تحياتي - يا زول كن دا سؤالك وغرضك كل يوم الصباح تعال البورد وأسأل . ونحن نتمتع ونحاول نجيب على سؤالك !! الزول دا كان ما أخاف الكضب من بابنوسة !! من أهلك المسيرية . كان صابت صابت وكان لا كمان أنا إتمتعت يا كبر , وأستحقيت الشكر الصباحي على ذوقك العزّال .
بحيراوي
10-15-2011, 08:18 AM
عائشة موسي السعيد عائشة موسي السعيد
تاريخ التسجيل: 07-10-2010
مجموع المشاركات: 1638
جابتنا سيرة الأبيض ـ بس والله آخر زول شفنا يغني في الأبيض كان عمر بانقا قبل أكثر ربع قرن!! دحين أعمامك الهنا في الموقع ديل كوووولهم من ذلك الجيل ، يمكن عصام دهب لسه جونيور،،
سلام ومحبة،،
10-15-2011, 08:23 AM
امينة عيسى امينة عيسى
تاريخ التسجيل: 11-20-2010
مجموع المشاركات: 619
ياخ سيرة الابيض ونيـــــالا دى براها تنعش الروح انا غايتو عشت فى الابيض اكتر من نيالا بس ما عرفتو{وش خجلان} وبيت ناس حمودة البعرفهم فى الابيض دا ما بيشبهم
بس عليك امان الله الوليد غناى تب
10-15-2011, 08:26 AM
عصام دهب عصام دهب
تاريخ التسجيل: 06-18-2004
مجموع المشاركات: 10401
الفنان الشاب ادم نيالا بدأ تجربته بدري شوية..و كان بيجي يحي بعض الحفلات في الدلنج.. عندو غنية ظريفة خلاص اولها بيقول ( اٍي يا أمي..خلي نفنط كدي كن نلقى مراد قلبي)..و هي اغنية تراث من دارفور..و كان بيغنيها في الحفلات..ولاحقا اشتهرت عند محمود عبد العزيز.. فاخونا ادم من قولة تيت كان منتبه لفكرة التراث..و ما رأيته في هذا الفيديو..انو شكلو ماشي كويس خالص..و امنياتنا له بالتوفيق.. طبعا كنت داير انزل تجربة زول تاني..غناي شديد..و خليك قريب..
و نشوفك
كبر
10-15-2011, 07:09 PM
Kabar Kabar
تاريخ التسجيل: 11-26-2002
مجموع المشاركات: 18537
صديقي البحيراوي..حبابك كتر خيرك على المرور من هنا..و مشاركتنا الإحتفال المبسط بالفنان ادم حمودة.. قربت يا البحيراوي..واخونا ادم من ناس نيالا..و اشتهر في الأبيض بهذا الإسم.. و بدا الغناء في الأبيض في النصف الثاني من الثمانينات..
و نشوفك.. كبر
10-15-2011, 07:18 PM
Kabar Kabar
تاريخ التسجيل: 11-26-2002
مجموع المشاركات: 18537
استاذتي و صديقتي عايشة..حبابك كتير خيرك على المرور من هنا.. بالجد سعيد بهذا المرور اللطيف..
Quote: ومن خلال هذا البوست التحيات لخديجة وام بلينا السنوسي.
كلام صحي ..ياخي ربع القرن ده بقى زي الدقيقة.. لا ادرى عن علاقة اخونا الفنان ادم حمودة بالأستاذ حمودة..و لكن الشاب ده بدأ حياتو الفنية في مدينة الأبيض..و كان بيجي يحي بعض الحفلات في مدينة الدلنج..و اول حفلة حضرتها ليهو كانت في سنة 1988.. طبعا دايما بنحتسر على ايام زمان..و كنا بنقول حليل زمان لمن كان جوز الحمام تلاتة..و من هذا الباب بنقول حليل زمان لمن كان ثنائي النغم كان تلاتة.. و برضك نشكر النت فهو قرب المسافات و اشياء اخرى ، على بعض حكماء المنتديات..و لقينا لينا فرصة نشوف ثنائي النغم (خديجة و زينب)..و لغاية الليلة بجر في سبحتي عشان القى لي فيديو للأستاذة ام بلينا السنوسي.. غايتو نحن اخر جيل اخر المحظوظين..و حضرنا حفلات حية لأستاذ ابراهيم موسى ابا..و استاذنا صديق عباس..لغاية ما حضرنا زمن ادم نيالا.. و بمناسبة مرورك نهديك خديجة و زينب..
و نشوفك طوالي يا عائشة.. كبر
10-15-2011, 07:23 PM
Kabar Kabar
تاريخ التسجيل: 11-26-2002
مجموع المشاركات: 18537
Quote: جابتنا سيرة الأبيض ـ بس والله آخر زول شفنا يغني في الأبيض كان عمر بانقا قبل أكثر ربع قرن!!
صديقي عبد اللطيف..حبابك كتر خيرك على المرور من هنا.. الأبيض دي مدينة عندها نكهة براها يا صديقي..و فيها جنس تفاصيل..دايرة ليها مجلدات من الحكي..
متلما قالت استاذتنا و صديقتنا عائشة.. ياخو ربع القرن ده قريب خلاص.. حضرت حفلة لصديقنا عمر بانقا في سنة 1987..و في السنة البعدها مباشرة حضرت حفلة لأخونا ادم نيالا..و عجبنا صبر ادم و مثابرتو.. لغاية ما وصل هذه المرحلة المميزة..
و دمت.. كبر
10-15-2011, 07:32 PM
Kabar Kabar
تاريخ التسجيل: 11-26-2002
مجموع المشاركات: 18537
امينة..حبابك يا صديقة.. كتر خيرك على المرور..و على بوكية الورد الجميل,.
Quote:
انا غايتو عشت فى الابيض اكتر من نيالا بس ما عرفتو{وش خجلان} وبيت ناس حمودة البعرفهم فى الابيض دا ما بيشبهم
اخونا الفنان ادم نيالا.. بدأ في مدينة الأبيض في النصف الثاني من ثمانينات القرن المنصرم..و تقريبا كان هناك طيلة فترة التسعينات.. في الوكت داك يا امينة.. كنا في الدلنج اشرطة الفنانين بتجينا من محلات عجيبة خلاص..و كنا بنحفظ اسماء الأستديوهات..استديو النجوم في الأبيض..و استديو فيصل في سنار (و ده منو سمعنا عصام محمد نور.. بلال موسى..محمد بخيت..و اخرين)..وكان برضك بتجينا اشرطة من نيالا..وبالرغم من انو مدينة ابوزبد قريبة من الدلنج.. لكن لمن تمشي أبوزبد بتسمع اشرطة فنانين كتار من نيالا..منهم قرشي رابح.. واكتر اشرطة من العاصمة من استديو و استريو سارة بالصافية..و لمن مشيت جامعة الخرطوم.. كانت امنيتي اول حاجة اشوف استديو و استريو سارة بالصافية..و ميدان عقرب..و التحية للقائمين على ذلك الأستديو.. فقد جمل وجدان السودان باغنيات جميلات..و كنا لم تزهج من غنا (هنا امدرمان) بتسمع اشرطة ذلك الأستديو..و الناس بعدين جات تكتب سيوسيولوجيا الغنا.. ممكن نشهد بانو هذا الأستديو قدم تيار بديل اتفاعلت معاهو خلق كتيرة في انحاء السودان.. كتر خيرك.. و نشوفك.. كبر
10-15-2011, 07:41 PM
Kabar Kabar
تاريخ التسجيل: 11-26-2002
مجموع المشاركات: 18537
عصام..حبابك يا صديق كتر خيرك على المرور.. ز انعاش الذاكرة
Quote: و في تلك الفترة كان يغني أيضاً ( عاطف أبو جبيهة ) و ( عامر ) و ( محفوظ عليش ) و ( عدلي )..
و فرقة شباب الأبيض الموسيقية هي من أميز الفرق الموسيقية الإقليمية ..
عارف يا عصام.. عنوان الخيط كان ( يا ناس الأبيض اهندا ادم نيالا..و الباقي نجيب عاطف ابوجبيهة).. ياخي شباب كانوا برغم الأمكانيات البسيطة..لكنهم قادرين على التجلي و العطاء.. فترة كنت افتش عن حاجات مسموعة لمحفوظ عليش..و عاطف ابوجبيهة..و لم اجد حاجة للأولاني..اما عاطف.. فكتر خيرك الإخوة في منتديات كردفان اونلاين..و جابو ليهو بعض المواد..و كلهم بيسألوا وين الزول ده..!
الفرقة اتخيل لي كان اسمها فنون كردفان..و هم بالجد شباب مبدعين للغاية..و اخونا الفنان محمود عبد العزيز قضى فترة في مدينة الأبيض..و الشباب ديل اشتغلوا معاهو اعمال كتيرة..عشان كده لمن غزا الخرطوم في سنة 1991.. قلب الساحة الفنية راسا على عقب.. و اذكر انو محمود من تجربة الأبيض مرق بحاجات كتيرة.. منه اغنية صديق عباس (اللالاية ضي الرتينة)..و اغنية (اي يا امي) التي نكتها ادم نيالا و غناها كثيرا في الأبيض و الدلنج..
في بداية التسعينات.. حضرت لي حفلة في حي كريمة (يتخيل غيروا اسمو و صار المهدية)..و سمعت فنان شاب كان بيغني اغنيات مصطفى سيد احمد..و تجرتو لاقت نجاح كبير..و بالنسبة لي هو اقرب صوت لمصطفى سيد احمد..و ذلك الشاب هو اخونا الفنان عمر خليل.. كتر خيرك.. و نشوفك تاني.. كبر
10-15-2011, 07:36 PM
الطيب شيقوق الطيب شيقوق
تاريخ التسجيل: 01-31-2005
مجموع المشاركات: 28804
هذا الشاب ( آدم نيالا ) اعجبني فيه انه استطاع ان يكسب شعبيته من خلال اغانيه الخاصة فلم اسمعه يوما يتغنى بأغاني غيره
في البداية.. مثله و مثل أي فنا مبتدئ.. كان يردد اغنيات الأخرين.. الهادي حامد.. عقد الجلاد.. شرحبيل احمد..و كان برضك بيحرص في كل مناسبة يقدم اغنياته الخاصة.. و معظمها كان استكشافات لأغاني التراث القديمة.. من الحاجات الجميلة أنو ادم نيالا التفت الى لونية مميزة في دارفور ..و هي غناء الجرداق..و زمان الجرداق كان مشهور بانو مديح الخيل..و اليوم اعتقد أن الفنان ادم حمود هو اقرب من يؤدي الجرداق بصورته القديمة.. كل الأعمال التي رأيتها هنا هي من اعماله.. الناس الشافت ادم نيالا في نهاية الثمانينات و التسعينات.. ح تندهش.. لأن شكله لم يتغير نهائي..الناس بتشيخ..وزنها بيزيد.. لكن هو كما هو..التحية له..
