمان للنعلين شبك
قال ليه حولين ما ضاق السمك
حاجة نفيسة قالت معاي بنتي
بس التضوقو وتمشي كورتي |
شكرا للإهداء يا المسافر ..!!
مع إني ما فهمت الغنية السمكية دي بتقول شنو لكن للضمان كدي لبست سفنجتي !!
| |
|
|
|
|
|
|
|
|
|
Re: هل كانت فعلاً أضغاث أحلام أم رؤى مستقبلية ؟! وما علاقتها بالأحداث الجارية في القاهرة والخرط (Re: ناذر محمد الخليفة)
|
تعرف يا ناذر ذكرتني بي نص كتبو التشكيلي المتفرد الاستاذ احمد عبد العال
و هو عباره عن قصه قصيره اسمها (جمعية المنتفعين بنومه) .. مبالغة
اقتطاف من السرد:
Quote: وبدأ الإلحاح من مئات المكدودين أو الطامعين في الزيادة ، بل وممن لا يعرفهم مطلقاً . بعضهم يزوده بصورته الفتوغرافية الملونة واضحة الملامح ، وبعضهم يزوده بسيرته الذاتية بتفاصيلها الدقيقة ليستظهر كل ذلك في عقله الباطن قبل النوم ..
والحال كهذا إضطرب نظام الحركة والمرور في الشوارع المحيطة بالمصلحة . إزدحام ومنامات وباعة شاي وسندوتشات وخلافات بين المنتظرين القادمين من شرق البلاد وغربها .
أصبح الرجل مكدوداً أكثر من ذي قبل ، لكن لم يـحدث مطلقاً أن رأي حلماً لنفسه هو شخصياً ، كل الأحلام وحصادها الوفير لغيره من الناس . حاول المستحيل لكن بالطبع ما كان الأمر بيده . وفرِّخت الأحلام وإزدهرت حـيـوات ، وسـرعـان ما تأسست جـمعـيـة حـقـيقية بأسم ( جمعية المنتفعين بنومِه ) . |
| |
|
|
|
|
|
|
|
|
|
Re: هل كانت فعلاً أضغاث أحلام أم رؤى مستقبلية ؟! وما علاقتها بالأحداث الجارية في القاهرة والخرط (Re: ناذر محمد الخليفة)
|
الاخ نازر حلمك واضح وتفسيرك راجح ....النفرين الثابتين بدون حركة ديل الجيش المصرى لان مهمته هى ما قمع المظاهرات وانما درء المخاطر المتمثلة فى طلمبة الوقود التى يحرثانها... وهو ما قام به بالفعل بعد ما صحيت من نومك والله اعلم ..... اما حلمة مناضلى الكى بورد بقيادة بكرى ابوبكر ـــ وهذا ليست اساءة ــ فقد فسرتها انت ولم تضح النقاط فى الحروف والنقاط هى البحر الذى زحف تحت سريرك فى الحلمة الاول يقابل خور ابوعنجا فى الاخيرة والفرق شاسع بين مظاهرات تمثل ببحر متلاطم الامواج واخرى بخور ابوعنجة المتواضع ، اما وجود من ذكرتهم وهم ... بكرى ابوبكر .. ميادة .. اكلة السمك والمستقلين بالحالة التى هم عليها من عدم التعاون، ونضيف على ما ذكرت سوء نيتهم الذى منعهم من عدم استغلال المركب الابيض وهو المظاهرات السلمية ، هو السبب فى فشلهم وفشل المظاهرات فى السودان الشى الذى لم تذكره صراحة .... موت المؤتمر الوطنى والاخريين ربما يعنى طول حياتهم فهنالك حلالات من الحلم تفسر بالعكس والله اعلم ....ابوسليمان
| |
|
|
|
|
|
|
|
|
|
Re: هل كانت فعلاً أضغاث أحلام أم رؤى مستقبلية ؟! وما علاقتها بالأحداث الجارية في القاهرة والخرط (Re: محمد سليمان عبد الله)
|
محمد سليمان ..
| Quote: ....النفرين الثابتين بدون حركة ديل الجيش المصرى لان مهمته هى ما قمع المظاهرات وانما درء المخاطر المتمثلة فى طلمبة الوقود التى يحرثانها... وهو ما قام به بالفعل بعد ما صحيت من نومك والله اعلم . |
برضو إحتمال راجح مع إحتمال المعتصمين القالت عليهو نازك ..!!
| Quote: اما حلمة مناضلى الكى بورد بقيادة بكرى ابوبكر ـــ وهذا ليست اساءة ــ فقد فسرتها انت ولم تضح النقاط فى الحروف والنقاط هى البحر الذى زحف تحت سريرك فى الحلمة الاول يقابل خور ابوعنجا فى الاخيرة والفرق شاسع بين مظاهرات تمثل ببحر متلاطم الامواج واخرى بخور ابوعنجة المتواضع ، |
يا سلام عليك يا محمد سليمان ..
أنا كنت عارف حلمي بتاع أبو عنجة دا فيهو ثغرات ..!!
| Quote: اما وجود من ذكرتهم وهم ... بكرى ابوبكر .. ميادة .. اكلة السمك والمستقلين بالحالة التى هم عليها من عدم التعاون، ونضيف على ما ذكرت سوء نيتهم الذى منعهم من عدم استغلال المركب الابيض وهو المظاهرات السلمية ، هو السبب فى فشلهم وفشل المظاهرات فى السودان |
ما متعاونين الشوية دي بس ..!!
يا خي الشغلة كأنها ما هاميهم ..
عشان كدة الشغلانية طرشقت في النهاية ..!!
| Quote: الشى الذى لم تذكره صراحة .... موت المؤتمر الوطنى والاخريين ربما يعنى طول حياتهم فهنالك حلالات من الحلم تفسر بالعكس والله اعلم ....ابوسليمان |
قالوا في الأحلام لو حلمت بي زول مات فدا معناتو عمرو طويل ..
يعني بالواضح كدة ما دام ال 16 سنة ما نفعت أرجو الـ 61 ..!!
مش يا هو دا كلامك ؟!!
مشكور يا محمد سليمان ..
| |
|
|
|
|
|
|
| |
ناذر محمد الخليفة
Nazik Eltayeb
بشير حسـن بشـير
ناصر احمد الامين
smart_ana2001
نادر الفضلى
عمر موسي منجي
محمد الشابك
المسافر
Nazar Yousif
Fathi Ali Mohammed
عمر صديق
Mahjob Abdalla
فيس بوك
تويتر
انستقرام
يوتيوب
بنتيريست