كبر
10-15-2011, 08:06 PM
tayseer alnworani tayseer alnworani
تاريخ التسجيل: 07-30-2007
مجموع المشاركات: 1500
اها انت وكل المروا من هنا اقول ليهم حكاية بداية الفنانين فى الابيض دى حكاية كبيرة خلاص وانا من بيت ساهم فى معرفتى للفنانين فى الابيض
اولا انا بت النورانى ومن مؤسسين فرقة فنون كردفان وكانت عنده تجارب كبيرة هو جمعة جابر ربنا يرحمه ودعبد القادر سالم والاستاذ الشاعر قاسم عثمان وود الجل (حسين )
كانت تجربة مميزة نقلت الغناء من الاقاليم للعاصمة بعد داك تجربة عبد الرحمن عبدالله وصديق عباس وابراهيم موسى ابا
واصبح الغناء الكردفانى مسموع ومعروف فى العاصمة وكل السودان
بعد داك تجربة عبد الفتاح عباس وحيدر محمد احمد وصديق (سواق التاكسى ) وديل كانوا من الجزيرة وبغنوا بالرق فى الابيض وكانت فترتهتم ايضا جميلة وليها طعم
ونعرج على تجربة فرقة الشباب الموسيقيه والفنانين المتميزين فيها مصطفى محمد الحسن (لم يستمر فى الغناء كثيرا بل اكتفى بى عزف الكمنجة ) عمر بانقا وجا الابيض من الخرطوم وكانت له موهبة متميزة لا تخفى على الجميع عادل الجاك ( الذى علمنا ان نطرب لاغانى عثمان حسين كم كان متميزا ) وايضا لا ننسى تجربة محمود عبد العزيز فى الابيض وشهرته بها ش انا اسهبت كتير لكن عشان نجى لموضوع البوست
يا سلام كانت تجربة ادم نيالا متميزة ومزدهرة فى الابيض ومعاه فى نفس الفترة الفنان عامر وكان متخصص فى حفلات بارا ) الفنان عاطف ابوجبيهة الفنان عدلى عنبر (ناس تبن فى الربع التانى اسامة زيدان الذى حينما يغرد باغانى زيدان كل الابيض تتطرب (بالمناسبة ود حلتنا تحديدا حى تقى وفى خضم العدد والمبدعين ظهر ادم نيالا وكانت تجربته متفردة وصنع لاسمه مكانا فى حفلات ومناسبات الابيض
مساءكم مفعم بالخير يا استاذنا / كبر و كل المتداخلين .. و حقيقة لقد جملت يومنا بهذا البوست الرائع .. و الفرقة التي أعنيها هي فرقة الشباب بقيادة / عبد الله بدوي و مصطفى محمد الحسن و أولاد الجاك هي أحدث من الرائدة فرقة فنون كردفان التي قدمت أبراهيم موسى أبا و صديق عباس و عبد الرحمن عبد الله و عبد القادر سالم و أم بلينة و ثنائي النغم و غيرهم .. و فرقة الشباب بدأت أيام إتحاد شباب السودان زمن نميري و أستمرت في إبداعها حيث قدمت محمود عبد العزيز في كاسيت كان و لا زال من أجمل ما غنى محمود عبد العزيز .. و آدم نيالا في الأبيض كان مقلاً في أغاني التراث لكنه كان ( بتاع هجيج ) و أعتقد أن تغنيه بأغاني التراث في العاصمة كان فكرة ذكية جداً قدمته للجمهور السوداني عامة و هو شاب مجتهد و يستحق .. الفنان عمر خليل جمعتني معه شلة و رفقة جميلة حيث كنا نلعب معهم تنس طاولة و تنس أرضي في نادي الضباط و معنا أخوه / طلال و بعض شباب حي الموظفين و الحي البريطاني ( فريق الإعتصام ) و أول مرة أشاهد عمر يغني كان في قيدومة شقيقي / جمال دهب أدهشني عمر من يومها و لا زال يدهشني حتى اللحظة فتحية له أينما حل و كيفما طل .. من المبدعين الشباب من مجايلينا في الأبيض / عماد الحلفاوي و أسامة حسن التجاني و سليمان كريمة و عبد الوهاب العميري هيبة و مالك و عادل تنقو ود القلعة و نميري حسين .. و واحد من أولاد جادين كان بيغني للأستاذ محمد الأمين و لم أسمع من يغني له مثل ذلك الولد الفلتة ..
و لأن الحديث يحلو معكم و المتداخلين في هذا البوست .. دعنا نتكئ مع المبدع / نميري حسين ..
تيسير..حبابك يا صديقة كتر خيرك على المرور.. و نشكرك على الإضاءة المفيدة..و منها استفدنا كثيرا.. التحية لهم جميعا..و تحية خاصة لأستاذنا و صديقنا مصطفى محمد الحسن..و له بصمات خالدة في معهد التربية الدلنج..
بالمناسبة انا من مشجعي فريق (تقي)..
و نشوفك تاني..
كبر
10-16-2011, 03:42 AM
Kabar Kabar
تاريخ التسجيل: 11-26-2002
مجموع المشاركات: 18537
سلام الاخ كبر تحياتى الى جميع اهالى الابيض ...اهلى وعشيرتى.. الاخت تيسير تحياتى لك وكل الربع الثانى وحى تقى وبلدو.. وحياتى الى عصام دهب....لااتزكرك بدقة ولكن ازهرى اخوك الاكبر كان الدفعة امامى مباشرة فى الابيض الثانوية وكنا معا فى اصدقاء الشرطة. تحياتى
10-16-2011, 03:48 AM
Kabar Kabar
تاريخ التسجيل: 11-26-2002
مجموع المشاركات: 18537
معتصم..حبابك كتر خيرك على المرور.. و التحية من عبرك لأخونا الفنان ادم نيالا (لو وقع في عينك تاني).. و نسمع منك بعض الإضاءات حول تجربته..و هي مساهمة بسيطة حوله..
كبر
10-16-2011, 08:43 AM
عصام دهب عصام دهب
تاريخ التسجيل: 06-18-2004
مجموع المشاركات: 10401
و نحن نتفيأ ظلال هذا البوست فاتني أن أعبر عن بالغ سعادتي و فرحتي بتواجد إبنة خالتي التي نفاخر بها و نباهي ( عين الشمش ) الأستاذة / عائشة موسى السعيد .. فأهلاً و مرحباً بها بين أهلها و في مدينتها .. و ننتظر بلهفة مواصلة مداخلاتها هنا .. ..
و مراحب ألوف أخي / طارق .. و سعيد بمقابلتك هنا....
Quote: وحياتى الى عصام دهب....لااتزكرك بدقة ولكن ازهرى اخوك الاكبر كان الدفعة امامى مباشرة فى الابيض الثانوية وكنا معا فى اصدقاء الشرطة.[/
دفعتي من أبناء الجبلاب د. عمر حسن قسم السيد و عمار عبد الله الخليفة و خليفة ، و كان وراءنا في الشرقية المذيع / أسامة عبد الرحيم الخليفة .. و على فكرة أغلب و أعز أصدقائي من حلتكم خاصة أولاد قنيو ..
(عدل بواسطة عصام دهب on 10-16-2011, 08:48 AM) (عدل بواسطة عصام دهب on 10-16-2011, 08:50 AM)
10-16-2011, 08:58 AM
منتصر عبد الماجد منتصر عبد الماجد
تاريخ التسجيل: 03-31-2005
مجموع المشاركات: 183
الاخ كبر والمتداخلون تحياتي لكم...وانتم توثقون للفنان الفذ وهذا الفتي الصداح الذي اطرب الملايين وترك اثرا في النفوس... واثري التراث السوداني الثر فله التحية, والثابت في رواية الصديق الاستاذ محمد مادبو والسيدة الفضلي حرمه الاستاذة فتحية ان هذا الفنان من ابناء دار فور مدينة الضعين بالتحديد...وفيها كانت البداية الفنية التي كانت تبشر بمولد فنان حقيقي موهوب...ومهموم بتراث المنطقة. اما عن علاقته بالابيض وكردفان الغرة ....اتت بالمصاهرة وان زوجته من كريمات الابيض ......والعهدة علي الراوي السيدة حرم الاستاذ مادبو
Quote: ياعبد اللطيف كلنا البقح في سيرة الابيض بنجيه ركضاً
انت مع الأعمام ولا ناس عصام دهب؟
لأنه رُبع قرن دا ما كان أول البارحة!
أول مرة ألقى زول يطمني بأن ما مضى ماهو إلا :(ها) ، زي مايقول السعوديون: لمحة ، والجميل لسه قادم!!
أنا في المنطقة الوسطى بين الأعمام وعصام ، البؤرة المظلمة (ههههههه)،،
وتبقى سيرة الأبيض هي من أجمل مايختزن المرء في القلب والعقل والفؤاد!!
لنا تقارب كبير مع أسرتكم الكريمة بالأبيض ، حبيبنا عصام دهب والدفعة اللواء أزهري ، وبحي أمير محمد عبده وياسين محمد طاهر ،، فهم ورب العباد إحساسنا بهم وكأننامن بيت واحد!!!
شكراً علي هذا الفيديو يمكن دي أول مره أشاهد فيها الفنان الواعد آدم حموده ده والله
بالفعل هو شاب متمكن والجميل إستمتاعه هو بآداءه للغناء وده قمة الروعه
والإهتمام بالتراث شئ يوصل إلي العالميه نتمني ليه المزيد من الإبداع وما بين دارفور وكردفان وطمبور الشايقية وربابة نوبة الجبال وطمبور أهل الشرق وأم كيكي ووووو ....
يكون لهذا التراث إحساساً خاص ..
التحية عبرك لكل من يرفع من أجل تراثنا السودانوي الخالص
الاخ كبر تحية مباركة الاستاذ ادم حمودة من ولاية جنوب دارفور وهو رئيس فنانو دارفور بالخرطوم جمعنى معه العمل العام فى الخرطوم (حاجيات دارفور فى زمن الحرب والكوارث) فنان قديم بس مهمش ودائما يشتكى من التميش الاعلامى ومعه صديقو الفنان احمد شارف برضو فنان غناى المهم فى فنان غناى جدا ظهر فى نيالا فى الثمنينات واوائل التسعنيات اسمو سراج العروبة يقال انو كان فى الابيض صوتو جميل جدا والان اصبح الفنان الاول للقصر الرئاسى التشادى غنى فى نيويورك دا لو لقيت ليهو حاجة سمعنا ليها معاك برضو
10-16-2011, 04:01 PM
عبدالدين سلامه عبدالدين سلامه
تاريخ التسجيل: 11-15-2008
مجموع المشاركات: 4648
و تقريباً ظهر في الأبيض نهاية الثمانينات و بداية التسعينيات ..
كانت حفلاته جداً رائعة ..
و كان يغني برفقة شباب الأبيض ..
و في تلك الفترة كان يغني أيضاً ( عاطف أبو جبيهة ) و ( عامر ) و ( محفوظ عليش ) و ( عدلي )..
و فرقة شباب الأبيض الموسيقية هي من أميز الفرق الموسيقية الإقليمية ..
شباب بيجضموا موسيقى صاح ..
و من خلال مشاهداتي للتلفزيون وجدت أن كثيراً من العازفين في هذه الفرقة إنتقلوا للخرطوم ..
ـ برجع ليك إن شاء الله ..
مالكم دايرين تخلونا نكنسل الاقامه ونرجع ياحليل الزمن الجميل شكرا لفاتح البوست والمتداخلين والله لأول مره أشم ريحة الدعاش في البورد والله يستر من كتكري وبالتأكيد لنا عودات وليست عوده .. عاليا دائما هذا البوست
10-16-2011, 04:40 PM
تبارك شيخ الدين جبريل تبارك شيخ الدين جبريل
تاريخ التسجيل: 12-04-2006
مجموع المشاركات: 13936
Quote: المهم فى فنان غناى جدا ظهر فى نيالا فى الثمنينات واوائل التسعنيات اسمو سراج العروبة يقال انو كان فى الابيض صوتو جميل جدا والان اصبح الفنان الاول للقصر الرئاسى التشادى غنى فى نيويورك دا لو لقيت ليهو حاجة سمعنا ليها معاك برضو
نعم يا الغالي الفنان سراج كان في الأبيض في ذات الفترة التي كان يتواجد فيها آدم نيالا و إبراهيم شطة و أعتقد أنه كان يغني مع فرقة الشباب .. أيضاً سمعت بأن زميلنا في الدراسة الفنان / فرج حلواني الذي كان في ليبيا أستقر بتشاد و علمت أنه أيضاً صاحب حضور كثيف هناك ..
ـ
يا طارق الجبلابي .. هل أنت طارق ( الشايقي ) الجبلابي ؟؟ أخو الباشمهندس صابر .. و توحيد ..
هذه المعلومة حصلت عليها من صديقي علي قنيو .. و توحيد طبعاً عازف جيتار ماهر و درس معانا في الشرقية ( أ ) نحنا قدامو بتلاتة سنوات ..
10-16-2011, 11:19 PM
طارق الجبلابى طارق الجبلابى
تاريخ التسجيل: 09-28-2011
مجموع المشاركات: 424
منتصر..حبابك يا صديق كتر خيرك على المرور من هنا.. و تشكر على الإضاءات حول اخونا الفنان ادم نيالا.. نعم يا صديقي.. حتى اسم الشهرة الذي اختاره..كان يشير الى نيالا.. و سمعت له الجرداق من قبل..و لكن اليوم احس انه معتق شديد.. الأبيض يا صديقي.. خلقت مدينة بديلة للإشعاع الفني لمن الغمة حصلت في دار ام سودان..و شباب كتير بدأ فيها واصل لغاية وصل الخرطوم.. لأنو الخرطوم هي المكان الوحيد للإعتراف.. عشان فيها دار الإذاعة و بالتالي الإنتشار.. لكن المدن برضك كانت بتخلق اجواءها الخاصة و فنانيها الخاصين مثل سنار.. مدني.. بورتسودان.. عطبرة.. الخ..
و نشوفك.. كبر
10-17-2011, 03:32 AM
Kabar Kabar
تاريخ التسجيل: 11-26-2002
مجموع المشاركات: 18537
عصام..حبابك ياخي بالمرة.. يا ريت تعرج معاك على الرعيل الأول من ناس اذاعة كردفان.. صديق جوهر.. شعيب يونس..حامد جاد الله.. عبد الله اسماعيل.. الأبيض مدينة فلتة يا صديقي..و ستظل هكذا..
و ما تطول الغيبة..
كبر
10-17-2011, 03:36 AM
Kabar Kabar
تاريخ التسجيل: 11-26-2002
مجموع المشاركات: 18537
ما عندك مشكلة ..بعد السحبة التالتة الموضوع ح يكون بالإيجار..! متذكر ايجار العجلات؟..ياخي دي ظاهرة يتخيل لي الشعب السوداني هو الإخترعها.. حبابك يا صديقي في أو وقت..و ممكن نعمل ليك دفتر جرورة كمان..
كبر
10-17-2011, 03:46 AM
Kabar Kabar
تاريخ التسجيل: 11-26-2002
مجموع المشاركات: 18537
Quote: والإهتمام بالتراث شئ يوصل إلي العالميه نتمني ليه المزيد من الإبداع وما بين دارفور وكردفان وطمبور الشايقية وربابة نوبة الجبال وطمبور أهل الشرق وأم كيكي
بالضبط يا ناصر..و نحن ناس الأقاليم..ياخي اذاعة هنا امدرمان دي طلعت عينا و اخرتنا.. لأنو العاصمة قامت خلقت ليها مزاج براها..و عشان هي عندها السلطة الفنية.. بقت تروج للحاجات البتشبه مزاجها.. عشان كده غنانا و فننا و ثقافتنا ما مرقت بره.. قاعد اتفرج في تجارب ناس غرب افريقيا..خصوصا مالي.. ياخي الفنانة (طبعا الغالبية مغنيات)..ممكن تغني في باريس..روما..بروكسل.. امستردام..الخ..و تلقاها شايلة القرع و البخس و ام كيكي..و كل الألات الشعبية..عشان كده الشعوب التانية بتنبهر بالحكاية دي و بتعرف انو في فن مختلف و راسخ كمان.. مرة اشتريت لي فيديو للموسيقار ياني..ولاحظت استخدام ايقاع الدليب في احدى مقطوعاتو..و تجاوب الناس معاهو..و بديت افتش.. لأنو الدليب حقنا.. اذاعة هنا امدرمان فارضة عليهو حظر..و اكتشفت أن الفنانة المالية العالمية (عملوها سفيرة نوايا حسنة في الأمم المتحدة)..قاعد تستخدم الإيقاع ده بضبانتو..و الفكرة عندهم أنو هناك حزام في افريقيا دي هو حاجة واحدة..و الشاهد الثقافات المشتركة..و نفس الفنانة قاعدة توظف ايقاع الكرنك بتاع جبال النوبة..!
لو كنت مكان ناس معهد الموسيقى و المسرح.. أي طالب أو طالبة متخرجة.. لألزمتهم أن يعملوا بحوث و دراسات حقلية و يمشوا يقعد مع الناس في التراب..و يسجلوا حاجاتهم..على بالحلال.. نحير ليك العالم كلو..!
نشوفك.. كبر
10-17-2011, 03:50 AM
Kabar Kabar
تاريخ التسجيل: 11-26-2002
مجموع المشاركات: 18537
استاذي و صديقي..عبد الرحيم..حبابك ولينا طولة ياخي..
Quote: شكرن مرتين كبر..دائما تختار حرفا او نغما نستمتع به..وإت وينك..قرمانييين حار..
كتر خيرك على هذه المطايبة.. و الشكر لسيدي اليوتوب..ياخي ده قرب لينا جنس مسافات..المردوم قاعد هبطرش..و الدرملي..و النقارة أم بقو...و الجراري.. غايتو الواحد يتفرج و يسب لناس (هنا امدرمان) القاعدين حارسين ليهم صقيعة..!
ما تطول الغيبة يا عبد الرحيم..
كبر
10-17-2011, 03:56 AM
Kabar Kabar
تاريخ التسجيل: 11-26-2002
مجموع المشاركات: 18537
وامين ابوبكر وو هيبة العميري و محمود عبد العزيز و فرج
بالله فرج حلواني ده برضك من عندكم ياناس الأبيض؟.. مرة هفت لي..و كنت قاعد افتش لأعمال الفنان السوداني الصافي محمد احمد..و الغريبة ما عندو أي حاجة مضافة في اليوتوب غير اغنيتو المشهورة لون الكاكاو..
اها لقيتها بصوت فرج الحلواني ..و اهديها ليك و للجميع هنا..(طبعا اسمو مكتوب بالفرنساوي.. لأنو اهلنا ناس تشاد ديل طبعا ناس فرنسي و كده)..
و نشوفك..
كبر
10-17-2011, 04:05 AM
Kabar Kabar
تاريخ التسجيل: 11-26-2002
مجموع المشاركات: 18537
الغالي..حبابك يا صديقي كتر خيرك على المرور من هنا..
عارف يا الغالي.. قلتها لأخونا محمد خليل فوق..انو الصدفة براها هي اللمتني في اعمال اخونا ادم حمودة..لأنو اصلا..كنت قاعد ابحث عن عملين (عيال ام سقدو اندسوا رقدوا..خلونا بره).. و (تيلم..تيلم..تيلم دانجا.. دتنجا سقردي)..و هي من اعمال الفنان احمد شارف..وعدت نفتح بيها خيط منفصل.. اما سراج الدين محمد جدو.. قاعد اسمع اعمالو طوالي..و عندو مجموعة..حقت القصر خليها غادي.. لكن نهديك هذه الأغنية التراثية..و قاعد اسمع ليها كتير خلاص..
الأغنية اسمها (اكتبو وريقة في الجنان.. اكتبوا وريقة من القجة حجبوا)..و بتشكل لي مدخل لظواهر ثقافية في تلك المجتمعات (يعني فكرة الحجبات و كده).. اتمنى أن تعجبك..و كويس عرفنا أنو سراج برضك مرة بمدينة الأبيض..
و نشوفك..
كبر
10-17-2011, 04:10 AM
Kabar Kabar
تاريخ التسجيل: 11-26-2002
مجموع المشاركات: 18537
عبد الدين..حبابك يا صديق كتر خيرك على المرور من هنا
Quote:
مالكم دايرين تخلونا نكنسل الاقامه ونرجع ياحليل الزمن الجميل شكرا لفاتح البوست والمتداخلين والله لأول مره أشم ريحة الدعاش في البورد والله يستر من كتكري وبالتأكيد لنا عودات وليست عوده .. عاليا دائما هذا البوست
يا اخو اخير انت قريب..لو صليت الصبح.. بتصلي الضهر في اب قبة فحل الديوم.. الكلام نحن القاعدين في صقع التراب..! اهو بمثل هذه الأشياء يا صديقي قاعدين نخلق التوزان..والمعافرة في دار الجليد..ياخي دي لم كتكري تهب..لمن نقول زمن العهن المنفوش خلاص حل تب..! نتمنى نشوفك طوالي ..
كبر
10-17-2011, 04:18 AM
Kabar Kabar
تاريخ التسجيل: 11-26-2002
مجموع المشاركات: 18537
Quote: لاحظت مؤخراً انتشار الموسيقى السودانية في الإعلام ...
يبدو أن كلية الموسيقى - معهد الموسيقى سابقاً - ووزارة الثقافة عجزوا عن الإستمرار في حرب التعريب والتغريب ...
الإنتشار الأجمل يا حبيب.. مارق من الناس الفري لانس .. free lance .. يعني هواة قاعدين يساهموا في النشر.. على المستوى الرسمي.. نعم هناك انفراجة..و الإذاعة و التلفزيون..برضهم بقوا يفتحوا كوة لتقديم اعمال مختلفة.. مدرسة المزيكا.ز لقت نفسها واقف في الصقيعة..ياخي دي سوت بدع في الفن السوداني.. حتى بلغ بنا الأمر أن نسمى حقبة كاملة بحقبة (التكوير/نسبة لكوريا)..يعني حتى الكوريين جايبنهم عشان يفرضوا علينا مزاجهم..شفت التغريب ده كيف؟.. كتر خير النت..و مواعين التواصل الحرة التي لا تعرف السنسرة.. عشان كده بنلقى الفرصة نشوف المختلف..! و لو النهج استمر كده.. بعد شوية ح نشوف فنانين و فنانات من السودان في العواصم العالمية..و منها نمرق للعالم عشان يشوفنا على حقيقتنا..!
و نشوفك..
كبر
10-17-2011, 04:22 AM
Kabar Kabar
تاريخ التسجيل: 11-26-2002
مجموع المشاركات: 18537
فوق اضفنا اصحابك سراج الدين محمد جدو..و فرج حلواني..و نتمنى ان تعجبك الإضافة.. و نفتش الباقي.. ياخي الأبيض دي مدينة مختلفة..و بالنماذج الفوق دي و غيرها..دشنت نفسها أنها مدينة ثقافية ممكن تقدم مزاجها للعالم..
و نشوفك طوالي .. كبر
10-17-2011, 04:24 AM
Kabar Kabar
تاريخ التسجيل: 11-26-2002
مجموع المشاركات: 18537
هدية صغنونة..و نحن في رحاب مدينة الأبيض..و ابداعاتها.. الشعرة سمرقندية المحتسب.. التحية لصديقتنا الأستاذة كوثر بيومي (ياخي دي عندها حلقات شوارد عن البرامكة و شراب الشاي..يا ريت نلقها مضافة).. و التحية للجندي المجهول صديقنا سمبتيكو..و هو ذاكرة حية ..و لماحة..و عندو قدرة و صبر على التقاط الحاجات الندرة و اضافتها الى اليوتوب..ما فعله و يفعله اخونا سمبتيكو.. وزارة الثقافة السودانية ما قادرة تعملوا..
قصيدة (غدر الزمن)..و هي اغنية معروفة للجميع..و هذه هي شاعرتها..و برضك من الأبيض..
التحية لكل المتابعين و المتابعات من خارج المنتدى..و بنقول ليهم كتر خيركم..و حضوركم بالجد زاد لينا.. عشان نعلم البسيط..
الأخ العزيز كبر سلامات والله مشتاقين ياخي ليك فترة لم نراك كيف الأسرة إن شاء الله كلهم بخير أولا شكرا لك على هذا البوست الرائع والذي خرج بنا من غم الرتابة إلى فضاء الراحة. عجبني في الفنان آدم حمودة تميزه وهو تركيزه على التراث وهي قيمة نسبية لمن هم في بيئتهم في كافة بقاع السودان.
وأغنية الجرداق دي كنت بفتش عليها لي زمن وكأني مررت على شئ مشابه في مطلع الجنزير التقيل بقول
يا خضرا هاي يا فرس المغار شن لم الصغار على الكبار .... وشن لم الليل مع النهار شن حالكن الخيل من هوايل الليل وشن الحالك الدبيب من حوافر الخيل محسوبة خيت الحسين إذكرينا في الليالي ديل تزغرد الحديا وفرحانه ام قدمين (أم قدمين نسر كبير يعيش على الرمم) فرحان الغراب بدم البطون الشين
شكرا لك على هذه الإضاءة المهمة والبوست الرائع. ولكنا عودة إن شاء الكريم. أخوك فضل الله خاطر .
10-17-2011, 06:09 AM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8610
ولامن يقولو النيل من انهار الجنة، أنا قاعد اقول ليهم المردوم من ايقاعات الجنة
والله جد يا كبر
وزى ما اسرنا المردوم ورتب جوانا احساس الإيقاع والطرب والنغم نحن برضو من جيهاتنا ختينا "عدلنا" مع ناس كردفان والإبيض واديناهم "فتاح عباس" و "حيدر محمد أحمد" و "الهادى" و "عبد الله مساعد" وعبد الله ده يمكن الناس ما بتذكروه زى الباقين
عبد الفتاح اعتزل الطرب قبل سنين طويلة، وحيدر الله يرحمه فات مننا قبل سنتين تقريبا
لكين ذكراهم اكيد باقية
وتانى يا كبر
انحناءة وتحية ومحبة لى كردفان كلها
10-17-2011, 07:04 AM
Kabar Kabar
تاريخ التسجيل: 11-26-2002
مجموع المشاركات: 18537
العزيز ول ابا فضل الله..حبابك لينا طولة يا فضل الله يا اخي.. كتر خيرك على السؤال.. و تحياتي من عبرك للأسرة الكريمة..و عموم اهلنا هناك و بعد
Quote:
وأغنية الجرداق دي كنت بفتش عليها لي زمن وكأني مررت على شئ مشابه في مطلع الجنزير التقيل بقول
كلام صحيح يا صديقي..و هي اهزوجة متداولة في جميع فرقان العطاوة (لغاية افريقيا الوسطى).. واحد من الذين التفتوا لهذه الأهزوجة.. اخونا الفنان عباس عبده الحسب عربان..و قضى فترة ايضا في مدينة الأبيض و عمل تسجيلات لإذاعة كردفان..و عباس قنان شامل..فهو ايضا تشكيلي..و لكنه ايضا له اهتمام بالتراث..و قد جمع منه مجموعة معتبرة..و كان يحرض في ادائها على استخدام الة العود و الفلوت..و يرفض أن يستخدم اوركسترا كاملة..و حجته أن طريقة العود و الفلوت هي الأقرب للأداء العادي..فمثلا كان يرى أن اغنية الدرملي (مثل الجنزير التقيل) هي اغنية تعتمد على الأداء الصوتي بدون الات..و ايضا من اهتماماته جمع بعض اغاني البن من منطقة الفرشاية في شمال الدلنج..و عباس اليوم متواجد في انجمينا..ربنا يرد غربته طيبا معافى (اخر الأخبار سمعت أنه مريض)..
اقدم نص للجرداق متاح اليوم.. وجدته في مجلة السودان رسائل و مدونات..و مكتوب باللغة الإنجليزية.. شفت المحنة دي ككيف يا ول ابا؟ و لو بتذكر اخونا و صديقنا ول ابا مراهد النور.. مراهد.. الـ ghost ..في ايام مدرسة كادقلي الثانوية (تلو)..كان لمن يتصلح كويس.. بيرجع قرون..و بيقعد يجردق جرداق عجيب و سمح..و تشاء الصدف انو بعد عشرات السنوات اجد بعض من جرداق اخونا مراهد..قد التفت اليه صديقنا و استاذنا الفنان الكبير عمر احساس..و سجله للإذاعة.. في اغنيته (يا علي)..و على يا و ل ابا هو ابونا على الجلة رضى الله عنه (ممكن تبحث عن موقع الإذاعة السودانية.. في المكتبة.. و في قائمة الفنانين و الفنانات فتش مجموعة عمر احساس..و ح تلقى الأغنية دي هناك..و بدايتها جرداق اخونا مراهد الذي يقول: يا ام دربا على سدوا..ضمير القنصو..السير بابو حليل امنا..لغاية ام صرة عجيلة على..الخ)..
التحية لأخونا و صديقنا الجميل الأستاذ مراهد النور..و هو من ابناء مدينة ابوجبيهة..و كم مرة حاولت ادخل منتديات مدينة ابوجبيهة عشان اسأل منو..و لم اوفق في التسجيل..و المنتديات دي يا فضل الله لو لقيت ليها فرقة راجعها..ياخي عيال ابا هناك كتر خيرهم.. قاعدين ينثروا التراث الشعبي و بيحاولوا جمع نصوص كتيرة..و يتخيل لي شغالين كويس..
كتر خيرك..و نشوفك طوالي يا فضل الله..
كبر
10-17-2011, 07:18 AM
Kabar Kabar
تاريخ التسجيل: 11-26-2002
مجموع المشاركات: 18537
صديقي الجميل المطر..حبابك و لينا طولة يا ابوذر ياخي.. كتر خيرك على المرور الأنيق ..
Quote: وبالخصوص تفرد وتميز الغناء الما بشبه غيره
ولامن يقولو النيل من انهار الجنة، أنا قاعد اقول ليهم المردوم من ايقاعات الجنة
والله جد يا كبر
وزى ما اسرنا المردوم ورتب جوانا احساس الإيقاع والطرب والنغم نحن برضو من جيهاتنا ختينا "عدلنا" مع ناس كردفان والإبيض واديناهم "فتاح عباس" و "حيدر محمد أحمد" و "الهادى" و "عبد الله مساعد" وعبد الله ده يمكن الناس ما بتذكروه زى الباقين
ياخي شهادتك عن المردوم (من ايقاعات الجنة)..دي وقعت لي في جرح و ح اقوم اغالط ليك بيها اخونا الروائي امير تاج السر الذي قال (المردوم الرقصة الهمجية)..و غلبني تب التفسير هي مشكار أم معيار.. (العبارة وردت في روايته - صائد اليرقات..و اتمنى أن يقرأها الجميع لطرافة فكرتها).. و التحية من عبرك للأخوان فتاح..حيدر..الهادي..و عبد الله..و نتمنى ان نسمع ليهم..اهو السودان كان كده يا قريبي..من كل وردة عطر..لمن تبقى باقة..
ايام الجامعة يا ابوذر كنت سكرتير ثقافي لجمعية طلاب وطالبات القانون..و صدف في الدورة بتاعتي سنة الأسبوع الثقافي..و عملت التصور..و ناس اللجنة التنفيذية اجازوهو..و كنت عامل فيها داير اجيب لي حاجة ما حصلت قبل كده.. اها قمت مشيت اتفاهمت مع ناس السمندل ( التحية لأستاذتنا الفاتح حسين و احمد باص..و شاكر ليهم استجابتهم)..و احضرت السمندل لأول مرة في تأريخ جامعة الخرطوم..و من ضمن المعزوفات التي عزفوها في تلك الليلة (مقطوعة ام روبة.. يا بنات الحي قولوا لأمروبة جيت اخطبها و قالوا لي مخطوبة)..الغريبة كل الصديقات و الأصدقاء كانوا مفتكرنها اغنية خليجية..و هي اغنية استاذنا ابراهيم موسى ابا..و هو من اهالي مدينة الأبيض الذي اثبت لنا أن الإبداع ما محتاج يمشوا ليهو لغاية الخرطوم عشان ينال الإعتراف الكافي..
غايتو في البوست الإ كن انت..و استاذتنا عائشة.. شخصى .. نكون عارفين عشرة اغنيات لإبراهيم موسى ابا.. نسوى شنو يا صديقي..اهو حال السودان كده..!
كتر خيرك يا ابوذر ..و نشوفك طوالي ياخي..
كبر
10-17-2011, 07:37 AM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8610
على ذكر طعم المردوم، عندى كتابة كتيرة سويتها مرة زى مقاربة بين المردوم والفلامنكو الأندلسى ودبكة اهل الشام خلينى النكوسها واجيبها ليك
بعدين زولنا د. أمير تاج السر ده خليهو زولى وبعرفو، بطنو غويطة زى ما بقول المصريين، عليك امان الله هسه تلقاه عنى بى نضميهو ده ماسك ليهو فى معنى تعجز الباب الجن والإنس عن فهمو، أمير زول مليان جمال لامن مدفق
تعرف يا كبر، واحد من اصوات غنانا العجيبة فعلا هو صوت ابراهيم موسى ابا، الترزى الفنان حتى الثمالة، صوته براهو زى ما هو الحال عند الجابرى مثلا وخليل اسماعيل وابو عركى واحمد شاويش وصلاح محمد عيسى، ديل الفوكليست الما عاديين واصواتهم تب ما زى الباقين اسمعو وهو يغنى زعلانه مالكى يا فريع الليونه انا قلبى من رادكى ما عشق بلاكى والله
ولا تسمع العاجكو وتضوق طعم الحس اللخدر لامن يجى مارق
حيدر المطرب الصداح توفى الى رحمة ربنا الله يرحمه والبركة فى الباقين
وابقى طيب يا كبر وسعيد
10-17-2011, 07:20 AM
الفاتح ميرغني الفاتح ميرغني
تاريخ التسجيل: 03-01-2007
مجموع المشاركات: 7488
صديقي الجميل كبر وضيوفه الافاضل. تحياتي الصوادح، ومشكور على الإتيان بكليب هذا الفنان صاحب الصوت المفعم بمساحات تطريبية واسعة والمتدفق بتلاوين جميلة وشجية. وتحية خاصة موصولة للمترجمة الضليعة عائشة موسى السعيد،ودي يا أستاذ عصام نزاحمك في المفاخرة بها لانها لا " تسد عين الشمس" وحسب بل وثقب الاوزون ايضا.
من سحر الابيض أنها كانت المدينة التي تستضيف الكابلي متحدثا عن الفلكلور والتراث والأدب، قبل أن تستضيفه صادحا بـ " ضنين الوعد" . لم يتسنى لنا حضور هجرة عصافير الخريف الأولى : عبدالقادر سالم وخليل إسماعيل وجمعة جابر وابراهيم موسى ابا ، وهي هجرة حملت معها جينات الموسيقى الكردفانية المستوحاة من أدب الدونكي والسواقي والشبرية وعالم الرحًليات وحتى مهرجان السبر والكجور. وعندما تفتح وعينا الجمالي،كانت هناك عصافير لازالت تغرد في كردفان، عبدالرحمن عبدالله وصديق عباس والعميري وآدم شقيش وأم بلينا السنوسي وأحمد هارون وحمودة محمد حامد وعمر الفحيل، وهو عم شريف الفحيل ووالده خالد الفحيل عارزف الاورغن المشهور..ثم ظهر سرب آخر من العصافير، عمر بانقا ومحفوظ عليش وسراج محمد حسين، ثم تجربة بلابل كردفان المتأسية بالبلابل ( Proper).واللواتي حققن نجاحا كبيرا وكانت أغنيتهن " سرحت مايكل جاكسون" بمثابة Hit في ذلك الزمن المسكون بصرعة ملك البوب، مايكل جاكسون. فبدأ وكأن في الأمر إستجابة إلى قانون طبيعي:كلما هاجرت اسراب إبداعية حلت محلها أسراب اخر، مما جعل تلك المدينة الفاضلة عصية على الفراغ الإبداعي! .وإن لم أكن مخطئا، كانت الابيض من المدن القلائل التي رفدت الفن ليس في سياق التجربة النسائية الغنائية فحسب، بل وحتى على مستوى العزف،فكانت هناك إشراقة زين العابدين( عازفة الاورغن في فرقة الشباب) ووالدها استاذ زين العابدين ( خريج معهد الموسيقى والمسرح) بمثلما كانت هناك حرم شرحبيل احمد ( عازفة البيز جيتار المعروفة- وهي أيضا من الابيض، غير متأكد من هذه المعلومة على وجه الدقة) كظاهرة نسائية ملفتة .
اما في مجال الحقيبة، فطبعا كان هناك عبدالفتاح عباس( صاحب الصوت الشجي والملقب بفهد بلان) وبرعي وعوض طه وصديق رفاعة واللمين وعامر والراحل حيدر محمد أحمد وآخرين أثروا ليال ما بننساها ودوام بنحن لذكراها! وكما أسلفت أن مدينة الابيض حقا تستعصي على الفراغ بل وتفترئ به، وذلك شأن المراكز الحضرية على مر العصور، فهي أن لم تكن القابلة التي تسهل صرخة الميلاد الاولى للمبدعين، فإنها في كثير من الاحيان لعبت دور الحاضنة التي رعت تلك المواهب وصقلتها بمثلما يصقل الجواهرجي نفيس المعادن، لذا لم يكن مستغربا أن تكون الأبيض محطة أو إستراحة محارب للمبدع آدم نيالا في مشواره الإبداعي ! - أستاذ عصام دهب لقيتك ختري وكتًال حفلات من الدرجة الاولى!.مشكور يا سيدي على النداء وحسن الظن العريض ولو أن بوستات الصديق الجميل كبر صادحة بذاتها. -الفنان سراج الدين محمد حسين من ابناء العباسية تقلي لكنه نشأ وترعرع في مدينة الابيض وكان حسن الصوت والاداء.وأكثر فنان رافقته عازفا بعد صديقي عمر بانقا( بندق) قبل إنضمامه إلى عقد الجلاد.هاجر الفنان سراج غربا، كما عرفت، إلى نيالا ومن ثم إلى تشاد وحصل على الجنسية ومثل ذلك البلد في مهرجانات عدة في السنغال والنيجر وأخيرا في مهرجان في الولايات المتحدة. محبتي للجميع.
صديقي الجميل.. الفاتح..حبابك كتر خيرك على الحضور.. و الإضاءات اللطيفة..و اكيد ح تنفع ناس كتيرين خلاص (ياريت بناتنا و ابناءنا ناس كلية المزيكا قاعدين يتاوقوا بي هنا)
الجابك يجيب الأصدقاء..مجيد..و باسط..و استاذنا و صديقنا اللورد يحي.. طبعا كنت داير اجيب ليك هدية من مزاجنا (بلوز الليجند على فاركة توري).. لكن قلنا نجيب حاجة من الأبيض..
تصدق يا الفاتح..لحقنا زمن ناس تقعد تغالطك انو الأغنية الجاية دي حقت محمود عبد العزيز..و صبرنا لغاية ما لقينا سيدها في اليوتوب..
استاذنا صديق عباس,.. اللالاية .. شكلو حالف ما يغني عبر الأثير..و هي الأغنية التي نزعم أن كل من بدا الغرام..قاعد يكتبها في اول جواب..
صديقي المطر.زحبابك ابشر بالخير.. عملت لي بوست في الربع الفات.. اسمو الغزالات الحرة..و كنا قاعدين نتونس فيهو أنا و الصديقة توما..و صديقنا تبارك..و اخرين.. و ممكن نديك المواد المنشورة فيهو عشان تساعدك اكتر في المقاربة..و كان فيهو فيرشن جديد للمردوم..و التمييز بين المردوم في مناطق الحوازمة..و هو تقيل الريتم..ياخي ده الرقصة الواحدة تعادل اربع مباريات في كرة السلة..و المردوم في مناطق المسيرية..و هو يمتاز بريتم خفيف و سريع..و يظهر فيهو الفوكل كتير.. التيحة لأخونا امير..و قريب انشاء الله نعمل قراءة لرواية صائد اليرقات..
و نشوفك طوالي يا صديقي.. كبر
10-17-2011, 09:55 AM
عصام دهب عصام دهب
تاريخ التسجيل: 06-18-2004
مجموع المشاركات: 10401
Quote: صديقي الجميل كبر وضيوفه الافاضل. تحياتي الصوادح، ومشكور على الإتيان بكليب هذا الفنان صاحب الصوت المفعم بمساحات تطريبية واسعة والمتدفق بتلاوين جميلة وشجية. وتحية خاصة موصولة للمترجمة الضليعة عائشة موسى السعيد،ودي يا أستاذ عصام نزاحمك في المفاخرة بها لانها لا " تسد عين الشمس" وحسب بل وثقب الاوزون ايضا.
من سحر الابيض أنها كانت المدينة التي تستضيف الكابلي متحدثا عن الفلكلور والتراث والأدب، قبل أن تستضيفه صادحا بـ " ضنين الوعد" . لم يتسنى لنا حضور هجرة عصافير الخريف الأولى : عبدالقادر سالم وخليل إسماعيل وجمعة جابر وابراهيم موسى ابا ، وهي هجرة حملت معها جينات الموسيقى الكردفانية المستوحاة من أدب الدونكي والسواقي والشبرية وعالم الرحًليات وحتى مهرجان السبر والكجور. وعندما تفتح وعينا الجمالي،كانت هناك عصافير لازالت تغرد في كردفان، عبدالرحمن عبدالله وصديق عباس والعميري وآدم شقيش وأم بلينا السنوسي وأحمد هارون وحمودة محمد حامد وعمر الفحيل، وهو عم شريف الفحيل ووالده خالد الفحيل عارزف الاورغن المشهور..ثم ظهر سرب آخر من العصافير، عمر بانقا ومحفوظ عليش وسراج محمد حسين، ثم تجربة بلابل كردفان المتأسية بالبلابل ( Proper).واللواتي حققن نجاحا كبيرا وكانت أغنيتهن " سرحت مايكل جاكسون" بمثابة Hit في ذلك الزمن المسكون بصرعة ملك البوب، مايكل جاكسون. فبدأ وكأن في الأمر إستجابة إلى قانون طبيعي:كلما هاجرت اسراب إبداعية حلت محلها أسراب اخر، مما جعل تلك المدينة الفاضلة عصية على الفراغ الإبداعي! .وإن لم أكن مخطئا، كانت الابيض من المدن القلائل التي رفدت الفن ليس في سياق التجربة النسائية الغنائية فحسب، بل وحتى على مستوى العزف،فكانت هناك إشراقة زين العابدين( عازفة الاورغن في فرقة الشباب) ووالدها استاذ زين العابدين ( خريج معهد الموسيقى والمسرح) بمثلما كانت هناك حرم شرحبيل احمد ( عازفة البيز جيتار المعروفة- وهي أيضا من الابيض، غير متأكد من هذه المعلومة على وجه الدقة) كظاهرة نسائية ملفتة .
اما في مجال الحقيبة، فطبعا كان هناك عبدالفتاح عباس( صاحب الصوت الشجي والملقب بفهد بلان) وبرعي وعوض طه وصديق رفاعة واللمين وعامر والراحل حيدر محمد أحمد وآخرين أثروا ليال ما بننساها ودوام بنحن لذكراها! وكما أسلفت أن مدينة الابيض حقا تستعصي على الفراغ بل وتفترئ به، وذلك شأن المراكز الحضرية على مر العصور، فهي أن لم تكن القابلة التي تسهل صرخة الميلاد الاولى للمبدعين، فإنها في كثير من الاحيان لعبت دور الحاضنة التي رعت تلك المواهب وصقلتها بمثلما يصقل الجواهرجي نفيس المعادن، لذا لم يكن مستغربا أن تكون الأبيض محطة أو إستراحة محارب للمبدع آدم نيالا في مشواره الإبداعي ! - أستاذ عصام دهب لقيتك ختري وكتًال حفلات من الدرجة الاولى!.مشكور يا سيدي على النداء وحسن الظن العريض ولو أن بوستات الصديق الجميل كبر صادحة بذاتها. -الفنان سراج الدين محمد حسين من ابناء العباسية تقلي لكنه نشأ وترعرع في مدينة الابيض وكان حسن الصوت والاداء.وأكثر فنان رافقته عازفا بعد صديقي عمر بانقا( بندق) قبل إنضمامه إلى عقد الجلاد.هاجر الفنان سراج غربا، كما عرفت، إلى نيالا ومن ثم إلى تشاد وحصل على الجنسية ومثل ذلك البلد في مهرجانات عدة في السنغال والنيجر وأخيرا في مهرجان في الولايات المتحدة. محبتي للجميع.[/QUOTE] دي مزيكاااا .. أستاذي و زميلي و صديقي الجميل .. أكتب عليك الله يا فاتح .. أكتب ياخي .. و أطرب .. أكتب و لا تبخل ..
Quote: لقيتك ختري وكتًال حفلات من الدرجة الاولى
يا فاتح أنت عارف حفلات الأبيض .. و خاصة ناس حلتكم القبة أوروبا .. عليك أمان الله أخدنا زوداتنا سمع وشوف لي يوم يبعثون إن شاء الله .. و كتر خيركم و كل مبدعي الأبيض وزمنها الجميل .. و ناسها .. ناس الأبيض .. يا الله .. شكراً لله و للأبيض بمن فيها و ما فيها .. و عليك الله يا فاتح واصل من غير فواصل ..
10-17-2011, 11:42 AM
عبد الحميد المقابل عبد الحميد المقابل
تاريخ التسجيل: 06-17-2011
مجموع المشاركات: 200
شكرا أستاذ كبر وضيوفه على هذه النافذة الكردفانية. الفنان آدم نيالا صوت من الأصوات الجميلة فى سماء مدينة الأبيض .ولا ينكر احد دور فرقة فنون كردفان وكذلك فرقة الشباب بقيادة عبدالله بدوي وعوض عبدالقادر ومصطفى محمد الحسن شقيق الأخ الاعلامى عبد الله محمد الحسن وأولاد الجاك وإبراهيم ( شطة) وخالد الفحيل ، و مصطفى زيادة على أجادته عزف الكمنجة كان مبدع جدا في أداء أغنيات الشفيع و و ظهر في تلك الفترة أيضا عازف الأكورديون الخطير ابراهيم محمد الحسن الشهير بى سناته و تم تحويرها لى سنادة و الأخ طارق منصور وهو من رواد عازفى البيز و تتلمذ غلى يديه عدد من العازفين و لابد أن نذكر المبدع صديقى الفاتح ميرغني . فهو كان اصغر عازف بيز في مدينة الابيض و كان يعزف مع كبار الفنانين سيف الجامعة وعمر بانقا ومحفوظ عليش، وقد اشاد به الفنان الكبير الراحل عثمان الشفيع في زواج (أن لم تخني الذاكرة) إبن الشاعر ود القرشي على كريمة باهي نور في حي القبة ، لمن قال : الولد ده البيز أتقل منو لكنه يطوع ضرباته بصورة عجيبة كلو كلو". وطبعا ما حننسى فتحي عبدالجبار( اخطر عازف جتار حاليا في الساحة مع الباشكاتب وداللمين ومعاز الجاك وابراهيم سنادة مع ابوعركي والقائمة تطول وديل كلهم بالمناسبة كانو قروب عمر بانقا. و نسبة لصداقتنا مع الوسط الفنى في تلك الفترة مافى حفلة في الأبيض ما ( لمينا كراسيها ) مع ضمان العشاء مع الفنانين ( و ما أدراك ماعشاء الفنانين ) مع الترحيل بعد نهاية الحفل و لابد لى أن أذكر أخى المهندس أنور عبد المجيد فقد كان الرفيق في كل تلك الغزوات .
و الحفلات التمام تمام كانت حفلات القبة و الربع الأول و مشكتنا الأساسية في حفلات الربع الأول أنه ما كان في أى فرصة لى اللولوة في وجود حراسة مشدده من أولاد دهب بقيادة المشاكس حينها الأخ المستشار عصام دهب ( لك عاطر التحايا) فقد كانو مفتحححين عيونهم ( وجه زعلااااان )
أكيييد لنا عوده
10-17-2011, 12:09 PM
باسط المكي باسط المكي
تاريخ التسجيل: 01-14-2009
مجموع المشاركات: 5473
و يا د. عبد الحميد نحنا إذن موعودين بكلام سمح و نضمي ممتع ..
و يا ريت أخونا البروف ـ رغم الأحزان في فقيدهم و زميلهم د. جبارة ( رحمه الله ) ـ يا ريت يدينا طلة ..
Quote: ( و ما أدراك ماعشاء الفنانين )
حقيقي ما أدراك ما عشاء الفنانين المجهبز يا دكتور .. و أنت تضطرني هنا للإعتراف بجرم تكتمت عليه ردحاً طويلا .. كنا شلة من شباب الأبيض من أحياء مختلفة .. و في يوم دخلنا ( الدور التاني ) في ( سينما عروس ) .. و بعدما طلعنا قدر ما فتشنا حتة نتعشى فيها ما لقينا .. أقترح علينا ( عمر طحنية ) أن نذهب لسوق ود عكيفة و من هناك لحفلة في حلتهم ( حي القبة ) قرايب ميرغني صاحبنا ، و جيران ناس عمر طحنية .. المهم ـ و أنا زايغ من التفاصيل ـ في النهاية أكلنا عشا الفنانين .. كان ـ اليوم داك ـ عشاء زي التقول الواحد أخو العريس عديييل كدة .. لكن هسة لما أتذكر التفاصيل بضوق طعم العشا داك ملح .. ملح .. اللهم لا تؤاخذنا بما فعل الأشقياء في شلتنا .. و بالمناسبة يا كبر الواقعة دي ذكرتني فنان جميل و غناي جداً إسمه ( إبراهيم بن عوف ) .. و حأجيك يا دكتور لقصة حفلات الربع الأول و موضوع ( الحراسات المشددة ) الإشاعة دا ..
10-17-2011, 12:59 PM
عبد الحميد المقابل عبد الحميد المقابل
تاريخ التسجيل: 06-17-2011
مجموع المشاركات: 200
كبر انت عارف كل ماتنزل اغنية من جهة غرب افريقيا بقيف عندها كتير جدا بتذكرني دائما المغارب والعشيات الحنينة كنت مولع بالراديو وسماع محطات كتيرة وكل ما اسمع ايقاعات افريقية بقيف عندها كتير كانها خيط من السحر وخصوصا جيترارات النيجر ومالي وطبول من تشادبحس كانو في شئ ضائع مني او انا انتمي لهذا الخيط الرفيع من السحر الخفي مابين طنابيرالجابودي وصفقات الايادي والايقاعت القوية في ضواحي المدن نسمعها في هجعة الليل وخصوصا في ليالي قمر اربعة عشر تهز الواحد هزومايدور اليوم من الترزية عازفين الاورغ فرق كبير احياناتهرب يسمعك من الا تنضرس منالاصوات المبرمجة الاليا وخاية من احساس في المدرسة المتوسطة كان بجينا في الداخلية واحد قالو من غرب افريقيا بعزف علي الة مصنوعة من الجلد ووتتخلها اوتار جيدة الدوزنة ويعزف ويغني بصوت حنين جدا ولغة نحن نتمني ان نفهمها العزيز كبر ثراث كردفاااان واهلنا في دارفور وغير بحور عميقة ويدوب ننحن في البدايات والفضل يرجع لامثال هذا الفنان الرائع ادم حمودة وعمر احساس كمالاننسي اشراقات البدايات ابراهيم موسي ابا وصديق عباس عبد الرحمن عبدالله وعبد القادر سالم والكتير من الذين نجهلهلم اغنيةخال فاطنة سمعتها مهلة العبادية حين ما اتت لاحياء حفل زواج في منطقة شمال كردفان ضواحي بارا سمعت الاغنية يتغني بهااحد المغنين وكتبتها في ورقة وربطتها في طرف التوب ونستها وحينما شرعت في غسيل ثيابها تذكرت الاغنية كانت الموية طمست معظم النص لاغنية خال فاطمة البنسمع فيه دة جزء بسيط من اغنية تحمل في معانيها كل القيم النبيلة بحسب معاير ذاك الوقت والله اعلم وياريت لو كل فنان يهتم بتراث منطقته من اجل التنوع والاناغم الجميل ووواصل ياعزيز
10-18-2011, 00:53 AM
mohmed khalail mohmed khalail
تاريخ التسجيل: 06-14-2007
مجموع المشاركات: 4509
عبد الحميد*..حبابك يا صديقي كتر خيرك على المرور من هنا.. و تشكر على هذه الإضاءات الإضافة.. يتخيل لي يا حميد..دايما بنكتب تأريخ المدن السياسي..و نتناسى تفاصيل تأريخ المدن الإجتماعي..و حتى لو تمت كتابة الأخير فانه ينكتب وفقا لأثره أو تأثره بالتأريخ السياسي..و اعتقد أن مثل هذه الإضاءات التي كتبت هنا في اماكن اخرى.. هي اتجاه لتصحيح الصورة بعض الشئ..
الأبيض مدينة عريقة للغاية..و كان لها اثرها منذ القدم..و لكنها مثل بقية مدن السودان الأخرى لم يكتب تأريخها الإجتماعي و الثقافي و الفني..مع اني ارى أن المساءل الثقافية و الفنية اكثر تجاوز لمسألة التعبير عن الذات الإنسانية من التعبير السياسي الفوقي..و لكنها تظل في صدور اهل المدينة و يتذهب حينما يذهبون..
كتر خيرك..و يا ريت الناس تكتب باستمرار..و تجمع المعلومات حتى يتم ترتيب الأشياء..و كتابة ذاكرة تنفع الأجيال القادمة و تربطهم بالماضي..
كبر __________
* عبد الحميد نأسف على الخطأ في طباعة الإسم..
(عدل بواسطة Kabar on 10-18-2011, 02:10 AM) (عدل بواسطة Kabar on 10-18-2011, 02:12 AM)
10-18-2011, 01:38 AM
Kabar Kabar
تاريخ التسجيل: 11-26-2002
مجموع المشاركات: 18537
باسط..حبابك يا صديقي كتر خيرك على المرور..و الإضافات الثرة..و هي مداخل بتودي لمداخل تانية..لغاية ما نمرق لينا بفكرة.. عارف ياباسط.. اهتمامي ينحصر في الشريط من المحيط لغاية بحر احمر..و قاعد ابحث عن التشابه و التقارب بين الثقافات في مجتمعات مالي..السنغال.. النيجر.. الكاميرون.. تشاد.. السودان.. اثيوبيا.. الصومال..و جيبوتي..و هناك اكتشافات مدهشة..و ما جعلها اكتشافات هو اننا لم تتاح لنا الفرصة من قبل رؤيتها و التفاعل معها..و ذلك لغياب تكنولوجيا التواصل اياها..و الجيد ان اليوم الأمر اختلف..و الأشياء اصبحت متيسرة.. قلت من قبل اكثر من مرة أن الفيديو المنشور في اليوتوب مثلا.. هو عبارة عن نص متكامل..و يتيح للمتابع قراءته من زوايا عديدة.. ناس المزيكا ممكن يلقوا المزيكا..الناس المهتمة بعالم الأزياء ممكن تلقى غرضها..و الناس المهتمة بالبحث عن الأدوات التي يستخدمها الإنسان في حياته العادية برضك ممكن تلقاها.. مرة كنت احدث بعض الأصدقاء و الصديقات عن المرحاكة..و زي ما عارف انو معظم ناس النت هم صغار في السن..و تجربتهم مرتبطة اكتر بالمدينة..و المدينة فارقت المرحاكة منذ دخول الطاحونة..في البحث وجدت مادة مسجلة من اثيوبيا..و فيها زولة بترحك في مرحاكة..و فيها بنيات شايلات ليه برام واردات للموية..و صبيان شايلين ليهم عصي..وواحد منهم خاتي ليهو مسواك في خشمو..و شاعق ليهو خلال في القجة..مثل هذا الفيديو..اثار دهشتي.. لأن نفس الآدوات و طريقة تعامل الناس و تفاعلهم و انفعالهم مع بعض.. هي نفس الحاجات التي كنت اراها في مجتمعنا بتاع الريف..و كنت اتساءل: ليه الناس التانية بتصور حاجاتها و بتعرضها بفخر للعالم و نحن لأ؟..ده سؤال كبير و داير ليهو نقة كتيرة خلاص.. ناس مالي و النيجر مثلا..لمن يعلموا فيديو كليب..ما بتكون الفكرة عندهم مجرد غنا..و انما هي الفكرة أنو الواحد منهم داير يقدم نفسو للعالم..و يقول ياهو ده انا و دي حاجاتي التي ازعم انها مختلفة عن حاجات الأخرين و انو ليها قيمتها الإنسانية..عشان كده في معظم المواد الفنية المنشورة بتلاحظ احتفاء كبير بتقديم الآلات الشعبية..و حدثني صديقي وليد عبد الحميد (وليد كوش).. و اتيحت له الفرصة العمل مع اليجند على فاركة توري من مالي.. حدثني وليد يقول أنهم في مالي يشترطون على دارس الموسيقى أن يكتب بحث عن احد الآلات الموسيقية المحلية.. تأريخ الألة.. طريقة صناعتها..طريقة استخدامها..و هكذا.. ياخي انا كنت قايل امكيكي دي الة اتوجدت فقط في مجتمعات البقارة في كردفان..و بالبحث و التفرج..وجدت انها الة شايعة في معظم مجتمعات افريقيا..و الماليين اكتر ناس قاعدين يوظفوها و يدوها مساحة في اغانيهم..اها ام كيكي دي يوم واحد ما شفتها في فيديو كليب سوداني..ليه؟.. الراديو اكتشاف مدهش يا باسط..و في غياب التلفزيون..بتلاحظ انو معظم مجتمعات الريف في السودان عندها علاقة حميمة مع الراديو..لكن محتوى الراديو شنو.. فدي هي المشكلة.. الإذاعة السودانية و لزمن طويل كانت بتقدم خطاب المدينة..ولم تهتم بحاجات الريف.. عشان كده كان موقفها مشوه..يعني ربوع السودان كان بيتقدم مرة واحدة في الأسبوع..و قد تكون معظم حلقاته مكررة و معادة..في مثل تلك الظروف.. بعض الإذاعات الأخرى كانت بتدي خيار اخر و بتديك فرصة تتفاعل مع ثقافات اخرى..!
التراث حاجة مهمة للغاية..و اليوم احتفاء الناس بتجربة اخونا ادم نيالا..و غيره من الفنانين و الفنانات الذي اهتموا بمعالجة و توظيف التراث و تقديمه للمشاهد..مثل هذه اللونية تجد الإحتفاء لأنها بتقدم حاجة مختلفة عن مزاج اذاعة هنا امدرمان الذي كان يسيطر لفترة من الزمن..و محتاجين جرأة اكتر.. يعني الناس الشغالة انتاج لأشرطة الفيديو كليب..ممكن تشكل فريق عمل متكامل..و الناس تشتغل بحث في المجتمعات الريفية..و تسجل الأعمال هناك..و بذلك ممكن الناس تلقى فرصة تعرض حاجات الإنسان السوداني كما هي..
كتر خيرك يا باسط.. و نشوفك.. كبر
10-18-2011, 02:16 AM
Kabar Kabar
تاريخ التسجيل: 11-26-2002
مجموع المشاركات: 18537
اها اضفنا مادتين واحدة بصوت سراج الدين..و التانية بصوت فرج حلواني.. هل ياهم نفس الفنانين المذكورين هنا ولا ده تشابه؟.. الإجابة ضرورية.. عشان لو طلعوا ماهم نقوم نسحب المواد دي..
كبر
10-18-2011, 02:23 AM
Kabar Kabar
تاريخ التسجيل: 11-26-2002
مجموع المشاركات: 18537
Quote: اضفنا مادتين واحدة بصوت سراج الدين..و التانية بصوت فرج حلواني.. هل ياهم نفس الفنانين المذكورين هنا ولا ده تشابه؟..
شكراً على الإضافة الرائعة .. و فرج حلواني ود حلة و زميل دراسة .. و متاكد تماما إنه يا هو دة صوتو ذاتو الما بغباني .. و سراج أستمعت له كثيراً في حفلات الأبيض و أكاد أجزم أنه سراج السمعتو في الأبيض .. و أستاذنا الفاتح أكيد بيكون طلع معاهو كم حفلة و أكيد عارف صوتو فممكن يفتي لينا في الحتة دي ..
الأخ الكريم كبر والزملاء المتداخلين دعني أثمن هذا البوست الرائع لتسليطه الضوء على مواهب الفن في كردفان الغرة هذا البوست مهم يا كبر لأنه يسلط الضوء على تراث مهم في السودان عامة وفي كردفان خاصة، والكتابة عن تاريخ المدن في السودان هي من الأشياء النادرة لأن هذا أدب لم نهتم به في السودان كثيرا، وّإذا عرجنا إلى الكلمات التراثية فإنك تصبح كالمؤذن في مالطا، كما يقول المثل. ليس بفعل الحداثة ولكن بفعل الانصراف عن الموروث والقراءة والبحث والتنقيب، فضلا عن سيادة لغة جديدة لا هي وصلت الماضي بالحاضر ولا سمت بذوق الاجيال الناشئة. هناك مصطلح جديد حايم يا كبر في لغة الشارع السوداني يصف الأجيال القديمة بأنها أجيال كانمانية والكانمانيون هم الذين عايشوا الماضي ويحنون إليه ويتحدثون عنه ويرون فيه زمنا جميلا، وإذا سلمنا بهذا فإن جيلنا كله يقع في دائرة هذا التوصيف - إن جاز لنا تسميته كذلك- والماضي فعلا كان جميلا، جميل بمحتواه الثقافي والتراثي والاجتماعي والأخلاقي، وهذا التوصيف قد يكون غير موضوعي ولكن نحسبه كذلك وفق قيم قد يراها غيرنا غير ذلك. وإذا لم تخرج الأجيال المعايشة لتلك الحقبة في مدينة الأبيض وفي ربوع كردفان بل في ربوع السودان، إذا لم تخرج كنوز التراث وتعيد اكتشافه، فإنه لن يتأتي للأجيال المعاصرة ربط حاضرهابالماضي لمعرفة تراثها وتاريخها الثقافي لكي تبني عليه ضروب فنونها في المستقبل، لأن المثل بقول "الماعندو قديم ... ما عندو جديد". الفن جميعه يا كبر في قبل السودان الأربع ازدهر في ماضينا لأن الحياة كانت رخية، ورخية واحدة من الكلمات التي شارفت على الاندثار، رخاء الحياة جعل الناس تهتم بالغناء والتراث والتسفار والعيش في المكان الذي يلبي مطلوباتهم، ولهذا السبب تجد الفنانين من كل حدب وصوب تهفو أفئدتهم لمدينة الأبيض بتراثها الباذخ وشعرائها الكثر ورعيلها الاول من المغنيين والفنانين والعازفين والأدباء.
ومثل هذا الجو المواتي لبزوغ الثقافة والمثقافة هو ما جعل فنانا مثل آدم حمودة يستطيب العيش في الأبيض في كنف قوم يعشقون الفن ويتنفسون هواءه. ومثله إبراهيم موسى أبا وطيور كثيرة مهاجرة لتجد في فحل الديوم مهبطا للتطريب وملاعبة الريح. والموسيقى يا كبر لغة تجمع كل الناس خاصة إذا لامست فيك أشياء تحسها وتحاول مسكها عبثا دون استطاعة. وقبل أن أغادر هذا البوست الرائع، سررت بمداخلة الصديق النابه الموسيقي الفاتح ميرغني والتي أضاءات جوانب مهمة من تاريخ كردفان وأب قبة فحل الديوم وما زلنا نتعشم في المزيد من إبداعاته وإبداعات أبناء الأبيض في هذا المنبر ، وفي انتظار تداخل يثري الحوار في هذا البوست من الأديب الروائي الشاعر فضيلي جماع فهو أحد المعاصرين لتلك الحقبة وأحد الفاعلين فيها، ودي مهمة أولاد الأبيض المتداخلين في هذا البوست لجلبه للمدى.
ولدي طلب أخير يا كبر أرجو أن تمدني بأي خيط للصديق مراهد أو الحصول على شعره والجرداق وإذا حصلت فدي وصية لابد من توصيلها "صرة في خيط." مع خالص التقدير لك وللأسرة أخوك فضل الله خاطر
10-18-2011, 09:19 AM
Hamid Elsawi Hamid Elsawi
تاريخ التسجيل: 09-22-2005
مجموع المشاركات: 3450
شكراً كبر لهذا البوست الهام شكراً للمتداخلين الذين أفادونا بالكثير
لا أذكر جلسة تحدثنا فيها عن الفن ولم ترد سيرة مدينة الابيض فهي عروس الرمال و عروس الفن ايضاً و أعني كل كردفان (كرنفال الجمال)
الايقاعات تستمد حرارتها من حرارة الشمس ... و تجاوزت السلم الخماسي المتعارف عليه في السودان لذلك لفتت نظر المستمعين و المهتمين بالفن من الخليج و كثير من الدول العربيه ... و حلقت تلك الايقاعات في سماء اوروبا و كتر خير الفنان المبدع عبد القادر سالم الذي كسر كثير من الحواجز ليقول للعالم
هنا كردفان
ـــــــــــــــــــــــ تخريمة: بفتش عليك و عندي معاك كلام كتير
10-18-2011, 11:58 AM
باسط المكي باسط المكي
تاريخ التسجيل: 01-14-2009
مجموع المشاركات: 5473
كبر والمتداخلين سلام حكي لي احد الاعمام انو في فنان شاب تشادي سوداني كان بترد عليهم في ميز الموظفين بنيالا كان صوته في غاية الروعة بس نسي اسمه كان بغني في ذاك الزمن ويحي الحفلات كان بردد هذه الكلمات الحنينةومعبرة ايا امي انت يالحراير جوزتيني راجل الضراير اونا اوناالبيض سنونا مشينا لينا قعير ضرابة لقينامسيكين دهابا فارش كمه يقراء في كتابه ما اخدته قولو لي كدابة ياريت ياريت ياكبر او احد المشاركين يجتهد يجيب باقي الكلام وياريت لو مغني من اي من المغنين الرائعين اوحتي من فرقة ونتابع ها الخيط السحري الجميل من تراث نجهله ومالنا كذلك كونو بخير واهو قاااعدين في البوست المميز شكرا لكل من مرة من هنا
ازيك يا طارق، ايام جميلة قضيناها في بيتكم و ضل حيطتكم، برفقة الصحاب من بيتكم و حوالين بيتكم، من آل الجبلاب و جيرانهم، تحياتي لتوحيد و الاخوان ** شكرا استاذ كبر
10-19-2011, 00:20 AM
mohmed khalail mohmed khalail
تاريخ التسجيل: 06-14-2007
مجموع المشاركات: 4509
Quote: كبر والمتداخلين سلام حكي لي احد الاعمام انو في فنان شاب تشادي سوداني كان بترد عليهم في ميز الموظفين بنيالا كان صوته في غاية الروعة بس نسي اسمه كان بغني في ذاك الزمن ويحي الحفلات كان بردد هذه الكلمات الحنينةومعبرة ايا امي انت يالحراير جوزتيني راجل الضراير اونا اوناالبيض سنونا مشينا لينا قعير ضرابة لقينامسيكين دهابا فارش كمه يقراء في كتابه ما اخدته قولو لي كدابة ياريت ياريت ياكبر او احد المشاركين يجتهد يجيب باقي الكلام وياريت لو مغني من اي من المغنين الرائعين اوحتي من فرقة ونتابع ها الخيط السحري الجميل من تراث نجهله ومالنا كذلك كونو بخير واهو قاااعدين في البوست المميز شكرا لكل من مرة من هنا
غايتو ما عندك حل إلا الاستعانة بالأخ الفاتح ميرغني عشان يجيب باقي الكلام أخوك فضل الله خاطر
10-19-2011, 03:33 PM
باسط المكي باسط المكي
تاريخ التسجيل: 01-14-2009
مجموع المشاركات: 5473
العزيز فضل الله..حبابك يا صديقي كتر خيرك على المرور من هنا..ورفد المسامرة..و التي قطع شك ستفيد الكثيرين و الكثيرات.. الصديق مراهد النور..اخر عهدي به مدرسة كادقلي الثانوية..و اذكر عنه ذاكرته القوية و حفظ كثير من المأثورات الشعبية و التراثية.. حاولت البحث عنه في سنواتي الأخيرة في الخرطوم..و عرفت انه كان يقيم في ضاحية الشجرة..و في هذا المنتدى لا اعرف شخص من نواحي ابوجبيهة الإ اخونا و صديقنا ول ابا كانتونا ون..و يا ريت ناس ابوجبيهة يجيبوا لينا اخبار مراهد هذا.. معك ايضا ادعو الى مرور استاذنا و صديقنا فضيلي جماع..و هو من الذين عاصروا مدينة الأبيض في زمن يحتاج ان ينكتب الآن..
كبر
10-19-2011, 04:58 PM
Kabar Kabar
تاريخ التسجيل: 11-26-2002
مجموع المشاركات: 18537
الإحتفاء بمثل هذه الأشياء يا صديقي ليهو صلة كبيرة بقصة التخطيط الثقافي و التمثيل الثقافي في دار ام سودان..فالعاصمة في وقت ما كانت هي التي تتحكم في المزاج السوداني و تفرض اشيائها..وكت داك يا صديقي كان التراث اشبه باللغة الغريبة و المزاج الأغرب و لم يجد حظه من الذيوع و الإنتشار.. لذلك غبر تأريخ مجتمعات كتيرة و مبدعة في نواحي السودان عامة..
في زمن ما بعد الحداثة (زمن حضاري على مستوى كوكب الأرض)..الناس فطنت لمشكلة الثقافة العالية..و الفن من اجل الفن..و اصبحت الدعوة تتجه الى ضرورة افساح المجال للثقافة التي يعتقد البعض انها شعبية بالتعبير عن ذاتها وفق كل الأدوات و المواعين الممكنة..و من الباب ده نجزم بان كتابة تاريخ المدن السودانية عامة..و تاريخ المدن الكردفانية خاصة..وتاريخ مدينة ألأبيض على الوجه الأخص.. مثل هذه الأشياء ضرورة ملحة..واعتقد أن ابناء و بنات تلك المدن هم وحدهم من تقع عليهم مسئولية كتابة مثل ذلك التاريخ الإجتماعي و الثقافي..و بالتالي خلق جسر التواصل بين الأجيال.. حتى يعرف الفرد ذاته الإنسانية و طرق تكوينها..!
في مدينة كالقري (في مقاعطة ألبرتا/غرب كندا)..المدينة فيها كثير من شركات البترول التي تهز و ترز على مستوى العالم.. لكن حتى الآن لم يتخلوا عن عاداتهم و ماضيهم العريق.. مدينة يا فضل الله.. اسبوع كامل مشغولة بوضع تمثال..الجراد تتحدث..محطات الإذاعة تتحدث..محطات التلفزيون العديدة تتحدث..و عارف التمثال طلع شنو؟.. تمثال تور (اي والله) اصقع نصب في حديقة تحت مبنى احد تلك الشركات..! المقاطعة عندها مهرجان يقام سنويا.. اسمو الأستامبيد..و هذا المهرجان يمجد حياة الرعي و الرعاة (لأن المقاطعة اساسا كانت بلد كابويات)..هذا المهرجان.. اسميه (بيني و بين نفسي) يوم العرضة (العرضة الواحدة التي سمي عليها احد احياء امدرمان)..في هذا المهرجان.. الخيل ..البقر.. التيران .. بيفتحوا ليها شوارع المدينة الرئيسية..و الكائنات دي تعجبك بزهوها و خيلائها..و الأطرف.. يحلو ليها دايما تبعر في الشوراع النظيفة..و العالم متكيفة شديد خلاص..!
مثل هذه التمثلات الرمزية البسيطة ليها معانيها..و نحن ناس الخرتوم ما دايرين نودي ليهو بهائمنا عشان تبعر ليهم في شوارعهم.. لكن دايرين لينا فرقة في الميديا عشان تراثنا يظهر..و ممكن ينافس عالميا.. ظاهرة الحنين الى الماضي ..يبدو انها ظاهرة كونية..و برضك في بلد الخواجات دي الناس بتحن للماضي..ويتخيل لي جيلنا حضر عقاب الحاجات السمحة..عشان كده بنحاول نديها للناس الورانا..
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Kabar
mohmed khalail
البحيراوي
عائشة موسي السعيد
امينة عيسى
عصام دهب
الطيب شيقوق
صلاح غريبة
الغالى شقيفات
طارق الجبلابى
معتصم مصطفي الجبلابي
عبدالدين سلامه
تبارك شيخ الدين جبريل
أبوذر بابكر
الفاتح ميرغني
عبد الحميد المقابل
باسط المكي
Hamid Elsawi
فيس بوك
تويتر
انستقرام
يوتيوب
بنتيريست